ഇഞ്ചി
ഇഞ്ചി
ഇഞ്ചി
ഇഞ്ചി, കുരുമുളക് തുടങ്ങിയ സുഗന്ധവ്യഞ്ജനങ്ങളാല്‍ പ്രസിദ്ധമായ കേരളം ഉള്‍പ്പെടുന്ന പ്രദേശങ്ങള്‍ ആയിരുന്നു അറബികളെയും യൂറോപ്യന്മാരെയും നൂറ്റാണ്ടുകള്‍ക്ക് മുമ്പ് ഭാരതത്തിലേക്ക് ആകര്‍ഷിച്ചത്. ചുക്കില്ലാത്ത കഷായമില്ല എന്ന ചൊല്ല് കേള്‍ക്കാത്തവര്‍ വിരളം. ആയുര്‍വേദ വിധി പ്രകാരം സര്‍വ്വ ശ്രേഷ്ടമായ ഇഞ്ചിയുടെ ഔഷധഗുണം കൊണ്ടാകണം ആയുര്‍വേദ ആചാര്യന്മാര്‍ ഇതിനെ സംസ്കൃതത്തില്‍ മഹാഔഷധി എന്ന് വിളിച്ച് പോന്നത്. കേരളീയരുടെ ഒട്ടു മിക്ക ആഹാരങ്ങളിലും ഇഞ്ചി ചേര്‍ക്കുന്നുണ്ട്. കേരളത്തില്‍ വ്യാവസായികാടിസ്ഥാനത്തില്‍ തന്നെ ഇഞ്ചി കൃഷി ചെയ്യുന്നുണ്ട്. എങ്കിലും ഗാര്‍ഹികാവശ്യതിനുള്ള ഇഞ്ചി അധികം വളപ്രയോഗം ഇല്ലാതെ തന്നെ വീടുകളില്‍ ഉത്പാദിപ്പിക്കുന്നതാണ് ഉത്തമം.
കേരളം ഉള്‍പ്പെടുന്ന പശ്ചിമഘട്ട മേഖലയിലെ കാലാവസ്ഥയാണ് ഇഞ്ചിയുടെ വളര്‍ച്ചക്ക് അനുയോജ്യം. നീര്‍വാര്‍ച്ചയും ജൈവാംശം കൂടുതലും ഉള്ള മണ്ണാണ് ഇഞ്ചി വളര്‍ത്താന്‍ നല്ലത്. ഗൃഹപരിസരങ്ങളില്‍ ചെറിയ തവാരണകള്‍ ഉണ്ടാക്കി അതില്‍ ഇഞ്ചി നടാം. ഇത് കൂടാതെ മന്‍ ചട്ടികളിലും മണ്ണ് നിറച്ച ചാക്കുകളിലും വീട്ടാവശ്യങ്ങള്‍ക്ക് ഉള്ള ഇഞ്ചി ഉല്‍പ്പാദിപ്പിക്കാം. ചെറിയ മുകുളങ്ങളോട് കൂടിയ കിഴങ്ങുകള്‍ ആണ് നടാന്‍ അനുയോജ്യം. നട്ട് മൂന്നോ നാലോ മാസം കഴിഞ്ഞാല്‍ വളര്‍ച്ചയെത്തിയ ചെടിയുടെ കടഭാഗത്ത്‌ നിന്നും അല്പം മണ്ണ് നീക്കി ആവശ്യത്തിനുള്ള ഇഞ്ചി ശേഖരിച്ചു തുടങ്ങാം.
ഔഷധ ഉപയോഗങ്ങള്‍
- ചുക്കും ജീരകവും കൂടി പൊടിച്ചു പഞ്ചസാര ചേര്‍ത്ത് കഴിക്കുന്നത് ചുമക്കും ദഹന സംബന്ധമായ വയറു വേദനക്കും ഫലപ്രദമാണ്.
- ചുക്കും ഏലക്കയും വെളുത്തുള്ളിയും സമമെടുത്ത് കഷായം വെച്ച് 25 മില്ലി വീതം ദിവസം രണ്ടു നേരം കഴിച്ചാല്‍ കൃമി, ഓക്കാനം, വയറു വേദന, ദഹനക്കുറവ് എന്നിവ ശമിക്കും.
- അസഹനീയമായ ചെവി വേദന ഉള്ളപ്പോള്‍ ഇഞ്ചിനീര് നല്ലത് പോലെ അരിച്ചു അല്‍പ്പം ചൂടാക്കി രണ്ടോ മൂന്നോ തുള്ളി ചെവിയില്‍ ഒഴിച്ചാല്‍ വേദന ശമിക്കും.
- ഒരു ഗ്രാം ചുക്ക് പൊടി തേനില്‍ കുഴച്ച് ദിവസം മൂന്ന് നേരം വീതം കഴിച്ചാല്‍ ഇക്കിളിനു ശമനം ഉണ്ടാകും.
- ഇഞ്ചിനീര് വെണ്ണ നെയ്യില്‍ സേവിച്ചാല്‍ ചുമ മാറും.
- ഇഞ്ചിനീരും തേനും സമം ചേര്‍ത്ത് കവിള്‍ കൊണ്ടാല്‍ പല്ലുവേദന ശമിക്കും.
- ഇഞ്ചിയും ശര്‍ക്കരയും ചേര്‍ത്ത് കഴിച്ചാല്‍ ഒച്ചയടപ്പ്‌ മാറും.
- തിപ്പലിയും ഇഞ്ചിയും ചേര്‍ത്ത് കാച്ചിയ പാല്‍ കുടിച്ചാല്‍ ഒച്ചയടപ്പ്‌ മാറും.
- ഇഞ്ചി കഷായത്തില്‍ മലരും ഇന്തുപ്പും തേനും ചേര്‍ത്ത് കഴിച്ചാല്‍ ഭക്ഷണത്തിന് രുചിയില്ലായ്മ മാറുകയും വിശപ്പ് ഉണ്ടാകുകയും ചെയ്യും.
- ഇഞ്ചിനീര്, കല്‍ക്കണ്ടം ചേര്‍ത്ത് കഴിക്കുന്നത് ദഹന സംബന്ധമായ അസുഖങ്ങള്‍ക്ക് നല്ലതാണ്.
- ചുക്ക്, കുരുമുളക്, തിപ്പലി ഇവ സമം ചേര്‍ത്ത് കഷായം വെച്ച് കഴിച്ചാല്‍ ചുമ , പനി, ജലദോഷം എന്നിവ ശമിക്കും.
- തലവേദനക്ക് ചന്ദനവും ചുക്കും ചേര്‍ത്ത് അരച്ച് നെറ്റിയില്‍ പുരട്ടുക.
- ചുക്കും ആവണക്കിന്‍ വേരും സമം ചേര്‍ത്ത് കഷായം വെച്ച് കുടിച്ചാല്‍ സന്ധിവേദന മാറും.
- അര ടീസ്പൂണ്‍ ഇഞ്ചിനീരില്‍ പകുതി വേവിച്ച മുട്ടയും തേനും ചേര്‍ത്ത് ഒരു മാസം സേവിച്ചാല്‍ ലൈംഗിക ദൗര്‍ബല്യങ്ങള്‍ മാറും.
- ഇഞ്ചി, ഗ്രാമ്പൂ, ഉപ്പ് ഇവ ചേര്‍ത്ത് ചവച്ചിറക്കുന്നത് നാവിന്റെയും അണ്ണാക്കിന്‍റെയും മാംസപേശികള്‍ക്ക് ബലം നല്‍കും.
- ഭക്ഷണശേഷം ഒരു കഷണം ഇഞ്ചി ചവച്ചിറക്കുന്നത് ദഹനക്കേട്, വയറ്റിലും കുടലിലും ഉണ്ടാകുന്ന അണുബാധ, വായുദോഷം എന്നിവക്ക് നല്ലതാണ്.
കടപ്പാട് : കേരള സംസ്ഥാന ഔഷധ സസ്യ ബോര്‍ഡ്‌
കൂടുതല്‍ വിവരങ്ങള്‍ക്ക് : Kerala State Medicinal Plants Board
അവസാനം പരിഷ്കരിച്ചത് : 1/28/2020
വിവിധ തരത്തിലുള്ള സുഗന്ധവ്യഞ്ജന വിളകളെ കുറിച്ചുള്ള...
