ജൈവ ഊര്ജ്ത്തിന്‌ ബയോഗ്യാസ്‌ പ്ലാന്റ്‌

ജൈവ ഊര്‍ജത്തിന്‌ ബയോഗ്യാസ്‌ പ്ലാന്റ്‌

ഇന്ധന ദൗര്‍ലഭ്യം രൂക്ഷമായ, ഊര്‍ജ പ്രതിസന്ധി നേരിട്ടുകൊണ്ടിരിക്കുന്ന ഒരു കാലഘട്ടത്തിലാണ്‌ നാമിന്ന്‌ ജീവിക്കുന്നത്‌. ഇതിനൊരു പരിഹാരം പാരമ്പര്യേതര ഊര്‍ജ സ്രോതസ്സുകള്‍ കണ്ടെത്തുകയും അവ പരാമാവധി പ്രയോജനപ്പെടുത്തുകയുമാണ്‌. സൗരോര്‍ജം,കാറ്റില്‍ നിന്നുള്ള ഊര്‍ജം, ജൈവവസ്‌തുക്കളില്‍നിന്നുള്ള ഊ ര്‍ജം എന്നിവ ഈ വിഭാഗത്തില്‍പ്പെടു ന്നു. ഇന്ന്‌ നാട്ടിന്‍പുറങ്ങളില്‍ പോലും പാചകത്തിന്‌വേണ്ടി വളരെ വിലകൂടിയ ദ്രവീകൃത പെട്രോളിയം ഗ്യാസ്‌(എല്‍ പി ജി) ആണ്‌ ഉപയോഗിക്കുന്നത്‌. കൃഷിയും കന്നുകാലി വളര്‍ത്തലും ഒത്തുചേര്‍ന്ന കൃഷിരീതി നിലവിലുള്ള നമ്മുടെ നാട്ടില്‍ പാചകത്തിനായി ബയോഗ്യാസ്‌ അല്ലെങ്കില്‍ ജൈവവാതകം ഉപയോഗിക്കുകയാണെങ്കില്‍ ചെലവു കുറഞ്ഞതും സുരക്ഷിതവുമായ ഇന്ധന ലഭ്യത ഉറപ്പുവരുത്താന്‍ സാധിക്കും. ബയോഗ്യാസ പ്‌ളാന്റിന്റെ പ്രധാന നേട്ടം നിര്‍മാണം കഴിഞ്ഞാല്‍ ആവര്‍ത്തനച്ചെലവ്‌ വരുന്നില്ല എന്നതാണ്‌. പാചകാവശ്യത്തിന്‌ പുറമെ വിളക്കുകള്‍ കത്തിക്കുവാനും പമ്പ്‌സെറ്റുകള്‍ പ്രവര്‍ത്തിപ്പിക്കുവാനും ഈ വാതകം പ്രയോജനപ്പെടുത്താം..
ബയോഗ്യാസ്‌
അന്തരീക്ഷവുമായി സമ്പര്‍ക്കമില്ലാത്ത അവസ്ഥയില്‍ ജൈവവസ്‌തുക്കളില്‍ സൂക്ഷ്‌മാണുക്കള്‍ പ്രവര്‍ത്തിക്കുമ്പോഴുണ്ടാകുന്ന വാതകമാണ്‌ ബയോഗ്യാസ്‌. 5570 ശതമാനം നിറമോ മണമോ ഇല്ലാത്ത മീതൈല്‍ വാതകവും, 3045 ശതമാനത്തോളം കാര്‍ബണ്‍ ഡൈ ഓക്‌സൈഡും ചെറിയതോതില്‍ മറ്റ്‌ വാതകങ്ങളായ നൈട്രജന്‍, ഹൈഡ്രജന്‍, ഹൈഡ്രജന്‍ സള്‍ഫൈഡ്‌, കാര്‍ബണ്‍ മോണോക്‌സൈഡ്‌, ഓക്‌സിജന്‍ എന്നിവയും അടങ്ങിയിരിക്കുന്നു. മീതൈല്‍ വാതകമാണ്‌ കത്താനായി ഉപയോഗിക്കുന്നത്‌. കരിയോ പുകയോ ഇല്ലാത്ത ഇളം നീലനിറത്തിലുള്ള ജ്വാലയോടെ കത്തുന്ന ഈ വാതകം സുരക്ഷിതവും വിഷമയമില്ലാത്തവയുമാണ്‌. ഇതുമൂലം അപകടമോ മറ്റാരോഗ്യ പ്രശ്‌നങ്ങളോ ഉണ്ടാവുന്നില്ല. 30-350 സെന്റിഗ്രേഡാണ്‌ മീതൈല്‍ വാതകത്തിന്‌ അനുകൂലമായ താപനില. ചൂട്‌ 100 താഴെയായാല്‍ ഗ്യാസുല്‍പാദനം നടക്കുകയില്ല.
ജൈവവാതകം ഉപയോഗിച്ച്‌ ആഹാരം പാകം ചെയ്യുകയാണെങ്കില്‍ കരിയോ പുകയോ ഉണ്ടാകാത്തതിനാല്‍ പാത്രങ്ങളും അടുക്കളയും ശുചിയായി സൂക്ഷിക്കുവാന്‍ കഴിയുന്നു. പരിസര മലിനീകരണം ഉണ്ടാവുന്നില്ല. വാതകത്തിന്റെ മര്‍ദ്ദം കുറവായതിനാല്‍ അപകട സാധ്യതയും കുറവാണ്‌. ചാണകം ഉണക്കി കത്തിക്കുന്നതിനാല്‍ 60 ശതമാനം ഇന്ധന ക്ഷമത ഈ വാതകത്തിന്‌ അധികമായുണ്ട്‌.

ഉപയോഗിക്കാവുന്ന ജൈവമാലിന്യങ്ങള്‍

ബയോഗ്യാസുല്‍പാദിപ്പിക്കാന്‍ ചാണകമാണ്‌ പ്രധാനമായും ഉപയോഗിക്കുന്നത്‌. എന്നാല്‍ മിക്കവാറും ജൈവവസ്‌തുക്കള്‍ ഇതിനായി പ്രയോജനപ്പെടുത്താം. ആട്‌, കോഴി, പന്നി എന്നിവയുടെ വിസര്‍ജ്യങ്ങളും അടുക്കളയിലെ പാഴ്‌ വസ്‌തുക്കള്‍, കാര്‍ഷികാവശിഷ്ടങ്ങള്‍ ചെറുതായി നുറുക്കിയ വയ്‌ക്കോല്‍, പച്ചപ്പുല്ല്‌, ജലസസ്യങ്ങള്‍ റബ്ബര്‍ഷീറ്റ്‌ അടിച്ച്‌ കഴിഞ്ഞ്‌ പാഴാക്കികഴയുന്ന വെള്ളം എന്നിവ ഇതിന്‌ വേണ്ടി ഉപയോഗിക്കാവുന്നതാണ്‌. 25 കിലോഗ്രാം ചാണകത്തില്‍നിന്നും 1 ക്യുബിക്‌ മീറ്റര്‍ ഗ്യാസ്‌ ഉല്‍പാദിപ്പിക്കാം. ഇതുപയോഗിച്ച്‌ നാലുപേര്‍ക്കാവാശ്യമായ ഭക്ഷണം തയ്യാറാക്കാം.

പ്‌ളാന്റ്‌ മോഡല്‍സ്‌
അരനൂറ്റാണ്ടിന്‌ മുമ്പ്‌ തന്നെ പ്‌ളാന്റിന്റെ നിര്‍മാണ സാങ്കേതികവിദ്യ ഇന്ത്യയില്‍ നിലവിലുണ്ടെങ്കിലും 1978ല്‍ മാത്രമാണ്‌ ഖാദി ആന്റ്‌ വില്ലേജ്‌ ഇന്‍ഡസ്‌ട്രീസ്‌ കമ്മീഷന്റെ നേതൃത്വത്തില്‍ ബയോഗ്യാസ്‌ പ്‌ളാന്റുകള്‍ വ്യാപകമായി നിര്‍മിക്കാന്‍ തുടങ്ങിയത്‌. ആദ്യകാലങ്ങളില്‍ നിര്‍മിച്ചിരുന്ന ജനതാ മോഡല്‍ പ്‌ളാന്റുകള്‍ നിര്‍മാണച്ചെലവ്‌ കൂടിയവയാണ്‌. 1984ഓടെ ആക്ഷന്‍ ഫോര്‍ ഫുഡ്‌ പ്രോഗ്രാമിന്റെ ഭാഗമായി ചെലവ്‌ കുറഞ്ഞ ദീനബന്ധു മോഡല്‍ തയ്യാറാക്കപ്പെട്ടതോടെ പാവപ്പെട്ട സാധാരണക്കാര്‍ക്കും പ്‌ളാന്റുകള്‍ സ്ഥാപിക്കാമെന്നായി. ഇതല്ലാതെ ഫ്‌ളോട്ടിംഗ്‌ ഗ്യാസ്‌ ഹോള്‍ഡര്‍, പ്രഗതിമോഡല്‍ ഫൈബര്‍ ഗ്‌ളാസ്‌ എന്നീ മോഡലുകളും കേന്ദ്ര സര്‍ക്കാര്‍ അംഗീകരിച്ചവയാണ്‌. കേരളത്തില്‍ കൂടുതല്‍ പ്രചാരത്തിലുള്ളത്‌ ഖാദി ആന്റ്‌ വില്ലേജ്‌ ഇന്‍ഡസ്‌ട്രീസ്‌’ കമ്മീഷന്റെ ഡ്രം മോഡലും കൃഷി വകുപ്പിന്റെ മേല്‍നോട്ടത്തില്‍ നിര്‍മിക്കുന്ന ജനത ദീന ബന്ധുമോഡലുകളുമാണ്‌.
ഡം മോഡലിനെ അപേക്ഷിച്ച്‌ നിര്‍മാണച്ചെലവ്‌ കുറഞ്ഞ ദീനബന്ധുവിന്റെ ഡ്യൂ മോഡലുകളാണ്‌ ഇന്ന്‌ കൂടുതലായി നിര്‍മിച്ചുവരുന്നത്‌. പെട്ടന്നു കേടു സംഭവിക്കാത്തതിനാല്‍ ഇതിന്‌ റിപ്പയര്‍ ചെലവുകളും കുറവായിരിക്കും. ബയോ ഗ്യാസ്‌ പ്‌ളാന്റിന്റെ പ്രധാന ഭാഗങ്ങള്‍ മിക്‌സിംഗ്‌ ടാങ്ക്‌, ദഹന അറ(ഡൈജസ്റ്റര്‍ ടാങ്ക്‌), വാതക സംഭരണി, നിര്‍ഗമന മാര്‍ഗം(ഔട്‌ലറ്റ്‌ ), വാല്‍വ്‌, സ്‌റ്റൗ എന്നിവയാണ്‌. വീട്ടലെ അംഗങ്ങളുടെ എണ്ണം, കന്നുകാലികളുടെ എണ്ണം, ദിവസവും ലഭ്യമായ ചാണകത്തിന്റെ അളവ്‌ എന്നിവ അടിസ്ഥാനമാക്കിയാണ്‌ പ്‌ളാന്റിന്റെ വലിപ്പം നിര്‍ണയിക്കുന്നത്‌.

നിര്‍മാണം, പ്രവര്‍ത്തനം

അടുക്കളയുടെയും തൊഴുത്തിന്റെയും സമീപത്തായിരിക്കണം പ്‌ളാന്റ്‌ നിര്‍മിക്കേണ്ടത്‌. നല്ല സൂര്യപ്രകാശം ലഭിക്കുന്നതും മഴക്കാലത്ത്‌ വെള്ളം കെട്ടിനില്‍ക്കാത്തതുമായ സ്ഥലമായിരിക്കണം പ്‌ളാന്റ്‌ നിര്‍മാണത്തിന്‌ തെരഞ്ഞെടുക്കേണ്ടത്‌. വീടിന്റെ അടിസ്ഥാനത്തില്‍ നിന്ന്‌ 1 മീറ്ററും കിണറില്‍ നിന്ന്‌ 10-15 മീറ്ററും അകലെ ആയിരിക്കണം. ഇഷ്ടിക/ഫെറോസിമന്റ്‌, മണല്‍, സിമന്റ്‌, കമ്പി എന്നിവയാണ്‌ പ്‌ളാന്റ്‌ നിര്‍മാണത്തിനാവശ്യമായ സാമഗ്രികള്‍. പ്‌ളാന്റ്‌ നിര്‍മാണത്തില്‍ പരിശീലനം ലഭിച്ച കല്‍പണിക്കാരെക്കൊണ്ടോ അംഗീകാരമുള്ള ഏജന്റുമാരെക്കൊണ്ടോ ആയിരിക്കണം പ്‌ളാന്റ്‌ നിര്‍മിക്കുന്നത്‌.
അംഗീകാരമുള്ള ഏജന്റുമാരെക്കൊണ്ട്‌ നിര്‍മിക്കുന്ന പ്‌ളാന്റുകള്‍ക്ക്‌ 3 വര്‍ഷത്തെ ഗ്യാരണ്ടി ലഭിക്കും. ടേണ്‍കീ ജോലിക്കായി ഒരു പ്‌ളാന്റിന്‌ 700 രൂപ ധനസഹായം ലഭിക്കും. സഹകരണ സംഘങ്ങള്‍, രജിസ്റ്റര്‍ചെയ്‌ത സൊസൈറ്റികള്‍, സന്നദ്ധസംഘടനകള്‍, പരിശീലനം ലഭിച്ച വ്യവസായ സംരംഭകര്‍ എന്നിവര്‍ക്ക്‌ ടേണ്‍ കീ ഫീസ്‌ നല്‍കാം. ഇവര്‍ വര്‍ഷത്തി ല്‍ രണ്ട്‌ പ്രാവശ്യം പ്‌ളാന്റുകള്‍ സന്ദര്‍ശിച്ച്‌ പ്രവര്‍ത്തനം തൃപ്‌തികരമാണെന്ന്‌ ഉറപ്പ്‌ വരുത്തണം. 1 മുതല്‍ 10 ക്യുബിക്‌ മീറ്റര്‍ വലുപ്പമുള്ള പ്‌ളാന്റുകള്‍ നിര്‍മിക്കുന്നുണ്ട്‌.
പ്‌ളാന്റ്‌ നിര്‍മിക്കുന്നതിനും കേടുപാടുകള്‍ തീര്‍ക്കുന്നതിനും കേന്ദ്ര ഗവണ്‍മെന്റ്‌ ധനസഹായം അനുവദിച്ചിട്ടുണ്ട്‌. പട്ടികജാതി/പട്ടികവര്‍ഗ/ചെറുകിട/നാമമാത്ര കര്‍ഷകര്‍ക്ക്‌ 2300 രൂപയും സബ്‌സിഡി ലഭിക്കും. പ്‌ളാന്റ്‌ നിര്‍മാണത്തിനാവശ്യമായ വായ്‌പ ബാങ്കുകള്‍ മുഖേന ലഭിക്കും.
നിര്‍മാണം പൂര്‍ത്തിയാക്കിയ പ്‌ളാന്റിലേക്ക്‌ പച്ചചാണകവും വെള്ളവും ഒരു കി. ഗ്രാം ചാണകത്തിന്‌ 1 ലിറ്റര്‍ വെള്ളം എന്ന അനുപാതത്തിലാണ്‌ കലക്കി ഒഴിക്കേണ്ടത്‌. ആദ്യം ചാണകം നിറച്ച്‌ 21 ദിവസം കഴിഞ്ഞശേഷം മാത്രമെ ഗ്യാസ്‌ ഉപയോഗിക്കാന്‍ പാടുള്ളൂ. പുതുതായി ചേര്‍ക്കുന്ന ചാണകത്തില്‍നിന്ന്‌ വാതകം പൂര്‍ണമായി ലഭിക്കാന്‍ 30-40 ദിവസം വേണം. വാതകം ഉപയോഗിക്കാന്‍ തുടങ്ങുന്ന ദിവസം മുതല്‍ എല്ലാ ദിവസവും നിശ്ചിത അളവിലുള്ള ചാണക ലായനി ദഹന അറയിലേക്ക്‌ ഒഴിച്ചുകൊടുക്കണം.

ബയോഗ്യാസ്‌ സ്‌ളറി
ബയോഗ്യസ്‌ സ്‌ളറി അഥവാ പ്‌ളാന്റില്‍നിന്ന്‌ പുറത്ത്‌ വരുന്ന ലായനി ചെടികള്‍ക്ക്‌ ഏറ്റവും നല്ല വളമാണ്‌. ഇതില്‍ ചാണകത്തിലേതിലേക്കാള്‍ കൂടിയ അളവില്‍ സസ്യ പോഷക ഘടകങ്ങള്‍ അടങ്ങിയിരിക്കുന്നു. ചെടികള്‍ക്ക്‌ എളുപ്പത്തില്‍ ലഭ്യമാകുന്ന അമോണിയ രൂപത്തിലുള്ള നൈട്രജന്‍, ഫോസ്‌ഫറസ്‌, പൊട്ടാഷ്‌, എന്നിവ ഇതിലുണ്ട്‌. ഇതുപയോഗിച്ച്‌ കൃഷി ചെയ്യുമ്പോള്‍ 10-20% വിള വര്‍ദ്ധനവ്‌ ഉണ്ടാകുന്നതായി പഠനങ്ങള്‍ തെളിയിക്കുന്നു. ഇതില്‍ നിന്ന്‌ എളുപ്പം കമ്പോസ്റ്റ്‌ തയ്യാറാക്കാം.

സാങ്കേതിക സാമ്പത്തിക സഹായങ്ങള്‍

പ്‌ളാന്റുകള്‍ നിര്‍മിക്കുന്നതിനാവശ്യമായ സാങ്കേതിക സഹായവും ഉപദേശവും അതാത്‌ പ്രദേശത്തെ കൃഷിഭവന്‍ മുഖേന ലഭ്യമാകും. ആവശ്യമെങ്കില്‍ ബാങ്ക്‌ വായ്‌പ ലഭിക്കുന്നതിനുള്ള സഹായങ്ങളും കൃഷിഭവനില്‍ നിന്ന്‌ ചെയ്‌തുതരും. നിര്‍മാണം പൂര്‍ത്തീകരിച്ച്‌ പ്‌ളാന്റ്‌ പ്രവര്‍ത്തിച്ചു തുടങ്ങിയാലുടനെ കേന്ദ്ര ഗവണ്‍മെന്റില്‍ നിന്നും അനുവദിച്ചിട്ടുള്ള സബ്‌സിഡി കൃഷിഭവനില്‍ നിന്നും ലഭിക്കും.
സംസ്ഥാനാടിസ്ഥാനത്തില്‍ പദ്ധതി മേല്‍നോട്ടം വഹിക്കുന്നത്‌ കൃഷി ഡയറക്ടറേറ്റിലെ അഡീഷണല്‍ ഡയറക്ടര്‍(ബയോഗ്യസ്‌) ആണ്‌. പ്‌ളാന്റിന്റെ പ്രവര്‍ത്തനം, സാങ്കേതികവിദ്യ സംബന്ധിച്ച്‌ കൃഷി ഓഫീസര്‍, അസിസ്റ്റന്റ്‌സ്‌ എന്നിവര്‍ക്കും പ്‌ളാന്റ്‌ നിര്‍മാണം, അറ്റകുറ്റപണികള്‍ എന്നിവ സംബന്ധിച്ച്‌ കല്‍പണിക്കാര്‍ക്കും വിവിധ തരത്തിലുള്ള പരിശീലന പരിപാടികള്‍ കൃഷിവകുപ്പിന്റെ ആഭിമുഖ്യത്തില്‍ നടത്തിവരുന്നു. തിരുവനന്തപുരത്ത്‌ വെള്ളായണിയിലുള്ള പരിശീലനകേന്ദ്രമാണ്‌ പരിശീലനങ്ങള്‍ സംഘടിപ്പിക്കുന്നത്‌.