Skip to content. | Skip to navigation

Vikaspedia

പങ്കുവയ്ക്കുക
Views
  • നില എഡിറ്റ്‌ ചെയുവാൻ വേണ്ടി തയ്യാ

മണ്ണിനങ്ങള്‍

വിവിധ മണ്ണിനങ്ങളും അനുബന്ധ വിവരങ്ങളും

മണ്ണ്

 

ഭൂമുഖത്തെ ഒരടിയോളം ആഴത്തിലുളള മേല്‍മണ്ണിലാണ് മനുഷ്യരാശിക്കാവശ്യമായ ഭക്ഷ്യധാന്യങ്ങളില്‍ ഏറിയ പങ്കും ഉല്പാദിപ്പിക്കുന്നത്. അതിനാല്‍ ജീവന്റെ നിലനില്പിന് തന്നെ ആധാരമായ അമൂല്യ വരദാനമാണു മണ്ണ്. അനേകകോടി വര്‍ഷങ്ങളിലൂടെ വെയില്‍, മഴ, മഞ്ഞ്, കാറ്റ് തുടങ്ങിയ പ്രകൃതി ശക്തികളുടെ നിരന്തര പ്രവര്‍ത്തനഫലമായി പാറകളില്‍ വിളളല്‍ ഉണ്ടവുകയും കാലാന്തരത്തില്‍ അവ പൊടിയുകയും ചെയ്യുന്നു. പാറപൊടിഞ്ഞതില്‍ ജീവജാലങ്ങള്‍ വളര്‍ന്നു തുടങ്ങുകയും ഇവയുടെ അവശിഷ്ടങ്ങള്‍ വീണ് ചെറിയ തോതില്‍ ജൈവാംശം ചേര്‍ക്കപ്പെടുകയും ചെയ്യുന്നു. ഇങ്ങനെ പാറയില്‍ നിന്നു ലഭിക്കുന്ന ധാതുപദാര്‍ത്ഥങ്ങളും ജൈവാംശവും മഴവെളളവും വായുവും എല്ലാം കൂടി ഇഴുകിച്ചേര്‍ന്ന് മണ്ണ് രൂപം കൊളളുന്നു. ചെടികളുടെ ഇലകളും മറ്റവശിഷ്ടങ്ങളും ദ്രവിച്ചു ചേരുമ്പോള്‍ മണ്ണില്‍ ജൈവാംശവും മഴവെള്ളവും വായുവും എല്ലാം കൂടി ഇഴുകിച്ചേര്‍ന്ന് മണ്ണ് രൂപം കൊളളുന്നു. ചെടികളുടെ ഇലകളും മറ്റവശിഷ്ടങ്ങളും ദ്രവിച്ചു ചേരുംപോള്‍ മണ്ണില്‍ ജൈവാംശ വര്‍ദ്ധനയുണ്ടാകുന്നു.. ജൈവവസ്തുക്കള്‍ അഴുകുന്നതു മണ്ണിലെ സൂക്ഷ്മജീവികളുടെ പ്രവര്‍ത്തനം കൊണ്ടാണ് . ഒരു ഗ്രാം മണ്ണില്‍ കോടിക്കണക്കിനു സൂക്ഷ്മ ജീവികളുടെ പ്രവര്‍ത്തനഫലമായി വിഘടിക്കപ്പെട്ടു ചേരുംപോഴാണ് മണ്ണിനു ജീവചൈതന്യമുണ്ടാക്കുന്നതും അതുമൂലം ചെടികളില്‍ വളരുന്നതിനനുകൂലമായ സാഹചഹര്യമുണ്ടാക്കുന്നതും.

കൃഷിക്കുത്തമമായ മണ്ണില്‍ അന്‍പതു ശതമാനത്തോളം ഖരപദാര്‍ത്ഥങ്ങളും ബാക്കിഭാഗം വെളളവും വായുവും ആയിരിക്കും ഖരപദാര്‍ത്ഥങ്ങളില്‍ത്തന്നെ ഏതാണ്ട് അഞ്ചു ശതമാനമെങ്കിലും ജൈവാംശം ഉണ്ടായിരിക്കണം . ബാക്കി നാലപത്തഞ്ചു ശതമാനത്തോളം മാത്രമെ പാറയില്‍ നിന്നു ലഭിക്കുന്ന ധാതുക്കള്‍ ആകാവൂ. എന്നാല്‍ ഇതെല്ലാം ഉണ്ടെങ്കിലും ഏറ്റവും പ്രധാന ഘടകം അതിലെ ജീവജാലങ്ങള്‍ ആണ്. ഈ ഘടകം ആണ് മണ്ണിന് ജീവ‌‌‌ന്‍ നല്കുന്നത്. ജീവനില്ലാത്ത മണ്ണില്‍ സസ്യങ്ങള്‍ക്ക് വളരാന്‍ സാദ്ധ്യമല്ല. മേല്പറഞ്ഞ ഘടകങ്ങളുടെ അനുപാതത്തില്‍ ഏറ്റക്കുറച്ചിലുണ്ടാകും. എന്നാല്‍ ഈ അനുപാതം നിലനിര്‍ത്താന്‍ സാധിക്കുന്നിടത്തോളം മണ്ണ് ആരോഗ്യമുളളതാണ് എന്നുപറയാം . വളരെക്കാലം ഈ രീതിയില്‍ തുടരുമ്പോള്‍ മേല്‍മണ്ണ്, അടിമണ്ണ്, എന്നിങ്ങനെ വ്യത്യസ്തങ്ങളായ അടുക്കുകകള്‍ രൂപം കൊള്ളുന്നു. ഏറ്റവും മുകളിലത്തെ ഭാഗത്തായിരിക്കും എപ്പോഴും സസ്യങ്ങളുടേയും മറ്റും ജന്തുജാലങ്ങളുടേയും അവശിഷ്ടങ്ങളും മറ്റും അടിഞ്ഞുകൂടുക. ഇവ ദ്രവിച്ചു മണ്ണിലേക്ക് ചേരുമ്പോഴാണ് മണ്ണില്‍ ജൈവാംശം രൂപപ്പെടുന്നത് . ഇങ്ങനെ ജൈവാംശം കലര്‍ന്ന മേല്‍മണ്ണ് കറുപ്പോ തവിട്ടു കലര്‍ന്ന കറുപ്പോ നിറത്തില്‍ കാണപ്പെടുന്നു. ഈ മേല്‍മണ്ണാണ് ഏറ്റവും ഫലപുഷ്ടമായത് . ഈ ഭാഗത്തെ മണ്ണിനു നല്ല ഒരു ഘടനയും രൂപപ്പെട്ടിട്ടുണ്ടാവും. ഈ മണ്ണ് സസ്യ വളര്‍ച്ചക്കുതകുന്ന തോതില്‍ വായുസഞ്ചാരമുളളതും വെളളവും മൂലകങ്ങളും മറ്റും ആവശ്യമായ തോതില്‍ സംഭരിച്ചുവെക്കാന്‍ കഴിവുളളതും ആയിരിക്കും. മേലൊഴുക്കിലും മറ്റും മേല്‍഼മണ്ണ് ഒരിക്കലും നഷ്ടപ്പെട്ടുപോകരുതെന്നു പറയുന്നത് ഇതു കൊണ്ടാണ്.

കേരളത്തിലെ മണ്ണിനങ്ങള്‍

 

കേരളത്തില്‍ പ്രധാനമായും എട്ടു തരത്തിലുള്ള മണ്ണിനങ്ങളാണ് കണ്ടുവരുന്നത്‌. തീരദേശ മണ്ണ്, എക്കല്‍ മണ്ണ്, കരിമണ്ണ്, വെട്ടുകല്‍ മണ്ണ്, ചെമ്മണ്ണ്‍, മലയോര മണ്ണ്, കറുത്ത പരുത്തി മണ്ണ്, വനമണ്ണ്‍ എന്നിവയാണ്.

1.തീരദേശമണ്ണ് (Costal alluvium)

കേരളത്തിലെ പടിഞ്ഞാറന്‍ സമുദ്ര തീരത്തും അതിനോട് ചേര്‍ന്നു കിടക്കുന്ന സമതല (ഉയരം 0-5 മീറ്റര്‍) പ്രദേശത്തും കണ്ടു വരുന്നു.

മഞ്ഞ കലര്‍ന്ന തവിട്ടു നിറമുള്ള ഈ മണ്ണില്‍ 80ശതമാനത്തിനു മുകളില്‍ മണലിന്‍റെ അംശമാണ്. ഫലപുഷ്ടി ഏറ്റവും കുറവ്.

പരിമിതികള്‍

  • സസ്യാഹാരമൂലകങ്ങള്‍ വളരെ കുറവ്.
  • ഉയര്‍ന്ന് ജലനിരപ്പ്‌ ഈ മണ്ണിന്റ പ്രത്യേകതയാണെങ്കിലും ഈര്‍പ്പം നിലനിര്‍ത്താനുള്ള കഴിവ് വളരെ കുറവ്,

പരിപാലനമുറകള്‍

  • ജൈവ വളങ്ങളും ജൈവ പദാര്‍ത്ഥങ്ങളും വളരെ അധികം ചെര്‍ക്കുക.
  • ചെടിയുടെ ചുവട്ടില്‍ ചെളി കലര്‍ന്ന മണ്ണ് ഇടുക. തൊണ്ട്, ചകിരിചോറ് എന്നിവ ചേര്‍ക്കുക.
  • വേനല്‍ക്കാലത്ത് ഡ്രിപ്പ് ഇറിഗേഷന്‍ നടത്തുക .
  • രാസവളങ്ങള്‍ തവണകളായി ചേര്‍ക്കുക .
  • ധാരാളം മഴയുള്ളപ്പോള്‍ വളപ്രയോഗം ഒഴിവാക്കുക.

പ്രധാനവിളകള്‍

തെങ്ങ്, കശുമാവ്, മറ്റു ഫല വൃക്ഷങ്ങള്‍

2.എക്കല്‍ മണ്ണ് (Alluvial Soil)

പുഴയോരങ്ങളിലും അതിനോട് ബന്ധപ്പെട്ട സമതല പ്രദേശത്തും  കണ്ടുവരുന്നു. ഭൌതിക രാസസ്വഭാവങ്ങളില്‍ പ്രാദേശികമായി വ്യത്യസ്തത കാണിക്കുന്നു.

താരതമ്യേന ജൈവാംശം ഉള്ളവയാണ്.  സാമാന്യം ഫലപുഷ്ടി ഉണ്ട്,

പരിമിതികള്‍

  • മഴക്കാലത്ത് വെള്ളപ്പൊക്ക ഭീഷണി,
  • ഉയര്‍ന്ന ജലനിരപ്പ്‌.
  • നീര്‍വാര്‍ച്ച കുറവ്.
  • പുഴക്കരയിലെ മണ്ണും കൃഷിയും ഒലിച്ചു  പോകാനുള്ള സാധ്യത.

പരിപാലനാമുറകള്‍

  • പുഴയോരങ്ങളില്‍ കരിങ്കല്‍ ഭിത്തി കെട്ടി സംരക്ഷണം.
  • വേനല്‍ക്കാലത്ത് ജലസേചനം.
  • ജലാംശത്തിന്റ തോത് നോക്കി വര്‍ഷത്തില്‍ രണ്ടോ മൂന്നോ തവണകളായുള്ള രാസവള പ്രയോഗം.
  • ചെലവു കുറഞ്ഞ മണ്ണു സംരക്ഷണ പ്രവര്‍ത്തനങ്ങള്‍.
  • നീര്‍വാര്‍ച്ച സൗകര്യം മെച്ചപ്പെടുത്തുക.

പ്രധാന വിളകള്‍

നെല്ല്, തെങ്ങ്, കമുക്, വാഴ, പച്ചക്കറികള്‍, ജാതി, ഗ്രാമ്പു, പയറു വര്‍ഗ്ഗങ്ങള്‍.

3.കരിമണ്ണ് (Kari Soil)

ആലപ്പുഴ, കോട്ടയം, എന്നീ ജില്ലകളില്‍ കടല്‍നിരപ്പിനു താഴെയുള്ള ചതുപ്പു നിലങ്ങളില്‍ കാണപ്പെടുന്നു.  രചനയില്‍ മണല്‍ കലര്‍ന്ന കളിമണ്ണ്.  നിറം കറുപ്പ്.  ഏകദേശം 50 സെന്റിമീറ്ററിനു താഴെ അഴുകിയ ജൈവ പദാര്‍ത്ഥങ്ങളും തടിയുടെ  അംശവും വളരെ അധികം കാണപ്പെടുന്നു.

പരിമിധികള്‍

  • വളരെ കുറഞ്ഞ നീര്‍വാര്‍ച്ച.
  • കടുത്ത അമ്ലത.
  • അയണിന്റയും അലുമിനിയത്തിന്റെയും ലേയത്വം കൂടിയ ലവണങ്ങളുടെ അധികരിച്ച തോത്.
  • വര്‍ഷകാലത്തില്‍ ഏറിയ സമയവും വെള്ളത്താല്‍ മൂടപ്പെട്ടിരിക്കുന്നു.
  • ഫോസ്ഫറസ്, കുമ്മായാംശം എന്നിവയുടെ അഭാവം.
  • ഗന്ധകം, അയണ്‍് സള്‍ഫൈഡ് കൂടുതല്‍.

പരിമിതികള്‍

  • അമ്ലത്വം കൂടാതിരിക്കാന്‍ ഈ മണ്ണ് ഒരിക്കലും ഉണങ്ങാന്‍ അനുവദിക്കരുത്.
  • കൃഷിക്ക് മുന്‍പ് വെള്ളം കയറ്റിയിറക്കണം. കൃത്യമായ വളപ്രയോഗം നടത്തണം.

പ്രധാന വിളകള്‍

നെല്ല്

4.വെട്ടുകല്‍മണ്ണ് (Laterite soil)

ഇടനാട്‌ (ഉയരം 20-100 മീറ്റര്‍) മുഴുവനും കാണപ്പെടുന്നു.  രചനയില്‍ ചരല്‍ കലര്‍ന്ന പശിമരാശി മുതല്‍ ചരല്‍ കലര്‍ന്ന കളിമണ്ണ്‍ വരെ. നിറം, മഞ്ഞ കലര്‍ന്ന തവിട്ടു നിറം മുതല്‍ ചുവപ്പു കലര്‍ന്ന തവിട്ടു നിറം വരെ. അമ്ല സ്വഭാവം ഉണ്ട്. മറ്റ് മണ്ണിനങ്ങളെ അപേക്ഷിച്ച് താഴ്ച കുറവ്.

പരിമിതികള്‍

  • അമ്ലത്വം (pH 5.0-6.2)
  • കുറഞ്ഞ ധനായണ വിനിമയശേഷി (CEC)
  • സസ്യാഹാര മൂലകങ്ങളുടെ ലഭ്യത കുറവ്.
  • അയണിന്റയും അലുമിനിയത്തിന്റെയും ഹൈട്രീകൃത ഓക്സൈഡുകളുടെ അധികരിച്ച തോത്.
  • വര്‍ദ്ധിച്ച ചരലംശം കാരണം ഫലപുഷ്ടിയുള്ള മണ്ണിന്റെ തോത് കുറവ്.
  • ഇളക്കമുള്ള മേല്‍മണ്ണ് മൂലം വര്‍ദ്ധിക്കുന്ന മണ്ണൊലിപ്പ് .

പരിപാലന മുറകള്‍

മൊത്തത്തില്‍ ഫലപുഷ്ടി കുറഞ്ഞ മണ്ണ് ആണെങ്കിലും സമീകൃത വളപ്രയോഗ മുറകള്‍ കൊണ്ട് ഇതിന്‍റെ ഉല്പാദനശേഷി വര്‍ദ്ധിപ്പിക്കാം.

  • കുമ്മായം ചേര്‍ക്കുക .
  • ജൈവ വളങ്ങളും ജൈവ പദാര്‍ഥങ്ങളും കൂടാതെ രാസവളങ്ങളും ചേര്‍ക്കുക.
  • മണ്ണിന്‍റെ ജല ആഗിരണ ശേഷി കൂട്ടാന്‍ ചാലുകളില്‍ തൊണ്ട് അടുക്കുക.
  • വേനല്‍ കാലത്തിനു മുമ്പ് മേല്‍മണ്ണ് ഇളക്കിയിടുകയും ഉണങ്ങിയ ഇലകള്‍ കൊണ്ട് പുതയിടുകയും ചെയുക.
  • കൊണ്ടൂരില്‍ കൂടി മണ്ണ് / കല്ല്‌  കയ്യാല കെട്ടി മണ്ണൊലിപ്പ് തടയുക .
  • ജല സംഭരണത്തിന് വേണ്ടി കൊണ്ടുറില്‍കിടങ്ങുകളും കുഴികളും എടുക്കുക .
  • വേനല്‍ക്കാലത്ത് ജലസേചനം നടത്തുക.

പ്രധാന വിളകള്‍

തെങ്ങ്, കുരുമുളക്, വാഴ , മരിച്ചീനി ,കശുമാവ് , കൈതച്ചക്ക.

5.ചെമ്മണ്ണ് (Red Soil)

കേരളത്തിലെ തെക്കന്‍ പ്രദേശങ്ങളില്‍ തിരുവനന്തപുരം, നെയ്യാറ്റിന്‍കര എന്നി താലൂക്കളില്‍ കാണപ്പെടുന്നു. രചനയില്‍ മണല്‍ കലര്‍ന്ന പശിമരാശി.നല്ല താഴ്ചയുള്ളവയാണ്. സസ്യാഹാര മൂലകങ്ങളുടെ അളവ് കുറവ്.

പരിമിതികള്‍

  • കുറഞ്ഞ ധനായണ വിനിമയ ശേഷി (CEC)
  • കുറഞ്ഞ ഫലപുഷ്ടി
  • മണ്ണൊലിപ്പിന് സാധ്യത കൂടുതല്‍
  • ഭുഗര്‍ഭ ജലത്തിന്റെ ലഭ്യത കുറവ്
  • അമ്ല സ്വഭാവം

പരിപാലന മുറകള്‍

  • ജൈവ വളങ്ങളും ജൈവ പദാര്‍ഥങ്ങളും സമീകൃതമായി ചേര്‍ക്കുക.
  • മണ്ണിന്‍റെ ജല ആഗിരണ ശേഷി കൂട്ടാന്‍ ചാലുകളില്‍ തൊണ്ട് അടുക്കുക .
  • വേനല്‍ കാലത്തിനു മുമ്പ് മേല്‍ മണ്ണ് ഇളക്കി ഇടുകയും ഉണങ്ങിയ ഇലകള്‍ കൊണ്ട് പുതയിടുകയും ചെയുക. കുമ്മായം ചേര്‍ക്കുക
  • കോണ്ടുറില്‍ കൂടി മണ്ണ് / കല്ല്‌  കയ്യാല കെട്ടി മണ്ണ് ഒലിപ്പ് തടയുക .
  • വേനല്‍ക്കാലത്ത് ജലസേചനം നടത്തുക.

പ്രധാന വിളകള്‍

  • തെങ്ങ്, കുരുമുളക്, വാഴ , മരിച്ചീനി ,കശുമാവ് , കൈതച്ചക്ക, നിലക്കടല, പച്ചക്കറികള്‍, തീറ്റപുല്ല്.

6.മലയോര മണ്ണ് (Hill soil)

ചരിവ് മാനം കൂടിയ മലകളില്‍ കണ്ടു വരുന്നു. രചനയില്‍ മണല്‍ കലര്‍ന്ന പശിമരാശി. ചരലിന്റെ അംശം വെട്ടുകല്‍ മണ്ണിനെ അപേഷിച്ചു കുറവാണ്‌ എങ്കിലും, ഉരുളന്‍ കല്ലുകള്‍ കാണപ്പെടുന്നു.

നിറം, കടുത്ത തവിട്ടു നിറം മുതല്‍ മഞ്ഞ കലര്‍ന്ന തവിട്ടു നിറം വരെ. വെട്ടുകല്‍ മണ്ണിനെക്കാളും അമ്ല സ്വഭാവം കുറവ്. സാമാന്യം നല്ല താഴ്ചയും നല്ല നീര്‍വാര്‍ച്ചയും ഉണ്ട്

പരിമിതികള്‍

വെട്ടുകല്‍ മണ്ണിനെ അപേഷിച്ചു ഫലപുഷ്ടിയുള്ള മണ്ണ് ആണങ്കിലും താഴ്ന്ന ജലനിരപ്പ്‌, മണ്ണ് ഒലിപ്പ് എന്നിവയാണ് ഇതിന്റെ പ്രധാന പരിമിതികള്‍ .

പരിപാലന മുറകള്‍

  • മണ്ണ് ഒലിപ്പ് തടയുക .
  • ജൈവ പുതയിടുക. ജൈവ വളങ്ങളും രാസവളങ്ങളും പരിമിതമായ തോതില്‍ നല്‍കുക
  • ജലസംഭരണത്തിന് വേണ്ടി കോണ്ടൂര്‍ കിടങ്ങുകളും കുഴികളും എടുക്കുക .
  • വേനല്‍ക്കാലത് ജലസേചനം നടത്തുക.

പ്രധാന വിളകള്‍

റബ്ബര്‍, തെങ്ങ്, കുരുമുളക്, കശുമാവ് , കൈതച്ചക്ക,  മറ്റു ഫലവൃക്ഷങ്ങള്‍ , തേയില, കാപ്പി.

7.കറുത്ത പരുത്തി മണ്ണ് (കാതര മണ്ണ് ) (Black Cotton Soil)

കേരളത്തിലെ പാലക്കാട്‌ ജില്ലയിലെ ചിറ്റൂര്‍ താലൂക്കിന്റെ നിരപ്പുള്ള കിഴക്കന്‍ പ്രദേശങ്ങളില്‍ കണ്ടുവരുന്നു. രചനയില്‍ കളിമണ്ണ്. കടുപ്പമേറിയ കറുപ്പ് നിറം , പൊട്ടാഷും കാത്സ്യവും

മെച്ചമായ തോതിലുള്ള ഈ മണ്ണിനു മിക്കവാറും ക്ഷാര ഗുണമാണ് (pH 6.8-7.8) ധനായണവിനിമയ ശേഷി (CEC)  കൂടുതല്‍.

പരിമിതികള്‍

  • നിലമൊരുക്കുവാന്‍ പ്രയാസം.
  • ജൈവാംശം  കുറഞ്ഞവ ആയതിനാല്‍ കുറഞ്ഞ ഫലപുഷ്ടി .
  • വരണ്ട കാലാവസ്ഥയില്‍ വെടിച്ചു കീറി വിള്ളലുണ്ടാകുന്നു.
  • കുറഞ്ഞ നീര്‍വാര്‍ച്ച
  • നൈട്രജനും ഫോസ്ഫറസും കുറവ്.

പ്രധാന വിളകള്‍

പരുത്തി, കരിമ്പ്‌, നെല്ല്, നിലക്കടല

8.വനമണ്ണ് (Forest Soil)

കേരളത്തിലെ വന പ്രദേശങ്ങളില്‍ കണ്ടു  വരുന്നു. പശിമരാശി മുതല്‍ കളിമണ്ണ് വരെ ഉള്ള രചനയും, നിറം ഇളം തവിട്ടു നിറം മുതല്‍ കടുപ്പമേറിയ തവിട്ടു നിറം വരെ

കാണപ്പെടുന്നു. നല്ല ഫലപുഷ്ടിയും ആഴവും നീര്‍വാര്‍ച്ചയും ഉണ്ട്.

പരിമിതികള്‍

വനനശീകരണം മൂലമുള്ള മണ്ണ് ഒലിപ്പ്

പരിപാലന മുറകള്‍

വന സംരക്ഷണവും വന വല്‍ക്കരണവും വഴി ഈ മണ്ണിനെ സംരക്ഷിക്കാം..

 

സസ്യപോഷണം

 

പ്രകൃതിയിലുളള 118 മൂലകങ്ങളില്‍ ഏതാണ്ട് 60-ല്‍പ്പരം മൂലകങ്ങള്‍ സസ്യശരീരത്തില്‍ കാണപ്പെടുന്നുണ്ട്.എന്നാല്‍ ഇവയെല്ലാം സസ്യവളര്‍ച്ചയ്ക്ക് ആവശ്യമുളളവയല്ല. ഒരു മൂലകം ചെടിയ്ക്ക് ആവശ്യമെന്നു പറയണമെങ്കില്‍ അത് സസ്യകോശ പ്രവര്ത്തനങ്ങളില്‍ നേരിട്ടു പങ്കുവഹിക്കുന്നതായിരിക്കണം . ആ മൂലകത്തിന്റെ അഭാവത്തില്‍ ചെടിക്കു വളര്‍ച്ചയുടെ വിവധഘട്ടങ്ങള്‍ പൂര്‍ത്തിയാക്കാന്‍ കഴിയാതെ വരികയും വേണം . മാത്രമല്ല മറ്റൊരു മൂലകത്തിന് ഇവയുടെ ധര്‍മ്മം നിര്‍വ്വഹിക്കാന്‍ സാധിക്കാതെയുമിരിക്കണം .ഇപ്രകാരം നോക്കുമ്പോള്‍ കേവലം 17 മൂലകങ്ങള്‍ മാത്രമാണ് എല്ലാ സസ്യങ്ങള്‍ക്കും ആവശ്യമെന്ന് ഇതിനകം അസന്നിഗ്ദ്ധമായി തെളിയിക്കപ്പെട്ടിട്ടുളളത്. അവ താഴെപ്പറയുന്നവയാണ് .

1. കാര്‍ബണ്‍

2. ഹൈഡ്രജന്‍ ,

3. ഓക്സിജന്‍

4. നൈട്രജന്‍

5. ഫോസ്ഫറസ്

6. പൊട്ടാസ്യം

7. കാത്സ്യം

8. മഗ്നീഷ്യം

9. സള്‍ഫര്‍

10. ഇരുമ്പ്

11.. മാംഗനീസ്

12,. ചെമ്പ്

13. നാകം

14. ബോറോണ്‍

15. മോളിബ്ഡിനം

16. ക്ലോറിന്‍

17. നിക്കല്‍

കോബാള്‍ട്ട് , സോഡിയം, വനേഡിയം , സിലിക്കണ്‍ എന്നീ മൂലകങ്ങളും ചില ചെടികള്‍ക്ക് ആവശ്യമാണെന്നും കണ്ടിട്ടുണ്ട്.

സസ്യപോഷണ മൂലകങ്ങള്‍ മണ്ണില്‍ കാണപ്പെടുന്നതു വിവിധരൂപങ്ങളിലാണ് . ഒരു മൂലകം തന്നെ പല രൂപത്തില്‍ മണ്ണില്‍ ഉണ്ടാകാം. എന്നാല്‍ ഓരോ മൂലകവും ഓരോ പ്രത്യേക രൂപത്തില്‍ മാത്രമെ ചെടികള്‍ക്കു വലിച്ചടുക്കാന്‍ സാധിക്കൂ. അതുകൊണ്ട് മൂലകങ്ങള്‍ ധാരാളമായി മണ്ണിലുണ്ടായാല്‍ മാത്രം പോരാ അവ വലിച്ചടുക്കാന്‍ പാകത്തില്‍ ജലത്തില്‍ ലയിക്കുന്നവയും വലിച്ചെടുക്കാന്‍ പാകത്തിലുളള രാസരൂപത്തിലുമായിരിക്കണം.

നൈട്രജന്‍ , നൈട്രേറ്റ് (NO3 )എന്ന രാസരൂപത്തിലാണ് എല്ലാ ചെടികളും വലിച്ചെടുക്കുന്നത് എന്നാല് നെല്ലിനു നൈട്രജനെ അമോണിയ (NH4+) രൂപത്തിലും വലിച്ചെടുക്കാന്‍ കഴിയും . പൊട്ടാസ്യം , കാത്സ്യം ,മഗ്നീഷ്യം, നാകം , കോബാള്‍ട്ട് , നിക്കല്‍ ( K+, Ca++, Mg++, Zn++,Co++, Ni+) ഇവ അവയുടെ അയോണിക് രൂപങ്ങളിലും സള്‍ഫര്‍ , മോളിബ്ഡിനം  എന്നിവ സള്‍ഫേറ്റ് (SO4) മോളിബ്ഡേറ്റ് (MoO4) എന്നീ രൂപങ്ങളിലുമാണ്  വലിച്ചെടുക്കപ്പെടുന്നത്. ഫോസ്ഫറസ്  ആകട്ടെ പല രൂപങ്ങളിലും  ആഗീകരണം ചെയ്യപ്പെടുമെങ്കിലും  ഡൈ ഹൈഡ്രജന്  ഫോസ്ഫേറ്റ് (H2PO4) എന്ന രൂപത്തില്‍ വലിച്ചെടുക്കാനാണ്  ചെടികള്‍ ഏറ്റവും ഇഷ്ടപ്പെടുന്നത് . ബോറോണ്  ബോറിക് ആസിഡ് (H3BO3) ആയും ക്ലോറിന്‍ അയോണ് രൂപത്തിലും (CI) വലിച്ചെടുക്കുന്നു. ഇരുമ്പ് , ചെമ്പ് , മാംഗനീസ് ഇവയ്ക്ക്  അയോണിക് രൂപങ്ങള്‍ ഓക്സീകരണ  അവസ്ഥയിലും നിരോക്സീകരണ അവസ്ഥയിലും  വ്യത്യസ്തമായിരിക്കും . നിരോക്സീകരണ അവസ്ഥയില്‍ കാണപ്പെടുന്ന രൂപങ്ങളായ യഥാക്രമം Fe++, Cu++, MN++ എന്നിവയാണ് ചെടികള്‍ ആഗിരണം ചെയ്യാനിഷ്ടപ്പെടുന്നത്.

സസ്യപോഷണ മൂലകങ്ങള്‍

ചെടികള്‍ക്കാവശ്യമുളള മൂലകങ്ങളില്‍ കാര്‍ബണ്, ഓക്സിജന്‍, ഹൈഡ്രജന്‍ എന്നിവ വായുവില്‍ നിന്നും വെളളത്തില്‍ നിന്നും  ലഭിക്കുന്നു. അതു  കൊണ്ട് ഇവയ്ക്ക്  ക്ഷാമമുണ്ടാകാറില്ല ബാക്കി മൂലകങ്ങള്‍ മണ്ണില്‍ നിന്നും കിട്ടേണ്ടവയാണ്

മണ്ണില്‍ നിന്നു കിട്ടേണ്ട മൂലകങ്ങളെ മൂന്നു വിഭാഗങ്ങളാക്കിത്തിരിച്ചിട്ടുണ്ട്.

1.. പ്രധാനമൂലകങ്ങള്‍

2.  ഉപ പ്രധാനമൂലകങ്ങള്‍

3. സൂക്ഷ്മ മൂലകങ്ങള്‍

പ്രധാനമൂലകങ്ങള്‍

നൈട്രജന്‍ , ഫോസ്പറസ്, പൊട്ടാസ്യം എന്നിവയാണ്  പ്രധാനമൂലകങ്ങള്‍ . കൂടിയ അളവില്‍ വേണ്ടിവരുന്നതു കൊണ്ടാണ് ഇവയുടെ ലഭ്യത ഉറപ്പുവരുത്താന്‍ മണ്ണില്‍ രാസവളങ്ങള്‍ ചേര്‍ക്കുന്നത് . അതു  കൊണ്ട്  ഇവയെ രാസവള മൂലകങ്ങളള്‍  എന്നും പറയുന്നു.

ഉപപ്രധാനമൂലകങ്ങള്‍

കാത്സ്യം, മഗ്നീഷ്യം, സള്‍ഫര്‍ എന്നിവ പ്രധാനമൂലകങ്ങളുടെ  അത്ര അളവ്  ആവശ്യമില്ല. രാസവളമായി ഇവയെ സാധാരണയായി മണ്ണില്‍  ചേര്‍ക്കാറുമില്ല. അതു കൊണ്ട് ഇവയെ  ഉപപ്രധാനമൂലകങ്ങള്‍ എന്നു പറയുന്നു

സൂക്ഷ്മ മൂലകങ്ങള്‍.

വളരെ കുറഞ്ഞ അളവില്‍  വിളകള്‍ക്കാവശ്യമുളള മൂലകങ്ങളാണ് സൂക്ഷ്മ മൂലകങ്ങള്‍. ഒരു ഹെക്ടറിലുളള വിള ഇത്തരം  മൂലകങ്ങള്‍ ഏതാനും ഗ്രാം മാത്രമാണ്  വലിച്ചെടുക്കുന്നത്. എന്നിരുന്നാലും ഇവയുടെ  ലഭ്യത ചെടികള്‍ക്കു വളരെ പ്രധാനമാണ്. ഇരുമ്പ് , മാംഗനീസ്, ചെമ്പ് , നാകം, ബോറോണ്, മോളിബ്ഡിനം,ക്ലോറിന്‍ ,നിക്കല്‍ എന്നിവയാണ് ചെടികള്‍ക്കാവശ്യമുളള സൂക്ഷ്മമൂലകങ്ങള്‍

മൂലകങ്ങളുടെ പ്രധാന ധര്‍മ്മങ്ങള്‍

നൈട്രജന്‍

ചെടികളിലെ പ്രോട്ടീന്‍  നിര്‍മ്മാണത്തിലെ  പ്രധാനഘടകമാണു നൈട്രജന്‍. പ്രോട്ടീനാണു ചെടികളുടെ വളര്‍ച്ചയുടെ പ്രധാനഘടകം. ഇലകള്‍ക്കു പച്ചനിറം കൊടുക്കുന്ന ക്ളോറോഫില്‍ കണികകളുടെ പ്രധാനഘടകം കൂടിയാണ് നൈട്രജന്‍.  നൈട്രജന്റെ  അഭാവത്തില്‍ വളര്ച്ചയെത്തിയ ഇലകളുടെ നിറം മഞ്ഞയാകുന്നു. കൂടാതെ  ചെടികളുടെ വളര്‍ച്ച മുരടിക്കുന്നതും കാണാം.

ഫോസ്ഫറസ്

വേരുകള്‍ വേഗം വളരുന്നതിനും അങ്ങനെ ചെടികളുടെ വളര്‍ച്ച ത്വരിതപ്പെടുത്തുന്നതിനും സഹായിക്കുന്ന മൂലകമാണിത് . അതു കൊണ്ടാണ് നാം ഫോസ്ഫറസ് വളങ്ങള്‍  അടിവളമായി എപ്പോഴും ഉപയോഗിക്കുന്നതി  പെട്ടെന്ന് പുഷ്പിക്കുന്നതിനും കായ്കളുടെ വളര്‍ച്ച മെച്ചപ്പെടുത്തുന്നതിനും ഫോസ്ഫറസ്  ആവശ്യമാണ്. ഈ മൂലകത്തിന്റെ അഭാവത്തില്‍  ഇലകള്‍ക്ക്  നീലകലര്‍ന്ന പച്ചനിറം  കൈവരുന്നതായി കാണാം. വേരുകളുടെ വളര്‍ച്ച മുരടിക്കുന്നതു കൂടാതെ കായ്കളുടെ വളര്‍ച്ചയും മോശമാകുന്നു.

പൊട്ടാഷ്

ചെടികള്‍ക്ക് കരുത്ത് , തണ്ടിന് കൂടുതല്‍ ബലം, രോഗങ്ങളെ  ചെറുക്കാനുളള ശക്തി , വിളര്‍ച്ചയെ ചെറുക്കാനുളള ശക്തി  എന്നിവ നല്കുന്നത് ഈ മൂലകമാണ്. ഇതിന്റെ അഭാവത്തില്‍  ചെടികളുടെ വളര്‍ച്ചയെത്തിയ ഇലകളുടെ അഗ്രഭാഗം കരിയുകയും  തവിട്ടുനിറത്തിലാവുകയും ചെയ്യുന്നു. കായ്കളിലും  വിത്തുകളിലും ചുളിവുകള്‍ ഉണ്ടാകുന്നതിനും  ഇതിന്റെ അഭാവം വഴിതെളിക്കും.

കാത്സ്യം

സസ്യകോശഭിത്തിയുടെ പ്രധാനഘടകമാണിത്. കൂടാതെ വേരുകളുടെ വളര്‍ച്ചയ്ക്കും കാത്സ്യം  അത്യാവശ്യമാണ്. കൂമ്പുകളില്‍ അഗ്രഭാഗങ്ങളുടെ വിളര്‍ച്ച മുരടിച്ച് ഒട്ടിപ്പിക്കുന്നത് ഈ മൂലകത്തിന്റെ അഭാവം കാണിക്കുന്നു. മുകുളങ്ങളും പൂക്കളും അസാധാരണമായി കൊഴിഞ്ഞു വീഴുന്നതും കാത്സ്യത്തിന്റെ അഭാവമാണ് കാണിക്കുന്നത്.

മഗ്നീഷ്യം

ഇലകളുടെ പച്ചനിറത്തിനു ഹേതുവായ ക്ലോറോഫില്‍ കണികകളുടെ മദ്ധ്യഭാഗത്തുളള മൂലകമാണ്  മഗ്നീഷ്യം . മൂപ്പെത്തിയ ഇലകളുടെ  അറികിലും ഞരമ്പുകള്‍ക്കിടയിലും  പച്ചനിറെം  മങ്ങുന്നതാണ്  ഈ മൂലകത്തിന്റെ അഭാവത്തിന്റെ പ്രധാന ലക്ഷണം. ഇലകള്‍ ചെറുതാവുക, അവയുടെ മാര്‍ദ്ദവം നശിക്കുക, തണ്ടുകളുടെ ശക്തി ക്ഷയിച്ച് ഇലകള്‍ കൊഴിയുക  എന്നിവയും മഗ്നീഷ്യത്തിന്റെ അഭാവം കാണിക്കുന്നു.

സള്‍ഫര്‍

ക്ലോറോഫില്‍ കണികകളുടെ നിര്‍മ്മാണത്തെ സഹായിക്കുന്ന മൂലകമാണിത്. എണ്ണക്കുരുക്കളില്‍ എണ്ണയുല്പാദനത്തെയും പയറുവര്ഗ്ഗങ്ങളുടെ പേരില്‍ നൈട്രജന്‍ സംഭരിക്കുന്ന മുഴകള്‍ ഉണ്ടാകുന്നതിനെയും ഇതു കാര്യമായി സഹായിക്കുന്നു. കായിക വളര്‍ച്ചമുരടിച്ചു കൂമ്പിലകള്‍ മഞ്ഞളിക്കുന്നത് ഈ മൂലകത്തിന്റെ അഭാവം കൊണ്ടാണ്.

ഇരുമ്പ്

ക്ലോറോഫില്‍ കണികകളുടെ  നിര്‍മ്മാണത്തെ സഹായിക്കുന്നു. ഇലകളില്‍  ഞരമ്പുകള്‍ക്കിടയില്‍ മഞ്ഞളിപ്പു ബാധിക്കുന്നത് ഇരുമ്പിന്റെ അഭാവത്തിലാണ്. ഇരുമ്പിന്റെ അഭാവം രൂക്ഷമായാല്‍ ഇല മുഴുവനായും മഞ്ഞളിക്കും.

മാംഗനീസ്

മാംഗനീസിന്റെ പ്രവര്‍ത്തനം ഏതാണ്ട്  ഇരുമ്പിന്റേതുപോലെ തന്നെയാണ്. തളിരിലകളില്‍ ഞരമ്പുകള്‍ക്കിടയില്‍  മഞ്ഞളിപ്പു ഉണ്ടാകുന്നതാണു മാംഗ്നീസിന്റെ അഭാവം കാണിക്കുന്നത്.

ബോറോണ്

മണ്ണിലല്‍ നിന്നും വേരുകള്‍ നൈട്രജന്‍ വലിച്ചെടുക്കുന്നതിനു സഹായിക്കുന്ന മൂലകം ബോറോണാണ്. കോശങ്ങളുടെ ഭിത്തിയുടെ ഒരു ഘടകം  കൂടിയാണു ബോറോണ്. ഇതിന്റെ അഭാവത്തിലല്‍ വേരുകളുടെ വളര്‍ച്ച മുരടിക്കുന്നതോടൊപ്പം കൂമ്പുകളുടെ അഗ്രമുകുളങ്ങള്‍ നശിക്കുകയും  ചെയ്യുന്നു. ചെടികളില്‍ പുഷ്പിക്കുന്നതിനും താമസമുണ്ടാകുന്നു. ഫലങ്ങളുടെ മാര്‍ദ്ദവം കുറയുന്നു.

നാകം

ഇതിന്റെ അഭാവത്തില്‍ പല ചെടികളിലും പലതരം ലക്ഷണങ്ങള്‍ കാണാം.  നെല്ലിന്റെ മൂപ്പെത്തിയ ഇലകളില്‍ തവിട്ടുനിറത്തിലുളള പൊട്ടുകള്‍ പ്രത്യക്ഷപ്പെടുന്നത് ഒരു ലക്ഷണമാണ്.  കൂടാതെ നെല്ലിന്റെ വളര്ച്ചയും മുരടിക്കും.  നാരക വര്‍ഗ്ഗങ്ങളില്‍ തളിരിലകള്‍ മുരടിച്ചു വീതി കുറഞ്ഞു വളരുന്നു.  ഇതിനെ ലിറ്റില് ലീഫ് എന്ന് വിളിക്കുന്നു.

ചെമ്പ്

ചെമ്പിന്റെ  അഭാവത്തില് തണ്ടുകളുടെ ശക്തി ക്ഷയിക്കുകയും  അവ തിരിഞ്ഞു വളരുകയും ചെയ്യും. ചെടികളുടെ വളര്ച്ച മുരടിക്കുകയും  കൂമ്പിലകളുടെ നിറം  മങ്ങുകയും ചെയ്യുന്നത് ഇതിന്റെ അഭാവത്തിലാണ്. കൂടാതെ  തണ്ടുകളുടെ  മുകുളങ്ങള് നശിക്കുന്നതു മൂലം കൂടുതല് ചിനപ്പുകളും ശിഖരങ്ങളും ഉണ്ടാകുകയും ചെയ്യും.

മോളിബ്ഡിനം

പയറു വര്‍ഗ്ഗങ്ങളുടെ  വേരില്‍ നൈട്രജന്‍ ശേഖരിക്കുന്ന പ്രവൃത്തി  ഈ മൂലകത്തിന്റെ  സഹായത്തിലാണ് നടക്കുന്നത്. ഇതിന്റെ അഭാവത്തില്‍  ഇലകള്‍ പൂര്‍ണ്ണമായി വളരില്ല. ചാട്ടവാറിന്റെ  ആകൃതിയില്‍  ഇലകള്‍ പ്രത്യക്ഷപ്പെടുന്നത് ഈ മൂലകത്തിന്റെ അഭാവത്തിലാണ്.

ക്ലോറിന്‍

ചിലയിനം സസ്യങ്ങളില്‍ ഇലകളില്‍ക്കൂടിയുളള ജലനഷ്ടം  നിയന്ത്രിക്കാന്‍ കഴിവുളള മൂലകമാണിത് . ഇലകള്‍  വാടുന്നതാണ്  ക്ലോറിന്റെ അഭാവം കാണിക്കുന്ന ലക്ഷണം.

കോബാള്‍ട്ട്

പയറു വര്‍ഗ്ഗ ചെടികളുടെ വേരില്‍  നൈട്രജന്‍ സംഭരിക്കുന്ന ബാക്ടീരിയകള്‍ക്ക്  ഈ മൂലകം ആവശ്യമാണ്.

 

മണ്ണ്‍,ജലസംരക്ഷണം

 

മണ്ണ്‍, ജല സംരക്ഷണത്തിന്റെ ആവശ്യകത

മണ്ണും ജലവും ജൈവസമ്പത്തും അടങ്ങുന്ന പ്രകൃതി വിഭവത്രയത്തിന്റെ വികസനമാണ് ഭുമിയില്‍ ജീവന്റെ നിലനില്‍പ്പിനു അടിസ്ഥാനം . പ്രക്രതി വിഭവങ്ങളുടെ സന്തുലിതവും ശാസ്ത്രീയവുമായ പരിപാലനവും വിനിയോഗവും സുസ്ഥിരമായ കാര്‍ഷിക വികസനത്തിന് അനിവാര്യമാണ്.

രണ്ടു കാലവര്‍ഷങ്ങളാല്‍ അനുഗ്രഹീതമായ നമ്മുടെ സംസ്ഥാനം മഴക്കാലം കഴിഞ്ഞാല്‍ കടുത്ത വരള്‍ച്ചയുടെ പിടിയില്‍ അമരുന്നു . രൂക്ഷമായ മണ്ണ്‍ ഒലിപ്പ് മൂലം ഉത്പാദന ക്ഷമമായ മേല്‍മണ്ണ് നശിക്കുകയും സസ്യങ്ങള്‍ക്കു ആവശ്യമായ പോഷകങ്ങള്‍ നഷ്ടപെടുകയും കാര്‍ഷിക ഉത്പാദനം കുറയുകയും ചെയുന്നു. ജലസംഭരണികളിലും നദീ മുങ്ങളിലും മണ്ണടിയുകയും മഴവെള്ളം മണ്ണിലേക്ക് കിനിഞ്ഞിറങ്ങാതെ ഭുജല ലഭ്യത കുറയുകയും ചെയുന്നു.

നീര്‍ത്തട പരിപാലനം (Watershed Management)

പ്രകൃതി വിഭവ സംരക്ഷണത്തിന് ഏറ്റവും അനുയോജ്യമായ മാതൃക നീര്‍ത്തടാധിഷ്ടിതമായ പരിപാലനം ആണെന്ന് ശാസ്ത്രീയമായി അംഗീകരിക്കപെട്ടിട്ടുണ്ട്. മഴവെള്ളം ഒട്ടും നഷ്ടപ്പെടുത്താതെ മണ്ണില്‍ പിടിച്ചു വെക്കാനും മണ്ണും ജൈവ വൈവിധ്യവും സംരക്ഷിക്കാനും നീര്‍ത്തടാധിഷ്ടിത മണ്ണ് ജല പരിപാലനം മാത്രമാണ് പോം വഴി . നീര്‍ത്തട വികസന പ്രവര്‍ത്തനങ്ങളില്‍ ഏറ്റവും പ്രാധാന്യമര്‍ഹിക്കുന്ന പ്രവര്‍ത്തനങ്ങള്‍ കൃഷി ഭുമികളിലെ ജല സംരക്ഷണ പ്രവര്‍ത്തനങ്ങള്‍ , സംരക്ഷണ കൃഷി മുറകള്‍, നീര്‍ച്ചാല്‍ സംരക്ഷണ മാര്‍ഗങ്ങള്‍, മഴവെള്ള സംഭരണം എന്നിവയാണ്.

  1. കൃഷി ഭുമികളിലെ മണ്ണ്‍, ജല സംരക്ഷണ പ്രവര്‍ത്തനങ്ങള്‍

മഴക്കാലത്ത്‌ കിട്ടുന്ന ജലം വേനല്‍ക്കാലത്തെക്ക് ശേഖരിച്ചു വയ്ക്കുന്നതിനു ഏറ്റവും ഉത്തമമായ സംഭരണി മണ്ണ് തന്നെയാണ്. ഭൂമിയുടെ ചരിവും മണ്ണിന്‍റെ സ്വഭാവവുമനുസരിച്ചു ഉള്‍ക്കൊള്ളാവുന്നത്ര മഴവെള്ളം വീഴുന്നിടത്ത് തന്നെ സംഭരിക്കുക എന്നതാണ് ലക്ഷ്യം

1. കയ്യാലകള്‍/ ബണ്ടുകള്‍

മിതമായ ചരിവുള്ള പ്രദേശത്ത്അവലംബിക്കാവുന്ന ഉത്തമമായ മണ്ണ് സംരക്ഷണ മാര്‍ഗമാണിത്. സമോച്ചരേഖയിലൂടെ മണ്ണ് കൊണ്ട് ബണ്ട് നിര്‍മിക്കാവുന്നതാണ്.

ഈ ബണ്ടുകളെ തീറ്റപ്പുല്ല് നട്ടു ബലപ്പെടുത്താവുന്നതാണ്

 

 

2. കല്ല്‌ കയ്യാലകള്‍


താരതമ്യേന ചരിവ് കൂടിയ പ്രദേശത്ത് സമോച്ചരെഖയിലൂടെ കല്ലടുക്കി മണ്ണിട്ട്‌ ബലപ്പെടു
ത്തുന്നതാണ് കല്ലു കയ്യാലകള്‍
. മഴവെള്ളത്തെ തടഞ്ഞു നിര്‍ത്തി

മണ്ണിലേക്ക് ഇറക്കാം . ബണ്ടുകള്‍ക്ക് മുകളില്‍ തീറ്റപ്പുല്ല് , പൈനാപ്പിള്‍ എന്നിവ വളര്‍ത്തി കൂടുതല്‍ ബലപ്പെടുത്താം.

 

3. വേദികകള്‍/ തട്ടുതിരിക്കല്‍

ചെരിവുള്ള ഭുമിയെ നിരപ്പുള്ള നിരവധി തട്ടുകളാക്കി കൃഷി ചെയ്യാന്‍ പാപ്പെടുത്തിയെടുക്കുന്ന രീതിയാണിത് . വേദികകളില്‍ ജലം തങ്ങി നിന്ന് മണ്ണിലേക്ക് ഊര്‍ന്നിറങ്ങുന്നു . വേദികകളുടെ ആയുസ് കൂട്ടുന്നതിനു അനുയോജ്യമായവിളകളും കൃഷി രീതികളും തെരഞ്ഞെടുക്കേണ്ടത് ആവശ്യമാണ്.

4. കോണ്ടൂര്‍ ട്രെഞ്ചുകള്‍

കോണ്ടൂര്‍ രേഖയിലൂടെ ചാലുകള്‍ കീറി ആ മണ്ണ് കൊണ്ട് ചാലിന് താഴെ ബണ്ട് പിടിപ്പിച്ചു വേണം ഇവ നിര്‍മിക്കുവാന്‍. ബണ്ടിനു മുകളില്‍ പുല്ലു വച്ച് പിടിപ്പിക്കാവുന്നതുമാണ്.മണ്ണിടിച്ചിലും ഉരുള്‍പൊട്ടലുമുള്ള ചെരിവ് കൂടിയ പ്രദേശങ്ങളില്‍ ഇവ ഒഴിവാക്കേണ്ടതാണ്.

 

5. മഴക്കുഴികള്‍

ചരിവിനു കുറുകെ സമോച്ചരേഖയില്‍ നിശ്ചിത അകലത്തില്‍ കുഴികള്‍ നിര്‍മിച്ചു കൃഷിയിടത്തിലെ മണ്ണും ജലവും ഒഴുകി നഷ്ടപ്പെടാതെ സംരക്ഷിക്കാം. ഇവയില്‍ നിറഞ്ഞു ജലം സാവധാനം മണ്ണിലേക്കിറങ്ങുന്നു.

 

6. വൃക്ഷത്തടങ്ങള്‍

വൃക്ഷത്തലപ്പുകളില്‍ വീഴുന്ന മഴവെള്ളം അതതു വൃക്ഷങ്ങളുടെ ചുവട്ടില്‍ അനുയോജ്യമായ വലിപ്പത്തില്‍ തയ്യാറാക്കിയ തടങ്ങളില്‍ തന്നെ സംഭരിച്ചു സാവധാനം മണ്ണിലേക്ക് ഇറക്കാം.

 

 

7. സസ്യപ്രബലനങ്ങളോടുകൂടിയ മണ്‍തിടിലുകള്‍

ചെറിയ ചരിവുകളില്‍ നിശ്ചിത കോണ്ടൂര്‍ രേഖയിലൂടെ മണ്‍തിടിലുകള്‍ ഉണ്ടാക്കുകയും അവയ്ക്ക് മീതെ തീറ്റപ്പുല്ലോ , കുറ്റിചെടികളോ വച്ച് പിടിപ്പിക്കുകയും ചെയുന്ന രീതിയാണിത് . സസ്യങ്ങളുടെ വേരിറങ്ങി മണ്‍തിടിലുകള്‍ ബലപ്പെടുകയും ചെയ്യും .

8. പുല്‍വരമ്പുകള്‍ / തിരണകള്

ചരിവിനു കുറുകെ കോണ്ടൂര്‍ രേഖകളില്‍ തീറ്റപ്പുല്ല് കൊണ്ട് തിരണകള്‍ ഉണ്ടാക്കുന്ന രീതിയാണിത് . രാമച്ചവും ഫലപ്രദമാണ്. പടരുന്ന വേരുള്ള പുല്ചെടികളാണ് അഭികാമ്യം.

9. ചെറു കുളങ്ങള്‍

പുരയിടത്തില്‍ നിന്നും വെള്ളം ഒഴുകി പോകുന്ന സ്ഥലങ്ങളില്‍ മഴക്കാലത്തിനു മുമ്പായി ചെറു കുളങ്ങള്‍ നിര്‍മിച്ചു ജലവും അതിനൊപ്പം ഒഴുകിപോകുന്ന

മണ്ണും തടഞ്ഞു നിര്‍ത്താം. വശങ്ങള്‍ പുല്ലു വച്ച് ബലപ്പെടുത്താവുന്നതാണ്



  1. സംരക്ഷണ കൃഷി മുറകള്‍

ശാസ്ത്രീയമായ കൃഷി രീതികളിലൂടെ പുരയിടത്തില്‍ നിന്നും മഴ വെള്ളം ഒഴുകി നഷ്ടപ്പെടാതെ സാവധാനം മണ്ണിലേക്ക് താഴ്ത്താം.

1. കോണ്ടൂര്‍ കൃഷി

ഭുമിയുടെ ചരിവിനു കുറുകെ കോണ്ടൂര്‍ വരമ്പിന് സമാന്തരമായി കൃഷി ചെയ്യുന്നതിനെ കോണ്ടൂര്‍ കൃഷി എന്ന് പറയുന്നു. മഴ വെള്ളം പിടിച്ചു നിര്‍ത്തുകയും

ജലം മണ്ണിലേക്ക് ഊര്‍ന്നിറങ്ങി മണ്ണ് ഒലിപ്പ് കുറയ്ക്കുകയും ഭുമി കൂടുതല്‍ കൃഷി യോഗ്യമാക്കുകയും ചെയുന്നു.

2. ബഹുതല കൃഷി

ഉയരം കൂടിയതും കുറഞ്ഞതുമായ സസ്യങ്ങള്‍ നിശ്ചിത രീതിയില്‍ കൃഷി ചെയ്യുന്ന സമ്പ്രദായമാണിത്. സസ്യങ്ങള്‍ തമ്മില്‍ സൂര്യ പ്രകാശത്തിനോ

വായുവിനോ വെള്ളത്തിനോ പോഷകങ്ങള്‍ക്കോ വേണ്ടിയുള്ള മത്സരം ഉണ്ടാകുന്നില്ല, മാത്രമല്ല രോഗ-കീടാക്രമണം കുറയ്ക്കുകയും പരിപാലനം

താരതമ്യേന എളുപ്പമാവുകയും ചെയുന്നു.

3. ഇടവരികൃഷി


മണ്ണ് ഒലിപ്പ് തടയുന്ന വിളകളും
, മണ്ണിളക്കല്‍ ആവശ്യമുള്ള വിളകളും ഒന്നിടവിട്ടുള്ള വരികളില്‍ കൃഷി ചെയ്യുന്ന സമ്പ്രദായമാണ് ഇടവരികൃഷി.

താരതമ്യേന ചരിവ് കുറഞ്ഞ പ്രദേശത്താണ് ഈ മാര്‍ഗം ഫലപ്രദം.

4. സമ്മിശ്ര കൃഷി

പ്രകൃതി വിഭവ സംരക്ഷണത്തിനും കര്‍ഷകന്‍റെ വരുമാനം വര്‍ധിപ്പിക്കാനും ഉതകുന്ന കൃഷി രീതിയാണിത്. ആഴത്തില്‍ വേരുകളുള്ള വിളകളോടൊപ്പം ഉപരിതലത്തില്‍ വ്യാപിക്കുന്ന വേരുകളുള്ള വിളകള്‍ ഒരുമിച്ചു കൃഷി ചെയ്യാം.

5. ഇടവിള കൃഷി

തെങ്ങിന്‍ തോപ്പുകളിലും മറ്റും വിളകള്‍ക്കിടയില്‍ ധാരാളം സ്ഥലം ലഭിക്കുന്നു . സൂര്യ പ്രകാശവും മണ്ണിലെ ഈര്‍പ്പവും ഉപയുക്തമാക്കി

വിവിധ തരത്തിലുള്ള വിളകള്‍ കൃഷി ചെയ്യാവുന്നതാണ് . മണ്ണില്‍  കൂടുതല്‍ ആവരണം സൃഷ്ടിക്കുന്നതോടൊപ്പം കര്‍ഷകന്‍റെ വരുമാനവും വര്‍ധിക്കുന്നു.

6. പുതയിടല്‍

കൃഷി ഭുമിയിലെ ചപ്പുചവറുകള്‍, പച്ചില വള ചെടികള്‍ എന്നിവ ഇട്ടു മണ്ണിനു ആവരണം സൃഷ്ടിക്കുന്നതാണ് പുതയിടല്‍. മണ്ണിലെ ജലാംശം നിലനിര്‍ത്തുകയും ജീര്‍ണിക്കുമ്പോള്‍ ജൈവാംശമായി മാറുകയും ചെയ്യുന്നു. അങ്ങനെ മണ്ണിലെ ജൈവ ഘടങ്ങളും സൂക്ഷ്മ ജീവികളും വര്‍ധിച്ചു മണ്ണിനെ ഫലസംപുഷ്ടമാക്കുന്നു.

7. വിള പരിവര്‍ത്തനം

ഒരേ സ്ഥലത്ത് ഓരോ പ്രാവശ്യവും വ്യത്യസ്ത വിളകള്‍ കൃഷി ചെയ്യുന്നത് മണ്ണിന്‍റെ ജലാഗിരണ ശേഷിയും വിഭവ സംരക്ഷണ ശേഷിയും വര്‍ധിപ്പിക്കുകയും രോഗ-കീടാക്രമണങ്ങള്‍ കുറയ്ക്കുകയും ചെയ്യും. വ്യതസ്ത കുടുംബത്തില്‍പ്പെട്ട വിളകള്‍ കൃഷി ചെയുന്നതാണ് ഉചിതം . ഉദാ- പയര്‍, നെല്ല്, പച്ചക്കറി.

8. പുല്‍കൃഷി

പുല്‍കൃഷി ചെലവു കുറഞ്ഞ ഒരു മണ്ണ് സംരക്ഷണ മാര്‍ഗമാണ്. മണ്ണിന്‍റെ ജലാഗിരണ ശേഷി വര്‍ധിപ്പിക്കുമെന്ന് മാത്രമല്ല മണ്‍തരികളെ കൂട്ടിയോജിപ്പിച്ച് വേരുപടലങ്ങള്‍ മണ്ണൊലിപ്പ് തടയുന്നു. തീറ്റപ്പുല്‍ വച്ചു പിടിപ്പിച്ചാല്‍ കാലിത്തീറ്റയായി കൂടി ഉപയോഗിക്കാം

9. ആവരണവി ളകള്‍

തോട്ടങ്ങളില്‍ ആവരണ വിളകള്‍ വളര്‍ത്തിയാല്‍ മഴത്തുള്ളികള്‍ നേരിട്ട് മണ്ണില്‍ പതിച്ചു മണ്ണ് ഒലിപ്പ് ഉണ്ടാകുന്നതു തടയാം. വിവിധ തരം പയര്‍ വര്‍ഗത്തില്‍പ്പെട്ട ചെടികളാണ് ഉപയോഗിക്കുന്നത് . ഇത് കര്‍ഷകന് അധിക വരുമാനം നേടികൊടുക്കുകയും മണ്ണിലെ നൈട്രജന്‍റെ അളവ് വര്‍ധിപ്പിക്കുകയും ചെയുന്നു.

10. ജൈവവേലികള്‍

ചരിവുകള്‍ക്ക് കുറുകെ സസ്യങ്ങള്‍ വേലിപോലെ നിരയായി വച്ച് പിടിപ്പിക്കുന്നതാണ് ജൈവവേലികള്‍. ശീമക്കൊന്ന, സുബാബുള്‍, മുരിങ്ങ, ഔഷധ സസ്യങ്ങള്‍ തുടങ്ങിയവ ഇതിനായി ഉപയോഗിക്കാം. പച്ചിലവളമായും കാലിത്തീറ്റയായും, പുതയിടാനും മറ്റും ഇവ ഉപയോഗിക്കാമെന്നുമാത്രമല്ല , കര്‍ഷകന് വരുമാന മാര്‍ഗവുമാണ്‌.

11. തരിശ് നിരയിടല്‍

ചരിവിനെതിരെ ഇടയ്ക്കിടെ കുറച്ചു സ്ഥലം കൃഷി ചെയ്യാതിരിക്കുക എന്ന രീതിയാണിത്. കൃഷി ചെയ്യാതെ തരിശിടുന്ന ഭാഗത്ത്‌ പുല്ലും മറ്റും യഥേഷ്ടം വളരാന്‍ അനുവദിക്കണം. ഇത് മണ്ണിന്‍റെ ഫലപുഷ്ടി വര്‍ധിപ്പിക്കുന്നതിനു കാരണമാകും. കൃഷി ചെയ്യുന്ന ഭാഗത്ത്‌ നിന്നും ഇളകിയ മണ്ണ് ഒലിച്ചു പോകാതെ ഈ സ്ഥലത്ത് നിക്ഷേപിക്കപ്പെടുന്നു.

12. സീറോ ടില്ലേജ്

വിളവെടുപ്പിനു ശേഷം ബാക്കി നില്‍ക്കുന്ന സസ്യാവശിഷ്ടങ്ങള്‍ നിലനിര്‍ത്തി, ണ്ണിളക്കല്‍ തുടങ്ങിയ പ്രവര്‍ത്തനങ്ങള്‍ ചെയ്യാതെ വിത്തിടുന്ന ഒരു സംബ്രദായമാണിത് . മണ്ണിലെ ജലാംജലാംശം സംരക്ഷിക്കുന്നതിനും മണ്ണ്ഒലിപ്പു തടയാനും ഇത് സഹായിക്കും.

13. കാര്‍ഷിക വനവത്കരണം

അനുയോജ്യമായ ഇനം വൃക്ഷങ്ങള്‍ നട്ട് പിടിപ്പിക്കുക വഴി മണ്ണിനെ ഉറപ്പിച്ചു സംരക്ഷിക്കുവാന്‍ കഴിയും. അധിക വരുമാനവും ലഭിക്കും. വിവിധ ഗുണങ്ങളുള്ളതും വിളകളെ പ്രതികൂലമായി ബാധിക്കാത്തതുമായ വൃക്ഷങ്ങള്‍ ഇതിനായി തെരഞ്ഞെടുക്കണം.

നീര്‍ചാലുകളിലെ സംരക്ഷണ പ്രവര്‍ത്തനങ്ങള്‍

നീരൊഴുക്കിന്‍റെ വേഗത കുറച്ചു മണ്ണിടിച്ചില്‍ കുറയ്ക്കാനും, പാര്‍ശ്വങ്ങളുടെ ശോഷണം തടയാനും നീര്‍ച്ചാലുകളില്‍ നടത്തുന്ന സംരക്ഷണ പ്രവര്‍ത്തനങ്ങള്‍ ഉപയോഗപ്രദമാണ്

  • തടയണകള്‍ (ചെക്ക് ഡാം)

നീരൊഴുക്കിനെതിരെ തുടര്‍ച്ചയായി തടസങ്ങള്‍ സൃഷ്ടിച്ചു ജലപ്രവാഹത്തിന്റെ ശക്തി കുറയ്ക്കുക എന്നതാണ് തടയകളുടെ ഉദ്ദേശ്യം. ഭുമിയുടെ ചരിവ്, മഴയുടെ തോത്, തോടിന്റെ വീതി തുടങ്ങിയ വിവിധ ഘടകങ്ങള്‍ പരിഗണിച്ചു നീരൊഴുക്കിന്റെതോത് മനസിലാക്കുകയും അനുയോജ്യമായ ചെക്ക് ഡാം നിര്‍മിക്കുകയുമാണ്‌ വേണ്ടത്.

  1. ജൈവതടയണകള്‍

നീര്‍ച്ചാലുകളുടെ ആരംഭത്തോടടുത്തുള്ള ഭാഗങ്ങളില്‍ ഇത്തരം തടയണകള്‍ ഫലപ്രദമാണ്. പുല്‍വര്‍ഗങ്ങള്‍, പച്ചിലവളങ്ങള്‍ തുടങ്ങിയ ചെടികള്‍ ചാലിന് കുറുകെ വച്ച് പിടിപ്പിച്ചു ഒഴികിവരുന്ന മണ്ണിനെ തടഞ്ഞു നിര്‍ത്താം.

  1. ബ്രഷ് വുഡ് തടയണകള്‍

നീരൊഴുക്ക് ശക്തിയാര്‍ജിക്കുന്ന ഇടങ്ങളില്‍ ഇത്തരം തടയണകള്‍ നിര്‍മിക്കാം. ചാലിന് കുറുകെ നിരകളായി തളിര്‍ക്കുന്ന മരക്കുറ്റികള്‍ നടുകയും അവയ്ക്കിടയില്‍ ചുള്ളിക്കമ്പുകള്‍, മരച്ചില്ലകള്‍, വള്ളിപ്പടര്‍പ്പു തുടങ്ങിയവ നിറച്ചു കെട്ടി ബലപ്പെടുത്തിയുമാണ് ബ്രഷ് വുഡ് തടയണകള്‍ ഉണ്ടാക്കുന്നത്. മരക്കുറ്റികള്‍ ക്രമേണ തളിര്‍ത്ത് തടയണകള്‍ ബലപ്പെടുകയും, നീരൊഴുക്കിന്റെ വേഗത കുറച്ചു മണ്ണ് ഒലിപ്പ് തടയുകയും ചെയുന്നു.

  1. ലോഗ് വുഡ് / പാഴ്ത്തടി തടയണകള്‍

തോടുകളില്‍ നീരോഴിക്കിനു കുറുകെ മരത്തടികള്‍ കെട്ടി ഉറപ്പിചു നിര്‍മിക്കുന്ന തടയണകളാണിത്. ഇവ ഒഴുകി വരുന്ന മണ്ണിനെ തടഞ്ഞു വയ്ക്കുകയും നീരൊഴുക്കിന്റെ വേഗത കുറയ്ക്കുകയും ചെയുന്നു.

  1. ഗാബിയന്‍ ചെക്ക്ഡാം

നിശ്ചിത കട്ടിയുള്ള വേലിക്കമ്പി കൊണ്ട് തയ്യാറാക്കിയ ബോക്സുകള്‍ക്കുള്ളില്‍ കല്ലുകള്‍ നിറച്ചു നിര്‍മ്മിക്കുന്ന തടയണകളാണിവ. കമ്പികള്‍ ഉപയോഗിക്കുന്നതിനാല്‍ പാറകള്‍ ഇളകാതിരിക്കുകയും, ദീര്‍ഘകാലം നിനില്ക്കുകയും ചെയും.


  1. കല്ല്‌, കോണ്‍ക്രീറ്റ് തടയണ

നീരൊഴുക്കിന്റെ തോതും തോടുകളുടെ വീതിയും കൂടുതല്‍ ഉള്ള ഇടങ്ങളില്‍ കാട്ടുകല്ലു , കരിങ്കല്ല്,സിമന്റു തുടങ്ങിയവ ഉപയോഗിച്ച് തടയണകള്‍ നിര്‍മിക്കാം.

  • പാര്‍ശ്വഭിത്തികള്‍

നീര്‍ച്ചാലുകളുടെയും അരുവികളുടെയും അരികു ഇടിഞ്ഞു വീണു നാശോന്മുഖമാകുന്നത് തടയാനാണ് ചാലുകളുടെ പാര്‍ശ്വങ്ങളില്‍ ഭിത്തി നിര്‍മിക്കുന്നത്. കരയിടിച്ചില്‍ തടയാനും, കൃഷി സ്ഥലങ്ങളില്‍ മണ്ണടിയുന്നത് തടയാനും പാര്‍ശ്വഭിത്തികള്‍ സഹായിക്കുന്നു.

  1. സസ്യങ്ങള്‍ കൊണ്ടുള്ള സംരക്ഷണം

നീര്‍ച്ചാലുകളുടെ പാര്‍ശ്വങ്ങളില്‍ കൈ, രാമച്ചം, ഈറ്റ, മുള തുടങ്ങിയ സസ്യങ്ങള്‍ വച്ചുപിടിപ്പിച്ചു പാര്‍ശ്വങ്ങള്‍ ഇടിയുന്നത് നിയന്ത്രിക്കാം. ചെലവു കുറഞ്ഞതും ഫലപ്രദവുമായ മാര്‍ഗമാണിത് .

  1. കയര്‍ ഭൂവസ്ത്രം

തികച്ചും പ്രക്രതി സൌഹാര്‍ദ്ദ രീതിയില്‍ കയര്‍ ഭൂവസ്ത്രം ഉപയോഗിച്ചും തോടുകളുടെ പാര്‍ശ്വങ്ങള്‍ സംരക്ഷിക്കാം. മീതെ പുല്‍വര്‍ഗങ്ങള്‍ വച്ച് ബലപ്പെടുത്തേണ്ടത് ആവശ്യമാണ്.

  1. കല്ല്‌ കൊണ്ടുള്ള പാര്‍ശ്വഭിത്തി

നീരൊഴുക്കിന്റെ തോതും കല്ലിന്റെ ലഭ്യതയും അനുസരിച്ചു കാട്ടുകല്ല്‌ ,കരിങ്കല്ല്, സിമന്റ്‌ തുടങ്ങിയവ ഉപയോഗിച്ചു തോടുകളുടെ പര്‍ശ്വഭിത്തി നിര്‍മിക്കാം.

iv മഴവെള്ള സംഭരണം

പൊതുവേ മഴ ലഭ്യത കൂടുതലുള്ള നമ്മുടെ സംസ്ഥാനത്ത് മഴവെള്ള സംഭരണത്തിന് സാദ്ധ്യതകള്‍ കൂടുതലാണ്. നിലവിലുള്ള ജല സ്രോതസുകളെ ആശ്രയിക്കാതെ തന്നെ നിത്യോപയോഗത്തിനുള്ള വെള്ളം ഈ രീതിയില്‍ സംഭരിക്കാം.

1. ഫെറോ സിമന്റ്‌ സംഭരണി

മേല്‍ക്കൂരയില്‍ നിന്നും ഒഴുകി വരുന്ന വെള്ളത്തെ പി വി സി പാത്തികളിലൂടെ ടാങ്കുകളില്‍ ശേഖരിച്ചു നേരിട്ട് ഉപയോഗിക്കുന്ന ലളിതമായ രീതിയാണിത്.

15000 ലിറ്റര്‍ സംഭരണ ശേഷിയുള്ള ഒരു ഫെറോ സിമന്റ്‌ ടാങ്ക് നിര്‍മ്മിച്ചാല്‍4പേരടങ്ങുന്ന കുടുംബത്തിനു 4 മാസം വരെ പാചകേതര ആവശ്യങ്ങള്‍ക്കുള്ള

വെള്ളം 1000ചതുരശ്ര അടി മേല്‍ക്കൂര വിസ്തീര്‍ണത്തില്‍ നിന്നും കണ്ടെത്താവുന്നതാണ് .

2. ജലസംഭരണികള്‍

ഉപരിതല പ്രവാഹം ശേഖരിക്കാനുതകുന്ന കുളങ്ങള്‍ ഭുഗര്‍ഭ ജലവിതാനം ഉയര്‍ത്തുന്നതിനു അനിവാര്യമാണ്. കൃഷി ആവശ്യത്തിനും മറ്റു ആവശ്യങ്ങള്‍ക്കുമായി കുളങ്ങളുടെ പുനരുദ്ധരണവും പുതിയ ജല സ്രോതസുകളുടെ വികസനവും ആവശ്യമാണ് . ഇതുവഴി ഭുജലസ്രോതസിന്‍മേലുള്ള ആശ്രയത്വം കുറയുകയും വേനല്‍ക്കാലത്തു കൂടുതല്‍ ജലം ലഭ്യമാകുകയും ചെയ്യും.

3. കിണര്‍ റീചാര്‍ജിംഗ്

മഴയുള്ള സമയത്ത് മേല്‍ക്കൂരയില്‍ നിന്നും മഴവെള്ളം പാത്തികളില്‍ക്കൂടി ശേഖരിച്ചു കിണറിനു മുകള്‍വശത്തായി എടുത്ത കുഴികളിലേക്കോ അല്ലെങ്കില്‍ ഫില്‍റ്റര്‍ വഴി നേരിട്ട് കിണറുകളിലേക്കോ ഇറക്കുന്ന രീതിയാണ്‌ ഇത്. വേനല്‍ക്കാലത്ത് ജല ലഭ്യത വര്‍ദ്ധിക്കുന്നതോടൊപ്പം കിണറ്റിലേക്കുള്ള ഉറവകള്‍ ശക്തിപ്പെടുത്തുവാനും ഈ മാര്‍ഗം സഹായിക്കും. ഉപയോഗശൂന്യമായ കിണറുകളും കുഴല്‍കിണറുകളും ഇപ്രകാരം മഴവെള്ളം ഭുജലത്തിലേക്ക് എത്തിക്കാന്‍ ഉപയോഗിക്കാവുന്നതാണ്. കാലക്രമേണ ഇവയിലും ഉറകള്‍ എത്തിത്തുടങ്ങും.

ആണ്ടുതോറും സമൃദ്ധമായി ലഭിക്കുന്ന മഴവെളളം കൃഷിഭൂമിയിലെ മണ്ണില്‍ ഊര്‍ത്തിറങ്ങാന്‍ അനുവദിച്ച് മണ്ണിലെ ഈര്‍പ്പം നിലനിര്‍ത്തുന്നതും ചെലവുകുറഞ്ഞ ജലസംരക്ഷണരീതിയാണ്. നേരത്തെ പറഞ്ഞ മണ്ണു സംരക്ഷണ രീതികള്‍ ജലസംരക്ഷണത്തിനു കൂടി ഉതകുന്നതാണ്.

ചരിവുളള പ്രദേശങ്ങളില്‍ കോണ്ടൂര്‍ ബണ്ടുകള്‍ക്കിടയില്‍ വീണ്ടും വരമ്പും ചാലും കോരി വേണം കൃഷി നടത്താന്‍. സമതലങ്ങളില്‍ ഈ രീതി മഴവെളളം കെട്ടി നിന്നു മണ്ണില്‍ ഊര്‍ന്നിറങ്ങാന്‍ സഹായിക്കും. തെങ്ങിനു ചുറ്റും രണ്ടു മീറ്റര്‍ വീതിയും അര മീറ്റര്‍ താഴ്ചയുമുളള തടങ്ങള്‍ എടുക്കുന്നതു ഒരു ജലസംരക്ഷണ പ്രവൃത്തി കൂടിയാണ്.

മഴവെളളം ശേഖരിക്കാന്‍ കൃഷി സ്ഥലങ്ങളില്‍ അവിടവിടെ മഴക്കുഴികള്‍ എടുക്കുന്ന സമ്പ്രദായം ജലസംരക്ഷണത്തിനു വലിയ തോതില്‍ ഉതകുന്നതായി തെളിയിക്കപ്പെട്ടിട്ടുണ്ട്. അതുപോലെതന്നെ പ്രധാന്യമര്‍ഹിക്കുന്നതാണ് വീടുകളുടെ മുകളില്‍ വീഴുന്ന മഴവെളളത്തെ മഴക്കൊയ്ത്തു (Rain Harvesting) സമ്പ്രദായങ്ങളിലൂടെ ശേഖരിക്കുന്നതും. ഇങ്ങനെ ശേഖരിക്കുന്ന വെള്ളം കുടിവെള്ളക്ഷാമം പരിഹരിക്കുന്നതിനുതിനുകൂടി സഹായകരമാകും.. നാട്ടിലുളള തോടുകള്‍, കുളങ്ങള്‍, മറ്റു തണ്ണീര്‍ത്തടങ്ങള്‍ എന്നിവയെ സംരക്ഷിച്ചു നിലനിര്‍ത്തേണ്ടതിന്റെ പ്രാധാന്യം വളരെ വലുതാണ്.

മണ്ണു പരിശോധന എന്തിന്, എങ്ങനെ?

 

ശാസ്ത്രീയ മണ്ണു പരിശോധന

 

ജിവന്റെ നിലനില്പിന് തന്നെ ആധാരമായ അമൂല്യ വരദാനമാണ് മണ്ണ്‍. നമ്മെ നിലനിര്‍ത്തുന്ന ഈ ജീവാമൃതം തികഞ്ഞ ഉത്തരവാദിത്വത്തോടെ സംരക്ഷിക്കേണ്ടതും അതേപടി വരും തലമുറയ്ക്ക്‌ കൈമാറേണ്ടതും നമ്മുടെ കര്‍ത്തവ്യമാണ്. ഫലപുഷ്ടിയുള്ള മണ്ണാണ് ചെടികളുടെ ആരോഗ്യകരമായ വളര്‍ച്ചയ്കും ഉയര്‍ന്ന ഉത്‌പാദനത്തിനും നിദാനം. മണ്ണ്‍ അറിഞ്ഞ് വളം ചെയ്‌താല്‍ മാത്രമേ നല്ല ഉത്പാദനം ലഭിക്കുകയുള്ളൂ.

വളപ്രയോഗം കൃഷിയില്‍ ഒഴിച്ചുകുടാനാകാത്ത ഒരു ഘടകമാണ്. പൊതുവായ ഒരു രാസവള ശുപാര്‍ശയുടെ അടിസ്ഥാനത്തില്‍ ആണ് കര്‍ഷകര്‍ സാധാരണയായി വളപ്രയോഗം നടത്തുന്നത്. എന്നാല്‍ ഈ പൊതുശുപാര്‍ശ എല്ലാ വിളകള്‍ക്കും ഏത് പ്രദേശത്തേയ്ക്കും എപ്പോഴും ഫലപ്രദമായിരിക്കണമെന്നില്ല. അതിനാല്‍ വളപ്രയോഗം കൂടുതല്‍‌ കാര്യക്ഷമവും ലാഭകരവുമാക്കാന്‍ വേണ്ട ഒരു ശാസ്ത്രീയമായ ഉപാധിയാണ് മണ്ണുപരിശോധന. ഓരോ പ്രദേശത്തെയും മണ്ണിന്‍റെ ഫലപുഷ്ടി അനുസരിച്ച് വിളകള്‍ക്ക് ലഭ്യമാകുന്ന സസ്യപോഷകങ്ങളുടെ അളവ് നിര്‍ണ്ണയിക്കുകയാണ് മണ്ണുപരിശോധന കൊണ്ട് ഉദ്ദേശിക്കുന്നത്.

സസ്യപോഷകങ്ങളെപ്പോലെ തന്നെ മണ്ണിന്‍റെ ഫലപുഷ്ടി നിര്‍ണ്ണയിക്കുന്ന മറ്റൊരു ഘടകമാണ് അതിന്‍റെ അമ്ലക്ഷാരാവസ്ഥ. ഇത് ക്രമീകരിക്കാന്‍ കുമ്മായ വസ്തുക്കള്‍ എത്രത്തോളം ആവശ്യമുണ്ടെന്ന്‍ മണ്ണുപരിശോ ധനയിലൂടെ മനസ്സിലാക്കാന്‍ സാധിക്കും.

മണ്ണു സാമ്പിള്‍ എടുക്കുമ്പോള്‍ ശ്രദ്ധിക്കേണ്ട കാര്യങ്ങള്‍

  • പരിശോധനക്കായി എടുക്കുന്ന സാമ്പിള്‍ കൃഷിസ്ഥലത്തെ മുഴുവന്‍ പ്രതിനിധീകരിക്കുന്നതായിരിക്കണം
  • ഓരോ പറമ്പ് അല്ലെങ്കില്‍ ഓരോ നിലത്തില്‍ നിന്നും പ്രത്യേക സാമ്പിളൂകള്‍ എടുക്കുക.
  • കൃഷിയിടത്തിന്‍റെ വിവിധ സ്ഥലങ്ങളില്‍ നിന്നും ശേഖരിക്കുന്ന മണ്ണ്‍ കൂട്ടികലര്‍ത്തി ഒരു സാമ്പിള്‍ തയ്യാറാക്കി പരിശോധിക്കണം.
  • ഓരോ പ്രദേശത്തെയും മണ്ണിന്‍റെ ഘടന, ആഴം,സ്ഥലത്തിന്‍റെ ചരിവ്, നീര്‍ വാര്‍ച്ചാ സൌകര്യങ്ങള്‍, ചെടികളുടെ വളര്‍ച്ച മുതലായവയുടെ അടിസ്ഥാനത്തില്‍ ഓരോ കൃഷിയിടങ്ങളില്‍ നിന്നും പ്രത്യേക സാമ്പിളുകള്‍ എടുക്കണം
  • ചെടികള്‍ വരിവരിയായി നട്ടിരിക്കുകയാണെങ്കില്‍ രണ്ടു വരികള്‍ക്കിടയില്‍ നിന്നുമാണ് സാമ്പിള്‍ എടുക്കേണ്ടത്.
  • മണ്ണ് സാമ്പിളുകള്‍ കുമ്മായം, ജിപ്സം വളങ്ങള്‍ എന്നിവയുമായി ബന്ധപ്പെടുത്തരുത്. കുമ്മായമോ വളമോ ചേര്‍തതിട്ടുണ്ടെങ്കില്‍ 3 മാസം കഴിഞ്ഞേ സാമ്പിള്‍ എടുക്കാവു.
  • ശേഖരിച്ച മണ്ണ്‍ 6 മാസം കാലാവധിക്ക് ശേഷം പരിശോ ധനയ്ക്ക് അയക്കുവാന്‍ പാടുള്ളതല്ല.

സാമ്പിള്‍ ശേഖരണത്തിനു തീര്‍ത്തും ഒഴിവാക്കേണ്ട സ്ഥലങ്ങള്‍

  • വരമ്പിനോട് ചേര്‍ന്നു കിടക്കുന്ന ഭാഗങ്ങള്‍
  • അടുത്തിടയ്ക്ക് വളം ചെയ്ത സ്ഥലങ്ങള്‍
  • വളക്കുഴികളുടെയൊ കമ്പോസ്റ്റ് വളക്കുഴികളുടെയൊ സമീപം
  • മരങ്ങളുടെ തായ്ത്തടിയുടെ സമീപം
  • വീട് / റോഡ്‌ എന്നിവയോട് ചേര്‍ന്ന പ്രദേശങ്ങള്‍
  • കൃഷിയോഗ്യമല്ലാത്ത സ്ഥലത്തോട് ചേര്‍ന്ന സ്ഥലങ്ങള്‍

 

 

മണ്ണു സാമ്പിള്‍ ശേഖരിക്കുന്നതിനുള്ള ഉപകരണങ്ങള്‍

 

  • മണ്‍വെട്ടി
  • പ്ലാസ്റ്റിക് ബക്കററ്
  • ഓഗര്‍

മണ്ണു സാമ്പിള്‍ ശേഖരിക്കുന്ന വിധം

  • കൃഷി ചെയ്യാന്‍ ഉദ്ദേശിക്കുന്ന വിളയുടെ വേര്പടലത്തിന്‍റെ ആഴത്തില്‍ ഉള്ള മണ്ണ്‍ സാമ്പിളുകള്‍ എടുക്കുക. നെല്ല്, പച്ചക്കറി, പയറുവര്‍ഗ്ഗങ്ങള്‍, മുതലായ ചെടികള്‍ക്ക് 15 സെ.മീ. ആഴത്തിലും മറ്റു വിളകള്‍ക്ക് 25 സെ.മീ. ആഴത്തിലുമാണ് സാമ്പിളുകള്‍ എടുക്കേണ്ടത്.
  • ചെടിയുടെ നിന്നും 15 മുതല്‍ 20 സെ. മീ. വിട്ടാണ് മണ്ണ്‍ എടുക്കേണ്ടത്. വാഴ, തെങ്ങ്‌ എന്നിവയ്ക്ക് തടത്തിന്റെ പുറത്ത് നിന്നാണ് മണ്ണ്‍ പരിശോധനയ്ക്കായി എടുക്കേണ്ടത്. വാഴയ്ക്ക് ഉദ്ദേശം 75 സെ. മീ. (രണ്ടര അടി) അകലെ നിന്നും തെങ്ങിന് ചുവട്ടില്‍ നിന്നും 2 മീറ്റര്‍ (ഉദ്ദേശം ആറടി)അകലെ നിന്നും വേണം സാമ്പിളുകള്‍ ശേഖരിക്കെണ്ടത്
  • മണ്ണ്‍ സാമ്പിളുകള്‍ എടുക്കുന്ന സ്ഥലം ആദ്യമായി പുല്ലും ഉണങ്ങിയ ഇലകളും നീക്കം ചെയ്ത് വൃത്തിയാക്കണം.

  • ഇങ്ങനെ വൃത്തിയാക്കിയ സ്ഥലത്ത് നിന്നും മണ്‍വെട്ടി ഉപയോഗിച്ച് നിര്‍ദ്ദിഷ്ട ആഴത്തില്‍ ‘ V ‘ ആകൃതിയില്‍ മണ്ണ്‍ വെട്ടിയെടുക്കുക.

  • തുടര്‍ന്ന് വെട്ടി മാറ്റിയ കുഴിയില്‍ നിന്നും മുകളറ്റം മുതല്‍ അടി വരെ 2 -3 സെ.മി. ഘനത്തില്‍ ഒരു വശത്തു നിന്നും മണ്ണ്‍ അരിഞ്ഞെടുക്കുക.

  • ഒരു പുരയിടത്തിന്റെ മണ്ണ്‍ സാമ്പിളുകള്‍ ശേഖരിക്കാന്‍ ‘സിഗ് സാഗ് ‘ (തലങ്ങും വിലങ്ങും ) രീതിയില്‍ നീങ്ങേണ്ടതാണ്.
  • ഒരേ സ്വഭാവമുള്ള ഒരേക്കര്‍ നിലത്തു നിന്ന് 5 – 10 സബ് സാമ്പിളുകള്‍ ശേഖരിക്കെണ്ടതാണ്.
  • ഇങ്ങനെ പല ഭാഗങ്ങളില്‍ നിന്ന് ശേഖരിച്ച മണ്ണ്‍ കല്ലും മറ്റ് സസ്യഭാഗങ്ങളും നീക്കി, കട്ടകള്‍ ഇടിച്ച് നല്ലതുപോലെ കൂട്ടികലര്‍ത്തുക.

മണ്ണ്‍ സാമ്പിള്‍ തയ്യാറാക്കുന്ന വിധം

പല സ്ഥലങ്ങളില്‍ നിന്നും ശേഖരിച്ച മണ്ണ്‍ 500 ഗ്രാം (1/2 കിലോ) ആയി കുറയ്ക്കേണ്ടതാണ്. ചതുര്‍വിഭജനം എന്ന പ്രക്രിയയിലൂടെ മണ്ണ്‍ (1/2 കിലോ) ആക്കാം.

  • ശേഖരിച്ച മണ്ണ്‍ നന്നായി കൂട്ടികലര്‍ത്തി ഒരു പ്ലാസ്റ്റിക് ഷീറ്റില്‍ നിരത്തിയിടുക.

  • അതിനുശേഷം നെടുകെയും കുറുകെയും ഓരോ വര വരച്ച് നാലായി വിഭജിക്കുക.

  • ഇതില്‍ നിന്നും കോണോട്കോണ്‍ വരുന്ന രണ്ടു ഭാഗങ്ങളും നീക്കികളഞ്ഞശേഷം വീണ്ടും മറ്റ് രണ്ട് ഭാഗങ്ങള്‍ കൂട്ടികലര്‍ത്തി ഒന്നിച്ച് കൂനയാക്കുക.

  • അവസാനം മണ്ണ്‍ അര കിലോ ആകുന്നതുവരെ ഈ ചതുര്‍വിഭജനം തുടരേണ്ടതാണ്.

  • ഇങ്ങനെ തയ്യാറാക്കിയ സാമ്പിള്‍ വൃത്തിയുള്ള തറയിലോ കടലാസിലോ നിരത്തി തണലില്‍ ഉണക്കിയെടുക്കണം. ഒരിക്കലും മണ്ണ്‍ വെയിലത്ത് ഉണക്കാന്‍ പാടില്ല.
  • ഉണങ്ങിയ മണ്ണ് സാമ്പിള്‍ തുണി സഞ്ചിയിലോ പ്ലാസ്റ്റിക് സഞ്ചിയിലോ നിറച്ച് പരിശോധനയ്ക്ക് അയയ്ക്കാം. സാമ്പിള്‍ തിരിച്ചറിയാനുള്ള നമ്പരോ കോഡോ മാഞ്ഞുപോകാതിരിക്കത്തക്കവിധം സഞ്ചിക്കുള്ളിലും പുറത്തും വയ്ക്കുക. മണ്ണ്‍ സാമ്പിളിനോടൊപ്പം അയക്കുന്ന ഫോറത്തിലും ഈ കോഡ് നമ്പര്‍ രേഖപ്പെടുത്തേണ്ടതാണ്.

 

മണ്ണു സാമ്പിളിനോടൊപ്പം അയക്കേണ്ട വിവരങ്ങള്‍

  1. കര്‍ഷകന്റെ പേരും മേല്‍വിലാസവും
  2. വില്ലേജ്, ബ്ലോക്ക്, പഞ്ചായത്ത്,ജില്ല.
  3. സാമ്പിള്‍ എടുത്ത രീതി
  4. കൃഷി സ്ഥലത്തിന്‍റെ സര്‍വേ നമ്പര്‍
  5. അടുത്തതായി കൃഷി ചെയ്യാനുദ്ദേശിക്കുന്ന വിള
  6. മുമ്പ് കൃഷി ചെയ്തിരുന്ന (തൊട്ടു മുമ്പുള്ള മൂന്ന് കൃഷിയുടെ വിളവും വളപ്രയോഗവും )
  7. നിര്‍ദ്ദേശം വേണ്ട കൃഷികള്‍, ഇനം
  8. ഏതെങ്കിലും പ്രത്യേകത കണ്ടിട്ടുണ്ടെങ്കില്‍ അതും
  9. കൃഷിക്കുള്ള ജലസേചന മാര്‍ഗ്ഗം
  10. നിര്‍വാര്‍ച്ച സൌകര്യം
  11. മണ്ണിന്‍റെ പ്രത്യേകതകള്‍ (മണ്ണിന്‍റെ അടിയില്‍ ഉറച്ച പാരു മണ്ണോ പാറയോ അലിഞ്ഞു ചേരാത്ത പദാര്‍‌ത്‌ഥങ്ങള്‍, മണ്ണൊലിപ്പ് എന്നിവ)
  12. കുമ്മായമോ മറ്റോ ഉപയോഗിക്കുന്നുണ്ടെങ്കില്‍ അതിന്‍റെ അളവും ഉപയോഗിച്ച സമയവും.

കേരളത്തിലെ മണ്ണുപരിശോധന സൌകര്യങ്ങള്‍

തിരുവനന്തപുരം ജില്ലയില്‍ പാറോട്ടുകോണത്ത് പ്രവര്‍ത്തിക്കുന്ന സെന്‍ട്രല്‍ സോയില്‍ ആന്‍റ് പ്ലാന്‍റ് ഹെല്‍ത്ത് ‌സെന്‍ററിന്റെ കീഴില്‍ സംസ്ഥാനത്തോട്ടാകെ 14 ജില്ലാ മണ്ണു പരിശോധന ലബോറട്ടറികള്‍ പ്രവര്‍ത്തിച്ചു വരുന്നു. കര്‍ഷകര്‍ ശേഖരിക്കുന്ന മണ്ണു സാമ്പിളുകള്‍ നിര്‍ദ്ദിഷ്ട ഫോറത്തിലുള്ള അപേക്ഷയോടൊപ്പം കൃഷി ഭവനില്‍ നിന്നും ജില്ല മണ്ണു പരിശോധന ലബോറട്ടറികളില്‍ എത്തിച്ച് പരിശോധിക്കുന്നു. തികച്ചും സൌജന്യമായിട്ടാണ് ഇങ്ങനെ മണ്ണു പരിശോധന നടത്തുന്നത്. എന്നാല്‍ കര്‍ഷകര്‍ നേരിട്ട് ലബോറട്ടറികളില്‍ എത്തിക്കുന്ന സാമ്പിളിന് 50 രൂപ ഫീസ്‌ ഈടാക്കി പരിശോധന നടത്തുന്നു.

മണ്ണ്‍ പരിശോധന ഘടകങ്ങള്‍

താഴെ പറയുന്ന ഘടകങ്ങള്‍ക്ക് മണ്ണ്‍ പരിശോധന നടത്തി വരുന്നു.

  1. അമ്ല ക്ഷാരത്വം
  2. സാള്‍ട്ട് ലയിച്ച് ചേര്‍ന്നിട്ടുള്ള അളവ്
  3. പാക്യജനകം (നൈട്രജന്‍)
  4. ഭാവഹം (ഫോസ്ഫറസ് )
  5. ക്ഷാരം (പൊട്ടാഷ്)
  6. സെക്കന്ററി മുലകങ്ങള്‍ (കാത്സ്യം, മെഗ്നീഷ്യം, സള്‍ഫര്‍ )
  7. സുക്ഷ്മ മുലകങ്ങള്‍ (ഇരുമ്പ്, ചെമ്പ്, നാകം, മാന്ഗനീസ് )

സഞ്ചരിക്കുന്ന മണ്ണു പരിശോധന ലബോറട്ടറികള്‍

കര്‍ഷകരുടെ മിത്രമായി അരികിലെത്തി കൃഷിയിടങ്ങളില്‍ തന്നെ മണ്ണു സാമ്പിളുകള്‍ പരിശോധന നടത്തി വളം ശുപാര്‍ശ ചെയ്യുന്നു. കൂടാതെ കര്‍ഷകര്‍ക്ക് അവബോധന ക്ലാസുകള്‍ സംഘടിപ്പിക്കുന്നു. കാര്‍ഷിക മേളകള്‍, സെമിനാറുകള്‍, തുടങ്ങിയ കാര്‍ഷിക പരിപാടികള്‍ക്ക് സഞ്ചരിക്കുന്ന മണ്ണു പരിശോധനശാലയുടെ സേവനം സൌജന്യമായി ലഭ്യമാണ്. റുറല്‍ വര്‍ക്ക് എക്സ്പീരിയന്‍സ് പ്രോഗ്രാമുകളില്‍ സജീവമായി പങ്കെടുക്കുന്നു.

സര്‍ക്കാരിന്റെ ഇത്തരം സേവനങ്ങള്‍ പ്രയോജനപ്പെടുത്തി മണ്ണ്‍ പരിശോധനയിലൂടെ വിളവ് വര്‍ദ്ധിപ്പിക്കാന്‍ എല്ലാ കര്‍ഷകരും മുന്നോട്ടൂ വരേണ്ടതാണ്. മണ്ണു പരിശോധന അടിസ്ഥാനമാക്കിയ വിവരങ്ങളും വിളയ്ക്കനുയോജ്യമായ ശുപാര്‍ശകളും സോയില്‍ ഹെല്‍ത്ത് കാര്‍ഡ് വഴി കര്‍ഷകര്‍ക്ക് ലഭ്യമാക്കുന്നു. ഈ കാര്‍ഡിന്റെ ശുപാര്‍ശയുടെ അടിസ്ഥാനത്തില്‍ കര്‍ഷകന് അടുത്ത വിള ലാഭകരമാക്കാന്‍ സമീകൃത വളപ്രയോഗം അവലംബിക്കാവുന്നതാണ്.

സംസ്ഥാന കൃഷി വകുപ്പ് ശാസ്ത്രീയ മണ്ണുപരിശോധനയുടെ അവബോധം കൃഷിക്കാരില്‍ സൃഷ്ടിക്കാന്‍ താഴെ പറയുന്ന പദ്ധതികള്‍ നടപ്പാക്കി വരുന്നു.

  1. സുക്ഷ്മ മുലകങ്ങള്‍ ഉള്‍പ്പെടുത്തിയ വിവിധ ക്രോപ്പ് ഡെമോന്‍സ്ട്രേഷനുകള്‍
  2. സോയില്‍ ഹെല്‍ത്ത് കാര്‍ഡ് മോണിറ്ററിംഗ് .

 

ജില്ലാ മണ്ണു പരിശോധന ലബോറട്ടറികളുടെ ഫോണ്‍ നമ്പര്‍

 

തിരുവനന്തപുരം 0471 2533044

കൊല്ലം 0474 2797869

പത്തനംതിട്ട 0473 2256645

ആലപ്പുഴ 0477 2266862

കോട്ടയം 0482 2231156

ഇടുക്കി 0486 2281162

എറണാകുളം 0484 2703976

തൃശൂര്‍ 0487 2320630

പാലക്കാട് 0466 2212091

മലപ്പുറം 0483 2731390

കോഴിക്കോട് 0496 2600250

വയനാട് 0493 5442499

കണ്ണൂര്‍ 0460 2206812

കാസര്‍ഗോഡ്‌ 0499 4227428

ജില്ലാ മണ്ണു പരിശോധന ലബോറട്ടറികളുടെ ഇ- മെയില്‍ വിലാസം‍

TVPM distlparottukonam@gmail.com

Kollam Salomy.george@yahoo.co.in

Pathanamthitta    dstlpandalam@gmail.com

Ernakulam           soiltestinglabernakulam@gmail.com

Trissur                dsltcr@gmail.com

Alappuzha           soiltestinglabalappuzha@gmail.com

Kottayam            dslkozha@gmail.com

Idukki                 soiltestinglabidukki@gmail.com

Kozhikkode          ascdstlthikkoti@gmail.com

Palakkad             ascsoilptb@gmail.com

Malappuram        dstlmlpm@gmail.com

Wayanad             ascwayanad@gmail.com

Kannur                dstlknr@gmail.com

Kasargode           dstlksd@gmail.com

മൊബൈൽ മണ്ണു പരിശോധന ലബോറട്ടറികളുടെ ഇ- മെയില്‍ വിലാസം‍

TVPM         mstl.tvm@gmail.com

Kollam        mstlkollam@gmail.com

Palakkad      mstlpattambi@gmail.com

Trissur         mstltsr@gmail.com

Kottayam     mstlkozha@gmail.com

Alappuzha     mstlalappuzha@gmail.com

Kozhikkode   ascmstlkkd@gmail.com

Kannur        mstlascknr@gmail.com

Malappuram mstlmpm@gmail.com

ജില്ലാ മണ്ണു പരിശോധന ലബോറട്ടറികളുടെ മേല്‍വിലാസം

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

പാറോട്ടുകോണംനാലാഞ്ചിറപി..

തിരുവനന്തപുരം -695015

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

കാവനാട്കുരീപ്പുഴ

കൊല്ലം – 691003

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

കടക്കാട്പന്തളംപി..

പത്തനംതിട്ട

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

സനാതനപുരംകളര്‍കോഡ്

ആലപ്പുഴ -3

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

കോഴ,പി..

കോട്ടയം - 686640

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

അരിക്കുഴ പി.., തൊടുപുഴ

ഇടുക്കി

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

കാര്‍ഷിക മൊത്ത വിപണന കേന്ദ്രം

മാറാട്നെട്ടൂര്‍ പി..

എറണാകുളം - 682019

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

ചെമ്പുക്കാവ്തൃശൂര്‍ - 680020

 

അസിസ്റ്റന്‍റ് സോയില്‍ കെമിസ്റ്റ്

ജില്ലാ മണ്ണു പരിശോധന ലബോറട്ടറി

മേലെ പട്ടാമ്പി,

പാലക്കാട് - 679306

 

കടപ്പാട് : കാർഷിക വിവരസങ്കേതം ഒരു വിരൽ തുമ്പിൽ

3.125
മനോജ് കെ. Apr 15, 2017 10:21 PM

വിവിധ തരം കൃഷിയ്ക്കാവശ്യമായ മണ്ണിന്റെ പിഎച്ച് മൂല്യം, അന്തരീക്ഷമര്‍ദ്ദം, മണ്ണിന്റെ ഈര്‍പ്പം, മണ്ണിലെ പോഷണങ്ങള്‍ ഇവയെ പ്രതിപാദിക്കുന്ന പട്ടിക ഇതോടൊപ്പം ചേര്‍ത്താല്‍ ഉചിതമായിരിക്കും.

നിങ്ങളുടെ നിര്‍ദ്ദേശം പോസ്റ്റ് ചെയ്യുക

(നിങ്ങള്‍ക്ക് അന്വേഷണങ്ങള്‍ പോസ്റ്റ് ചെയ്യുകയോ ചര്‍ച്ച ചെയ്യുകയോ ചേര്‍ക്കുകയോ ചെയ്യാം)

Enter the word
നവിഗറ്റിഒൻ
Back to top