നടുവേദന - ജീവിതശൈലിയിലൂടെ

നടുവേദന

പ്രായമേറുന്നുവെന്നു നമ്മോടു പറയാൻ ശരീരത്തിന് ഒട്ടേറെ വഴികളുണ്ട്. പ്രായം നമുക്കു വിവിധ രോഗങ്ങൾ സമ്മാനിക്കുന്നു. ഇതിലൊന്നാണു നടുവേദന. പക്ഷേ ഒരൽപം ശ്രദ്ധ വച്ചാൽ നടുവേദന പിടിപെട്ടില്ലാത്തവർക്ക് അതുണ്ടാകാതെ നോക്കാൻ പറ്റും. ഭാരം പൊക്കുമ്പോഴും, കുനിയുമ്പോഴും, നടക്കുമ്പോഴും ഇരിക്കുമ്പോഴും ഒക്കെ ഒരൽപം കരുതൽ, ശ്രദ്ധ കൊടുത്താൽ അതെളുപ്പമായി. 

∙ നടുവിനും കഴുത്തിനും ആഘാതമേൽപിക്കുന്ന കാര്യങ്ങൾ ചെയ്തുകൂടാ. കംപ്യൂട്ടർ ഉപയോഗം നമുക്കിടയിൽ ഏറിവരികയാണ്. കംപ്യൂട്ടറിനു മുന്നിൽ ഇരിക്കുമ്പോൾ സ്ക്രീൻ വ്യക്തമായി കാണാൻ തല മുന്നോട്ടോ പിന്നോട്ടോ ആഞ്ഞുപിടിക്കുന്നത് കഴുത്തിനും നടുവിനും നല്ലതല്ല. നിവർന്നിരുന്നു വേണം കംപ്യൂട്ടർ ഉപയോഗിക്കേണ്ടത് 

∙ കസേരയുടെ അറ്റത്തിരിക്കുന്നതും നടുവിനു താങ്ങുകൊടുക്കാതെ കസേരയിലിരിക്കുന്നതും നടുവേദനയുണ്ടാക്കാൻ ഇടയാക്കും 

∙ ഫോൺ തലയ്ക്കും തോളിനുമിടയിൽ വച്ച് സംസാരിക്കുന്നതു കഴുത്തിനു വേദനയുണ്ടാക്കും. ഫോൺ കൈകൊണ്ടു പിടിച്ചു തന്നെ സംസാരിക്കണം. 

∙ടൈപ്പു ചെയ്യുമ്പോൾ കീബോർഡ് അധികം ഉയരത്തിൽ ഇരിക്കുന്നതും താഴ്ന്നിരിക്കുന്നതും നല്ലതല്ല. രണ്ടിനും മധ്യേയായിരിക്കണം കീബോർഡിന്റെ സ്ഥാനം. 

∙ ഒരു മണിക്കൂറിലേറെ ഒരിടത്തിരിക്കുന്നതും നല്ലതല്ല. കുറഞ്ഞത് ഒരു മണിക്കൂർ കൂടുമ്പോഴെങ്കിലും അഞ്ചു മിനിറ്റ് സമയത്തേക്ക് എഴുന്നേറ്റു നടക്കണം. 

∙ ഫോം മാട്രസുകളും ഫോം കൊണ്ടുള്ള കിടക്കകളും നടുവേദനക്കാർക്കു നല്ലതല്ല. വേദനയില്ലാത്തവർക്കും സ്ഥിരമായ കിടപ്പ് രോഗമുണ്ടാക്കാൻ ഇടയുണ്ട്. ഉറപ്പാർന്ന പരുത്തിക്കിടക്കയോ, കയർ മാട്രസോ ആണു നല്ലത്. 

∙ തറയിലോ തടിക്കട്ടിലിലോ ഒന്നും വിരിക്കാതെ കിടന്നുറങ്ങുന്നതും നല്ലതല്ലെന്നാണു വിദഗ്ധാഭിപ്രായം

മുപ്പത്തഞ്ചു വയസു കഴിഞ്ഞാൽ നടുവേദന!

നടുവിനു കൊളുത്തി വലിക്കുന്നതുപോലുള്ള വേദന അപ്രതീക്ഷിതമായെങ്കിലും അനുഭവിച്ചിട്ടില്ലാത്തവർ ചുരുക്കമായിരിക്കും. ശ്വാസോച്ഛ്വാസം ചെയ്യുമ്പോൾ പോലും മിന്നൽ പോലുള്ള ഈ കഠിന നൊമ്പരം അനുഭവിച്ചിട്ടില്ലാത്തവർ ഭാഗ്യവാന്മാർ. നട്ടെല്ലിലോ ബന്ധപ്പെട്ട പേശികളിലോ സന്ധികളിലോ ഉണ്ടാകുന്ന ഏതെങ്കിലും രോഗത്തിന്റെ ലക്ഷണമാണു നടുവേദന. നടുവിന്റെ താഴ്ഭാഗത്ത് ഉണ്ടാകുന്നതാണ് നടുവേദനയിൽ കൂടുതലും. 

നടുവേദന വരാൻ സാധ്യതയുള്ളവർ 
മുപ്പത്തഞ്ചു വയസു കഴിഞ്ഞാൽ നടുവേദനയ്ക്കുള്ള സാധ്യത കൂടുന്നു. എല്ലുകളുടെ ബലം കുറഞ്ഞു തുടങ്ങുകയും പേശികളുടെ ഇലാസ്തികത കുറയുകയും ചെയ്യുന്നതാണു കാരണം. നട്ടെല്ലിലെ ഡിസ്കുകളിലെ ജലാംശം കുറയുന്നതു മൂലം വ‌ഴക്കം കുറഞ്ഞ് നടുവേദന വരാം. 

നടുവേദന വരാൻ സാധ്യതയുള്ളവർ 
∙ സ്ഥിരമായി ഇരുന്നും നിവർന്നും ജോലിചെയ്യുന്നവർ 
∙ അമിതഭാരം ചുമക്കുന്നവർ 
∙ വ്യായാമം ചെയ്യാത്തവർ 
∙ നടക്കുമ്പോഴും ഇരിക്കുമ്പോഴും കിടക്കുമ്പോഴും ശരിയായ ശാരീരിക നില പാലിക്കാത്തവർ 
∙ നട്ടെല്ലിനു വൈകല്യമുള്ളവർ 
∙ അമിത വണ്ണമുള്ളവർ, കുടവയറുള്ളവർ 
∙ ഹൈഹീൽഡ് ചെരിപ്പ് ഉപയോഗിക്കുന്നവർ (രണ്ടു സെന്റീമീറ്ററിൽ കൂടുതൽ ഹീലുള്ളവ) 
∙ അണുബാധ, അർബുദം തുടങ്ങിയവ നട്ടെല്ലിനെ ബാധിച്ചവർ, ആന്തരികാവയവങ്ങൾക്ക് അസുഖം ബാധിച്ചവർ 
∙ അസ്ഥിക്ഷയം (ഓസ്റ്റിയോപൊറോസിസ്) പിടിപെട്ടവർ 
∙ ഗർഭിണികൾ 
∙ പുകവലിക്കുന്നവർ 
∙ മാനസികസമ്മർദ്ദമുള്ളവർ

വ്യായാമം ശീലമാക്കിയാൽ നടുവേദന തടയാം

നട്ടെല്ലിലെ അസ്ഥികളുടെ ചലനശേഷി നിലനിർത്താനും പേശികളുടെ ബലം കൂട്ടാനും അമിതവണ്ണവും കുടവയറും കുറയ്ക്കാനും വ്യായാമങ്ങൾ ചെയ്യുന്നതു ശീലമാക്കണം. 

മലർന്നു കിടന്നുകൊണ്ട് ഒരു കാൽ ഉയർത്തുക. പിന്നീട് രണ്ടു കാലുകളും തൊണ്ണൂറു ഡിഗ്രി ഉയർത്തുക. ഇത് അഞ്ചു തവണ ആവർത്തിക്കുക. 

നേരേ നിന്നശേഷം കാൽമുട്ടു മടക്കാതെ കുനിച്ച് കൈവിരലുകൾ നിലത്തു തൊടുന്നതും നല്ല വ്യായാമമാണ്. നടുവേദന തടയാൻ ഏതു പ്രായത്തിലും ചെയ്യാവുന്ന ലളിതമായ ധാരാളം വ്യായാമങ്ങളുണ്ട്. ഡോക്ടറുടെ നിർദേശപ്രകാരം അവരവർക്കു യോജിച്ചതു തിരഞ്ഞെടുക്കുക. 

മാനസിക സമ്മർദ്ദമുള്ളവരിൽ നടുവേദന പെട്ടെന്നു വരുന്നതായി കാണുന്നു. അവരുടെ നടപ്പിലും ഇരിപ്പിലും ശാരീരിക നില മാറുന്നതാണു കാരണം. ഇവരിൽ നടുവേദന മാറാനും കൂടുതൽ സമയമെടുക്കും.

ജീവിതശൈലിയിൽ ശ്രദ്ധിച്ചാൽ നടുവേദന തടയാം

ജീവിതശൈലിയിൽ അൽപം ശ്രദ്ധിച്ചാൽ നടുവേദന വരുന്നത് മിക്കവാറും തടയാം. 

ശരിയായ ശാരീരിക നില പാലിക്കുക എന്നതാണ് ഏറ്റവും പ്രധാനം ദീർഘനേരം ഇരുന്നു ജോലി ചെയ്യുന്നവർ നടുവിനു താങ്ങു കിട്ടുന്ന രീതിയിലുള്ള കസേരകൾ ഉപയോഗിക്കണം. നടുവിന് സപ്പോർട്ട് കിട്ടുന്ന വിധത്തിൽ കുഷ്യൻ വയ്ക്കണം. നടുവിനു താങ് കിട്ടാത്ത വിധത്തിൽ മുമ്പോട്ടു ചാഞ്ഞിരുന്ന് ജോലി ചെയ്യരുത്. 

അര മണിക്കൂറിലോ ഒരു മണിക്കൂർ കഴിയുമ്പോഴോ എഴുന്നേറ്റു നിൽക്കുക. കസേരയിൽ ഇരുന്നു തന്നെ കൈകാലുകൾക്ക് അയവ് കിട്ടുന്ന വ്യായാമങ്ങൾ ചെയ്യാം. ഇരു കൈകളും പരസ്പരം കോർത്തു പിടിച്ച് മുന്നോട്ടു നീട്ടിവലിച്ചു പിടിച്ചിട്ട് മെല്ലെ അയച്ചിടുക. കസേരയിൽ ഇരുന്നു തന്നെ കാലുകളും നീട്ടിയും മടക്കിയും വ്യായാമം ചെയ്യാം. 

ദീർഘനേരം വാഹനം ഓടിക്കുന്നവരും നടുവിന് ഒരു കുഷ്യൻ താങ്ങായി വയ്ക്കണം. നിങ്ങളുടെ ഇരിപ്പിടം സ്റ്റിയറിങ് വീലിനോട് ആവശ്യത്തിന് അടുത്തിട്ടുണ്ടെന്ന് ഉറപ്പു വരുത്തുകയും ചെയ്യുക ദീർഘനേരം നിന്നു ജോലിചെയ്യുന്നവർ ഉയരം കുറഞ്ഞ പീഠത്തിൽ ഇടയ്ക്കു ഇരുകാലുകളും കയറ്റി വയ്ക്കുക.

നടുവേദനയോ... ഈ കാര്യങ്ങൾ ശ്രദ്ധിക്കൂ

പ്രായമേറുന്നുവെന്നു നമ്മോടു പറയാൻ ശരീരത്തിന് ഒട്ടേറെ വഴികളുണ്ട്. പ്രായം നമുക്കു വിവിധ രോഗങ്ങൾ സമ്മാനിക്കുന്നു. ഇതിലൊന്നാണു നടുവേദന. പക്ഷേ ഒരൽപം ശ്രദ്ധ വച്ചാൽ നടുവേദന പിടിപെട്ടില്ലാത്തവർക്ക് അതുണ്ടാകാതെ നോക്കാൻ പറ്റും. ഭാരം പൊക്കുമ്പോഴും, കുനിയുമ്പോഴും, നടക്കുമ്പോഴും ഇരിക്കുമ്പോഴും ഒക്കെ ഒരൽപം കരുതൽ, ശ്രദ്ധ കൊടുത്താൽ അതെളുപ്പമായി. 

∙ നടുവിനും കഴുത്തിനും ആഘാതമേൽപിക്കുന്ന കാര്യങ്ങൾ ചെയ്തുകൂടാ. കംപ്യൂട്ടർ ഉപയോഗം നമുക്കിടയിൽ ഏറിവരികയാണ്. കംപ്യൂട്ടറിനു മുന്നിൽ ഇരിക്കുമ്പോൾ സ്ക്രീൻ വ്യക്തമായി കാണാൻ തല മുന്നോട്ടോ പിന്നോട്ടോ ആഞ്ഞുപിടിക്കുന്നത് കഴുത്തിനും നടുവിനും നല്ലതല്ല. നിവർന്നിരുന്നു വേണം കംപ്യൂട്ടർ ഉപയോഗിക്കേണ്ടത് 

∙ കസേരയുടെ അറ്റത്തിരിക്കുന്നതും നടുവിനു താങ്ങുകൊടുക്കാതെ കസേരയിലിരിക്കുന്നതും നടുവേദനയുണ്ടാക്കാൻ ഇടയാക്കും 

∙ ഫോൺ തലയ്ക്കും തോളിനുമിടയിൽ വച്ച് സംസാരിക്കുന്നതു കഴുത്തിനു വേദനയുണ്ടാക്കും. ഫോൺ കൈകൊണ്ടു പിടിച്ചു തന്നെ സംസാരിക്കണം. 

∙ടൈപ്പു ചെയ്യുമ്പോൾ കീബോർഡ് അധികം ഉയരത്തിൽ ഇരിക്കുന്നതും താഴ്ന്നിരിക്കുന്നതും നല്ലതല്ല. രണ്ടിനും മധ്യേയായിരിക്കണം കീബോർഡിന്റെ സ്ഥാനം. 

∙ ഒരു മണിക്കൂറിലേറെ ഒരിടത്തിരിക്കുന്നതും നല്ലതല്ല. കുറഞ്ഞത് ഒരു മണിക്കൂർ കൂടുമ്പോഴെങ്കിലും അഞ്ചു മിനിറ്റ് സമയത്തേക്ക് എഴുന്നേറ്റു നടക്കണം. 

∙ ഫോം മാട്രസുകളും ഫോം കൊണ്ടുള്ള കിടക്കകളും നടുവേദനക്കാർക്കു നല്ലതല്ല. വേദനയില്ലാത്തവർക്കും സ്ഥിരമായ കിടപ്പ് രോഗമുണ്ടാക്കാൻ ഇടയുണ്ട്. ഉറപ്പാർന്ന പരുത്തിക്കിടക്കയോ, കയർ മാട്രസോ ആണു നല്ലത്. 

∙ തറയിലോ തടിക്കട്ടിലിലോ ഒന്നും വിരിക്കാതെ കിടന്നുറങ്ങുന്നതും നല്ലതല്ലെന്നാണു വിദഗ്ധാഭിപ്രായം

കൃത്യമായ വ്യായാമമാണു നടുവേദന അകറ്റാനുള്ള മികച്ച മാർഗം

കൃത്യമായ വ്യായാമമാണു നടുവേദന അകറ്റാനുള്ള മികച്ച മാർഗമെന്നു പഠനങ്ങൾ തെളിയിക്കുന്നു. പുറത്തെയും വയറ്റിലെയും മസിലുകൾ ബലപ്പെടുത്താനു വഴക്കമുള്ളതാവാനും വ്യായാമം സഹായകരമാണ്. കടുത്ത നടുവേദന അകറ്റാൻ ദിവസവും വ്യായാമം ചെയ്താൽ മതിയെന്നു സ്വീഡനിൽ നടന്ന ഗവേഷണത്തിൽ തെളിഞ്ഞിട്ടുണ്ട്. 

പക്ഷേ വ്യായാമം മുടങ്ങാതെ ചെയ്യുകയെന്നതാണു പ്രധാനം. വ്യായാമ മുറകൾ നിർത്താതെ ചെയ്യാനാകുമെന്ന് ഉറപ്പില്ലാത്തവർ അതു ചെയ്യുകയുമരുത്. തുടങ്ങിയിട്ട് ഇടയ്ക്കുവച്ചു നിർത്തിയാൽ രോഗാവസ്ഥ ഗുരുതരമാക്കാൻ അതിടയാക്കും. യോഗാഭ്യാസത്തിലോ വ്യായാമമുറകളിലോ വൈദഗ്ധ്യം തേടിയവരുടെ അഭിപ്രായം ആരാഞ്ഞശേഷം അവരുടെ നിർദേശാനുസരണം ഓരോരുത്തർക്കും യോജിച്ച വ്യായാമമുറ അനുഷ്ഠിക്കണമെന്നു വിദഗ്ധ ഫിസിയോ തെറാപ്പിസ്റ്റുമാർ പറയുന്നു. 

വ്യായാമത്തിൽ മാത്രമല്ല ഭാരമുള്ള വസ്തുക്കൾ ഉയർത്തുമ്പോഴും ശ്രദ്ധിക്കാനുണ്ട്. ഭാരമുള്ള വസ്തുക്കൾ ഉയർത്താനായി നിന്നനിൽപിൽ കുനിയരുത്. മുട്ട് മടക്കിവച്ചു വേണം എടുക്കാൻ. മാത്രമല്ല വസ്തു ശരീരത്തോട് അടുപ്പിച്ചു പിടിക്കുകയും വേണം. ശരീരത്തിന്റെ ഒരു വശത്തേക്കു മാത്രമായി ഭാരം കൂടുതൽ താങ്ങുകയുമരുത്. പകരം രണ്ടു വശത്തേക്കും തുല്യമായി ഭാരം താങ്ങണം. അരക്കെട്ടിൽ നിന്നു കുനിയാതെ മുട്ടുമടക്കി ഇടിക്കുന്നതുപോലെയാക്കിയശേഷം ഉയർത്തുന്നതാണ് അഭികാമ്യം.. 

ഭാരമുള്ള വലിയ വസ്തുക്കൾ വലിച്ചടുപ്പിക്കുകയോ വലിച്ചിഴയ്ക്കുകയോ ചെയ്യുന്നതിനു പകരം തള്ളിക്കൊണ്ടു പോകുകയാണ് ഉചിതം. ശരീരഭാരം ഒരുപോലെ നിലനിർത്താനും ശ്രദ്ധിക്കണം. വണ്ണം കൂടുമ്പോൾ സ്വാഭാവികമായും വയറും ചാടും. വയറ്റിൽ ഒരു കിലോ ഭാരം കൂടുന്നത് നട്ടെല്ലിനെ രണ്ടരശതമാനം അധികഭാരമെടുപ്പിക്കാൻ ഇടയാക്കും. 

പുകവലി ഒഴിവാക്കേണ്ടതാണ് മറ്റൊരു കാര്യം 
വളഞ്ഞുകുത്തിയും ചാഞ്ഞും ചരിഞ്ഞും നിൽക്കുന്നതും ദോഷകരമാണ്. തലയുയർത്തിപ്പിടിച്ച് നിവർന്നു നിൽക്കാനും നിവർന്നിരിക്കാനും ശ്രദ്ധിക്കണം. കൃത്യമായ വ്യായാമമുറകളും ശരിയായ നടപ്പും ഇരിപ്പും ഭാരം ഉയർത്തലുമെല്ലാംകൊണ്ടു നടുവേദനനയെ പമ്പ കടത്താമെന്നും വിദഗ്ധർ പറയുന്നു.

വെട്ടിച്ചു നടക്കാം നടുവേദനയെ

ഹൃദ്രോഗം, പുകവലിയുടെ ദോഷവശങ്ങൾ തുടങ്ങി നമുക്കറിയാവുന്ന കാര്യങ്ങൾ ഏറെയുണ്ട്. എന്നാൽ വളരെ സാധാരണമായ നടുവേദന എന്ന അസുഖം നമ്മിൽ പലരും അനുഭവിക്കുന്നുണ്ടെങ്കിലും തീരെ ബുദ്ധിമുട്ടിലാകുമ്പോൾ മാത്രമേ അതു ഗൗരവമായി എടുക്കാറുള്ളൂ. അൽപം ശ്രദ്ധിച്ചാൽ നമുക്ക് ഈ അസുഖത്തിൽ നിന്ന് ഒഴിഞ്ഞു നിൽക്കാൻ കഴിയും. അതിനുള്ള ശ്രമം വേണമെന്നുമാത്രം. 

നടുവു സംരക്ഷണത്തിൽ ശ്രദ്ധിക്കാവുന്ന ചില കാര്യങ്ങളിതാ 
ഇരിക്കുക, കിടക്കുക, നിൽക്കുക, നടക്കുക, തുടങ്ങിയവയെല്ലാം ദൈനംദിന ജീവിതത്തിൽ ഒഴിച്ചു കൂടാൻ പറ്റാത്തവയാണ്. പലരും ഓഫീസ് ജോലികൾ ചെയ്യുന്നവരും. ഓഫിസ് ജോലിയിൽ പലപ്പോഴും മണിക്കൂറുകളോളം ഒരേ ഇരിപ്പ് ഇരിക്കേണ്ടിയും വരും. നടുവിന് ഏറ്റവും പ്രയാസം ഉണ്ടാക്കുന്നതാണ് ഇരിപ്പ്. നീണ്ടു നിൽക്കും തോറും നടുവിനു കൂടുതൽ ജോലിയാകും. അതുകൊണ്ടുതന്നെ തുടർച്ചയായ ഇരിപ്പിന് ഇടയ്ക്കിടെ അൽപ സമയം വിരാമം കൊടുക്കുന്നത് നല്ലതാണ്. ഒരു മണിക്കൂർ കഴിയുമ്പോൾ 10 മിനിറ്റ് നടക്കുകയോ നിൽക്കുകയോ വേണം. 

കസേരയാണു നടുവേദന ഉണ്ടാക്കുന്ന പ്രധാന വില്ലൻ. മിക്ക കസേരകളുടെയും പിറകുവശം ഒരേ നിരപ്പിൽ ഉള്ളതായിരിക്കും.ഇത്തരം കസേരകളിൽ ഇരിക്കുമ്പോൾ നട്ടെല്ലിന്റെ ഒരു ഭാഗത്തിന് ആവശ്യമായ താങ്ങു കിട്ടാതെ പോകുന്നു. മിക്കപ്പോഴും നട്ടെല്ലിനും കസേരയുടെ പിൻവശത്തിനും ഇടയിലുള്ള ഈ വിടവ് ഒരു കൈ കടത്താൻ പാകത്തിലുള്ളതാകും. ഈ ഭാഗത്ത് ഒരു ചെറിയ കുഷൻ വച്ചുകൊടുത്താൽ നടുവിനു താങ്ങാകും. ഈ പ്രശ്നം ഒഴിവാക്കുന്ന നല്ല ഇനം കസേരകൾ ഇപ്പോൾ വിപണിയിൽ ലഭ്യമാണ്.

കിടപ്പ് നടുവിന് ഏറ്റവും നല്ലത്

നടുവിന് ഏറ്റവും താങ്ങുകിട്ടുന്നതു മലർന്നുകിടക്കുമ്പോഴാണ് കമിഴ്ന്നുകിടക്കുന്ന ശീലമുള്ളവർ അതു മാറ്റിയേ മതിയാവൂ. കമിഴ്ന്നു കിടക്കുന്നതു നടുവിനു ബുദ്ധിമുട്ടുണ്ടാക്കുകയും ക്രമേണ നടുവേദനയ്ക്കു കാരണമാകുകയും ചെയ്യും. കിടക്ക ഉറപ്പുള്ളതാകണം. 

കിടക്കയിൽ നിന്ന് എഴുന്നേൽക്കുമ്പോഴും ശ്രദ്ധിക്കണം. ആദ്യം ഒരുവശത്തേക്കു ചരിഞ്ഞു കിടന്ന ശേഷം എഴുന്നേൽക്കുക. കുറേനേരത്തെ വിശ്രമത്തിനുശേഷം നടുവിലേക്കു കൂടുതൽ സമ്മർദം പെട്ടെന്നു വരുന്നതു നല്ലതല്ല. അതുകൊണ്ടുതന്നെ ഒരുവശം ചരിഞ്ഞുകിടന്നതിനുശേഷം എഴുന്നേൽക്കുന്നതാണു ഗുണകരം. 

ഭാരമുള്ള വസ്തുക്കൾ എടുത്തുയർത്തുക. ഭാരമുള്ള വസ്തുക്കളുമായി നടക്കുക. കുനിഞ്ഞുനിന്നു ജോലി ചെയ്യുക. തുടങ്ങിയവയൊക്കെയാണു നടുവേദന ഉണ്ടാക്കുന്ന മറ്റു ഘടകങ്ങൾ. അറയിൽ നിന്ന് ഒരു ഭാരവസ്തു ഉയർത്തേണ്ടപ്പോൾ ചില കാര്യങ്ങൾ ശ്രദ്ധിക്കുക. 

കുനിഞ്ഞു നിന്ന് അത് ഉയർത്തുന്നതിനു പകരം ഇടുപ്പും കാൽമുട്ടും കൂടുതലായി ഉപയോഗിക്കുക. അതായതു മുട്ടുകുത്തി ഇരുന്നുകൊണ്ടു ഭാരം പൊക്കുക. ഭാരോദ്വഹന മത്സരക്കാർ ചെയ്യുന്നതു ശ്രദ്ധിച്ചിട്ടില്ലേ. അതുപോലെതന്നെ അതുപോലെ ഭാരവസ്തുക്കളുമായി നടന്നു നീങ്ങേണ്ടി വരുമ്പോൾ ഭാരം ദേഹത്തോടു കഴിയുന്നത്ര ചേർത്തുവയ്ക്കുക. 

കുനിഞ്ഞു നിൽക്കുന്നത് അത്രയേറെ അപകടകരമല്ല. എന്നാൽ ദിർഘനേരം കുനിഞ്ഞു നിന്നു ജോലി ചെയ്യുന്നതു നല്ലതല്ല ഇത്തരം ജോലി ചെയ്യുന്നവർ കുനിഞ്ഞു നിൽപ് എത്രയും കുറയ്ക്കാനുള്ള മാർഗങ്ങൾ കണ്ടെത്തണം. 

അതുപോലെ സ്ഥിരമായി ഭാരമുയർത്തേണ്ട ജോലി ചെയ്യുന്നവർ നടുവിനു സംരക്ഷണം നൽകുന്ന ബൽറ്റ് ധരിക്കണം. ഒരേ രീതിയിൽ നിന്നോ ഇരുന്നോ ഉള്ള ജോലി ഒഴിവാക്കുകയാണു നടുവേദനയും കഴുത്തുവേദനയും ഒഴിവാക്കാനുള്ള ഏറ്റവും നല്ല മാർഗം . ഇതാണു നടുവു സംരക്ഷണത്തിനായി നമുക്കു ചെയ്യാൻ കഴിയുന്ന ഏറ്റവും നല്ല കാര്യം.

ഒരേ ഇരിപ്പ് ഇരുന്നാൽ കിടപ്പാകും

ചമ്രം പടഞ്ഞിരുന്നു കച്ചവടം നടത്തുന്നതാണ് ഇന്ത്യയിലെ പരമ്പരാഗത രീതി. ഈ രീതി വർഷങ്ങളോളം തുടരുന്നതു നട്ടെല്ലിൽ കണ്ണികൾക്കു കുഴപ്പമുണ്ടാക്കാം. നേരത്തേ പറഞ്ഞതുപോലെ ഇടയ്ക്കിടെ എഴുന്നേറ്റു നടക്കുന്നത് ഇത്തരക്കാർക്കും നല്ലതാണ്. 

നമ്മുടെ വീട്ടമ്മമാർക്കും ഈ സ്വഭാവമുണ്ട് അവരും ഒരേ ഇരിപ്പ് ഒഴിവാക്കണം. ഒരു വിഭാഗം ആളുകൾ തുടർച്ചയായി ഇരുന്നു ജോലി ചെയ്യുന്നവരാണെങ്കിൽ മറ്റൊരു വിഭാഗം നിന്നു ജോലി ചെയ്യാൻ വിധിക്കപ്പെട്ടവരാണ്. നടുവിനെ സംബന്ധിച്ചിടത്തോളം നിൽപാണു കുറേക്കൂടി ഭേദം. 

പൊതുവേ നടപ്പ് നടുവിനു നല്ലതാണ് നടുഭാഗത്തെ പേശികളെ ചലിപ്പിക്കുകയും ശക്തമാക്കുകയും ചെയ്യും.നടക്കുമ്പോൾ പ്രത്യേകിച്ചു ശ്രദ്ധിക്കാനൊന്നുമില്ല. കൂടുതൽ ബലം പിടിച്ചു നടക്കേണ്ടതില്ലെന്നു മാത്രം. ചിലർക്കു കയറ്റം കയറുമ്പോഴും മറ്റും നടുവേദന അധികരിക്കാറുണ്ട്. ഇത്തരക്കാർ കയറ്റം ഒഴിവാക്കി നടക്കുക ജോഗിങ്ങും നല്ലതാണ്.

ഇരുചക്ര വാഹനങ്ങളിൽ യാത്ര ചെയുമ്പോൾ

ഇരുചക്രവാഹനങ്ങളുടെ പിൻസീറ്റിൽ സ്ത്രീകൾ മിക്കവാറും ഒരു വശത്തേയ്ക്ക് കാലുകളിട്ട് ശരീരം മാത്രം ചരിച്ചാണ് ഇരിക്കുക. ഈ നിലയിൽ ദീർഘനേരം ഇരിക്കുന്നതു നടുവിന്റെ സമ്മർദ്ദം കൂട്ടും. കാലുകൾ സീറ്റിന്റെ ഇരുവശവുമിട്ട് ഇരിക്കുന്നതാണു നടുവിനു നല്ലത്. 

നടക്കുമ്പോഴും നിവർന്നു നടക്കണം. തലകുനിച്ച് നടക്കുന്നതു നല്ലതല്ല. വിശ്രമിച്ചാൽ മാറുന്നതാണു സാധാരണയായുള്ള നടുവേദന, ബെഡ്റസ്റ്റാണ് ഏറ്റവും നല്ലത് . വേദന കുറയുന്നില്ലെങ്കിൽ ചികിത്സ ആവശ്യമാണ്. 

കാഠിന്യമുള്ള പ്രതലത്തിൽ കിടക്കുന്നത് നടുവിനു നല്ലതല്ല. പക്ഷേ കിടക്ക ഉറപ്പുള്ളതായിരിക്കണം. നിവർന്നു നിൽക്കുമ്പോൾ നടുവ് എങ്ങനെ ആയിരിക്കുന്നുവോ അതേ നില നൽകുന്ന മെത്തയാണ് കിടക്കുമ്പോഴും നല്ലത്. 

നടുവേദനയുള്ളവർ മലർന്നു കിടക്കുമ്പോൾ നടുവിന്റെ ഭാഗത്തും കമിഴ്ന്നു കിടക്കുമ്പോൾ വയറിനു താഴെയും ചെറിയ തലയണ വയ്ക്കുന്നതു നടുവിനു അധികം ആയാസം ഉണ്ടാകുന്നില്ല. കിടന്നിട്ട് എഴുന്നേൽക്കുമ്പോൾ പെട്ടെന്നു ചാടിയെണീക്കരുത്. ഒരു അരികിലേക്ക് ചരിഞ്ഞ് സാവധാനം കൈകളിൽ ബലമൂന്നി എഴുന്നേൽക്കുക. തലവയ്ക്കുന്നതിനും കനം കുറഞ്ഞ തലയണ ഉപയോഗിക്കുക.

ഭാരം ഉയർത്തുമ്പോൾ ശ്രദ്ധിക്കേണ്ട ചില കാര്യങ്ങൾ

ഭാരം ഉയർത്തുമ്പോൾ ശ്രദ്ധിക്കേണ്ട ചില കാര്യങ്ങൾ ഭാരം ഉയർത്തുമ്പോൾ ശ്രദ്ധിക്കേണ്ട ചില കാര്യങ്ങൾ അമേരിക്കൻ അക്കാദമി ഓഫ് ഓർത്തോപീഡിക് സർജൻസ് നിർദ്ദേശിച്ചിട്ടുണ്ട്. ഭാരം ഉയർത്തുന്നതിനു മുമ്പ് അൽപം പ്ലാനിങ് വേണം. ഭാരം തിടുക്കത്തിൽ ഉയർത്തുമ്പോഴാണു മിക്കവാറും നടുവെട്ടൽ അനുഭവപ്പെടുക. 

ഭാരമെടുക്കും മുമ്പ് ആദ്യം കാലുകൾ തമ്മിൽ അകറ്റി ആവശ്യത്തിന് അകലം ക്രമീകരിക്കുക. 
നട്ടെല്ല് പതുക്കെ മുന്നോട്ട് വളയ്ക്കുക. 
എന്നിട്ട് കാൽമുട്ടുകൾ വളയ്ക്കുക. 
വയറിന്റെ മസിൽ ദൃഢമാക്കി പൊക്കേണ്ട ഭാരം മുറുകെ ഇരുകൈകൊണ്ടും ശരീരത്തോട് ചേർത്ത് പിടിക്കുക. 
തല ഉയർത്തിക്കൊണ്ട് മുതുക് സാവധാനത്തിൽ നിവർത്തുക. 
ഉയരത്തിലുളള ഷെൽഫിലും മറ്റും സാധനം വയ്ക്കുമ്പോഴും ഷെൽഫിനോട് അടുത്ത് നിന്നുവേണം അവ ഉയർത്താൻ . 
നിലമടിക്കാൻ നീളമുള്ള ചൂൽ ഉപയോഗിക്കുക. 
തറ, ഇരുന്ന് തുടയ്ക്കുക. 
തുണികൾ കൂടുതൽ കഴുകാൻ ഉണ്ടെങ്കിൽ നിന്നു ചെയ്യരുത്. ബേസിനിൽ തുണി വച്ച് ഉയരം കുറഞ്ഞ സ്റ്റൂളിൽ ഇരുന്ന് തുണി വൃത്തിയാക്കുക. 
ഭാരമുയർത്തി ശീലമില്ലാത്തവർ അമിതഭാരവും പ്രത്യേക രൂപമില്ലാത്ത കരിങ്കല്ല്, പോലുള്ള സാധനങ്ങളും പൊക്കുമ്പോൾ കൂടുതൽ ആളുകളുടെ സഹായം തേടുക. 
ഒരു സാധനം തള്ളിമാറ്റുമ്പോൾ കാലുകളുടെ ഗതി മാറ്റാതെ ശരീരം വളച്ച് ചെയ്യാൻ ശ്രമിക്കരുത്. 
ഭാരമുള്ള വസ്തുക്കൾ കഴിവതും തള്ളി നീക്കുക.

കടപ്പാട് :മലയാള മനോരമ