অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ആയുര്‍വേദ പൊടികൈകള്‍

മുടിയഴകിന് ആയുര്‍വേദം

മുടിയുടെ സംരക്ഷണത്തിന് ആയുര്‍വേദം ഫലപ്രദമാണ്. മുടികൊഴിച്ചില്‍, അകാലനര, താരന്‍ തുടങ്ങിയ മുടിയെ ബാധിക്കുന്ന എല്ലാപ്രശ്‌നങ്ങള്‍ക്കും 
ആയുര്‍വേദത്തില്‍ പരിഹാരമുണ്ട്.

സ്ത്രീയുടെയും പുരുഷന്റെയും സൗന്ദര്യ സങ്കല്‍പ്പങ്ങളില്‍ പ്രധാനപ്പെട്ട ഒരു സ്ഥാനമാണ് മുടിക്കുള്ളത്. നമ്മുടെ ശരീരത്തില്‍ ഏറ്റവും വേഗം വളരുന്ന കോശസമൂഹങ്ങളിലൊന്നാണ് മുടി.

നേരിയ ക്ഷതങ്ങളില്‍ നിന്നും തലയെ രക്ഷിക്കാനും സൂര്യാതാപവും അള്‍ട്രാ വയലറ്റ് രശ്മികളും നേരിട്ട് തലയില്‍ പതിക്കാതിരിക്കാനും തലമുടി സഹായിക്കുന്നു. എന്നാല്‍ മുടി സംരക്ഷണം പറയുമ്പോലെ അത്ര നിസാരമല്ല.

കറുപ്പും കരുത്തുമുള്ള നീണ്ട് ഇടതൂര്‍ന്ന മുടി ഉണ്ടാകുവാന്‍ അല്‍പം ശ്രദ്ധയും പരിചരണവും ആവശ്യമാണ്. താരന്‍, മുടികൊഴിച്ചില്‍, അകാലനര ഇവയെ ചെറുക്കാന്‍ പ്രത്യേക പരിചരണം കൊണ്ടേ കഴിയൂ.

കുളിക്കുമ്പോള്‍ തലമുടിക്കിടയിലൂടെ തലയോട്ടയില്‍ എല്ലായിടത്തും കൈവിരലുകളുടെ അറ്റം അമര്‍ത്തി മസാജ് ചെയ്യാന്‍ ശ്രദ്ധിക്കുക. നനഞ്ഞ മുടി കെട്ടി വയ്ക്കാതിക്കുക. മുടി നന്നായി ഉണങ്ങിയതിന് ശേഷമേ കെട്ടാവൂ.

ഇലക്‌ട്രോണിക് ഹെയര്‍ ഡ്രയര്‍ ഉപയോഗിച്ച് നിരന്തരം മുടി കൃത്രിമമായി ഉണക്കുവാന്‍ ശ്രമിച്ചാല്‍ മുടി പൊട്ടിപ്പിളരുവാന്‍ ഇടയുണ്ട്.

വേനല്‍ക്കാലത്ത് മുടിയില്‍ അഴുക്കും പൊടിയും പിടിക്കുന്നത് പെട്ടന്നായിരിക്കും. അതിനാല്‍ ആഴ്ചയില്‍ രണ്ടു തവണതെങ്കിലും താളിയോ ഹെര്‍ബല്‍ ഷാംപൂവോ ഉപയോഗിച്ച് തലമുടിയിലെ അഴുക്ക് നീക്കം ചെയ്യണം.

മുടി പരിചരിക്കുമ്പോള്‍

  1. മുടിയില്‍ എണ്ണ ആവശ്യത്തിന് മാത്രം ഉപയോഗിക്കുക
  2. മുടി നനയുമ്പോള്‍ ഇലാസ്തികത കൂടുന്നതിനാല്‍ ചീകുമ്പോള്‍ കൂടുതല്‍ വലിയുവാനും പൊട്ടിപ്പോകാനുമുള്ള സാധ്യത ഏറുന്നു
  3. വേഗത്തില്‍ ബ്രഷ് ചെയ്യുന്നത് മുടിക്ക് ദോഷം ചെയ്യും. അകന്ന പല്ലുകളുള്ള ചീപ്പുകൊണ്ട് വളരെ സാവധാനം ബ്രഷ് ചെയ്യണം.
  4. ഓയില്‍ മസാജിംഗ് തലയോട്ടിയിലെ രക്തയോട്ടം ത്വരിതപ്പെടുത്തുന്നു
  5. ഹെന്ന ഒരു നല്ല കണ്ടീഷണറാണ്
  6. പ്രോട്ടീനുകളും മിനറലുകളും അടങ്ങിയ ഭക്ഷണം (മുട്ട, പാല്‍, മുരിങ്ങാക്കായ്, കടല, സോയാബീന്‍) മുടിയുടെ വളര്‍ച്ചയ്ക്ക് നല്ലതാണ്.
  7. ഷാംപൂ ഉപയോഗിച്ച് മുടി കഴുകുന്നതിനു മുമ്പ് വെളിച്ചെണ്ണ തലയില്‍ നന്നായി തേച്ച് പിടിപ്പിക്കണം.
  8. ഒരു ടേബിള്‍ സ്പൂണ്‍ വെളിച്ചെണ്ണ ചൂടാക്കി തലയോട്ടിയില്‍ വിരല്‍ത്തുമ്പുകള്‍ കൊണ്ട് 10 മിനിട്ട് മസാജ് ചെയ്യുക. തലയോട്ടിയില്‍ രക്തയോട്ടം വര്‍ധിപ്പിക്കാന്‍ ഇത് നല്ലതാണ്.
  9. രാത്രി ഉറങ്ങുന്നതിന് മുമ്പ് മൃദുവായ തുണി കൊണ്ട് തല പൊതിഞ്ഞ് കെട്ടുക.
  10. ഷാംപൂ ഉപയോഗിച്ച് മുടി കഴുകിയതിനു ശേഷം നാലു കപ്പ് ചെറു ചൂടുവെള്ളത്തില്‍ ഒരു ടീസ്പൂണ്‍ തേന്‍ ചേര്‍ത്ത് മുടി കഴുകുക. മുടിക്ക് തിളക്കവും ഭംഗിയും കിട്ടാന്‍ ഇത് സഹായിക്കും.

മുടിയുടെ ആരോഗ്യത്തിന്

  1. നാം കഴിക്കുന്ന ഭക്ഷണത്തില്‍ വേണ്ടത്ര മാംസ്യം ഉണ്ടായിരിക്കണം. മുടിയുടെ വളര്‍ച്ചയ്ക്ക് അത്യന്താപേക്ഷിതമായ ഘടകമാണ് മാംസ്യം.
  2. തവിടു കളയാത്ത അരി, മുട്ട, മാംസം, പാല്‍, തൈര്, വെണ്ണ, പഴങ്ങള്‍, ഇലക്കറികള്‍ ഇവയെല്ലാം മുടിയുടെ വളര്‍ച്ചയ്ക്കും ആരോഗ്യത്തിനും ഒഴിച്ചുകൂടാനാവാത്ത ഭക്ഷണ പദാര്‍ഥങ്ങളാണ്.
  3. വിപണിയില്‍ ലഭിക്കുന്ന മിക്ക ഹെയര്‍ ഡൈകളിലും തലമുടിക്ക് ഹാനികരമായ പല രാസവസ്തുക്കളും അടങ്ങിയിരിക്കുന്നു. മൈലാഞ്ചി ഉപയോഗിച്ച് ഡൈ ചെയ്യുന്നതാണ് നല്ലത്.
  4. ആഹാരത്തില്‍ മുളക്, ഉപ്പ്, പുളി എന്നിവയുടെ അമിതമായ ഉപയോഗം മുടിയുടെ ബലക്കുറവിന് കാരണമാകും.
  5. അമിത ചിന്തകളും മാനസിക പിരിമുറുക്കവും മസ്തിഷ്‌ക താപത്തെ വര്‍ധിപ്പിക്കുന്നതിനാല്‍ മുടിയുടെ ദൃഢത കുറയാനിടയുണ്ട്.
  6. തേങ്ങാപ്പാല്‍ തലയില്‍ തേച്ചു കുളിക്കുന്നത് അമിതമായ ചൂടുകൊണ്ട് മുടി കൊഴിയുന്നത് തടയുവാന്‍ സഹായിക്കും.
  7. വേനല്‍ക്കാലത്ത് ദിവസവും രണ്ട് തവണയെങ്കിലും മുടി കഴുകണം.
  8. മുടിയുടെ വളര്‍ച്ചയ്ക്ക് അത്യാവശ്യമായ പോഷക ഘടകമാണ് ഇരുമ്പ്, ചീര, മുരിങ്ങയില തുടങ്ങിയ ഇലക്കറികള്‍. ഇവ ഭക്ഷണത്തില്‍ ധാരാളമായി ഉള്‍പ്പെടുത്തുക.
  9. കാരറ്റ്, തണ്ണിമത്തന്‍, ബീറ്റ്‌റൂട്ട് തുടങ്ങിയ ചുവന്ന നിറമുള്ള പഴങ്ങളിലും പച്ചക്കറികളിലും വൈറ്റമിന്‍ ബി ധാരാളമായി അടങ്ങിയിരിക്കുന്നു. ഇവ നിത്യാഹാരത്തില്‍ ഉള്‍പ്പെടുത്തുക.
  10. പുകവലി, സൂര്യപ്രകാശത്തിലെ അള്‍ട്രാ വയലറ്റ്് രശ്മികള്‍, ഹെയര്‍ ഡ്രൈയറിന്റെ സ്ഥിരമായ ഉപയോഗം എന്നിവ മുടിയെ ദോഷകരമായി ബാധിക്കുന്നു.
  11. വരണ്ട മുടിയുള്ളവര്‍ കണ്ടീഷണര്‍ അടങ്ങിയ, ഏഴില്‍ താഴെ പി.എച്ച് ലെവലുള്ള ഷാംപൂ ഉപയോഗിച്ച് മുടി കഴുകണം.

വീട്ടില്‍ തയാറാക്കാവുന്ന കണ്ടീഷണര്‍

മുടിക്ക് തിളക്കവും മൃദൃത്വവം കനവും നല്‍കുന്ന കണ്ടീഷണര്‍ വീട്ടില്‍ തയാറാക്കാം. ഒരു മുട്ട അടിച്ച് പതപ്പിച്ചതിലേക്ക് ഒരു ടീസ്പൂണ്‍ തേനും രണ്ട് ടീസ്പൂണ്‍ വെളിെച്ചണ്ണയോ ചേര്‍ക്കുക. ഇതു തലയോട്ടിയില്‍ നന്നായി തേച്ച് പിടിപ്പിച്ചതിന് ശേഷം മുടിയില്‍ ആവികൊള്ളിക്കുക. അതു കഴിഞ്ഞ് ഷാംപൂ ചെയ്യുക.

വരണ്ട മുടി ഈര്‍പ്പമുള്ളതാക്കാം

ഒരു ചെറിയ പാത്രത്തില്‍ വാഴപ്പഴം കുഴമ്പുരൂപത്തിലാക്കി എടുക്കുക. ഇതില്‍ നിന്നും ഒരു ടീസ്പൂണ്‍ കുഴമ്പെടുത്ത് അതില്‍ അര ടീസ്പൂണ്‍ കര്‍പ്പൂര തൈലം ചേര്‍ക്കുക. രണ്ട് മിനിട്ടോളം ഈ മിശ്രിതം നന്നായി ഇളക്കുക.

നനഞ്ഞ മുടിയില്‍ ഇതുപയോഗിച്ച് മസാജ് ചെയ്യുക. അഞ്ച് മിനിട്ട് കഴിഞ്ഞ് ഷാംപൂ ഉപയോഗിച്ച് തലയില്‍ പുരട്ടിയ മിശ്രിതം കഴുകിക്കളയുക.

ടിയപാളയംകോടന്‍ പഴം ഒരു ടീസ്പൂണ്‍ ഒലിവ് ഓയില്‍ ചേര്‍ത്ത് മിക്‌സിയില്‍ അടിച്ച് പതപ്പിച്ച് മുടിയില്‍ തേച്ച് നന്നായി മസാജ് ചെയ്യുക. പത്ത് മിനിട്ടിനു ശേഷം കുളിക്കുക. രണ്ടാഴ്ചയിലൊരിക്കല്‍ ഇപ്രകാരം ചെയ്താല്‍ മുടിക്ക് നല്ല തിളക്കവും മൃദുത്വവും ലഭിക്കും.

അകാലനര

ആധുനിക ജീവിതവും ചുറ്റുപാടുകളും ചേര്‍ന്ന് നമുക്ക് സമ്മാനിച്ച ആരോഗ്യപ്രശ്‌നങ്ങളില്‍ ഒന്നാണ് 'അകാല നര'. തലമുടിക്ക് നിറം നല്‍കുന്ന മെലാനിന്‍ പിഗ്‌മെന്റ് ഉല്‍പാദിപ്പിക്കുന്നത് മെലനോസൈറ്റ് കോശങ്ങളാണ്.

ഈ കോശങ്ങളുടെ എണ്ണം കുറയുകയോ പ്രവര്‍ത്തനം നിലയ്ക്കുകയോ ഇവ നശിച്ചുപോവുകയോ ചെയ്യുമ്പോഴാണ് അകാലനര ഉണ്ടാകുന്നത്. മുപ്പത് വയസിനു മുമ്പേ നര തുടങ്ങുന്നതിനെയാണ് അകാല നര എന്നതുകൊണ്ട് ഉദ്ദേശിക്കുന്നത്.

അകാലനര തടയാന്‍ ചില മാര്‍ഗങ്ങള്‍

  1. അയണ്‍, വിറ്റാമിനുകള്‍, പോഷണം എന്നിവയുടെ കുറവു മൂലം നരയുണ്ടാകാം
  2. മാനസിക - ശാരീരിക സമ്മര്‍ദങ്ങള്‍ നരയ്ക്കു കാരണമാകുന്നു
  3. തിരക്കേറിയ ജീവിതം സമ്മാനിക്കുന്ന മാനസിക സമ്മര്‍ദങ്ങള്‍ മൂലം ശരീരോഷ്മാവ് കൂടാനും അതുവഴി മുടി നരയ്ക്കാനും കാരണമായേക്കാം
  4. മുടി കഴുകാന്‍ ഒരിക്കലും ചൂടുവെള്ളം ഉപയോഗിക്കരുത്
  5. ദിവസവും രാത്രി അല്‍പം ഉണക്കനെല്ലിക്ക വെള്ളത്തിട്ട് പിറ്റേന്ന് ഇതേ വെള്ളത്തില്‍ നെല്ലിക്ക പിഴിഞ്ഞ് അരിച്ചെടുത്ത് തലയില്‍ തേയ്ക്കുക
  6. കറ്റാര്‍വാഴപ്പോള നീര് വെളിച്ചെണ്ണയില്‍ കാച്ചി തലയില്‍ തേയ്ക്കുക
  7. ചുവന്നുള്ളി അരിഞ്ഞ് വെളിച്ചെണ്ണയിലിട്ട് കാച്ചി തേച്ചാല്‍ തലമുടി തഴച്ചു വളരും
  8. കറിവേപ്പില ധാരാളം ചേര്‍ത്ത് വെളിച്ചെണ്ണ കാച്ചി തലയില്‍ തേയ്ക്കുക
  9. തല തണുക്കെ എണ്ണതേച്ച് കുളിക്കുന്നത് ശരീരോഷ്മാവ് കുറയ്ക്കാന്‍ സഹായിക്കും.
  10. ഭക്ഷണത്തില്‍ പച്ചക്കറി, പഴം ഇവയുടെ അളവ് വര്‍ധിപ്പിക്കുക, കൊഴുപ്പ് കൂടുതലുള്ളതും വറുത്തതും പൊരിച്ചതുമായ ആഹാര വസ്തുക്കള്‍ പാടെ നിര്‍ത്തുക
  11. ഷാംപൂ, ഹെയര്‍ഡൈ തുടങ്ങിയവ മുടി നരയ്ക്കാന്‍ പ്രേരക ഘടകങ്ങളാണ്
  12. ക്ലോറിന്‍ ചേര്‍ന്ന വെള്ളം അകാലനരയുണ്ടാക്കുന്ന ഏറ്റവും പ്രധാന വില്ലനാണ്
  13. ആഹാരത്തില്‍ ചീര, തഴുതാമ, കാരറ്റ് എന്നിവ ധാരാളമായി ചേര്‍ക്കുക
  14. സോയമില്‍ക്ക്, ധാന്യങ്ങള്‍ എന്നിവയില്‍ അകാലനര തടയാന്‍ കഴിവുള്ള വിറ്റാമിനുകള്‍ ബി അടങ്ങിയിട്ടുണ്ട്
  15. ധാരാളം ശുദ്ധജലം കുടിക്കുക. കുറഞ്ഞത് പത്ത് ഗ്ലാസ് ശുദ്ധജലമെങ്കിലും ഒരു ദിവസം കുടിച്ചിരിക്കണം
  16. കഠിനജലം (സാന്ദ്രത കൂടിയ വെള്ളം) ആണ് ലഭ്യമെങ്കില്‍ തിളപ്പിച്ചാറിയ ശേഷമേ കുളിക്കാവൂ.

അകാലനര തടയാന്‍

ഹെന്ന ട്രീറ്റ്‌മെന്റ്

ആവശ്യമുള്ള സാധനങ്ങള്‍

  1. ഹെന്ന പൗഡര്‍ - അരക്കപ്പ്
  2. ഉണക്കനെല്ലിക്ക പൊടിച്ചത് - അരക്കപ്പ്
  3. നാരങ്ങാ നീര് - അര ടേബിള്‍ സ്പൂണ്‍
  4. തേയിയ വെള്ളം - അര ടേബിള്‍ സ്പൂണ്‍
  5. തൈര് - ഒരു കപ്പ്
  6. മുട്ടയുടെ വെള്ള - ഒരെണ്ണത്തിന്റേത്

ഉപയോഗിക്കേണ്ട വിധം

മേല്‍പ്പറഞ്ഞ ചേരുവകള്‍ നന്നായി യോജിപ്പിച്ചെടുത്ത മിശ്രിതം ഇരുമ്പുപാത്രത്തിലോ സ്റ്റീല്‍ പാത്രത്തിലോ എടുത്ത് അഞ്ച് - ആറ് മണിക്കൂര്‍ വയ്ക്കണം. പിന്നീട് തലമുടിയിലും തലയോട്ടിയിലും തേച്ച് പിടുപ്പിച്ച് ഒരു മണിക്കൂറിന് ശേഷം വീര്യം കുറഞ്ഞ ഷാംപൂ ഉപയോഗിച്ച് കഴുകിക്കളയണം. (ഹെന്ന ചെയ്യും മുമ്പ് തലയില്‍ നന്നായി ഓയില്‍ മസാജ് ചെയ്തിരിക്കണം).

താരന്‍

അള്‍ട്രാവയലറ്റ് രശ്മികളില്‍ നിന്നും തലയോട്ടിയെ സംരക്ഷിക്കാന്‍ ത്വക്കിലെ സ്‌നേഹഗ്രന്ഥികള്‍ ഉല്‍പാദിപ്പിക്കുന്ന എണ്ണമയമുള്ള സെബം പൊടിയും ചെളിയും വിയര്‍പ്പുമായി ചേരുമ്പോഴാണ് താരന്‍ ഉണ്ടാകുന്നത്.

താരനകറ്റാന്‍ ചില ഒറ്റമൂലികള്‍

ഒരു ടേബിള്‍ സ്പൂണ്‍ ഉലുവ വെള്ളത്തിലിട്ട് കുതിര്‍ക്കുക. ഇത് നന്നായി അരിച്ചെടുത്ത് തലയോട്ടിയില്‍ തേച്ചുപിടിപ്പിക്കുക. അര മണിക്കൂര്‍ കഴിഞ്ഞ് ശുദ്ധജലത്തില്‍ തല കഴുകുക.

  1. ഉലുവ, ജീരകം എന്നിവ ഒരു ടേബിള്‍ സ്പൂണ്‍ വീതം എടുത്ത് ഒരു രാത്രി മുഴുവന്‍ വെള്ളത്തിലിട്ട് വയ്ക്കുക. പിറ്റേന്ന് ഇവ നന്നായി അരച്ചെടുത്ത കുഴമ്പില്‍ പശുവിന്‍ പാല്‍ ചേര്‍ന്ന് കുഴച്ച് തലയോട്ടിയില്‍ തേച്ചുപിടിപ്പിക്കുക. പതിനഞ്ചു മിനിട്ടിനു ശേഷം തല കഴുകുക.
  2. അരി കഴുകാതെ അടുപ്പത്തിട്ട് തിളപ്പിച്ച് കിട്ടുന്ന കഞ്ഞിവെള്ളം തലയില്‍ പുരട്ടുക. അതിനു ശേഷം ചെറുപയര്‍ പൊടി കുഴച്ച് തലയോട്ടിയില്‍ തേച്ചു പിടിപ്പിക്കുക. കുറച്ചു സമയത്തിന് ശേഷം ശുദ്ധജലത്തില്‍ തല കഴുകുക.
  3. ചെറുതായി ചൂടാക്കിയ വെളിച്ചെണ്ണ രാത്രി തലയില്‍ പുരട്ടി പിറ്റേന്ന് രാവിലെ ഏതെങ്കിലും ഹെയര്‍ ഷാംപൂ ഉപയോഗിച്ച് കഴുകിക്കളയുക
  4. ഒരു ടേബിള്‍ സ്പൂണ്‍ ചെറുനാരങ്ങാ നീരില്‍ രണ്ട് ടേബിള്‍ സ്പൂണ്‍ വെളിച്ചെണ്ണ ചേര്‍ത്ത മിശ്രിതം തലയോട്ടിയില്‍ നല്ലതുപോലെ തേച്ച് പിടിപ്പിക്കുക. ഒരു മണിക്കൂര്‍ കഴിഞ്ഞ് ചെറിയ ചൂടുവെള്ളത്തില്‍ തല കഴുകുക
  5. നാല് ടേബിള്‍ സ്പൂണ്‍ പയറുപൊടി വിനാഗിരിയുമായി ചേര്‍ത്തിളക്കി 15 മിനിട്ടിന് ശേഷം തലയോട്ടിയില്‍ പുരട്ടുക. അര മണിക്കൂര്‍ കഴിഞ്ഞ് കഴുകിക്കളയുക
  6. രണ്ടു കോഴിമുട്ടയുടെ മഞ്ഞക്കരു രണ്ട് ടീസ്പൂണ്‍ വെള്ളവുമായി ചേര്‍ത്തിളക്കുക. മുടി നനച്ചതിനു ശേഷം ഈ മിശ്രിതം തലയോട്ടിയില്‍ നന്നായി തേച്ചുപിടിപ്പിക്കുക. അര മണിക്കൂര്‍ കഴിഞ്ഞ് ചെറു ചൂടവെള്ളം ഉപയോഗിച്ച് തല കഴുകുക
  7. ഒരു ടേബിള്‍ സ്പൂണ്‍ തേയില ഒരു ലിറ്റര്‍ വെള്ളത്തില്‍ 3 മിനിട്ട് നേരം തിളപ്പിക്കുക. ഈ മിശ്രിതം നന്നായി തണുക്കാന്‍ അനുവദിക്കുക. കുളി കഴിഞ്ഞ് അവസാനം ഈ വെള്ളത്തില്‍ തല കഴുകുക.
  8. തേങ്ങാപ്പാലും ചൂടുവെള്ളവും ചേര്‍ത്ത മിശ്രിതത്തില്‍ ഏതാനും തുള്ളി നാരങ്ങാനീര് കൂടി ചേര്‍ക്കുക. ഈ മിശ്രിതം തലയോട്ടിയില്‍ പുരട്ടി അര മണിക്കൂറിന് ശേഷം ഇളം ചൂടുവെള്ളത്തില്‍ തല കഴുകുക.
  9. ഒരു ടേബിള്‍ സ്പൂണ്‍ വിനാഗിരി അര ബക്കറ്റ് വെള്ളത്തില്‍ കലര്‍ത്തി തല കഴുകുക. (ഈ മിശ്രിതത്തില്‍ തല കഴുകുന്നതിന് മുമ്പ് ഏതെങ്കിലും ഷാംപൂ ഉപയോഗിച്ച് തലമുടി നല്ലതുപോലെ കഴുകിയിരിക്കണം.
  10. ശര്‍ക്കരയും വാളന്‍ പുളിയും തുല്യഅളവില്‍ കലര്‍ത്തുക. ഈ മിശ്രിതം അരച്ചു കുഴമ്പു രൂപത്തിലാക്കുക. ഇങ്ങനെ തയാറാക്കിയ മിശ്രിതം തലയില്‍ തേച്ചു പിടിപ്പിക്കുക. പത്തു മിനിട്ടിനു ശേഷം ശുദ്ധജലത്തില്‍ തല കഴുകുക.

മുടി തിളങ്ങാന്‍

ഷാംപൂ ഉപയോഗിച്ച്് മുടി കഴുകിയതിന് ശേഷം നാല് കപ്പ് ചെറുചൂടുവെള്ളത്തില്‍ ഒരു ടീസ്പൂണ്‍ തേന്‍ ചേര്‍ത്തിളക്കിയതുകൊണ്ട് മുടി കഴുകുക. മുടിക്ക് തിളക്കവും ഭംഗിയും ലഭിക്കും.

മുടി കൊഴിച്ചില്‍ തടയാം

  1. കരിഞ്ചീരകം വെളിച്ചെണ്ണയില്‍ കാച്ചി ഉപയോഗിക്കുക
  2. മൈലാഞ്ചിയില അരച്ചുണക്കി വെളിച്ചെണ്ണയില്‍ കാച്ചി തേയ്ക്കുക
  3. ചെറുനാരങ്ങാ നീരും നാളികേരവും ചേര്‍ത്ത മിശ്രിതം തലയില്‍ പുരട്ടുക
  4. ഉലുവയിട്ടു കുതിര്‍ന്ന നാളികേരവെള്ളം കൊണ്ട് തല മസാജ് ചെയ്യുക
  5. രണ്ടു മുട്ട നന്നായി അടിച്ചെടുക്കുക. ഇതില്‍ രണ്ട് ടേബിള്‍ സ്പൂണ്‍ വെള്ളം ചേര്‍ക്കുക. തലമുടി നനച്ചതിനു ശേഷം ഈ മിശ്രിതം തലയില്‍ ഒഴിക്കുക. തലയോട്ടി നല്ലതുപോലെ മസാജ് ചെയ്യുക. പത്ത് മിനിട്ടിനു ശേഷം തല കഴുകുക.
  6. അര ലിറ്റര്‍ വെള്ളത്തില്‍ ഒരു ടീസ്പൂണ്‍ ഉപ്പ് ലയിപ്പിച്ച വെള്ളത്തില്‍ തല കഴുകുക.
  7. ഒരു മുറി നാളികേരത്തിന്റെ പാലും ഒരു ടീസ്പൂണ്‍ ചെറുനാരങ്ങാ നീരും ചേര്‍ത്ത് തയാറാക്കിയ മിശ്രിതം ഉപയോഗിച്ച് തലയോട്ടി മസാജ് ചെയ്യുക. അര മണിക്കൂറിന് ശേഷം ചെറു ചൂടുവെള്ളത്തില്‍ തല കഴുകുക.

മുടി പൊട്ടിപ്പോകാതിരിക്കാന്‍

കട്ടിത്തൈര് - അര കപ്പ് 
ഹെന്ന - രണ്ട് ടീസ്പൂണ്‍ 
ചെറുനാരങ്ങാ നീര് - 1 ടീസ്പൂണ്‍ 
വെളിച്ചെണ്ണ - 2 ടീസ്പൂണ്‍

ഉപയോഗക്രമം

മേല്‍പ്പറഞ്ഞ ചേരുവകള്‍ ചേര്‍ത്ത് തയാറാക്കിയ മിശ്രിതം തലയോട്ടിയില്‍ നന്നായി തേച്ച് പിടിപ്പിക്കുക. അര മണിക്കൂറിന് ശേഷം ഒരു വീര്യം കുറഞ്ഞ ഷാംപൂ ഉപയോഗിച്ച് കഴുകിക്കളയുക.

ഹെര്‍ബല്‍ ഹെയര്‍ കണ്ടീഷണറുകള്‍

  1. നെല്ലിക്ക അരച്ച് പേസ്റ്റ് രൂപത്തിലാക്കുക. ഇത് അല്‍പം പുളിച്ച മോരില്‍ കലര്‍ത്തി തലയില്‍ തേയ്ക്കുക.
  2. രണ്ട് കപ്പ് മൈലാഞ്ചി, ഒരു കപ്പ് വെള്ളം, ഒരു ടീസ്പൂണ്‍ നാരങ്ങാ നീര്, ഒരു ടേബിള്‍സ്പൂണ്‍ കാപ്പിപ്പൊടി ഇവ ചേര്‍ത്ത് തയാറാക്കിയ മിശ്രിതം അര മണിക്കൂര്‍ തലയില്‍ പുരട്ടിവയ്ക്കുക. ശുദ്ധ ജലത്തില്‍ തല കഴുകുക.
  3. ഒരു മുട്ടയും ഒരു ചെറുനാരങ്ങയുടെ നീരും ചേര്‍ത്തുണ്ടാക്കിയ മിശ്രിതത്തില്‍ തല കഴുകുക.
  4. ചെമ്പരത്തിയില, പൂവ്, തുളസിയില ഇവ അരച്ചുണ്ടാക്കിയ പേസ്റ്റ് തലയില്‍ തേച്ച് പിടിപ്പിച്ച് ശുദ്ധജലത്തില്‍ കഴുകിക്കളയുക.
  5. വെണ്ണ നീക്കിയ പുളിച്ച മോര് തലമുടിയില്‍ തേച്ച് പിടിപ്പിക്കുക. പതിനഞ്ച് മിനിട്ട് കഴിഞ്ഞ് ശുദ്ധജലത്തില്‍ തല കഴുകുക.
  6. കുളിക്കാനുപയോഗിക്കുന്ന വെള്ളത്തില്‍ ഏതാനും തുള്ളി ചെറുനാരങ്ങാനീരു കൂടി ചേര്‍ത്ത് തല കഴുകിയാല്‍ മുടി മിനുസവും തിളക്കവും ഉള്ളതായിത്തീരും.
  7. ചെമ്പരത്തിയില അരച്ചു കുഴമ്പാക്കിയതില്‍ ഒരു ടീസ്പൂണ്‍ ഷിക്കാക്കായ് കൂടി ചേര്‍ത്ത് മുടിയില്‍ പുരട്ടുക. ഇത് നല്ലൊരു ഷാംപൂവും കണ്ടീഷണറുമാണ്.

മഴക്കാലവും മുടിയുടെ സംരക്ഷണവും

മഴക്കാലത്ത് നനഞ്ഞ മുടി ഉണങ്ങാതെ കെട്ടിവച്ചാല്‍ ദുര്‍ഗന്ധവും പേനും മുടിക്കായയും താരനുമെല്ലാം ഉണ്ടാകും. വര്‍ഷകാലം മുടിക്ക് പ്രത്യേകമായ ശ്രദ്ധയും പരിചരണവും നല്‍കേണ്ട സമയമാണ്.

  1. മഴ നനഞ്ഞാല്‍ മുടി നന്നായി ഉണങ്ങിയതിന് ശേഷമേ കെട്ടിവയ്ക്കാവൂ. ഇല്ലെങ്കില്‍ മുടിക്കായ ഉണ്ടാകും. എന്നാല്‍ ഹെയര്‍ സ്റ്റീമര്‍ ഉപയോഗിച്ച് മുടിക്കായ അകറ്റാം.
  2. മഴക്കാലമായാലും എല്ലാ ദിവസവും കുളിക്കുക. അല്ലാത്തപക്ഷം തലയില്‍ താരനും ശിരോചര്‍മ്മത്തില്‍ അണുബാധയും ഉണ്ടാകാന്‍ സാധ്യതയുണ്ട്
  3. താരനുള്ളവര്‍ ഉപയോഗിക്കുന്ന ചീപ്പും ബ്രഷും കൂടെക്കൂടെ വൃത്തിയാക്കണം.
  4. താരനകറ്റുന്ന ഷാംപൂ ഏതാനും ദിവസം തുടര്‍ച്ചയായി ഉപയോഗിച്ചാല്‍ ഈ രോഗത്തില്‍ നിന്നും മുക്തി നേടാം.
  5. നനഞ്ഞ മുടി ചീകാന്‍ പല്ലുകള്‍ അകന്ന ചീപ്പ് ഉപയോഗിക്കുക
  6. മുടി നന്നായി നനഞ്ഞിരിക്കുമ്പോള്‍ കഴിവതും ചീകാതിരിക്കുകയാണ് നല്ലത്. നനയുമ്പോള്‍ മുടി പൊട്ടിപ്പോകാനുള്ള സാധ്യത കൂടുതലാണ്.

ഡോ. ഹസീന റിയാസ്
ആയുര്‍വേദിക് കണ്‍സള്‍ട്ടന്റ്
കിംസ്‌സൂപ്പര്‍സ്‌പെഷാലിറ്റി ഹോസ്പിറ്റല്‍
കൊടുവള്ളി, കോഴിക്കോട്

തലവേദന നിയന്ത്രിക്കാന്‍ ആയുര്‍വേദം

തലയേയും കഴുത്തിനേയും തമ്മില്‍ ബന്ധിപ്പിക്കുന്ന ഭാഗത്തെ പേശികള്‍ക്ക് അധികം സമ്മര്‍ദ്ദം ഉണ്ടാകുന്നതിന്റെ ഫലമായി ഉണ്ടാകുന്ന തലവേദനയാണ് മസ്‌കുലാര്‍ വിഭാഗത്തില്‍ പെടുന്നവ.

തലവേദന ഒരു രോഗമല്ല . ശരീരത്തിലുണ്ടാകുന്ന മറ്റ് രോഗങ്ങളുടെ ലക്ഷണം മാത്രമാണ്. ഈ തത്വത്തെ മനസിലാക്കാതെ മിക്കവരും തലവേദനയുണ്ടാകുമ്പോള്‍ തന്നെ വേദനാസംഹാരികളില്‍ അഭയം തേടുന്നു.

അവര്‍ക്ക് താല്‍ക്കാലിക ശമനം ലഭിക്കുന്നു. എന്നാല്‍ എന്താണ് വേദനയ്ക്ക് യഥാര്‍ഥ കാരണം എന്ന് കണ്ടെത്താന്‍ കഴിയാതെ പോകുന്നു.

ഇങ്ങനെ ഒരു പ്രവൃത്തിയുടെ ഫലമായിഅവര്‍ക്കുണ്ടായിരിക്കുന്ന അത്യന്തം ദോഷഫലം പ്രദാനം ചെയ്യുന്ന ഒരു വ്യാധി അവര്‍ അറിയാതെ തന്നെ അവരുടെ ശരീരത്തില്‍ വര്‍ധിക്കാന്‍ കാരണമാകുകയും, യഥാര്‍ഥ രോഗത്തെ കണ്ടെത്തുമ്പോഴേക്കും ചികിത്സ കൊണ്ട് ശമിപ്പിക്കാന്‍ കഴിയാതെ വരികയും ചെയ്യും.

കാരണങ്ങള്‍ തിരിച്ചറിയണം

അമിതമാനസിക സമ്മര്‍ദം, ശരീരത്തില്‍ നിന്നും ജലാംശം നഷ്ടപ്പെടുക, ആഹാരം സമയം തെറ്റി കഴിക്കുക, ആഹാരം ഒഴിവാക്കുക, ശരീരത്തില്‍ ആവശ്യത്തിനു ഗ്ലൂക്കോസ് ഇല്ലാതെ വരിക, വിവിധ തരം അണുബാധകള്‍, അമിത രക്തസമ്മര്‍ദം, കണ്ണിന് കൂടുതല്‍ ആയാസം ഉണ്ടാകുന്ന ജോലികള്‍, തലച്ചോറില്‍ ഉണ്ടാകുന്ന മുഴകള്‍, തലച്ചോറിന്റെ പ്രവര്‍ത്തന വൈകല്യങ്ങള്‍, സൈനസൈറ്റിസ്, തലയ്ക്കുണ്ടാകുന്ന ആഘാതം തുടങ്ങിയ പലകാരണങ്ങള്‍കൊണ്ടും തലവേദനയുണ്ടാകാം.

ചില സ്ത്രീകളില്‍ ആര്‍ത്തവം ഉണ്ടാകാന്‍ പോകുന്നതിന്റെയും ആര്‍ത്തവിരാമം സംഭവിക്കുന്നതിന്റെയും മുന്നോടിയായി ഹോര്‍മോണുകള്‍ക്കുണ്ടാകുന്ന വ്യതിയാനങ്ങള്‍ വരെ തലവേദനയ്ക്കു കാരണമാകാറുണ്ട് .

മറ്റ് രോഗലക്ഷണങ്ങള്‍ ഒന്നും ഉണ്ടാകാതെ വെറും തലവേദന മാത്രം കാണുന്ന അവസ്ഥയില്‍ പ്രത്യേകിച്ച് ചികില്‍സകള്‍ ഒന്നും ആവശ്യമില്ല . ഇത്തരം വേദനകള്‍ അല്‍പം വിശ്രമിച്ചാല്‍ താനേ മാറും.

എന്നാല്‍ തലവേദനയോടൊപ്പം പനി, കാഴ്ചയ്ക്കു വ്യത്യാസം, കഴുത്തിനുവേദന, തലകറക്കം, ബോധക്ഷയം, ചെവിയില്‍വേദന, ഛര്‍ദി മുതലായ ലക്ഷണങ്ങള്‍ കൂടി കാണുന്നുണ്ടെങ്കില്‍, വിശദമായ പരിശോധനകള്‍ വഴി രോഗനിര്‍ണയം നടത്തേണ്ടതായിവരും.

തലവേദനകളെ, വസ്‌കുലാര്‍, മസ്‌കുലാര്‍, സെര്‍വികോജനിക്, ട്രാക്ഷന്‍, ഇന്‍ഫ്‌ളമേറ്ററി, എന്നിങ്ങനെ 5 പ്രധാന തരങ്ങളായി തിരിച്ചിരിക്കുന്നു . മൈഗ്രേന്‍ എന്നുപറയുന്ന തലവേദനയും, വിവിധ തരത്തിലുള്ള വിഷാംശങ്ങള്‍ മൂലം ഉണ്ടാകുന്ന തലവേദനകളും, വസ്‌കുലാര്‍ എന്ന വിഭാഗത്തില്‍ പെടുന്നവയാണ്.

തലയുടെ ഒരുവശത്തോ, ഇരുവശങ്ങളിലുമോ വേദന, കാഴ്ചക്കു വൈകല്യങ്ങള്‍, മനംപിരട്ടല്‍, ഛര്‍ദ്ദി എന്നിവ ഇത്തരം തലവേദനകളോടൊപ്പം ഉണ്ടായിരിക്കും. ചിലപ്പോള്‍ വേദന വളരെ ശക്തമാകുകയും, രോഗി വളരെ അസ്വസ്ഥത പ്രകടിപ്പിക്കുകയും ചെയ്യും.

ടെന്‍ഷന്‍ തലവേദന

തലയേയും കഴുത്തിനേയും തമ്മില്‍ ബന്ധിപ്പിക്കുന്ന ഭാഗത്തെ പേശികള്‍ക്ക് അധികം സമ്മര്‍ദ്ദം ഉണ്ടാകുന്നതിന്റെ ഫലമായി ഉണ്ടാകുന്ന തലവേദനയാണ് മസ്‌കുലാര്‍ വിഭാഗത്തില്‍ പെടുന്നവ.

ഇവയെ ടെന്‍ഷന്‍ തലവേദന എന്നും പറയപ്പെടും. ഇവ തലയുടെ വശങ്ങളില്‍ ഉണ്ടാകുകയും കഴുത്തിലേക്കും, തോള്‍ ഭാഗത്തേയ്ക്കും വ്യാപിക്കുകയും ചെയ്യുന്നു.

കഴുത്തിന്റെ പുറകുഭാഗത്ത് നട്ടെല്ലിനോടനുബന്ധിച്ചുണ്ടാകുന്ന വൈകല്യങ്ങളുടെ ഫലമായി ഉണ്ടാകുന്ന തലവേദനയാണ് സെര്‍വിക്കോജനിക്ക് വിഭാഗത്തില്‍പ്പെടുന്നവ.

ഇതു മൂലം ആ ഭാഗത്ത് കൂടി കടന്നുപോകുന്ന നാഡികളിലും ഞരമ്പുകളിലും സമ്മര്‍ദ്ദമുണ്ടാകുകയും, തത്ഫലമായി കഴുത്തു തിരിയ്ക്കുന്നതിനും, കൈകള്‍ ചലിപ്പിക്കുന്നതിനും പ്രയാസം അനുഭവപ്പെടാം .

തലയോട്ടിയുടെ ഉള്ളില്‍ ഉണ്ടാകുന്ന അസാധാരണ കോശസമൂഹവളര്‍ച്ചകളുടെയും, മുഴകളുടെയും ഫലമായി ഉണ്ടാകുന്ന തലവേദനകളാണ് ട്രാക്ഷന്‍ വിഭാഗത്തില്‍പ്പെടുന്നവ.

തലച്ചോറിനകത്തും സമീപഭാഗങ്ങളിലുമുള്ള അണുബാധ, നീര്‍ക്കെട്ട് മുതലായവയുടെ ഫലമായി ഉണ്ടാകുന്ന തലവേദനകള്‍ എല്ലാം ഇന്‍ഫ്‌ളമേറ്ററി വിഭാഗത്തില്‍പ്പെടുന്നവയാണ്. സൈനസൈറ്റിസ് എന്നറിയപ്പെടുന്ന ദുഷ്ടപീനസ രോഗവും ഈ കൂട്ടത്തില്‍ പെടും.

കാലവാസ്ഥയും ജീവിത രീതിയും

വെയില്‍, മഞ്ഞ്, പുക, എന്നിവയേല്‍ക്കുക, വെള്ളത്തില്‍ അധികസമയം കളിക്കുക , വളരെ ഉറങ്ങുക, തീരെ ഉറങ്ങാതിരിക്കുക, തല വിയര്‍ക്കുക, മനപ്രയാസം, കിഴക്കന്‍ കാറ്റുകൊള്ളുക, കണ്ണുനീരിനെ തടയുക, അമിതമായി കരയുക, അമിത ജലപാനം, മദ്യപാനം, തലയില്‍ കൃമികളുണ്ടാകുക, മലമൂത്രാദികളെ തടയുക, ശരിയായ രീതിയില്‍ അല്ലാതെ തലയിണ ഉപയോഗിച്ച് കിടക്കുക, ശരീര ശുദ്ധി വരുത്താതെയിരിക്കുക, എണ്ണതേച്ച്കുളിക്കാതെയിരിക്കുക, എപ്പോഴും താഴേയ്ക്ക് നോക്കിയിരിക്കുക, സുഖകരങ്ങളല്ലാത്ത ഗന്ധം ഏല്‍ക്കുക, ദഹനക്കേടുണ്ടാകുക , ഉറക്കെ സംസാരിക്കുക, എന്നിവയെല്ലാം കാരണം വാതം മുതലായ ദോഷങ്ങള്‍ ശിരസിനെ ആശ്രയിച്ച് കോപിച്ചിട്ട് തലവേദന മുതലായ ശിരോരോഗങ്ങള്‍ ഉണ്ടാകുന്നു എന്നുമാണ് ആയുര്‍വേദ ശാസ്ത്രം അഭിപ്രായപ്പെടുന്നത ്. തലവേദനകളെ ശിരസ്താപം എന്നും ശിരശൂലം എന്നും നാമകരണം ചെയ്യപ്പെട്ടിരിക്കുന്നു .

വാതജ ശിരസ്താപം

ചെന്നിയുടെ ഭാഗത്ത് കുത്തിനോവും,പുരികങ്ങളുടെ നടുഭാഗവും, നെറ്റിയും വളരെയധികം വേദനിക്കുകയും, ചെവിയുടെ ഉള്‍ഭാഗത്തുനിന്നും ശബ്ദവും വേദ 
നയും, കേള്‍വിക്കുറവും, കണ്ണുകളില്‍ കുത്തിവും തല കറങ്ങുന്നതുപോലെ തോന്നുകയും, കഴുത്തിനും താടിയെല്ലുകള്‍ക്കും പിടുത്തമുണ്ടാകുകയും, വെയി 
ലത്ത് നോക്കാന്‍ പ്രയാസം, മൂക്കില്‍ കൂടി വെള്ളം വരികയും, വേദന ഉണ്ടാകുകയും താനേ ശമിക്കുകയും ചെയ്യുക, അമര്‍ത്തിപിടിക്കുകയോ, എണ്ണ പുരട്ടുക, 
വിയര്‍പ്പിക്കുക എന്നിവ കൊണ്ട് അല്‍പ്പം ശമിക്കുകയും ചെയ്യുക എന്നിവ വാതജശിരസ്താപത്തിന്റെ്‌ലക്ഷണങ്ങളാകുന്നു .

ഈ വാതജ ശിരസ്താപം തന്നെ തലയുടെ ഇടതോ, വലത്തോ ആയ ഒരുഭാഗത്ത് മാത്രം ഉണ്ടാകുകയും, പതിനഞ്ച് ദിവസമോ ഒരുമാസമോ കൂടുമ്പോള്‍ ഉണ്ടാകുകയും , താനേ ശമിക്കുകയും ചെയ്താല്‍ അതാണ് അര്‍ധാവഭേദകം എന്ന് അറിയപ്പെടുന്നത്.ഇതിന് യഥാസമയം ചികില്‍സിക്കാതെ രോഗം വര്‍ദ്ധിക്കാന്‍ അനുവദിച്ചാല്‍ കണ്ണി്‌ന്റെയോ, ചെവിയുടെയോ വൈകല്യത്തിനു കാരണമാകും.

പിത്തജ ശിരസ്താപം

തലപുകച്ചില്‍, പനി, വിയര്‍പ്പ്, കണ്ണിനു ചൂട്, ബോധക്കേട് എന്നിവയും, രാത്രിയിലും ശീതസ്വഭാവമുള്ളവ അരച്ച് തേയ്ക്കുമ്പോഴും അല്‍പ്പം ശമിക്കുക, എന്നിവ പിത്തജ ശിരസ്താപത്തിന്റ ലക്ഷണങ്ങളാകുന്നു .

കഫജ ശിരസ്താപം

രുചിയില്ലായ്മ, മോഹാലസ്യം, തലയ്ക്ക് കനം, മന്ദത, തണുപ്പ്, നെറ്റിയിലും ചെന്നിയിലുമുള്ള ഞരമ്പുകളില്‍ സ്പന്ദനമില്ലായ്മ , അലസത, പകല്‍ വേദന കുറ 
യുകയും, രാത്രിയില്‍ അധികരിക്കുകയും ചെയ്യുക, കണ്‍തടത്തില്‍ വീക്കം, ചെവിചൊറിച്ചില്‍, ഛര്‍ദ്ദി, എന്നിവ കഫജ ശിരസ്താപത്തിന്റ ലക്ഷണങ്ങളാകുന്നു .

രക്തജ ശിരസ്താപത്തില്‍ പിത്തജ ശിരസ്താപത്തില്‍ ഉള്ളതിനേക്കാള്‍ വേദന അധികരിച്ചിരിക്കും . ത്രിദോഷജ ശിരസ്താപത്തില്‍ വാത പിത്ത കഫ ശിര 
സ്താപങ്ങളുടെ എല്ലാ ലക്ഷണങ്ങളും ഉണ്ടായിരിക്കും .

കൃമിജ ശിരസ്താപം

പഥ്യവും, അപഥ്യവും ആയ ആഹാരങ്ങള്‍ ഭക്ഷിക്കുന്നതുകൊണ്ട് ശിരസിലെ രക്തം , മാംസം എന്നിവയ്ക്ക് നുലവ് ഉണ്ടാകുകയും വാതപിത്തകഫങ്ങള്‍ കോപിക്കുകയും ചെയ്യുമ്പോള്‍ ശിരസില്‍ കൃമികള്‍ ഉണ്ടാകുന്നു. അവ ശിരസിലെ രക്തം പാനം ചെയ്ത് ഭയങ്കരങ്ങളും, ചിത്തവിഭ്രമത്തെ ഉണ്ടാക്കുന്നവയും ആയ വേദനകളെ ഉണ്ടാക്കുന്നു.

അപ്പോള്‍ പനി, ചുമ, ബലഹീനത, തലയോട്ടിക്കു വരള്‍ച്ച, വീക്കം, പലവിധ വേദനകള്‍, സര്‍വാംഗം ചൂട്, തരിപ്പ്, ദുര്‍ഗന്ധം, അണ്ണാക്കിലും ശിരസിലും ചൊറിച്ചില്‍, വീക്കം, ചെവിമൂളല്‍, എന്നിവയെ ഉണ്ടാക്കുന്നു. ഇതാണ് കൃമിജ ശിരസ്താപം.

സൂര്യാവര്‍ത്തം

വാതം പിത്തത്തിനോട് ചേര്‍ന്ന് കോപിച്ച്, ചെന്നി, നെറ്റി, കണ്ണ്, പുരികം, എന്നിവിടങ്ങളില്‍ സൂര്യോദയത്തിനു ശേഷം വേദന തുടങ്ങുകയും, ആ വേദന (വിശന്നിരിക്കുന്നവന് പ്രത്യേകിച്ചും) ഉച്ച വരെ വര്‍ദ്ധിക്കുകയും, ഉച്ചയ്ക്കു ശേഷം സാവധാനം ശമിക്കുകയും ചെയ്യും. ഇതില്‍ ചൂടു കൊണ്ടാണോ തണുപ്പുകൊണ്ടാണോ രോഗത്തിനു ശമനം ഉണ്ടാകുക എന്ന് പ്രത്യേകിച്ച് വ്യവസ്ഥകള്‍ ഒന്നുമില്ല. ഇത് സൂര്യാവര്‍ത്തം ആകുന്നു.

തലവേദന ഉണ്ടാകാതിരിക്കാന്‍ സ്വീകരിക്കാവുന്ന സ്വാഭാവികമാര്‍ഗങ്ങള്‍.

  1. കാഴ്ചയിലോ ഗന്ധത്തിലോ അരോചകമായവയെ കഴിവതും ഒഴിവാക്കുക.
  2. ഭക്ഷണം ഉറക്കം മുതലായവയില്‍ കൃത്യതപാലിക്കുക.
  3. ആഹാരം പോഷക സമൃദ്ധമായിരിക്കാന്‍ ശ്രദ്ധിക്കുക.
  4. ആവശ്യത്തിന് വെള്ളം കുടിയ്ക്കുക .
  5. കഫീന്‍ചേര്‍ന്ന പാനിയങ്ങളും മദ്യവും ഉപയോഗിക്കാതിരിക്കുക .
  6. കൂടുതല്‍ മാനസിക പിരിമുറുക്കം അനുഭവപ്പെടുമ്പോള്‍ വിശ്രമിക്കാന്‍ ശ്രദ്ധിക്കുക .
  7. വായിക്കുമ്പോഴും, ടീവി, കംപ്യൂട്ടര്‍, മുതലായവ ഉപയോഗിക്കുമ്പോഴും ശരിയായ വെളിച്ചത്തിലും, സൗകര്യപ്രദമായ ഇരിപ്പിടത്തിലും ഇരുന്ന് ഉപയോഗിക്കുക.
  8. മാനസിക സന്തോഷത്തില്‍ കഴിയുന്നവരും അവ പ്രദാനം ചെയ്യാന്‍ കഴിയുന്നവരുമായി കൂടുതല്‍ ഇടപഴകുക.

ഒറ്റമൂലി പ്രയോഗങ്ങള്‍

  1. ജാതിക്ക നന്നായി അരച്ച് തലയില്‍ പുരട്ടുക
  2. കൊത്തമല്ലി പനിനീരില്‍ അരച്ച് നെറ്റിയില്‍ പുരട്ടുക
  3. ചന്ദനവും ചുക്കും കൂടി അരച്ചതോ , രക്തചന്ദനം അരച്ചതോ, നെറ്റിയില്‍ പുരട്ടുക
  4. പടവലത്തിന്റെ വേര് അരച്ച് നെറ്റിയില്‍ പുരട്ടുക
  5. കുമ്പിളിന്റെ ഇല അരച്ച് നെറ്റിയില്‍ പുരട്ടുക
  6. കടുക് പച്ചവെള്ളത്തില്‍ അരച്ച് നെറ്റിയില്‍ പുരട്ടുക
  7. കുന്നിക്കുരുവും കുന്നിവേരും അരച്ച് നെറ്റിയില്‍ പുരട്ടുക
  8. മുക്കുറ്റി അരച്ച് നെറ്റിയില്‍ പുരട്ടുക
  9. തുമ്പയിലയുടെ നീര് നെറ്റിയില്‍ പുരട്ടുക
  10. മുരിങ്ങപ്പശ പശുവിന്‍ പാല്‍ ചേര്‍ത്ത് ചെന്നിയില്‍ പുരട്ടുക
  11. ചെറുനാരങ്ങാനീരില്‍ രാസ്‌നാദി പൊടി ചേര്‍ത്ത് കുറുക്കി നിറുകയില്‍ തളം വയ്ക്കുക

ചികില്‍സകള്‍

പത്ഥ്യാക്ഷ ധാത്ര്യാദി, വരണാദി, ദശമൂലകടുത്രയം, ഏലാകണാദി, ദശമൂലം എന്നീ കഷായങ്ങള്‍, ഗോരോചനാദി, വെട്ടുമാരന്‍, ശ്വാസാനന്ദം, എന്നീ ഗുളികകള്‍, താലീസപത്രാദി, കര്‍പ്പൂരാദി എന്നീ ചൂര്‍ണ്ണങ്ങള്‍, ദശമൂല രസായനം, വ്യോഷാദിവടകം എന്നിവ അവസ്ഥാനുസരണം സേവിക്കുന്നതും, ബലഹഠാദി, ഭൃംഗാമലകാദി, ക്ഷീരബല എന്നി എണ്ണകള്‍ തലയില്‍ പുരട്ടുന്നതും, ഇവകൊണ്ട് തലയില്‍ ധാര ചെയ്യുന്നതും , ക്ഷീരബല 101 ആവര്‍ത്തിച്ചത്, അണുതൈലം, എന്നിവ കൊണ്ട് നസ്യം ചെയ്യുന്നതും തലവേദനയ്ക്ക് ആശ്വാസം നല്‍കുന്നതാണ് .

കടപ്പാട്:

ഡോക്ടര്‍. ആര്‍. രവീന്ദ്രന്‍.
അസി .സീനിയര്‍. മെഡിക്കല്‍ ഓഫീസര്‍
ദി ആര്യവൈദ്യ ഫാര്‍മസി (കോയമ്പത്തൂര്‍) ലിമിറ്റഡ്.
കോട്ടയം

ചര്‍മ്മത്തെ കാക്കാന്‍ ആയുര്‍വേദം

ചര്‍മ്മസംരക്ഷണത്തിനും രോഗം ചികിത്സിച്ചു മാറ്റുന്നതിനും ആയുര്‍വേദം ഫലപ്രദമാണ്. പ്രകൃതിയുടെ തനത് ഔഷധഗുണം ചര്‍മ്മത്തിന്റെ തകരാറുകള്‍ പരിഹരിച്ച് സ്വാഭാവികത നിലനിര്‍ത്താന്‍ സഹായിക്കുന്നു.

ത്വക്‌രോഗങ്ങള്‍ പ്രധാനമായും 2 തരത്തില്‍ ഉണ്ട്. വിസര്‍പ്പം എന്നും കുഷ്ഠം എന്നും. വിസര്‍പ്പരോഗം മിക്കവയും വ്രണമായി പരിണമിക്കുന്ന ഒന്നാണ്. രോഗത്തിന്റെ ആരംഭത്തില്‍തന്നെ പല ഭാഗങ്ങളിലായി നിറവ്യത്യാസങ്ങള്‍ പ്രത്യക്ഷപ്പെട്ടതിനുശേഷം വളരെ വേഗത്തില്‍തന്നെ ശരീരം മുഴുവന്‍ വ്യാപിച്ച് പൊള്ളിയതുപോലെ കുരുക്കള്‍ ഉണ്ടായി അവ പൊട്ടി വ്രണമായിത്തീരുന്നു.

വിസര്‍പ്പരോഗം മൂന്നുതരത്തില്‍ ഉണ്ടാകുന്നതായി കാണാം. ബാഹ്യമായി ഉണ്ടാകുന്നത് (പുറമെ ഉണ്ടാകുന്നത്), ആന്തരമായി ഉണ്ടാകുന്നത് (അകത്ത് ഉണ്ടാകുന്നത്), ആന്തരികമായും ബാഹ്യമായും ഉണ്ടാകുന്നത്. അതില്‍ ബാഹ്യത്തേക്കാള്‍ ആന്തരവും, രണ്ടുതരത്തിലും ഉണ്ടാകുന്നത് അതിലും വിഷമതകള്‍ ഏറിയവ ആയിരിക്കും.

എല്ലാ വിസര്‍പ്പരോഗങ്ങളും ജ്വരത്തോടും നിറവ്യത്യാസത്തോടും കൂടിയിരിക്കുമ്പോള്‍തന്നെ ചികിത്‌സിക്കാതെയിരുന്നാല്‍ ക്രമേണ നിറവ്യത്യാസമുള്ള ഭാഗങ്ങള്‍ പൊള്ളലുകള്‍കൊണ്ട് ഉണ്ടാകുന്നതുപോലെ കുമിളകളായിത്തീരുന്നു. ഇവ പിന്നീട് പഴുത്തു പൊട്ടി വ്രണങ്ങളായിത്തീരും.

പനി, അതിസാരം, ഛര്‍ദ്ദി, തൊലിയും മാംസവും പിളരുക, ശരീരത്തിനു തളര്‍ച്ച, അരുചി, ആഹാരം ദഹിക്കാതെയിരിക്കുക ഇവയെല്ലാം വിസര്‍പ്പരോഗത്തിന്റെ ഉപദ്രവങ്ങളാകുന്നു.

ഉപ്പും പുളിയും എരുവും ധാരാളമുള്ള ആഹാരങ്ങള്‍ സ്ഥിരമായി ഉപയോഗിക്കുന്നതുകൊണ്ടും ഉഷ്ണഗുണപ്രദാനങ്ങളായ ആഹാരങ്ങള്‍ നിത്യം ഉപയോഗിക്കുന്നതുകൊണ്ടും ശരീരത്തില്‍ വാത പിത്തകഫങ്ങള്‍ കോപിച്ചാണ് വിസര്‍പ്പം ഉണ്ടാകുന്നത്.

ഇത്തരത്തിലുള്ള ആഹാരങ്ങളുടെ അമിതമായ ഉപയോഗംകൊണ്ട് ശരീരത്തില്‍ രക്തം, ഉദരം, ത്വക്, മാംസം എന്നിവയും വാതപിത്ത കഫങ്ങളെപ്പോലെ ഏറ്റവും ദുഷിക്കുന്നു.

അഗ്‌നിവിസര്‍പ്പം

വാത പിത്ത കഫങ്ങളുടെ കോപനം ഹേതുവായി പനി, ഛര്‍ദ്ദി, തളര്‍ച്ച, വയറിളക്കം, ദാഹം, തലചുറ്റല്‍, വിശപ്പ് കുറവ്, അരുചി എന്നിവയോടുകൂടി ഉണ്ടാകുന്ന വിസര്‍പ്പമാണ് അഗ്‌നിവിസര്‍പ്പം.

ജ്വലിച്ചിരിക്കുന്ന തീക്കനല്‍ ശരീരത്തില്‍ വാരി വിതറിയതുപോലെ ഉണ്ടാകുന്ന ഈ രോഗം എവിടെയെല്ലാം വ്യാപിക്കുന്നുവോ ആ ഭാഗം കരിക്കട്ടകള്‍ പോലെ കറുത്തോ നീലിച്ചോ ചുവന്നോ വരുകയും തീപ്പൊള്ളല്‍ ഏറ്റതുപോലെ കുമിളകള്‍ ഉണ്ടാവുകയും ചെയ്യും. ഇത്തരം വിസര്‍പ്പം ശരീരത്തില്‍ വേഗത്തില്‍ വ്യാപിക്കുന്നവയാണ്.

ഗ്രന്ഥിവിസര്‍പ്പം

ഞരമ്പുകളിലും മാംസത്തിലും നാഡികളിലും ചെറുതായും വട്ടത്തിലും തടിച്ചിട്ടും കടുപ്പത്തോടുകൂടിയും ചുവന്നും ഉണ്ടാകുന്ന മുഴകളാണ് ഗ്രന്ഥിവിസര്‍പ്പം. അഗ്‌നിവിസര്‍പ്പത്തില്‍ കാണുന്ന പനി മുതലായ രോഗലക്ഷണങ്ങള്‍ കാണും. കഫവും വാതവും കോപിച്ചാണ് ഗ്രന്ഥിവിസര്‍പ്പം ഉണ്ടാകുന്നത്.

കുഷ്ഠം

ആയുര്‍വേദശാസ്ത്രം എല്ലാവിധ ത്വക്‌രോഗങ്ങളെയും കുഷ്ഠം എന്ന തലക്കെട്ടിലാണ് പ്രതിപാദിക്കുന്നത്. വിസര്‍പ്പരോഗം വ്രണമായി പരിണമിക്കുന്ന ഒന്നാണ് എന്ന് നേരത്തെ സൂചിപ്പിച്ചിരുന്നുവല്ലോ. കുഷ്ഠം രോഗങ്ങള്‍ക്കും അങ്ങിനെയുള്ള സ്വഭാവമാണ് ഉള്ളത്.

എന്നാല്‍ കുഷ്ഠം രോഗങ്ങളില്‍ ആകെയുള്ള വ്യത്യാസം അത് ആദ്യംതന്നെ ആന്തരമായി ഉണ്ടായി അകത്തുനിന്നും പുറത്തേക്ക് ത്വക്ഭാഗം വരെ വന്നതിനുശേഷം പുറത്തുനിന്നും അകത്തേയ്ക്ക് വ്യാപിക്കുന്നു എന്നതാണ്.

അകമേനിന്നും ദോഷം നാഡികളില്‍ വ്യാപിച്ചു രക്തം, മാംസം മുതലായവയെ ദുഷിപ്പിച്ചുകൊണ്ടാണ് ത്വക്കിലേക്ക് എത്തുന്നത്. അപ്പോള്‍ ത്വക്കിനു നിറഭേദം ഉണ്ടാവുകയും രോഗം പ്രകടമാവുകയും ചെയ്യുന്നു. ശരീരത്തില്‍ അവിടവിടെയായി ചൂട്, വേദന മുതലായവയോടുകൂടി ഉണ്ടാകുന്ന നിറവ്യത്യാസങ്ങളാണ് കുഷ്ഠം രോഗങ്ങളുടെ വ്യക്തമായ രൂപം.

കുഷ്ഠരോഗങ്ങള്‍ ആകെ 18 തരം ഉണ്ട്. അവയില്‍ 7 എണ്ണം മഹാകുഷ്ഠംങ്ങള്‍ എന്നറിയപ്പെടുന്നു. ഈ മഹാകുഷ്ഠംങ്ങളുടെ കൂട്ടത്തില്‍പ്പെടുന്നതാണ് അവയവങ്ങള്‍ നഷ്ടപ്പെടുന്ന രീതിയില്‍ കാണപ്പെടുന്നതും നാം എല്ലാം ഭയക്കുന്നതുമായ യഥാര്‍ഥ കുഷ്ഠംരോഗം അഥവാ ലെപ്രസി. ഇപ്പോള്‍ ഈ രോഗത്തിന്റെ തോത് ഇന്ത്യയില്‍ വളരെ കുറവാണ്. ബാക്കിയുള്ളവയെല്ലാം സാധാരണഭാഷയില്‍ ത്വക്‌ദോഷങ്ങള്‍ എന്നറിയപ്പെടുന്ന രോഗങ്ങളാണ്.

ശരീരത്ത് തൊട്ടാല്‍ മിനുസമായിരിക്കുക, അല്ലെങ്കില്‍ കട്ടിയായി ഇരിക്കുക, അധികമായി വിയര്‍ക്കുകയോ വിയര്‍ക്കാതെയിരിക്കുകയോ ചെയ്യുക. നിറഭേദം വരുക, ചുടിച്ചില്‍, ചൊറിച്ചില്‍, തൊലിയില്‍ തൊട്ടാല്‍ അറിയാതെയിരിക്കുക, കുത്തിക്കൊള്ളുന്നതുപോലെ വേദനിക്കുക, വട്ടത്തില്‍ തിണര്‍ത്തുപൊങ്ങുക, ശരീരത്തിനു തളര്‍ച്ച, വ്രണമുണ്ടായാല്‍ അധികമായ വേദന ഉണ്ടാവുക.

ശരീരത്തിനു തളര്‍ച്ച, വ്രണമുണ്ടായാല്‍ അധികമായ വേദനയോടുകൂടിയിരിക്കുക, നിസാര കാരണങ്ങള്‍ക്കൊണ്ടുപോലും വീണ്ടും പഴുത്ത് വ്രണം ആയിത്തീരുക, ശരീരത്തില്‍ രോമാഞ്ചമുണ്ടാവുക, രക്തം കറുത്ത നിറത്തിലായിത്തീരുക എന്നിവയെല്ലാം വരാന്‍പോകുന്ന കുഷ്ഠംരോഗത്തിന്റെ ലക്ഷണമായി പറയപ്പെടുന്നു.

ശരീരത്തില്‍ മൊരിച്ചില്‍ ഉണ്ടാകുന്നതു മുതല്‍ തലയില്‍ വട്ടത്തില്‍ മുടികൊഴിഞ്ഞുപോകുന്നതുവരെയുള്ള രോഗങ്ങള്‍ എല്ലാംതന്നെ ത്വക്‌രോഗങ്ങളുടെ വിഭാഗത്തില്‍പ്പെടുത്താവുന്നവയാണ്.

ഭക്ഷണം ശ്രദ്ധയോടെ

വിരുദ്ധമായ അന്നപാനാദികള്‍ ഉപയോഗിക്കുന്നവര്‍ക്ക് (തൈരും മത്‌സ്യവും ഒരുമിച്ച് ഉപയോഗിക്കുക, മാംസം നെയ്യില്‍ വറുത്ത് ഉപയോഗിക്കുക, തേന്‍ ചൂടാക്കി സേവിക്കുക തുടങ്ങിയവ) വളരെ എണ്ണമയം ഉള്ള ആഹാരം ഉപയോഗിക്കുന്നവര്‍ക്കും മലമൂത്രാദികളെ അധികം സമയം തടഞ്ഞു നിറുത്തുന്നവര്‍ക്കും അധികമായി ഭക്ഷണം കഴിച്ചതിനുശേഷം ഉടന്‍തന്നെ വ്യായാമത്തില്‍ ഏര്‍പ്പെടുന്നവര്‍ക്കും, വെയില്‍, അധ്വാനം, ഭയം എന്നിവകൊണ്ട് പാരവശ്യം ഉണ്ടായ ഉടന്‍തന്നെ തണുത്തവെള്ളം കുടിക്കുന്നവര്‍ക്കും ശരിക്കും പാകം വരാത്ത ഭക്ഷണ സാധനങ്ങള്‍ ഉപയോഗിക്കുന്നവര്‍ക്കും, പുത്തരിച്ചോറ്, തൈര്, മത്‌സ്യം, മാംസം, ഉപ്പ്, പുളി, ഉഴുന്ന്, എള്ള്, ശര്‍ക്കര, പാല്‍ എന്നിവ അതിയായി ഭക്ഷിക്കുന്നവര്‍ക്കും പകല്‍ കൂടുതല്‍ സമയം ഉറങ്ങുന്നവര്‍ക്കും വാത പിത്ത കഫങ്ങള്‍ ദുഷിച്ച് ത്വക്കിനെയും രക്തത്തെയും മാംസത്തെയും ശരീരത്തിലെ ജലാംശത്തിനെയും ദുഷിപ്പിക്കുക കാരണമാണ് കുഷ്ഠംമടക്കമുള്ള ത്വക്‌ദോഷങ്ങള്‍ ആവിര്‍ഭവിക്കുന്നത്.

ചികിത്സയില്‍ ശ്രദ്ധിക്കാന്‍

വിസര്‍പ്പ രോഗത്തില്‍ ആദ്യാവസ്ഥയില്‍ തൈലങ്ങളും എണ്ണകളും ഉപയോഗിക്കുന്നത് നിഷിദ്ധമായിരിക്കെ കുഷ്ഠരോഗങ്ങളില്‍ ആദ്യംതന്നെ തൈലങ്ങളും നെയ്യും ഉപയോഗിച്ചുള്ള ചികിത്‌സകളാണ് വിധിക്കുന്നത്. ഇതിനായി തിക്തകഘൃതം, മഹാതിക്തകഘൃതം എന്നിവ ഉപയോഗിക്കാം.

എല്ലാത്തരം കുഷ്ഠംരോഗങ്ങളിലും ചേര്‍ക്കുരുവിന്റെ എണ്ണയോ, മരോട്ടി എണ്ണയോ കടുകെണ്ണയോ കുടിക്കുന്നത് നല്ലതാണെന്ന് പറയപ്പെടുന്നു. വിസര്‍പ്പരോഗത്തിനുള്ള ചികിത്‌സയിലെ വമനം, വിരോചനം മുതലായവയും രക്തമോക്ഷവും ഇവിടെയും ചെയ്യാവുന്നതാണ്.

പതിനഞ്ചു ദിവസം കൂടുമ്പോള്‍ ഒരിക്കല്‍ വമനൗഷധങ്ങളും മാസത്തിലൊരിക്കല്‍ വിരേചനൗഷധങ്ങളും, മൂന്നുദിവസത്തിലൊരിക്കല്‍ നസ്യവും ആറുമാസത്തിലൊരിക്കല്‍ രക്തമോക്ഷവും അവസ്ഥാനുസാരേണ ചെയ്യുന്നത് ഇത്തരം രോഗികളില്‍ നന്നായിരിക്കും.

വെള്ളപ്പാണ്ട്

ശ്വിത്രം എന്ന രോഗം ഉണ്ടാകുന്നതും കുഷ്ഠം ഉണ്ടാകുന്നതുപോലെതന്നെയാണ്. എന്നാല്‍ ശ്വിത്രം ഒരിക്കലും വ്രണമായി തീരുന്നില്ല. അതുകൊണ്ടുതന്നെ അതില്‍നിന്നും ചോര, ചലം, മുതലായവയുടെ സ്രവണം ഉണ്ടാകുന്നില്ല. ഈ രോഗം ഉണ്ടാകുന്നവരില്‍ ശരീരത്ത് അവിടവിടെയായി വെള്ളക്കടലാസിന്റെ രീതിയില്‍ വെളുത്തിരിക്കുന്നതു കാണാം.

രോമങ്ങള്‍ വെളുത്തുപോകാത്തതും അധികം തടിക്കാത്തതും ഒന്നിനോടൊന്ന് കൂട്ടിമുട്ടാത്തതും പുതിയതും തീകൊണ്ട് പൊള്ളല്‍ ഉണ്ടായ ഭാഗത്തല്ലാതെ ഉണ്ടായിരിക്കുന്നതുമായ ശ്വിത്രരോഗം ചികിത്സിച്ച് ഭേദമാക്കാവുന്നവയാണ്.

ഇതിന് വിപരീതമായിട്ട് ഉണ്ടാകുന്ന ശ്വിത്രരോഗം ചികിത്സിച്ചുഭേദമാക്കാന്‍ പ്രയാസമാണ്. ഗുഹ്യഭാഗത്ത് ഉണ്ടാകുന്നതും കൈ, കാല്‍, ചുണ്ട് എന്നിവിടങ്ങളില്‍ ഉണ്ടാകുന്നതും പുതിയവ ആയിരുന്നാല്‍ കൂടിയും ചികിത്സിച്ച് ഭേദമാക്കാന്‍ പ്രയാസമേറിയവയാണ്.

കടപ്പാട്: ഡോ. ആര്‍. രവീന്ദ്രന്‍

പനി മാറിയിട്ടും പിടിവിടാതെ വേദന

വൈറല്‍ പനിയും അതേ തുടര്‍ന്നുണ്ടാകുന്ന വൈറല്‍ ആര്‍ത്രൈറ്റിസും കുറച്ചൊന്നുമല്ല നമ്മുടെ നിത്യ ജീവിതത്തെ താറുമാറാക്കുന്നത് .

പനിക്കുശേഷം സന്ധികളില്‍ അനുഭവപ്പെടുന്ന നീര്‍ക്കെട്ടും വേദനയും പലരേയും അലട്ടുന്ന പ്രശ്‌നമാണ്. പനി മാറിയാലും സന്ധിവേദന തുടരും. 
വൈറല്‍ രോഗബാധയെത്തുടര്‍ന്ന് സന്ധികളിലുണ്ടാകുന്ന നീര്‍വീക്കവും വേദനയുമാണ് വൈറല്‍ ആര്‍ത്രൈറ്റിസ്.

ഈ അവസ്ഥ കുട്ടികളെ അപേക്ഷിച്ച് മുതിര്‍ന്നവരെയാണ് കൂടുതലും ദുരിതത്തിലാക്കുന്നത്. മുണ്ടിവീക്കം, ഹെപ്പാറ്റൈറ്റിസ് ബി, സി തുടങ്ങിയ വൈറല്‍രോഗബാധയെ തുടര്‍ന്നും സന്ധിവേദന ഉണ്ടാകാറുണ്ട്.

സന്ധിവാതരോഗങ്ങള്‍ പലതുണ്ടെങ്കിലും വൈറല്‍ ആര്‍ത്രൈറ്റിസ് ഏറ്റവും കൂടുതല്‍ ആളുകളിലും കാണപ്പെടുന്നു. വൈറല്‍ രോഗങ്ങള്‍ ഏതു നിമിഷവും പടര്‍ന്നു പിടിക്കാനുള്ള സാധ്യത ഉള്ളതുകൊണ്ടാണിത്. കൂടാതെ വൈറല്‍ രോഗങ്ങളെ തടയുകയും അത്ര എളുപ്പമാവില്ല.

വൈറല്‍ പനിയും അതേ തുടര്‍ന്നുണ്ടാകുന്ന വൈറല്‍ ആര്‍ത്രൈറ്റിസും കുറച്ചൊന്നുമല്ല നമ്മുടെ നിത്യ ജീവിതത്തെ താറുമാറാക്കുന്നത്. ചിക്കന്‍ ഗുനിയ വ്യാപകമായിരുന്ന കാലത്ത് ഓഫീസില്‍ ഹാജര്‍നില വലിയ തോതില്‍ കുറഞ്ഞതും വിപണിയില്‍ കച്ചവടം കുറഞ്ഞതും നമുക്ക് അനുഭവമുള്ളതാണ്.

തകരുന്ന പ്രതിരോധ സംവിധാനം

വൈറസ് അണുബാധയിലൂടെ ശരീരത്തിന്റെ പ്രതിരോധ സംവിധാനം തകരാറിലാകുന്ന വൈറല്‍ ആര്‍ത്രൈറ്റിസ്. വൈറല്‍ പനികളുടെയെല്ലാം ഭാഗമായി വൈറല്‍ ആര്‍ത്രൈറ്റിസ് ഉണ്ടാകാം.

ആര്‍ത്രൈറ്റിസ് ഉള്ള വ്യക്തികളില്‍ ചിക്കുന്‍ഗുനിയപോലുള്ള പനികള്‍ പിടികൂടുമ്പോള്‍ വേദനയുടെ തോതും കൂടുന്നു. പനിക്കുശേഷം മാസങ്ങളോളം നീണ്ടു നില്‍ക്കുന്ന വേദനയും നീര്‍ക്കെട്ടുമാണ് ഈ രോഗത്തിന്റെ പ്രധാന ലക്ഷണം.

അരയ്ക്കു താഴേക്കുള്ള സന്ധികളിലാണ് വേദന കൂടുതലായും അനുഭവപ്പെടുന്നത്. കൈകാലുകളിലെ ചെറിയ സന്ധികള്‍, മണിബന്ധം, ഇടുപ്പ്, നടുവ്, കണങ്കാല്‍ തുടങ്ങിയ ഭാഗങ്ങളിലാണ് ഇത് പ്രധാനമായും ബാധിക്കുന്നത്. വൈറല്‍ ആര്‍ത്രൈറ്റിസ് ഉള്ളവര്‍ക്ക് വിരലുകള്‍ മടക്കാന്‍ ബദ്ധിമുട്ട് അനുഭവപ്പെടും.

രോഗചികിത്സ

ശരീരത്തിന്റെ പ്രതിരോധശക്തി വര്‍ധിപ്പിച്ച് രോഗശമനം നല്‍കുകയാണ് ആയുര്‍വേദത്തില്‍ ചെയ്യുന്നത്. ശാരീരിക പ്രത്യേകതകള്‍കൊണ്ട് മധ്യവയസ് പിന്നിട്ടവരില്‍ രോഗത്തിന് ശാശ്വതമായ ശമനം ലഭിക്കണമെന്നില്ല.

ഓരോരുത്തരുടെയും ശാരീരികാവസ്ഥ അനുസരിച്ച് കിടത്തിചികിത്സ ചെയ്യുന്നതും വേദനയ്ക്ക് ആശ്വാസം നല്‍കും. നീര് കുറഞ്ഞു കഴിഞ്ഞാല്‍ കിഴി, അഭ്യംഗം, പിഴിച്ചില്‍ തുടങ്ങിയ ചികിത്സകള്‍ ചെയ്യാവുന്നതാണ്.

പരിപൂര്‍ണമായ രോഗ ശമനത്തിന് 14 - 21 ദിവസത്തോളം കിടത്തിചികിത്സ ആവശ്യമാണ്. മരുന്നു കഴിക്കുന്നവരില്‍ രോഗശമനത്തിന് ആറുമാസത്തിലധികം സമയം വേണ്ടിവരാം.

ചിക്കുന്‍ഗുനിയമൂലമുള്ള വൈറല്‍ ആര്‍ത്രൈറ്റിസിന് രാസ്‌നാദി കഷായം, ഗോരോചനാദി ഗുളിക, രാസനണ്ഡാദി കഷായം, പുനര്‍നവാദി കഷായം മുതലായ ഔഷധങ്ങള്‍ ഫലപ്രദമാണ്.

ജീവിതക്രമത്തില്‍ ശ്രദ്ധിക്കാന്‍

  1. സന്ധിവേദനയ്‌ക്കൊപ്പം കൈകാലുകളില്‍ നീരുള്ളവര്‍ തൈരിന്റെ ഉപയോഗം കുറയ്ക്കണം.
  2. പാത്രം ചൂടാക്കി ഒരു തോര്‍ത്ത് മൂന്നോ നാലോ ആയി മടക്കി അതില്‍വച്ച് ചൂടാകുമ്പോള്‍ എടുത്ത് വേദനയുള്ള ഭാഗത്ത് വയ്ക്കുക.
  3. തണുത്ത ആഹാരവും ചുറ്റുപാടുകളും ഒഴിവാക്കുക.
  4. തോടുള്ള മീനുകള്‍ കഴിക്കാതിരിക്കുക.
  5. പഴയതും വീണ്ടും ചൂടാക്കിയതുമായ ഭക്ഷണം ഒഴിവാക്കണം.

വേദന കുറയ്ക്കാന്‍ പൊടികൈകള്‍

  1. ശരീരം മുഴുവന്‍ ഔഷധമിട്ട് കാച്ചിയ എണ്ണ തേച്ച് കുളിക്കുക. സന്ധികള്‍ക്ക് അയവ് കിട്ടാന്‍ ഇത് സഹായിക്കും. എണ്ണ തേച്ച് പിടിപ്പിച്ച് അരമണിക്കൂര്‍ കഴിഞ്ഞുവേണം കുളിക്കാന്‍.
  2. ഇന്ദുകാന്തം കഷായം, ച്യവനപ്രാശം, ഖോരോചനാദി ഗുളിക തുടങ്ങിയ പ്രതിരോധ ശക്തി വര്‍ധിപ്പിക്കുന്ന മരുന്നുകള്‍ കഴിക്കുക.
  3. എണ്ണയില്‍ വറുത്തവ, ബേക്കറി സാധനങ്ങള്‍, കോക്കോ ചേര്‍ന്ന വിഭവങ്ങള്‍ ഇവ ഒഴിവാക്കുക.
  4. മത്സ്യമാംസാദികള്‍ കഴിക്കണമെന്ന് നിര്‍ബന്ധമുള്ളവര്‍ വറുത്തു കഴിക്കാതെ ചാറായി കഴിക്കുക.
  5. തഴുതാമ, ജീരകം, കരിങ്ങാലി ഇവ ഇട്ട് തിളപ്പിച്ച വെള്ളം കുടിക്കുക.
  6. കമ്മ്യൂണിസ്റ്റുപച്ചയിട്ട് തിളപ്പിച്ച വെള്ളംകൊണ്ട് വേദനയുള്ള ഭാഗത്ത് ധാര കോരുക.
  7. ഉമ്മത്തിന്റെ ഇല അരച്ച് പുകച്ചിലും നീരും ഉള്ള ഭാഗത്ത് കെട്ടിവയ്ക്കുന്നത്. ഇവ കുറയാന്‍ സഹായിക്കും.
  8. മുരിങ്ങയില, പുളിയില, വാതംകൊല്ലി ഇവ ഇട്ട് തിളപ്പിച്ച വെള്ളത്തില്‍ കുളിക്കുക.
  9. പ്രായമുള്ളവര്‍ സ്‌റ്റെപ്പ് കയറുക, തൂത്തുവാരുക, അലക്കുക തുടങ്ങിയ ആയാസമുള്ള ജോലികള്‍ ചെയ്യുന്നത് കുറയ്ക്കുക.

വ്യായാമം

വൈറല്‍ ആര്‍ത്രൈറ്റിസിന്റെ ഫലമായി സന്ധികളില്‍ ഉണ്ടാകുന്ന വേദനയുടെ തീക്ഷ്ണത കുറയ്ക്കാന്‍ വ്യായാമങ്ങള്‍ സഹായിക്കും. ചികിത്സയ്ക്കുശേഷം ലഘുവായ വ്യായാമങ്ങള്‍ ചെയ്തു തുടങ്ങാം.

  1. കൈകളില്‍ നന്നായി തൈലം തേച്ചുപിടിപ്പിച്ച ശേഷംചെറുചൂടുവെള്ളത്തില്‍ മുക്കിവച്ച് വിരലുകള്‍ ചലിപ്പിക്കുക.
  2. കഴുത്ത് വശങ്ങളിലേക്ക് ചലിപ്പിക്കുക.
  3. കാല്‍വിരലുകളില്‍നിന്ന് പൊങ്ങുകയും താഴുകയും ചെയ്യുക.
  4. കിടന്നുകൊണ്ട് മുട്ട് നിവര്‍ത്തുകയും മടക്കുകയും ചെയ്യുക.
  5. നടത്തവും സന്ധികള്‍ക്ക് ആയാസം നല്‍കുന്നു.

വിവരങ്ങള്‍ക്ക് കടപ്പാട്:

ഡോ. ആര്‍. രവീന്ദ്രന്‍
കോയമ്പത്തൂര്‍ ആര്യവൈദ്യ ഫാര്‍മസി, കോട്ടയം

അവസാനം പരിഷ്കരിച്ചത് : 10/24/2019



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate