അമിതവണ്ണം ആപത്ത്

എന്താണ് അമിതവണ്ണം?

കൊച്ചു കുട്ടികളിൽ തുടങ്ങി പ്രായഭേദമന്യേ പലരും അഭിമുകരിക്കുന്ന ഒരു പ്രശ്നമാണ് അമിതവണ്ണം അഥാവ ഒബീസിറ്റി. ജീവിതനിലവാരം ഉയർന്നതോടെ അമിതവണ്ണവും അനുബന്ധ രോഗങ്ങളും പിടിപെടാനുള്ള സാധ്യതയും കൂടി. ഒരാളുടെ ഉയരത്തിൽ നിന്ന് 100 കുറച്ച് കിട്ടുന്ന സംഖ്യയായിരിക്കണം അയാളുടെ ശരീരഭാരം. 

അമിതവണ്ണം എങ്ങനെ ഉണ്ടാകുന്നു?
നാം കഴിക്കുന്ന ആഹാരം ഓരോ പ്രവർത്തിയും ചെയ്യുന്നതിനുള്ള ഊർജം പ്രദാനം ചെയ്യുന്നു. 50 ശതമാനം കാർബോഹൈഡ്രേറ്റും 30 ശതമാനം മാംസ്യവും 20 ശതമാനം കൊഴുപ്പും എന്ന ക്രമത്തിലായിരിക്കണം നാം കഴിക്കേണ്ടത്. പലപ്പോഴും ഇതിൽ നിന്ന് വ്യത്യസ്തമായി നമുക്ക് ഇഷ്ടപ്പെട്ട ആഹാരം ധാരാളമായി കഴിക്കുന്ന ഒരു രീതിയാണ് പലർക്കും ഉള്ളത്. ഏത് ആഹാരം അമിതമായി കഴിച്ചാലും അതിനനുസരിച്ച് നമ്മൾ ശരീരം ഉപയോഗപ്പെടുത്തണം. ഉപയോഗപ്പെടുത്താതെ പോയാൽ കഴിച്ച ഭക്ഷണത്തിലൂടെ ലഭിച്ച അധിക കലോറി കൊഴുപ്പായി ശരീരത്തിൽ അടിഞ്ഞു കൂടുന്നു. ത്വക്കിനടിയിൽ കൊഴുപ്പിന്റെ ഒരു ആവരണം തന്നെ രൂപപ്പെടുന്നു. അമിതവണ്ണക്കാരുടെ വയർ, ഹിപ്പ്, ‍െനഞ്ച് തുടങ്ങിയ ഭാഗങ്ങൾ കൂടുതലായി തടിച്ചു തൂങ്ങി വരുന്നു. ഇത് പല രോഗങ്ങൾക്കും കാരണമാകുകയും ബോഡി മാസ് ഇൻഡക്സ് കൂടുകയും ചെയ്യുന്നു. ഇത് 30–ൽ കൂടുമ്പോൾ അമിതവണ്ണമായി കണക്കാക്കപ്പെടുന്നു. 

കാരണങ്ങൾ
അമിതവണ്ണത്തിനുള്ള കാരണങ്ങൾ പലതാണ്. പ്രധാന കാരണം ആഹാരരീതിയിലും ജീവിതശൈലിയിലും വന്ന വ്യത്യാസം തന്നെയാണ്. ശാരീരികമായുള്ള കാര്യങ്ങളും അമിതവണ്ണവുമായി ബന്ധപ്പെട്ടിരിക്കുന്നു. പിറ്റ്യൂട്ടറി ഗ്രസന്ഥി, തൈറോയ്ഡ് ഗ്രന്ഥി, അഡ്രിനൽ ഗ്രന്ഥി തുടങ്ങിയവയുടെ പ്രവർത്തന മാന്ദ്യത്താൽ ശരീരത്തിന്റെ ഭാരം കൂടുന്നുണ്ട്. വ്യായാമശീലം തീരെ ഇല്ലാത്തതും പാരമ്പര്യവും ഇതിലേക്ക് വഴിവയ്ക്കുന്നവയാണ്. 

പാരമ്പര്യവും ഒബീസിറ്റിയും
കുടുംബത്തിൽ എല്ലാവർക്കും വണ്ണമുണ്ട് എന്ന പേരിൽ അമിതവണ്ണം പിടിപെടാനുള്ള സാധ്യത വെറും അഞ്ച് ശതമാനം മാത്രമാണ്. മാതാപിതാക്കൾ അമിതവണ്ണമുള്ളവർ ആണെങ്കിൽ കുട്ടികളിൽ അമിതവണ്ണം ഉണ്ടാകാനുള്ള സാധ്യതയുണ്ട്. ജനിതകഘടകങ്ങളിൽ വരുന്ന വ്യത്യാസങ്ങളാണ് ഇതിനു കാരണം. അവരിൽ കൊഴുപ്പ് അടങ്ങിയ കോശങ്ങൾ കൂടുതലായി ഉണ്ടാകും. കൊഴുപ്പിനെ ആഗിരണം ചെയ്യാനും ശരീരത്തിലെ പ്രവർത്തനങ്ങൾ ശരിയായ രീതിയിൽ നടക്കാതെ വരികയും ചെയ്യുമ്പോൾ കൊഴുപ്പ് അടിഞ്ഞു കൂടി ഭാരം കൂടാനുള്ള സാധ്യതയുണ്ടാകുന്നു. 

ഭക്ഷണം ധൃതിയിൽ വാരിവലിച്ച് കഴിക്കാതെ സാവധാനം ചവച്ചരച്ച് വായിലെ സലൈവയുമായി വേണ്ട വിധത്തിൽ ചേർന്ന് വേണം കഴിക്കാൻ. ദഹനപ്രക്രിയയുടെ ആദ്യഘട്ടം തുടങ്ങുന്നത് വായിൽ നിന്നാണ്. ചവച്ചരച്ച് വേണ്ട സമയം എടുത്ത് കഴിക്കുമ്പോൾ വളരെ കുറച്ച് ആഹാരം കൊണ്ടു തന്നെ നമുക്ക് വയർ നിറയുന്നതായി തോന്നും. 15 മുതൽ 20 മിനിറ്റു വരെ സമയം മതിയായി എന്ന് ഓർമപ്പെടുത്തുന്ന സിഗ്നൽ നമ്മുടെ തലച്ചോറിൽ നിന്നു ലഭിക്കാൻ. ധൃതിയിൽ ചവച്ചരയ്ക്കാതെ കഴിക്കുമ്പോൾ ഭക്ഷണം മതിയായി എന്ന സന്ദേശം ലഭിക്കാത്ത അവസ്ഥ സംജാതമാകുന്നു. അങ്ങനെയുള്ള വ്യക്തികളിലും അമിതവണ്ണം ഉണ്ടാകാനുള്ള സാധ്യത കൂടുതലാണ്. 

ഒരു കുടുംബത്തിലെ എല്ലാവരും വണ്ണമുള്ളവരാണെങ്കിൽ അവരുടെ വണ്ണം കുറയ്ക്കാൻ എളുപ്പാണ്. ഒരേ ആഹാരരീതിയിലേക്ക് അവരെ കൊണ്ടു വരാനും ജീവിതശൈലിയിൽ മാറ്റങ്ങൾ കൊണ്ടുവരാനും സാധ്യമാണ്.

അമിതവണ്ണക്കാരുടെ ആഹാരരീതി ഇങ്ങനെ

അമിതവണ്ണത്തിൽ ഏറ്റവും പ്രധാന വില്ലൻ ആഹാരം തന്നെയാണ്. എന്നാൽ പട്ടിണി കിടന്ന് വണ്ണം കുറയ്ക്കാനും സാധിക്കില്ല. അതു പോഷകാഹാരക്കുറവ് മൂലമുള്ള പല രോഗങ്ങളിലേക്കും വഴിവയ്ക്കുന്നതിനേ ഉപകരിക്കൂ. 

ജോലിയുമായി ബന്ധപ്പെട്ടുള്ള ഒബീസിറ്റി ഇന്ന് വളരെയധികം കാണപ്പെടുന്നുണ്ട്. ദിനചര്യയിൽ വരുന്ന വ്യത്യാസമാണ് ഇവിടെ വില്ലനാകുന്നത്. രാവിലെ എഴുന്നേറ്റ് പ്രാഥമിക കർമങ്ങൾ നിർവഹിച്ച ശേഷം വിശപ്പ് ഉണ്ടെന്ന് അറിഞ്ഞതിനു ശേഷം മാത്രം ഭക്ഷണം കഴിക്കുക. നാം കഴിച്ച ആഹാരം വേണ്ട വിധത്തിൽ ദഹിച്ചെങ്കിൽ മാത്രമേ വിശപ്പ് ഉണ്ടാകൂ. പ്രധാനമായും മൂന്ന് ആഹാരകാലങ്ങളാണ് പറയുന്നത്. രാവിലെ കഴിച്ച ആഹാരം ദഹിച്ചതിനു ശേഷം മാത്രം ഉച്ചയ്ക്ക് ഭക്ഷിക്കുക. അതുപോലെ തന്നെ രാത്രിയിലെ ആഹാരവും. ഇവ കഴിക്കുന്ന രീതിക്കും പ്രത്യേകതകളുണ്ട്. 

ഇഷ്ടപ്പെട്ട ആഹാരം സമയനിഷ്ഠയില്ലാതെ കൂടെക്കൂടെ കഴിക്കുന്നവരാണ് നമ്മളിൽ പലരും. കൃത്യസമയത്ത് ഉറങ്ങുകയും സമയത്ത് ഉണർന്ന് എഴുന്നേൽക്കാതിരിക്കുകയും ചെയ്യുന്ന അവവസ്ഥയുമുണ്ട്. ഇപ്പോഴത്തെ കുട്ടികളിൽ പലരും വളരെ വൈകി ഉറങ്ങുന്നവരും വൈകി എഴുന്നേൽക്കുന്നവരുമാണ്. ഇതു നമമ്മുടെ അഗ്നിദീപ്തിയിൽ വ്യത്യാസങ്ങൾ ഉണ്ടാക്കുന്നു. 

ആഹാരം കഴിക്കാതിരിക്കുന്നത് വണ്ണം കുറയ്ക്കുന്നതിനുള്ള പരിഹാരമാർഗമല്ല. സമീകൃതാഹാരം അല്ലെങ്കിൽ നാരുകളടങ്ങിയ പച്ചക്കറികളും പഴങ്ങളും ധാരാളം കൊണ്ടുവരിക.ശരീരത്തിനുള്ളിലെ പ്രവർത്തനങ്ങളെ സുഗമമാക്കാനും ശരിയായ മലശോധനയ്ക്കും കൊഴുപ്പ് അടിയുന്നത് തടയാനും ഇവ കഴിക്കുന്നത് സഹായിക്കും. ഫാസ്റ്റ്ഫുഡും ജങ്ക്ഫുഡും പൂർണമായും ഒഴിവാക്കുക. മയണൈസ്, ചീസ് എന്നിവ ചേർത്ത വെജിറ്റേറിയൻ ആഹാരങ്ങളും കൊഴുപ്പു കൂട്ടുന്നവയാണ്. എണ്ണയിൽ വറുത്തതും പൊരിച്ചതുമായ സാധനങ്ങൾ ഒഴിവാക്കുക. റെഡ്മീറ്റും പോർക്കും കൊഴുപ്പ് കൂടുതൽ അടങ്ങിയിട്ടുള്ള ആഹാരങ്ങളാണ്. ആഹാര രീതിയിൽ വരുത്തുന്ന വ്യത്യാസത്തിലൂടെ ഓരോ സ്റ്റേജിലും ഉണ്ടാകുന്ന വണ്ണക്കൂടുതൽ പരിഹരിക്കാവുന്നതാണ്. ദിവസവും വ്യായാമത്തിനുള്ള അവസരം കൊടുക്കണം. ടിവി കാഴ്ച, വിഡിയോ ഗെയിം തുടങ്ങിയ ശരീരം അനങ്ങാതെയുള്ള കളികളിൽ നിന്ന് കുട്ടികളെ പിന്തിരിപ്പിക്കണം. ശാരീരിക വ്യായാമം ഉണ്ടാകാത്തക്ക രീതിയിൽ കളിക്കാനുള്ള അവസരം വീട്ടിൽ ഉണ്ടാക്കണം. മാതാപിതാക്കൾക്കും ഒപ്പം ചേർന്ന് ചെയ്യാവുന്ന വ്യായാമങ്ങൾ വീട്ടിൽത്തന്നെ പരിശീലിക്കാവുന്നതാണ്. ഓട്ടവും നടത്തവുമൊക്കെ ശാരീരിക വ്യായമങ്ങളാണ്. 

വെള്ളം ധാരാളം കുടിക്കുന്നത് വണ്ണം കുറയ്ക്കാൻ സഹായിക്കും. ശരീരത്തിനുള്ളിലെ പ്രവർത്തനങ്ങളെ ശുദ്ധീകരിക്കാൻ വെള്ളം കുടി നല്ലതാണ്. തണുത്ത വെള്ളമാണ് കുടിക്കുന്നതെങ്കിൽ ശരീരഊഷ്മാവിലേക്ക് കൊണ്ടുവരാൻ കുറച്ച് ഊർജം ഉപയോഗിക്കേണ്ടതായി വരും. ഇതിനെ കത്തിക്കാനായി കലോറി ഉപയോഗപ്പെടുത്താൻ സാധിക്കും.

അമിതവണ്ണത്തിനു മരുന്നുണ്ടോ?

ആഹാരം നിയന്ത്രിക്കാനോ വ്യായാമം ചെയ്യാനോ ഒന്നും താൽപര്യവും സമയവുമില്ല. കഴിക്കാൻ ഏതെങ്കിലും മരുന്ന് കിട്ടിയെങ്കിൽ നന്നായിരുന്നു. ഈ ചിന്ത തന്നെയാണ് പലരിലെയും അമിതവണ്ണത്തിനും കാരണമാകുന്നത്. മരുന്ന് മാത്രമായി കഴിക്കുക എളുപ്പമുള്ള കാര്യമല്ല. ഔഷധവും ആഹാരവും വ്യായാമവും യോജിപ്പിച്ചു കൊണ്ടുള്ള ചികിത്സാരീതിയേ ഫലപ്രദമാകൂ. കാർബോഹൈഡ്രേറ്റ് അല്ലെങ്കിൽ ഗ്ലൂക്കോസ് കണ്ടന്റ് ധാരാളം അടങ്ങിയിട്ടുള്ള ധാന്യങ്ങൾ ഒഴിവാക്കാം. നമ്മുടെ അരിയാഹാരം ഇത്തരത്തിലുള്ള ഒന്നാണ്. ഇതു മാറ്റി ഊർജം കിട്ടത്തക്ക രീതിയിലുള്ള മറ്റ് ധാന്യങ്ങളെ ആശ്രയിക്കാം. തവിടു തെള്ളിയെടുത്തത്, കൂവരക്, തിന, ചാമയരി ഇവ കഞ്ഞിയായി ഉപയോഗിക്കാം. അതല്ലെങ്കിൽ ഇവ പൊടിച്ചെടുത്ത് പലഹാരങ്ങൾ ഉണ്ടാക്കിക്കഴിക്കാം. ഗോതമ്പും ഉപയോഗിക്കാവുന്നതാണ്. 

കൊഴുപ്പിന്റെ വിഘടനത്തിന് ഏറെ സഹായിക്കുന്ന ഒന്നാണ് അയൺ. അയൺ അടങ്ങിയിട്ടുള്ള ഇലക്കറികളും ആഹാരങ്ങളും ഭക്ഷണത്തിൽ ഉൾപ്പെടുത്തുകയാണെങ്കിൽ അത് പ്രകൃതിദത്തമായി തന്നെ കൊഴുപ്പ് കുറയ്ക്കാനും ബോഡി മാസ് കുറയ്ക്കാനും സഹായിക്കും. 

ഓരോ കാലഘട്ടത്തിലേക്കു മാറുമ്പോഴാണ് പലപ്പോഴും നമ്മൾ മനസിലാക്കുന്നത് വെയ്റ്റ് കൂടിവരികയാണെന്ന്. ജനിച്ചപ്പോൾ വളരെ മെലിഞ്ഞ് ഇരുന്ന കുട്ടി ഒരു സ്റ്റേജ് കഴിയുമ്പോൾ വണ്ണംവച്ച് വരുന്നതു കാണാം. ഇത്തരക്കാർക്ക് ആഹാരവും വ്യായാവും ഔഷധങ്ങളും ഉപയോഗിച്ച് ശരീരഭാരം നിയന്ത്രിക്കേണ്ടതാണ്. ഇന്നത്തെ കാലഘട്ടത്തിൽ വ്യായായമം എല്ലാവരും നിർബന്ധമായും ചെയ്തിരിക്കേണ്ടതാണ്.

വണ്ണം കുറയ്ക്കാൻ ആദ്യഘട്ടത്തിൽ ചെയ്യേണ്ടത്

ശരീരഭാരം കൂടുന്ന സമയത്ത് തന്നെ ആഹാരനിയന്ത്രണം കൊണ്ടുവരണം. ജീവിതശൈലിയിൽ ഒരു ചിട്ട കൊണ്ടുവരാ‍ൻ പ്രത്യേകം ശ്രദ്ധിക്കണം. ഓരോരുത്തരുടെയും ശരീരപ്രകൃതിക്കും ജോലിക്കും അനുസൃതമായ ആഹാരം കഴിക്കാനാണ് ആയുർവേദം നിർദേശിക്കുന്നത്. ഇഷ്ടമുള്ള ആഹാരം കഴിച്ച് വയർ നിറയ്ക്കുന്നതിനു പകരം അര വയർ ആഹാരം കൊണ്ടും കാൽ ഭാഗം വെള്ളത്തിനായും ബാക്കി കാൽഭാഗം വായുവിനായും ബാക്കിവയ്ക്കേണ്ടതാണ്. വേണ്ടുന്ന വിധത്തിൽ ദഹനം നടന്ന് അതിന്റെ നല്ല അംശം ശരീരം ആഗിരണം ചെയ്ത് അഴുക്കിനെ പുറത്തേക്കു കളയാനുള്ള ഒരു സജ്ജീകരണത്തിനായി ഇത്തരത്തിലുള്ള ആഹാരരീതിയിലേക്ക് പോകണം. 

അമിതവണ്ണമുള്ള വ്യക്തികൾ ആഹരത്തിന്റെ തുടക്കത്തിൽ തന്നെ രണ്ടു ഗ്ലാസ് വെള്ളം കുടിക്കുക. ഇത് വിശപ്പിനെ കുറയ്ക്കാനും ആഹരം കഴിക്കുന്നതിന്റെ അളവ് കുറയ്ക്കാനും ഗ്യാസ്ട്രിക് ജ്യൂസിനെ ഡൈല്യൂട്ട് ചെയ്യാനും സഹായിക്കും. കഴിച്ച ആഹാരം ദഹിക്കാനും ഇത് സഹായകമാണ്. ക്ഷീണിച്ചിരിക്കുന്ന പ്രകൃതക്കാർ ഭക്ഷണത്തിനു ശേഷം വെള്ളം കുടിക്കുക. മധ്യപ്രകൃതക്കാർ ഇടയ്ക്കിടയ്ക്ക് വെള്ളം കുടിക്കുക. 

മധുര പലഹാരങ്ങൾ കലോറിയുടെ കലവറയാണ്. സസ്യഭുക്കുകളായവരിൽ മധുരം അധികം കഴിക്കുന്നവരിലാണ് കൂടുതലായും അമിതവണ്ണം പ്രതൃക്ഷപ്പെടുന്നത്. നമ്മൾ അധികമായി കഴിക്കുന്ന ആഹാരം കൊഴുപ്പായി നിക്ഷേപിക്കുന്നത് ഒന്നോ രണ്ടോ ദിവസം ഭക്ഷണം കിട്ടാത്ത അവസരത്തിൽ ഉപയോഗിക്കാനായാണ്. ശരീരത്തിന്റെ പ്രവർത്തനങ്ങൾക്ക് ആവശ്യമായ കൊഴുപ്പ് സ്വതസിദ്ധമായിത്തന്നെ ഉണ്ടാകുന്നുണ്ട്. അതിനെ മറികടന്നാണ് ഇത്രയും കൊഴുപ്പ് നമ്മൾ ഉള്ളിലേക്ക് എടുക്കുന്നത്. അധികം മധുരമള്ളത്, മാസം, എണ്ണയിൽ പൊരിച്ചത് എന്നിവ കലോറി മൂല്യം കൂട്ടുന്ന ആഹാരങ്ങളാണ്,. ഇവ കുറച്ചാൽത്തന്നെ അമിതവണ്ണക്കാരിൽ വണ്ണം കുറയ്ക്കാനുള്ള ആദ്യപടിയായി.

ഒബീസിറ്റിയും അനുബന്ധ രോഗങ്ങളും

ശരീരഭാരം കൂടുന്നത് വകവയ്ക്കാതെ ആഹാരനിയന്ത്രണം നടത്താതെ വാരിവലിച്ചു കഴിക്കുന്നവർ ചെന്നെത്തുന്നത് പല മാരകരോഗങ്ങളിലേക്കുമാണ്. പ്രമേഹം, കൊളസ്ട്രോൾ, ഹൃദയസംബന്ധമായ രോഗങ്ങൾ, പക്ഷാഘാതം ഇവയെല്ലാം തന്നെ പരസ്പരം ബന്ധപ്പെട്ടു വരുന്ന ഒരു കൂട്ടം രോഗങ്ങളാണ്. കുട്ടികളായിരിക്കുമ്പോൾ തന്നെ വയർ, ചെസ്റ്റ്, ഹിപ്പ് ഭാഗങ്ങൾ വണ്ണംവച്ച് തൂങ്ങി വരുന്ന അവസ്ഥയിൽ ശ്രദ്ധിക്കേണ്ടത് ഇവർക്ക് ജീവിതശൈലീരോഗങ്ങൾ വരാനുള്ള സാധ്യതയാണ്. 

ഒരു പ്രമേഹരോഗി അമിതവണ്ണം ഉള്ള അൾ ആകണമെന്നില്ല. ടൈപ്പ് 2 ഡയബറ്റിസ് വരുന്നവരിൽ വണ്ണം കൂടിയവരും കുറഞ്ഞവരുമെന്നുണ്ട്. അമിതവണ്ണമുള്ളവരിൽ 85 ശതമാനം പേർക്കും പ്രമേഹം വരാനുള്ള സാധ്യത കൂടുതലാണ്. 

കൊഴുപ്പ് രക്തധമനികളിൽ അടിഞ്ഞുകൂടി കൊറോണറി ഹാർട്ട് ഡിസീസ് വരാനുള്ള സാധ്യതയുമുണ്ട്. വ്യായാമക്കുറവും കൊഴുപ്പിന്റെ അംശം കൂടിയിരിക്കുന്നതു കൊണ്ടും ബി പി കൂടി എപ്പോഴും ഹൈപ്പർ ടെൻസീവായി കാണപ്പെടറുണ്ട്. ചിലരിൽ ഹൃദയത്തിന്റെ മസിലുകൾ അയഞ്ഞ് അതിന്റെ പ്രവർത്തനക്ഷമത കുറയുന്ന അവസ്ഥയുമുണ്ടാകാറുണ്ട്. ചെറുപ്പത്തിലെ അമിതവണ്ണമുള്ളവരെ പ്രായമായി വരുന്തോറും ഇത്തരം രോഗങ്ങളിലേക്കു തള്ളിവിടാതെ ആഹാരത്തിൽ വളരെയധികം ചിട്ട കൊണ്ടുവരണം. 

പിത്താശയത്തിന്റെ ഗോൾ ബ്ലാഡറിൽ കൊഴുപ്പ് അടിഞ്ഞ് അത് അടഞ്ഞു പോകുന്ന അവസ്ഥ അമിതവണ്ണക്കാരിൽ കണ്ടുവരുന്നുണ്ട്. ഗോൾബ്ലാഡറിൽ നിന്നു വരുന്ന ബൈജ്യൂസാണ് ദഹനത്തിനു സഹായിക്കുന്നത്. കൊഴുപ്പ് ആഹാരങ്ങൾ അമിതമായി കഴിക്കുമ്പോൾ അകത്തു ചെല്ലുന്നതിനു മുൻപ് ഇത്തരത്തിലുള്ള പ്രശ്നങ്ങൾ അവരിൽ കൂടുതലായിട്ട് കാണാം. 

ഗ്യാസ് കെട്ടുക, ശ്വാസനാളം അടയുന്നതു പോലെ തോന്നുക തുടങ്ങിയവ കൊഴുപ്പ് അടിയുന്നതുകൊണ്ട് ഉണ്ടാകുന്നവയാണ്. വളരെ ചെറുപ്രായത്തിൽ തന്നെ പലർക്കും ഗോൾബ്ലാഡർ നീക്കം ചെയ്യേണ്ട അവസ്ഥയുമുണ്ടാകുന്നു. 

ശരീരം ശുദ്ധീകരിക്കുന്ന ഒരു പ്രധാന അവയവമാണ് ലിവർ. അമിതവണ്ണക്കാരിൽ പലരിലും കണ്ടു വരാറുള്ള ഒരു പ്രധാന രോഗമാണ് കൊഴുപ്പ് അടിഞ്ഞിട്ട് ഉണ്ടാകുന്ന ഫാറ്റി ലിവർ. ഓരോ സ്റ്റേജ് കഴിയുന്തോറും ഇത് ലിവർ സിറോസിസിലേക്ക് വഴിമാറും. ഇതാകട്ടെ, മാരകമായിട്ടുള്ള ഒരു കാൻസർ സ്റ്റേജാണ്. 

അമിതവണ്ണമുള്ള പുരുഷൻമാരിൽ കാണുന്ന മറ്റൊരു അവസ്ഥയാണ് പ്രോസ്റ്ററുമായി ബന്ധപ്പെട്ടു വരുന്ന പ്രോസ്റ്റേറ്റ് കാൻസർ പോലുള്ളവ. പ്രോസ്റ്റേറ്റ് ഗ്രന്ഥിക്കു വീക്കം വരുക, മൂത്രതടസം അനുഭവപ്പെടുക, വൃക്കയുടെ പ്രവർത്തനങ്ങളെ ബാധിക്കുക തുടങ്ങിയവ ഇതുമായി ബന്ധപ്പെട്ടു വരുന്നു. 

പഞ്ചകർമചികിത്സ ഫലപ്രദം 
ശരീരത്തെ പഞ്ചകർമങ്ങൾ കൊണ്ട് ശുദ്ധിയാക്കുന്നത് അവരുട എൻഡോക്രെയ്ൻ ഗ്രന്ഥികൾ വേണ്ട വിധത്തിൽ പ്രവർത്തിക്കുകയും ഉപാപചയ പ്രവർത്തനങ്ങൾ ശരിയായ രീതിയിൽ നടക്കുകയും ചെയ്യും. ഇതുവഴി അമിതവണ്ണവും അതുമായി ബന്ധപ്പെട്ടുള്ള രോഗങ്ങളെയും മാറ്റാൻ സാധിക്കും.

സ്ത്രീകളിലെ അമിതവണ്ണം അപകടത്തിലേക്ക്

പെൺകുട്ടികളിൽ അമിതവണ്ണം നിരവധി പ്രശ്നങ്ങൾ സൃഷ്ടിക്കുന്നുണ്ട്. ഗർഭാശയവും അതിനോട് അനുബന്ധമായിട്ടുള്ള പ്രശ്നങ്ങൾ ഇപ്പോൾ വളരെ കൂടുതലാണ്. ഗർഭാശയ മുഴ, ഗർഭാശയ കാൻസർ വരെ ഉണ്ടാകുന്നുണ്ട്. അമിതമായ കൊഴുപ്പ് ശരീരത്തിൽ പ്രവേശിക്കുമ്പോൾ ശരീരത്തിലെ കോശങ്ങളുടെ വളർച്ച പോലെതന്നെ അണ്ഡാശയത്തിൽ ഓവം രൂപപ്പെടാതെ സിസ്റ്റിക് ചെയ്ഞ്ചായി അതു പൊട്ടുകയും കാൻസറായി മാറുകയും ചെയ്യും. 

ക്രമം തെറ്റിയുള്ള ആർത്തവം ഇന്ന് പല പെൺകുട്ടികളും അഭിമുഖീകരിക്കുന്ന ഒരു പ്രധാന പ്രശ്നം തന്നെയാണ്. തൈറോയ്ഡ് ഗ്രന്ഥിയുടെ പ്രവർത്തനങ്ങളും സ്ത്രീ ഹോർമോണുകളായ ഈസ്ട്രജൻ പ്രോജസ്ടറോൺ തുടങ്ങിയവയുടെ പ്രവർത്തനങ്ങളും ബന്ധപ്പെട്ടു കിടക്കുന്നവയാണ്. ഇങ്ങനെ വരുന്നവരിൽ ആദ്യമേ തന്നെ നിർദേശിക്കുന്നത് ഭാരം കുറയ്ക്കാനാണ്. ഇത് എൻഡോക്രെയ്ൻ ഗ്രന്ഥിയെ ശരിയായി പ്രവർത്തിപ്പിക്കാൻ സഹായിക്കുകയും അതുവഴി ഈ പ്രശ്നങ്ങൾ പരിഹരിക്കാനും സാധിക്കുന്നു. 

വന്ധ്യതാപ്രശ്നവുമായി വരുന്നവരും നിരവധിയാണ്. ജോലിത്തിരക്കും കൃത്യനിഷ്ഠയില്ലാതെയുള്ള ആഹാരരീതിയും വ്യായാമക്കുറവും ഇന്നു പല പെൺകുട്ടികളേയും വന്ധ്യതയിലേക്ക് കൊണ്ടെത്തിക്കുന്നു. ഉദ്വർത്തനം പോലുള്ള ആയുർവേദ ചികിത്സകൾ വഴി ശരീരഭാരം കുറയ്ക്കുകയും മൃദു വിരേചനങ്ങളും ഡയറ്റ് ക്രമീകരണവും വഴി അണ്ഡവിസർജനം നടത്തി അണ്ഡോത്പാദനത്തെ സഹായിക്കുകയും ചെയ്യുന്ന ധാരകളും വസ്തി പ്രയോഗങ്ങളും ആയുർവേദം നിർദേശിക്കുന്നുണ്ട്.

അമിതവണ്ണക്കാരുടെ ആയുർവേദ ചികിത്സ

വളരെ കഷ്ടപ്പെട്ട് പഥ്യനിഷ്ഠയോടു കൂടിയുള്ള ചികിത്സയാണ് ആയുർവേദം അനുശാസിക്കുന്നത്. കഫമേദസുകളെ ഘനിക്കുന്ന രീതിയിൽ അല്ലെങ്കിൽ ചേതനീയമായിട്ടുള്ളരും രൂക്ഷമായിട്ടുള്ള ആഹാരങ്ങളും സ്വേദപ്രയോഗങ്ങളുമൊക്കെയാണ് ചെയ്യുക. ഉദ്വർത്തനം പോലുള്ള ചികിത്സകൾ രൂക്ഷസ്വേദമാണ്. സൂക്ഷ്മചൂർണങ്ങൾ, ധാന്യചൂർണങ്ങൾ എന്നിവ പൊടിച്ചത് മുകളിലേക്ക് ശ്കതമായി പൊഡർ മസാജ് ചെയ്യുന്നു. ഇങ്ങനെ ചെയ്യുമ്പോൾ അഡിപ്പോസ് ഫാറ്റിനെ അത് വിലയിപ്പിച്ചു കളയും. ഇത് ട്രീറ്റ്മെന്റ് ചെയ്തുകൊടുക്കുന്ന വ്യക്തികൾക്കും ക്ലേശകരമായിട്ടുള്ള ഒന്നാണ്. 

അഡിപ്പോസ് ഫാറ്റിനെ നല്ല ശക്തിയോടെ തിരുമ്മി അതിനെ വിലയിപ്പിച്ചു കളയുകയാണു ചെയ്യുന്നത്. അത് സിസ്റ്റത്തിലൂടെ കടന്ന് ഗോഷ്ഠത്തിൽ വരികയും വിരേചനം, വസ്തി, കഷായവസ്തി തുടങ്ങിയ ശോധനപ്രയോഗങ്ങൾ വഴി പുറത്തേക്ക് കളഞ്ഞ് ശരീരത്തെ ശുദ്ധിചെയ്യുന്നു. 

വരണാദി കഷായം, വരാഘ്വാദം, വരാചൂർണം, ത്രിഫല ചൂർണം തേനിൽ ചാലിച്ചത് തുടങ്ങിയ ഔഷധപ്രയോഗങ്ങളാണ് സാധാരണ ചെയ്യാറുള്ളത്. കഷായയോഗങ്ങളും ആയുർവേദം നിർദേശിക്കുന്നുണ്ട്. ഇവ ഓരോന്നും ഓരോ അവസ്ഥയ്ക്കനുസരിച്ച് ഉപയോഗപ്പെടുത്താവുന്നതാണ്. രൂക്ഷവും ഉഷ്ണവുമായിട്ടുള്ള ആഹാരങ്ങളാണ് നൽകുന്നത്. കലോറി കുറഞ്ഞ ആഹാരങ്ങളാണ് കഴിക്കേണ്ടത്.

വണ്ണം കുറയ്ക്കാൻ ആദ്യഘട്ടത്തിൽ ചെയ്യേണ്ടത്

ശരീരഭാരം കൂടുന്ന സമയത്ത് തന്നെ ആഹാരനിയന്ത്രണം കൊണ്ടുവരണം. ജീവിതശൈലിയിൽ ഒരു ചിട്ട കൊണ്ടുവരാ‍ൻ പ്രത്യേകം ശ്രദ്ധിക്കണം. ഓരോരുത്തരുടെയും ശരീരപ്രകൃതിക്കും ജോലിക്കും അനുസൃതമായ ആഹാരം കഴിക്കാനാണ് ആയുർവേദം നിർദേശിക്കുന്നത്. ഇഷ്ടമുള്ള ആഹാരം കഴിച്ച് വയർ നിറയ്ക്കുന്നതിനു പകരം അര വയർ ആഹാരം കൊണ്ടും കാൽ ഭാഗം വെള്ളത്തിനായും ബാക്കി കാൽഭാഗം വായുവിനായും ബാക്കിവയ്ക്കേണ്ടതാണ്. വേണ്ടുന്ന വിധത്തിൽ ദഹനം നടന്ന് അതിന്റെ നല്ല അംശം ശരീരം ആഗിരണം ചെയ്ത് അഴുക്കിനെ പുറത്തേക്കു കളയാനുള്ള ഒരു സജ്ജീകരണത്തിനായി ഇത്തരത്തിലുള്ള ആഹാരരീതിയിലേക്ക് പോകണം. 

അമിതവണ്ണമുള്ള വ്യക്തികൾ ആഹരത്തിന്റെ തുടക്കത്തിൽ തന്നെ രണ്ടു ഗ്ലാസ് വെള്ളം കുടിക്കുക. ഇത് വിശപ്പിനെ കുറയ്ക്കാനും ആഹരം കഴിക്കുന്നതിന്റെ അളവ് കുറയ്ക്കാനും ഗ്യാസ്ട്രിക് ജ്യൂസിനെ ഡൈല്യൂട്ട് ചെയ്യാനും സഹായിക്കും. കഴിച്ച ആഹാരം ദഹിക്കാനും ഇത് സഹായകമാണ്. ക്ഷീണിച്ചിരിക്കുന്ന പ്രകൃതക്കാർ ഭക്ഷണത്തിനു ശേഷം വെള്ളം കുടിക്കുക. മധ്യപ്രകൃതക്കാർ ഇടയ്ക്കിടയ്ക്ക് വെള്ളം കുടിക്കുക. 

മധുര പലഹാരങ്ങൾ കലോറിയുടെ കലവറയാണ്. സസ്യഭുക്കുകളായവരിൽ മധുരം അധികം കഴിക്കുന്നവരിലാണ് കൂടുതലായും അമിതവണ്ണം പ്രതൃക്ഷപ്പെടുന്നത്. നമ്മൾ അധികമായി കഴിക്കുന്ന ആഹാരം കൊഴുപ്പായി നിക്ഷേപിക്കുന്നത് ഒന്നോ രണ്ടോ ദിവസം ഭക്ഷണം കിട്ടാത്ത അവസരത്തിൽ ഉപയോഗിക്കാനായാണ്. ശരീരത്തിന്റെ പ്രവർത്തനങ്ങൾക്ക് ആവശ്യമായ കൊഴുപ്പ് സ്വതസിദ്ധമായിത്തന്നെ ഉണ്ടാകുന്നുണ്ട്. അതിനെ മറികടന്നാണ് ഇത്രയും കൊഴുപ്പ് നമ്മൾ ഉള്ളിലേക്ക് എടുക്കുന്നത്. അധികം മധുരമള്ളത്, മാസം, എണ്ണയിൽ പൊരിച്ചത് എന്നിവ കലോറി മൂല്യം കൂട്ടുന്ന ആഹാരങ്ങളാണ്,. ഇവ കുറച്ചാൽത്തന്നെ അമിതവണ്ണക്കാരിൽ വണ്ണം കുറയ്ക്കാനുള്ള ആദ്യപടിയായി.

കടപ്പാട് : മനോരമ ഓണ്‍ലൈന്‍ ന്യൂസ്‌