<div dir="auto" style="text-align: justify; "><b>ശാന്തമായ കിടപ്പുമുറി</b></div> <div dir="auto" style="text-align: justify; ">എത്രമാത്രം ഉറക്കം വേണമെന്നത് ഒരോ വ്യക്തിയെയും അനുസരിച്ച് വ്യത്യാസപ്പെട്ടിരിക്കും. നവജാത ശിശുക്കൾ ദിവസവും 16 മുതൽ 18 മണിക്കൂർ ഉറങ്ങുമ്പോൾ 1-3 വയസ്സുവരെയുള്ള കുട്ടികൾ 14 മണിക്കൂറും 3-ഉം 4-ഉം വയസ്സുള്ള കുട്ടികൾ 11-ഓ 12-ഓ മണിക്കൂറും ഉറങ്ങേണ്ടത് ആവശ്യമാണ്. സ്കൂളിൽ പോകുന്ന കുട്ടികൾ 10 മണിക്കൂറും കൗമാരത്തിലുള്ളവർ 9-ഓ 10-ഓ മണിക്കൂറും പ്രായപൂർത്തിയായവർ 7-ഓ 8-ഓ മണിക്കൂറും ഉറങ്ങേണ്ടതാണ്.</div> <div dir="auto" style="text-align: justify; "></div> <div dir="auto" style="text-align: justify; ">ആവശ്യാനുസരണം തിരഞ്ഞെടുക്കാവുന്ന ഒന്നല്ല ഉറക്കം. വിദഗ്ധരുടെ അഭിപ്രായമനുസരിച്ച് പിൻവരുന്ന കാര്യങ്ങൾക്ക് ഉറക്കം പ്രധാനമാണ്.</div> <div dir="auto" style="text-align: justify; "></div> <div dir="auto" style="text-align: justify; ">കുട്ടികളുടെയും കൗമാരത്തിലുള്ളവരുടെയും വളർച്ചയ്ക്കും ബുദ്ധിവികാസത്തിനും.</div> <div dir="auto" style="text-align: justify; "></div> <div dir="auto" style="text-align: justify; ">പുതിയ വിവരങ്ങൾ പഠിക്കുന്നതിനും ഓർമയിൽ സൂക്ഷിക്കുന്നതിനും.</div> <div dir="auto" style="text-align: justify; "></div> <div dir="auto" style="text-align: justify; ">ഭക്ഷണത്തിലൂടെയുള്ള ഊർജോത്പാദനത്തെയും ശരീരഭാരത്തെയും സ്വാധീനിക്കുന്ന ഹോർമോണുകളുടെ സന്തുലിതാവസ്ഥ നിയന്ത്രിക്കാൻ.</div> <div dir="auto" style="text-align: justify; "></div> <div dir="auto" style="text-align: justify; ">ഹൃദയാരോഗ്യത്തിന്.</div> <div dir="auto" style="text-align: justify; "></div> <div dir="auto" style="text-align: justify; ">രോഗങ്ങൾ തടയുന്നതിന്.</div> <div dir="auto" style="text-align: justify; "></div> <div dir="auto" style="text-align: justify; ">അമിതവണ്ണം, വിഷാദം, ഹൃദ്രോഗം, പ്രമേഹം, അപകടങ്ങൾ എന്നിവയ്ക്ക് ഉറക്കക്കുറവ് കാരണമായേക്കാം. ഇത്, മതിയായി ഉറങ്ങേണ്ടതിന്റെ പ്രാധാന്യത്തിന് അടിവരയിടുന്നു.</div> <div dir="auto" style="text-align: justify; "></div> <div dir="auto" style="text-align: justify; ">വേണ്ടത്ര ഉറക്കം ലഭിക്കുന്നില്ലെങ്കിൽ നിങ്ങൾക്ക് എന്തു ചെയ്യാനാകും?</div> <div dir="auto" style="text-align: justify; "></div> <div dir="auto" style="text-align: justify; ">എല്ലാ ദിവസവും ഒരേ സമയത്തുതന്നെ കിടക്കുക. ഒരേ സമയത്ത് എഴുന്നേൽക്കുക.</div> <div dir="auto" style="text-align: justify; "></div> <div dir="auto" style="text-align: justify; ">നിങ്ങളുടെ കിടപ്പുമുറി ശാന്തവും ഇരുട്ടുള്ളതും സ്വസ്ഥവുമായിരിക്കണം. കൂടാതെ, അധികം ചൂടോ തണുപ്പോ ഇല്ലാത്ത ഒരു അന്തരീക്ഷവും ആയിരിക്കണം.</div> <div dir="auto" style="text-align: justify; "></div> <div dir="auto" style="text-align: justify; ">കിടന്നുകൊണ്ട് ടിവി കാണുകയോ മൊബൈലും മറ്റ് ഉപകരണങ്ങളും ഉപയോഗിക്കുകയോ ചെയ്യരുത്.</div> <div dir="auto" style="text-align: justify; "></div> <div dir="auto" style="text-align: justify; ">നിങ്ങളുടെ കിടക്ക പരമാവധി സുഖപ്രദമാക്കുക.</div> <div dir="auto" style="text-align: justify; "></div> <div dir="auto" style="text-align: justify; ">കാപ്പിയും കഫീൻ അടങ്ങിയ മറ്റ് ഭക്ഷണപദാർഥങ്ങളും അമിതഭക്ഷണവും മദ്യവും കിടക്കുന്നതിനുമുമ്പ് കഴിക്കാതിരിക്കുക.</div> <div dir="auto" style="text-align: justify; "></div> <div dir="auto" style="text-align: justify; ">ഇക്കാര്യങ്ങളെല്ലാം ചെയ്തതിനു ശേഷവും ഉറക്കമില്ലായ്മയോ അതിനോട് ബന്ധപ്പെട്ട മറ്റ് തകരാറുകളോ, അതായത് പകൽസമയത്ത് അസാധാരണമായി ഉറക്കം തൂങ്ങുക, ഉറങ്ങുന്നതിനിടയിൽ ശ്വാസം കിട്ടാതെ ചാടി എഴുന്നേൽക്കുക തുടങ്ങിയ പ്രശ്നങ്ങൾ നേരിടുന്നുണ്ടെങ്കിൽ ആരോഗ്യവിദഗ്ധരുടെ നിർദേശം സ്വീകരിക്കുക.</div>