<div id="MiddleColumn_internal"> <h3 style="text-align: justify; "><b>എന്താണ് ട്രൈക്കിയാസിസ്?</b></h3> <p style="text-align: justify; ">കൺപീലികളുടെ സ്ഥാനം ക്രമമല്ലാതെയും പല ദിശകളിലുമാവുന്ന അവസ്ഥയാണ് ട്രൈക്കിയാസിസ്. ഈ അവസ്ഥയിൽ, കണ്ണിൽ നിന്ന് പുറത്തേക്കുള്ള കൺപീലികൾ മാത്രമായിരിക്കില്ല, കണ്ണിനുള്ളിലേക്ക് വളഞ്ഞവയും ഉണ്ടായിരിക്കും. ഇത്തരത്തിലുള്ള അസ്വാഭാവിക പീലികൾ കോർണിയയിലും കൺപോളകളുടെ ഉൾവശത്തും മറ്റും ഉരസുന്നതിലൂടെ കണ്ണിന് അസ്വസ്ഥതയുണ്ടാവും.</p> <h3 style="text-align: justify; "><b>കാരണങ്ങൾ</b></h3> <p style="text-align: justify; ">അണുബാധ, കൺപോളകളുടെ വീക്കം, ആഘാതം, ഓട്ടോഇമ്മ്യൂൺ (പ്രതിരോധ ശേഷി ശരീരത്തിനെതിരെ തിരിയുന്ന അവസ്ഥ) എന്നിവ മൂലം ഇത് സംഭവിക്കാം.</p> <h3 style="text-align: justify; "><b>അപകടസാധ്യതാ ഘടകങ്ങൾ</b></h3> <p style="text-align: justify; ">ചില അവസ്ഥകൾ ട്രൈക്കിയാസിസിനുള്ള അപകടസാധ്യത വർദ്ധിപ്പിക്കും;</p> <ul style="text-align: justify; "> <li>എപ്പിബ്ളെഫരോൺ: കണ്ണിനു ചുറ്റുമുള്ള ചർമ്മം അയഞ്ഞു കിടക്കുന്നതു മൂലം കൺപീലികൾ ലംബമായി നിൽക്കുന്ന ജന്മനായുള്ള അവസ്ഥ.</li> <li>കണ്ണിന് ഏൽക്കുന്ന ക്ഷതം</li> <li>ദീർഘകാലം നിലനിൽക്കുന്ന ബ്ളെഫാറൈറ്റിസ്, കൺപോളകൾക്ക് വീക്കവും കൺപോളകളുടെ അരികിലും കൺപീലികളുടെ സമീപത്തുമായി സ്രവങ്ങളും ബാക്ടീരികളും അടിഞ്ഞുകൂടുന്ന അവസ്ഥ.</li> <li>ഹെർപ്സ് സോസ്റ്റർ രോഗം</li> <li>ട്രാക്കോമ: കണ്ണിനെ ബാധിക്കുന്ന കടുത്ത അണുബാധ</li> <li>ശ്ളേഷ്മസ്തരങ്ങൾക്കും ചർമ്മത്തിനും അപൂർവമായി ഉണ്ടാകുന്ന ചില പ്രശ്നങ്ങൾ</li> </ul> <h3 style="text-align: justify; "><b>ലക്ഷണങ്ങൾ</b></h3> <p style="text-align: justify; ">ട്രൈക്കിയാസിസ് മൂലം ബുദ്ധിമുട്ടുന്നവർക്ക് ഇനി പറയുന്ന പ്രശ്നങ്ങൾ ഉണ്ടാകാം;</p> <ul style="text-align: justify; "> <li>കണ്ണുകൾക്ക് അസ്വസ്ഥത</li> <li>കണ്ണിൽ എന്തോ വീണതുപോലെയുള്ള തോന്നൽ</li> <li>കണ്ണിനു ചുവപ്പുനിറം</li> <li>കണ്ണിൽ നിന്ന് വെള്ളമെടുക്കുക</li> <li>കണ്ണിൽ നിന്നുള്ള സ്രവം</li> <li>കണ്ണിനു വേദന</li> <li>പ്രകാശത്തോടുള്ള അമിതപ്രതികരണം</li> <li>കോർണിയയ്ക്ക് പോറൽ</li> <li>കോർണിയയിൽ അൾസർ</li> </ul> <h3 style="text-align: justify; "><b>രോഗനിർണയം</b></h3> <p style="text-align: justify; ">നിങ്ങളുടെ ചികിത്സാ ചരിത്രത്തിന്റെയും വൈദ്യ പരിശോധനയുടെയും അടിസ്ഥാനത്തിലാവും ഡോക്ടർ ട്രൈക്കിയാസിസിന്റെ നിർണയം നടത്തുക. ഇതിൽ ഇനി പറയുന്നവയെ കുറിച്ചുള്ള പരിശോധനകളും വിവരങ്ങളും ഉൾപ്പെടും;</p> <ul style="text-align: justify; "> <li>ഹെർപ്സ്, സോസ്റ്റർ, ട്രാക്കോമ (കണ്ണിനെ ബാധിക്കുന്ന ഒരു ബാക്ടീരിയ അണുബാധ) തുടങ്ങിയവ</li> <li>കൺപോളകൾക്ക് സംഭവിക്കുന്ന ക്ഷതം</li> <li>ദീർഘകാലമായുള്ള ബ്ളെഫാറൈറ്റിസ്</li> </ul> <p style="text-align: justify; ">നിങ്ങളുടെ ഡോക്ടർ, കോർണിയ, കൺപീലികൾ എന്നിവ സൂക്ഷ്മമായി പരിശോധിക്കും. മുകളിലത്തെ കൺപോള വിപരീത ദിശയിലാക്കി ക്രമമല്ലാത്ത കൺപീലികളുടെ എണ്ണം, അവയുടെ സ്ഥാനം, ബ്ളെഫാറൈറ്റിസിന്റെ സൂചന എന്തെങ്കിലും ഉണ്ടോ തുടങ്ങിയ കാര്യങ്ങൾ പരിശോധിക്കും.</p> <h3 style="text-align: justify; "><b>ചികിത്സ</b></h3> <p style="text-align: justify; ">ട്രൈക്കിയാസിസ് ഇനി പറയുന്ന രീതികളിൽ ആയിരിക്കും ചികിത്സിക്കുക;</p> <ul style="text-align: justify; "> <li><b>എപ്പിലേഷൻ</b>: ദിശതെറ്റിയുള്ള കൺപീലികൾ ചവണ ഉപയോഗിച്ച് പിഴുന്നു.</li> <li><b>ഇലക്ട്രോലിസിസ്</b>: കൺപീലി സ്ഥിരമായി നീക്കംചെയ്യുന്നതിനായി, അതിന്റെ വേരുകളിൽ ആഴ്ത്തുന്ന സൂചിയിലൂടെ വൈദ്യുതി കടത്തിവിടുന്നു</li> <li><b>ലേസർ തെർമോഅബ്ലേഷൻ</b>: കൺപീലുയുടെ വേരുകൾ നശിപ്പിക്കുന്നതിനായി ലേസർ ഉപയോഗിക്കുന്നു</li> <li><b>റേഡിയോഫ്രീക്വൻസി അബ്ലേഷൻ</b>: കൺപീലികളും അവയുടെ വേരുകളും നീക്കംചെയ്യുന്നതിന് റേഡിയോഫ്രീക്വൻസി ഉപയോഗിക്കുന്നു.</li> <li><b>ക്രയോസർജറി</b>: ദ്രവീകൃത നൈട്രജൻ ഉപയോഗിച്ച് കൺപീലികളുടെ വേരുകൾ നശിപ്പിക്കുന്നു.</li> </ul> <p style="text-align: justify; ">ചിലയവസരങ്ങളിൽ, ശരിയായ രീതിയിൽ കൺപീലികൾ പുന:സ്ഥാപിക്കുന്നതിന് ശസ്ത്രക്രിയ ആവശ്യമായിവരും.</p> <h3 style="text-align: justify; "><b>പ്രതിരോധം</b></h3> <p style="text-align: justify; ">ഇതിനെ പ്രതിരോധിക്കാൻ നിലവിൽ വഴികളൊന്നുമില്ല</p> <h3 style="text-align: justify; "><b>സങ്കീർണതകൾ</b></h3> <ul style="text-align: justify; "> <li>കോർണിയയ്ക്ക് പോറൽ ഉണ്ടാവുക</li> <li>കോർണിയയിൽ അൾസർ</li> <li>കാഴ്ചനഷ്ടം</li> </ul> <h3 style="text-align: justify; "><b>അപകട സൂചനകൾ</b></h3> <p style="text-align: justify; ">കണ്ണിൽ എന്തോ വീണതു പോലെയുള്ള തോന്നൽ ഒന്നോ രണ്ടോ ദിവസത്തിനുള്ളിൽ മാറിയില്ല എങ്കിൽ ഡോക്ടറെ സന്ദർശിക്കുക.</p> <p style="text-align: justify; "><i><b>കടപ്പാട് : <span style="text-align: left; float: none; ">മോഡസ്റ്റ</span></b></i></p> </div>