ആരോഗ്യവും ആരോഗ്യജീവിതവും

വേനല്ക്കാലം ആരോഗ്യകരമാക്കാം വേനല് കടുക്കുകയാണ്. ചില കാര്യങ്ങള് അറിഞ്ഞിരുന്നാല് ആരോഗ്യത്തോടെ തന്നെ ഈ വേനല്ച്ചൂടും നമുക്ക് തരണം ചെയ്യാം. ചൂട്, പൊടി, അലര്ജനുകള്, ശ്വാസകോശത്തെ ബാധിക്കുന്ന വൈറസുകള് തുടങ്ങിയവ മൂലമുണ്ടാകുന്ന ശ്വാസകോശ രോഗങ്ങള് വേനല്ക്കാലത്ത് കൂടുതലുണ്ടാകാം. ശ്വാസകോശ രോഗങ്ങള് (ആസ്ത്മാ പോലെയുള്ളവ) നേരത്തേ ഉള്ളവര്ക്ക് അവ വഷളാകുകയും ചെയ്യാം.

പുറത്തിറങ്ങുമ്പോള് കഴിവതും കര്ച്ചീഫോ അല്ലെങ്കില് മാസ്കോ ധരിക്കുക, ചുമ, കഫം, ശ്വാസം മുട്ടല് തുടങ്ങിയ ലക്ഷണങ്ങള് കണ്ടാല് വൈദ്യസഹായം തേടുക തുടങ്ങിയവ ചെയ്യേണ്ടതാണ്. എച്ച് വണ് എന് വണ്, ഇന്ഫ്ളുവന്സ പോലെയുള്ള മാരകമായ രോഗങ്ങളും ഇക്കാലത്ത് കൂടുതലായി പരക്കുന്നു.

അവയുടെ ലക്ഷണങ്ങളും ചുമ, കഫം, ശ്വാസംമുട്ടല് തുടങ്ങിയവ തന്നെയാണ്. അതിനാല് വൈദ്യസഹായം തേടാന് മടിക്കരുത്. ശ്വാസകോശ രോഗങ്ങളുള്ളവരും മറ്റ് മാരകമായ രോഗങ്ങളുള്ളവരും വാക്സിനേഷന് (ഇന്ഫ്ളുവന്സ) എടുക്കുന്നത് അഭികാമ്യമായിരിക്കും. ചിക്കന്പോക്സ്, ചെങ്കണ്ണ്, വയറിളക്ക രോഗങ്ങള് (വൈറസ് ബാധ മൂലം, ടൈഫോയ്ഡ്, ഹെപ്പറ്റൈറ്റിസ് മൂലം) തുടങ്ങിയവ വേനല്ക്കാലത്ത് കൂടുതലായി കാണാം. തിളപ്പിച്ചാറിയ ശുദ്ധജലം മാത്രം കുടിക്കുക. പഴങ്ങളും പച്ചക്കറികളും നന്നായി കഴുകി ഉപയോഗിക്കുക. പഴകിയ ഭക്ഷണം കഴിക്കാതിരിക്കുക, പുറത്തുനിന്ന് ഭക്ഷണം കഴിക്കേണ്ടി വന്നാല് അവിടത്തെ ശുചിത്വവും വെള്ളത്തിന്റെ ഉറവിടവും നല്ലതാണെന്ന് ഉറപ്പുവരുത്തുക. ചിക്കന്പോക്സ് രോഗികളുമായി കൂടുതല് അടുത്തിടപഴകാതിരിക്കുക, വാക്സിനേഷന് എടുക്കുക (ടൈഫോയ്ഡിനും, ചിക്കന്പോക്സിനും വാക്സിനേഷന് ലഭ്യമാണ്). അമിതമായ അളവില് സൂര്യപ്രകാശം നേരിട്ട് ഏല്ക്കുന്നതുമൂലം ചില ബുദ്ധിമുട്ടുകള് ഉണ്ടായേക്കാം. രാവിലെ 10 മുതല് 3 മണി വരെ സൂര്യപ്രകാശം കാഠിന്യമേറിയതാണ്. നേരിട്ട് ത്വക്കില് ഏറ്റാല് ചിലപ്പോള് പൊള്ളലും, സൂര്യാഘാതം, ഉഷ്ണാഘാതം, നിര്ജ്ജലീകരണം തുടങ്ങിയ മാരകമായ അവസ്ഥകള്ക്കുവരെ ഇത് കാരണമായേക്കാം. നമ്മുടെ ശരീരത്തില് നിന്ന് ജലാംശം നഷ്ടപ്പെടുത്തുകയും, ശരീരത്തിന്റെ താപനില വളരെയധികം കൂടുകയും, ആന്തരിക ഊഷ്മാവ് സന്തുലിതമായി നിലനിറുത്തുന്ന പ്രക്രിയയ്ക്ക് തടസം വരുകയും ചെയ്യുന്നു. അമിതമായ ക്ഷീണം, പൊള്ളുന്ന ചൂട്, തലകറക്കം, മയക്കം തുടങ്ങി ജന്നി പോലെയോ, മസ്തിഷ്കത്തിന്റെ പ്രവര്ത്തനം കുറഞ്ഞ് കോമ പോലെയോ മാരകമായേക്കാം. ദീര്ഘനേരം വെയിലില് പണിയെടുക്കുന്നവര്, പ്രായമായവര്, മറ്റ് അസുഖങ്ങളുള്ളവര്, ഡൈയൂററ്റിക് (ജലാംശം പുറത്തു കളയുന്ന) മരുന്നുകള് ഉപയോഗിക്കുന്നവര് തുടങ്ങിയവര്ക്ക് ഇതിനുള്ള സാദ്ധ്യത വളരെ കൂടുതലാണ്. ഇത്തരം ലക്ഷണങ്ങള് കണ്ടാല് എത്രയും വേഗം വെയിലില് നിന്നും മാറ്റുക. തണുത്ത വെള്ളം ശരീരത്തിലൊഴിക്കുകയോ തണുത്ത കാറ്റേല്പ്പിക്കുകയോ ചെയ്ത് ശരീരം തണുപ്പിക്കുക. വസ്ത്രങ്ങള് അയച്ചിടുക, അടിയന്തരമായ വൈദ്യസഹായം കൊടുക്കുക, ധാരാളം വെള്ളം കുടിക്കുക, പഴങ്ങളും പഴച്ചാറുകളും കഴിക്കുക, മാംസാഹാരങ്ങള് ഒഴിവാക്കുക. തണുത്ത വെള്ളത്തില് കുളിക്കുക, അയഞ്ഞ കോട്ടണ് വസ്ത്രങ്ങള് ഉപയോഗിക്കുക, ദീര്ഘനേരം യാത്ര ചെയ്യുമ്പോഴോ, ജോലി ചെയ്യുമ്പോഴോ മതിയായ അളവില് വെള്ളം കുടിക്കുകയും വിശ്രമിക്കുകയും ചെയ്യുക. സൂര്യപ്രകാശത്തിന്റെ അളവ് കൂടുതലുള്ള സമയങ്ങളില് പുറത്തുപോകുമ്പോള് കുട, തൊപ്പി തുടങ്ങിയ പ്രതിരോധ സാമഗ്രികള്, സണ്സ്ക്രീന് ലോഷനുകള് തുടങ്ങിയവ ഉപയോഗിക്കുക, ജോലിസമയം ക്രമീകരിക്കുക തുടങ്ങിയ പ്രതിരോധ മാര്ഗങ്ങള് അവലംബിക്കാം. എന്നത്തേയുംകാള് കൂടുതല് ചൂടും വെയിലുമാണ് ഇനി വരാനിരിക്കുന്നത്. അതിനാല് കൂടുതല് ശ്രദ്ധ വേണം.

ചുമയെ പ്രതിരോധിക്കാന് ചിലവഴികളിതാ അണുബാധകള്, പൊടിയില് നിന്നും പുകയില് നിന്നുമുള്ള അലര്ജികള്, പരിസ്ഥിതിയില് നിന്ന് ഉണ്ടാകുന്ന അസ്വസ്ഥതകളോടുള്ള ശരീരത്തിന്റെ സ്വാഭാവിക പ്രതിരോധം എന്നിങ്ങനെ നിരവധി അവസ്ഥകളുടെ സൂചനയായിട്ടാവാം ചുമ ഉണ്ടാവുന്നത്.

ജലദോഷവും പനിയുമാണ് മിക്കപ്പോഴും ചുമയ്ക്കുള്ള കാരണമാവുന്നത്. ഇതിലൂടെ, ബാഹ്യവസ്തുക്കളെ കഫത്തിലൂടെ പുറന്തള്ളാന് ശരീരം ശ്രമിക്കുന്നു. മൂക്കിനു മുകളില് നിന്നുള്ള ഒലിപ്പ്, ആമാശയത്തിലെ ദഹനരസം തിരികെ അന്നനാളത്തിലെത്തുന്ന ആസിഡ് റിഫ്ളക്സ്, മരുന്നുകളുടെ പാര്ശ്വഫലങ്ങള് എന്നിവയും ചുമയ്ക്ക് കാരണാമാവാം.

ചുമയെ പ്രതിരോധിക്കാനുള്ള വഴികള്

ചുമയെ പ്രതിരോധിക്കാനുള്ള വളരെ ലളിതമായ വഴികളെ കുറിച്ച് നോക്കാം;

കൈകള് കഴുകുകയും അണുവിമുക്തമാക്കുകയും ചെയ്യുക ; അണുബാധ പകരാതിരിക്കാനുള്ള ഏറ്റവും ലളിതമായ വഴിയാണ് കൈകള് വൃത്തിയായി കഴുകുന്നത്. സാധാരണ അണുബാധകള് പ്രതിരോധിക്കാന് കൈകള് ഹാന്ഡ് വാഷ് ഉപയോഗിച്ച് വൃത്തിയായി കഴുകുന്നത് സഹായിക്കും. ജലദോഷം മാത്രമല്ല, ഏതൊരു രോഗത്തെ പ്രതിരോധിക്കുന്നതിനും വ്യക്തിശുചിത്വം പാലിക്കുന്നത് സഹായിക്കും.

ശ്വാസകോശ അണുബാധയുള്ളവരുമായി സമ്ബര്ക്കത്തില് ഏര്പ്പെടുന്നത് ഒഴിവാക്കുക ; ശ്വാസകോശ അണുബാധയുള്ളവര്ക്ക് ഹസ്തദാനം നല്കുക, അവര് കഴിക്കുന്ന പാത്രത്തില് നിന്ന് ഭക്ഷണം കഴിക്കുക തുടങ്ങിയ നടപടികള് അണുബാധ പകരാന് കാരണമായേക്കാം. രോഗബാധിതരില് നിന്ന് സൗകര്യപ്രദമായ അകലം സൂക്ഷിക്കുന്നത് എപ്പോഴും നല്ലതാണ്.

വസ്ത്രങ്ങളും കൈലേസും മറ്റും അണുവിമുക്തമാക്കുക ; വസ്ത്രങ്ങളും ടവ്വലുകളും കിടക്കവിരിയും മറ്റും കൃത്യമായി അലക്കുകയും പൊടിവിമുക്തമാണെന്ന് ഉറപ്പുവരുത്തുകയും ചെയ്യണം. കിടക്കമുറിയിലെ തുണികളിലും മറ്റും അടിഞ്ഞുകൂടുന്ന പൊടിയില് ബാക്ടീരിയകള് വളരാന് സാധ്യതയേറെയാണെന്ന് മനസ്സിലാക്കുക. വൃത്തിയാക്കുന്ന അവസരത്തില് ഒന്നോ രണ്ടോ തുള്ളി ഡെറ്റോള് പോലെയുള്ള അണുനാശിനികളും ഉപയോഗിക്കുക. മുഷിയുന്നതിന് അനുസരിച്ച് വസ്ത്രങ്ങള് കഴുകുന്ന ഇടവേളകളും കുറയ്ക്കുക.

നിര്ജലീകരണം ഒഴിവാക്കാന് ധാരാളം വെള്ളം കുടിക്കുക ; ആവശ്യമായ തോതില് വെള്ളം കുടിക്കുന്നത് കഫം നേര്ത്തതാക്കുകയും അത് പുറന്തള്ളുന്നതിന് സഹായകമാവുകയും ചെയ്യും. അയാസരഹിതമായി കഫം പുറത്തു പോകുന്നത് ചുമ കുറയ്ക്കും.

വീട്ടില് തന്നെ കഴിയുക ; നിങ്ങള്ക്ക് അസ്വസ്ഥത അനുഭവപ്പെടുകയാണെങ്കില് ജോലി അല്ലെങ്കില് പഠനത്തില് നിന്ന് തല്ക്കാലം വിട്ടുനില്ക്കുക. മറ്റുള്ളവരിലേക്ക് അണുബാധപകരാനുള്ള സാധ്യത ജോലിസ്ഥലത്തും സ്കൂളിലും വളരെ കൂടുതലാണ്.

പ്രതിരോധ കുത്തിവയ്പ് ; വില്ലന് ചുമയെ പ്രതിരോധിക്കുന്നതിന് പെര്ട്യൂസിസ് വാക്സിന് എടുക്കുന്നത് സഹായിക്കും. നിങ്ങളുടെ കുട്ടിക്ക് മാത്രമല്ല നിങ്ങള്ക്കും പ്രതിരോധ കുത്തിവയ്പ് എടുക്കേണ്ടതാണ്. ഇക്കാര്യം ഓര്ക്കുക, പെര്ട്യൂസിസ് വാക്സിന് എടുത്താല് പോലും വില്ലന് ചുമ പിടിപെടാം.

ഇടയ്ക്കിടെ മുഖത്ത് സ്പര്ശിക്കുന്നത് ഒഴിവാക്കുക ; അണുബാധയുണ്ടാക്കുന്ന സ്രവങ്ങള് വീണ പ്രതലങ്ങളില് (മേശ, പുസ്തകങ്ങള് തുടങ്ങിയവ) സ്പര്ശിച്ച ശേഷം മുഖത്ത്, പ്രത്യേകിച്ച് കണ്ണുകള്, മൂക്ക്, വായ, സ്പര്ശിക്കുന്നത് ജലദോഷവും ചുമയും ഉണ്ടാകാനുള്ള സാധ്യത വര്ദ്ധിപ്പിക്കുന്നു.

പാസീവ് സ്മോക്കിംഗ് (നിഷ്ക്രിയ ധൂമപാനം) നിര്ത്തുക ; ഏതു തരത്തിലുള്ള പുകയില ഉപയോഗവും ശ്വാസനാളിയില് അസ്വസ്ഥത ഉണ്ടാക്കും. അത് വരണ്ട ചുമയുടെ രൂപത്തിലായിരിക്കും പ്രത്യക്ഷമാവുക. പാസീവ് സ്മോക്കിംഗ് ആസ്ത്മയ്ക്കും മറ്റ് ശ്വസന തകരാറുകള്ക്കും കാരണമായേക്കാം. നിക്കോട്ടിന് പുനസ്ഥാപന (നിക്കോട്ടിന് റീപ്ളേസ്മെന്റ് തെറാപ്പി) ചികിത്സ നടത്തുന്നതിലൂടെ പുകവലിയില് നിന്ന് മോചനം നേടാന് സാധിക്കും.

രക്തത്തില് നല്ല കൊളസ്ട്രോള് വര്ദ്ധിപ്പിക്കാന് ചെയ്യേണ്ടകാര്യങ്ങള് കൊളസ്ട്രോള് രണ്ടു തരമുണ്ട്- ഹൃദയാരോഗ്യത്തിനു ഹാനികരമായതും, മറ്റൊന്നു ഗുണപ്രദമായതും.ഹൈ ഡെന്സിറ്റി ലിപോ പ്രോട്ടീന് (HDL) കൊളസ്ട്രോളാണ് നല്ല കൊളസ്ട്രോള്. HDL കൊളസ്ട്രോള് ഹൃദയത്തിന്റെ ആരോഗ്യം നിലനിര്ത്താന് വളരെ അത്യന്താപേക്ഷികമാണ്. ഹൃദയധമനികളില് അടിഞ്ഞു കൂടാന് സാധ്യതയുള്ള ഹാനികരമായ കൊളസ്ട്രോളിനെ HDL കരളില് എത്തിക്കുകയും അതുവഴി ശരീരത്തില് നിന്നും പുറന്തള്ളുകയും ചെയ്യുന്നു. അതിനാല് HDL ന്റെഅളവ് രക്തത്തില് നല്ലയളവില് ഉണ്ടാകേണ്ടതുണ്ട്.

ഇനി കൊളസ്ട്രോള് നില അറിയാനായി രക്തപരിശോധന നടത്തുമ്പോള്ള് HDL ന്റെ അളവ് കൂടി പരിശോധിക്കുക. നല്ല കൊളസ്ട്രോളിന്റെ അളവ് പുരുഷന്മാരില് 40ല് താഴെയും, സ്ത്രീകളില് 50ല് താഴെയാണ് എങ്കില് ഹൃദ്രോഗമുണ്ടാകാനുള്ള സാധ്യതകള് ഏറെയാണ്. രക്തത്തില് HDL അളവ് കുറഞ്ഞത് അറുപതെങ്കിലും ഉണ്ടായിരിക്കണം. ഭക്ഷണക്രമീകരണവും ജീവിതശൈലിയിലെ നിയന്ത്രണങ്ങളും രക്തത്തില് നല്ല കൊളസ്ട്രോളിന്റെ അളവ് വര്ദ്ധിപ്പിക്കാന് കാരണമാകുന്നുണ്ട്.

1) അലസത ഒഴിവാക്കുക: മടിയും അലസതയും നല്ല കൊളസ്ട്രോളിന്റെ ശത്രുക്കളാണ്. കഴിയുന്നതും എപ്പോഴും ഊര്ജ്ജസ്വലമായിരിക്കാന് ശ്രമിക്കുക. ഇത് രക്തത്തില് നല്ല കൊളസ്ട്രോളിന്റെ ആളവ് വര്ധിപ്പിക്കുമെന്ന് മാത്രമല്ല, അപകടകാരിയായ കൊളസ്ട്രോളിനെ ഇല്ലാതാക്കുകയും ചെയ്യും.

2) ശരീരഭാരം നിയന്ത്രിക്കുക: അമിതഭാരം ദുര്മേദസിനും കാരണമാകും എന്നു പറയേണ്ടതില്ലെലോ. കൂടാതെ ശരീരത്തില് കൊഴുപ്പ് അടിഞ്ഞുകൂടാനുള്ള ഏറ്റവും പ്രധാനകാരണവും അമിതഭാരവും വണ്ണവുമാണ്.

3) ആഹാരക്രമത്തില് കൊഴുപ്പ് കുറഞ്ഞതും, ആരോഗ്യകരമായതുമായ ഭക്ഷണം തിരഞ്ഞെടുക്കുക. മത്സ്യം നല്ല കൊള്സട്രോള് ഉത്പാദിപ്പിക്കാന് ശരീരത്തെ സഹായിക്കുന്നു. മത്സ്യത്തില് ധാരാളം ഒമേഗ 3 ഫാറ്റി ആസിഡ് അടങ്ങിയിട്ടുണ്ട്. പ്രത്യേകിച്ചും കടല് മത്സ്യങ്ങളില്. ചെമ്മീന്, കക്ക തുടങ്ങിയവ ഫാറ്റി ആസിഡ് ധാരാളം അടങ്ങിയവയാണ്. ധാരാളം മാംസമുള്ള മീനുകള് ഒഴിവാക്കുകയാണ് നല്ലത്. ഏതുതരം മത്സ്യമാണെങ്കിലും കറി വച്ചോ ഗ്രില്, ബേക്ക് ചെയ്തോ കഴിയ്ക്കണം. എണ്ണയില് വറുത്താല് ഇവ ചീത്ത കൊളസ്ട്രോളാണ് ഉണ്ടാക്കുക.കൂടാതെ ഓറഞ്ച് ജൂസ്, വെളുത്തുള്ളി, മുന്തിരി പാനീയങ്ങള് എന്നിവയും നല്ല കൊളസ്ട്രോള് ഉത്പാദനത്തിന് സഹായകരമാണ്.

4) മിതമായ മദ്യപാനം: ചെറിയ അളവിലെ മദ്യം നല്ല കൊള്സട്രോള് ഉത്പാദനത്തിന് സഹായകരമാണ് എങ്കിലും മദ്യപാനം മറ്റു പല രോഗങ്ങളും ക്ഷണിച്ചുവരുത്തുമെന്നതിനാല് ശ്രദ്ധിക്കേണ്ടതുണ്ട്. നിങ്ങളുടെ ഡോക്ടറുമായി കണ്സള്ട്ട് ചെയ്തതിനു ശേഷം മാത്രം ഇതു ശ്രമിക്കുക.

5) പുകവലി പൂര്ണ്ണമായും നിര്ത്തുക. സിഗരറ്റ് ജീവിതത്തില് നിന്നും അകറ്റി നിര്ത്തുന്നത് നല്ല കൊളസ്ട്രോളിനെ സ്വാഗതം ചെയ്യും

കുട്ടികളിലെ ക്രാഡില് ക്യാപ് ഒന്നോ രണ്ടോ മാസം പ്രായമുള്ള കുഞ്ഞുങ്ങളുടെ തലയോട്ടിയില് ഉണ്ടാകാവുന്ന മഞ്ഞയോ വെളുപ്പോ നിറത്തിലുള്ള തടിപ്പുകളോ പാടുകളോ ആണ് ക്രാഡില് ക്യാപ്. ഇത് തീര്ത്തും അപകടരഹിതമായ ഒരു അവസ്ഥയായതിനാല് മാതാപിതാക്കള് ആശങ്കപ്പെടേണ്ടതില്ല. മുതിര്ന്നവരിലെ താരന് (സെബോറിയ) എന്ന അവസ്ഥയാണിത്.

നവജാതശിശുക്കളിലും മൂന്നു മാസം വരെ പ്രായമുള്ള കുഞ്ഞുങ്ങളിലുമാണ് ക്രാഡില് ക്യാപ് എന്ന അവസ്ഥ സാധാരണ കണ്ടുവരാറുള്ളത്. ചില കുട്ടികളില് തലയോട്ടിയില് ചില ഭാഗങ്ങളില് മാത്രമുള്ള പൊറ്റകള് ആയിരിക്കും കാണപ്പെടുക. മറ്റുചിലരിലാവട്ടെ, തലയോട്ടി മുഴുവനും ഇത് വ്യാപിച്ചിരിക്കുന്നതായി കാണാം. ചിലയവസരങ്ങളില്, കണ്പുരികങ്ങള്, കണ്പോളകള്, ചെവി, പിന്കഴുത്ത്, കക്ഷം, ഡയപര് വയ്ക്കുന്നഭാഗം എന്നിവിടങ്ങളിലേക്കും ബേബി ക്രാഡില് വ്യാപിച്ചേക്കാം. എന്നാല്, ഇത് സ്പര്ശനം മൂലം പകരില്ല. ശുചിത്വമില്ലായ്മയുടെ സൂചനയാണ് ഇത് എന്നുകൂടി മനസ്സിലാക്കുക.

ലക്ഷണങ്ങള്

തലയോട്ടിയില് പൊറ്റകള് കാണപ്പെടുക എണ്ണമയമുള്ള ചര്മ്മവും വെളുത്തത് അല്ലെങ്കില് മഞ്ഞ നിറത്തിലുള്ള പൊറ്റകളും ഇളം ചുവപ്പുനിറം ചര്മ്മത്തിന്റെ അടരുകള് ചെവി, കണ്പോളകള്, മൂക്ക്, കഴല എന്നിവിടങ്ങളിലും ചര്മ്മം പൊറ്റപിടിച്ചിരിക്കാം. ക്രാഡില് ക്യാപിന്റെ കാരണം

ക്രാഡില് ക്യാപിന്റെ കാരണങ്ങള് വ്യക്തമല്ല. ഇതിലേക്ക് നയിക്കാവുന്ന ചില ഘടകങ്ങളെ കുറിച്ചാണ് ഇനി പറയുന്നത്

ഹോര്മോണ്: : ജനിക്കുന്നതിനു മുമ്പ് അമ്മയില് നിന്ന് കുഞ്ഞിലേക്ക് കൈമാറ്റംചെയ്യപ്പെടുന്ന ഹോര്മോണുകള് ഇതിനു കാരണമായേക്കാം. ഇത് കുഞ്ഞിന്റെ തലയോട്ടിയിലെ എണ്ണ ഗ്രന്ഥികള് കൂടുതല് എണ്ണ (സേബം) ഉത്പാദിപ്പിക്കാന് കാരണമായേക്കാം.

ഫംഗസ്: തലയോട്ടിയിലെ സേബത്തില് വളരുന്ന മലാസെസിയ (Malassezia) എന്ന ഫംഗസും ഇതിന് കാരണമായേക്കാം.

മറ്റു ഘടകങ്ങള്: : കൂടുതല് ചൂട് അല്ലെങ്കില് തണുപ്പ് ഉള്ള കാലാവസ്ഥ, എണ്ണമയമുള്ള ചര്മ്മം, പ്രതിരോധശേഷിക്കുറവ്, മറ്റ് ചര്മ്മ പ്രശ്നങ്ങള് എന്നിവയും ഇതിന് കാരണമായേക്കാം.

എങ്ങനെ ചികിത്സിക്കാം ?

ആദ്യമായി, ക്രാഡില് ക്യാപ് നിങ്ങളുടെ കുഞ്ഞിന് ദോഷകരമല്ല എന്ന് മനസ്സിലാക്കുക. സാധാരണഗതിയില് ഏതാനും മാസങ്ങള്ക്കുള്ളില് അത് താനേ ഭേദമാവും. ഇതിന് വേണ്ടി ചെയ്യേണ്ടത് ഇത്രമാത്രം, ശക്തികുറഞ്ഞ ഒരു ഷാമ്പൂ ഉപയോഗിച്ച് ദിവസവും കുഞ്ഞിന്റെ തല കഴുകി വൃത്തിയാക്കുക.പാടുകള് അല്ലെങ്കില് പൊറ്റകള് എളുപ്പം ഭേദപ്പെടുന്നില്ല എങ്കില് അവ നിയന്ത്രണവിധേയമാക്കാന് ചില വീട്ടു ചികിത്സകളുണ്ട്;

ഷാമ്പൂ ചെയ്യുന്നതിന് ഒരു മണിക്കൂര് മുമ്പ് ബേബി ഓയിലോ പെട്രോളിയം ജെല്ലിയോ കുട്ടിയുടെ തലയോട്ടിയില് തേച്ചുപിടിപ്പിക്കുക. ഇത് പൊറ്റകള് ഇളകിപ്പോകാന് സഹായിക്കും. ഷാമ്പൂ ചെയ്യുമ്പോള് മൃദുവായ ഒരു ബ്രഷ് ഉപയോഗിച്ച് പതുക്കെ ഉരയ്ക്കുന്നതും പൊറ്റകള് ഇളകിപ്പോകാന് സഹായിക്കും. ഷാമ്പൂ ചെയ്തശേഷം എണ്ണമയം പൂര്ണമായി കഴുകി കളയണം, എണ്ണമയം ബാക്കിയിരിക്കുന്നത് ക്രാഡില് ക്യാപിനെ വഷളാക്കും. എപ്പോഴാണ് ഡോക്ടറെ കാണേണ്ടത്

മുകളില് പറഞ്ഞിരിക്കുന്ന വഴികളൊന്നും ഫലപ്രദമായില്ലെങ്കില് നിങ്ങളുടെ കുഞ്ഞിനെ ഒരു പീഡിയാട്രീഷ്യനെയോ ഡെര്മറ്റോളജിസ്റ്റിനെയോ കാണിക്കാം. താരന് ഇല്ലാതാക്കാനുള്ള ശക്തികുറഞ്ഞ ഷാമ്പൂ ആയിരിക്കും ഡോക്ടര്മാര് നിര്ദേശിക്കുന്നത്. ഷാമ്പൂ ഉപയോഗിക്കുമ്പോള് അത് കുഞ്ഞിന്റെ കണ്ണില് വീഴാതിരിക്കാന് ശ്രദ്ധിക്കണം.ക്രാഡില് ക്യാപ് എന്ന് പറയുന്നത് വളരെ സാധാരണവും അപകടരഹിതവുമായ ഒരു അവസ്ഥയാണെന്ന് മനസ്സിലാക്കുക. ലളിതമായ വീട്ടുചികിത്സയിലൂടെ അത് ഭേദമാക്കാവുന്നതേയുള്ളൂ. ഇത് കുഞ്ഞിന്റെആരോഗ്യത്തെ ഒരു രീതിയിലും ഗുരുതരമായി ബാധിക്കില്ല.

കണ്ണിന്റെ സംരക്ഷണത്തിന് ഗ്രീന് ടീ ലോകവ്യാപകമായി പ്രചാരം ലഭിച്ചിട്ടുള്ള ഒരു പാനീയമാണ് ഗ്രീന് ടീ. ഫൈറ്റോന്യൂട്രിയന്റുകളാല് സമ്പുഷ്ടമാണ് ഗ്രീന് ടീ. ഇതില് അടങ്ങിയിരിക്കുന്ന പോളിഫിനോളുകള്ക്ക് ജൈവശാസ്ത്രപരമായ ഗുണഫലങ്ങള് ഉണ്ടെന്ന് ചില പഠനങ്ങളില് വ്യക്തമാക്കുന്നു. അതായത്, പ്രധാനമായും കാറ്റക്കിനുകളും അതിന്റെഉത്പന്നങ്ങളും (എപിഗാല്ലോ കാറ്റക്കിന്-3-ഗാല്ലേറ്റ് (ഇജിസിജി), എപിഗാല്ലോകാറ്റക്കിന് (ഇജിസി), എപികാറ്റക്കിന് (ഇസി), എപികാറ്റക്കിന്-3-ഗാല്ലേറ്റ് (ഇസീജി), ഗാല്ലോകാറ്റക്കിന് ഗാല്ലേറ്റ് (ജിസിജി)) ഇത്തരത്തിലുള്ള ഗുണഫലങ്ങള് പ്രധാനം ചെയ്യുന്നു.

അമിതവണ്ണം, ടൈപ്പ് 2 പ്രമേഹം, ക്യാന്സര്, ലിപിഡ് മെറ്റാബോളിസത്തില് ഉണ്ടാകുന്ന അസ്വാഭാവികതകള്, അതെറോസ്ക്ളീറോസിസ്, മറ്റ് കാര്ഡിയോവാസ്കുലര് രോഗങ്ങള് തുടങ്ങി ദീര്ഘകാലം നിലനില്ക്കുന്ന രോഗങ്ങളെ പ്രതിരോധിക്കുന്നതിന് ഗ്രീന് ടീയില് അടങ്ങിയിരിക്കുന്ന ഫൈറ്റോകെമിക്കലുകള് സഹായിക്കുമെന്നാണ് കരുതുന്നത്.

ഹൃദയം, തലച്ചോര്, വൃക്കകള് തുടങ്ങിയ അവയവങ്ങളെ ഓക്സിഡേറ്റീവ് പരുക്കുകളില് നിന്ന് സംരക്ഷിക്കുന്നതിന് ഇജിസിജി സഹായിക്കുമെന്നും പഠനങ്ങള് വ്യക്തമാക്കുന്നു.

കണ്ണുകളുടെ ആരോഗ്യത്തിന് ഗ്രീന് ടീ പ്രയോജനപ്രദമായ പങ്കു വഹിക്കുന്നുവെന്ന് നിരവധി പഠനങ്ങള് തെളിയിച്ചിട്ടുണ്ട്. ഗ്ളൂക്കോമയ്ക്കും മറ്റ് നേത്രരോഗങ്ങള്ക്കും എതിരെ ഇത് സംരക്ഷണം നല്കുന്നുവെന്നും പഠനങ്ങള് പറയുന്നു.

ഗ്ളൂക്കോമ: നേത്രഗോളത്തില് സമ്മര്ദം വര്ധിക്കുകയും ക്രമേണ കാഴ്ച നഷ്ടം സംഭവിക്കുന്നതുമാണ് ഇതിന്റെ ലക്ഷണം. ഗ്രീന് ടീയുടെ ഘടകങ്ങള്ക്ക് ആമാശയത്തില് നിന്ന് കണ്ണുകളില് എത്തിച്ചേരാന് സാധിക്കുമെന്നും അവയെ റെറ്റിന, ലെന്സ് തുടങ്ങിയ ഭാഗങ്ങളിലേത് അടക്കമുള്ള കോശകലകള്ക്ക് വലിച്ചെടുക്കാന് സാധിക്കുമെന്നും പരീക്ഷണങ്ങളില് തെളിഞ്ഞിട്ടുണ്ട്. ഉപഭോഗം നടത്തി 20 മണിക്കൂര് സമയം ഇത്തരം ഘടകങ്ങള് കണ്ണിന്റെ ഭാഗങ്ങളില് നിലനില്ക്കുമെന്നാണ് റിപ്പോര്ട്ടുകളില് പറയുന്നത്. ഓക്സിഡേറ്റീവ് സ്ട്രെസില് നിന്ന് ഗ്രീന് ടീ സംരക്ഷണം നല്ക്കുമെന്നാണ് പഠനങ്ങള് വ്യക്തമാക്കുന്നത്. ഇത് ഗ്ലൂക്കോമ പോലെയുള്ള നേത്രരോഗങ്ങളെ ചെറുക്കുന്നതിനുള്ള സാധ്യത വര്ധിപ്പിക്കുന്നു.

വരണ്ട കണ്ണുകള്: : കണ്ണുകളുടെ ഉപരിതലത്തില് ഉണ്ടാകുന്ന കോശജ്വലനവുമായി ബന്ധപ്പെട്ട് ഉണ്ടാകുന്ന ഒരു അവസ്ഥയാണ് വരണ്ട കണ്ണുകള്. കോശജ്വലനം സംഭവിക്കുന്ന അവസരത്തില്, കോശങ്ങള്ക്ക് തകരാറു വരുത്തുന്ന പ്രധാന കാരണം ഓക്സിഡേറ്റീവ് സ്ട്രെസ് ആണെന്ന് തിരിച്ചറിഞ്ഞിട്ടുണ്ട്. ഗ്രീന് ടീയില് അടങ്ങിയിട്ടുള്ള ഇജിസിജി ക്ക് ആന്റി-ഇന്ഫ്ളമേറ്ററി, ആന്റിഓക്സിഡന്റ് സ്വഭാവങ്ങള് ഉണ്ട്. വരണ്ട കണ്ണുകള് ഉള്പ്പെടെയുള്ള കണ്ണിന്റെ പ്രശ്നങ്ങള്ക്ക് ചികിത്സാപരമായി ഇജിസിജി ഉപയോഗിക്കാന് സാധിക്കുമന്നാണ് ന്യൂയോര്ക്കില് നിന്നുള്ള ഗവേഷകര് അഭിപ്രായപ്പെടുന്നത്.

അള്ട്രാവയലറ്റ് വികിരിണങ്ങള്ക്കെതിരെയുള്ള സംരക്ഷണം: അള്ട്രാവയലറ്റ് (യുവി) രശ്മികള്, പ്രത്യേകിച്ച് അള്ട്രാവയലറ്റ് ബി (യുവിബി) കോര്ണിയയ്ക്ക് പരുക്ക് പറ്റുന്നതിനുള്ള ഒരു പ്രധാന അപകടസാധ്യതാ ഘടകമാണ്. യുവിബി വികിരണങ്ങള് മൂലമുള്ള കോര്ണിയയുടെ ഓക്സിഡേറ്റീവ് സ്ട്രെസിനെതിരെ സംരക്ഷണം നല്കാന് ഇജിസിജി അടങ്ങിയ തുള്ളിമരുന്നുകള്ക്ക് സാധിക്കുമെന്ന് തായ്വാനില് നടന്ന ഒരു പഠനത്തില് വ്യക്തമായിട്ടുണ്ട്. വിവിധ നേത്രരോഗങ്ങളില് നിന്ന് സംരക്ഷണം നല്കുന്നുവെന്ന് പരീക്ഷണ മാതൃകകളില് പ്രാമാണീകരിക്കപ്പെട്ടിട്ടുണ്ട്. എന്നാല്, മനുഷ്യരില് ഇതിന്റെ വൈദ്യശാസ്ത്രപരമായ ഫലപ്രാപ്തിയെ കുറിച്ച് കൂടുതല് വ്യക്തത ആവശ്യമാണ്. ഫൈറ്റോകെമിക്കലുകള് ധാരാളം അടങ്ങിയ പാനീയമായ ഗ്രീന് ടീയ്ക്ക് ആരോഗ്യപരമായ ധാരാളം ഗുണങ്ങള് ഉണ്ട്. ഇതിന് കണ്ണുകള്ക്ക് ഓക്സിഡേറ്റീവ് സ്ട്രെസ് ഡിസോഡറുകളില് നിന്നുള്ള സംരക്ഷണവും ഉറപ്പാക്കാന് കഴിഞ്ഞേക്കും. എന്നിരുന്നാലും, കാഴ്ചയ്ക്ക് എന്തെങ്കിലും തകരാറുകള് ഉണ്ടെങ്കില് ഡോക്ടറുടെ ഉപദേശം തേടുകയാണ് സുരക്ഷിതമായ നടപടി.

ഭാരം കുറയ്ക്കാന് അഞ്ച് വഴികള് ഇതാ ഭാരം കുറക്കാന് ഏവര്ക്കും പരീക്ഷിക്കാവുന്ന ചില കാര്യങ്ങള് പങ്കുവെക്കാം. ഭാരം കുറക്കാനുള്ള എല്ലാ ശ്രമങ്ങള്ക്കും ഏറ്റവും നല്ല സമയം രാവിലെയാണ്. ഭാരം കുറക്കുന്നതിനായി അതിരാവിലെ ചെയ്യാവുന്ന അഞ്ച് കാര്യങ്ങള് ഇതാ:

1. ഇളം ചൂടുവെള്ളം കുടിക്കുക രാവിലെ എഴുന്നേറ്റ ഉടന് ഇളം ചൂടുവെള്ളം കുടിച്ചു കൊണ്ട് ദിവസം തുടങ്ങുക. അത് ദഹന സംവിധാനത്തെ ശുദ്ധീകരിക്കുകയും ശരീരപോഷണത്തിന് സഹായിക്കുകയും ചെയ്യും. െവള്ളത്തിന് ചൂട് കൂടരുത്. തണുപ്പുവിട്ട അവസ്ഥ മാത്രമേ ഉണ്ടാകാവൂ. ആദ്യം ഇളം ചൂടുവെള്ളം കുടിച്ച് പിന്നീട് ദിവസം മുഴുവന് തണുത്ത വെള്ളം കുടിക്കാവുന്നതാണ്. ഇളം ചൂടുവെള്ളത്തില് വേണമെങ്കില് അല്പം നാരങ്ങനീരോ തേനോ ഒഴിച്ച് കഴിക്കാവുന്നതാണ്.

2. വെള്ളക്കുപ്പികള് നിറച്ചു കൊണ്ടിരിക്കുക ഓരോ ദിവസവും തുടങ്ങുന്നത് വെള്ളക്കുപ്പികള് നിറച്ചുകൊണ്ടാകെട്ട. കൂടുതല് തവണ വെള്ളം കുടിക്കുന്നുവെങ്കില് ഭാരം കുറയുമെന്നാണ് വിദഗ്ധാഭിപ്രായം. വെള്ളം കുടിച്ചാല് ആവശ്യത്തില് കൂടുതല് ഭക്ഷണം കഴിക്കാനുള്ള സാധ്യത ഇല്ലാതാകും. ഇത് കലോറി കുറക്കാന് സഹായിക്കുമെന്നതാണ് വെള്ളം കുടിക്കു പിന്നിലെ തത്വം. അതിനാല് എവിടെ പോകുമ്പോഴും വെള്ളം നിറച്ച കുപ്പികള് കൂടെ കരുതുക. വീട്ടില് നിന്ന് പുറത്തിറങ്ങുന്നതിനു മുമ്പ് രണ്ട് ഗ്ലാസ് വെള്ളം കുടിക്കുക. ദിവസും രണ്ട് ലിറ്റര് വെള്ളം നിര്ബന്ധമായും കുടിക്കണം.

3. പ്രഭാതത്തില് പ്രോട്ടീനും നാരുകളുമുള്ള ഭക്ഷണം കൂടുതല് കഴിക്കുക പ്രഭാതത്തിലേതാണ് (പ്രാതല്) ഒരു ദിവസത്തെ ഏറ്റവും പ്രധാന ഭക്ഷണം. പ്രാതല് ഒഴിവാക്കുന്ന ഒരാള് അധിക ഭാരത്തിന് വഴിവെട്ടുകയാണ്. പ്രോട്ടീനുകളും നാരുകളും ധാരാളമടങ്ങിയ ഭക്ഷണമാണ് പ്രാതലിന് കഴിക്കേണ്ടത്. കാരണം ഇവ ദഹിക്കാന് സമയം കൂടുതലെടുക്കും. അതുമൂലം വിശപ്പ് കുറയുകയും വയര് നിറഞ്ഞിരിക്കുകയാണെന്ന് തോന്നല് നിങ്ങളിലുണ്ടാക്കുകയും ചെയ്യും. പ്രാതലിന് 35 ഗ്രാം പ്രോട്ടീന് അടങ്ങിയ ഭക്ഷണം കഴിക്കുന്നത് നാലു മുട്ട കഴിക്കുന്നതിന് തുല്യമാണ്. മുട്ടയും രാവിലെ കഴിക്കുന്നത് നല്ലതാണ്. മുട്ടയിലെ പ്രോട്ടീന് വിശപ്പ് തടയുന്നതോടൊപ്പം അധികമുള്ള കലോറിയെ എരിച്ചു കളയുകയും ചെയ്യുന്നു. എന്നാല്, പഞ്ചസാരയും മധുര പലഹാരങ്ങളും ഒഴിവാക്കുക. അത് ഇന്സുലിന് ഉത്പാദിപ്പിക്കുന്നതോടൊപ്പം നിങ്ങളിലെ വിശപ്പിനെ വര്ധിപ്പിക്കുകയും ചെയ്യും.

4. ഇടഭക്ഷണം കരുതാം ശരീരം യന്ത്രം പോലെ പ്രവര്ത്തിക്കുന്നതിനാല് ഇടക്ക് ഇന്ധനം ആവശ്യമായി വരും. അതിനാല് പ്രാതലിനു ശേഷം പുറത്തു പോകുമ്പോള് ഇടഭക്ഷണം കൈയില് കരുതുക. ഇടഭക്ഷണം എന്തെങ്കിലും ആകാം എന്നു കരുതാതെ അവയും ആരോഗ്യകരമാക്കാന് ശ്രദ്ധിക്കുക. ദിവസും മെനു മാറിയില്ലെങ്കില് മടുപ്പു മൂലം അനാരോഗ്യകരമായ ഭക്ഷണ ശീലത്തിലേക്ക് തിരിച്ചു പോകാന് സാധ്യതയുണ്ട്.

5. വ്യായാമം അതിരാവിലെ വ്യായാമം ചെയ്യുന്നത് ശരീര ഭാരം കുറക്കുന്നതിനുള്ള നല്ല ഉപാധിയാണ്. കൈകാലുകള്ക്ക് പ്രാധാന്യം കൊടുത്തു കൊണ്ടുള്ള വ്യായാമങ്ങളാണ് ഏറ്റവും നല്ലത്. ശരീരം നന്നായി വിയര്ക്കുമ്പോള് അധികമുള്ള കലോറി എരിഞ്ഞു തീരും. ഇത് നമ്മുടെ ശരീരത്തെ ആരോഗ്യകരമായി നിലനിര്ത്തും. മാത്രമല്ല, രാവിലെ ചെയ്യുന്ന വ്യായാമം സുഖനിദ്രക്കും സഹായകമാകും. സുഖപ്രദമായ ഉറക്കവും അമിതഭാരത്തെ കുറക്കാന് സഹായിക്കുന്ന ഘടകമാണ്.

ലിപോമ എന്ന കൊഴുപ്പ് നിറഞ്ഞ മുഴകള്

എന്താണ് ലിപോമ ?

ചര്മ്മത്തിനടിയില് കാണുന്ന, മൃദുവായ കൊഴുപ്പിന്റെ മുഴകളാണ് ലിപോമകള്. സാധാരണയായി, ഇവ അപകടകാരികളല്ലാത്തതും സാധാരണഗതിയില് ചികിത്സ വേണ്ടിവരാത്തവയുമാണ്. ചെറുതും വേദനയില്ലാത്തതുമാണെങ്കില് ഇവയെ അവഗണിക്കാം. നൂറു പേരില് ഒരാള്ക്ക് ലിപോമ ഉണ്ടാകാം.

കാരണങ്ങള് : ലിപോമകളുടെ ശരിയായ കാരണം വ്യക്തമല്ല. ചിലയവസരങ്ങളില് കുടുംബാംഗങ്ങളില് ആര്ക്കെങ്കിലും ലിപോമ ഉള്ളത് അപകടസാധ്യതാ ഘടകമായി കണക്കാക്കുന്നു. മൂര്ച്ചയില്ലാത്ത വസ്തുക്കള് മൂലമുണ്ടാകുന്ന പരുക്കുകളും ചിലസമയത്ത് ഇതിനു കാരണമാകുന്നു.

ലക്ഷണങ്ങള്

മിനാരത്തിന്റെ ആകൃതിയിലുള്ള മുഴ മൃദുത്വമുള്ള ഇവ സ്പര്ശിക്കുമ്പോള് ചര്മ്മത്തിനടിയില് തെന്നി നീങ്ങുന്നതായിരിക്കും തോളുകള്, കഴുത്ത്, കൈകള്, പുറം, കക്ഷം തുടങ്ങിയ ഭാഗങ്ങളിലാണ് സാധാരണ കാണപ്പെടാറുള്ളത് എങ്കിലും ശരീരത്തില് എവിടെ വേണമെങ്കിലും ഇവ പ്രത്യക്ഷപ്പെടാം. ഭൂരിഭാഗം കേസുകളിലും ലിപോമകള്ക്ക് പ്രത്യേക ലക്ഷണങ്ങള് ഒന്നും കാണില്ല. എന്നാല്, ചിലതില് സമ്മര്ദം ചെലുത്തുന്ന അവസരത്തില് വേദനയുണ്ടാകും. ലിപോമ ഒന്ന് മാത്രമായോ ഒന്നിലധികമായോ പ്രത്യക്ഷമാകാം.

രോഗനിര്ണയം :ശാരീരിക പരിശോധനയിലൂടെയാണ് സാധാരണഗതിയില് ഡോക്ടര് രോഗനിര്ണയം നടത്തുന്നത്. ചിലയവസരത്തില്, ക്യാന്സര് അല്ല എന്ന് ഉറപ്പുവരുത്തുന്നതിന് ബയോപ്സി നടത്താന് നിര്ദേശിച്ചേക്കാം.

ചികിത്സ: നിര്ദോഷങ്ങളായ ലിപോമകള്ക്ക് ചികിത്സ ആവശ്യമില്ല. എന്നാല്, ശരീരത്തിന്റെ പ്രധാന ഭാഗങ്ങളില് വരുന്നവയും ബുദ്ധിമുട്ട് ഉണ്ടാക്കുന്നവയും ഇനി പറയുന്ന രീതികളിലൂടെ നീക്കംചെയ്യാന് സാധിക്കും;

ശസ്ത്രക്രിയയിലൂടെ നിര്മാര്ജനം ചെയ്യല്: ഇതാണ് ലിപോമ നീക്കം ചെയ്യുന്നതിന് സാധാരണ സ്വീകരിക്കുന്ന വഴി. ലിപോസക്ഷന്: ലിപോമ ഉള്ള ഭാഗം മരവിപ്പിച്ച ശേഷം സിറിഞ്ച് ഉപയോഗിച്ച് കൊഴുപ്പ് വലിച്ചുകളയുന്നു. ഞെക്കികളയല്: മുഴയില് ചെറിയ മുറിവുണ്ടാക്കി കൊഴുപ്പ് ഞെക്കികളയുന്നു. പ്രതിരോധം : ലിപോമ ഉണ്ടാകാനുള്ള യഥാര്ത്ഥ കാരണം വ്യക്തമല്ലാത്തതിനാല് ഇവയെ പ്രതിരോധിക്കുക എളുപ്പമല്ല.

സങ്കീര്ണതകള്

വളരെ അപൂര്വമായി ഇവ ക്യാന്സര് ആയി പരിണമിക്കാറുണ്ട്. ചില അവസരങ്ങളില്, ഇവ പേശികളുടെ ചലനത്തെ തടസ്സപ്പെടുത്താറുണ്ട്. ഞരമ്പുകള്ക്ക് മുകളിലാണ് പ്രത്യക്ഷപ്പെടുന്നത് എങ്കില് ഇവ വേദനയുണ്ടാക്കും.

അടുത്ത നടപടികള് : ലിപോമകള്ക്ക് വേദന അനുഭവപ്പെടുകയോ അവ വളരുകയോ ചെയ്യുന്നുണ്ടെങ്കില് ഡോക്ടറുടെ ഉപദേശം സ്വീകരിക്കുക.

നാവിന്റെ വൃത്തിയും പ്രധാനമാണ് നമ്മുടെ ശരീരത്തിലെ ഏറ്റവും വൃത്തികേടായ സ്ഥലം ഏതാണ്? അതിനുത്തരം വായ തന്നെയാണ്. കാരണം കൂടുതല് ബാക്ടീരിയകള് ഉള്ളതും അപകടവും വൃത്തികേടുമായ സ്ഥലം വായ് തന്നെയാണ്. രണ്ട് നേരവും ബ്രഷ് ചെയ്യുന്നവരാണ് നമ്മളില് പലരും. എന്നിട്ടും വായ വൃത്തിയാവുന്നില്ലെന്നതാണ് സത്യം.

ബ്രഷ് ചെയ്താല് മാത്രം പോര. നാവും വൃത്തിയായി സൂക്ഷിക്കണം. കാരണം നാവ് വൃത്തിയായാല് തന്നെ നമ്മുടെ ദന്തപ്രശ്നങ്ങളും വായിലെ വൃത്തിയും കൃത്യമായി സംരക്ഷിക്കാന് പറ്റും. എന്നാല് ഇനി മടി പിടിച്ച് നാവ് വൃത്തിയാക്കാതിരുന്നാലോ? അതിന്റെ അപകടങ്ങള് താഴെ പറയുന്നവയാണ്.

സ്ഥിരമായി നാവ് വൃത്തിയാക്കാതിരുന്നാല് നമ്മുടെ രസമുകുളങ്ങള് നമുക്ക് പണി തരുന്നു. ബാക്ടീരിയയുടെ ഒരു പാളി നാവിനു മുകളില് രൂപപ്പെടുന്നു. ഇത് പിന്നീട് വിശപ്പില്ലായ്മയിലേക്ക് മലബന്ധം പോലുള്ള പ്രശ്നങ്ങളിലേക്കും നമ്മെ നയിക്കും.

ചിലര് എത്രയൊക്കെ പ്രാവശ്യം പല്ല് തേച്ചാലും വായ് നാറ്റം എന്ന വില്ലന് പലപ്പോഴും ഇവരെ പിടികൂടാറുണ്ട്. ഇതിന് കാരണം പല്ല് തേയ്ക്കുമ്പോള് നാവ് വൃത്തിയാക്കുന്നില്ല എന്നത് തന്നെയാണ്. നാവ് സ്ഥിരമായി വൃത്തിയാക്കേണ്ടതിന്റെ ആവശ്യകത വളരെ വലുത് തന്നെയാണ്

ചിലരുടെ നാവ് കണ്ടിട്ടില്ലേ കറുത്ത നിറത്തില്. ചിലരതിനെ കരിനാക്ക് എന്നൊക്കെ വിളിയ്ക്കും. എന്നാല് നാവ് വൃത്തിയാക്കാത്തവരിലാണ് ഇത്തരത്തിലൊരു പ്രശ്നം സ്ഥിരമായി കാണപ്പെടുന്നത്. നിങ്ങള് വൃത്തിയാക്കാന് തുടങ്ങിയാല് ഈ പ്രശ്നം വളരെ സിംപിളായി പരിഹരിയ്ക്കപ്പെടും.

മോണപഴുപ്പാണ് മറ്റൊരു പ്രശ്നം. നാവിലുണ്ടാവുന്ന ബാക്ടീരിയ നാവില് മാത്രം ഒതുങ്ങിക്കൂടില്ല. ഇത് മോണയിലേക്കും വ്യാപിക്കും. അതിന്റെ ഫലമായി മോണപഴുപ്പ് ഉണ്ടാവുന്നു. അപ്പോള് ഇതില് നിന്നെല്ലാം രക്ഷപ്പെടാന് വേഗം നാവ് വടിയ്ക്കാന് തുടങ്ങിക്കോളൂ.

പലരുടേയും നാവില് വെളുത്ത പാട കാണപ്പെടുന്നു. പ്രത്യേകിച്ച് കുട്ടികളുടെ നാവില്. യീസ്റ്റ് ഇന്ഫെക്ഷനാണ് ഇതെന്നതാണ് സത്യം. അതുകൊണ്ട് ഇതിനെ പ്രതിരോധിയ്ക്കാന് ഒറ്റവഴിയേ ഉള്ളൂ. അതാണ് നാവ് വൃത്തിയാക്കുന്നത്.

ക്യാന്സര് തടയാന് ബ്രോക്കോളി ബ്രൊക്കോളിയുടെ ആരോഗ്യ ഗുണങ്ങള് പറഞ്ഞാല് തീരില്ലാ. വിറ്റമിൻ കെ, സി, ഫോളിക് ആസിഡ്, പൊട്ടാസ്യം, ഫൈബർ എന്നിവ സമൃദ്ധമായടങ്ങിയ പച്ചക്കറിയാണിത്. രുചികരമായ ബ്രൊക്കോളിയിൽ അടങ്ങിയിരിക്കുന്ന സൾഫോറഫേൻ എന്ന പദാർത്ഥം കാന്സര് ഉണ്ടാക്കുന്ന മാരകമായ സെല്ലുകളുടെ വളര്ച്ചയെ ഇല്ലാതാക്കുന്നു. കരൾ, ശ്വാസകോശം, ത്വക്ക്, പ്രോസ്റ്റേറ്റ്, ബ്രസ്റ്റ് എന്നിവിടങ്ങളിലുണ്ടാകു കാന്സര് തടയാന് ഉത്തമമാണ് ഈ പച്ചക്കറി. കാബേജ് കുടുംബത്തിൽ പെടുന്ന ഈ ബ്രൊക്കോളി ആഴ്ചയിൽ ഒരിക്കലെങ്കിലും ഭക്ഷണക്രമത്തിൽ ഉൾപ്പെടുത്താൻ കഴിഞ്ഞാൽ ആരോഗ്യത്തിന് വളരെ നല്ലതാണ്.

അനുപാനം എങ്ങനെ

അനുപാനം

ആഹാരത്തിന്റെ അനുബന്ധമായികുടിക്കുന്ന പാനീയങ്ങളാണ് അനുപാനം. ആഹാരത്തിന് ശൈഥില്യവും മൃദുത്വവുമുണ്ടാക്കികൊണ്ട് ഇവ ദഹന പ്രക്രിയയെ സഹായിക്കുകയും ആഹാരസാരത്തെ ശരീരമാസകലം എത്തിച്ച് ധാതുപുഷ്ടിയുണ്ടാക്കാന് പ്രേരകമായി പ്രവര്ത്തിക്കുകയും ചെയ്യുന്നു. ഭക്ഷണം മതി എന്ന രീതിയില് തൃപ്തിയുണ്ടാക്കും. ശരീരബലം നല്കും. അന്നത്തിന്റെ ഗുണത്തിനു വിപരീതമായതും വിരുദ്ധമാകാത്തതുമായിരിക്കണം അനുപാനം. തണുത്തവെള്ളം: ശുദ്ധജലം തന്നെയാണ് ശ്രേഷ്ഠമായ അനുപാനം. തൈര്, തേന്, യവം, ഗോതമ്പ്, മദ്യങ്ങള്, ഉള്പ്പുഴുക്കുണ്ടാക്കുന്ന ഇനങ്ങള് എന്നിവയില് തണുത്തവെള്ളം തന്നെ ഉപയോഗിക്കണം. ചൂടുവെള്ളം: അരച്ചുണ്ടാക്കിയ ഭക്ഷണങ്ങളിലും ദഹിക്കാന് പ്രയാസമുള്ളവയിലും ചോറ് കഴിച്ചിട്ടും ചൂടുള്ള ജലം കുടിക്കണം. ഹേമന്തഋതുവിലും ചൂടുവെള്ളമാണു ശുപാര്ശ ചെയ്യുന്നത്. നെയ്യ് സേവിച്ചാലോ നെയ്യ് കലര്ന്നവ സേവിച്ചാലോ ചെറുചൂടുവെള്ളം അനുപാനമായി ഉപയോഗിക്കണം.

പാല്: : പട്ടിണി, വഴിനടപ്പ്, കൂടുതല് സംസാരിച്ചശേഷം (പ്രസംഗം, വായ്പാട്ട് ഇത്യാദികള്ക്കുശേഷം), വ്യായാമത്തില് ക്ഷീണിതമായിരിക്കുമ്പോള് ഒക്കെ ഏറ്റവും ഉത്തമമായ പാനീയം പാല് ആകുന്നു. ബാലന്മാരും വൃദ്ധന്മാരും പാല് നിത്യവും കുടിക്കണം.

മറ്റുപാനീയങ്ങള്: : ഇലക്കറിക്ക് തയിരിന്വെള്ളമോ വെപ്പുകാടിയോ അനുപാനമാക്കാം. കോഴിയിറച്ചി കഴിച്ചാല്, പേരാലിന്റെയും മറ്റും കായകൊണ്ടുണ്ടാക്കിയ ആസവങ്ങള് ആണു യോജ്യം. പന്നി, എരുമ, പോത്ത് എന്നിവയുടെ മാംസത്തിന് തേന് ചേര്ത്ത പച്ചവെള്ളമോ, മോരോ കുടിക്കണം. ഭക്ഷണപദാര്ത്ഥങ്ങളും, വിവിധ ചേരുവകളും സൂക്ഷ്മമായി നിരീക്ഷിച്ചു കൊണ്ടുള്ള അനുപാന വിധിയാണിത്.

തൈര് നിഷിദ്ധം ; മോര് കുടിക്കണം : തൈര് നിത്യം ഉപയോഗിക്കരുത്. രാത്രിയില് ഉപയോഗിക്കരുത് (മഞ്ഞള് അരച്ചു ചേര്ത്ത പുളിശ്ശേരി ആവാം) ഉച്ചഭക്ഷണാവസാനം പച്ചമോരുകൂട്ടി ചോറുണ്ണുകയോ പച്ച മോര് കുടിക്കുകയോ ചെയ്യണം. മോര് ഗ്രഹണ്യവയവത്തില് പ്രവര്ത്തിക്കാന് പോന്ന വീര്യമുള്ളതാണ്. ദഹനത്തിനാവശ്യമായ അന്ത:സ്രവണങ്ങളെ ത്വരിതപ്പെടുത്തും. ആയതിനാല് അഗ്നി ദീപനകരമായി വിലയിരുത്തിയിട്ടുമുണ്ട്. ലഘുഗുണമായതിനാല് ദഹിക്കാന് ബുദ്ധിമുട്ടുണ്ടാവില്ല. മലത്തെ അതിരസിപ്പിക്കാതെ മിതപ്പെടുത്തും. വിപാകത്തില് (ദഹനാനന്തര രസം) മധുരമായതിനാല് പിത്തത്തെ വേണ്ടതിലധികം വര്ദ്ധിപ്പിക്കുകയില്ല. അമ്ളപ്രാധാനമായതിനാലും കഷായരസം ഉള്ളടങ്ങിയിരിക്കുന്ന തിനാലും എന്നാല് ഉഷ്ണവീര്യത്തോടുകൂടിയതായതിനാലും സ്രോതോലീനമായ കഫത്തെ ബഹിഷ്കരിക്കുന്നതിന് സഹായിക്കും. കേവലം അമ്ളരസവും കഷായരസവും മാത്രമല്ല; കുറച്ചു മധുരരസവും കൂടി മോരിനുണ്ട്. ഈ മധുരരസവും പുളിപ്പും സാന്ദ്രത (കട്ടി)യും വാതത്തിനു ഹിതകരമാണ്. ചുരുക്കത്തില് ത്രിദോഷങ്ങള്ക്ക് ഹിതകരമായിട്ടുള്ളതാണ് മോര്. അന്നേ ദിവസം തന്നെ കലക്കിയെടുക്കുന്ന മോരാണ് ഉചിതം. അത് ഉള്പ്പുഴുക്കുണ്ടാക്കുകയില്ല. ആഹാരത്തിന്റെ സുഖകരമായ ദഹനത്തിനു സഹായിക്കുന്നതിനാലാണ് മോരു കൂട്ടി ഉണ്ടുകൊണ്ട് ഭക്ഷണം അവസാനിപ്പിക്കണമെന്ന കേരളീയ സദ്യാവിധിയുള്ളത്. ഇത് ആയുര്വേദ സമ്മതമാണെന്ന് സാരം.

ഗ്രഹണിക്കുണ്ടാകുന്ന രോഗങ്ങളിലും രക്തസ്രുതിയില്ലാത്ത അര്ശോരോഗത്തിലും മോര് ഔഷധം കൂടിയാകുന്നു. പുല്ലുള്ള ഭൂമിയില് മോര് വീണാല് ആ പുല്ലുകള് കരിയുന്നു. പിന്നെകിളിര്ക്കുകയും ഇല്ല. അര്ശസ്സിലും ഇതേ പ്രകാരമാകുന്നു. ദാഹത്തിന് സംഭാരമായി കുടിക്കാന് എന്തുകൊണ്ടും യോഗ്യമാണിത്. ചൂടാക്കി തൈര് കുടിക്കരുത്. അത് രക്തത്തെയും പിത്തത്തെയും ദുഷിപ്പിക്കും. വസന്തം, ഗ്രീഷ്മം, ശരദ് ഋതുക്കളില് തൈര് കഴിക്കരുത്. തൈര് നെയ്യ് ചേര്ത്തോ നെയ്യ് കൊണ്ടുണ്ടാക്കിയവ ചേര്ത്തോ കഴിച്ചാല് കഫം വര്ദ്ധിക്കും. പക്ഷെ വാതം ശമിക്കും. തൈര് ശരക്കര ചേര്ത്തു കഴിച്ചാല് തണ്ണീര്ദാഹവും ചുട്ടുനീറ്റലും ശമിക്കും. തൈര് ചെറുപയറുപരിപ്പോ തേനോ നെയ്യോ പഞ്ചസാരയോ നെല്ലിക്കായോ ചേര്ത്തേ ഉപയോഗിക്കാവൂ.

കീമോതെറാപ്പിയ്ക്ക് ശേഷം മുടി വീണ്ടും വളരാന് ചില വഴികളിതാ ക്യാന്സര് ചികിത്സയില് പ്രധാനമാണ് കീമോതെറാപ്പി. ക്യാന്സര് കോശങ്ങളെ കൊന്നൊടുക്കാനുളള ചികിത്സാവിധി. കീമോതെറാപ്പിയ്ക്ക് പല പാര്ശ്വഫലങ്ങളുമുണ്ട്. ശരീരമാസകലമുള്ള വേദനയിലൂടെ രോഗിയ്ക്കു കടന്നു പോകേണ്ടി വരും. മുടി കൊഴിയുന്നതാണ് മറ്റൊന്ന്. കീമോതെറാപ്പി കഴിഞ്ഞാല് മുടി വീണ്ടു വളരാന് സഹായിക്കുന്ന ചില വഴികളെക്കുറിച്ചാണ് താഴെ പറയുന്നത്.

പ്രോട്ടീന് : പ്രോട്ടീന് അടങ്ങിയ ഭക്ഷണങ്ങള് മുടി വളര്ച്ചയ്ക്കു പ്രധാനമാണ്. ഇവ ഭക്ഷണത്തില് ഉള്പ്പെടുത്തുക. മുട്ട, പയര് വര്ഗങ്ങള്, ചിക്കന് തുടങ്ങിയവ പ്രോട്ടീന് ഉറവിടങ്ങളാണ്

വൈറ്റമിന് : വൈറ്റമിന് ബി, സി, ഇ എന്നിവയടങ്ങിയ ഭക്ഷണങ്ങള് പ്രധാനം. വൈറ്റമിന് ഇ മുടിവളര്ച്ചയെ സഹായിക്കുന്നു. സി, ഇ എന്നിവ മുടി വളരാന് സഹായിക്കുന്ന രോമകൂപത്തിന്റെ ആരോഗ്യത്തിന് നല്ലതാണ്.

ഒമേഗ 3, ഒമേഗ 6 ഫാറ്റി ആസിഡുകള് : ഒമേഗ 3, ഒമേഗ 6 ഫാറ്റി ആസിഡുകള് മുടിവളര്ച്ചയ്ക്കു പ്രധാനമാണ്. മീനുകളില് ഇവ അടങ്ങിയിട്ടുണ്ട്.

ഇനോസിറ്റോള് : വൈറ്റമിന് ബിയുടെ കൂട്ടത്തില് പെട്ട ഇനോസിറ്റോള് എന്ന കാര്ബോഹൈഡ്രേറ്റ് ശിരോചര്മത്തിന്റെ ആരോഗ്യത്തിനും ഇതുവഴി മുടിവളര്ച്ചയ്ക്കും സഹായിക്കും. മുഴുവന് ധാന്യങ്ങള്, നട്സ്, ഇലക്കറികള്, സിട്രസ് പഴങ്ങള് എന്നിവയില് ഇത് അടങ്ങിയിട്ടുണ്ട്.

ഹോട്ട് ഓയില് മസാജ് : ഹോട്ട് ഓയില് മസാജ് മുടി വളര്ച്ചയെ സഹായിക്കുന്ന മറ്റൊരു ഘടകമാണ്.

കാൻസർ തുടക്കത്തിൽ തന്നെ തിരിച്ചറിയാൻ രക്തപരിശോധന പ്രാരംഭഘട്ടത്തിൽ തന്നെ കാൻസറിനെ തിരിച്ചറിഞ്ഞ് ചികിത്സ ആരംഭിക്കാൻ ലളിതമായ രക്തപരിശോധനയിലൂടെ കഴിയുമെന്ന് കണ്ടെത്തൽ. രക്തപരിശോധനയിലൂടെ എല്ലാത്തരം കാൻസറിന്റെയും സാന്നിധ്യം നേരത്തെ മനസിലാക്കാൻ കഴിയുമെന്നാണ് ഇതുസംബന്ധിച്ച പുതിയ പഠനം വ്യക്തമാക്കുന്നത്. പ്രസീഡിംഗ്സ് ഓഫ് ദ നാഷണൽ അക്കാദമി ഓഫ് സയൻസിൽ പഠനം പ്രസിദ്ധീകരിച്ചിട്ടുണ്ട്.. രക്തത്തിന്റെ പ്ലാസ്മയിലുള്ള ഫോസ്ഫോപ്രോട്ടീനുകളെയാണ് രക്തപരിശോധനയിലൂടെ തിരിച്ചറിയുന്നതെന്ന് ഇൻഡിയാന പുർഡ്യൂ സർവകലാശാലയിലെ പ്രൊഫ. ആൻഡി താവോ പറഞ്ഞു. ശരീരം ഉത്പാദിപ്പിക്കുന്ന ബയോമാർക്കറുകളാണ് അർബുദം തിരിച്ചറിയാൻ സഹായിക്കുന്നത്. വിവിധയിനം ട്യൂമറുകൾ വിവിധയിനം ബയോമാർക്കറുകളാകും സൂചിപ്പിക്കുക. ഫോസ്ഫോപ്രോട്ടീൻ ഇവയിൽ ഏറ്റവും പ്രധാനപ്പെട്ട ഒന്നാണ്. ഒരു രക്തസാമ്പിളിൽ 2400 ഓളം ഫോസ്ഫോപ്രോട്ടീനുകൾ കണ്ടെത്തിയതിൽ 144 എണ്ണം കാൻസർ രോഗികളുടെ ബയോമാർക്കറുകളാണെന്ന് കണ്ടെത്തി. കാൻസർ രോഗബാധ സംശയിക്കുന്നവർക്ക് ഏറെ പ്രതീക്ഷ നൽകുന്ന പഠനമാണ് പുറത്തുവന്നിരിക്കുന്നത്. കൂടാതെ കാൻസർ ചികിത്സ കഴിഞ്ഞവർക്ക് വീണ്ടും രോഗബാധയുണ്ടാകുമോ എന്ന ആശങ്കയ്ക്കും ഉത്തരം നൽകാൻ പുതിയ രക്തപരിശോധനയ്ക്ക് കഴിയുമെന്നാണ് ആരോഗ്യരംഗം വിലയിരുത്തുന്നത്.

ചോക്ളേറ്റ് കഴിച്ചാലുള്ള ഗുണങ്ങള് ചോക്ളേറ്റ് കഴിച്ചാല് പല ഗുണങ്ങള് ഉണ്ട്. ഒന്നാമതായി സൌന്ദര്യം തന്നെയെടുക്കാം. അതാണല്ലോ മുഖ്യം. സുന്ദരനും സുന്ദരിയുമാകാന് എന്തും ചെയ്യുന്ന ഇക്കാലത്ത് ചോക്ളേറ്റ് തിന്നാല് സൌന്ദര്യം കൂടുമെന്ന് കേട്ടാലോ. അതെ, ഡാര്ക്ക് ചോക്ളേറ്റ് കഴിച്ചാല് സൌന്ദര്യ് കൂടും. ഇതിലെ ഫ്ളാവനോയ്ഡുകള് ചര്മ്മത്തിന് നല്ലതാണ്. ചര്മ്മത്തെ അല്ട്രാവയലറ്റ് കിരണങ്ങളില് നിന്നു രക്ഷിക്കാന് ഇതിന് കഴിയും മാത്രമല്ല ഡാര്ക്ക് ചോക്ളേറ്റിലെ ആന്റി ഓക്സിഡന്റുകള് ചര്മ്മത്തിന് തിളക്കവും നല്കും.

അടുത്തതായി ചില ആരോഗ്യചിന്തകളാവാം. ഡാര്ക്ക് ചോക്ളേറ്റ് പ്രമേഹത്തെയും നിയന്ത്രിക്കും. ഫ്ളാവനോയ്ഡുകളാണ് ഇവിടെയും താരം. ഇവ നൈട്രിക് ഓക്സൈഡിന്റെ അളവ് കൂട്ടി ഇന്സുലിന്റെ അളവിനെ നിയന്ത്രിക്കുന്നു.ടെന്ഷനകറ്റാനും ചോക്ളേറ്റ് നന്നാണ്. സ്ട്രെസ് ഹോര്മോണ് കോര്ട്ടിസോളിന്റെ അളവ് കുറയ്ക്കാന് ഡാര്ക്ക് ചോക്ളേറ്റിന് കഴിയുമെന്നാണ് പഠനം.

തടി കുറയ്ക്കാനും ചോക്ളേറ്റ് നന്നാണ്. ഡാര്ക്ക് ചോക്ളേറ്റ് കഴിക്കുമ്പോള് പൊതുവെ വിശപ്പ് കുറയും. അതിനാല് കഴിക്കുന്ന ഭക്ഷണത്തിന്റെ അളവ് കുറയും.തത്ഫലമായി തടികുറയുകയും ചെയ്യും.

മാത്രമല്ല ഓര്മ്മശക്തിയും ബുദ്ധിയും കൂട്ടാനും ചോക്ളേറ്റിന് കഴിയും. അപ്പോള്, ഇനി ധൈര്യമായി ചോക്ളേറ്റ് കഴിക്കാം. പക്ഷേ, അധികം വേണ്ട. എന്തും അധികമായാല് വിഷമാണ്.

അഞ്ചാം പനി എന്ന മീസില്സിനെ കുറിച്ച് അറിയൂ കുട്ടികളെ ബാധിക്കുന്ന ഒരു സാംക്രമിക രോഗമാണ് അഞ്ചാം പനി അഥവാ പൊങ്ങന് പനി. മീസില്സ് വൈറസാണ് ഈ രോഗത്തിനു കാരണം. റുബിയോള, റെഡ് മീസില്സ് എന്ന പേരുകളിലും ഈ രോഗം അറിയപ്പെടുന്നു. അഞ്ചാം പനി ബാധിച്ചാല്, ചര്മ്മത്തിലുടനീളം കുരുക്കളും പാടുകളും ഉണ്ടാവുകയും പനി, ചുമ, മൂക്കൊലിപ്പ് തുടങ്ങിയ ലക്ഷണങ്ങള് പ്രകടമാവുകയും ചെയ്യും. എന്നാല്, പ്രതിരോധ കുത്തിവയ്പിലൂടെ അഞ്ചാം പനിയെ മിക്കവാറും നിയന്ത്രണവിധേയമാക്കാന് സാധിച്ചിട്ടുണ്ട്.

കാരണങ്ങള്: : വായുവിലൂടെ പകരുന്ന രോഗമാണ് മീസില്സ്. അണുബാധയുള്ള കുട്ടിയുടെ അല്ലെങ്കില് മുതിര്ന്നവരുടെ മൂക്കിലും തൊണ്ടയിലും വച്ചാണ് വൈറസ് ഇരട്ടിക്കുന്നത്. മീസില്സ് വൈറസ്ബാധയുള്ള ആള് ചുമയ്ക്കുമ്പോള്, ചീറ്റുമ്പോള് അല്ലെങ്കില് സംസാരിക്കുമ്പോള് പുറത്തേക്കു തെറിക്കുന്ന തുള്ളികളില് വൈറസ് ഉണ്ടായിരിക്കുകയും അവ വായുവില് കലരുകയും ചെയ്യുന്നു. ഇത് ശ്വസിക്കുന്നവര്ക്ക് മീസില്സ് അണുബാധയുണ്ടാകുന്നു. ഇത്തരം തുള്ളികള് ഏതെങ്കിലും പ്രതലത്തില് പതിക്കുകയാണെങ്കില് ആ സ്ഥലവും മലിനമാകും. വൈറസുകള്ക്ക് മണിക്കൂറുകളോളം സജീവമായി നിലകൊള്ളാന് കഴിയുമെന്നതിനാല് അത്തരം പ്രതലങ്ങളില് സ്പര്ശിച്ച ശേഷം വായ, കണ്ണ്, മൂക്ക് എന്നിവിടങ്ങളില് സ്പര്ശിച്ചാല് അണുബാധയുണ്ടാകാം.

ലക്ഷണങ്ങള്: : വൈറസുമായി സമ്പര്ക്കത്തിലായി 10 മുതല് 14 ദിവസങ്ങള്ക്കുള്ളില് അഞ്ചാം പനിയുടെ ലക്ഷണങ്ങള് പ്രകടമാവും. ലാക്ഷണങ്ങളില് ഇനി പറയുന്നവയും ഉള്പ്പെടുന്നു,

പനി വരണ്ട ചുമ മൂക്കൊലിപ്പ് കണ്ണുകള്ക്ക് ചുവപ്പു നിറം, കണ്ണില് നിന്ന് വെള്ളമൊലിക്കല് തൊണ്ടവേദന ഉമിനീര് ഗ്രന്ഥികള് വീങ്ങുക കോപ്ലിക് സ്പോട്ടുകള് - വായയ്ക്കുള്ളില് ചുവന്ന പശ്ചാത്തലത്തില് നീലരാശിയിലുള്ള മധ്യഭാഗത്തോടുകൂടിയ ചെറിയ വെളുത്ത കുത്തുകള്. ശരീരമാസകലം പാടുകള് കുട്ടികളെ അപേക്ഷിച്ച് മുതിര്ന്നവരിലായിരിക്കും കടുത്ത ലക്ഷണങ്ങള് കാണപ്പെടുക രോഗനിര്ണയം: സാധാരണഗതിയില്, ശരീരത്തിലെ പാടുകളുടെയും വായില് കാണപ്പെടുന്ന കുത്തുകളുടെയും അടിസ്ഥാനത്തില് ഡോക്ടര്ക്ക് രോഗനിര്ണയം നടത്താന് സാധിക്കും. ചിലയവസരത്തില്, അണുബാധ സ്ഥിരീകരിക്കാന് രക്തപരിശോധനയും നടത്തും.

അപകടസാധ്യതാ ഘടകങ്ങള്

പ്രതിരോധ കുത്തിവയ്പ് എടുക്കാത്തത് : കൂടുതലായും പ്രതിരോധ കുത്തിവയ്പ് എടുക്കാത്ത കുട്ടികളിലും മുതിര്ന്നവരിലുമാണ് അഞ്ചാം പനി ഉണ്ടാകുന്നത്. രാജ്യാന്തര സഞ്ചാരം : വികസ്വര രാജ്യങ്ങളില് അഞ്ചാം പനി സാധാരണമായതിനാല് അത്തരം സ്ഥലങ്ങളിലേക്ക് ആവര്ത്തിച്ച് യാത്രപോകുന്നത് അപകടസാധ്യത ഉയര്ത്തുന്നു. വൈറ്റമിന് എ യുടെ കുറവ് : വൈറ്റമിന് എ യുടെ കുറവുള്ളവര്ക്ക് അഞ്ചാം പനി പിടിപെടാനുള്ള സാധ്യത കൂടുതലാണ്. ചികിത്സ: അഞ്ചാം പനിയുടെ ലക്ഷണങ്ങള്ക്ക് 7-10 ദിവസത്തിനുള്ളില് സ്വയം ശമനമുണ്ടാകും. എന്നിരുന്നാലും, ലക്ഷണങ്ങള് ശമിക്കുന്നതിനായി ഡോക്ടര് ഇനി പറയുന്ന ചികിത്സകള് നിര്ദേശിച്ചേക്കാം;

പനി കുറയുന്നതിനുള്ള മരുന്നുകള് ചെവിയിലെ അണുബാധ അല്ലെങ്കില് ന്യൂമോണിയ പോലെയുള്ള ബാക്ടീരിയ അണുബാധകള് ഉണ്ടെങ്കില് അവയ്ക്കെതിരെയുള്ള ആന്റിബയോട്ടിക്കുകള്. വൈറ്റമിന് എ സപ്ളിമെന്റുകള് രോഗിക്ക് പ്രയോജനപ്രദമാകുന്ന ചില വീട്ടുചികിത്സകള്

നല്ല പനിയുള്ള അവസരത്തില് നിര്ജലീകരണം തടയുന്നതിനായി ധാരാളം വെള്ളവും ജ്യൂസും ഔഷധ ചായയും മറ്റും കഴിക്കുക. ആവശ്യത്തിനു വിശ്രമിക്കുക തൊണ്ടവേദനയും ചുമയും ഉണ്ടെങ്കില് ആവികൊള്ളുക കണ്ണിന് ആയാസം കൊടുക്കാതിരിക്കുക. വായന, ടിവി കാണല് തുടങ്ങിയവ ഒഴിവാക്കുക. തീവ്രമായ പ്രകാശം കണ്ണിലടിക്കാതെ സണ്ഗ്ളാസുകള് ഉപയോഗിക്കുക. സങ്കീര്ണതകള്:

ചെവിയിലെ അണുബാധ : അഞ്ചാം പനിയുമായി ബന്ധപ്പെട്ട സാധാരണ സങ്കീര്ണതകളില് ഒന്നാണ് ചെവിയിലെ ബാക്ടീരിയ അണുബാധ. ബ്രോങ്കൈറ്റിസ് : അഞ്ചാം പനി മൂലം ശ്വാസനാളത്തില് അല്ലെങ്കില് ശ്വാസകോശങ്ങളില് കോശജ്വലനം (ഇന്ഫ്ളമേഷന്) ഉണ്ടായേക്കാം. ന്യൂമോണിയ : ശ്വാസകോശ അണുബാധ ന്യൂമോണിയയ്ക്കു കാരണമാകാം. ഇതു മൂലം കടുത്ത പനിയും ചുമയും ശ്വാസതടസ്സവും ഉണ്ടാകാം. എന്സെഫാലിറ്റിസ് (മസ്തിഷ്കവീക്കം): അഞ്ചാം പനിയുമായി ബന്ധപ്പെട്ട അപൂര്വമായി സംഭവിക്കുന്ന ഒരു സങ്കീര്ണതയാണിത്. തലച്ചോറിന് വീക്കമുണ്ടാകുന്നതു മൂലമാണ് ഇതു സംഭവിക്കുന്നത്. കടുത്ത പനി, ബോധക്ഷയം, കോച്ചിപ്പിടുത്തം, തലവേദന, ഛര്ദി, ഓക്കാനം എന്നിവ ഇതുമൂലം സംഭവിക്കാം. ഗര്ഭവുമായി ബന്ധപ്പെട്ട പ്രശ്നങ്ങള് : ഗര്ഭകാലത്ത് മീസില്സ് ബാധ ഉണ്ടായാല്, ഗര്ഭം അലസുന്നതിന് അല്ലെങ്കില് മാസം തികയാതെ പ്രസവിക്കുന്നതിന് അല്ലെങ്കില് പ്രസവിക്കുന്ന കുഞ്ഞിന് വേണ്ടത്ര ഭാരം ഇല്ലാതിരിക്കാന് സാധ്യതയുണ്ട്. പ്ളേറ്റ്ലെറ്റ് എണ്ണം കുറയുക : മീസില്സ് ബാധ മൂലം രക്തത്തിലെ പ്ളേറ്റ്ലെറ്റുകളുടെ എണ്ണം കുറയാന് സാധ്യതയുണ്ട്. പ്രതിരോധം:

പ്രതിരോധ കുത്തിവയ്പാണ് ഇതിനെതിരെയുള്ള തെളിയിക്കപ്പെട്ട പ്രതിരോധ നടപടി. കുട്ടികള്ക്ക് ഇതിനായി എംഎംആര് വാക്സിന് നല്കുന്നു. 12 മാസം പ്രായമുള്ള കുട്ടികള്ക്ക് ഇതിന്റെ ആദ്യ ഡോസു നല്കുന്നു. നാലു വയസ്സിനും ആറ് വയസ്സിനും ഇടയിലാണ് രണ്ടാമത്തെ ഡോസ് നല്കുന്നത്. ഈ രണ്ട് ഡോസുകളിലൂടെ അവര്ക്ക് മീസില്സില് നിന്ന് ജീവിതകാലം മുഴുവന് സംരക്ഷണം ലഭിക്കുന്നു.

പ്രതിരോധ കുത്തിവയ്പ് എടുക്കാത്ത മുതിര്ന്നവര്ക്കും എത്രയും വേഗത്തില് ഇതിന്റെ സംരക്ഷണം ലഭ്യമാക്കാവുന്നതാണ്.

നിങ്ങള്ക്ക് പ്രതിരോധ കുത്തിവയ്പ് എടുത്തിട്ടില്ല എങ്കിലും, നിങ്ങള്ക്ക് മീസില്സ് വൈറസുമായി സമ്പര്ക്കമുണ്ടായി എങ്കിലും, 72 മണിക്കൂറിനുള്ളില് പ്രതിരോധ കുത്തിവയ്പ് എടുത്തിരിക്കണം.

അഞ്ചാം പനി ഒരു വൈറസ് അണുബാധ ആയതിനാല് അതിന് പ്രത്യേകമായ ചികിത്സകളൊന്നുമില്ല. അണുബാധയുള്ള കുട്ടിക്ക് അല്ലെങ്കില് മുതിര്ന്ന ആള്ക്ക് ശരിയായ വിശ്രമം നല്കുകയും ധാരാളം വെള്ളവും മറ്റ് ദ്രാവകങ്ങളും നല്കുകയും ലക്ഷണാധിഷ്ഠിത ചികിത്സ നല്കുകയും വേണം. മറ്റുള്ളവരിലേക്ക് അണുബാധ പകരാതിരിക്കാന് വേണ്ട മുന്കരുതലുകള് സ്വീകരിക്കുക. അഞ്ചാം പനി ഒരാള്ക്ക് ഒരിക്കല് മാത്രമേ ഉണ്ടാവുകയുള്ളൂ. ഒരിക്കല് പിടിപെട്ടാല്, ജീവിതകാലം മുഴുവന് അതിനതിരെയുള്ള പ്രതിരോധശേഷി കൈവരിക്കും.

ദിവസവും മുട്ട കഴിച്ചാലുള്ള ഗുണങ്ങള് കൊളസ്ട്രോള് ആണ് എല്ലാവരുടെയും പ്രധാന പ്രശ്നം. കൊളസ്ട്രോളിനെ പേടിച്ച് മുട്ട കഴിക്കാത്തവരാണോ നിങ്ങള്? എങ്കില് അറിഞ്ഞോളൂ. ദിവസവും ഒന്നല്ല മൂന്നു മുട്ട കഴിക്കുന്നത് നല്ലതാണ്. കാഴ്ചശക്തി മുതല് നല്ല ആരോഗ്യമുള്ള ശരീരം വരെ, ആരോഗ്യമുള്ള കുഞ്ഞ് ജനിക്കാന് വരെ ദിവസം മൂന്നു മുട്ട കഴിക്കുന്നത് അത്യുത്തമമത്രേ. ആരോഗ്യത്തിന് ഏറെ നല്ല ഭക്ഷണമാണ് മുട്ട. പ്രോട്ടിനും കാല്സ്യവും ചേര്ന്ന മികച്ച ഭക്ഷണം. ദിവസവും മൂന്നു മുട്ട മുഴുവന് കഴിക്കണം എന്നാണത്രേ ശാസ്ത്രം. മുട്ടയുടെ മഞ്ഞയില് 90 ശതമാനം കാല്സ്യവും അയണുമാണ്. വെള്ളയില് പകുതിയോളം പ്രോട്ടിനും.

പക്ഷേ, ഇങ്ങനെ ദിവസവും മൂന്നു മുട്ട കഴിച്ചാല് എന്തു സംഭവിക്കുമെന്ന ആശങ്ക മൂലം പലരും മുട്ടയെ നിത്യജീവിതത്തില് നിന്ന് അകറ്റി നിര്ത്തുകയാണ്.

കൊളസ്ട്രോള് വര്ധിച്ച് ആരോഗ്യം നഷ്ടപ്പെടാന് ഇത് ഒരു കാരണമായേക്കാം എന്നാണ് പലരും ചിന്തിക്കുന്നത്. പക്ഷേ ഒന്നുമുണ്ടാവില്ല. അറിഞ്ഞോളൂ മുട്ടയുടെ എട്ടു ഗുണങ്ങള്.

1. കൊളസ്ട്രോള്: : കൊളസ്ട്രോള് ആണ് എല്ലാവരുടെയും പ്രശ്നം. എന്നാല് അങ്ങനൊരു പേടി വേണ്ടെന്ന് ആരോഗ്യരംഗത്തെ വിദഗ്ധര് അഭിപ്രായപ്പെടുന്നു. കാരണം എന്താണെന്നല്ലേ. മുട്ടയില് കൊളസ്ട്രോള് ഇല്ലാത്തതു കൊണ്ടല്ല അത്. മറിച്ച്, കൊളസ്ട്രോളുള്ള ആരോഗ്യകരമായ ഭക്ഷണം കഴിക്കുമ്പോള് കരള് പ്രവര്ത്തിച്ച് അമിതമായ കൊളസ്ട്രോളിനെ അഡ്ജസ്റ്റ് ചെയ്യും.

2. വിളര്ച്ച ഒഴിവാക്കാം . പോഷകഗുണമുള്ള ആഹാരത്തിന്റെ അപര്യാപ്തതയാണ് ആളുകളില് പ്രത്യേകിച്ച് കുട്ടികളില് വിളര്ച്ച പോലുള്ള പ്രശ്നങ്ങള്ക്ക് കാരണം. ദിവസവും മൂന്നു മുട്ട കഴിക്കുന്നത് ഇത്തരം പ്രശ്നങ്ങള്ക്ക് നല്ലൊരു ശതമാനവും പരിഹാരം കാണും.

3. ശരീരത്തിന് ഊര്ജദായകമാണ് മുട്ട . എല്ലാ ദിവസവും പ്രാതലിന്റെ കൂടെയോ അല്ലെങ്കില് പ്രാതല് തന്നെയും മുട്ടയാക്കുന്നത് നല്ലതാണ്. പ്രാതലായി മുട്ട ഉപയോഗിക്കുന്നത് ശരീരത്തിന് ഊര്ജം നല്കാന് സഹായിക്കും.

4. ഭാരം കുറയ്ക്കും. ശരീരഭാരം കുറയ്ക്കാന് മുട്ട ഉപകാരപ്പെടും. പ്രാതലിന് മുട്ട കഴിക്കുന്നതു ശരീരഭാരം കുറയ്ക്കാന് സഹായിക്കും.

5. തലച്ചോറിന്റെ ആരോഗ്യം : തലച്ചോറിന്റെ ആരോഗ്യം കാക്കാന് മുട്ട ശീലമാക്കുന്നതു നല്ലതാണ്.

6. ആരോഗ്യമുള്ള കുഞ്ഞ്: ആരോഗ്യമുള്ള കുഞ്ഞ് ജനിക്കാനാണ് ഏതൊരു അച്ഛനും അമ്മയും ആഗ്രഹിക്കുന്നത്. ഗര്ഭിണികള് മുട്ട കഴിക്കുന്നതു ഗര്ഭസ്ഥ ശിശുവിന്റെ ആരോഗ്യം വര്ധിപ്പിക്കുമെന്ന് വിദഗ്ധര് അഭിപ്രായപ്പെടുന്നു.

7. കാഴ്ച വര്ധിപ്പിക്കും: ദിവസവും മൂന്ന് മുട്ട കഴിക്കുന്നതു കാഴ്ച കൂടാന് സഹായിക്കുന്നു. തിമിര സാധ്യത 20 ശതമാനം കുറയ്ക്കാനും മുട്ടയ്ക്ക് സാധിക്കും.

8. മുടി , നഖം എന്നിവയുടെ ആരോഗ്യം : ദിവസവും മുട്ട കഴിക്കുന്നത് മുടി, നഖം എന്നിവയുടെ ആരോഗ്യത്തിന് ഏറെ നല്ലതാണ്.

നല്ല ആരോഗ്യത്തിനു ഈ 5 കാര്യങ്ങള് ഒഴിവാക്കാം

അമിത ഭക്ഷണം : തലച്ചോറിലെ രക്തകുഴലുകള് കട്ടിയാക്കുകയും തലച്ചോറിന്റെ പ്രവര്ത്തനത്തെയും ബാധിക്കും. ശരീരത്തില് കൊഴുപ്പ് അടിഞ്ഞുകൂടുന്നതിനും ഇതു കാരണമാകുന്നുണ്ട്.

പുകവലി : തലച്ചോറിന്റെ പ്രവര്ത്തനങ്ങളെ മന്ദീഭവിക്കുകയും, ഉറക്കം നഷ്ടപ്പെടുത്തുകയും ചെയ്യുന്നു. തലച്ചോറിനു വിശ്രമം ലഭിക്കാതെ വന്നാല് തലച്ചോറിലെ കോശങ്ങള്ക്ക് തളര്ച്ചയുണ്ടാകും. കൂടാതെ വായ്ക്കുള്ളിലെ ക്യാന്സറിനു ഇത് കാരണമാകുകയും ചെയ്യും

അമിതമായ മധുരം: തലച്ചോറിന്റെ വികാസത്തിന് ആവശ്യമായ പോഷകങ്ങളെയും പ്രോടീനുകളെയും മധുരം കൂടുതല് കഴിക്കുന്നത് പ്രതികൂലമായി ബാധിക്കും

തലവഴി മൂടി പുതച്ചുള്ള ഉറക്കം : മൂടി പുതച്ചു ഉറങ്ങുമ്പോള് കാര്ബണ്ഡൈയോക്സൈഡിന്റെ അളവ് പുതപ്പിന്നുള്ളില് കൂടുതലായിരിക്കും അങ്ങനെ ആവശ്യത്തിനു ഓക്സിജന് ലഭിക്കതെയിരിക്കുന്നത് ശരീരത്തിന്റെ പ്രവര്ത്തനങ്ങളെ മുഴുവനായി ബാധിക്കും.

പ്രാതല് വേണ്ടെന്നു വയ്ക്കുക : പ്രാതല് കഴിക്കാതെ ഇരിക്കുമ്പോള് രക്തത്തിലെ പഞ്ചസാരയുടെ നില താഴും .ആവശ്യമായ പോഷണങ്ങള് ലഭികാതെ തലച്ചോറിന്റെ പ്രവര്ത്തനം മന്ദീഭവിക്കും .

മീനിന്റെ ആരോഗ്യഗുണങ്ങള് നോണ് വെജിറ്റേറിയന് ഭക്ഷണം ഇഷ്ടമുളളവര്ക്ക് തടി കുടൂമെന്നു പേടിയ്ക്കാതെ കഴിയ്ക്കാവുന്ന ഒന്നാണ് മീന്. ധാരാളം പ്രോട്ടീനുകളും ധാതുക്കളും വൈറ്റമിനുകളും ഇതില് അടങ്ങിയിട്ടുണ്ട്. ഒമേഗ ത്രീ ഫാററി ആസിഡിന്റെ ഒരു പ്രധാന ഉറവിടം കൂടിയാണിത്. പല അസുഖങ്ങള്ക്കുമുള്ള നല്ലൊരു പ്രതിവിധി കൂടിയാണിത്. ചില അസുഖങ്ങള്ക്കും ചില അസുഖങ്ങള് തടയുന്നതിനും. മീനിന്റെ ആരോഗ്യഗുണം മുഴുവനായി ലഭിയക്കണമെങ്കില് കഴിയ്ക്കുന്ന രീതിയും പ്രധാനമാണ്. വറുത്ത മീന് മിക്കവാറും പേരുടെ ഇഷ്ടവിഭവമാണെങ്കിലും ഇത് തടി കൂട്ടുകയും കൊളസ്ട്രോള് പോലുള്ള അസുഖങ്ങള് വരുത്തുകയും ചെയ്യും. കറി വച്ചോ, ബേക്ക, ഗ്രില് വഴികളിലൂടെയോ ഇത് കഴിയ്ക്കുകയാണ് ഏറ്റവും ഉചിതം.

ആസ്തമ : ആസ്തമയുള്ളവര്ക്കു കഴിയ്ക്കാവുന്ന നല്ലൊന്നാന്തരം ഭക്ഷണമാണ് മീന്. ഇത് ദിവസവും ഭക്ഷണത്തില് ഉള്പ്പെടുത്തുന്നത് ഗുണം ചെയ്യും.

കണ്ണിനും തലച്ചോറിനും: കണ്ണിനും തലച്ചോറിനും നല്ലൊരു ഭക്ഷണം കൂടിയാണ് മീന്. ഇതിലെ ഒമേഗ ത്രീ കണ്ണിന്റെ റെറ്റിനയേയും തലച്ചോറിനേയും സംരക്ഷിയ്ക്കുന്നു.

ഹൃദയസംബന്ധമായ അസുഖങ്ങള്ക്കുള്ള പ്രതിവിധി : ഹൃദയസംബന്ധമായ അസുഖങ്ങള്ക്കുള്ള നല്ലൊരു പ്രതിവിധി കൂടിയാണ് മീന്. രക്തധമനിയിലെ തടസങ്ങള് നീക്കുവാന് മീന് കഴിയ്ക്കുന്നത് നല്ലതാണ്.

ക്യാന്സര് : മീന് ക്യാന്സര് സാധ്യത 30-50 ശതമാനം വരെ കുറയ്ക്കുമെന്നാണ് പറയുന്നത്. പ്രത്യേകിച്ച് ബ്രെസ്റ്റ് ക്യാന്സര്, കോളന് ക്യാന്സര് എന്നിവ.

പ്രമേഹം: പ്രമേഹരോഗികള്ക്കു കഴിയ്ക്കാവുന്ന നല്ലൊരു ഭക്ഷണം കൂടിയാണിത്. രക്തത്തിലെ ഗ്ലൂക്കോസിന്റെ അളവു കുറയ്ക്കാന് ഇതിന് സാധിയ്ക്കും.

എല്ലുകളുടെ ബലത്തിന് : മീനിലെ കാല്സ്യം എല്ലുകളുടെ ബലത്തിനും നല്ലതാണ്. പ്രത്യേകിച്ച് ചെറുമത്സ്യങ്ങള്.

കടപ്പാട് : www.infomagic.com