Skip to content. | Skip to navigation

Vikaspedia

പങ്കുവയ്ക്കുക
Views
  • നില എഡിറ്റ്‌ ചെയുവാൻ വേണ്ടി തയ്യാ

കുട്ടികളിലെ രോഗങ്ങളും ചികിത്സയും

കുട്ടികളിലെ പലവിധ രോഗങ്ങളും ചികിത്സയും

കുട്ടികളിലെ എയ്ഡ്സും, ചികിത്സയും

 

ഡിസംബര്‍ ഒന്നാണ് ലോക എയ്ഡ്സ് ദിനമായി ആചരിച്ച് വരുന്നത്. എയ്ഡ്സ് പകരുന്ന വഴികള്‍, പ്രതിരോധമാര്‍ഗ്ഗങ്ങള്‍, ചികിത്സ എന്നിവയെക്കുറിച്ച് രാജ്യാന്തര തലത്തില്‍ അവബോധമുണ്ടാക്കുക, രോഗത്തെക്കുറിച്ചുള്ള തെറ്റിദ്ധാരണകള്‍ നീക്കുക, എയ്ഡ്സ് പോരാട്ടത്തില്‍ രാജ്യാന്തര സഹകരണം ഉറപ്പുവരുത്തുക എന്നിവ ലക്ഷ്യം വച്ചാണ് എല്ലാ വര്‍ഷവും ലോക എയ്ഡ്സ് ദിനം ആചരിക്കുന്നത്. സുരക്ഷിതമല്ലാത്ത ലൈംഗിക ബന്ധങ്ങള്‍, സുരക്ഷാ മാനദണ്ഡങ്ങള്‍ പാലിക്കാതെ രക്തം സ്വീകരിക്കുക, ഒരിക്കല്‍ ഉപയോഗിച്ച സിറിഞ്ചുകള്‍ പിന്നേയും ഉപയോഗിക്കുക എന്നിങ്ങനെയൊക്കെയാണ് പ്രധാനമായും എയ്ഡ്സ് പകരുന്നത്.

രോഗിണിയായ അമ്മയില്‍ നിന്ന് കുഞ്ഞിലേക്ക് രക്തം വഴിയും, ഏറ്റവും അധികം മുലപ്പാല്‍ വഴിയും, രക്തത്തിലെ കമ്പോണന്റുകള്‍ വഴിയും, ആശുപത്രി സംബന്ധമായ സിറിഞ്ച്, സര്‍ജറി ഉപകരണങ്ങള്‍ വഴിയും, സെക്ഷ്വല്‍ കോണ്ടാക്റ്റ് വഴിയും, കുത്തിവയ്ക്കുന്ന മരുന്നുകള്‍ വഴിയുമെല്ലാം എയ്ഡ്സ് ബാധയുണ്ടാകാറുണ്ട്. കൂടുതലും പ്രസവ സമയത്തും, മുലപ്പാലിലൂടെയുമാണ് ഇത് പകരുന്നത്.

അമ്മയില്‍ നിന്ന് കുഞ്ഞിലേക്കുള്ള രോഗവ്യാപന സാധ്യതയെ ART വഴി ഒരുപരിധി വരെ കുറയ്ക്കാന്‍ സാധിക്കും. എച്ച് ഐ വി വൈറസിനെ നശിപ്പിക്കുന്ന മരുന്ന് സഞ്ചയത്തെ വിളിക്കുന്ന പേരാണ് ART. അമ്മ രോഗിണിയാണെങ്കില്‍ ഗര്‍ഭാവസ്ഥ മുതല്‍ക്കേ ART അഥവാ ആന്റി റിട്രോവൈറല്‍ തെറാപ്പിയില്‍ ആയിരിക്കും. ജനനശേഷം കുഞ്ഞിനും അനുയോജ്യമായ ART തുടങ്ങുകയും ചെയ്യും. പെട്ടെന്ന് തന്നെ മ്യൂട്ടേഷന്‍ വന്ന് പ്രതിരോധശേഷി വരുന്നതാണ് എച്ച്ഐവി വൈറസിന്റെ ശക്തി. അതുകൊണ്ട് തന്നെ ഒരു തരം മരുന്ന് മാത്രം ഉപയോഗിക്കാതെ പല മെക്കാനിസത്തിലൂടെ വര്‍ക്ക് ചെയ്യുന്ന മരുന്നുകള്‍ (സാധാരണയായി മൂന്നു തരം വ്യത്യസ്ത മരുന്നുകള്‍) ഒരുമിച്ച് കൊടുക്കുകയാണ് ചെയ്യുന്നത്. ഈ മരുന്നുകള്‍ എത്ര വച്ച്, എപ്പോള്‍, അതിന് ഇഫക്റ്റ് ഇല്ലെങ്കില്‍ പിന്നേത് എന്നൊക്കെയുള്ള ഡീറ്റെയ്ല്‍ഡ് ചികിത്സാ പദ്ധതിയാണ് ART. ഇതിനെ HAART (Highly Active ART) എന്നും പറയാറുണ്ട്‌. സിഡോവുഡിന്‍, ലാമിവുഡിന്‍, അബകാവിര്‍, റിട്ടൊനാവിര്‍ എന്നിവയാണ് സാധാരണയായി ഇതിനായി ഉപയോഗിക്കുന്ന മരുന്നുകള്‍.

ഒരിക്കല്‍ ശരീരത്തെ ബാധിച്ച് കഴിഞ്ഞാല്‍ മരുന്നുകളിലൂടെ ആയുസ്സ് കുറച്ച് കൂടെ നീട്ടി കൊണ്ടുപോകാം എന്നല്ലാതെ പൂര്‍ണ്ണമായും രോഗമുക്തി ലഭിക്കുകയില്ല എന്നതാണ് ഈ രോഗത്തിന്റെ പ്രത്യേകത. രോഗം പൂര്‍ണ്ണമായും ഭേദമാക്കുന്നതിനായുള്ള മരുന്നുകള്‍ കണ്ടുപിടിക്കുന്നതിന് വേണ്ടി ധാരാളം പരീക്ഷണങ്ങള്‍ ലോകത്തിന്റെ വിവിധ ഭാഗത്ത് നടക്കുന്നുണ്ട്. കണ്ടുപിടുത്തങ്ങളുടെ കാര്യത്തില്‍ ശുഭകരമായ പല വാര്‍ത്തകളും വരുന്നുണ്ട്. ഇന്നല്ലെങ്കില്‍ നാളെ വിപ്ലവകരമായ കണ്ടുപിടുത്തം നടക്കും എന്നുതന്നെയാണ് ശാസ്ത്രലോകവും പ്രത്യാശിക്കുന്നത്. നമുക്കും അങ്ങനെത്തന്നെ കരുതാം.

കുട്ടികളിലെ വിശപ്പില്ലായ്മ

കുട്ടി ഒന്നും കഴിക്കുന്നില്ല… മിക്ക അമ്മമാരുടെയും പരാതിയാണിത്. എത്ര നിര്‍ബന്ധിച്ചാലും ഭക്ഷണം കഴിക്കാന്‍ ചിലപ്പോള്‍ മക്കള്‍ തയാറാകില്ല. മക്കളെ ഭക്ഷണം കഴിപ്പിക്കുന്നത് യുദ്ധത്തിന് സമമാണ് പല വീടുകളിലും. കുട്ടിക്കാലത്ത് കൃത്യമായി ഭക്ഷണം കഴിച്ചില്ലെങ്കില്‍ പല ആരോഗ്യപ്രശ്‌നങ്ങളുമുണ്ടാകും. കുട്ടികളുടെ വിശപ്പില്ലായ്മയും അവ പരിഹരിക്കാനുള്ള മാര്‍ഗങ്ങളും നോക്കാം.

സാധാരണ സംഭവം

രണ്ടു മുതല്‍ എട്ടു വയസുവരെയുള്ള കുട്ടികളില്‍ വിശപ്പില്ലായ്മയും ഭക്ഷണം കഴിക്കാനുള്ള മടിയും സാധാരണ കണ്ടുവരാറുണ്ട്. മുലപ്പാല്‍ കുടിക്കുന്ന കാലത്താണെങ്കില്‍ ഇതു വളരെ സാധാരണവുമാണ്. ആവശ്യമുള്ള പോഷകങ്ങള്‍ മുലപ്പാലിലൂടെ ലഭിക്കുന്നുണ്ട്. ഇതിനാല്‍ വലിയ ടെന്‍ഷന്റെ ആവശ്യമില്ല. പഴങ്ങളും പോഷകസമ്പുഷ്ടമായ ഭക്ഷണങ്ങളും ഈ സമയത്ത് നല്‍കുക. ഭക്ഷണങ്ങള്‍ കുട്ടികള്‍ക്ക് ഇഷ്ടമാകുന്ന തരത്തില്‍ തയാറാക്കി നല്‍കണം. പഴങ്ങളും പച്ചക്കറിലും ചേര്‍ത്ത് തയാറാക്കുന്ന സാലഡ്, ജ്യൂസ് എന്നിവ ഭക്ഷണം കഴിക്കാന്‍ മടിക്കുന്ന കുട്ടികള്‍ക്കു നല്‍കാം.

പല കാരണങ്ങള്‍

ഭക്ഷണം നന്നായി കഴിച്ചില്ലെങ്കിലും ചിലപ്പോള്‍ കുട്ടികള്‍ക്ക് പ്രശ്‌നങ്ങളൊന്നുമുണ്ടാകില്ല. ആവശ്യത്തിന് വളര്‍ച്ച, തൂക്കം, ഉത്സാഹം എന്നിവയുണ്ടെങ്കില്‍ വിശപ്പില്ലായ്മ ഗൗരവമായി എടുക്കേണ്ടതില്ല. വിളര്‍ച്ച, രക്തക്കുറവ്, വിരശല്യം എന്നിവയുടെ ലക്ഷണമായും വിശപ്പില്ലായ്മയുണ്ടാകാം. ഈ രോഗങ്ങളുടെ ലക്ഷണമുണ്ടെങ്കില്‍ കുട്ടികളെ ഡോക്ടരുടെ അടുത്തെത്തിക്കണം. എന്നാല്‍ സ്‌കൂളില്‍ പഠിക്കുന്ന കുട്ടികള്‍ക്ക് മറ്റു കാരങ്ങള്‍ കൊണ്ടും വിശപ്പില്ലായ്മ അനുഭവപ്പെടാം. പരീക്ഷ, പഠിത്തം ഇവയുടെ ഉത്കണ്ഠ പ്രകടമാകുന്നത് വിശപ്പില്ലായ്മയുടെ രൂപത്തിലാകാം. പെട്ടെന്നുള്ള വിശപ്പില്ലായ്മ അപൂര്‍വ്വമായി ഹൃദയരോഗങ്ങള്‍, ന്യൂമോണിയ, ലുക്കീമിയ തുടങ്ങിയ മാരക രോഗങ്ങളുടെ ലക്ഷണമാകാറുണ്ട്.

ഭക്ഷണം കഴിപ്പിക്കല്‍ തന്ത്രപൂര്‍വം

കഥ പറഞ്ഞാണ് പണ്ടു കാലത്ത് മുത്തശ്ശിമാര്‍ കുട്ടികളെ ഭക്ഷണം കഴിപ്പിച്ചിരുന്നത്.
ആഹാരം കഴിക്കാന്‍ വിമുഖതയുള്ള കുട്ടിക്ക് ആസ്വാദ്യകരമായ രീതിയില്‍ ഭക്ഷണം നല്‍കുകയാണെങ്കില്‍ മിക്കവാറും ഫലം കണ്ടേക്കാം. കഥപറഞ്ഞോ സമപ്രായക്കാരായ കുട്ടികളോടൊപ്പമോ ഭക്ഷണം കഴിക്കുന്നത് മക്കള്‍ക്കും താത്പര്യമായിരിക്കും. അവര്‍ അറിയാതെ തന്നെ ആവശ്യത്തിനു ഭക്ഷണം കഴിക്കാന്‍ ഇത് ഉപകരിക്കും.

കുട്ടികളുടെ കണ്ണുകളുടെ സംരക്ഷണം

മൊബൈലിലും കംപ്യൂട്ടറിലും സ്ഥിരമായി കളിച്ച് നിരവധി പ്രശ്‌നങ്ങളാണ് നമ്മുടെ കുട്ടികളുടെ കണ്ണുകള്‍ക്കിപ്പോള്‍. വളരെ ചെറിയ പ്രായം മുതല്‍ കണ്ണട ഉപയോഗിക്കാന്‍ തുടങ്ങുന്നു പുതിയ തലമുറ. കണ്ണിനുണ്ടാകുന്ന പ്രശ്‌നങ്ങള്‍ ഉടന്‍ മനസിലാക്കിയിട്ടില്ലെങ്കില്‍ വലിയ ആരോഗ്യപ്രശ്‌നങ്ങളുണ്ടാകും. മാതാപിതാക്കളും ഇക്കാര്യത്തില്‍ ശ്രദ്ധ പുലര്‍ത്തണം.

കംപ്യൂട്ടറും മൊബൈലും പ്രധാന വില്ലന്‍

കംപ്യൂട്ടറും മൊബൈലുമാണിപ്പോള്‍ കുട്ടികളുടെ കൂട്ടുകാര്‍. ഏതു നേരവും ഇവയില്‍ കളിച്ചു കൊണ്ടിരിക്കുന്നത് കണ്ണിന് പ്രശ്‌നമാണ്. വളര്‍ന്നു വരുന്ന സമയത്ത് ഇവയില്‍നിന്നുള്ള പ്രകാശം സ്ഥിരമായി കണ്ണിനേല്‍ക്കുന്നത് നല്ലതല്ല. മൂന്നുവയസു വരെ കുട്ടികള്‍ക്ക് കംപ്യൂട്ടറും മൊബൈലും കളിക്കാന്‍ നല്‍കരുത്. ടിവി കാണലിനും നിയന്ത്രണം വേണം. കംപ്യൂട്ടറും ടിവിയും ഉപയോഗിക്കുമ്പോള്‍ ഇടയ്ക്ക് തണുത്ത വെള്ളത്തില്‍ മുഖം കഴുകാന്‍ കുട്ടികളോട് നിര്‍ദേശിക്കണം. ഇരുട്ടത്തിരുന്നുള്ള ഇവയുടെ ഉപയോഗം അനുവദിക്കരുത്.

ഭക്ഷണത്തിലും ശ്രദ്ധ വേണം

പച്ചക്കറികള്‍, പഴം, ഇലക്കറികള്‍ എന്നിവ കണ്ണിന്റെ ആരോഗ്യത്തിന് അത്യാവശ്യമാണ്. വളര്‍ന്നു വരുന്ന പ്രായത്തില്‍ ഇവയെല്ലാം നിര്‍ബന്ധമായും കുട്ടികള്‍ക്ക് നല്‍കണം. ചീര, മുരിങ്ങ തുടങ്ങിയ ഇലക്കറികള്‍ കണ്ണുകളുടെ ആരോഗ്യത്തിന് ഏറെ നല്ലതാണ്. ന്യൂഡില്‍സും ബര്‍ഗറുമെല്ലാം കുട്ടികള്‍ സ്ഥിരമാക്കിയതോടെയാണ് കണ്ണുകള്‍ക്ക് ആരോഗ്യപ്രശ്‌നങ്ങളും തുടങ്ങിയത്. ഇത്തരം ഭക്ഷണങ്ങള്‍ക്ക് അവധി കൊടുത്തു നമ്മുടെ നാട്ടില്‍ സുലഭമായി ലഭിക്കുന്ന ഇലക്കറികളും പച്ചക്കറികളും കുട്ടികള്‍ക്കു കൊടുക്കൂ.

നിങ്ങളുടെ കുട്ടിയുടെ കണ്ണിന് പ്രശ്‌നമുണ്ടോ…?

കണ്ണിന് എന്തെങ്കിലും പ്രശ്‌നമുണ്ടെങ്കില്‍ ആദ്യമൊന്നും കുട്ടികള്‍ക്കും മനസിലാവണമെന്നില്ല. തലവേദന, കണ്ണിന് ചൊറിച്ചില്‍, കാഴ്ച മങ്ങല്‍ തുടങ്ങി നിരവധി ലക്ഷണങ്ങളാണ് വിവിധ അസുഖങ്ങള്‍ക്കുള്ളത്. രക്ഷിതാക്കള്‍ കൃത്യമായി ശ്രദ്ധിച്ചാല്‍ ഇക്കാര്യം മനസിലാകാം. കാഴ്ചയ്ക്ക് പ്രശ്‌നമുണ്ടെങ്കില്‍ കുട്ടികള്‍ താഴെ പറയുന്ന ലക്ഷണങ്ങള്‍ കാണിക്കും.

1. കുട്ടികള്‍ക്ക് പതിവായി തലവേദന വരുകയും കണ്ണ് തിരുമ്മുകയും ചെയ്യുന്നത് കാഴ്ചയ്ക്ക് പ്രശ്‌നമുള്ളതിന്റെ സൂചനയാണ്. വൈകുന്നേരം തലവേദന സ്ഥിരമായി അനുഭവപ്പെട്ടാല്‍ ഉടന്‍ തന്നെ നേത്രരോഗ വിദഗ്ധനെ കാണിക്കണം.

2. ടിവി കാണുമ്പോഴും പുസ്തകം വായിക്കുമ്പോഴും കുട്ടി ഇടയ്ക്ക് കണ്ണടയ്ക്കുന്നുണ്ടോ…? തല ചെരിച്ച് പിടിച്ചു നോക്കുന്നുണ്ടോ…? ഇവയെല്ലാം കാഴ്ചയ്ക്ക് പ്രശ്‌നമുള്ളതിന്റെ ലക്ഷണങ്ങളാണ്.

3. കണ്ണിന് പ്രശ്‌നമുള്ള കുട്ടികള്‍ പുസ്തകങ്ങള്‍ ചേര്‍ത്ത് പിടിച്ചു വായിക്കും. ടിവിയോട് വളരെ അടുത്തിരിക്കും.

4. നല്ല ലൈറ്റുള്ള സ്ഥലത്ത് നിന്നും പ്രകാശം കുറഞ്ഞിടത്തേക്ക് എത്തുമ്പോള്‍ കുത്തുകള്‍ കാണുന്നു പോലെ ചില കുട്ടികള്‍ക്ക് അനുഭവപ്പെടാം. ഇക്കാര്യം കുട്ടികള്‍ പറഞ്ഞാല്‍ ഉടന്‍ തന്നെ ചികിത്സ തേടണം.

5. പതിവായി കണ്ണ് ചുവക്കുന്നതും ശ്രദ്ധിക്കണം. വിറ്റാമിനുകളുടെ കുറവും മറ്റുമാകും കാരണം.

മഴക്കാലത്ത് കുഞ്ഞുങ്ങള്‍ക്കുണ്ടാകുന്ന ചര്‍മ്മ രോഗങ്ങള്‍

പ്രതിവിധികളും പരിഹാരങ്ങളും

അമ്മമാര്‍ ശ്രദ്ധിക്കേണ്ടത്

കുഞ്ഞിന്റെ ചര്‍മ്മത്തിന് വളരെയധികം ശ്രദ്ധ ലഭിക്കേണ്ട സമയമാണ് മഴക്കാലം., പ്രത്യേകിച്ച് അഞ്ച് വയസ്സില്‍ താഴെയുള്ള കുട്ടികള്‍ക്ക്. പല ചര്‍മ്മ രോഗങ്ങളും മഴക്കാലത്ത് കൂടുതലായി കാണപ്പെടുന്നു. ഇതിന് കാരണം മഴക്കാലത്ത് അന്തരീക്ഷത്തിലേയും ചര്‍മ്മത്തിലേയും ഈര്‍പ്പത്തിന്റെ അളവ് കൂടുന്നത് അണുക്കള്‍ പെരുകുവാന്‍ കാരണമാകുന്നു എന്നതാണ്. മഴക്കാലത്ത് കുട്ടികളെ ബാധിക്കുന്ന ചര്‍മ്മരോഗങ്ങളില്‍ ഏറ്റവും പ്രധാനം പലതരം അണുബാധകളാണ്.

അണുബാധകള്‍

കുഞ്ഞിന്റെ ചര്‍മ്മത്തിനെ ബാധിക്കുന്ന അനുബാധകളില്‍ പ്രധാനപ്പെട്ടവ വൈറസ് (Viral Infections), ബാക്ടീരിയ (Bacterial Infections), ഫംഗസ് (Fungal Infections) എന്നിവയാണ്. ഇവയില്‍ ഏറ്റവും പെട്ടെന്ന് പകരാന്‍ സാധ്യതയുള്ളത് വിരല്‍ അനുബാധകകളാണ്. മഴക്കാലത്ത് കുഞ്ഞുങ്ങളില്‍ ഏറ്റവും സാധാരണയായി കാണപ്പെടുന്ന വൈറല്‍ അണുബാധയാണ്‌ hand foot & mouth disease (HFMD). ഇത് അഞ്ച് വയസ്സില്‍ താഴെയുള്ള കുട്ടികളെയാണ് ഏറ്റവും കൂടുതലായി ബാധിക്കുന്നത്. നഴ്സറി സ്കൂളില്‍ പോകുന്ന കുട്ടികളുടെ ഇടയില്‍ ഇത് വരെ പെട്ടെന്ന് പകരുന്നു. ഉമിനീരിലൂടെയും മലത്തിലൂടെയുമാണ് ഇത് പ്രധാനമായും പകരുന്നത്. പനി, തൊണ്ടവേദന, വായില്‍ പുണ്ണ്‍, ഭക്ഷണം കഴിക്കാന്‍ വിസമ്മതിക്കുക എന്നുവയാണ് തുടക്കത്തിലുള്ള ലക്ഷണങ്ങള്‍. തുടര്‍ന്ന്‍, കൈവെള്ളയിലും പടങ്ങളിലും ചുവപ്പ് നിറമുള്ള, വെദാനയുള്ള വെള്ളം നിറഞ്ഞ കുമിളകള്‍ പ്രത്യക്ഷപ്പെടുന്നു. ചിലപ്പോള്‍ കൈകാല്‍ മുട്ടുകളിലും മറ്റു ശരീര ഭാഗങ്ങളിലും ചിക്കന്‍പോക്സ് പോലെ കാണപ്പെടാറുണ്ട്. സാധാരണ ഗതിയില്‍ ഇത് 7 ദിവസം വരെ നീണ്ട് നില്‍ക്കാം.

പ്രതിരോധം

ഈ രോഗത്തിന് പ്രതിരോധ കുത്തിവയ്പ്പുകള്‍ ലഭ്യമല്ല. എന്നാല്‍ ചില കാര്യങ്ങളില്‍ ശ്രദ്ധ ചെലുത്തിയാല്‍ രോഗം വരുന്നത് ഒരു പരിധി വരെ തടയാന്‍ സാധിക്കും.

  • ടോയ്ലറ്റില്‍ പോയ ശേഷവും, ഭക്ഷണം കഴിക്കുന്നതിന് മുമ്പും സോപ്പും വെള്ളവും ഉപയോഗിച്ച് നന്നായി കൈ കഴുകുക.
  • കൈ വിരലുകള്‍, കളിപ്പാട്ടങ്ങള്‍ എന്നിവ വായില്‍ ഇടാതെ കഴിവതും ശ്രദ്ധിക്കുക.
  • അണുനാശിനി ഉപയോഗിച്ച് നിലം, കളിപ്പാട്ടങ്ങള്‍ എന്നിവ വൃത്തിയാക്കുക.
  • രോഗലക്ഷണങ്ങള്‍ കാണുന്ന കുട്ടികളെ അസുഖം പൂര്‍ണ്ണമായും സുഖപ്പെടും വരെ സ്കൂളില്‍ വിടാതിരിക്കുക.
ഫംഗസ് മൂലമുള്ള അണുബാധകള്‍

മഴക്കാലത്ത് ചര്‍മ്മത്തിലെ ഈര്‍പ്പം കൂടുന്നത് കൊണ്ടും, ഈര്‍പ്പമുള്ള വസ്ത്രങ്ങള്‍ ധരിക്കുന്നത് കൊണ്ടും കുട്ടികളില്‍ ഫംഗസ് അഥവാ പൂപ്പല്‍ ബാധ മൂലമുള്ള ചര്‍മ്മ രോഗങ്ങള്‍ കൂടുതലായി കാണപ്പെടുന്നു. കാല്‍ വിരലുകളുടെ ഇടയിലും ഗുഹ്യഭാഗങ്ങളിലുമാണ് ഇത് കൂടുതലായി കാണപ്പെടുക. അസഹ്യമായ ചൊറിച്ചിലുള്ള ചുവന്ന പാളികളായാണ്‌ ഇത് കാണപ്പെടുന്നത്. ഉടന്‍ ചികിത്സിച്ച് ഭേദപ്പെടുത്തിയില്ലെങ്കില്‍ ഇത് ശരീരത്തിന്റെ മറ്റു പല ഭാഗങ്ങളിലേക്കും മറ്റുള്ളവരിലേക്കും പകരാന്‍ സാധ്യതയുണ്ട്.

മഴക്കാലത്ത് കുട്ടികളില്‍ വളരെ സാധാരണയായി കാണപ്പെടുന്ന മറ്റൊരു ചര്‍മ്മ രോഗമാണ് കൊത്തും മറ്റു പ്രാണികളും കടിക്കുനന്ത് മൂലമുള്ള അലര്‍ജി (Papular Urticaria). അസഹ്യമായ ചൊറിച്ചിലോടുകൂടിയ ചുവന്നു തടിച്ച പാടുകലായി കൈകാലുകളുടെ മുട്ടിന് താഴേക്കാണ് ഇത് സാധാരണയായി കാണപ്പെടുക. ചൊറിച്ചില്‍ മൂലം മുറിവുകള്‍ പഴുക്കുവാനുള്ള സാധ്യത കൂടുതലാണ്.

സ്കൂളില്‍ പോകുന്ന കുട്ടികളില്‍ കാണപ്പെടുന്ന മറ്റൊരു പ്രധാന ചര്‍മ്മ രോഗമാണ് കാലിലെ പടം വിണ്ടുകീറല്‍ (Fore Foor Eczema). ഇതും മഴക്കാലത്ത് കൂടുതലാകാന്‍ സാധ്യതയുണ്ട്. കാലിലെ വിള്ളലിലൂടെ മഴവെള്ളത്തില്‍ നിന്നും അണുബാധ കയറി പഴുപ്പ് വരാനുള്ള സാധ്യത ഏറെയാണ്‌.

മഴക്കാലത്തും ആരോഗ്യമുള്ള ചര്‍മ്മത്തിന് ശ്രദ്ധിക്കേണ്ട കാര്യങ്ങള്‍
  1. കൈകാലുകള്‍ വൃത്തിയായി സൂക്ഷിക്കുക. മഴയത്ത് പുറത്ത് പോയി വന്നാല്‍ കൈകാലുകള്‍ സോപ്പും വെള്ളവും ഉപയോഗിച്ച് കഴുകിയ ശേഷം ടവല്‍ ഉപയോഗിച്ച് ഉണക്കി വയ്ക്കുക. ചര്‍മ്മ രോഗമുള്ള കുട്ടികള്‍ ഡോക്ടര്‍ നിര്‍ദ്ദേശിക്കുന്ന വീര്യം കുറഞ്ഞ സോപ്പുകള്‍ ഉപയോഗിക്കുന്നത് നല്ലതാണ്.
  2. മഴവെള്ളം കെട്ടിനില്‍ക്കുന്ന സ്ഥലങ്ങളില്‍ കുട്ടികളെ കളിക്കാന്‍ അനുവദിക്കാതിരിക്കുക.
  3. കൊതുക് കറിയെ പ്രതിരോധിക്കാനുള്ള മാര്‍ഗ്ഗങ്ങള്‍ സ്വീകരിക്കുക.
  4. തിളപ്പിച്ചതോ ഫില്‍ട്ടര്‍ ചെയ്തതോ ആയ വെള്ളം മാത്രം കുടിക്കാന്‍ ഉപയോഗിക്കുക. തിളപ്പിച്ച വെള്ളം 24 മണിക്കൂറിനുള്ളില്‍ ഉപയോഗിക്കുക.
  5. മഴക്കാലത്ത് ക്ജാല്‍ വിരലുകള്‍ ഇടുങ്ങി നില്‍ക്കുന്ന പാദരക്ഷകള്‍ (ഷൂസ്, സോക്സ്‌) കഴിവതും ഒഴിവാക്കുക.
  6. വരണ്ട ചര്‍മ്മം, പാഠം വിണ്ടുകീറല്‍ എന്നീ പ്രശ്നങ്ങളുള്ള കുട്ടികള്‍ മോയ്സ്ച്വറൈസിംഗ് കരീം ഉപയോഗിക്കുക.

ഡോ.ജെന്നി മാത്യു
DVD, MD, DNB
Lisa Skin Clinic, Calicut

ബാലരോഗങ്ങള്‍ പ്രതിരോധമാര്‍ഗ്ഗങ്ങള്‍

ശാരീരികവും മാനസികവും ബുദ്ധിപരവും സാമൂഹികപരവുമായി ഒരു കുട്ടിക്ക്‌ ആരോഗ്യമുണ്ടാവാനുള്ള ചുറ്റുപാടിലല്ല ഇന്നത്തെ കുട്ടികള്‍ ജീവിക്കുന്നത്. ഏതു നിമിഷവും രോഗിയാവാനുള്ള സാധ്യതകള്‍ നിറഞ്ഞ, സഹിക്കാനാവാത്ത വിധം മലിനീകരിക്കപ്പെട്ട, ഒരു കാലത്താണ് ഇന്നത്തെ കുഞ്ഞുങ്ങള്‍ കഴിയുന്നത്. ബാലകാല്യത്തെ ആരിഗ്യം സഹ്രിയായ രീതിയിലാവണമെങ്കില്‍ ആരോഗ്യത്തെ കുറിച്ചുള്ള ശരിയായ അറിവുകള്‍ കുട്ടിക്ക്‌ പഠിപ്പിച്ച് കൊടുക്കേണ്ടതുണ്ട്. പുതിയ പാഠപുസ്തകങ്ങളില്‍ ആയുസ്സിന്റെ ശാസ്ത്രമായ ആയുര്‍വ്വേദത്തിന് പ്രാധ്യാന്യം നല്‍കി ഉള്‍ക്കൊള്ളിച്ചിരിക്കുന്നത് സ്വാഗതാര്‍ഹമായ ഒരു കാര്യമാണ്. ശുചിത്വബോധം വീട്ടില്‍ നിന്നുതന്നെ കുട്ടി പഠിക്കണം. വിദ്യാലയത്തില്‍ ആരോഗ്യ ബോധവത്കരണത്തില്‍ ആധുനിക ചികിത്സക്കൊപ്പം ആയുര്‍വ്വേദരീതിയില്‍ എങ്ങനെ ആരോഗ്യം ചെറുപ്പക്കാലത്ത് സംരക്ഷിക്കാമെന്ന് കുട്ടിയെ പഠിപ്പിക്കണം, ശീലിപ്പിക്കണം. കുട്ടിയുടെ ആരോഗ്യസംരക്ഷണം ആരോഗ്യ പുനസ്ഥാപനം, ആരോഗ്യപരിപോഷണം എന്നിവയ്ക്ക് പ്രാധാന്യം നല്കിവേണം വിദ്യാലയ ആരോഗ്യപദ്ധതിക്ക്‌ രൂപം നല്‍കാന്‍. പകര്‍ച്ചവ്യാധികള്‍, ശുദ്ധജല്‍ ലഭ്യത വിദ്യാലയത്തിന്റെ സ്ഥാനാം, ശൌചാലയത്തിന്റെ വരുത്തി, വായുസഞ്ചാരം, പോഷകാഹാര വിതരണം, വ്യായാമം, കായിക പരിശീലനം, ആരോഗ്യ ശീലങ്ങള്‍, രോഗപ്രതിരോധ അറിവുകള്‍, ശുചിത്വം എന്നിവയ്ക്ക് പ്രത്യേകം പ്രാധാന്യം നല്‍കേണ്ടത നമ്മുടെ കുട്ടികളുടെ ആരോഗ്യ സംരക്ഷണത്തില്‍ താത്പര്യമുള്ള അദ്ധ്യാപകര്‍, രക്ഷകര്‍ത്താക്കള്‍, ജനപരതിനിധികള്‍ എന്നിവരുടെ കടമയാണ്.

കീടനാശിനികള്‍, ഘനലോഹങ്ങള്‍, മലിനീകരിക്കപ്പെട്ട വായു, ജലം എന്നിവയുമായുള്ള ഗര്‍ഭസ്ഥശിശുവിന്റെ അമിത സമ്പര്‍ക്കം കുട്ടിയുടെ ആരോഗ്യസ്ഥിതിയെയും വളര്‍ച്ചയേയും പ്രതികൂലമായി ബാധിക്കുന്നതാണ്. ലോകാരോഗ്യ സംഘടന മേല്‍ സൂചിപ്പിച്ച വിഷയത്തില്‍ ശാസ്ത്രീയ പഠനങ്ങള്‍ നടത്തിയിട്ടുണ്ട്. ലെഡ്‌ അടങ്ങിയ കളിക്കോപ്പുകള്‍ കുട്ടികളില്‍ ആരോഗ്യ പ്രശ്നങ്ങള്‍ സൃഷ്ടിക്കുന്നുണ്ട്. രാസവസ്തുക്കളടങ്ങിയ ദാഹശമനികള്‍, സ്വാദ്‌ വര്‍ദ്ധിപ്പിക്കാനും നിറം കൂട്ടാനുമുപയോഗിക്കുന്ന കൃത്രിമ പദാര്‍ത്ഥങ്ങള്‍ എന്നിവ ദഹന വ്യവസ്ഥയെ പ്രതികൂലമായി ബാധിക്കുന്നതും പല്ലിന്റെ ഉറപ്പിനെ കുറയ്ക്കുന്നതുമാണ്.

അസുഖങ്ങള്‍ക്ക് ആയുര്‍വ്വേദം

കുട്ടികള്‍ക്കുണ്ടാകുന്ന അസുഖങ്ങള്‍ അവയ്ക്കുള്ള ചികിത്സ, ശിശുക്കളുടെ ആരോഗ്യസംരക്ഷണം, കുട്ടിയുടെ അമ്മയ്ക്കുണ്ടാകുന്ന രോഗങ്ങള്‍, മുലപ്പാളിനുണ്ടാവുന്ന ദോഷങ്ങള്‍ എന്നിവയെല്ലാം അടങ്ങുന്ന ചികിത്സാ വിഭാഗത്തെ ‘കൗമാരഭൃത്യം’ എന്നാണു പറയുന്നത്. ‘കഷ്യപസംഹിത’ അഷ്ടാംഗഹൃദയം’ എന്നീ ഗ്രന്ഥങ്ങളില്‍ ബാലരോഗചികിത്സ, ആരോഗ്യസംരക്ഷണം എന്നിവയെക്കുറിച്ച് വിശദമായി രേഖപ്പെടുത്തിയിട്ടുണ്ട്. രോഗപ്രതിരോധശേഷി വര്‍ദ്ധിപ്പിക്കുന്ന ആയുര്‍വേദ ഔഷദങ്ങള്‍ കുട്ടികള്‍ക്ക്‌ കൊടുത്താല്‍ കാലാവസ്ഥ മാറുമ്പോഴുണ്ടാകുന്ന പണി, തുമ്മല്‍, ശ്വാസകോശ രോഗങ്ങള്‍ എന്ന് തുടങ്ങി നിരവധി രോഗങ്ങളില്‍ നിന്ന് കുട്ടിയെ രക്ഷിക്കാനാകും.

നവജാത ശിശുക്കള്‍ക്ക്

നവജാത ശിശുക്കള്‍ക്കുണ്ടാകുന്ന പനിക്ക്‌ കഞ്ഞിക്കൂര്‍ക്കില നീര്, തുളസിനീര് എന്നിവയില്‍ തേന്‍ ചേര്‍ത്ത്‌ നല്‍കാവുന്നതാണ്. ഗോപീചന്ദനാദി ഗുളിക മേല്‍പ്പറഞ്ഞ ഇലകല്‌െ നീരില്‍ ചേര്‍ത്ത്‌ നല്‍കുന്നത് പണി, ചുമ, തുമ്മല്‍, തൊണ്ടവേദന, നീര്‍വീഴ്ച എന്നിവയ്ക്ക് വളരെ നല്ലതാണ്.

രാജന്യാദി ചൂര്‍ണ്ണം

കുട്ടികള്‍ക്കുണ്ടാവുന്ന എല്ലാ രോഗങ്ങളിലും ഉപയോഗിക്കാവുന്ന ഒരു ഔഷദമാണ് രാജന്യാദിചൂര്‍ണ്ണം. (മഞ്ഞള്‍, ദേവദാരം, ചരളം, അത്തിത്തിപ്പലി, ചെരുവഴുതന വേര്, വെണ്‍വഴുതിന വേര്, മൂവില വേര്, ശതകുപ്പ എന്നിവയാണിതിലെ ഘടകങ്ങള്‍) 1-5 ഗ്രാം വരെ തേന്‍, നെയ്യ് എന്നിവ ചേര്‍ത്ത്‌ നല്‍കാവുന്നതാണ്. ഈ ചൂര്‍ണ്ണം തന്നെ വെള്ളത്തിലോ മോരിലോ ഇട്ടു തിളപ്പിച്ച് ആറിയ ശേഷം ചേര്‍ത്ത്‌ കൊടുക്കുന്നത് രോഗപ്രതിരോധശേഷി വര്‍ദ്ധിപ്പിക്കാനും പനിയുള്ള സമയങ്ങളില്‍ വിശപ്പുണ്ടാകാനും വയറിളക്കം ശമിക്കാനും നല്ലതാണ്. ശ്വ്വാസം മുട്ടല്‍, അലര്‍ജി, തുമ്മല്‍ എന്നീ ബുദ്ധിമുട്ടുകള്‍ക്കും ഈ ചൂര്‍ണ്ണം കഴിക്കുന്നത് നല്ലതാണ്.

ശരീരബലം വര്‍ദ്ധിപ്പിക്കാന്‍

കുട്ടികളുടെ ശരീരബലം വര്‍ദ്ധിപ്പിക്കാനും നിറം നന്നാവാനും ആരോഗ്യം നിലനിര്‍ത്താനും എണ്ണതേച്ച് കുളിപ്പിക്കേണ്ടാതാണ്. കോലരക്ക് പ്രധാനമായി ചേരുന്ന ലക്ഷാദി വെളിച്ചെണ്ണ തെപ്പിച്ച് അരമണിക്കൂര്‍ കഴിഞ്ഞ് ചെറുപയര്‍ പോടീ ഉപയോഗിച്ച് കഴുകികളയുന്നത് വളരെ നല്ലതാണ്. ശ്വാസം മുട്ടല്‍, നീര്‍വീഴ്ച, തുമ്മല്‍ അപസാമ്ര എന്നീ രോഗങ്ങളുള്ള കുട്ടികള്‍ക്കും ഈ വെളിച്ചെണ്ണ തെപ്പിക്കുന്നത് രോഗശമനം ഉണ്ടാക്കുന്നതായി കണ്ടിട്ടുണ്ട്.

കൃമിശല്യത്തിന്

കൃമിശല്യം കുട്ടികളെ വല്ലാതെ ബുദ്ധിമുട്ടിക്കുന്ന ഒരസുഖമാണ്. മലിനമായ ആഹാരം, ജലം എന്നിവ ഉപയോഗിക്കുക, വസ്ത്രങ്ങള്‍ വൃത്തിഹീനമായവ ധരിക്കുക, നഖങ്ങള്‍ വെട്ടാതിരിക്കുക എന്നിങ്ങനെ നിരവധി കാരണങ്ങള്‍ കൊണ്ട് കൃമി രോഗം പിടിപെടും. വിഴാലരി, മഞ്ഞള്‍, കറിവേപ്പില, വെളുത്തുള്ളി എന്നിവ ചതച്ച് മോരിലിട്ട് തിളപ്പിച്ച് ആറിയ ശേഷം ഉപയോഗിക്കുന്നത് കൃമിശല്യം നിയന്ത്രിക്കാന്‍ നല്ലതാണ്. അതില്‍ അഷ്ടചൂര്‍ണ്ണം ചേര്‍ത്ത്‌ കഴിക്കുന്നത് വിശപ്പ്‌ വര്‍ദ്ധിപ്പിക്കാനും കൃമിശല്യം ഇല്ലാതാക്കാനും നല്ലതാണ്. മാതളനാരങ്ങ, പപ്പായ എന്നിവ കഴിക്കുന്നത് കൃമിശല്യത്തെ ഇല്ലാതാക്കും. മുയല്‍ച്ചെവിയുടെ ഇലയുടെ നീര് കഴിക്കുന്നത് കൃമി രോഗത്തെ കുറയ്ക്കുനതാണ്. കൃമിഘ്ന വടികയാണ കുട്ടികളുടെ കൃമിരോഗത്തിന് കൊടുക്കാവുന്ന മറ്റൊരു മരുന്നാണ്.

ശ്വാസം മുട്ടല്‍

ശ്വാസകോശത്തില്‍ കഫം നിറഞ്ഞ് ശ്വസന വൈകല്യമുണ്ടായി ചുമ, ശ്വാസംമുട്ടല്‍ എന്നിവ കുട്ടികളെ ബാധിക്കുന്നൊരു ആരോഗ്യപ്രശ്നമാണ്. തണുത്ത വെള്ളം കുടിക്കുക, തണുപ്പുള്ള അന്തരീക്ഷം കഫം വര്‍ദ്ധിപ്പിക്കുന്ന പാല്‍ മുതലായവ അധികം കഴിക്കുക, വേണ്ടത്ര ദഹനം ഇല്ലാതിരിക്കുക, കാലാവസ്ഥാ വ്യതിയാനം, അച്ഛനോ അമ്മയ്ക്കോ ഈ അസുഖം ഉണ്ടാകുക, പൊടി, പുക എന്നിവ ശ്വസിക്കുക എന്നിങ്ങനെ നിരവധി കാരണങ്ങള്‍ കൊണ്ട് ശ്വാസം മുട്ടല്‍ ഉണ്ടാവാനിടയുണ്ട്. ആടലോടകനീര്, തേന്‍, കല്‍ക്കണ്ടം എന്നിവ ചേര്‍ത്ത്‌ കഴിക്കുന്നത് ശ്വാസരോഗം കുറയ്ക്കും. ദശമൂലകടുത്രയാദി കഷായം, മൃദ്വീകാദിലേഹ്യം, താലീസ്‌പത്രാടി ചൂര്‍ണ്ണം, ശ്വാസാനന്ദം ഗുളിക, ദശമൂല രസായനം, വാശകാദ്യരിഷ്ടം എന്നിഗനെയുള്ള ഔഷധങ്ങള്‍ വൈദ്യനിദ്ദേശാനുസൃതം ശ്വാസംമുട്ടലുള്ളപ്പോള്‍ കുട്ടിക്ക്‌ നല്‍കുന്നത് രോഗത്തെ ശമിപ്പിക്കുവാന്‍ നല്ലതാണ്. രോഗം മാറിയാല്‍ പ്രതിരോധശക്തി വര്‍ദ്ധിപ്പിക്കുന്ന ദാഡിമാദിഘൃതം, ച്യവന്നപ്രാശം, അഗസ്ത്യരസായനം എന്നിവനെയുള്ളവ തുടര്‍ന്ന് സേവിപ്പിക്കുന്നത് ശ്വാസം മുട്ടല്‍ വരാതിരിക്കാന്‍ സഹായിക്കും.

ദഹനത്തിന്

മുസ്താരിഷ്ടം ദഹനപ്രക്രിയയെ സുഗമമാക്കുന ഒരു ഔഷധമാണ്. മുത്തങ്ങ പ്രധാനമായടങ്ങിയ ഒരു ഔഷധമാണിത്. കൃമിശല്യം, വയരുവീര്‍പ്പ്‌, പണി എന്നിവയും കുട്ടികള്‍ക്കിത് ഭക്ഷണശേഷം കൊടുക്കാവുന്നതാണ്. കഴിച്ച ആഹാരം ദഹിക്കാതെ കുട്ടികള്‍ക്കുണ്ടാവുന്ന ചര്‍ദ്ദിക്ക് വില്വാദിലെശ്യം, ധന്വന്തരം ഗുളിക, ജീരകാദ്യരിഷ്ടം എന്നിവ വൈദ്യനിര്‍ദ്ദേശാനുസൃതം സേവിക്കാം. മലരിട്ട് തിളപ്പിച്ച് വെള്ളം ആറിയ ശേഷം ചര്‍ദ്ദി രോഗത്തിന് കൊടുക്കാവുന്നതാണ്. ചെറുനാരങ്ങാനീര് തേന്‍ ചേര്‍ത്ത്‌ കൊടുക്കാം. ഗ്രഹിനി, കുട്ടികള്‍ക്കുണ്ടാകുന്ന ദഹനക്കേട് ഇടയ്ക്കിടെ വയറിളകിപ്പോവുക എന്നിവ മധുകാസവം കൊടുത്താല്‍ ശമിക്കും. ചുക്കും ജീരകവും ചതച്ചിട്ട് തിളപ്പിച്ചാറിയ വെള്ളവും കുടിക്കണം.

ത്വക്ക് രോഗങ്ങള്‍

കുട്ടികള്‍ക്ക്‌ ത്വക്ക് രോഗങ്ങള്‍ വരാതിരിക്കുവാന്‍ നാല്പാമാരാടി വെളിച്ചെണ്ണ എലാടി വെളിച്ചെണ്ണ ചെമ്പരത്യാദി വെളിച്ചെണ്ണ എന്നിവയില്‍ ഏതെങ്കിലും വൈദ്യനിര്‍ദ്ദേശാനുസൃതം ദേഹത്ത്‌ തേച്ച് കുളിക്കുവാന്‍ ഉപയോഗിക്കാവുന്നതാണ്. ത്വക്ക് രോഗമുള്ളപ്പോള്‍ നാല്പാമാരപ്പട്ട, വേപ്പ്, മഞ്ഞള്‍ എന്നിവയിട്ട് തിളപ്പിച്ച വെള്ളം ആറിയ ശേഷം ദേഹത്ത്‌ ഒഴിക്കുന്നത് ചൊറിച്ചില്‍ നിറവ്യത്യാസം എന്നിവ കുറയ്ക്കും.

പനി

കുട്ടികള്‍ക്കുണ്ടാകുന്ന പനിക്ക്‌ അമൃതാരിഷ്ടം, മുക്കാമുക്കടുവാദി ഗുളിക എന്നിവ വളരെ ഫലപ്രദമാണ്. മുത്തങ്ങല്യും പര്‍പ്പടകപ്പുല്ലും ചതച്ച് വെള്ളത്തിലിട്ട് തിളപ്പിച്ച് ചെറു ചൂടില്‍ കുടിക്കാന്‍ കൊടുക്കാം.

ശരീരബലവും ബുദ്ധിശക്തിയും

ശാരീരിക ബലം വര്‍ദ്ധിക്കാനും പ്രതിരോധശേഷി വര്‍ദ്ധിപ്പിക്കാനും ആയുര്‍വ്വേദത്തില്‍ നിര്‍ദ്ദേശിക്കുന്ന ഔഷധദ്രവ്യങ്ങളാണ് നെല്ലിക്ക, മാതളം, അമുക്കുരം, ചിറ്റമൃത്, തുളസി, മുന്തിരിങ്ങ, മഞ്ഞള്‍ എന്ന് തുടങ്ങിയവ. ബുദ്ധി, ഓര്‍മ, സംസാരം എന്നിവ നന്നാവാന്‍ ബ്രാഹ്മിയുടെ നീര് തേന്‍ ചേര്‍ത്ത്‌ കഴിക്കുന്നത് നല്ലതാണ്. മുത്തിളിന്റെ നീരിനും ഇതേ ഗുണങ്ങളുണ്ട്.

നേത്ര രോഗങ്ങള്‍

നേത്രരോഗങ്ങളില്‍ ത്രിഫല ചൂര്‍ണ്ണം തേന്‍ ചേര്‍ത്ത്‌ രാത്രി കഴിക്കുന്നത് ഉത്തമമാണ്. കണ്ണിന് നീര്, ചുവപ്പ്, ചൊറിച്ചില്‍ എന്നിവയില്‍ നേത്രാമൃതം രണ്ടുതുള്ളി ഉത്ടിക്കുന്നത് നല്ലതാണ്. ആഹാരത്തില്‍ അതത് നാട്ടില്‍ ലഭ്യമാകുന്ന ധാന്യങ്ങള്‍, പച്ചക്കറികള്‍, പഴങ്ങള്‍, ഇലക്കറികള്‍ എന്നിവ ഉപയോഗിക്കുന്നതാണ് ഏറ്റവും നല്ലത്.

ആരോഗ്യം എന്നത് ശാരീരികവും മാനസികവുമായ പരിപൂര്‍ണ്ണ സ്വാസ്ഥ്യമാണ്. അല്ലാതെ കേവലം രോഗത്തിന്റെയോ ദൌര്‍ബല്യത്തിന്റെയോ അഭാവം അല്ല. ആരോഗ്യപൂര്‍ണ്ണമായ ദീര്‍ഘായുസ്സ്‌, രോഗങ്ങള്‍ക്ക്‌ ശാശ്വത പരിഹാരം, ശാരീരികവും മാനസികവുമായ സ്വാസ്ഥ്യം എന്നിവ ആയുര്‍വേദത്തിന്റെ പ്രധാന ലക്ഷണങ്ങളാണ്. ആയുസ്സിന്റെ ശാസ്ത്രത്തിന്റെ അടിസ്ഥാന തത്വങ്ങള്‍ അറിയുകയും ശീലിക്കുകയും ചെയ്യുന്നത് രോഗപ്രതിരോധശക്തി കുറഞ്ഞുവരുന്ന ഇന്നത്തെ കാലഘട്ടത്തിന്റെ ആവശ്യമായി എല്ലാവരും തിരിച്ചറിഞ്ഞിരിക്കുന്നു. കേവലം രോഗം മാറ്റാന്‍ മാത്രം വേണ്ടിയുള്ള ശാസ്ത്രമല്ല ആയുര്‍വേദം. രോഗാവസ്ഥയിലേക്ക് നയിക്കുന്ന കാരണങ്ങളെ അറിഞ്ഞ്, ഒഴിവാക്കേണ്ടവയെ ഒഴിവാക്കിയും സ്വീകരിക്കേണ്ടവയെ വേണ്ടവിധം ഉപയോഗിക്കുകയും ചെയ്യാന്‍ പഠിപ്പിക്കുന്നതാകുന്നു ആയുര്‍വേദ ചികിത്സ. മരുന്നുകള്‍ കൊണ്ടുമാത്രം ഉണ്ടാവുന്നതല്ല ആരോഗ്യം. രോഗാവസ്ഥയിലേക്ക് ഹിതമായ ആഹാരവിഹാരങ്ങള്‍ക്ക് നിത്യ ജീവിതത്തില്‍ പ്രാധാന്യം കല്‍പ്പിക്കുന്നത് നമ്മുടെ ശീലമായി മാറുന്നുണ്ട്.

ആയുസ്സിന് ഹിതാഹിതമായ കാര്യങ്ങള്‍ ഈ ശാസ്ത്രത്തില്‍ ഉള്ളത് കൊണ്ട് അല്ലെങ്കില്‍ ആയുസ്സിന് ഹിതാഹിതമായ കാര്യങ്ങള്‍ ഇതില്‍ നിന്ന് നമുക്ക്‌ ലഭ്യമാകുന്നത് കൊണ്ട് ദീര്‍ഘയുസ്സിന്റെ ശാസ്ത്രമായി ആയുര്‍വേദം അറിയപ്പെടുന്നു.

ഡോ.ദേവീകൃഷ്ണന്‍

കോട്ടക്കല്‍ ആര്യവൈദ്യശാല

സ്കൂളും രോഗങ്ങളും

 

 

സ്കൂള്‍ തുറക്കുന്നത് തന്നെ മഴക്കാലത്താണ്. അതുകൊണ്ട് തന്നെ സ്കൂള്‍ തുറന്ന് രണ്ടുമൂന്ന് മാസം ഹാജര്‍ നില വളരെ കുറയാനാണ് സാധ്യതയും. കാരണം കുട്ടികള്‍ക്കുണ്ടാകുന്ന ആരോഗ്യ പ്രശ്നങ്ങള്‍ തന്നെ. മഴക്കാലമായതിനാല്‍ പല തരത്തിലുള്ള സുരക്ഷാ വിട്ടുവീഴ്ച്ചകളുണ്ടാകുവാനും സാധ്യത ഏറെയാണ്‌. ആ സാധ്യതകളെ ഇല്ലായ്മ ചെയ്യണമെങ്കില്‍ കുഞ്ഞുങ്ങളുടെ ഭക്ഷണം, വസ്ത്രം തുടങ്ങി എല്ലായിടത്തും ശ്രദ്ദഹ് പതിപ്പിച്ചേ തീരൂ. ചെറിയ അശ്രദ്ധകള്‍ പലപ്പോഴും വലിയ രോഗങ്ങള്‍ക്ക് കാരണമായിത്തീരാം. കുഞ്ഞുങ്ങള്‍ സഹപാഠികളോട് അടുത്തിഴപഴകുന്നവരായതിനാല്‍ വളരെ വേഗത്തില്‍ രോഗങ്ങള്‍ പടര്‍ന്ന്‍ പിടിക്കാന്‍ സാധ്യതയുണ്ട്. ഒറു കുട്ടിക്ക് അസുഖം വന്നാല്‍ ക്ലാസ്സിലെ ബഹുഭൂരിപക്ഷം കുട്ടികളിലേക്കും അത് വ്യാപിക്കാം. ജലദോഷം, പനി, വയറിളക്കം തുടങ്ങി വിവിധങ്ങളായ അസുഖങ്ങളാണ് മഴക്കാലത്ത് കുഞ്ഞുങ്ങളെ കാത്തിരിക്കുന്നത്. സ്കൂളിലെ ശുചിത്വമില്ലായ്മയും, വ്യക്തിശുചിത്വമില്ലായ്മയുമെല്ലാം ഇത്തരം അസുഖങ്ങള്‍ക്ക് കാരണമാകാം. രക്ഷിതാക്കളും അദ്ധ്യാപകരും കൃത്യമായി ശ്രദ്ധ ചെലുത്തുകയാണെങ്കില്‍ ഇത്തരം രോഗങ്ങളുടെ പിടിയില്‍ പെടാതെ നമുക്ക് നമ്മുടെ കുഞ്ഞുങ്ങളെ രക്ഷിക്കാം. അവര്‍ പൂര്‍ണ്ണാരോഗ്യത്തോടെ സ്കൂളില്‍ പോയി വരട്ടെ.

ശുചിത്വമുള്ള പഠനാന്തരീക്ഷം

സ്കൂളില്‍ മഴക്കാലത്ത് ഏറ്റവും വൃത്തിഹീനമായി കിടക്കുന്ന സ്ഥലങ്ങളായി മൂത്രപ്പുരകളും കക്കൂസുകളും മാറാറുണ്ട്. ഈര്‍പ്പം കെട്ടിക്കിടക്കുകയും നിരവധി പേര് വരുനന്തിനാല്‍ ഇവ വൃത്തിഹീനമായി കിടക്കുകയും ചെയ്യുന്നു. കൊതുകുകളും മറ്റും പറക്കുന്നതിനും ഇത് കാരണമായി തീരാറുണ്ട്. ഇത് പലവിധ അസുഖങ്ങള്‍ക്കും കാരണമാകാം. വേനലവധി കഴിഞ്ഞ് വരുന്നതിനാല്‍ മിക്ക കുട്ടികള്‍ക്കും ഇത്തരം ടോയ്ലറ്റുകള്‍ ഉയോഗിക്കാന്‍ അറപ്പ് അനുഭവപ്പെടുകയാണ് പതിവ്. ആദ്യമായി സ്കൂളിലെത്തുന്ന കുട്ടികളാണെങ്കില്‍ പറയുകയേ വേണ്ട. മഴക്കാലമായതിനാല്‍ തുടരെ തുടരെ മൂത്രമൊഴിക്കേണ്ടി വരുമെങ്കിലും വൃത്തിയില്ലാത്ത ടോയ്ലറ്റാണെങ്കില്‍ കുട്ടികള്‍ അവ ഉപയോഗിക്കാതെ സഹിച്ച് നില്‍ക്കാറാണ് പതിവ്. ഇത് പലവിധ അസുഖങ്ങള്‍ക്കും കാരണമാകാം. ഇക്കാരത്തില്‍ ശ്രദ്ധ ചെലുത്തേണ്ടത് അദ്ധ്യാപകരും രക്ഷിതാക്കളുമാണ്. സ്കൂളില്‍ കുട്ടികള്‍ക്ക് അനുവദിച്ചിട്ടുള്ള ടോയ്ലറ്റുകള്‍ വൃത്തിയുള്ളതാണെന്ന് ഉറപ്പ് വരുത്തണം. കുട്ടികള്‍ വീട്ടിലെത്തിയാല്‍ പഠന വിശേഷങ്ങള്‍ തിരക്കുന്നതോടൊപ്പം തന്നെ ഇത്തരം വിഷങ്ങളും ചോദിച്ചറിയണം. അതൃപ്തമായ മറുപടിയാണ് കുട്ടികളില്‍ നിന്ന് ലഭിക്കുന്നതെങ്കില്‍ എത്രയും പെട്ടെന്ന് തന്നെ സ്കൂള്‍ അധികൃതരെ അറിയിക്കുകയും വേണ്ട നടപടികള്‍ കൈക്കൊള്ളുന്നുണ്ടോ എന്ന് അന്വേഷിക്കുകയും ചെയ്യുക. അത് നിങ്ങളുടെ കടമയും കുട്ടികളുടെ അവകാശവുമാണെന്നും മറക്കാതിരിക്കുക.

മാതാപിതാക്കള്‍ ശ്രദ്ധിക്കുക

പകര്‍ച്ച വ്യാധികളുടെ വലിയൊരു നിര തന്നെ പ്രത്യക്ഷപ്പെടുന്ന കാലമാണ് പുതിയ അധ്യയന വര്‍ഷത്തിലെ മഴക്കാലം. കുട്ടികളെ വ്യക്തിശുചിത്വം പാലിക്കാന്‍ പഠിപ്പിക്കേണ്ടത് നമ്മള്‍ തന്നെയാണ്. കൈകാലുകളും വായയുമെല്ലാം എപ്പോഴും വൃത്തിയായിരിക്കാന്‍ പഠിപ്പിക്കുക. പകര്‍ച്ചവ്യാധികള്‍ ഉണ്ടാകുന്നത് സ്കൂളില്‍ന്റെ ശുചിത്വമില്ലായ്മ കാരണമാണെങ്കില്‍ അത് ബന്ധപ്പെട്ടവരെ അറിയിക്കാന്‍ ശ്രമിക്കുക. കുഞ്ഞുങ്ങള്‍ക്ക് ഏതെങ്കിലും രീതിയിലുള്ള പകര്‍ച്ചവ്യാധികളുണ്ടാവുകയാണെങ്കില്‍ അത് മാറുന്ന വരെ അവരെ സ്കൂളിലേക്കയക്കാതിരിക്കുകയും അത് എത്രയും പെട്ടെന്ന് ഭേദമാകാന്‍ വേണ്ട കാര്യങ്ങള്‍ ചെയ്യുകയും ചെയ്യുക. ഇല്ലെങ്കില്‍ കൂടുതല്‍ കുട്ടികളിലേക്ക് അസുഖം വ്യാപിക്കാം.

സ്കൂളില്‍ ഫസ്റ്റ് എയ്ഡ്

സ്കൂള്‍ തുറന്ന് മാസം ഒന്ന് കഴിഞ്ഞതേയുള്ളൂ പക്ഷേ അമ്മമാരുടെ പരാതി ഒഴിഞ്ഞ നേരമില്ല. മിക്ക കുട്ടികളും വീണ് കയ്യും കാലും മുറിഞ്ഞുമൊക്കെയാണ് വീട്ടിലെത്തുന്നത്. ഇത്തരം വീഴലും പൊട്ടലുമെല്ലാം സ്കൂളിലെ സ്ഥിരം കാഴ്ചയാണ്. അതിനാല്‍ തന്നെ ഇത്തരം അവസരങ്ങളില്‍ പ്രഥമ ശുശ്രൂഷക്കുള്ള സാഹചര്യങ്ങള്‍ സ്കൂളില്‍ ഒരുക്കേണ്ടത് അദ്ധ്യാപകരുടേയും അധികൃതരുടെയും ഉത്തരവാദിത്വമാണ്. അതില്‍ നിന്നും ഒഴിഞ്ഞു നിന്നാല്‍ അത് കുഞ്ഞുങ്ങളുടെ ആരോഗ്യകാര്യത്തില്‍ സ്കൂളിനുള്ള ഗുരുതരമായ വീഴ്ച തന്നെയാണ്. ഇത്തരം കാര്യങ്ങളില്‍ പ്രത്യേകമായി അദ്ധ്യാപകരെ ചുമതലകള്‍ ഏല്‍പ്പിക്കേണ്ടതാണെന്ന് രക്ഷിതാക്കള്‍ക്ക് ആവശ്യപ്പെടാവുന്നതേയുള്ളൂ. അപകടം പറ്റി കഴിഞ്ഞാല്‍ അതെങ്ങനെ സംഭവിച്ചു എന്നും അധ്യാപകര്‍ എങ്ങനെ ഇടപെട്ടു എന്നും കുഞ്ഞുങ്ങളോട് തിരക്കി നോക്കാം. കുഞ്ഞുങ്ങള്‍ വീണ് പരിക്കേറ്റാല്‍ അവരെ ശാസിക്കാതെ അപകടത്തെ കുറിച്ച് സ്നേഹത്തോടെ മുന്നറിയിപ്പ് നല്‍കുകയാണ് വേണ്ടത്. വീഴാതെ വളര്‍ന്നവര്‍ ആരുണ്ട്‌ ? അതിന്റെ വലിയ പ്രത്യാഘാതങ്ങളില്‍ നിന്നും കുഞ്ഞുങ്ങളെ രക്ഷപ്പെടുത്തുകയാണ് വേണ്ടത്.

ഭക്ഷണം ശ്രദ്ധിക്കുക

മഴക്കാലത്ത് കുട്ടികളുടെ ഭക്ഷണകാര്യത്തില്‍ ആവശ്യമായ് ശ്രദ്ധ വച്ചില്ലെങ്കില്‍ അവര്‍ക്ക് വളരെ പെട്ടെന്ന് അസുഖങ്ങള്‍ പിടിപെടാം. അത് സ്കൂള്‍ ദിനങ്ങളെ വെട്ടിച്ചുരുക്കുകയും അവരുടെ പഠന നിലവാരത്തെ ബാധിക്കുകയും ചെയ്യും. സ്കൂളില്‍ ഭക്ഷണം ലഭിക്കുന്നവരാണെങ്കില്‍ സ്കൂള്‍ ഭക്ഷണത്തെ കുറിച്ച് കുട്ടികളോട് ചോദിച്ചറിയാം. കൂടാതെ സ്കൂളില്‍ ചെന്ന് ഭക്ഷണത്തിന്റെ സുരക്ഷയും വൃത്തിയും നേരില്‍ കണ്ട് ഉറപ്പുവരുത്തുകയും ചെയ്യാം. ഭക്ഷണസുരക്ഷയുടെ കാര്യത്തില്‍ വീഴ്ച്ച വരുത്തുന്നുണ്ടെങ്കില്‍ വളരെ കര്‍ശനമായി തന്നെ അതില്‍ ഇടപെടുകയും ചെയ്യാം. അതേ സമയം കുഞ്ഞുങ്ങള്‍ക്ക് നാം വീട്ടില്‍ നിന്നും നല്‍കുന്ന ഭക്ഷണവും, ഭക്ഷണം നല്‍കാന്‍ ഉപയോഗിക്കുന്ന പാത്രങ്ങളുമെല്ലാം വൃത്തിയുള്ളതാണെന്ന് ഉറപ്പുവരുത്തുകയും ചെയ്യണം. ഭക്ഷണം കഴിക്കുന്നതിന് മുമ്പ് കൈ കഴുകിയിരിക്കണമെന്ന് പറയുകയും ശീളിപ്പിക്കുകയും വേണം. സ്കൂളിനടുത്ത് നിന്നും മറ്റും കടയില്‍ നിന്നും ലഭിക്കുന്ന വൃത്തിയില്ലാത്ത ഭക്ഷണങ്ങള്‍ കഴിക്കരുതെന്ന് നിര്‍ബന്ധമായും പറയുകയും വേണം. കുഞ്ഞുങ്ങളില്‍ മഴക്കാലത്ത് കണ്ടുവരുന്ന വയറിളക്കത്തിന്റെയും വയറുവേദനയുടേയും മറ്റും കാരണം ഭക്ഷണത്തിലേ വൃത്തിയില്ലായ്മ തന്നെയാണ്. അതൊഴിവാക്കിയാല്‍ തന്നെ കുഞ്ഞുങ്ങള്‍ക്കുണ്ടാകുന്ന പല അസുഖങ്ങളും തടയാം.

ശുചിത്വമുള്ള വസ്ത്രം

പല സ്കൂളുകളിലും ഏറെക്കുറെ എല്ലാ ദിവസവും യൂണിഫോം നിര്‍ബന്ധമാണ്‌. മഴക്കാലമായതിനാല്‍ ഡ്രസ്സ് ഉണങ്ങി കിട്ടാനും പ്രയാസമാണ്. മിക്ക അമ്മമാര്‍ക്കും തലവേദനയൊഴിഞ്ഞു നേരമില. പക്ഷേ, കുഞ്ഞുങ്ങളുടെ വസ്ത്രത്തിന്റെ കാര്യത്തില്‍ യാതൊരു വിട്ടുവീഴ്ചയും കാണിക്കരുത്. അവര്‍ക്ക് ഉണങ്ങിയ, വൃത്തിയും വെടിപ്പുമുള്ള വസ്ത്രങ്ങള്‍ ധരിച്ച് സ്കൂളില്‍ പോകാന്‍ സാഹചര്യമൊരുക്കേണ്ടത് രക്ഷിതാക്കളാണ്. ഈര്‍പ്പമുള്ളതും വൃത്തിയില്ലാത്തതുമായ വസ്ത്രങ്ങള്‍ ധരിക്കുന്നതിനാല്‍ ഫംഗസ് ബാധ പോലുള്ള നിരവധി അസുഖങ്ങള്‍ കുട്ടികളെ വീര്‍പ്പുമുട്ടിക്കാം. അതവരുടെ ശ്രദ്ധയെ ബാധിക്കുകയും പഠനത്തില്‍ പിറകോട്ടാകാന്‍ കാരണമാകുകയും ചെയ്യുന്നു. അതിനാല്‍ വൃത്തിയും വെടിപ്പുമുള്ള വസ്ത്രങ്ങളോടെ മാത്രം കുഞ്ഞുങ്ങളെ സ്കൂളിലെക്കയക്കുക. കുടിട്കള്‍ നല്ല വസ്ത്രങ്ങള്‍ ധരിച്ചാണ് സ്കൂളിലെത്തുന്നത് എന്ന് അദ്ധ്യാപകര്‍ക്കും ഉറപ്പുവരുത്താം. ഇത്തിരി ശ്രദ്ധയുണ്ടായാല്‍ മതി ആരോഗ്യത്തോടെ നമ്മുടെ കുട്ടികള്‍ക്ക് സ്കൂളിലെത്തി മുഴുവന്‍ ഹാജറോടെ പഠിച്ച് ഒന്നാമാനാകാം. ആരോഗ്യപൂര്‍ണ്ണമായൊരു സ്കൂള്‍ മഴക്കാല ഓര്‍മ്മകള്‍ അവര്‍ക്ക് നല്‍കേണ്ടത് നമ്മുടെ കടമയാണ്.

കുട്ടികളിലെ മലബന്ധം

 

 

കുട്ടികളില്‍ സര്‍വ്വസാധാരണയായി കണ്ടുവരുന്ന ഒരു പ്രശ്നമാണ് മലബന്ധം. ചില കുട്ടികളില്‍ ദിവസങ്ങളോളമോ ആഴ്ചകളോളമോ മലബന്ധം കാണാറുണ്ട്‌. ശരിയായ ദഹനമുള്ള കുട്ടികള്‍ ദിവസവും ഒരു തവണയെങ്കിലും ടോയ്‌ലറ്റില്‍ പോകാറുണ്ട്. ആഴ്ചയില്‍ മൂന്ന് തവണയെങ്കിലും ശോധനയില്ലാത്ത കുട്ടികള്‍ക്ക്‌ മലബന്ധം ഉണ്ടെന്ന് തന്നെ കരുതാം. രണ്ടാഴ്ചയില്‍ കൂടുതല്‍ മലബന്ധം ഉണ്ടാവുകയാണെങ്കില്‍ തീര്‍ച്ചയായും ഡോക്ടറെ കാണിക്കണം. വയറുവേദന, വയറുവീര്‍ക്കല്‍, വയറുകടി, വിശപ്പില്ലായ്മ, ടോയ്ലറ്റില്‍ പോകുമ്പോള്‍ ബുദ്ധിമുട്ട്, മലം ഉറച്ചിരിക്കല്‍ തുടങ്ങിയവയാണ് മലബന്ധത്തിന്റെ ലക്ഷണങ്ങള്‍.

കാരണങ്ങള്‍
ഭക്ഷണരീതി

കുട്ടികള്‍ക്ക്‌ ദഹിക്കാന്‍ ബുദ്ധിമുട്ടുള്ള ഭക്ഷണങ്ങള്‍, കൊഴുപ്പടങ്ങിയവ, മധുരപലഹാരങ്ങള്‍ ഇവയെല്ലാം മലബന്ധത്തിന് കാരണമാകാം. ഭക്ഷണത്തില്‍ ഇലക്കറികളുടേയും നാരടങ്ങിയ പഴവര്‍ഗ്ഗങ്ങളുടേയും ധാന്യങ്ങളുടെയും അഭാവവും ഇതിന് കാരണമാകാം. ഭക്ഷണക്രമത്തിലുള്ള വ്യതിയാനം മറ്റൊരു കാരണമാണ്. ഉദാഹരണത്തിന് സ്ഥിരമായി മുലപ്പാല്‍ മാത്രം കുടിക്കുന്ന കുട്ടി പശുവിന്‍ പാല്‍ കുടിച്ചാലോ കട്ടി കുറഞ്ഞ ആഹാരത്തില്‍ നിന്ന് കട്ടി കൂടിയ ആഹാരത്തിലേക്ക് മാറുമ്പോഴോ മലബന്ധം ഉണ്ടാകാന്‍ സാധ്യതയുണ്ട്. കുറച്ചുകൂടി വളര്‍ന്ന കുട്ടികളില്‍ പുതുതായി എന്തെങ്കിലും കഴിച്ചാല്‍ വയറുവേദനയോ മലബന്ധമോ സാധാരണയാണ്. അധികം എരിവുള്ള ഭക്ഷണം കഴിച്ചാലോ ഗ്യാസിന്റെ പ്രശ്നം കൊണ്ടോ മലബന്ധം ഉണ്ടാകാം.

പിടിച്ച് വയ്ക്കരുത്

ടോയ്ലറ്റില്‍ പോകാതെ ചില കുട്ടികള്‍ പിടിച്ചു വയ്ക്കുന്നത് മൂലവും മലബന്ധം ഉണ്ടാകാറുണ്ട്. രണ്ടുവയസ്സിന് മുകളിലുള്ള കുട്ടികള്‍ക്ക്‌ കൂടുതല്‍ സമയവും കളിക്കാനാണ് താല്പര്യം. ചില കുട്ടികള്‍ക്ക്‌ ടോയ്ലറ്റില്‍ പോകാന്‍ പേടിയോ ഇഷ്ടക്കുറവോ ഉണ്ടാകാറുണ്ട്. ഇത്തരക്കാര്‍ പിടിച്ചു വയ്ക്കാറാണ് പതിവ്‌. മലബന്ധം മുന്‍പുണ്ടായ കുട്ടികള്‍ അതിന്റെ ബുദ്ധിമുട്ടോര്‍ത്ത് പേടിച്ച് പോകാതിരിക്കും. കുട്ടികള്‍ക്ക്‌ ഒരു തവണ ബുദ്ധിമുട്ട് തോന്നിയാല്‍ പിന്നീട് അവര്‍ ശ്രമിക്കാന്‍ പ്രയാസമാണ്.

ദിനചര്യ തെറ്റിച്ചാല്‍

സ്ഥിരമായി ടോയ്ലറ്റില്‍ പോകുന്ന കുട്ടികള്‍ പതിവ് തെറ്റിച്ചാല്‍ (സ്ഥലം മാറിയാലോ എന്തെങ്കിലും അസുഖം വന്നാലോ) പിന്നീട് ആ രീതി വീണ്ടും തുടങ്ങാന്‍ മടി കാണിക്കാറുണ്ട്.

ശാരീരികാദ്ധ്വാനം കുറയുമ്പോള്‍

കുട്ടികള്‍ക്ക്‌ അവരവരുടെ പ്രായത്തിനൊത്ത കളികളും ആഹാരവും അതാത് സമയത്ത്‌ തന്നെ വേണം. നന്നായി ഓടിക്കളിച്ചാല്‍ കുട്ടികളുടെ ദഹനം സുഗമമായി നടക്കും. കൂടാതെ വിശപ്പുമുണ്ടാകുന്നു. എന്നാല്‍ വീട്ടില്‍ തന്നെ അടഞ്ഞുകൂടിയിരിക്കുന്ന കുട്ടികളില്‍ മലബന്ധത്തിന് സാധ്യത കൂടുതലുണ്ട്.

ചില മരുന്നുകളുടെ പ്രയോഗം

കൂടുതല്‍ വീര്യമുള്ള അയേണ്‍ ടാബ്ലറ്റുകള്‍, വേദന സംഹാരികള്‍ തുടങ്ങിയവ കുട്ടികളില്‍ മലബന്ധമുണ്ടാക്കാറുണ്ട്.

ശാരിരികമായ പ്രശ്നങ്ങള്‍

ചില കുട്ടികളില്‍ കുടലിന്റേയും മലദ്വാരത്തിന്റേയും ഘടനയിലുള്ള വ്യത്യാസം മലബന്ധത്തിന് കാരണമാകാറുണ്ട്. ഇത് തിരിച്ചറിയാന്‍ വിദഗ്ദ്ധ ഡോക്ടറുടെ പരിശോധന ആവശ്യമാണ്‌.

എങ്ങനെ മാറ്റാം?

ശരിയായ ആഹാരക്രമം തന്നെയാണ് ആദ്യമായി വേണ്ടത്‌. ധാരാളം പഴങ്ങളും പഴച്ചാറുകളും പച്ചക്കറികളും ധാന്യങ്ങളും ദിവസേന ആഹാരത്തില്‍ ഉള്‍പ്പെടുത്തുക. കുട്ടികള്‍ക്ക്‌ അതാത് സമയത്ത്‌ ആവശ്യത്തിനുള്ള ഭക്ഷണം കൊടുക്കുക. ഭക്ഷണം കഴിക്കുന്നത് കുറഞ്ഞാലും കുട്ടികളില്‍ മലബന്ധം ഉണ്ടാകാറുണ്ട്. ചെറുപഴം കഴിക്കുന്നത് നല്ലതാണ്.

വ്യായാമം

കുട്ടികളെ ചെറുപ്പത്തിലേ അടുക്കും ചിട്ടയുമുള്ള ജീവിതക്രമം പാലിക്കാന്‍ പഠിപ്പിക്കുക. ദിവസവും 30മിനിറ്റ്‌ മുതല്‍ ഒരു മണിക്കൂര്‍ വരെ ഓടിച്ചാടി കളിക്കണം. യോഗയോ എക്സര്‍സൈസോ പോലുള്ള ശരീരത്തിലെ ചലനങ്ങള്‍ ദഹനത്തിനും ശോധനയ്ക്കും ഉപകാരപ്രദമാണ്. ചെറിയ കുട്ടികള്‍ക്ക്‌ വയറ് ചൂടാക്കി കൊടുക്കാം (തുണിയോ കൈയോ ചെറുചൂടോടെ വയറില്‍ വച്ച് കൊടുക്കുക)

ടോയ്ലറ്റില്‍ പോകുന്നത് ശീലമാക്കുക. പ്രഭാത കൃത്യങ്ങളില്‍ ടോയ്ലറ്റില്‍ പോകുന്നത് ചെറുപ്പം മുതലേ ശീലിപ്പിക്കുക. പ്രത്യേകിച്ച് ഭക്ഷണത്തിന് ശേഷം ഒരു വയസ്സാവുമ്പോഴേക്കും പോട്ടിയിലിരിക്കാന്‍ പഠിപ്പിക്കാം. നന്നായി വെള്ളം കുടിക്കുക. ആഹാരക്രമീകരണം പോലെ തന്നെ അതിപ്രാധനമാണ് ശരീരത്തിനാവശ്യമായ ജലാംശം നിലനിര്‍ത്തുക എന്നത്. മാനസിക സമ്മര്‍ദ്ദവും പേടിയും കുട്ടികളില്‍ നിന്ന് ഒഴിവാക്കുക.

ചിലരില്‍ പരീക്ഷാപ്പേടിയും ഹോംവര്‍ക്ക് ചെയ്യാതെ വരുമ്പോഴുള്ള പേടിയും ഇതിനുകാരണമാകാറുണ്ട്. വീട്ടില്‍ നിന്ന് പുറത്തുപോകുമ്പോഴുള്ള വൃത്തിഹീനമായ ചുറ്റുപാട്, അപരിചിതമായ സ്ഥലങ്ങള്‍ തുടങ്ങിയവയും ഇതിന് കാരണമാകാറുണ്ട്. ഇത്തരം പ്രശ്നങ്ങള്‍ കണ്ടെത്തി അവരോടു സംസാരിച്ച് അവരുടെ ആവലാതികള്‍ മാറ്റിക്കൊടുക്കേണ്ടതാണ്. മലബാന്ധമുണ്ടായാലുള്ള ബുദ്ധിമുട്ടുകളെ പറ്റി ബോധവത്കരിക്കുക. ദീര്‍ഘകാലം നില്‍ക്കുന്ന മലബന്ധമുണ്ടാകുംപോള്‍ ഡോക്ടറെ കാണിക്കേണ്ടതാണ്.

3.0
നിങ്ങളുടെ നിര്‍ദ്ദേശം പോസ്റ്റ് ചെയ്യുക

(നിങ്ങള്‍ക്ക് അന്വേഷണങ്ങള്‍ പോസ്റ്റ് ചെയ്യുകയോ ചര്‍ച്ച ചെയ്യുകയോ ചേര്‍ക്കുകയോ ചെയ്യാം)

Enter the word
നവിഗറ്റിഒൻ
Back to top