Skip to content. | Skip to navigation

Vikaspedia

പങ്കുവയ്ക്കുക
Views
  • നില എഡിറ്റ്‌ ചെയുവാൻ വേണ്ടി തയ്യാ

ടെന്‍ഷന്‍ ഫ്രീ കിടിലന്‍ ടിപ്സ്

കൂടുതല്‍ വിവരങ്ങള്‍

യാത്രയിൽ ശ്രദ്ധിക്കാം ഈ അഞ്ച് കാര്യങ്ങൾ

വേനലവധി ഇങ്ങെത്തി. പരീക്ഷച്ചൂട് കഴി‍ഞ്ഞാൽ ചെറിയ യാത്രകളൊക്കെയാവാം. എന്നാൽ ഈ കുസൃതികളെയും കൊണ്ടുള്ള യാത്രകൾ എന്നും റിസ്ക്കുള്ളവയാണ്. കുട്ടികളുമായുള്ള യാത്രകളിൽ മാതാപിതാക്കൾ ശ്രദ്ധിക്കേണ്ട ചില പ്രധാന കാര്യങ്ങൾ

1. എല്ലാം നേരത്തെ ബുക്ക് ചെയ്യാം

യാത്രകളിൽ ഒരു റിസ്ക്കും ഏറ്റെടുക്കരുതേ. എല്ലാ കാര്യങ്ങളും നേരത്തെ തന്നെ ബുക്ക് ചെയ്താൽ അവസാനഘട്ടത്തിലെ ബഹളവും ടെൻഷനും ഒഴിവാക്കാം. ബസ് ആണെങ്കിലും പ്ളെയ്നാണെങ്കിലും ട്രെയിനാണെങ്കിലും ടിക്കറ്റുകൾ മുൻകൂട്ടി ബുക്ക് ചെയ്യുക. അതുപോലെ താമസിക്കാനുള്ള ഹോട്ടലുകൾ പോകേണ്ട സ്ഥലങ്ങൾ തുടങ്ങിയവയെ കുറിച്ച് നല്ല ധാരണ വേണം. നേരത്തെ ബുക്ക് ചെയ്താൽ നിങ്ങൾക്ക് എക്സ്ട്രാ മുറിയോ കുട്ടികൾക്കായുള്ള മറ്റ് സൗകര്യങ്ങളോ വേണമെങ്കിൽ ലഭിക്കാൻ എളുപ്പമായിരിക്കും.

2. യാത്രയുടെ വിശദമായ കുറിപ്പ് തയ്യാറാക്കുക

യാത്രയുടെ പൂർണ്ണ വിവരങ്ങൾ അടങ്ങിയ കുറിപ്പ് നേരത്തെ തന്നെ തയ്യാറാക്കി വയ്ക്കുക. ഒരു മിനുട്ട് പോലും കളയാതെ കൃത്യമായി കാര്യങ്ങൾ ചാർട്ട് ചെയ്യാം. കുട്ടികൾക്ക് വെറുതെ കളയാൻ സമയം കൊടുക്കരുത്. മുഴുവൻ സമയവും കളികളും വിനോദവും കാഴ്ചകളും ആകട്ടെ. അവരുടെ എക്സ്ട്രാ എനർജി മുഴുവൻ ഉപയോഗിക്കട്ടെ. രാത്രി േവഗം ഉറങ്ങാനും ഇത് സഹായിക്കും. വെറുതെ ഇരുന്നാലാണ് അവർ ഓരോ കുസൃതികൾ ഒപ്പിക്കുന്നത്. യാത്രകളിൽ അത് ബുദ്ധിമുട്ടുണ്ടാക്കുമെന്ന് പ്രത്യേകം പറയേണ്ടതില്ലല്ലോ.

3. ചൈൽഡ് ട്രാക്കർ ഉപയോഗിക്കാം

ചൈൽഡ് ട്രാക്കർ ഉപയോഗിക്കുക എന്നു പറയുമ്പോൾ െനറ്റി ചുളിക്കണ്ട. അത് അത്ര വലിയ സംഭവമൊന്നുമല്ല. തിരക്കുള്ള സ്ഥലങ്ങളിൽ പോകുമ്പോൾ കുട്ടികൾ കൂട്ടം തെറ്റി പോകാൻ ഇടയുണ്ട്. ഇതൊഴിവാക്കാൻ ചൈൽഡ് ട്രാക്കർ സഹായിക്കും. കുട്ടികളുടെ കൈയ്യിൽ മൊബൈൽ ഫോണുണ്ടെങ്കിൽ അതിൽ ട്രാക്കിംങ് ആപ്പ് സൗകര്യം ഒരുക്കുക. അവർ കൂട്ടം തെറ്റിയാൽ അലാം അടിക്കുന്നതിലുടെ വലിയ അപകടങ്ങൾ ഒഴിവാക്കാം.

4. യാത്രയിൽ കഴിവതും മധുരം ഒഴിവാക്കാം

എല്ലാ കുട്ടികളും മധുരപ്രിയരാണ്. കിട്ടിയാൽ മുഴുവൻ അകത്താക്കുകയും ചെയ്യും. യാത്രയിൽ എന്തെങ്കിലും അസ്വസ്തതയുണ്ടായാൽ അത് യാത്രയെ മുഴുവൻ ബാധിക്കും അതുകൊണ്ട് പരമാവധി മധുരവും എണ്ണയിൽ വറുത്തതുമായ പലഹാരങ്ങൾ ഒഴിവാക്കാം.

5. ഇവ കരുതാൻ മറക്കണ്ട

നിങ്ങളുടെ കുട്ടിയുെട പ്രായം എത്രയുമായിക്കൊള്ളട്ടെ ശുചിത്വപരിപാലനത്തിനാവശ്യമായ വസ്തുക്കൾ കൂടെ കരുതുക. ലിക്വിഡ് സോപ്പ്, ടിഷ്യു, ടവ്വൽ, മരുന്നുകൾ തുടങ്ങിയവ കരുതുക. കൂടാതെ രണ്ട് മൂന്ന് ജോഡി എക്സ്ട്രാ ഉടുപ്പുകളും എടുത്തുവയ്ക്കാൻ ശ്രദ്ധിക്കുക.

കുട്ടികളും ഇനി വ്യായാമം ചെയ്യും അവരറിയാതെ, 5 കിടിലൻ ടിപ്സ്!

എല്ലാവരും വ്യായാമത്തിൻറെ ആവശ്യത്തെക്കുറിച്ച് വാതോരാതെ സംസാരിക്കാറുണ്ട്. എന്നാൽ വ്യായാമം ചെയ്യാൻ പലർക്കും മടിയാണ്. ദിവസവും വ്യായാമം ചെയ്യുന്നതിൻറെ ഗുണം ഒന്നു വേറെതന്നെയാണ്. മസിലുകളുടെ ശരിയായ വികാസത്തിനും എല്ലുകളുടെ ഉറപ്പിനും അമിത വണ്ണം തടയുന്നതിനും വ്യായാമം അത്യാവശ്യമാണ്. മുതിർന്നവർ മാത്രമല്ല ചെറിയകുട്ടികൾ വരെ ഇത്തരം കസർത്തിനായി സമയം മാറ്റി വയ്ക്കണമെന്നാണ് ആരോഗ്യ രംഗത്തെ വിദഗ്ധർ പറയുന്നത്. കുട്ടികളെ വ്യായാമം ചെയ്യിപ്പിക്കാൻ അല്പം പ്രയാസമാണ് അവരെ വ്യായാമവുമായി ഇഷ്ടത്തിലാക്കാൻ ഇതാ ചില കിടിലൻ ടിപ്സുകൾ.

സൈക്കിൾ വാങ്ങി കൊടുക്കാം

സൈക്കിൾ ചവിട്ടുന്നത് ഇഷ്ടമല്ലാത്ത കുട്ടികൾ കുറവായിരിക്കും. സൈക്കിംളിംങ് ഏറ്റവും നല്ല ഒരു വ്യായാമമാർഗമാണ്. മടിയുള്ള കുട്ടികൾപോലും സൈക്കിൾ ചവിട്ടാൻ റെഡിയായിരിക്കും. ആസ്വദിച്ച് ചെയ്യുന്ന വ്യായമമാണിത്, സൈക്കിൾ ചവിട്ടുന്നതിലൂടെ അറിയാതെ തന്നെ പേശികൾക്കാവശ്യമായ വ്യായമം കിട്ടുകയാണ്.

ഒപ്പം നടക്കാം

രാവിലത്തെയും വൈകുന്നേരത്തെയും നടപ്പ് ഒരു സൂപ്പർ വ്യായാമമുറയാണ്. രാവിലത്തെ ശുദ്ധവായു ശ്വാസകോശത്തിന് വളരെ നല്ലതാണ് അതുപോലെ ഭക്ഷണശേഷമുള്ള വൈകുന്നേരത്തെ നടപ്പ് ദഹനപ്രക്രിയയെ ത്വരിതപ്പെടുത്താനും സഹായിക്കും. നടത്തം കായികമായി നമ്മെ കരുത്തരാക്കും. കാഴ്ചകൾകണ്ട് ഇങ്ങനെ നടക്കാൻ ആർക്കാണ് ഇഷ്ടമല്ലാത്തത്.

നീന്തിത്തുടിക്കാം

വെള്ളത്തിലുള്ള ഈ പരിപാടി കുട്ടികൾക്ക് തീർച്ചയായും ഇഷ്ടമാകും. മറ്റെല്ലാ വ്യായാമങ്ങളിൽ നിന്നും വ്യത്യസ്തമായി ഇത് ശരീരടത്തിനാകെ ഗുണം ചെയ്യുന്നു. എല്ലാ മസിലുകൾക്കും ആയാസം നൽകുകയും ശരീതം കൂടുതൽ ഫ്ളെക്സിബിൾ ആകുകയും ചെയ്യും.

ഓടിച്ചാടി കളിക്കട്ടെ

കാറ്റിനെതിരെയും പൂമ്പാറ്റയ്ക്കി പുറകെയും അവരും ഓടട്ടെ. സ്കേറ്റിംങ് നല്ലൊരു വ്യായാമമാണ്. അതാ മൂലം ശരീരത്തിന്‍റെ മുകൾഭാഗത്തിന് ഫ്ളെക്സിബിലിറ്റിയും കാലുകൾക്ക് ബാലൻസിംങും കൃത്യതയും ലഭിക്കുന്നു.

ബോളുകൾ കൊണ്ടുള്ള കളികൾ

എന്തു കൊണ്ടും കുട്ടികൾക്ക് പ്രിയ്യപ്പെട്ടതാണ് ഇത്തരം കളികൾ. ഫു‍ഡ്ബോൾ, ബാസ്ക്കറ്റ് ബോള്‍, വോളിബോൾ അങ്ങന ബോളുകൊണ്ട് കളിക്കാവുന്ന എല്ലാത്തരം കളികളും അവർ കളിക്കട്ടെ. ഈ കളികൾ വ്യായാമത്തെക്കാളുപരി അവരുടെ ആശയവിനിമയശേഷി വർദ്ധിപ്പിക്കുന്നു. കൂടാതെ മറ്റുള്ളവരുമായി നന്നായി ഇടപഴകാനും നല്ല സാമൂഹികജീവിയാകാനും ഇത്തരം കളികൾ പ്രാപ്തരാക്കും.

ഈ അ‍ഞ്ച് സ്പോട്സ് ഇനങ്ങളും കുട്ടികൾക്ക് ഇഷ്ടാമാകുമെന്ന് ഉറപ്പാണ്. ഇവമൂലം വ്യായാമത്തേക്കാളുപരി മറ്റ് പല കാര്യങ്ങളും ലഭിക്കുന്നു. കുട്ടുകളുടെ പ്രായവും അവരുടെ ഒഴിവു സമയവും കണക്കാക്കി അവർക്ക് യോജിക്കുന്നവ നിങ്ങൾക്ക് തിരഞ്ഞെടുക്കാം. ആദ്യം ചെറുതായൊന്ന് പ്രോത്സാഹിപ്പിക്കേണ്ടി വന്നേക്കാം. എന്നാൽ തുടങ്ങി കഴിഞ്ഞാൽ പിന്നെ അവർ ആസ്വദിച്ച് ചെയ്തു കൊള്ളും.

അരുതേ കുട്ടികളെ തല്ലരുതേ, ഞെട്ടിക്കും ഈ പഠനം!

ഉപദേശിച്ച് മടുക്കുമ്പോൾ കുറുമ്പ് കാണിക്കുന്ന കുട്ടികളെ മാതാപിതാക്കൾ അടികൊടുക്കുന്നത് സ്വാഭാവികമാണ്. പലർക്കും അറിയാം അടി കൊടുക്കുന്നത് നല്ല പ്രവണത അല്ലെന്ന്, പക്ഷേ അതല്ലാതെ എന്ത് ചെയ്യാം എന്ന് പല മാതാപിതാക്കള്‍ക്കും അറിയില്ല. അടികൊടുക്കുക എന്നത് ഒരിക്കലും ഒരു പരിഹാര മാർഗമല്ല. ഫാമിലി റിസർച്ച് ലബോറട്ടറിയിലെ ഡോ മുറേ പറയുന്നത് ശ്രദ്ധേയമാണ്. അദ്ധ്യാപകരും മാതാപിതാക്കളും ശിക്ഷിക്കുന്ന കുട്ടികൾ കൂടുതൽ ആക്രമസ്വഭാവമുള്ളവരായി മാറും എന്ന സുപ്രധാനമായ വിവരമാണ് അദ്ദേഹം നൽകുന്നത്. കൂടാതെ ഇത്തരം കുട്ടികളിൽ ആത്മാഭിമാനം കുറയുകയും വിഷാദരോഗത്തിനടിമപ്പെടുകയും ചെയ്യാം. മാത്രമല്ല ഇങ്ങനെ ശിക്ഷിക്കപ്പെടുന്നവർ മുതിരുമ്പോൾ ചെറിയ വേതനം മാത്രമുള്ള ജോലികളിലാണ് എത്തപ്പെടുന്നതെന്നുമാണ് ഞെട്ടിപ്പിക്കുന്ന പഠന വിവരം. കുട്ടികളെ തല്ലാതെ അവരെ കാര്യങ്ങൾ പറഞ്ഞു മനസിലാക്കാൻ രക്ഷകർത്താക്കളോട് അദ്ദേഹം പറയുന്നത് ഇവയാണ്.

ശാന്തരാകാം

നൂറുകൂട്ടം പ്രശ്നങ്ങൾക്കു നടുവിൽ നിൽക്കുമ്പോഴാകും കുട്ടിയുടെ അലമ്പ്, നിങ്ങളുടെ നിയന്ത്രണം നഷ്ടമാകുന്നത് സ്വാഭാവികം. അവർ എന്ത് കുറുമ്പ് കാണിച്ചാലും സ്വയം നിയന്ത്രിക്കുക. ഒന്നു മുതൽ പത്ത് വരെ മനസിൽ എണ്ണുക, അല്പ സമയം ശാന്തരായി നിൽക്കുക. ആ സമയം അടിക്കുക എന്ന ശിക്ഷയല്ലാതെ മറ്റെന്ത് ചെയ്യാം എന്ന് ചിന്തിക്കുക.

റിലാക്സ് ചെയ്യാം

വീടും ജോലിയും കുട്ടികളെ നോക്കലും ഒക്കെയായി ആകെ തളർന്നിരിക്കുമ്പോഴാകും കുട്ടികള്‍ പ്രശ്നങ്ങളുണ്ടാക്കുന്നത്. മാതാപിതാക്കൾ വിശ്രമിക്കാനും വ്യായാമം ചെയ്യാനും വിനോദത്തിനും മറ്റും സമയം കണ്ടെത്തണം. ഇത് നിങ്ങളുടെ പിരിമുറുക്കം കുറയ്ക്കുകയും ശാന്തമായി പ്രതികരിക്കാൻ പ്രാപ്തരാക്കുകയും ചെയ്യും.

ശാന്തമായി എന്നാൽ കർശനമായി പറയാം

എത്ര പറഞ്ഞാലും അനുസരിക്കാതെ വരുമ്പോഴാകും നമ്മൾ അടിച്ചു പോകുന്നത്. എന്നാൽ ഇനിമുതൽ പറഞ്ഞാൽ അനുസരിക്കാത്തപ്പോൾ അവരടെ കണ്ണിൽ നോക്കി ശാന്തമായി എന്നാൽ കർശനമായി പറയാം അങ്ങനെ ചെയ്യരുതെന്ന്. അടിക്കുന്നതിനേക്കാളും വഴക്കു പറയുന്നതിനേക്കാളും ഗുണം ചെയ്യുമത്.

തിരഞ്ഞെടുക്കാൻ അവസരം കൊടുക്കാം

ഭക്ഷണ സമയത്ത് അതുമായി കളിക്കുകയാണെന്നിരിക്കട്ടെ, കർശനമായിത്തന്നെ രണ്ട് ഓപ്ഷന്‍ കൊടുക്കുക. ഒന്നുകിൽ കളി നിർത്തി ഭക്ഷണം കഴിക്കുക. അല്ലെങ്കിൽ എഴുന്നേറ്റു പോകുക. ഭക്ഷണം കഴിക്കാൻ തോന്നുന്ന സമയത്ത് വന്ന് കഴിക്കാം എന്നും പറയാം.

പരിണതഫലം എന്താണെന്ന് പറഞ്ഞു കൊടുക്കാം

അയൽ വീട്ടിലെ ജനാലചില്ല്പൊട്ടിച്ച കുട്ടിക്ക് നിങ്ങൾ നല്ല അടികൊടുക്കും അല്ലേ? ചെയ്തത് തെറ്റാണെന്ന് അവിടെ അവന് മനസിലാകുന്നുണ്ടോ? ഇനി ഇങ്ങനെ ഒരു കാര്യം ചെയ്താലും അത് ഒളിച്ചു വയ്ക്കാനേ അവൻ ശ്രമിക്കൂ. കൂടാതെ അവന് നിങ്ങളോട് ദേഷ്യവും തോന്നാം. അത് കൊണ്ട് ചെയ്ത തെറ്റിന്റെ പരിണതഫലം എന്താണെന്ന് കർശനമായി പറഞ്ഞു മനസിലാക്കാം.

അവിടെ നിന്നും മാറി നിൽക്കാം

അടികൊടുക്കേണ്ട സാഹചര്യം വരുമ്പോൾ സ്വയം നിയന്ത്രിക്കുക, പതിയെ അവിടെ നിന്നും മറ്റൊരു മുറിയിലേയ്ക്ക് മാറാം. മനസ് ശാന്തമായതിന് ശേഷം അവരോട് സംസാരിക്കാം.

വെറും അഞ്ച് കാര്യങ്ങൾ, കുട്ടി മിടുമിടുക്കരാകും!

കുട്ടികൾ എപ്പോഴും ശ്രദ്ധ കിട്ടാൻ‌ ആഗ്രഹിക്കുന്നവരാകും. മാത്രമല്ല അവർ ചെയ്യുന്ന കാര്യങ്ങൾ മറ്റുള്ളവർ അംഗീകരിക്കണമെന്ന് അവർക്ക് നിർബന്ധമാണ്. മാതാപിതാക്കളുടേയും മുതിർന്നവരുടേയും പരിഗണന കിട്ടാത്ത കുഞ്ഞുങ്ങൾ പലപ്പോഴും മുതിർന്നു വരുമ്പോഴേയ്ക്കും പ്രശ്നക്കാരായി മാറുന്നത് കാണാം. ഈ അഞ്ചു കാര്യങ്ങൾ മാതാപിതാക്കൾ ശ്രദ്ധിച്ചാൽ മിടുക്കരാക്കാം അവരെ.

1. അവർക്ക് പറയാനുള്ളത് കേൾക്കാം

കുട്ടികൾ എന്തെങ്കിലും പറഞ്ഞു കൊണ്ട് വരുമ്പോൾ അത് ശ്രദ്ധിക്കാതിരിക്കുക, അവർക്ക് ചെവി കൊടുക്കാതെ മറ്റ് ജോലികളിൽ മുഴുകുക തുടങ്ങിയവ മാതാപിതാക്കൾക്ക് ചേർന്ന പ്രവർത്തിയല്ല. ജോലിത്തിരക്കാണ് നിങ്ങളുടെ പ്രശ്നമെങ്കിൽ അതിനും പരിഹാരമുണ്ട്. നിങ്ങൾ ഫ്രീ ആകുന്ന സമയം നോക്കി ദിവസവും ഒരു പത്ത് മിനുട്ടെങ്കിലും അവർ പറയുന്നത് കേൾക്കാൻ മാറ്റിവയ്ക്കാം, ടോക്കിംങ് ടൈം എന്നതിന് പേരും നൽകാം. ഈ സമയം അവർക്ക് എന്തും ചോദിക്കാൻ അവസരം നൽകുക. കുട്ടികളുമായി നല്ലൊരു ബന്ധമുണ്ടാക്കിയെടുക്കാൻ പറ്റിയ ഈ അവസരം വെറുതേ കളയല്ലേ...

2. അവർ പറഞ്ഞ് തന്നെ പഠിക്കട്ടെ

കു‍ഞ്ഞുങ്ങൾക്ക് ചില കാര്യങ്ങൾ പൂർണമായി പറഞ്ഞ് ഫലിപ്പിക്കാനാവില്ല, എങ്കിലും അവരെ കളിയാക്കല്ലേ... പലപ്പോഴും അവരുടെ അഭിപ്രായങ്ങൾ യുക്തിയുള്ളതാവില്ല എങ്കിലും അവരെ നിരുത്സാഹപ്പെടുത്തല്ലേ.. ഒരു പക്ഷേ അവർ പറയുന്ന കാര്യങ്ങൾ നിങ്ങൾക്ക് ശരിയെന്നു തോന്നില്ലായിരിക്കും പക്ഷേ മനസു മടുപ്പിക്കുന്ന വിധത്തിൽ അവരോട് ഒരിക്കലും പെരുമാറരുത്. എല്ലാത്തിനും അവർക്ക് സമയവും സാവകാശവും കൊടുക്കാം. ഉള്ളിലുള്ള വികാരങ്ങളും വിചാരങ്ങളും പ്രകടിപ്പിച്ച് തന്നെ അവർ വളരട്ടെ.

3. അവർക്കു വേണ്ടി അവർ തന്നെ സംസാരിക്കട്ടെ

അവർക്ക് വേണ്ട കാര്യങ്ങൾക്കായി അവർ തന്നെ ശബ്ദിക്കട്ടെ. ഹോട്ടലിൽ വെയിറ്ററിനോടും, കടയിലെ സെയിൽസ്മാനോടും ഒക്കെ അവർ തന്നെ ചോദിക്കട്ടെ. നന്നായി സംസാരിക്കാനുള്ള ഒരവസരവും അവര്‍ പാഴാക്കിക്കളയാതിരിക്കട്ടെ.

4. ചെറിയ കഴിവുകൾ പോലും അംഗീകരിക്കണം

ചില കുട്ടികൾക്ക് നല്ല ഓർമശക്തിയുണ്ടാകും. ചിലർക്കാകട്ടെ പാട്ടു പാടാനുള്ള കഴിവുണ്ടാകും. മറ്റ് ചിലരാകട്ടെ ചിത്രരചനയിൽ കഴിവുള്ളവരും. കുഞ്ഞുങ്ങളിലെ ഈ കഴിവുകളെ ഒരിക്കലും പാഴാക്കി കളയരുത്. മാത്രമല്ല അവയൊന്നും വിലകുറച്ചു കാണുകയുമരുത്. വേണ്ട പ്രോത്സാഹനം നൽകുകയും ചെയ്യാം. തങ്ങളുടെ കഴിവുകൾ അംഗീകരിക്കപ്പെടുന്നത് വളരെ അഭിമാനകരമാണവർക്ക്.

5. ക്ഷോഭം അടക്കി അവരെ കേൾക്കാം

എന്തെങ്കിലും പ്രശ്നവുമായി അവർ നിങ്ങളെ സമീപിച്ചുവെന്നിരിക്കട്ടെ. കാര്യം മുഴുവൻ അറിയുന്നതിന് മുന്‍പേ അവരോട് ഒരിക്കലും കയർക്കരുത്. കാരണം വീണ്ടും ഇത്തരമൊരവസരമുണ്ടായാൽ അത് നിങ്ങളുമായി പങ്കുവെയ്ക്കാൻ അവർ മടിക്കും. രണ്ട് നിമിഷം ശാന്തരാകുക എന്നിട്ട് പറയുക. "നീ ഇത് എന്നോട് പറഞ്ഞത് നന്നായി, നമുക്ക് പരിഹാരമുണ്ടാക്കാം, ഇനി മേലാൽ ഇതാവർത്തിക്കാതെ നോക്കണം ". ഇതുകൊണ്ടുള്ള ഗുണം ഭാവിയിൽ എന്ത് പ്രശ്നമുണ്ടായാലും അവർ നിങ്ങളുമായി അത് പങ്കുവയ്ക്കും. അവർ വിഷമിച്ചിരിക്കുകയോ വേദനിച്ചിരിക്കുകയോ പേടിച്ചിരിക്കുയോ ആണെങ്കിൽ അവർക്ക് വേണ്ട മാനസിക പിന്തുണ നൽകാൻ ശ്രദ്ധിക്കണം. വൈകാരികമായ ഇത്തരം പിന്തുണയില്ലാത്തതാണ് പല കുട്ടികളും കൈവിട്ട് പോകാനുള്ള പ്രധാന കാരണം.

മടക്കിക്കൊണ്ടുവരാം പഴയ ആ 5 ശീലങ്ങൾ, മിടുമിടുക്കരാക്കാം കുട്ടികളെ

കാലം മാറിയതോടെ നമ്മുടെ ദിനചര്യകളിലും ഒരുപാട് മാറ്റങ്ങൾ വന്നു. പണ്ട് ഉണ്ടായിരുന്ന പല നല്ല ശീലങ്ങളെയും പഴഞ്ചൻ എന്ന പേരു നൽകി ഒഴിവാക്കി. കുടുംബാംഗങ്ങൾ ഒരുമിച്ചിരുന്ന് ഭക്ഷണം കഴിക്കുന്നത് പോലും ഇന്ന് പഴഞ്ചനായി. ബർണാഡ് ടോഡ്‌ലർ ഡെവലപ്മെന്റ് സെന്റർ ഡയറക്ടറായ ഡോ. തോവ ക്‌ളെൻ പറയുന്നത് പഴയശീലങ്ങളിലേയ്ക്ക് കുട്ടികളെ മടക്കിക്കൊണ്ടു വരാനാണ‌്. താഴെ പറയുന്ന അഞ്ച് പഴയ ശീലങ്ങൾ മടക്കിക്കൊണ്ടുവരാനാണ് അദ്ദേഹം പറയുന്നത്.

1. ഒരുമിച്ചിരുന്ന് ഭക്ഷണം

പണ്ടുണ്ടായിരുന്ന ഏറ്റവും നല്ല ശീലങ്ങളിലൊന്നാണത്. കുടുംബത്തിലെ എല്ലാവരും ഒരുമിച്ചുകൂടുന്ന മനോഹരമായ ആ നിമിഷങ്ങളെ മടക്കിക്കൊണ്ടുവരാം. കുടുംബാംഗങ്ങൾ തമ്മിൽ ഊഷ്മളമായ ബന്ധം ഉണ്ടാക്കിയെടുക്കാൻ പറ്റിയ അവസരമാണിത്. അന്നന്നത്തെ വിശേഷങ്ങളും വിഷമങ്ങളും ഒക്കെ പങ്കുവയ്ക്കാം, എന്തിനും ഏതിനും കൂടെ ഒരു കുടുംബമുണ്ടെന്ന ധൈര്യം, അതൊന്നു വേറെതന്നെയാണ്.

2. പുറത്തു കളിച്ച് വളരട്ടെ

മാതാപിതാക്കളേ, കളിച്ച് തിമിർത്ത ആ കുട്ടിക്കാലം ഓർമയില്ലേ? അത്തരമൊരു കാലം നിങ്ങളുടെ കുട്ടികൾക്കും കിട്ടട്ടെ. അവരെ കൂട്ടുകാരുമായി പുറത്ത് കളിക്കാൻ അനുവദിക്കുക. അത് അവരുടെ ഇന്ദ്രിയങ്ങളെ ഉണർത്തുകളും വളർച്ചയെ പുരോഗതിയിലേയ്ക്ക് നയിക്കുകയും ചെയ്യും. ഇന്ദ്രിയങ്ങളുടെ ഈ ഉത്തേജനം മൂലം പഠനത്തിൽ കൂടുതൽ ശ്രദ്ധകേന്ദ്രീകരിക്കാൻ അവർക്കാകുന്നു.

3. മണ്ണിൽ കളിച്ച് വളരട്ടെ

മണ്ണിൽ അവർ യഥേഷ്ടം കളിക്കട്ടെ. പ്രകൃതിയിലേയ്ക്ക് ഇറങ്ങി പ്രകൃതിയെ അറിഞ്ഞ് അവർ വളരട്ടെ. മുറ്റത്തിറങ്ങുമ്പോൾ ഒരു കമ്പ് കിട്ടിയെന്നിരിക്കട്ടെ, ആദ്യ കാഴ്ചയിൽ അത് വെറുമൊരു കമ്പ് മാത്രമാണ്, എന്നാൽ അതുകൊണ്ട് മണ്ണിലോ ചെളിയിലോ ഒന്നിളക്കുമ്പോൾ അതൊരു ഉപകരണമാകുകയാണ്. ആ കമ്പ് കൊണ്ട് ഒരുപാട് വസ്തുക്കൾ നിർമിക്കാനാകുമെന്നത് കുട്ടികൾക്ക് വലിയൊരു അറിവാണ് പകർന്നു നൽകുന്നത്.

4. നിയമവും നിയന്ത്രണവും നല്ലത്

രക്ഷകർതൃത്വം ഒരിക്കലും ഒരു മത്സരമല്ലെന്നറിയുക. മാതാപിതാക്കൾ നിയമങ്ങളും നിയന്ത്രണങ്ങളും വയ്ക്കുമ്പോൾ അവർക്ക് കൂടുതൽ സുരക്ഷിതത്വബോധം ഉണ്ടാകുന്നു. ഒരുപാട് നിയന്ത്രണങ്ങൾ വേണമെന്നതിന് അർത്ഥമില്ല. ഈ നിയമങ്ങളും നിയന്ത്രണങ്ങളും അവരുടെ വളർച്ചയിൽ ഗുണകരവും ആയിരിക്കും.

5. തോൽവിയും പരാജയവും നല്ലതാണ്

വിജയങ്ങൾ മാത്രം പോര ഇടയ്ക്ക് തോൽവിയും വേണം. പരാജയം അവരെ നിരാശപ്പെടുത്തുക തന്നെ ചെയ്യും, എന്നാൽ അടുത്ത ശ്രമത്തിലെ വിജയം അവരുടെ ആത്മവിശ്വാസം വർദ്ധിപ്പിക്കുകതന്നെ ചെയ്യും. വീണ്ടും വീണ്ടും പരിശ്രമിക്കാനുള്ള ഒരു പ്രേരണയുണ്ടാക്കാനും സ്വന്തം നിലയിൽ കാര്യങ്ങൾ ചെയ്യാനും അതവരെ പ്രാപ്തരാക്കുകയും ചെയ്യും

ഇനിയും വൈകിയിട്ടില്ല, കുട്ടികൾക്കായി കരുതലിന്റെ കുട പിടിക്കാം

അഖില ശ്രീധർ

വാത്സല്യത്തോടെ നോക്കേണ്ട കണ്ണുകളിൽ കാമം നിറയുമ്പോൾ പിച്ചിച്ചീന്തപ്പെടുന്നത് നമ്മുടെ നല്ല നാളെയുടെ വാഗ്ദാനങ്ങളാണ്. കുഞ്ഞുങ്ങളെ ലൈംഗികവൈകൃതങ്ങൾക്ക് ഇരയാക്കുന്നവർക്കെതിരെ പ്രതികരിക്കാത്ത ഒരു സമൂഹത്തിൽ കുട്ടികളെ എങ്ങനെ വളർത്തും? ഓരോ ദിവസം പത്രം വായിക്കുമ്പോഴും ഒരു നൂറുതവണ രക്ഷിതാക്കളുടെ മനസ്സിലുയർന്ന സംശയമായിരിക്കുമിത്. എന്നിട്ട് നിങ്ങൾ എന്തു ചെയ്തു? ഇന്നലെ വരെ ടി.വി ചാനലുകളിലും പത്രങ്ങളിലും കേട്ടും കണ്ടും അറിഞ്ഞ കുട്ടികൾക്കെതിരെയുള്ള പീഡനം നാളെ നിങ്ങളുടെ പടികടന്നെത്തിയേക്കാം. ഇപ്പോഴും പ്രതികരണങ്ങൾ ഫേസ്ബുക്ക് പേജിനപ്പുറം കടക്കാതിരിക്കുകയാണ്. ‘എവിടെയോ, ആരുടെയോ കുട്ടി, പിന്നെ ഞാനെന്തിനു പേടിക്കണം. എന്റെ മകൻ/ മകൾ സുരക്ഷിതരാണ്’. ഈ ചിന്തയാണ് ആദ്യം മാറേണ്ടത്. കണ്ണൊന്നു തെറ്റിയാൽ ഏതു നിമിഷവും പൊട്ടിതകരാവുന്ന സംരക്ഷണത്തിന്റെ വലയത്തിനുള്ളിലാണ് നമ്മുടെ കുട്ടികൾ എന്ന് തിരിച്ചറിയണം. ഒരു ചെറിയ ശ്രദ്ധമതിയാകും മുന്നിലെ വലിയൊരു അപകടം തന്നെ തരണം ചെയ്യാൻ. ഇനിയെങ്കിലും നമുക്കൊന്ന് കരുതിയിരിക്കാം. കുട്ടികളുടെ മേൽ കാമക്കഴുതകളുടെ കരിനിഴൽ പടരാതിരിക്കാൻ എന്തൊക്കെ കാര്യങ്ങളിൽ ശ്രദ്ധപുലർത്തണം?

സംസാരം ആരോഗ്യത്തിന് ഹാനികരമല്ല

കുട്ടികളുടെ ദൈംനദിന പ്രവർത്തനങ്ങളിൽ രക്ഷിതാക്കൾ അവരോടൊപ്പം നിൽക്കുക എന്നതാണ് ആദ്യപടി. ഈ ജോലിത്തിരക്കിനിടയിൽ അതിനൊക്കെ എവിടെയാ സമയം എന്നതാണ് മിക്കവരുടെയും പ്രശ്നം. നിങ്ങളുടെ ജോലി നടക്കട്ടെ, അതോടൊപ്പം തന്നെ മകനോട്/ മകളോട് സംസാരിക്കാമല്ലോ. നീ ഇന്ന് ഉച്ചഭക്ഷണം ആരോടൊപ്പം ഇരുന്നാണ് കഴിച്ചത്? എല്ലാ ടീച്ചർമാരും ക്ലാസെടുത്തോ? ഒഴിവുസമയത്ത് എന്തൊക്കെ ചെയ്തു? സ്കൂൾ വിട്ട് വരാൻ എന്തേ വൈകിയത്? പോലുള്ള ചെറിയ കാര്യങ്ങളെന്തെങ്കിലും വർത്തമാനം പറയുന്നതിനിടെ എപ്പോഴെങ്കിലും അറിഞ്ഞുവയ്ക്കാൻ ശ്രമിക്കുക. രണ്ടോ മൂന്നോ ദിവസം ഇതാവർത്തിച്ചാൽ നിങ്ങൾ ചോദിക്കാതെ തന്നെ കുട്ടികൾ ഈ കാര്യങ്ങൾ പറഞ്ഞുതുടങ്ങും. ഈ ശീലം വളർത്തിക്കൊണ്ടുവരാൻ ശ്രമിക്കുക.

ആരൊക്കെയാണ് കുട്ടികളുടെ ഒരു ദിവസത്തിലൂടെ കടന്നുപോകുന്നവർ?

ഈ കാര്യം രക്ഷിതാക്കൾ തീർച്ചയായും അറിഞ്ഞുവയ്ക്കണം. കുട്ടികൾ സമയം ചെലവിടുന്ന ആളുകൾക്കൊപ്പം അവർ ഹാപ്പിയാണോ? എന്തെങ്കിലും അസ്വസ്ഥത, ഇഷ്ടക്കേട് എപ്പോഴെങ്കിലും പ്രകടമാക്കുന്നുണ്ടോ എന്നത് എപ്പോഴും ശ്രദ്ധിക്കുക. അങ്ങനെ എന്തെങ്കിലും തോന്നിയാൽ അതിന്റെ കാരണം എന്താണെന്ന് പെട്ടെന്നു തന്നെ കുട്ടിേയാട് ചോദിച്ച് മനസ്സിലാക്കുക.

സൂക്ഷിക്കാനേൽപ്പിക്കുന്ന കൈകൾ സുരക്ഷിതമാണോ?

ഡേ കെയർ സെന്ററുകൾ, വീട്ടിലെ ആയമാർ, പുതിയ സ്കൂളിലെ അന്തരീക്ഷം, കളിയിടങ്ങൾ തുടങ്ങി കുട്ടിയുമായി ഇടപെടുന്ന ആളുകളെ, സ്ഥലങ്ങളെ കണ്ണടച്ച് വിശ്വസിക്കാതിരിക്കുക. (ഓർക്കുക, ഇതുവരെയുള്ള കണക്കുകൾ പരിശോധിച്ചാൽ ഏറ്റവും കൂടുതൽ പീഡനത്തിനിരയാകുന്നത് മൂന്നുവയസ്സുവരെ പ്രായമുള്ള കുട്ടികളാണ്. അതായത് സംസാരിക്കാൻ പഠിച്ചുവരുന്ന പ്രായം.)

നിങ്ങളിങ്ങനെ ചെയ്തിട്ടുണ്ടോ?

ജോലി കഴിഞ്ഞ് വീട്ടിലെത്തി ചാനൽ മാറ്റുന്നതിനിടെ ഒരു പീഡനവാർത്തയെങ്കിലും കേൾക്കാത്ത ദിവസമില്ലല്ലോ? ഇൗ സമയത്ത് കുട്ടിയെ അടുത്ത് വിളിച്ച് ഈ വാർത്തയിൽ പറയുന്ന കാര്യം എന്താണെന്ന് മനസ്സിലായോ? ഇതുപോലുള്ള സംഭവം മുമ്പ് കേട്ടിട്ടുണ്ടോ? കൂട്ടുകാർ ആരെങ്കിലും ഇതിനെ കുറിച്ച് സംസാരിക്കാറുണ്ടോ? ഇങ്ങനൊരു സന്ദര്‍ഭം നേരിടുന്നത് മോൻ/ മോളാണെങ്കിൽ എന്തുചെയ്യും പോലുള്ള ചോദ്യങ്ങൾ ചോദിക്കുകയും അതിലൂടെ വിഷയത്തിന്റെ പ്രാധാന്യം കുട്ടികള്‍ക്ക് മനസ്സിലാക്കി കൊടുക്കുകയും ചെയ്യുക. സാധാരണ ഉള്ള പ്രകൃതത്തിൽ നിന്ന് കുട്ടികൾ എന്തെങ്കിലും മാറ്റം എപ്പോഴെങ്കിലും കാണിച്ചു തുടങ്ങിയാൽ അത് നിസാരമായി തള്ളാതിരിക്കുക.

പറഞ്ഞുകൊടുക്കൂ, എവിടെ വരെയാകാം

പരിചിതനോ അപരിചിതനോ ആയ ഒരാൾ ദേഹത്തുതൊടുമ്പോൾ ഗുഡ് ടച്ച് ആണോ ബാഡ് ടച്ച് ആണോ എന്ന് തിരിച്ചറിയാനുള്ള കഴിവ് കുട്ടികളിൽ വളർത്തികൊണ്ടുവരണം. ഒരാളുടെ സാമീപ്യം ഏതെങ്കിലും രീതിയിലുള്ള അസ്വസ്ഥതയോ ഇഷ്ടക്കേടോ ഉണ്ടാക്കുന്നുവെങ്കിൽ അത് രക്ഷിതാക്കളോടോ അയാളോടൊ തന്നെ തുറന്നു പറയാനുള്ള ധൈര്യം ഉണ്ടാക്കിയെടുക്കുക. എന്താണ് ലൈംഗിക അതിക്രമണം അതെങ്ങനെ ശരീരത്തെ, മനസ്സിനെ ബാധിക്കുന്നുവെന്ന കാര്യം മടി കൂടാതെ കുട്ടികൾക്ക് മനസ്സിലാകുന്ന ഭാഷയിൽ പറഞ്ഞുകൊടുക്കുക തന്നെ വേണം. അവരുടെ ശരീരത്തിലെ സ്വകാര്യഭാഗങ്ങൾ സ്വകാര്യമായി തന്നെ സൂക്ഷിക്കേണ്ടതിനെ കുറിച്ച് ബോധവാന്മാരാക്കുക.

തന്നെ ശിക്ഷിക്കുമോ എന്ന പേടി കൊണ്ടാണ് പലപ്പോഴും കുട്ടികൾ ഒന്നും തുറന്നു പറയാത്തത്. അതിനാൽ രക്ഷിതാക്കൾ അവരുടെ നല്ല ചങ്ങാതിമാരാവുക. എന്തും തുറന്നു സംസാരിക്കാനുള്ള സാഹചര്യം വളർത്തിയെടുക്കുക. കുഞ്ഞുങ്ങൾ എന്തു പറയുമ്പോഴും അത് ശ്രദ്ധയോടെ കേൾക്കുക. മാനസികമായ പിൻബലം നൽകുക. രക്ഷിതാക്കളുടെ നിരന്തരമായ ഇടപെടലിലൂടെ കുട്ടികൾ ആക്രമിക്കപ്പെടാനുള്ള സാഹചര്യം കുറച്ചുകൊണ്ടുവരാം. അതുകൊണ്ട് കരുതൽ നമുക്ക് വീട്ടിൽ നിന്നു തുടങ്ങാം.

ഓണ്‍ലൈനിൽ നിന്നും ചിലത് പഠിക്കാനുണ്ട്

ഡിജിറ്റൽ മീഡിയലും ഇൻറർനെറ്റുമൊക്കെയാണ് കുട്ടികളെ വഴിതെറ്റിക്കുന്നതെന്നാണ് പലരും പറയുന്നത്. കുട്ടികൾ എന്ത് തെറ്റ് ചെയ്താലും അതിൻറെ പഴി ഇൻറർനെറ്റിനാണ്. എന്നാൽ കുട്ടിക്കുറുമ്പുകളുടെ വികൃതിക്ക് പരിഹാരമാകാനും ഈ പാവം ഇൻറർനെറ്റിന് കഴിയും. അവധി ദിവസങ്ങളിൽ ഇവരെ എങ്ങനെയൊന്ന് അടക്കിയിരുത്തും എന്നോർത്ത് ആകുലപ്പെട്ടിരിക്കുന്നവരാണോ നിങ്ങൾ ...ഫീസും കൊടുക്കണ്ട, ദൂരെയെങ്ങും പോകേണ്ട, അവർ നമ്മുടെ കണ്‍വെട്ടത്തു തന്നെ കാണും എന്ന ചില പ്രത്യകതകളുമുണ്ട്. ഈ ഓൺലൈന്‍ പഠനത്തിന്. ഇതാ ചില കിടിലൻ ഓൺലൈന്‍ വഴികൾ.

അലങ്കാരപ്പണി, തയ്യൽ, ക്രോസ്‌ സ്റ്റിച്ച്

ചില കുട്ടികള്‍ കരകൗശല വിദ്യയിൽ നിപുണരായിരിക്കും. മറ്റ് കുട്ടികൾ ഇതൊക്കെ ചെയ്യുന്നത് കണ്ടിട്ട് എൻറെ കുട്ടിയും ഇങ്ങനൊക്കെ ചെയ്തിരുന്നെങ്കിലെന്ന് ആശിച്ചിട്ടുണ്ടോ? വഴിയുണ്ടെന്നേ..മിക്ക കുട്ടികക്കും ജൻമനാ ഇത്തരം വിദ്യകളിൽ അഭിരുചിയുണ്ടാകും, അവധി അവസരമാക്കി നമുക്കത് പൊടിതട്ടിയെടുക്കാം. . യു ടൂബിലോ ക്രാഫ്റ്റിങ് വെബ്സൈറ്റിലോ പരതി അവർക്കു പറ്റിയ വിഡിയോ കണ്ടെത്താം, കടകളിൽ നിന്നും ക്രാഫിറ്റിനാവശ്യമായ സാധനങ്ങൾ വാങ്ങാം. അത് നോക്കി അതു പോലെ ഉണ്ടാക്കാൻ പറഞ്ഞു നോക്കൂ. കുസൃതികുട്ടൻമാര്‍ അടങ്ങിയിരുന്ന് ചെയ്യുന്നത് കാണാം.

വിദേശഭാഷ പഠിക്കാം

മറ്റ് ഭാഷകൾ പഠിക്കുന്നത് ഒരു രസമല്ലേ, മാത്രമല്ല ഭാവിയിൽ കുട്ടികൾക്ക് അത് ഗുണം ചെയ്യുകയും ചെയ്യും. ഏതെങ്കിലും രാജ്യത്തെക്കുറിച്ച് കുട്ടി താല്പര്യപൂർവം പറയുകയാണെങ്കിൽ അവിടുത്തെ വിശേഷങ്ങൾ പറഞ്ഞു കൊടുക്കാം. അവിടുത്തെ ഭാഷ എന്താണെന്നും എങ്ങനെ ഉച്ഛരിക്കണമെന്നും, എങ്ങനെ പഠിക്കാമെന്നും ഓൺലൈൻ വഴി പറഞ്ഞു കൊടുക്കാം. അതിനായി ധാരാളം ഫ്രീ ഓൺലൈൻ കോഴ്സുകളും ഡിക്‌ഷനറികളും ഓഡിയോകളും ഉണ്ട്.

കോഡിങ് പഠിക്കാം

അഞ്ച് വയസുമുതലുള്ള കുട്ടികൾക്കായുള്ള ധാരാളം കോഡിങ് സൈറ്റുകളുണ്ട്. കോഡിങിൽ താല്പര്യമുള്ള കുട്ടുകൾക്ക് അത് വളരെ പ്രയോജനം ചെയ്യും.

ഗ്രാഫിക് ഡിസൈൻ

പടം വരയ്ക്കാനിഷ്ടമുള്ള കൂട്ടികൾക്ക് ഫോട്ടോഷോപ്പും ഇലുസ്ട്രേറ്റരുമൊക്കെ പരിചയപ്പെടുത്താം. ഉതിൽ വിജയിച്ചാൽ കുട്ടികൾക്കായി ഓൺലൈൻ ഗ്രാഫിക്ക് ഡിസൈൻ കോഴ്സുകളുണ്ട്.

വെബ് ഡിസൈൻ

വെബ് ഡിസൈനിൽ അഭിരുചി വളർത്തിയെടുക്കാം. വെബ് ഡിസൈനിംങിൻറെ ബാലപാഠങ്ങൾ പഠിക്കാൻ ധാരാളം വെബ്സൈറ്റുകളുണ്ട്. വളരെ കുറഞ്ഞ സമയത്തിനുള്ളിൾ വെബ്സൈറ്റ് ഡിസൈൻ ചെയ്യുന്നത് കാണാം

പൂന്തോട്ട നിർമാണം

സ്ഥലപരിമിതിയാണ് ഇന്ന് വീടുകളിളിലും പൂന്തോട്ടങ്ങൾ മായാൻ കാരണം. എന്നാൽ ഉള്ള സ്ഥലത്ത് മനോഹരമായി പൂന്തോട്ടങ്ങൾ നിർമിക്കാനുള്ള വഴികൾ പറഞ്ഞു തരാൻ ധാരാളം വെബ്സൈറ്റുകളുണ്ട്. പല രാജ്യങ്ങളിലെ പൂന്തോട്ട നിർമാണ രീതികളും പഠിക്കാം. കുട്ടികൾക്കായുള്ള പൂന്തോട്ട നിർമാണ കോഴ്സുകളുമുണ്ട്.

കുട്ടികളെ തല്ലാതെയും നേരെയാക്കാം

തെറ്റു ചെയ്യാത്ത കുട്ടികളുണ്ടാകില്ല. എല്ലാ കുട്ടിക്കുറുമ്പന്മാരുടെ കയ്യിലും എന്തെങ്കിലും കുസൃതിത്തരങ്ങളുണ്ടാകും. ചെറിയ ചിലതെറ്റുകൾ ചെയ്യുമ്പോൾ കുഞ്ഞുങ്ങളെ പറഞ്ഞു തിരുത്താം. വികൃതി കൂടിയാലോ? വടിയെടുത്തോ കൈ കൊണ്ട് തല്ലിയോ ഒക്കെ ശാസിക്കാറാണോ പതിവ്? കുട്ടികളെ തല്ലുന്നത് അവരെ ശാസിക്കുന്നതിനേക്കാൾ അധികം നിങ്ങളുടെ കലി അടക്കാനാണെന്ന് മനശാസ്ത്ര വിദഗ്ധർ പറയുന്നു. കുട്ടികളെ തെറ്റു പറഞ്ഞ് മനസിലാക്കി കൊടുക്കാനും ശാസിക്കാനും തല്ലുക മാത്രമാണോ വഴി. ഇതാ ഈ മാർഗങ്ങൾ ഒന്നു നോക്കൂ.

ഒറ്റയ്ക്ക് മാറിയിരിക്കാം

കുട്ടി തെറ്റ് ചെയ്താൽ അപ്പോൾ കുട്ടിയുടെ മാനസികാവസ്ഥ അവന്റെ ഭാഗത്തെ ശരിയിൽ മാത്രമായിരിക്കും. അടിക്കാൻ ചാടി വീഴും മുമ്പ് ഓർക്കേണ്ടത് പക്വതയുള്ള നിങ്ങളാണ്. നിങ്ങളും കുട്ടിയും തമ്മിലുള്ള മുഖാമുഖ സന്ദർഭം ഒഴിവാക്കുകയാണ് വേണ്ടത്. പെട്ടെന്ന് തന്നെ പ്രതികരിക്കുന്നതിനേക്കാൾ കുട്ടിക്ക് അൽപം സമയം നൽകുന്നത് തന്നെയാണ് നല്ലത്. നിങ്ങൾക്കും നല്ല രീതിയിൽ അവനെ പറഞ്ഞ് മനസിലാക്കാൻ അപ്പോൾ കഴിയണമെന്നില്ല. പെട്ടെന്ന് കുട്ടിയുടെ അടുത്ത് നിന്ന് മാറാം. അൽപ്പ സമയത്തേക്ക് ഒന്നും മിണ്ടാതെ ഇരിക്കാം. ഏതെങ്കിലും മൂലയിൽ പോയി നിൽക്കാൻ കുട്ടിയോട് പറയാം. നിങ്ങൾക്കുണ്ടായ വിഷമം ഒരു പേപ്പർ എടുത്ത് എഴുതൂ.

റിയലിസ്റ്റിക് പണിഷ്മെന്റ്

സൈക്ലിങ്, കാർട്ടൂൺ എന്നിവ പോലെ എന്തെങ്കിലും കാര്യങ്ങൾ ഏറെ ഇഷ്ടപ്പെടുന്ന കുട്ടിയാണ് എങ്കിൽ എന്തെങ്കിലും തെറ്റ് കാണിച്ചാൽ കുറച്ചു ദിവസത്തേയ്ക്ക് അവയിൽ നിന്ന് വിലക്കാം. അത്തരത്തിലുള്ള ശിക്ഷകൾ കുട്ടികളെ വികൃതി കാണിക്കുന്നതിൽ നിന്ന് പിന്തിരിപ്പിക്കും.

പണി’ കൊടുക്കാം

ചെടി നനയ്ക്കൽ, മുറികൾ വൃത്തിയാക്കൽ പോലുള്ള കുട്ടികൾക്കിഷ്ടമില്ലാത്ത വീട്ടിലെ ജോലികൾ നിർബന്ധപൂർവം ചെയ്യിപ്പിക്കാം. ഇത് അവരെ വേദനിപ്പിക്കാതെ ശിക്ഷിക്കാനുള്ള ഒരു മാർഗമാണ്.

നല്ലതും കണ്ടെത്താം

കുട്ടിക്കുറുമ്പന്മാർ തെറ്റു മാത്രമല്ലല്ലോ നല്ല കാര്യങ്ങളും ചെയ്യാറില്ലേ? അവർക്ക് നല്ല കാര്യങ്ങൾ ചെയ്യുമ്പോൾ കൂടുതൽ മാർക്ക് നൽകാനും മോശം കാര്യം ചെയ്യുമ്പോൾ ഏറ്റവും കുറവ് മാർക്ക് നൽകാനും ഒരു നോട്ടീസ് ബോർഡ് നൽകാം. മനോഹരമായി തയാറാക്കിയ ഒരു നോട്ടീസ് ബോർഡാകുമ്പോൾ മറ്റുള്ളവരെ കാണിക്കുന്ന രീതിയിൽ വീട്ടിൽ തൂക്കാം. അത് മറ്റുള്ളവർ കാണും എന്നതിനാൽ നല്ല കാര്യങ്ങൾ ചെയ്യാനും കൂടുതൽ മാർക്ക് വാങ്ങാനും കുട്ടികൾക്കുള്ളിൽ വാശിയുണ്ടാകും.

അമ്മമാരുടെ ടെൻഷനു പിന്നിൽ ഈ 3 കാര്യങ്ങൾ!

പേരൻറിങ് കാലഘട്ടം വളരെ മനോഹരമായ കാലമാണെന്നതിൽ ഒരു സംശയവുമില്ല. കുട്ടികളുടെ കൊച്ചു കുസൃതികളും കളികളും കൊഞ്ചലുകളുമൊക്കെയായി മിക്ക മാതാപിതാക്കളും വളരെ ആസ്വദിച്ചാണ് കുട്ടികളെ വളർത്തുന്നത്. പേരൻറിങ് കാലം അച്ഛനും അമ്മയ്ക്കു തികച്ചും വ്യത്യസ്തമാണ്. അച്ഛൻമാരെക്കാൾ അമ്മമാർക്ക് ടെൻഷൻറെ കാലം കൂടെയാണ്. അതെന്താ അച്ഛൻമാക്ക് ടെൻഷനില്ലേയെന്ന് ചോദിക്കാൻ വരട്ടെ. മിനസോട്ട സർവകലാശാലയിലെ അദ്ധ്യാപകർ നടത്തിയ പഠനങ്ങൾ പറയുന്ന കാര്യങ്ങൾ അറിയുക. അമ്മമാർ ഈ കാലഘട്ടം അച്ഛൻമാരേക്കാൾ കുറവാണ് ആസ്വദിക്കുന്നത് എന്നതിന് പ്രധാന കാരണം അവർ കൂടുതൽ ജോലികൾ കൂടെ ചെയ്യുന്നു എന്നതാണ്. ഈയൊരവസരത്തിലാണ് കെയ്‌ലി ഷ്വാട്സ് എന്ന അധ്യാപിക നടത്തിയ ചെറിയ ഒരു ശ്രമം ശ്രദ്ധേയമാകുന്നത്.

1.അച്ഛൻമാരേക്കാൾ കൂടുതൽ ജോലി അമ്മമാർ ചെയ്യുന്നു

കുട്ടികളുടെ അച്ചടക്ക കാര്യം തൊട്ട് പഠനകാര്യങ്ങളിൽ വരെ അമ്മമാരാണ് മുൻക്കൈ എടുക്കാറ്. ഓഫീസ് ജോലിയും വീട്ടുജോലിയും കുട്ടികളുടെ കാര്യങ്ങളും കഴി‍ഞ്ഞാൽ പിന്നെ എങ്ങനെ ഈ കാലം ആസ്വദ്യകരമാക്കണമെന്നാണ് പറയുന്നത്? നമുക്കറിയാം അത്ര ആസ്വാദ്യകരമല്ലാത്ത പല ജോലികളും അമ്മമാർ ചെയ്യുന്നുണ്ട്. കുട്ടികളുമായുള്ള കളികളൊക്കെ എല്ലാവർക്കും ഇഷ്ടം തന്നെയാണ്, അച്ഛൻമാർ കുട്ടികളോടൊപ്പം ചിലവഴിക്കുന്ന അധിക സമയവും അവർക്കൊപ്പം കളികളിൽ മുഴുകുകയാണ് ചെയ്യുന്നത്. അമ്മമാരുടെ കാര്യം തികച്ചും വ്യത്യസ്തമാണ്.

അമ്മമാർ ചെയ്യേണ്ടത്–

അമ്മ എനിക്കൊപ്പം കളിക്കാറേയില്ല എന്ന പരാതി കേട്ടിട്ടുള്ളവരാകും മിക്ക അമ്മമാരും. ഈ ടിപ്സ് ഒന്നു പരീക്ഷിക്കൂ. വിരസമായ ജോലികളിൽ കുട്ടികളേയും കൂട്ടാം. തുണി കഴുകാനും മടക്കാനും വീട്ടുസാധനങ്ങൾ അടുക്കിവയ്ക്കാനും ചെടി നനയ്ക്കാനുമൊക്കെ കുട്ടികളുമായി ഒരു മത്സരം തന്നെ വയ്ക്കാം. അത് ജോലിഭാരം കുറയ്ക്കുകയും കുട്ടികളുടെ കൂടെ കളിക്കുന്നില്ലെന്ന പരാതിക്ക് പരിഹാരമാകുകയും ചെയ്യും. അത് കുട്ടികളെ ചെറിയ പ്രായത്തിൽ തന്നെ സ്വയം പര്യാപ്തരാക്കുമെന്നതിൽ സംശയമില്ല. കുട്ടികളുമൊത്ത് ആസ്വാദ്യകതമായി സമയം ചിലവഴിക്കുകയും ചെയ്യാം , പണികളും നടക്കും.

2. അച്ഛൻമാരേക്കാൾ മൾട്ടി ടാസ്ക് അമ്മമാർക്കാണ്

ഒരേ സമയം ഒന്നില്‍ കൂടുതല്‍ പ്രവർത്തികൾ ചെയ്യുക എന്നത് സ്ത്രീകളുടെ പ്രത്യേകിച്ച് അമ്മമാരുടെ പ്രത്യേകതയാണ്. കുട്ടികൾ ഒപ്പമുള്ള സന്ദർഭങ്ങളിൽ അമ്മമാർ ചെയ്യുന്ന ജോലികൾ അനവധിയാണ്. അച്ഛൻമാർ പൊതുവെ ഒരേ സമയം കുട്ടിയെ നോക്കുക എന്ന ദൗത്യം മാത്രമാകും ചെയ്യുക. അതുകൊണ്ട് തന്നെ അവർ റിലാക്സ്ഡും ആയിരിക്കും.

അമ്മമാർ ചെയ്യേണ്ടത്–

കുട്ടി ജനിക്കുമ്പോൾ തന്നെ ചെറിയ ജോലികളിൽ ഭർത്താവിനേയും പങ്കാളിയാക്കാം. കുട്ടികളുടെ കാര്യങ്ങൾ ചെയ്യാൻ അവരെ പഠിപ്പിക്കാം. ആദ്യം അല്പം പാളിച്ചയൊക്കെ ഉണ്ടായാലും നിങ്ങൾക്ക് തിരുത്തി കൊടുക്കാവുന്നതേയുള്ളൂ. ഇത് മൂലം മറ്റ് ജോലികൾ നിങ്ങൾക്ക് ഈസിയായി ചെയ്യാൻ സാധിക്കും.

3. എന്തിനും അമ്മേ.... എന്ന ആ വിളി

അമ്മേ ഷൂസ് എവിടെ, അമ്മേ വിശക്കുന്നു, അയ്യോ അമ്മേ കാല് വേദനിക്കുന്നു ഇങ്ങനെ അച്ഛൻ അടുത്തുണ്ടെങ്കിലും എന്തിനും ഏതിനും കുട്ടികൾ വിളിക്കുന്നത് അമ്മയെ തന്നെയാണ്. അമ്മ എവിടെ? എന്ന ഒറ്റ ചോദ്യം മാത്രമാകും അവർ അച്ഛനോട് ചോദിക്കാറ്. ഈ വിളികളും ആവശ്യങ്ങളും മൂലം അമ്മമാരുടെ വിശ്രമസമയവും ഉറക്ക സമയവും കുറയുന്നു.

അമ്മമാർ ചെയ്യേണ്ടത്–

നിങ്ങൾക്കായ് കുറച്ചു സമയം മാറ്റി വയ്ക്കാം. ദിവസത്തിൽ അരമണിക്കൂറെങ്കിലും നിങ്ങളുടെ കാര്യങ്ങളിൽ മുഴുകുക. ഒന്ന് പുറത്തു പോകുകയോ, കൂട്ടുകാരുമായി ഒത്തുചേരുകയോ, സൗന്ദ്യര്യകാര്യങ്ങൾക്ക് സമയം ചിലവഴിക്കുകയോ നിങ്ങൾക്കിഷ്ടമുള്ള ഹോബിയിൽ ഏർപ്പെടുകയോ ഒക്കെയാവാം

പരീക്ഷാക്കാലം ഇനി ടെൻഷൻഫ്രീ, 4 കിടിലൻ ടിപ്സ്!

കുട്ടികളും അധ്യാപകരും തമ്മിലുള്ള ബന്ധം പണ്ട് വളരെ ആഴമുള്ളതായിരുന്നു. അവരുടെ ഒട്ടുമിക്ക കാര്യങ്ങളും അധ്യാപകർക്ക് അറിയുകയും ചെയ്യാമായിരുന്നു. മാതാപിതാക്കളോടെന്ന പോലെ എന്തും ഏതും അവരോട് തുറന്നു പറയുന്ന ഒരു വിദ്യാർഥി സമൂഹം എപ്പഴൊക്കേയോ ഉണ്ടായിരുന്നു. കാലം മാറിയതോടെ മറ്റ് ബന്ധങ്ങളിലെന്ന പോലെ അധ്യാപക– വിദ്യാർഥി ബന്ധത്തിലും വിള്ളൽ വീണു. പഠിപ്പിക്കുക എന്ന ഉത്തരവാദിത്വം മാത്രം നിറവേറ്റുന്ന അധ്യാപകരാണ് ഇന്ന് അധികവും. ഈയൊരവസരത്തിലാണ് കെയ്‌ലി ഷ്വാട്സ് എന്ന അധ്യാപിക നടത്തിയ ചെറിയ ഒരു ശ്രമം ശ്രദ്ധേയമാകുന്നത്.

1. പഠനത്തിന് നിശ്ചിതമായ സമയക്രമം ഉണ്ടാക്കുക

പഠനസമയത്തിന്‍റെ ദൈര്‍ഘ്യം കൂട്ടുന്നത് പരീക്ഷക്കാലത്ത് ചിലപ്പോള്‍ വിപരീത ഫലം സൃഷ്ടിച്ചേക്കാം. അതിനാല്‍ നിലവില്‍ കുട്ടി പഠിക്കാനുപയോഗിക്കുന്ന സമയത്തെ ഫലപ്രദമായി തരം തിരിക്കുക. കുട്ടി പഠിക്കുന്ന സമയം തീരം കുറവാണങ്കില്‍ രണ്ട് മണിക്കൂര്‍ കൂടി പഠനത്തിനായി ഇതോടൊപ്പം ചേര്‍ക്കാം. പഠിക്കുന്നത് എല്ലാ ദിവസവും ഒരേ സമയങ്ങളിലാക്കുക. ഇത് പഠനം ഒരു ശീലമായി മാറ്റാന്‍ സഹായിക്കും. കുട്ടികള്‍ക്ക് ഒരു വിഷയം പഠിക്കാന്‍ പ്രത്യേക സമയം ഉപയോഗിക്കുന്നത് തലേ ദിവസത്തെ ഓര്‍മ്മ നന്നായി നിലനിര്‍ത്താനും സഹായിക്കും. ഇത് റിവിഷന്‍ എളുപ്പമാക്കും.

2. ഇടവേളകള്‍ അനിവാര്യമാണ്.

ഒരു വിഷയത്തിന്‍റെ അന്നേ ദിവസത്ത ക്വാട്ട തീര്‍ന്നാല്‍ അല്ലെങ്കില്‍ സമയം തീര്‍ത്താന്‍ ഉടന്‍ അടുത്ത ബുക്കെടുത്ത് കൈയ്യില്‍ കൊടുക്കേണ്ട. ഇടവേള കുട്ടിക്ക് നല്‍കുക. ഇത് മനസ്സിനെ ഫ്രഷാക്കാന്‍ കുട്ടികളെ സഹായിക്കും. ഒപ്പം അവര്‍ പഠിച്ച് കഴിയുമ്പോള്‍ അവരെ അഭിനന്ദിക്കുക. അവര്‍ക്ക് ഇഷ്ടമുള്ള ഭക്ഷണം ഉണ്ടാക്കി നല്‍കാം. ഇതെല്ലാം പഠനത്തിന്‍റെ ആലസ്യത്തില്‍ നിന്ന് കുട്ടികളെ മോചിപ്പിക്കാന്‍ സഹായിക്കും.

3. കുട്ടികളുടെ കൂടി താല്‍പ്പര്യം പരിഗണിക്കുക

കുട്ടികള്‍ക്ക് തീരെ സഹിക്കാന്‍ വയ്യാത്ത കാര്യമാണ് അവരുടെ സ്വാതന്ത്ര്യത്തില്‍ കൈ കടത്തുന്നത്. നിവൃത്തിയില്ലാത്തെ അവര്‍ മിക്കപ്പോഴും സഹിക്കുന്ന ഈ കൈ കടത്തലിനോടുള്ള പ്രതിഷേധം അവര്‍ക്ക് പ്രകടിപ്പിക്കാന്‍ കഴിയുക നിസ്സഹകരണത്തിലൂടെയാകും. പഠനത്തിന്‍റെ കാര്യത്തില്‍ അതിനാല്‍ അവരില്‍ അടിച്ചമര്‍ത്തലുകള്‍ നടത്തേണ്ടതില്ല. അവരുടെ അഭിപ്രായം കൂടി പരിഗണിച്ച് ടൈം ടേബിളും പഠനക്രമവും, പഠന രീതിയും തയ്യാറാക്കാം. അവര്‍ക്ക് താല്‍പ്പര്യമുള്ള എളുപ്പമുള്ള വിഷയങ്ങള്‍ പഠിക്കേണ്ട രീതിയും വിഷമമുള്ളവ പഠിക്കേണ്ട രീതിയും വ്യത്യസ്തമായിരിക്കും. ഒപ്പം എങ്ങനെ നിങ്ങള്‍ അവരുടെ പഠനത്തില്‍ ഇടപെടണം എന്നുള്ളതിലും അവരുടെ അഭിപ്രായം തേടാവുന്നതാണ്. പഠിപ്പിക്കേണ്ടതുണ്ടോ, അതോ ചോദ്യോത്തര രീതിയില്‍ പഠിക്കാന്‍ അവരെ സഹായിച്ചാല്‍ മതിയോ, ഇതെല്ലാം കുട്ടികളില്‍ ആത്മവിശ്വാസം വളര്‍ത്താനും സഹായിക്കും.

4.പഠനത്തിന്‍റെ ഇടവേളകള്‍ രസകരമാക്കാം

പഠനം ടൈം ടേബിളനുസരിച്ച് മുന്നോട്ട് പോകുമ്പോഴും അതില്‍ താല്‍പ്പര്യം നഷ്ടപ്പെടാതിരിക്കാന്‍ ചില മാര്‍ഗ്ഗങ്ങള്‍ സ്വീകരിക്കാം. ഇടദിവസങ്ങളിൽ അവരെ പുറത്തേക്ക് കൊണ്ടുപോകാം. സിനിമക്കോ, മറ്റു പരിപാടികള്‍ക്കോ , ആഘോഷങ്ങള്‍ക്കോ അവരെ കൂട്ടാം. ഇത് അവരുടെ മനസ്സില്‍ അധിക സമ്മര്‍ദ്ദം ഉണ്ടാകാതിരിക്കാന്‍ സഹായിക്കും

ആറ് കൊല്ലമായി അച്ഛനെ കണ്ടിട്ട്... ടീച്ചറിന്റെ മുന്നിൽ മനസുതുറന്ന് കുട്ടികൾ, ഇതാവണം ടീച്ചർ!

കുട്ടികളും അധ്യാപകരും തമ്മിലുള്ള ബന്ധം പണ്ട് വളരെ ആഴമുള്ളതായിരുന്നു. അവരുടെ ഒട്ടുമിക്ക കാര്യങ്ങളും അധ്യാപകർക്ക് അറിയുകയും ചെയ്യാമായിരുന്നു. മാതാപിതാക്കളോടെന്ന പോലെ എന്തും ഏതും അവരോട് തുറന്നു പറയുന്ന ഒരു വിദ്യാർഥി സമൂഹം എപ്പഴൊക്കേയോ ഉണ്ടായിരുന്നു. കാലം മാറിയതോടെ മറ്റ് ബന്ധങ്ങളിലെന്ന പോലെ അധ്യാപക– വിദ്യാർഥി ബന്ധത്തിലും വിള്ളൽ വീണു. പഠിപ്പിക്കുക എന്ന ഉത്തരവാദിത്വം മാത്രം നിറവേറ്റുന്ന അധ്യാപകരാണ് ഇന്ന് അധികവും. ഈയൊരവസരത്തിലാണ് കെയ്‌ലി ഷ്വാട്സ് എന്ന അധ്യാപിക നടത്തിയ ചെറിയ ഒരു ശ്രമം ശ്രദ്ധേയമാകുന്നത്.

ഡെൻവറിലെ ഡൗൾ എലിമെൻട്രി സ്കൂളിലെ അധ്യാപികയായ കെയ്‌ലി ഷ്വാട്സ് ഒരു കൗതുകത്തിനാണ് കുട്ടികളോട് ഒരു വാക്യം പൂരിപ്പിക്കാൻ ആവശ്യപ്പെട്ടത്. പൂരിപ്പിക്കേണ്ടത് ഇതായിരുന്നു – ' ടീച്ചർ അറിയണമെന്ന് ഞാൻ ആഗ്രഹിക്കുന്നത്..... ' അതിന് കുട്ടികൾ എഴുതി നൽകിയ മറുപടികൾ ആ അധ്യാപികയുടെ കണ്ണ് തുറപ്പിക്കുന്നതായികുന്നു. അതുകൊണ്ട് തന്നെ മറ്റ് അധ്യാപർക്ക് ഒരു മാതൃകയാകാൻ  എന്ന ഹാഷ്ടാഗിൽ അവർ അവ ട്വീറ്റ് ചെയ്യുകയായിരുന്നു. വളരെവേഗമാണ് അത് വൈറലായത്. ലോകമെമ്പാടുമുള്ള ഒരുപാട് അദ്ധ്യാപകർ കെയ്‌ലിയുടെ മാതൃക പിൻതുടർന്നു.

തങ്ങളുടെ വീട്ടിലെ ദാരിദ്ര്യവും മാതാപിതാക്കളുടെ അവഗണനയും അസുഖങ്ങളും വരെ കുട്ടികൾ തുറന്നെഴുതി. ഇതാ അതിൽ ശ്രദ്ധേയമായ ചില കുറിപ്പുകള്‍. "ടീച്ചർ അറിയണമെന്ന് ഞാൻ ആഗ്രഹിക്കുന്നത്, എനിക്ക് ഹോംവർക്കു ചെയ്യാൻ വീട്ടിൽ ഒരു പെൻസിൽ പോലുമില്ല " സാമ്പത്തിക ബുദ്ധിമുട്ടുള്ള ഒരുകുട്ടിയുടേതാണ് ഈ കുറിപ്പ്.

മറ്റ് കുറിപ്പുകൾ ഇങ്ങനെ :

"എന്റെ അമ്മ പലപ്പോഴും വീട്ടിൽ ഉണ്ടാവാറില്ല, അതുകൊണ്ട് റീഡിംങ് ബുക്ക് ഒപ്പിടാൻ പോലും അമ്മയെ കിട്ടാറില്ല"

"എനിക്ക് മൂന്ന് വയസ് ഉള്ളപ്പോൾ എന്‍റെ അച്ഛനെ മെക്സിക്കോയിലേക്ക് നാടുകടത്തിയതാണ്, ആറ് കൊല്ലമായി ഞാന്‍ അച്ഛനെ കണ്ടിട്ട്, അച്ഛനെ ഒരുപാട് മിസ് ചെയ്യുന്നു"

"എന്‍റെ അമ്മയ്ക്ക് കാൻസറാണ്, വീട്ടിൽ മിക്ക ദിവസവും ഞാൻ തനിച്ചാണ്"

"എന്‍റെ മാതാപിതാക്കൾ വേര‍പിരിഞ്ഞു. ഞങ്ങൾ 7 മക്കളാണ്, അതിൽ 5 പോർ ആണ്‍കുട്ടികളും "

ഇങ്ങനെ ആരുടെയുംകണ്ണ് നനയിക്കുന്ന കുറെ കുറിപ്പുകൾ. അതോടൊപ്പം "ടീച്ചർ വിചാരിക്കുന്നതിലും സ്മാർട്ടാണ് ഞാൻ " എന്നുള്ള രസകരമായ എഴുത്തുകളും ഉണ്ടായിരുന്നു.

കെയ്‌ലി ഷ്വാട്സ് അടുത്തിടെയാണ് “I Wish My Teacher Knew: How One Question Can Change Everything For Our Kids,” എന്ന പുസ്തകം പ്രകാശനം ചെയ്തത്. മാതാപിതാക്കളും അധ്യാപകരും വിദ്യാർഥികളും തമ്മിലുണ്ടാകേണ്ട ആശയവിനിമയത്തെക്കുറിച്ചും നല്ല ബന്ധത്തെക്കുറിച്ചും അവർ ഇതിൽ വ്യക്തമായിപ്പറയുന്നു. സ്നേഹിക്കപ്പെടുകയും പരിഗണിക്കപ്പെടുകയും ചെയ്തില്ലെങ്കിൽ കുട്ടികൾക്ക് പഠിക്കാൻ പോലും സാധിക്കില്ലെന്ന് കെയ്​ലി പറയുന്നു. മാതാപിതാക്കളാണ് കുട്ടികളുടെ ആദ്യത്തെ അധ്യാപകർ. അവർ തന്നെയാണ് കുട്ടികളുടെ മികച്ച അധ്യാപകരും. അതുകൊണ്ട് തന്നെ അവർ എന്നും എപ്പോഴും കുട്ടികളോട് ചേർന്നു നിൽക്കണം എന്നും കെയ്‌ലി പറയുന്നു.

ആൺകുട്ടികളുള്ള അമ്മമാർ അറിയാൻ 10 കാര്യങ്ങൾ!

അമ്മമാർക്കെന്നും ടെൻഷനാണ്, ആൺകുട്ടിയായാലും പെണ്‍കുട്ടിയായാലും വളർന്നുവലുതായി ഒരു കരയ്ക്കെത്തിക്കുന്നത് വരെ അവർക്ക് ആധിയാണ്. നല്ല ഭക്ഷണവും വിദ്യാഭ്യാസവും മാത്രം നല്കിയാൽ പോര നല്ല മൂല്യങ്ങളും പകർന്നു നൽകാൻ അമ്മമാർ പ്രത്യേകം ശ്രദ്ധിക്കാം. പെൺകുട്ടികൾക്കും അമ്മമാർക്കുമൊക്കെ ധാരാളം ടിപ്സുകൾ പലരും പറയാറുണ്ട്. അതുപോലെ ആൺകുട്ടികളുടെ അമ്മമാർക്കായി ഇതാ 10 സൂപ്പർ ടിപ്സുകള്‍.

1. പെൺകുട്ടികളോട് എങ്ങനെ പെരുമാറണമെന്നും അവരെ എങ്ങനെ ബഹുമാനിക്കണമെന്നും അവർക്ക് പറഞ്ഞു കൊടുക്കാം. ശാരീരികമായി പെണ്‍കുട്ടികൾ അവരെക്കാൾ അശക്തരായിരിക്കാം, പക്ഷേ മാനസികമായി പെൺകുട്ടികൾ വളരെ ഉയരത്തിലാണെന്ന് അവർ മനസിലാക്കട്ടെ.

2. ഒട്ടുമിക്ക ആൺകുട്ടികളും എല്ലാക്കാര്യങ്ങളും അമ്മമാരോട് പങ്കുവയ്ക്കാറില്ല. എന്നാൽ അവരുടെ കണ്ണിലേയക്ക് നോക്കൂ, അവർക്കെന്തോ പറയാനില്ലേ? അങ്ങനെയുള്ള സന്ദർഭങ്ങളിൽ ശാന്തരായി സ്നേഹപൂർവം അവർക്കരികിലൊന്ന് ഇരുന്നു നോക്കൂ, അപ്പോളറിയാം വ്യത്യാസം.

3.അവരുടെ നല്ലഗുണങ്ങളെ അംഗീകരിക്കുക. നല്ല പ്രവർത്തിചെയ്താൽ അഭിനന്ദിക്കാനും മടിക്കണ്ട.

4.അവൻ നിങ്ങൾക്കെത്ര പ്രിയപ്പെട്ടവനാണെന്ന് ഇടയ്ക്കിടെ ഓർമ്മിപ്പിക്കാം. എത്ര അലമ്പനാണെങ്കിലും " നീ ഒന്ന് സ്കൂളിലേയ്ക്ക് പോയാൽ എന്ത് സമാധാനം കിട്ടും' എന്നൊന്നും അവരോട് ഒരിക്കലും പറയരുത്. അത്തരം വാക്കുകൾ അവരിൽ ഉണ്ടാക്കുന്ന ആഘാതം എത്ര വലുതാണെന്നോ.

5. അമ്മയ്ക്ക് നിന്നെ ഒരുപാട് ഇഷ്ടമാണെന്ന് ഇടയ്ക്കിടെ പറയാം. ഇടയ്ക്കിടയ്ക്ക് സർപ്രൈസ് നിറച്ച് കത്തിലൂടെയോ മേശപ്പുറത്ത് വെച്ച കുറിപ്പിലൂടെയോ ഒക്കെയാകാം.

6.അർഹിക്കുന്നവർക്ക് നിറഞ്ഞ മനസോടെ കൊടുക്കാനും നന്ദി പറഞ്ഞുകൊണ്ട് സ്വീകരിക്കാനും, മറ്റുള്ളവരോട് അനുകമ്പയോടും ബഹുമാനത്തോടും പെരുമാറാൻ പഠിപ്പിക്കാം.

7.വീടിന്റെയും അലമാരയുടേയുമൊക്കെ താക്കോൾ നിങ്ങളുടെ കൈയ്യിലല്ലേ , അതുപോലെ വീട്ടിലെ ഡിജിറ്റൽ ഉപകരണങ്ങളുടെ പാസ്വേഡുകളും നിങ്ങളുടെ കൈയ്യിൽ തന്നെയാകട്ടെ.

8. ആൺകുട്ടികൾ നിങ്ങളുടെ എതിൽ ലിംഗത്തിൽപ്പെട്ടവരാണെന്ന ബോധം വേണം. അവരുടെ ചിന്തയും പ്രവർത്തികളും തികച്ചും വ്യത്യസ്തമായിരിക്കും. ചിലപ്പോൾ നിങ്ങൾക്കവരെ മനസിലാക്കാൻ സാധിച്ചെന്നു വരില്ല.

9. അവരുടെ അദ്ധ്യാപകരുമായി നല്ല ബന്ധം സൂക്ഷിക്കുക. കൂട്ടുകാരെ അറിയുക, അവർ പോകുന്നതെവിടെയൊക്കെയെന്ന് നിങ്ങളും അറിഞ്ഞിരിക്കുക.

10. ലോകത്തിലുള്ള, അവൻ നേരിടാനിടയുള്ള എല്ലാ ചതിക്കുഴികളെക്കുറിച്ചും അതിനെ പ്രതിരോധിക്കാനുള്ള വിദ്യകളും പറഞ്ഞു മനസിലാക്കാം.

പ്രായമേറിയ അമ്മമാർക്ക് ഒരു സന്തോഷവാർത്ത!

കൂട്ടുകാരുടെ അമ്മയെക്കണ്ടാൽ ചേച്ചിയാണെന്നേ തോന്നൂ. എന്റെ അമ്മയെക്കണ്ടോ തലയൊക്കെ നരച്ച്, ദേഹമൊക്കെ ചുളിഞ്ഞ് എന്നു സങ്കടപ്പെടുന്നവർ കേട്ടോളൂ. നിങ്ങൾ അമ്മയോട് താങ്ക്‌സ് പറയണം. കാരണം പ്രായമായ അമ്മമാർക്ക് പിറക്കുന്ന കുട്ടികൾ കൂടുതൽ സ്മാർട്ടാണെന്ന് കണ്ടെത്തിക്കഴിഞ്ഞു. പ്രായമേറിയ അമ്മമാരുടെ കുഞ്ഞുങ്ങൾക്ക് ആരോഗ്യം കുറവായിരിക്കുമെന്ന മുൻ ധാരണകളെയും പഠനങ്ങളെയും തള്ളുന്നതാണ് അമേരിക്കയിൽ അടുത്തിടെ നടത്തിയ പുതിയ പഠനം.

ഇന്റർനാഷനൽ ജേണൽ ഓഫ് എപ്പിഡെമ്യോളജിയിലാണ് പ്രായമേറുന്ന അമ്മമാർക്ക് ആശ്വാസം പകരുന്ന പഠനം വന്നിരിക്കുന്നത്. കാലത്തിന്റെ മാറ്റത്തിന്റെ പ്രതിഫലനമാണ് റിപ്പോർട്ടിലുമുള്ളത്. നാൽപതു വർഷം മുൻപത്തെ മുതിർന്ന അമ്മമാരെക്കാൾ, മാനസികമായും പ്രായോഗികമായും വിദ്യാഭ്യാസപരമായും ഏറെ മുന്നിലാണ് ഇന്നത്തെ മുപ്പത്തഞ്ചോ നാൽപതോ വയസ്സിൽ അമ്മമാരാകുന്ന യുവതികൾ. അവർക്കു പിറക്കുന്ന കുഞ്ഞുങ്ങൾ പ്രായം കുറഞ്ഞ അമ്മമാരുടെ കുഞ്ഞുങ്ങളെക്കാൾ കാര്യങ്ങളിൽ ധാരണയുള്ളവരായിരിക്കും.

പത്തോ പതിനൊന്നോ വയസ്സിലെത്തിയ കുട്ടികളെയാണ് നിരീക്ഷിച്ചത്. 1958ലും 1970ലും നടത്തിയ പഠനങ്ങളിൽ 25നും 29നും ഇടയിൽ പ്രായമായ അമ്മമാരുടെ മക്കൾക്കായിരുന്നു 35നും 39നും ഇടയിൽ പ്രായമായ അമ്മമാർക്കു പിറക്കുന്ന കുട്ടികളെക്കാൾ കാര്യശേഷി. എന്നാൽ പുതിയ പഠനത്തിൽ ഇതിൽ മാറ്റം വന്നു. ലണ്ടൻ സ്‌കൂൾ ഓഫ് എക്കണോമിക്‌സ് ആൻഡ് പൊളിറ്റിക്കൽ സയൻസിലെ ആലിസ് ഗോസിസ് ആണ് പഠനത്തിനു നേതൃത്വം നൽകിയത്.

കടപ്പാട്-മനോരമ ഓണ്‍ലൈന്‍.കോം

3.2380952381
നിങ്ങളുടെ നിര്‍ദ്ദേശം പോസ്റ്റ് ചെയ്യുക

(നിങ്ങള്‍ക്ക് അന്വേഷണങ്ങള്‍ പോസ്റ്റ് ചെയ്യുകയോ ചര്‍ച്ച ചെയ്യുകയോ ചേര്‍ക്കുകയോ ചെയ്യാം)

Enter the word
നവിഗറ്റിഒൻ
Back to top