<div id="MiddleColumn_internal"> <p style="text-align: justify; "><strong>ചിരിപ്പിച്ച് ചിരിപ്പിച്ച് കുട്ടികളെ സ്മാർട്ട് ആക്കാം.</strong></p> <p style="text-align: justify; ">ചിരിപ്പിച്ച് കുട്ടികളെ മിടുക്കരാക്കാമെന്നുകേട്ടു തല തല്ലി ചിരിക്കേണ്ട. സംഭവം സത്യം. ഫ്രാൻസിലെ ഒരുകൂട്ടം ഗവേഷകരാണ് ഈ പഠനത്തിനു പിന്നിൽ. ഒന്നിനും മൂന്നു വയസിനും ഇടയിലുള്ള കുട്ടികളെ എന്തെങ്കിലുമൊക്കെ തമാശ കാട്ടി രസിപ്പിച്ച് ചിരിപ്പിച്ചാൽ പുതിയ കാര്യങ്ങൾ പെട്ടെന്നു പഠിക്കാനുള്ള അവരുടെ കഴിവു വർധിക്കുമെന്നാണ് കണ്ടെത്തൽ.</p> <p style="text-align: justify; ">18 മാസം പ്രായമുള്ള കുട്ടികളിൽ നടത്തിയ പഠനത്തിന്റെ അടിസ്ഥാനത്തിലാണു റിപ്പോർട്ട്. പഠനത്തിന്റെ ഭാഗമായി മുതിർന്നവരെയും കുട്ടികളെയും ആദ്യം രണ്ടു ഗ്രൂപ്പായി തിരിച്ചു. പിന്നീട് അകലെയായി ഒരു കളിപ്പാട്ടവും അതെടുക്കാനുള്ള ഉപകരണവും നൽകി.</p> <p style="text-align: justify; ">ആദ്യ ഗ്രൂപ്പിൽപെട്ടവർ കളിപ്പാട്ടം കൈക്കലാക്കിയ ശേഷം അതുമായി കുട്ടികളുടെ അരികിലിരുന്നു വെറുതെ കളിച്ചു. കുട്ടികളുടെ ഇടയിൽ ഒരു പ്രതികരണവും ഉണ്ടാക്കാൻ ഇവർക്ക് സാധിച്ചില്ല. എന്നാൽ രണ്ടാമത്തെ ഗ്രൂപ്പിൽപെട്ടവർ കളിപ്പാട്ടം കൈയിലെടുത്ത ശേഷം താഴേക്ക് വലിച്ചെറിഞ്ഞു. ഈ പ്രവൃത്തി പകുതിയിലധികം കുട്ടികളെ ചിരിപ്പിക്കുകയും പിന്നീട് കുട്ടികളിത് ആവർത്തിക്കുകയും ചെയ്തു.</p> <p style="text-align: justify; ">ചിരിക്കുന്ന കുട്ടികൾക്ക് സാമൂഹികപരമായ കഴിവും ഗ്രഹണശക്തിയും കൂടുതലായിരിക്കും. ഈ കുട്ടികൾ മുതിർന്നവരെ അനുകരിക്കുകയും നന്നായി പെരുമാറുകയും ചെയ്യും. ചിരി കുട്ടികളുടെ ബുദ്ധിശക്തി വർധിപ്പിക്കും. ചിരിക്കുമ്പോൾ തലച്ചോറിലെ ഡോപമിൻറെ അളവു കൂടുന്നതാണിതിനു കാരണമെന്നും ഗവേഷകർ പറയുന്നു.കുട്ടികളെ ചിരിപ്പിച്ചാൽ ആ ചിരി വെറുതെയാവില്ലെന്ന് ഇപ്പോൾ മനസിലായില്ലേ? എന്തായാലും ഇനിമുതൽ അച്ഛനമ്മമാർ കുട്ടികളെ കുടുകുടെ ചിരിപ്പിച്ചോളൂ...അവരും സ്മാർട്ട് ആകട്ടെ...</p> <p style="text-align: justify; ">കടപ്പാട്: മനോരമ ഓണ്ലൈന്</p> </div>