ഇതില് ഏതെങ്കിലുമൊരു കൂട്ടു തെരഞ്ഞെടുക്കാം. കൊളസ്ട്രോള്, പ്രമേഹം എന്നിവയുള്ളവര് തേങ്ങാ, ശര്ക്കര എന്നിവയില്ലാത്ത കൂട്ട് ഉപയോഗിക്കണം. ഔഷധകഞ്ഞിച്ചേരുവകള് അങ്ങാടി മരുന്നു കടയില് കിട്ടും.
10 ഗ്രാം ആശാളി 25ഗ്രാം ഉലുവ 100ഗ്രാം ഉണക്കലരി ഇവ കഞ്ഞി വെച്ച് അല്പം നെയ്യ് ചേര്ത്ത് കഴിക്കുക.
100 ഗ്രാം ചെന്നെല്ലരി, ആശാളി, ഉലുവ, ചുക്ക് എന്നിവ ഓരോന്നും 10ഗ്രാം ആവശ്യത്തിനു വെള്ളം ചേര്ത്തു വേവിക്കുക. നല്ലവണ്ണം വെന്തു കഴിഞ്ഞാല് ജീരകപ്പൊടി, തേങ്ങാചിരകിയത്, മഞ്ഞള്പ്പൊടി, കറിവേപ്പില (10ഗ്രാം വീതം) ഇവ അരച്ചുചേര്ത്തു തിളപ്പിച്ചു പഞ്ചകോലചൂര്ണമോ, അഷ്ടചൂര്ണമോ ഒരു ടീസ്പൂണ് ചേര്ത്തു കഴിക്കുക.
പഞ്ചകോലചൂര്ണ്ണം 50ഗ്രാം കിഴികെട്ടി ഒരു പാത്രത്തില് വെള്ളമൊഴിച്ച് ഇടുക. അതില് 250ഗ്രാം അരിയിട്ടു (നവരയരിയോ ഉണക്കലരിയോ) പാചകം ചെയ്യുക. അടുപ്പത്തു നിന്നു വാങ്ങുമ്പോള് കിഴിപിഴിഞ്ഞിട്ടു കഞ്ഞി കുടിക്കുക.
60 ഗ്രാം ചെറുപയര് കഴുകി കരടു കളഞ്ഞ് ഒരു ലിറ്റര് വെള്ളത്തില് കുറുക്കി അരലിറ്ററാക്കുക. ഇത് അരച്ചെടുത്തതില് ഇന്തുപ്പ്, മല്ലി, ചുക്ക് (50 ഗ്രാം) പൊടിച്ചു ചേര്ക്കുക. ആറുമ്പോള് അല്പം മാതളങ്ങാ നീരു ചേര്ത്ത് കറിവേപ്പിലയും ചുവന്നുള്ളിയും പശുവിന് നെയ്യില് വറുത്തു താളിച്ച് ഉപയോഗിക്കുക.
100 ഗ്രം ചെന്നെല്ലരിയിട്ടു പകുതി വേവാകുമ്പോള് ആശാളി, ഉലുവ, ജീരകം, ഏലക്കായ്, അയമോദകം, വിഴാലരി, ചുക്ക് (10 ഗ്രാം വീതം) ഇവ പൊടിച്ചു ചേര്ത്തു കഴിക്കാം. 10 ഗ്രാം തേങ്ങാ ചിരകിയതും ശര്ക്കരയും ചേര്ത്ത് കഴിച്ചാല് വാത, പിത്ത, കഫ ദോഷങ്ങളകലും.
തിളപ്പിച്ചു കുറുക്കിയ പാകത്തില് വേണം കഞ്ഞി ഉപയോഗിക്കുവാന്. മരുന്നു കഞ്ഞി കഴിക്കുമ്പോള് ഭക്ഷണം തന്നെ മരുന്നായി മാറുകയാണ്. വിപണിയിലെ ഏതെങ്കിലും കര്ക്കിടക കഞ്ഞിക്കൂട്ട് വാങ്ങി ഉപയോഗിക്കുന്നതിനു മുമ്പു വൈദ്യ നിര്ദേശം തേടുന്നതു നല്ലതാണ്
മരുന്നുകഞ്ഞി ചൂടോടെ കഴിക്കണം.
ചുക്കും ജീരകവുമിട്ട് തിളപ്പിച്ച വെള്ളം മാത്രം കുടിക്കുക.
ഒരു വര്ഷത്തിലേറെ പഴക്കം ചെന്ന ഗോതമ്പ്, ചെന്നെല്ലരി, നവര തുടങ്ങിയവ വേണം മരുന്നു കഞ്ഞിക്ക് ഉപയോഗിക്കുവാന്.
മരുന്ന് കിഴികെട്ടിയിടുമ്പോള്, കഞ്ഞി വെന്തശേഷം മരുന്നുകിഴി പിഴിഞ്ഞു കഞ്ഞിയില് ചേര്ത്തിട്ടു ചണ്ടി കളയുക.
മഴ ശക്തമായ ദിവസങ്ങളില് വിശപ്പു കൂടും. ആ ദിവസങ്ങില് താഴെപ്പറയുന്ന ഏതെങ്കിലുമൊരു കൂട്ട് രാവിലെ ഒരു നേരം കഴിക്കുക.
1. 10 ഗ്രാം പുളിയും ( മാതളനാരങ്ങയുടെ പുളി ) നെയ്യും പാകത്തിന് ഇന്തുപ്പും ചേര്ത്ത്
കുറുക്കിയ ആഹാരം അല്പം തേന് ചേര്ത്ത് ഒരു നേരം കഴിക്കുന്നതു ഗുണം ചെയ്യും.
2. തുവരച്ചീര,പാകത്തിനു ഉപ്പും 10 ഗ്രാം പഞ്ചകോലചൂര്ണ്ണവും ഒരു ഔണ്സ് തൈരിന്
വെള്ളത്തില് (തൈരിന്റെ തെളി) ചേര്ത്ത് ഉപയോഗിക്കാം.
പകലുറക്കം, അമിതാധ്വാനം, വെള്ളത്തില് കൂടുതല് സമയം നിന്നുള്ള ജോലികള്, തണുത്ത കാറ്റേല്ക്കല് തുടങ്ങിയവ ഒഴിവാക്കണം.
കഴിവതും മത്സ്യവും മാംസവും ഉപേക്ഷിക്കുക.
ചെറു ചൂടുവെള്ളത്തില് കുളിക്കുക.
എപ്പോഴും ചെരുപ്പു ധരിക്കുക.
പുകവലി, മദ്യപാനം എന്നിവ പാടില്ല
ഔഷധയുക്തമായ ദ്രാവകം ശരീരത്തിന്റെ പ്രത്യേകഭാഗത്ത് പ്രവഹിപ്പിക്കുന്ന ചികിത്സയാണു ധാര. നിശ്ചിതമായ ഉയരത്തില് നിന്ന് ആവശ്യമായ സമയത്തേക്ക് ധാര ഇടമുറിയാതെ പ്രവഹിപ്പിക്കുന്നു. ശരീരം മുഴുവനായി ധാര ചെയ്യാം. ഇതാണു സര്വാംഗധാര, ഏതെങ്കിലും ശരീരഭാഗങ്ങളില് മാത്രമായി ചെയ്യുന്നത് ഏകധാരയാണ്. ധാരകള് വിവിധ രീതികളില് ഉണ്ടെങ്കിലും അവയില് പ്രധാനം ശിരോധാരയാണ്.
ശിരോധാര - ശിരസില് മാത്രമായി ചെയ്യാവുന്ന ധാരയാണ് ശിരോധാര. തൈലധാര, തക്രധാര, ക്ഷീരധാര എന്നിവയാണ് ശിരോധാരകളില് പ്രധാനം.
ഔഷധങ്ങളിട്ടു നിര്മ്മിച്ച തൈലമുപയോഗിച്ച് ചെയ്യുന്ന ധാരയാണു തൈലധാര. ധന്വന്തരം തൈലം, കാര്പ്പാസാസ്യാദിതൈലം തുടങ്ങിയവയാണ് ഉപയോഗിക്കുന്നത്. സെറിബ്രല് അട്രോഫി, പാര്ക്കിന് സോണിസം, നാഡീവ്യൂഹ തകരാറുകള്, തലച്ചോറിലെ ആഘാതം മുതലായവക്ക് തൈലധാരപ്രയോജനപ്രദമാണ്.
മോര് ഉപയോഗിച്ചുള്ള ധാരയാണു തക്രധാര, ഔഷധങ്ങളിട്ടു കാച്ചിയ പാല് തൈരാക്കി, കടഞ്ഞ് നെയ്യ് മാറ്റി മോരാക്കി അതുകൊണ്ടാണു തക്രധാര ചെയ്യുന്നത്. സോറിയാസിസ്, എക്സിമ, പ്രമേഹം, ഉറക്കക്കുറവ്, ചിലതരം മാനസിക രോഗങ്ങള് എന്നിവയില് അതീവ ഫലപ്രദമാണു തക്രധാര.
ഔഷധങ്ങള് ചേര്ത്തു സംസ്ക്കരിച്ച പാലുകൊണ്ട് ചെയ്യുന്ന ധാരയാണു ക്ഷീരധാര. കുറുന്തോട്ടി, ഇരുവേലി, രാമച്ചം, ചന്ദനം, ഇരട്ടിമധുരം, തുടങ്ങിയ ഔഷധങ്ങളാണ് ഉപയോഗിക്കാറുള്ളത്. വിവിധയിനം തലവേദനകള്, ഉറക്കക്കുറവ്, മാനസിക രോഗങ്ങള് എന്നിവയില് ഫലപ്രദമാണ് ക്ഷീരധാര
ആയുര്വേദഗ്രന്ഥമായ അഷ്ടാംഗഹൃദയത്തില് ഇതിന്റെ ചികിത്സാ തത്വങ്ങള് വിവരിക്കുന്നുണ്ട്. പ്രസവശുശ്രൂഷയില് ശ്രദ്ധിക്കേണ്ട കാര്യങ്ങള് ഇവയാണ് - 1. അഗ്നിദീപ്തി - ശരിയായ ദഹനശക്തി ഉണ്ടാക്കുക. 2. ഗര്ഭാശയശുദ്ധി - പ്രസവാനന്തരം ഗര്ഭാശയത്തില് കെട്ടിക്കിടക്കുന്ന അശുദ്ധരക്തം ഒഴുക്കികളയല്. 3. ഗര്ഭാശയം ചുരുക്കല് - ഗര്ഭഭാരത്താല് വികസിച്ച ഗര്ഭാശയം ചുരുക്കിപൂര്വ്വസ്ഥിതി പ്രാപിപ്പിക്കല്. 4. വാതകോപം തീര്ക്കല് - ഇത് പരമപ്രധാനമാണ്. ശരീരത്തില് ഏതൊരു ചലനം നടക്കണമെങ്കിലും അത് വാതത്തിന്റെ കര്മ്മമാണ്. പ്രസവം പോലുള്ള വലിയ ഒരു കര്മ്മം നടന്ന ശരീരത്തില് ത്രിദോഷങ്ങള് കോപിക്കാനിടയുണ്ട്. വിശേഷിച്ച് വാതം. അതാണ് പലവിധ വേദനകള് ബാധിക്കുന്നത്. ഈ വാതകോപം ഉടന് ശമിപ്പിക്കേണ്ടതുണ്ട്. 5. രക്തനഷ്ടം - ഗര്ഭധാരണശേഷം ഭ്രൂണം വളര്ന്ന് കുഞ്ഞാവുന്നത് അമ്മയുടെ രക്തം സ്വീകരിച്ചു കൊണ്ടാണ്. കൂടാതെ പ്രസവത്തിലും രക്തനഷ്ടം സംഭവിക്കുന്നുണ്ട്. അതുകൊണ്ട് രക്തത്തിന്റെ മതിയായ തോത് നിലനിര്ത്തണം. 6. മാംസശോഷം - ശരീരത്തില് നാം ഭക്ഷിക്കുന്ന ആഹാരം രസമായും അന്നരസം പചിച്ച് രക്തമായും രക്തത്തില് നിന്ന് മാംസവും മാംസത്തില് നിന്ന് മേദസ്സും എന്ന മുറക്ക് സപ്തധാതുക്കളും പുഷ്ടിപ്പെടുകയാണ്. ശരീരത്തില് രക്തക്കുറവ് സംഭവിക്കുമ്പോള് മാംസശോഷണത്തിന് കാരണമാവുകയും സ്ത്രീയുടെ ദേഹം മെലിയാനും കാരണമാകും ഇത് പരിഹരിക്കാന് വേണ്ടി ദേഹപുഷ്ടിയിലും ശ്രദ്ധിക്കണം. ഇത്രയും കാര്യങ്ങളാണ് പ്രസവാനന്തര ശുശ്രൂഷകൊണ്ട് ലക്ഷ്യമിടുന്നത്.
പ്രസവിച്ച ഏഴു രാത്രികള്ക്കു ശേഷം മാത്രമേ ബൃംഹണക്രിയ (ദേഹം പോഷിപ്പിക്കല്) ചെയ്യാവൂ എന്നും അതുതന്നെ മാംസഭക്ഷണം കൊടുത്തുതുടങ്ങാവൂ എന്നും പ്രത്യേകം നിര്ദ്ദേശമുണ്ട്. നാട്ടില് സാധാരണയായി നടപ്പുള്ള പ്രസവശുശ്രൂഷ - പ്രസവിച്ച സ്ത്രീക്ക് വിശപ്പുണ്ടായിക്കഴിഞ്ഞാല് പഞ്ചകോലചൂര്ണം എണ്ണയിലോ നെയ്യിലോ ഉരുക്കിയ ശര്ക്കരയിലോ ചേര്ത്ത് കഴിപ്പിക്കണം. അഗ്നിദീപ്തിക്കും ദുഷ്ടരക്തം സ്രവിച്ച് പോകാനും ഗര്ഭാശയശുദ്ധിക്കും ഗര്ഭാശയം ചുരുങ്ങി പൂര്വ്വസ്ഥിതി പ്രാപിക്കാനും ഉദ്ദേശിച്ചുകൊണ്ടുള്ളതാണ് ഈ പ്രയോഗം. ഇതിനെ മുക്കിടി കുടിപ്പിക്കല് എന്നാണ് മുമ്പ് പറഞ്ഞിരുന്നത്. അഗ്നിദീപ്തികരങ്ങളായ ഔഷധങ്ങള് അരച്ചുരുട്ടി തെളി മദ്യത്തിലോ മോരിലോ കലക്കി രാവിലെ കുടിപ്പിക്കും. പുളിങ്കുഴമ്പ് അഥവാപുളിലേഹ്യം എന്നു പേരുള്ള ഔഷധക്കൂട്ട് ഇതിന് പകരമായുണ്ട്. ഒന്നുമുതല് ഏഴു ദിവസം വരെ ഇത് സേവിച്ചാല് മതി. വയറ്റില് വേദന അനുഭവപ്പെടുന്നുവെങ്കില് മദ്യത്തില് ചേര്ത്താണ് കഴിക്കേണ്ടത്. മൂന്നുദിവസത്തിനുശേഷം ധന്വന്തരം കഷായമോ മര്മകഷായമോ ധന്വന്തര ഗുളിക ചേര്ത്ത് കാലത്തും വൈകുന്നേരവും കൊടുത്തു തുടങ്ങാം. ജീരകാരിഷ്ടവും ദശമൂലാരിഷ്ടവും ചേര്ത്ത് ഉച്ചക്കും രാത്രിയും ഭക്ഷണശേഷം കൊടുക്കാം. പ്രസവിച്ച സ്ത്രീ രാവിലെ 11 മണിയോടെയെങ്കിലും കുളിച്ച് ഭക്ഷണം കഴിച്ച് വിശ്രമിക്കണം. വെള്ളത്തിന് ദാഹം കൂടുമെങ്കിലും വെള്ളം അല്പം മാത്രയിലേ നല്കാവൂ.
പെറ്റെണീക്കല് ആകുമ്പോഴേക്കും ഒരു ആടിന്റെ എല്ലാ ഭാഗവും കഴിപ്പിക്കുക എന്നതാണ് പഴയ ചിട്ട. മസാലക്കൂട്ട് ചേര്ത്തല്ല ഇത് പാകപ്പെടുത്തുക, പകരം പ്രത്യേക ഔഷധക്കൂട്ട് ചേര്ത്താണ് വരട്ടിയെടുക്കുന്നത്. ആടിന്റെ ധാതുക്കള് മനുഷ്യശരീരത്തോട് ഏറ്റവും യോജിച്ചതായതുകൊണ്ട് ആട്ടിന്മാംസം ഉപയോഗിക്കുന്നു. ഇതില്, സ്തനങ്ങള്ക്ക് വിള്ളല്, മുറിവ്, പാല് വേണ്ടത്ര ഇല്ലാതിരിക്കുക എന്നീ അവസ്ഥകളില് ആടിന്റെ അകിടും മുലയും കഴിപ്പിക്കലും പഴയ വൈദ്യന്മാര് നിര്ദ്ദേശിക്കാറുണ്ട്. ദഹന സംബന്ധമായ പ്രശ്നങ്ങള് ഉണ്ടാകാതിരിക്കാന് ആട്ടിന്കുടല് കുടലെരിക്ക എന്ന മരുന്ന് ചേര്ത്ത് പാകപ്പെടുത്തി നല്കുന്ന പതിവുണ്ട്.
തേച്ചുകുളി - പ്രസവാനന്തര ചികിത്സയില് വളരെ പ്രധാനം തേച്ചുകുളിക്കുണ്ട്. ബലാതൈലം-ധന്വന്തര തൈലം- ധാന്വന്തരകുഴമ്പ് മുതലായ വാതഹരങ്ങളായ തൈലങ്ങള് ദേഹത്ത് പുരട്ടി ഇഞ്ച, പച്ചമഞ്ഞള് മുതലായവ ഉപയോഗിച്ചാണ് വിസ്തരിച്ചുള്ള കുളി. തനിയെ കുളിക്കുന്നതിന് പകരം കുളിപ്പിക്കുകയാണ് ചെയ്യുന്നത്. പച്ചവെള്ളം ഉപയോഗിച്ച് കുളിക്കാന് പാടില്ല വാതഹരങ്ങളായ ഔഷധക്കൂട്ടുകളിട്ട് തിളപ്പിച്ച് ചൂട് പാകമാക്കിയ വെള്ളമാണ് കുളിക്കാനായി ഉപയോഗിക്കേണ്ടത്. ആവണക്കില, പഴുത്ത പ്ലാവില, പഴുത്ത മടല്, ചിരട്ട, വാതംകൊല്ലിയില ഇവയോ നാല്പ്പാമരമോ ചേര്ത്ത് വെള്ളം തലേന്നാള് തിളപ്പിച്ചിടണം. പിറ്റേന്നാള് പാകത്തിന് ചൂടാക്കി ഉപയോഗിക്കുക. (നാല്പാമരം ആദ്യദിവസങ്ങളില് പതിവില്ല. ഗര്ഭാശയശുദ്ധിക്കുശേഷം മാത്രം) സഹിക്കാവുന്ന ചൂടിലുള്ള വെള്ളം ശരീരത്തില് എറിഞ്ഞാണ് കുളിപ്പിക്കേണ്ടത്. അടിവയര്, കാല്ത്തുട, ഭഗപ്രദേശം എന്നിവിടങ്ങളില് വെള്ളം മുക്കിപ്പിടിക്കുകയും വേണം. ഇങ്ങനെ കുളിപ്പിക്കുമ്പോള് മാറിടത്തെ ചൂടുവെള്ളത്തില് കഴുകരുത്. ഇല്ലെങ്കില് മുലപ്പാല് വറ്റാനിടയാകും.മറ്റൊരു സമ്പ്രദായംകൂടി നടപ്പിലുണ്ട്. നല്ല എള്ളാട്ടിയ എണ്ണ അതികാലത്തും വൈകുന്നരവും ഓരോ കൈകുമ്പിള് നിറയെ നെറുകയില് ഇടും. തലയ്ക്കല് വാഴയിലയോ കവുങ്ങിന്കുമ്പാളയോ ഇട്ടാണ് കിടക്കുന്നത്. ശിരസ്സിനും നേത്രത്തിനും വളരെ ഗുണം ചെയ്യുകയും മുലപ്പാല് വര്ധിക്കാനും ഏറെ ഫലപ്രദാമാണ്.
വിശ്രമം - കാല്നീട്ടി കാല്പാദങ്ങള് അടുപ്പിച്ച് വെച്ചാണ് കിടക്കേണ്ടത്. ശരീരത്തിന് ഉലച്ചില് തട്ടാതെ കുഞ്ഞിനെ പാല് കുടിപ്പിക്കണം. ഇത്തരത്തില് ശുശ്രൂഷ പാലിച്ചാല് ശരീരബലവും ശരീരവര്ണവും നല്ല സൌന്ദര്യവും ആരോഗ്യവും ലഭിക്കും
മാംസ്യത്തിന്റെ അഭാവം മൂലം കുട്ടികള്ക്കുണ്ടാകുന്ന രോഗമാണിത്. കുട്ടിക്ക് മുലപ്പാലിനൊപ്പം പോഷകസമൃദ്ധമായ ആഹാരവും നല്കിയാല് ഈ രോഗബാധ തടയാം.
ലക്ഷണങ്ങള്
ശരീരവളര്ച്ച, തലച്ചോറിന്റെ വളര്ച്ച എന്നിവ മുരടിക്കുന്നു.
വിവര്ണമായ ത്വക്ക്, തലമുടി.
വീര്ത്ത മുഖം, ഉന്തിയ വയര് .
ശോഷിച്ച കൈകാലുകള് എന്നിവയാണ് ഈ അസുഖത്തിന്റെ ലക്ഷണങ്ങള്.
മാംസ്യത്തിന്റെയും മറ്റു ഊര്ജ്ജദായക ഭക്ഷണപദാര്ഥങ്ങളുടെയും അഭാവം മൂലമുണ്ടാകുന്ന രോഗമാണിത്. മുലപ്പാല് കൊടുക്കുന്നത് കുറവായ രാജ്യങ്ങളിലെ കുട്ടികളിലാണ് ഈ രോഗം കൂടുതല് കണ്ടുവരുന്നത്.
ലക്ഷണങ്ങള് - ചുക്കിച്ചൂളിഞ്ഞ ത്വക്ക്, കുഴിഞ്ഞ കണ്ണ് , മെലിഞ്ഞ ശരീരം എന്നിവയാണ്.
ആവശ്യത്തിലധികം പോഷക സാധനങ്ങള് ശരീരത്തിലെത്തിയാല് പല ദൂഷ്യഫലങ്ങളുമുണ്ടാകും. അതിന്റെ ഫലമായി അമിതഭാരവും പൊണ്ണത്തടിയുമുണ്ടാകും. സാധാരണ വേണ്ടുന്ന ഭാരത്തിന്റെ 20 ശതമാനത്തില് കൂടുതല് ഭാരമുണ്ടായാല് അമിതഭാരമായി കാണക്കാക്കാം.
ലക്ഷണങ്ങള് - അമിതമായ കൊഴുപ്പ് ശരീരത്തില് അടിയുന്നതുമൂലം ഹൃദയസ്തംഭനം, ഉയര്ന്ന രക്തസമ്മര്ദ്ദം, ക്രോമ്പോനിന് എന്നിവയുണ്ടാകും
പ്രമേഹരോഗത്തെ നിയന്ത്രിക്കാന് ആയുര്വേദത്തിലൂടെ ഫലപ്രദമായി സാധിക്കും. ശരിയായ ഔഷധപ്രയോഗത്തോടൊപ്പം പഥ്യാഹാരവും വ്യായാമവും എണ്ണതേച്ചുകുളി തുടങ്ങിയവയും ശീലിക്കണം. മധുരം, പുള്, എരിവ്, പകലുറക്കം അലസത എന്നിവ ഉപേക്ഷിക്കുകയും വേണം.
പ്രമേഹചികിത്സയില് പ്രഥമവും പ്രധാനവുമായ ഭാഗം ആഹാരക്രമീകരണമാണ്. എന്നാല് ആഹാരത്തെ ഒഴിവാക്കുകയുമരുത്. ഗോതമ്പ്, റാഗി, യവം, പയറുവര്ഗങ്ങള്, പാവയ്ക്ക, കോവയ്ക്ക, വെണ്ടക്ക, വാഴക്കൂമ്പ്, വാഴപ്പിണ്ടി, ഇലക്കറികള്, ചെറു മത്സ്യങ്ങള് ഇവയൊക്കെ മാറിമാറി ഭക്ഷണത്തിലുള്പ്പെടുത്താം. ശീതളപാനീയങ്ങളും മറ്റും നിത്യോപയോഗത്തിന് നല്ലതല്ല. മോര്, നാരങ്ങാനീര്, കരിങ്ങാലിയോ വേങ്ങയോ വെന്തവെള്ളം ഇവയൊക്കെ ദാഹശമനത്തിന് ഉപയോഗിക്കാം. കഞ്ഞി, ചോറ്, ഇവ പാകം ചെയ്യുമ്പോള് ചെറൂള, കറുക എന്നിവ ചതച്ച് കിഴികെട്ടിയിടുന്നത് ആഹാരത്തെത്തന്നെ ഔഷധമാക്കി മാറ്റുന്നു. പ്രമേഹരോഗികള് ആഹാരത്തില് കൊഴുപ്പിന്റെ അളവ് വര്ധിക്കാതിരിക്കാന് ശ്രദ്ധിക്കണം.
ചിട്ടയായ വ്യായാമം പ്രമേഹരോഗനിയന്ത്രണത്തോടൊപ്പം രക്തസമ്മര്ദ്ദവും കൊളസ്ട്രോളും അമിതവണ്ണവും കുറക്കുകയും മാനസിക പിരിമുറുക്കങ്ങള് അകറ്റുകയും ചെയ്യും.
നാല്പാമരാദികേരം, ഏലാദികേരം, ധന്വന്തരം കുഴമ്പ്, പിണ്ഡതൈലം ഇവയില് ഏതെങ്കിലും ദേഹത്ത് തേച്ചുകുളിക്കുന്നത് നാഡികളെയും പാദങ്ങളെയും ത്വക്കിനെയും കണ്ണുകളെയും ഒരുപോലെ സംരക്ഷിക്കും. പ്രമേഹരോഗി ഔഷധോപയോഗത്തോടൊപ്പം ഉലുവ പൊടിച്ചോ വെള്ളത്തിലിട്ടുവെച്ചോ ഉപയോഗിക്കുന്നത് ഉത്തമമാണ്. ഭക്ഷണത്തില് മഞ്ഞളിന്റെ ഉപയോഗം വര്ധിപ്പിക്കാനും ശ്രദ്ധിക്കണം.
15 മില്ലി നെല്ലിക്കാനീരില് അരടീസ്പൂണ് മഞ്ഞള്പൊടി ചേര്ത്ത് രാവിലെ വെറുംവയറ്റില് സേവിക്കാം. വാഴപ്പിണ്ടിനീരില് മഞ്ഞള്പൊടി ചേര്ത്ത് ഉപയോഗിക്കുന്നതും കടുക്കാത്തൊണ്ട്, കുമ്പിള്വേര്, മുത്തങ്ങ, പാച്ചോറ്റിത്തൊലി ഇവ സമം കഷായംവെച്ചു കുടിക്കുന്നതും പ്രമേഹരോഗികള്ക്ക് ഗുണപ്രദമാണ്. നിശാകതകാദി കഷായം പതിവായി സേവിച്ചാല് പ്രമേഹം നിയന്ത്രണവിധേയമാകും.
മധുരം ഒഴിവാക്കുക.
എണ്ണയും തേങ്ങയും നിയന്ത്രിക്കുക.
കൃത്യസമയങ്ങളില് ആഹാരം കഴിക്കുക.
വറുത്തതും പൊരിച്ചതും കഴിവതും ഒഴിവാക്കുക.
പഴങ്ങള് ദിവസം ഒന്നോ രണ്ടോ മാത്രം കഴിക്കുക.
പച്ചക്കറികളും ഇലവര്ഗങ്ങളും എല്ലാ ഭക്ഷണത്തിനൊപ്പവും ഉള്പ്പെടുത്തുക.
തൊലികളഞ്ഞ കോഴിയിറച്ചി കഴിക്കാം.
മാട്ടിറച്ചി പരമാവധി ഒഴിവാക്കണം. പൊറോട്ട, ബേക്കറി ഉല്പന്നങ്ങള്, ലഘുപാനീയങ്ങള്, മുട്ടയുടെ മഞ്ഞക്കരു എന്നിവ ഒഴിവാക്കുക.
ഉപ്പിന്റെ ഉപയോഗം കുറക്കുക.
തവിടോടുകൂടിയ ധാന്യങ്ങള് ഭക്ഷണത്തില് ഉള്പ്പെടുത്തുക.
പാലിന്റെ അളവ് നിയന്ത്രിക്കുക.
ആഹാരത്തിന്റെ അളവ് നിയന്ത്രിക്കുക.
ദിവസവും 8 മുതല് 12 വരെ ഗ്ലാസ്സ് വെള്ളം കുടിക്കുക.
കാപ്പിയും ചായയും അമിതമായി കഴിക്കരുത്.
ഇരുമ്പിന്റെ കുറവുകൊണ്ടുണ്ടാകുന്ന രോഗമാണ് അനീമിയ. അനീമിയ ബാധിച്ച ആളുകള്ക്ക് വിളര്ച്ച. ക്ഷീണം, വായ്ക്കുള്ളില് തടിപ്പ്, ആഹാരപാനീയങ്ങള് വിഴുങ്ങാന് ബുദ്ധിമുട്ട്, അണുബാധകള്, ഹൃദയത്തിന് വീക്കം എന്നിവയൊക്കെ നേരിടേണ്ടി വരും.
അനീമിയ - കാരണങ്ങള്
ആഹാരത്തിലെ ഇരുമ്പിന്റെ കുറവ്, ആഹാരം ഉള്ളില് ചെന്നാലും ശരീരത്തിന്റെ കുറഞ്ഞ ആഗിരണശേഷി, വലിയ രീതിയിലുള്ള രക്തംപോക്ക്, വിരശല്യം, രക്തദാനം, ശസ്ത്രക്രിയ വഴി വയറോ ഇരുമ്പ് ആഗിരണം ചെയ്യുന്ന ചെറുകുടലിന്റെ ഭാഗങ്ങളോ നീക്കം ചെയ്യല് എന്നിവയെല്ലാം ശരീരത്തില് ഇരുമ്പിന്റെ അംശം കുറക്കുകയും അനീമിയയിലേക്ക് എത്തിക്കുകയും ചെയ്യും. മാസമുറ, ഗര്ഭധാരണം, പ്രസവം, മുലയൂട്ടല് ഇവ വഴി സ്ത്രീകള്ക്ക് ഇരുമ്പ് നഷ്ടപ്പെടുന്ന തോത് ഏറെയാണെങ്കിലും ഏതു പ്രായത്തിലും അനീമിയ ഉണ്ടാകും. പച്ചക്കറികള്, വാഴപ്പഴം, മുട്ട, കരള്, ഇവയെല്ലാം ഇരുമ്പ് ലഭിക്കുന്ന സ്ത്രോതസ്സുകളാണ്. പച്ചനിറമില്ലാത്ത ഇലകളും പച്ചക്കറികളും പാലും പാലുല്പ്പന്നങ്ങളും ഈ കാര്യത്തില് വളരെ പുറകിലാണ്.
ശ്രദ്ധിക്കേണ്ട കാര്യങ്ങള് - വെറുംവയറ്റില് കടന്നുചെല്ലുന്ന ഇരുമ്പിനെ ആഗിരണം ചെയ്യാന് എളുപ്പമാണ്. പക്ഷേ ഇത് പലരിലും പ്രത്യേകിച്ച് പ്രായമായവരില് വയറുവേദന, വയറു കമ്പിക്കല്, മുതലായ അസ്വസ്ഥതകള് ഉണ്ടാക്കും. അങ്ങനെയുണ്ടായാല് തുടര്ന്ന് ആഹാരത്തോടൊപ്പം കഴിക്കുന്നതാണ് നല്ലത്. മരുന്ന് കൂടുതലായി കഴിച്ചാല് അതായത് 10 ഗുളികകളോളം ഒരേസമയം ഉള്ളില് ചെന്നാല് ഇരുമ്പിന്റെ അംശം കൂടുതലായി വിഷബാധക്ക് കാരണമാകും. വയറിളക്കം, ഛര്ദ്ദി എന്നിവയില് തുടങ്ങി മരണത്തിലേക്ക് എത്തിക്കും. പില്ക്കാലത്ത് വയറിനുള്ളില് ആസിഡിന്റെ കൂടുതലായ ഉല്പാദനവും അതുവഴിയുണ്ടാകുന്ന പ്രശ്നങ്ങളും നേരിടേണ്ടിവരും.
മഞ്ഞപ്പിത്തം ഉണ്ടോ എന്നറിയാന് രാവിലെ എണീറ്റയുടന് മൂത്രം ഒരു പാത്രത്തിലെടുത്ത് അതില് ചോറ് ഇട്ടു നോക്കുക. കുറച്ച് കഴിഞ്ഞ് വറ്റ് മഞ്ഞ നിറമാകുന്നുവെങ്കില് മഞ്ഞപ്പിത്തമുണ്ടെന്നര്ത്ഥം. കണ്ണിന്റെയുള്ളില് മഞ്ഞ നിറം കാണുകയും കൈകളിലും കാലുകളിലും മഞ്ഞ നിറം അനുഭവപ്പെടുകയും ചെയ്യും.
കീഴാര് നെല്ലി, കഞ്ഞുണ്ണി വേര് എന്നിവ പശുവിന് പാലില് അരച്ചുകഴിക്കുക.
പൂവാംകുരുന്നില വേര് പശുവിന് പാലില് അരച്ചു കഴിക്കുക.
മാവിന് തളിര് ഇളനീര് വെള്ളത്തിലരച്ച് സേവിക്കുക.
തഴുതാമ വേര് പാലിലരച്ച് കലക്കി പഞ്ചസാര ചേര്ത്ത് കുടിക്കുക.
കരിമുത്തിളിന്റെ ഇല പിഴിഞ്ഞ നീരും പാലും ചേര്ത്ത് കുടിക്കുക.
ചിറ്റാമൃത്, മുന്തിരി, കരിമ്പ് ഇവയുടെ കഷായത്തില് പഞ്ചസാര മേമ്പൊടി ചേര്ത്ത് കഴിക്കുക.
ഒരുനുള്ള് ജീരകവും പൂവാംകുരുന്നിലയും കൂടി അരച്ച് പാലില് കലക്കി രാവിലെ കഴിക്കുക,
ദിവസേന മഞ്ഞളും കറിവേപ്പിലയും കടുക്കത്തോടും ചതച്ചിട്ട് മോര് കുടിക്കുക.
വെളുത്ത നൊച്ചിവേര് അരച്ച് മോരില് സേവിക്കുക.
ചിറ്റമൃത്, കരിമ്പ്, വേപ്പിന്തൊലി, മുന്തിരി എന്നിവ കൊണ്ടുള്ള കഷായത്തില് തേന് ചേര്ത്തു കഴിക്കുക.
മുള്ളങ്കി പച്ചക്ക് ചവച്ച് തിന്നുക .
കീഴാര് നെല്ലി അരച്ച് പാലിലോ ഇളനീരിലോ ചേര്ത്ത് അതിരാവിലെ കഴിച്ചാല് മഞ്ഞപ്പിത്തം ഇല്ലാതാവും.
വേപ്പിലനീരും തേനും ചേര്ത്ത് രണ്ടുനേരം വീതം മൂന്നുദിവസം സേവിക്കുക.
പാവലിന്റെ ഇല പിഴിഞ്ഞ നീര് ഓരോ സ്പൂണ് വീതം രണ്ട് കായവും ചേര്ത്ത് ദിവസവും മൂന്ന് നേരം കഴിക്കുക.
മഞ്ഞപ്പിത്തമുള്ള കുട്ടികളെ രണ്ടുനേരം വെയില് കൊള്ളിക്കുന്നത് നല്ലതാണ്.
തേങ്ങാപാല് ശരീരത്തില് തേച്ച് പിടിപ്പിച്ച് മുഞ്ഞയിലയിട്ട് തിളപ്പിച്ച വെള്ളത്തില് കുളിപ്പിക്കുക.
ജലദോഷം, നീരിറക്കം - കുളികഴിഞ്ഞ് രാസ്നാദി ചൂര്ണ്ണം തലയില് തിരുമ്മുന്നത് പതിവാക്കുക. ജലദോഷവും തലനീരിറക്കവും നിശ്ശേഷം മാറുന്നതാണ്.
മുട്ടുവേദന - കരിനൊച്ചിയില അരച്ചിട്ടാല് മുട്ടുവേദന മാറും.
മുലപ്പാല് വര്ദ്ധിക്കാന് - ശതാവരിക്കിഴങ്ങ് ഉണക്കിപ്പൊടിച്ച് പശുവിന് പാലില് കലക്കി സേവിക്കുന്നത് മുലപ്പാല് വര്ദ്ധിക്കാന് വിശേഷമാണ്.
ദഹനക്കേട്, വായുകോപം - ഇഞ്ചിനീര്, നാരങ്ങാനീര് ഇവ ചേര്ത്തു കഴിച്ചാല് ദഹനക്കേടും വായുകോപവും മാറും.
മുണ്ടിനീരിന് (തലനീര്) പ്ലാ മഞ്ഞള് അരച്ചിട്ടാല് മതി.
കുരുക്കള് - വിങ്ങിപ്പൊട്ടിയ കുരുക്കളില് നിന്ന് പഴുപ്പു പൂര്ണ്ണമായും പോയില്ലെങ്കില് മുളമ്പഞ്ഞി വെയ്ക്കാവുന്നതാണ്.
നടുവേദന - ആവണക്കെണ്ണയും കരിനൊച്ചിയിലയുടെ ചാറും സമാസമം ചേര്ത്തു സേവിക്കുന്നത് നടുവേദന കുറയാന് സഹായിക്കും.
മോണപഴുപ്പ് - മല്ലിയുടെ ഇല ചവച്ചുതുപ്പിയാല് മോണപഴുപ്പ് ശമിക്കും.
പ്രസവാനന്തരമുള്ള നടുവേദന - ഉലുവ കഞ്ഞിവെച്ച് കുടിച്ചാല് പ്രസവാനന്തരമുള്ള നടുവേദനയും ക്ഷീണവും മാറും.
മുറിവ് - മുക്കുറ്റിയുടെ വിത്ത് അരച്ച് പുരട്ടിയാല് മുറിവ് ഉണങ്ങും. മുറിവിന് മുളയുടെ മൊരിയും നൂറും ചാലിച്ച് പുരട്ടുക.
രക്താര്ശസ്സ് - പാവയ്ക്കയുടെ വേര് അരച്ച് മോരില് ചേര്ത്ത് കുടിക്കുന്നത് രക്താര്ശസ്സ് മാറാന് സഹായിക്കും.
ശരീരക്ഷീണം - വെള്ളത്തില് പുളിയിലയിട്ട് തിളപ്പിച്ച ശേഷം കുളിച്ചാല് ശരീരക്ഷീണം മാറും.
ചെവിയില് പ്രാണി പോയാല് ഉപ്പു വെള്ളമോ വെളിച്ചെണ്ണയോ ചെവിയില് ഒഴിക്കുക.
വളം കടി - കാലിന്റെ വളം കടിക്ക് മൈലാഞ്ചി അരച്ച് വിരലില് പൊത്തുക.
വാതം, തരിപ്പ്, കടച്ചില്, നീര്ക്കെട്ട് എന്നിവക്ക് - വെയിലിപ്പരുത്തി സമൂലം ഇടിച്ച് പിഴിഞ്ഞ നീരും,തേങ്ങാപാലും, വെളിച്ചെണ്ണയും സമം ചേര്ത്ത് കൊട്ടം, കരിഞ്ചീരകം എന്നിവയും അരച്ച് കലക്കി സമം ചേര്ത്ത് തേച്ചാല് മതി.
തലവേദന, പനി - മുഞ്ഞയുടെ ഇല അരച്ച് നെറ്റിയില് പുരട്ടിയാല് തലവേദനക്കും പനിക്കും ആശ്വാസം കിട്ടും.
ചോരക്കുരു - കോവലിന്റെ ഇല നെയ്യുടെ പാകത്തില് അരച്ച് വെണ്ണയില് ചേര്ത്ത് ചാലിക്കുക. ഇത് പുരട്ടിയാല് ചോരക്കുരു പൊട്ടി ചലവും, ദുഷിച്ച ചോരയും പോയി വളരെ പെട്ടെന്ന് സുഖമാവും.
മുള്ള് കുത്തിയാല് - കാരത്തൊട്ടിയുടെ ഇല വെണ്ണപോലെ അരച്ച് പുരട്ടിയാല് കുത്തിയമുള്ള്, കുപ്പിച്ചില്ല് എന്നിവ പുറത്തുപോരും.
നെഞ്ചെരിച്ചില് - പെരുംജീരകം ദിവസത്തില് പലതവണ ചവച്ചിറക്കിയാല് നെഞ്ചെരിച്ചില് മാറും.
തൊണ്ടയടപ്പ് - തിപ്പലിയും ഇഞ്ചിയും ഒരു ഗ്ലാസ്സ് പാലില് ചേര്ത്ത് കഴിച്ചാല് തൊണ്ടയടപ്പ് മാറും.
അഞ്ചാംപനി വരാതിരിക്കാന് - തുളസിനീരും ശര്ക്കരയും ചേര്ത്ത് മൂന്നുനേരം കഴിക്കുക.
ബുദ്ധിശക്തി - ബ്രഹ്മി നിഴലില് ഉണക്കിപ്പൊടിച്ചത് പാലിലോ തേനിലോ പതിവായി കഴിച്ചാല് നല്ല ബുദ്ധിശക്തിയുണ്ടാകും.
കാലിലെ മുഴ - പുല്ലാനിയുടെ കായ ചൂടാക്കി അതില് ചവിട്ടിയാല് ഭേദമാകും
ചുമ, ശ്വാസം മുട്ടല് - ചെറിയ ആടലോടകത്തിന്റെ ഇല കുത്തിപ്പിഴിഞ്ഞെടുത്ത നീര് ഒരു സ്പൂണ് എടുത്ത് അത്രയും തേനും ചേര്ത്ത് കഴിക്കുക.
അപസ്മാരം - വയമ്പ് പൊടിച്ചതും തേനും ബ്രഹ്മിനീരില് ചേര്ത്ത് കഴിച്ചാല് അപസ്മാരം ശമിക്കും.
ശ്വാസാദിരോഗങ്ങള്ക്ക് - ചങ്കിനകത്തുണ്ടാകുന്ന എരിച്ചില്, വേദന, വരള്ച്ച, വിയര്പ്പ് മുതലായ രോഗങ്ങള്ക്കും ക്ഷയത്തിനും പലതരത്തിലുള്ള ഹൃദ്രോഗങ്ങള്ക്കും ഏത്തവാഴച്ചുണ്ട് കൊത്തിയരിഞ്ഞ് ഇന്തുപ്പും കുരുമുളക് പൊടിയും ചേര്ത്ത് വേവിച്ച് നെയ്യില് കടുകുവറുത്ത് ചോറിന് കറിയായിട്ടോ പലഹാരമായിട്ടോ 41 ദിവസം ഉപയോഗിച്ചാല് ഈ രോഗങ്ങള് കുറയും.
നീര്ദോഷം - ഒരു പനിക്കൂര്ക്കയില ഒരു നേരം എന്ന കണക്കില് വാട്ടിപ്പിഴിഞ്ഞ് രണ്ടുനേരം കൊടുക്കുക.
ചുമ - അര ടീസ്പൂണ് തേന് അത്രയും നാരങ്ങാനീര് ചേര്ത്ത് ദിവസവും രണ്ടുനേരം വീതം കൊടുക്കുക.
പനി - തുളസിനീരും തേനും ചേര്ത്ത് കൊടുക്കുക.
മാറാത്ത കുരുവിന് - കുരുവിന് നന്നാറിക്കിഴങ്ങ്, എള്ള്, എന്നിവ സമം പാലില് പുഴുങ്ങിയരച്ച് നെയ്യ് ചേര്ത്ത് പുരട്ടുക.
കഴുത്തിലെ പഴുപ്പ്- ചെന്തെങ്ങിന് കരിക്ക്, മാശിക്ക, ചുവന്ന ചെമ്പരത്തിമൊട്ട് എന്നിവ മോര് ചേര്ത്തരച്ച് കുഴച്ചിട്ടാല് ചെറിയ കുട്ടികളിലെ കഴുത്തിലും മറ്റുമുണ്ടാകുന്ന പഴുപ്പ് മാറും.
വിളര്ച്ച - വെള്ളരിക്ക, തക്കാളി, കാരറ്റ്, വെണ്ടക്ക ഇവ ചെറുതായിട്ടരിഞ്ഞ് പഞ്ചസാര ചേര്ത്ത് കൊടുക്കുക, തളര്ച്ചയും വിളര്ച്ചയും മാറിക്കിട്ടും
നമ്മുടെ വീട്ടിലും പരിസരത്തുമായുള്ള മരുന്നു കൊണ്ട് രോഗം മാറ്റിയിരുന്ന ഒരു കാലഘട്ടം ഉണ്ടായിരുന്നു. പ്രകൃതിയില് നിന്നും അവരുടെ ജീവിത ചുറ്റുപാടില് നിന്നും ലഭ്യമായ സസ്യചോതാദികളെയും, പ്രകൃതി വിഭവങ്ങളെയും മരുന്നായി ഔഷധങ്ങളെയും മരുന്നായി ഉപയോഗിച്ചു. ഈ ഔഷധങ്ങളെനേരിട്ട് മരുന്നായും ഭക്ഷണത്തിന്റെ കൂടെയുമാണ് ഉപയോഗിച്ചിരുന്നത്.
ചില നാട്ടറിവുകള്
പുളിച്ചു തികട്ടല്
ചെറുവഴുതിന വേര്, ആടലോടകത്തിന് വേര്, ചിറ്റമൃത് എന്നിവ സമം കഷായം വെച്ചു തേന് മേമ്പൊടി ചേര്ത്തു കഴിക്കുക.
വൈകുന്നേരം ചെറുനാരങ്ങാനീര് കഴിക്കുക.
· കറിവേപ്പില വെള്ളം തൊടാതെ അരച്ച് നെല്ലിക്കയോളം വലിപ്പത്തില് കാച്ചിയ ആട്ടിന് പാലിന്റെ കൂടെ രാവിലെ സേവിക്കുക.
· മുന്തിരി പതിവായി കഴിക്കുക.
· കരിംജീരകം കഷായം വെച്ചു വെളുത്തുള്ളി നീര് ചേര്ത്തു കഴിക്കുക.
നെഞ്ചെരിച്ചില്
പെരും ജീരകമോ കൊത്തംമല്ലിയോ അല്പാല്പമായി പലവട്ടം ചവച്ചിറക്കുക.
ഒരു വെറ്റില അല്പം ഉപ്പും ജീരകവും കൂട്ടി സാവധാനം ചവച്ചിറക്കുക.
ചെന്നിക്കുത്ത്
തണുത്ത വെള്ളം കൊണ്ടോ ആറിയ പാല് കൊണ്ടോ ചെന്നിക്കുത്തുള്ള ഭാഗത്തു ധാര ചെയ്യുക. കഞ്ഞുണ്ണി നീര് നസ്യം ചെയ്യുക.
തലവേദന
കൊഴുപ്പ നീരും നല്ലെണ്ണയും കൂട്ടിച്ചേര്ത്തു മൂന്നുതുള്ളി വീതം നസ്യം ചെയ്യുക. പാണല് വേര് പാലില് അരച്ച് നെറ്റിയില് പുരട്ടുക.
നെല്ലിക്കാ തൊലി പാലില് അരച്ചു നെറ്റിയില് പുരട്ടുക.
തങ്കാവേര് മുലപ്പാലില് അരച്ച് നെറ്റിയില് ഇടുക.
· തേറ്റാം പരല് കോഴിമുട്ടയുടെ വെള്ളയില് അരച്ച് നെറ്റിയില് ഇടുക.
· നിലവാര് കുത്തിപ്പിഴിഞ്ഞ നീര് തലവേദന വലതു ഭാഗത്താണെങ്കില് ഇടത്തെ ചെവിയിലും മറിച്ചാണെങ്കില് വലത്തെ ചെവിയിലും ഒഴിക്കുക.
പനി
ചുക്ക്, കുരുമുളക്, കടുക്കമൂലി, കടുംജീരകം എന്നിവയെടുത്ത് കഷായം ഉണ്ടാക്കി കുടിക്കുക. കൃഷ്ണ തുളസി അരച്ചു കുടിച്ചാല് പനി പെട്ടന്ന് ഭേദപ്പെടും.
വിരേചനം
ആറു ഗ്രാം കടുക്കതോടു പൊടിച്ച് ചൂടുവെള്ളത്തില് കലക്കി അതിരാവിലെ കുടിക്കുക.ഉദരകൃമി
കണിക്കൊന്നയുടെ തോല് 100 ഗ്രാം ഇടിച്ച് രണ്ടു ഗ്ലാസ്സ് വെള്ളത്തില് കാച്ചി നാലിലൊന്നാക്കി അതിരാവിലെ കഴിക്കുക.
ആര്യവേപ്പില നീര് 10 മില്ലിയും അത്ര തന്നെ തേനും ചേര്ത്ത് രാവിലെയും വൈകിട്ടും മൂന്നു ദിവസം തുടര്ച്ചയായി കഴിക്കുക.
വയറിനകത്തെ കുരു കീഴാര് നെല്ലി അരച്ച് മോരില് ചേര്ത്തി കുടിച്ചാല് വയറിനകത്തെ കുരു മാറും.
നാഡീബലം
കറുകയുടെ പച്ചനീര് പത്തുമില്ലി വീതം രാവിലേയും വൈകിട്ടും കഴിക്കുക.അമുക്കരത്തിന്റെ വേര് ഇടിച്ചുപൊടിച്ചത് പാലില് കലക്കി കുടിക്കുക.
ധാതുക്ഷയം
അടപതിയന് വേര് പാലില് വേവിച്ച് വെയിലത്തുണക്കി പൊടിച്ചെടുത്ത ചൂര്ണ്ണം ആറു ഗ്രാം വീതം കലക്കി ദിവസവും രാത്രി സേവിക്കുക.
ദുര്മേദസ്സ്
ഒരു ചെറുനാരങ്ങയുടെ നീര് ഒരു ഗ്ലാസ്സ് വെള്ളത്തില് 10 മില്ലി തേനും ചേര്ത്ത് പതിവായി രാവിലെ കഴിക്കുക. ഉങ്ങിന്പൂവ് ഭക്ഷിക്കുക.
രക്ത സമ്മര്ദ്ദം
അമല്പൊരിയുടെ ഉണങ്ങിയ വേര് പൊടിച്ചുണ്ടാക്കിയ ചൂര്ണ്ണം ഒരു ഗ്രാം ത്രിഫല ചൂര്ണ്ണവുമായി ചേര്ത്ത് ദിവസം രണ്ടു നേരവും കഴിക്കുക.
ചര്മ്മ രോഗങ്ങള്
അമുക്കരത്തിന്റെ ഇല അരച്ച് ബാഹ്യലേപമായി ഉപയോഗിക്കുക.വേപ്പിലയും പച്ചമഞ്ഞളും ചേര്ത്ത് തിളപ്പിച്ച വെള്ളത്തില് കുളിക്കുക
ദീര്ഘകാല യൌവ്വനം
കടുങ്ങല് സമൂലം പിഴിഞ്ഞെടുത്ത രസം അര ഔണ്സ് വീതമെടുത്ത് വെണ്ണ ചേര്ത്തുണ്ടാക്കുന്ന ഔഷധം കല്ക്കവും രസവുമായെടുത്ത് നെയ്യ് കാച്ചി പത്തു ഗ്രാം വീതം ദിവസവും രണ്ടു നേരം കഴിക്കുക.
തുമ്മലിന് പൂവാങ്കുറുന്നില, കരിംജീരകം എന്നിവയിട്ട് മൂപ്പിച്ചരിച്ച വെളിച്ചെണ്ണ തേച്ച് കുളിക്കുക. രാസ്നാദി പൊടി തിരുമ്മുക. ചുക്ക്, കുരുമുളക്, തിപ്പല്ലി, പൂശ്ക്കരമൂലം എന്നിവ പൊടിച്ച് കിടക്കുന്നതിനു മുമ്പ് കഴിക്കുക.
ചുവന്നുള്ളി ചെറുതായി അരിഞ്ഞ് കല്ക്കണ്ടം കൂട്ടി സേവിക്കുന്നതും, കുരുമുളകു പൊടിച്ചെടുത്തു തേനില് ചാലിച്ച് സേവിക്കുന്നതും ചുമയ്ക്ക് ആശ്വാസം കിട്ടുന്നതിന് നല്ലതാണ്.
മുരിങ്ങാത്തൊലി ചതച്ച് നീരെടുത്ത് ചുക്ക്, കുരുമുളക്, ജീരകം എന്നിവ പൊടിച്ചെടുക്കുക, ചീനച്ചട്ടി ചൂടാകുമ്പോള് അല്പം നറുനെയ്യ് ഒഴിച്ച് മുരിങ്ങാതൊലി നീരില് മുകളില് പറഞ്ഞ പൊടികലക്കി ഒഴിക്കുക. തിളയ്ക്കുമ്പോള് കോഴിമുട്ട, ഉപ്പ് ചേര്ത്ത് കഴിക്കുക.
തുളസിയില, കുടങ്ങല് സമൂലം, കുരുമുളക്, ചുക്ക്, ജീരകം, മല്ലി ഇവ ചേര്ത്ത് കഷായം വെച്ച് ദിവസേന രണ്ടുനേരം കഴിക്കുന്നത് മഴക്കാലരോഗങ്ങള് വരാതിരിക്കാന് സഹായിക്കും.
തുളസിനീരില് സമം തേനും അല്പം ചെറുനാരങ്ങാനീരും ചേര്ത്ത് പലപ്രാവശ്യം കഴിക്കുന്നത് ആസ്തമാ രോഗികള്ക്ക് നല്ലതാണ്.
ചുക്ക്, രാമച്ചം, മുത്തങ്ങ, ചിറ്റാമൃത്, ജീരകം ഇവ ചേര്ത്ത് കഷായം വെച്ച് കഴിച്ചാല് പനി മാറുന്നതാണ്.
തെങ്ങിന്റെ തൊലി ഉണക്കിപ്പൊടിച്ച് എണ്ണ കാച്ചി തേച്ചാല് വളംകടി ശമിക്കും.
അയമോദകം വറുത്ത് പൊടിച്ച് മോരില് ചേര്ത്ത് കഴിച്ചാല് അജീര്ണം മാറും.
ഒരു ടീസ്പൂണ് ഇഞ്ചിനീരും സമം ഉള്ളിനീരും അല്പം തേനും ചേര്ത്ത് കഴിക്കുന്നത് പനി, ശ്വാസം മുട്ടല് തുടങ്ങിയവ ശമിപ്പിക്കും
ക്ഷയരോഗം പെട്ടെന്ന് കുറയ്ക്കാന് സഹായിക്കുന്ന ഒരു മരുന്നാണ് ചക്കപ്പഴഅരിഷ്ടം. പണ്ടുകാലങ്ങളിലുള്ള ആളുകള് അവരുടെ ആരോഗ്യം കാത്തുസൂക്ഷിക്കുന്നതിന് ഉപയോഗിച്ചിരുന്ന ഒരു തരം അരിഷ്ടമാണിത്. ഏറ്റവും ചുരുങ്ങിയ സാധനങ്ങള് മാത്രം ആവശ്യമായി വരുന്ന ഒരു മരുന്നു നിര്മ്മാണ രീതി കൂടിയാണിത്. ഈ അരിഷ്ടം ഉണ്ടാക്കാനായി ഉപയോഗിക്കുന്നത് വരിക്കച്ചക്കയോ പഴംചക്കയോയാണ്.
വരിക്കച്ചക്കയോ, പഴംചക്കയോ, കുരുവോടുകൂടി ശര്ക്കരയും ചേര്ത്ത് ഭരണിയില് ഇട്ടുവെക്കുക. ചക്കപ്പഴത്തിന്റെ അളവില് പകുതി ശര്ക്കരചേര്ത്താല് മതി. വേണമെങ്കില് ഏലക്കാ, ഗ്രാമ്പു, കറുവപ്പട്ട,എന്നിവയും ചേര്ത്ത് 41 ദിവസം അടച്ചുവെയ്ക്കുക. 41 ദിവസത്തിനു ശേഷം അരിച്ചെടുത്ത് ഈ ദ്രാവകത്തിന്റെ പത്തില് ഒരു ഭാഗം തേന് ഒഴിക്കുക. (1 ലിറ്റര് അരിഷ്ടത്തിന് 100 ml) തേന് ഒഴിക്കുക. ഇങ്ങനെ തയ്യാറാക്കിയ ഈ മരുന്ന് കഴിച്ചാല് ക്ഷയ രോഗം പെട്ടെന്ന് കുറയുന്നതാണ്. അലോപ്പതി മരുന്നിന്റെ കൂടെ ഈ മരുന്ന് ഉപയോഗിക്കാം.
കുഞ്ഞ് ജനിച്ച് 28 -)o നാളില് കുഞ്ഞിന് കടുക്ക, ജാതിക്ക, നെല്ലിക്ക, മാശിക്ക്, രുദ്രാക്ഷം, മുത്തങ്ങ,കായം, സ്വര്ണ്ണം എന്നിവ അരച്ച് അല്പ്പം കഴിക്കാന് കൊടുക്കാം. ചുരുങ്ങിയത് 56 വരെയെങ്കിലും കൊടുക്കണം. ഇതു ആരോഗ്യത്തിനും ചര്മ്മകാന്തിക്കും നല്ലതാണ്.
പ്രസവശേഷം മൂന്നുമാസം കുട്ടികള്ക്ക് മുലപ്പാല് തന്നെയാണ് ഉത്തമാഹാരം. മൂന്നുമാസത്തിന് ശേഷം കുട്ടി രോഗിയല്ലെങ്കില് പണിപുല്ല് ഉണക്കിനല്കുകയോ പച്ച നേന്ത്രക്കായ ഉണക്കിപൊടിച്ച് പാകം ചെയ്ത് നല്കുന്നതും കുട്ടിയുടെ രോഗപ്രധിരോധശേഷി വര്ദ്ധിപ്പിക്കാന് സഹായിക്കും
പയര്വര്ഗങ്ങള്, സസ്യങ്ങള്, ഔഷധ കായകള് എന്നിവ കൂട്ടി ഉണക്കി പൊടിച്ച് നല്കുന്നത് കുട്ടിയുടെ ആരോഗ്യത്തിനും ഒരു പരിധി വരെ സഹായിക്കുന്നു.
ഗര്ഭിണികള്ക്ക് സുഖപ്രസവത്തിനുവേണ്ടി കര്ളാടി, കൊത്തംപാല, ജീരകം എന്നിവ അരച്ച് ചെറിയരിക്കൊണ്ട് കഞ്ഞിയുണ്ടാക്കി ഒരാഴ്ച കൊടുക്കുന്നത് നല്ലതാണ്. കരിമുരുക്കിന്റെ ഇല ഇടിച്ചുപിഴിഞ്ഞ് നീരെടുക്കുക. കൊത്തംപാല, മല്ലി, ഉപ്പ്, ഉള്ളി എന്നിവ ചേര്ത്തരച്ച് അല്പം മോരില് തിളപ്പിച്ചത് രാവിലെമുലയൂട്ടുന്ന അമ്മ സേവിക്കുക. അമ്മയുടെയും കുഞ്ഞിന്റെയും വയര് ശുദ്ധമാവും.
ഞണ്ട്, ഞവിഞ്ഞി മാംസം എന്നിവ കഴിക്കാം.
സന്താന നിയന്ത്രണത്തിനു കല്ലുവാഴയുടെ അകത്തെ കൂമ്പ് കഴിച്ചാല് സ്ത്രീകള്ക്ക് ഗര്ഭധാരണം തടയാന് കഴിയും. പ്രസവത്തിനു ശേഷം സ്ത്രീകള്ക്ക് വയറ്റിലെ പുണ്ണ് കരിയുവാന് വേണ്ടി മുക്കിടി മരുന്നും, ഇളയ പൂക്കുല അരിഞ്ഞും, അരിക്കിന് വെള്ളത്തിലോ മോരിലോ വേവിച്ച് ഒപ്പം മല്ലി, വെളുത്തുള്ളി, കുരുമുളക്,ജീരകം എന്നിവ അരച്ച് ഒരു മരപലകയില് പരത്തി വെച്ച് ഉണക്കുക. അതില് നിന്ന് കഷ്ണമെടുത്ത് മോരില് വേവിച്ച് കുടിക്കുക
അവസാനം പരിഷ്കരിച്ചത് : 1/28/2020
കൂടുതല് വിവരങ്ങള്
ആഹാരപദാര്ഥടങ്ങള് ദഹിക്കാതിരിക്കുന്ന അവസ്ഥ
അമിതവണ്ണം നിയന്ത്രിക്കുന്നതില് ആഹാര നിയന്ത്രണത്തിന...
കൂടുതല് വിവരങ്ങള്