അഭിരുചി പരീക്ഷകള്‍
അഭിരുചി പരീക്ഷകള്‍
- താല്‍പര്യ സഞ്ചികകള്‍
- വ്യക്തിത്വ വിശകലനം
- യാന്ത്രികാഭിരുചി
- ഐന്ദ്രികാഭിരുചി
- കലാഭിരുചി
- സംഗീതാഭിരുചി
- ക്ലറിക്കല്‍ അഭിരുചി
- ആതുര ശുശ്രൂഷയിലെ അഭിരുചി
- വൈദ്യശുശ്രൂഷയിലെ അഭിരുചി
- ശാസ്ത്രത്തിലും എഞ്ചിനീയറിംഗിലുമുള്ള അഭിരുചി
- നിയമകാര്യത്തിലെ അഭിരുചി
- മാനേജ്മെന്റ്റിലെ അഭിരുചി
- മാധ്യമ അഭിരുചി
- അധ്യാപനത്തിലെ അഭിരുചി
- പൈലറ്റ് ആപ്റ്റിട്യൂറ്റ് ബാറ്ററി ടെസ്റ്റ്
- സാന്ദര്‍ഭിക പരീക്ഷകള്‍
താല്‍പര്യ സഞ്ചികകള്‍
കുട്ടികളോട് നമ്മള്‍ സാധാരണ ചോദിക്കുന്ന ഒരു ചോദ്യമുണ്ട്. എന്താവാനാണ് നിങ്ങള്‍ക്കാഗ്രഹം? ഡോക്ടര്‍, എഞ്ചിനീയര്‍, ഐ.എ.എസ്കാരന്‍, അധ്യാപകന്, പൊലീസ് ഇന്‍സ്പെക്ടര്‍, ചിത്രകാരന്‍ ഇങ്ങിനെ പല തരത്തിലുള്ള മറുപടികളാണ് നമുക്കു കിട്ടുക. എന്നാല്‍ ഉത്തരങ്ങളിലും ആഗ്രഹങ്ങളിലുമല്ലാതെ അവരുടെ വ്യക്തിത്വങ്ങളില്‍ ഒളിഞ്ഞിരിക്കുന്ന മറ്റൊരു ഘടകമുണ്ട്, അഭിരുചി. ഈ ആഗ്രഹങ്ങള്‍ പലതും ഒരു പക്ഷേ അവരുടെ അഭിരുചിയുടെ ബഹിര്‍സ്ഫുരണങ്ങളാവാം; എന്നാല്‍ അത് അഭിരുചിയായിക്കൊള്ളണമെന്നില്ല, പക്ഷേ ഇവ തൊഴിലുകളോടുള്ള ആഭിമുഖ്യത്തെയോ താല്‍പര്യത്തെയോ കുറിക്കുന്നു. ഈ ആഭിമുഖ്യം വിലയിരുത്താന്‍ മന:ശാസ്ത്രജ്ഞര്‍ ധാരാളം ടെസ്റ്റുകള്‍ ഗവേഷണത്തിലൂടെ ആവിഷ്കരിച്ചിട്ടുണ്ട്. ഇവ താല്‍പര്യ സഞ്ചികകള്‍ (ഇന്‍ററസ്റ്റ് ഇന്‍വെന്‍ററി) എന്നാണ് അറിയപ്പെടുന്നത്. ഇതു മുഖാന്തിരം ഒരാളുടെ അഭിരുചി എന്തെന്ന് മനസ്സിലാക്കി ആ മേഖലയിലേക്ക് അയാളെ നയിക്കാന്‍ ഒരു നല്ല അധ്യാപകന് കഴിയുന്നു. കരിയര്‍ കൗണ്‍സിലിംഗില്‍ ധാരാളമായി ഇന്‍ററസ്റ്റ് ഇന്‍വെന്‍ററികള്‍ ഉപയോഗിച്ചു വരുന്നു.
വ്യക്തിത്വ വിശകലനം
നല്ല വ്യക്തിത്വമുള്ളവരെ ആരാണ് ഇഷ്ടപ്പെടാത്തത്. വ്യക്തിത്വ വികസനത്തിന് നിത്യജീവിതത്തിലും ഔദ്യോഗിക ജീവിതം കെട്ടിപ്പടുക്കുന്നതിലും വലിയ പങ്കാണുള്ളത്. വ്യക്തിത്വ വികസനം നമ്മുടെ പരിസരങ്ങളില്‍ നിന്നും ചുറ്റുപാടുകളില്‍ നിന്നും ആരംഭിക്കുന്നു. അതുകൊണ്ടുതന്നെ വ്യക്തിത്വ വികസനത്തില്‍ സ്കൂള്‍ വിദ്യാഭ്യാസ കാലഘട്ടം നല്ലൊരു പങ്ക് വഹിക്കുന്നു. ഒരാളില്‍ കൂടിയിരിക്കുന്ന വ്യക്തിഗുണങ്ങള്‍ കണ്ടെത്തിയാല്‍ മാത്രമേ പോരായ്മകള്‍ ചൂണ്ടിക്കാട്ടി അതു പരിഹരിക്കാന്‍ സാധിക്കുകയുള്ളൂ. ഈ ഗുണങ്ങള്‍ വിശകലനം ചെയ്യാന്‍ ധാരാളം പരീക്ഷകള്‍ മന.ശാസ്ത്രജ്ഞര്‍ വികസിപ്പിച്ചെടുത്തിട്ടുണ്ട്. ബഹുമുഖത്വം, പ്രായോഗികത, താത്വിക സമീപനം, സഹകരണ മനോഭാവം, നേതൃത്വപാടവം തുടങ്ങി വിവിധ തലങ്ങളില്‍ ഒരാളുടെ വ്യക്തിത്വ ഗുണങ്ങള്‍ ഇതിലൂടെ വിശകലനം ചെയ്യുന്നു. ഇങ്ങനെ ഒരാളുടെ പോരായ്മകള്‍ മനസ്സിലാക്കി വേണ്ട ഉപദേശങ്ങള്‍ നല്‍കാന്‍ ഒരു നല്ല അധ്യാപകനോ മന:ശാസ്ത്രജ്ഞനോ കഴിയുന്നു. കൂടര്‍ പ്രിഫറന്‍സ് റിക്കോര്‍ഡ് (പേഴ്സണല്‍), വിന്നസോട്ട പേര്‍സണാലിറ്റി ഇന്‍വെന്‍ററി, ഹം വാഡ്സ് വര്‍ത്ത് ടെംപറമെന്‍റ് സ്കെയില്‍ തുടങ്ങിയ അംഗീകരിക്കപ്പെട്ട പല വ്യക്തിത്വ വിശകലന പരീക്ഷകളും ഇന്ന് നിലവിലുണ്ട്.
യാന്ത്രികാഭിരുചി
ഒരു പ്രത്യേക വിഷയത്തിലുള്ള താല്‍പര്യം, അറിവ്, അല്ലെങ്കില്‍ കഴിവാര്‍ജ്ജിക്കാനുള്ള ഒരാളുടെ തൃഷ്ണയെ അല്ലെങ്കില്‍ പ്രത്യേക സ്വഭാവ വിശേഷത്തെ അഭിരുചി എന്നു പറയുന്നു.
ഈ അഭിരുചി ഓരോരുത്തരിലും വ്യത്യസ്തമായിരിക്കും. സംഗീതത്തില്‍ അഭിരുചിയുള്ളയാള്‍ക്ക് ചിത്രരചനയില്‍ അതുണ്ടാവണമെന്നില്ല. എന്നാല്‍ അയാള്‍ക്ക് ചിത്രങ്ങള്‍ കാണാനും ആസ്വദിക്കാനുമുള്ള താല്‍പര്യം ഉണ്ടായെന്നിരിക്കും. എന്നാല്‍ ചിത്രരചനയില്‍ താല്‍പര്യമുള്ളതുകൊണ്ട് അതില്‍ അഭിരുചി ഉണ്ടാവണമെന്നില്ല. ഇതുപോലെ തന്നെയാണ് സാങ്കേതിക വിഷയങ്ങളും. എഞ്ചിനിയറിംഗിന് പഠിക്കാനുള്ള താല്‍പര്യം എഞ്ചിനീയറിംഗിലുള്ള അഭിരുചിയല്ല. അതിന് യാന്തികാഭിരുചിയെ നിര്‍ണ്ണയിക്കുന്ന ഘടകങ്ങള്‍ വ്യക്തിഗുണങ്ങളിലും കഴിവുകളിലും സമ്മേളിക്കണം. എഞ്ചിനീയറിംഗില്‍ അഭിരുചിയില്ലാത്തയാള്‍ക്ക് എഞ്ചിനീയറാകാന്‍ കഴിയുകയില്ല എന്നല്ല ഇതിനര്‍ത്ഥം. എന്നാല്‍ എഞ്ചിനീയറിംഗിന്‍റെ മേഖലയില്‍ ക്രിയാത്മകമായ സംഭാവനകള്‍ നല്‍കാന്‍ ഒരുപക്ഷേ ഇയാള്‍ക്കു കഴിഞ്ഞെന്നുവരില്ല. ഇവിടെയാണ് അഭിരുചി പരീക്ഷകളുടെയും താല്‍പര്യ സഞ്ചികകളുടെയും പ്രാധാന്യം.
ഐന്ദ്രിക ചാലക ശക്തികള്‍, സ്ഥലബന്ധങ്ങള്‍, യന്ത്രസംബന്ധമായ വിവരങ്ങള്‍ ശേഖരിക്കാനുള്ള കഴിവ് തുടങ്ങി ഒന്നിലധികം ഘടകങ്ങള്‍ ചേരുന്നതാണ് യാന്ത്രികാഭിരുചി. നല്ലൊരു എഞ്ചിനീയര്‍ക്ക് ഉണ്ടായിരിക്കേണ്ട ഈ അഭിരുചി നിര്‍ണ്ണയിക്കാന്‍ ധാരാളം പരീക്ഷകള്‍ ഇന്നുണ്ട്. യാന്ത്രികാഭിരുചി പരീക്ഷകള്‍ രണ്ടു തരത്തിലുണ്ട്. കഴിവ് പരിശോധിക്കുന്ന പരീക്ഷകളും പേപ്പറും പെന്‍സിലും ഉപയോഗിച്ചുള്ള സാധാരണ മാനസികാപഗ്രഥന പരീക്ഷയും. കഴിവ് പരിശോധിക്കുന്ന പരീക്ഷകളില്‍ യാന്ത്രികമായ ഏതെങ്കിലും ജോലികളാവും നല്‍കുക. വിഘടിപ്പിച്ച ഏതെങ്കിലും ചെറിയ യന്ത്രഭാഗങ്ങളാവും ഇതിനായി നല്‍കുന്നത്. ഒരു നിശ്ചിത സമയത്തിനുള്ളില്‍ പരീക്ഷാര്‍ത്ഥി യന്ത്രഭാഗങ്ങള്‍ ശരിയായി ഘടിപ്പിക്കണം. സ്ഥലബന്ധങ്ങള്‍ വിശകലനം ചെയ്യുന്ന പരീക്ഷയില്‍ പല ആകൃതികളില്‍ കാര്‍ഡ്ബോര്‍ഡില്‍ മുറിച്ചെടുത്ത രൂപങ്ങള്‍ അവയുടെ യഥാര്‍ത്ഥസ്ഥാനങ്ങളില്‍ നിശ്ചിത സമയത്തിനുള്ളില്‍ സംയോജിപ്പിക്കാന്‍ പരീക്ഷാര്‍ത്ഥിയോട് ആവശ്യപ്പെടുന്നു. വസ്തുക്കളുടെ ആകൃതിയും വലിപ്പവും വിശകലനം ചെയ്യുന്നതില്‍ ഒരാളുടെ കഴിവ് ഇതിലൂടെ വിലയിരുത്താന്‍ സാധിക്കുന്നു. ഒരുകൂട്ടം ജ്യാമിതീയ രൂപങ്ങളില്‍ നിന്നും ശരിയായി യോജിപ്പിച്ചവ തിരഞ്ഞെടുക്കുന്നതാണ് മറ്റൊരു പരീക്ഷ. ജ്യാമിതീയ രൂപങ്ങള്‍ വിഭാവനം ചെയ്യാനും ഭാവനയില്‍ അവയ്ക്ക് രൂപ വ്യതിയാനം വരുത്തുവാനുള്ള ഒരാളുടെ കഴിവ് ഇതിലൂടെ വിലയിരുത്തുന്നു. ഏതെങ്കിലും യാന്ത്രിക പ്രശ്നങ്ങളുടെ ചിത്രങ്ങള്‍ നല്‍കി അതില്‍ ഏതു പ്രശ്നമാണ് ചിത്രീകരിച്ചിരിക്കുന്നതെന്ന് പരീക്ഷാര്‍ത്ഥിയെക്കൊണ്ട് പറയിക്കുന്നതാണ് മറ്റൊരു പരീക്ഷാരീതി. ഇത് യന്ത്രസംബന്ധമായ വിവരങ്ങളും അവ വിശകലനം ചെയ്യാനുള്ള പരീക്ഷാര്‍ത്ഥിയുടെ കഴിവും വിലയിരുത്തുന്നു.
ഇങ്ങിനെ പലതരത്തില്‍ യാന്ത്രികാഭിരുചി വിലയിരുത്താനുള്ള പരീക്ഷകള്‍ മന:ശാസ്ത്രജ്ഞര്‍ ഗവേഷണങ്ങളിലൂടെ വികസിപ്പിച്ചിട്ടുണ്ട്. മിന്നസോട്ട മെക്കാനിക്കല്‍ ആപ്റ്റിറ്റ്യൂഡ് ടെസ്റ്റ് ഇത്തരത്തില്‍ ഒന്നാണ്.
ഐന്ദ്രികാഭിരുചി
ഇന്നുള്ള പല തൊഴിലുകള്‍ക്കും ഐന്ദ്രികാഭിരുചി വളരെ പ്രധാനമാണ്. ഐന്ദ്രികാഭിരുചി വിലയിരുത്തുന്ന പല പരിശോധനകളും നിലവിലുണ്ട്.
കാഴ്ചശക്തിയെ സംബന്ധിച്ച് ദൂരക്കാഴ്ച, ഹ്രസ്വദൃഷ്ടി, ദൂരം അളക്കാനുള്ള കഴിവ്, നിറങ്ങള്‍ തിരിച്ചറിയാനുള്ള കഴിവ് തുടങ്ങിയവയാണ് സാധാരണ പരിശോധിക്കുന്നത്. പ്രോട്ടോമീറ്റര്‍, സൈറ്റ് സ്ക്രീന്‍, സ്റ്റെല്ലര്‍ ചാര്‍ട്ട്, ഹോം ഗ്രന്‍ വൂളര്‍ ടെസ്റ്റ്, ഇഷിനാര കളര്‍ പ്ലേറ്റ് ടെസ്റ്റ് തുടങ്ങിയവയാണ് കാഴ്ചശക്തി പരിശോധിക്കുന്ന സങ്കേതങ്ങള്‍.
കേള്‍വിശക്തി വിലയിരുത്താനും ധാരാളം പരിശോധനകള്‍ ഇന്നുണ്ട്. പതിഞ്ഞ ശബ്ദങ്ങള്‍ കേള്‍പ്പിച്ചും പ്യൂവര്‍ ടോണ്‍ ഓഡിയോമീറ്റര്‍ തുടങ്ങിയ ഉപകരണങ്ങളുടെ സഹായത്തോടെയുമാണ് കേള്‍വി പരിശോധനകള്‍ നടത്തുന്നത്.
കലാഭിരുചി
സൗന്ദര്യാരാധനക്ക് മനുഷ്യ സംസ്കാരത്തോളം തന്നെ പഴക്കമുണ്ട്. സൗന്ദര്യമുള്ള വസ്തു എന്നും സന്തോഷത്തെ പ്രദാനം ചെയ്യുന്നു എന്ന് മഹാകവി കീറ്റ്സീന്‍റെ അഭിപ്രായം സൗന്ദര്യാരാധനയെ സംബന്ധിച്ച ഒരു ലോകസത്യം കൂടിയാണ്. കലയെയും കലാസ്വാദനത്തെ സംബന്ധിച്ചും ഈ അഭിപ്രായം വളരെ യോജിക്കുന്നു. എന്നാല്‍ ഒരു സൗന്ദര്യാസ്വാദകന്‍റെയോ കലാകാരന്‍റെയോ കഴിവുകളെയോ അയാള്‍ക്ക് അതിലുള്ള അഭിരുചിയെയോ വിലയിരുത്തുന്നത് സൗന്ദര്യാരാധന പോലെ അത്ര എളുപ്പമുള്ള കാര്യമല്ല. കലാമൂല്യം വിലയിരുത്തുന്നതിനുള്ള കഴിവ്, ഭാവന, സൗന്ദര്യബോധം എന്നീ ഘടകങ്ങള്‍ പരീക്ഷിച്ചാല്‍ മാത്രമേ ഒരാളുടെ കലാവാസനയെക്കുറിച്ചുള്ള വ്യക്തമായ ചിത്രം നമുക്ക് ലഭിക്കുകയുള്ളൂ. മന:ശാസ്ത്രജ്ഞരും വിദ്യാഭ്യാസ വിദഗ്ദ്ധരും ഈ വിഷയത്തില്‍ ധാരാളം പരീക്ഷണങ്ങള്‍ നടത്തിക്കൊണ്ടിരിക്കുന്നു. ഈ പരീക്ഷണങ്ങളിലൂടെ കലാഭിരുചി വിലയിരുത്തുന്ന ഫലപ്രദമായ ധാരാളം ടെസ്റ്റുകള്‍ വികസിപ്പിച്ചിട്ടുണ്ട്. മെയര്‍ ആര്‍ട് ടെസ്റ്റ്, വെറ്റ് അഡോറി ആര്‍ട്ട് ടെസ്റ്റ്, ഗ്രേപ്സ് ഡിസൈന്‍, ജഡ്ജ്മെന്‍റ് ടെസ്റ്റ്, ലീവറെന്‍സ് ടെസ്റ്റ് എന്നിവ കലാഭിരുചി വിലയിരുത്തുന്ന അംഗീകരിച്ച പരീക്ഷകളാണ്.
സംഗീതാഭിരുചി
പാടാന്‍ ഇഷ്ടപ്പെടാത്തവര്‍ ആരും തന്നെയുണ്ടാവില്ല അതുപോലെ തന്നെ പാട്ടുകേള്‍ക്കാനും. ഇതിന് സംഗീതവാസന വേണമെന്നോ സംഗീതത്തെക്കുറിച്ച് അറിയണമെന്നോ ഇല്ല. അതുകൊണ്ടാണ് നല്ല പാട്ടുകളും ഈണങ്ങളും ഭാഷയേതുമായിക്കൊള്ളട്ടെ നമ്മെ ആകര്‍ഷിക്കുന്നതും നമുക്കവ ആസ്വദിക്കാന്‍ കഴിയുന്നതും. നഴ്സറിക്ലാസ്സുകളിലെ കൊച്ചുപാട്ടുകളും സ്കൂള്‍ ക്ലാസ്സുകളിലെ പാട്ടുപിരീഡുകളും സംഗീതാസ്വാദനത്തിന്‍റെ ആദ്യ പാഠങ്ങളാണ്. എന്നാല്‍ നന്നായി പാടാനും പാട്ടിനെ വിലയിരുത്താനും സംഗീതവാസന കൂടിയേതീരൂ. സംഗീതവാസന തിട്ടപ്പെടുത്താന്‍ ഇന്ന് ധാരാളം ടെസ്റ്റുകള്‍ മന:ശാസ്ത്രജ്ഞര്‍ ഗവേഷണങ്ങളിലൂടെ കണ്ടുപിടിച്ചിട്ടുണ്ട്. സംഗീതവാസന പ്രധാനമായും രണ്ടുതരത്തിലാണ് വിലയിരുത്തുന്നത്-അഭിരുചി പരീക്ഷയുടെയും മികവ് പരിശോധനയുടെയും അടിസ്ഥാനത്തില്‍. അഭിരുചി പരീക്ഷകള്‍ ഒരാളുടെ ജന്മനായുള്ള കഴിവുകളെ വിലയിരുത്തുന്നു. മറിച്ച് മികവ് പരീക്ഷകള്‍ സംഗീതത്തിലുള്ള അറിവിനെ വിലയിരുത്തുന്നു. സീഷോര്‍ ടെസ്റ്റ്, വിസ്റ്റ്ലര്‍ ആന്‍ഡ് തോര്‍പ്പ് ടെസ്റ്റ്, ഡ്രേക്ക് മ്യൂസിക്കല്‍ മെമ്മറി ടെസ്റ്റ് തുടങ്ങിയവയാണ് പ്രചാരത്തിലുള്ള സംഗീത അഭിരുചി പരീക്ഷകള്‍.
ക്ലറിക്കല്‍ അഭിരുചി
ഓഫീസിലെ കാര്യങ്ങള്‍ സുഗമമായി നീങ്ങണമെങ്കില്‍ നല്ലൊരു ഗുമസ്തന്‍ കൂടിയേ തീരൂ. പ്രത്യേകിച്ച് ഓഫീസ് ജോലികള്‍ കൂടുതല്‍ കാര്യക്ഷമവും സുതാര്യവുമായിക്കൊണ്ടിരിക്കുന്ന ഈ കാലഘട്ടത്തില്‍ ഓഫീസ് ക്ലര്‍ക്ക് സമര്‍ത്ഥരായാല്‍ മാത്രം പോരാ, അതില്‍ അഭിരുചിയും കൂടിയുണ്ടാവണം. അതിനാലാണ് ബാങ്കുകള്‍, പൊതുമേഖലാ സ്ഥാപനങ്ങള്‍ തുടങ്ങിയവയെല്ലാം പരീക്ഷനടത്തി ക്ലര്‍ക്കുമാരെ തിരഞ്ഞെടുക്കുന്നത്. ഈ പരീക്ഷകളില്‍ അഭിരുചിയെ വിലയിരുത്തുന്ന ചോദ്യങ്ങളുമുണ്ടാവും. വേഗത, അക്കങ്ങള്‍ കൈകാര്യം ചെയ്യുവാനുള്ള കൃത്യത, ശരിയായ പദപ്രയോഗങ്ങള്‍, ഇംഗ്ലീഷ് ഭാഷ കൈകാര്യം ചെയ്യുവാനുള്ള കഴിവ്, പദസമ്പത്ത്, അക്ഷരത്തെറ്റില്ലാതെ എഴുതുവാനുള്ള കഴിവ്, നല്ല കൈയക്ഷരം തുടങ്ങിയ ഘടകങ്ങള്‍ കൂടിച്ചേരുന്നതാണ് ക്ലറിക്കല്‍ അഭിരുചി. മാത്രമല്ല ശരാശരി ബുദ്ധിശക്തിയും ഇതിനാവശ്യമാണ്. വിന്നസോട്ട ക്ലറിക്കല്‍ ടെസ്റ്റ് പോലെ ക്ലറിക്കല്‍ അഭിരുചിയെ വിലയിരുത്തുന്ന ധാരാളം പരീക്ഷകള്‍ ഇന്ന് വികസിപ്പിച്ചിട്ടുണ്ട്.
ആതുര ശുശ്രൂഷയിലെ അഭിരുചി
ഒരു നഴ്സാവുകയെന്നത് വിദേശങ്ങളില്‍ അവസരമൊരുക്കുന്ന നല്ല ശമ്പളമുള്ള ജോലി എന്നതിനപ്പുറം സേവനവും കൂടിയാണ്. ആതുരശുശ്രൂഷ വെറും ഒരു ജോലി എന്ന രീതിയില്‍ മാത്രം ചെയ്യാവുന്ന ഒന്നല്ല. മറ്റുള്ളവരുടെ വിഷമങ്ങള്‍ പങ്കുവെക്കാനും ഒരു ചെറുപുഞ്ചിരിയോടെ അവരെ ആശ്വസിപ്പിക്കാനുമുള്ള പക്വവും നിര്‍മ്മലവുമായ ഒരു മനസ്സാണ് ഇതിനാവശ്യം. ക്ഷമ, ആത്മസംയമനം, സഹനശക്തി, അനുകമ്പ, ശുചിത്വം തുടങ്ങിയ വ്യക്തിഗുണങ്ങള്‍ തന്നെയാണ് ഇതിനടിസ്ഥാനം. ഇതിലുപരി നല്ല ബുദ്ധിശക്തി, നിരീക്ഷണ പാടവം, ശാസ്ത്രീയ വീക്ഷണം, ഓര്‍മ്മശക്തി തുടങ്ങി പല ഘടകങ്ങളും ആതുരശുശ്രൂഷയിലെ അഭിരുചിയില്‍ ഒത്തുചേരുന്നു.
വൈദ്യശുശ്രൂഷയിലെ അഭിരുചി
ഒരു ഡോക്ടറാവുക എന്നത് അത്ര എളുപ്പമുള്ള കാര്യമല്ല. ആതുരസേവനം നടത്തണം എന്ന് ആത്മാര്‍ത്ഥമായി മോഹിക്കുന്ന എല്ലാവര്‍ക്കും ഡോക്ടറാവാന്‍ കഴിയുകയുമില്ല. കാരണം വൈദ്യശാസ്ത്രപഠനം, പഠിതാക്കളില്‍ ബുദ്ധിശക്തി, ഓര്‍മ്മശക്തി, ശാസ്ത്രപഠനത്തിലെ താല്‍പര്യം തുടങ്ങിയ ഘടകങ്ങള്‍ ഉയര്‍ന്നതോതില്‍ ആവശ്യപ്പെടുന്നു. അതിനാല്‍ പലപ്പോഴും വൈദ്യശാസ്ത്രത്തിലെ അഭിരുചി അതിനുള്ള യോഗ്യതകളെ അടിസ്ഥാനമാക്കിയാണ് നിര്‍ണ്ണയിക്കുന്നത്. പെട്ടെന്ന് ഗ്രഹിക്കാനും പഠിച്ചവ ഓര്‍മ്മയില്‍ ചിട്ടപ്പെടുത്തി വെക്കാനുമുള്ള കഴിവ്, പഠനത്തിലെ മികവ്, ലഭ്യമായ വിവരങ്ങളില്‍ നിന്ന് വിശദീകരണങ്ങളും നിഗമനങ്ങളും നടത്താനുള്ള കഴിവ്, യുക്തി എന്നിവയാണ് വൈദ്യശാസ്ത്രത്തിലെ അഭിരുചിയില്‍ പരീക്ഷിക്കുന്നത്. മെഡിക്കല്‍ കോളേജുകളിലേക്കുള്ള പ്രവേശന പരീക്ഷകളില്‍, വൈദ്യശാസ്ത്രത്തിലെ അഭിരുചി വിലയിരുത്തുന്ന ചോദ്യങ്ങള്‍ സാധാരണ ഉണ്ടാകാറുണ്ട്.
ശാസ്ത്രത്തിലും എഞ്ചിനീയറിംഗിലുമുള്ള അഭിരുചി
ബുദ്ധിപരമായ കഴിവുകളെ ശാസ്ത്രകാര്യങ്ങളില്‍ ഉപയോഗിക്കുവാനുള്ള കഴിവിനെയാണ് ശാസ്ത്ര വിഷയത്തിലെ അഭിരുചിയായി കണക്കാക്കുന്നത്. അതിനാല്‍ ഒരാള്‍ക്ക് ശാസ്ത്ര വിഷയങ്ങളില്‍ എത്രക്ക് വിജയിക്കാനാകും എന്നുമാത്രമാണ് ഈ വിഷയങ്ങളിലെ അഭിരുചി പരീക്ഷകള്‍ സാധാരണ വിലയിരുത്തുന്നത്.
എന്നാല്‍ പഠിക്കാനുള്ള കഴിവും കണക്ക്, സ്ഥലബന്ധങ്ങള്‍, യാന്ത്രികത, ഭൗതികശാസ്ത്രം തുടങ്ങിയ വിഷയങ്ങളിലുള്ള പ്രത്യേക താല്‍പര്യങ്ങളും ചേരുന്നതാണ് എഞ്ചിനീയറിംഗിലെ അഭിരുചിയായി വിലയിരുത്തുന്നത്. സ്കൂള്‍ ക്ലാസ്സുകളിലും മറ്റു പരീക്ഷകളിലും നേടിയ തിളക്കമാര്‍ന്ന വിജയം ഈ അഭിരുചികളുടെ സൂചനയാണെന്ന് പറയാം. ഇതുകൂടാതെ എഞ്ചിനീയറിംഗ് ജോലികളോടുള്ള താല്‍പര്യം, അതിനുവേണ്ടുന്ന ആരോഗ്യം, പ്രചോദനം, സ്ഥിരത തുടങ്ങിയവയും ഈ അഭിരുചിയുടെ മറ്റു ഘടകങ്ങളാണ്. എഞ്ചിനീയറിംഗ് അഭിരുചി പരീക്ഷകള്‍ ഒരാളിലെ ഇത്തരം സ്വഭാവഗുണങ്ങള്‍ വിലയിരുത്തുന്നവയായിരിക്കും.
നിയമകാര്യത്തിലെ അഭിരുചി
സാധാരണ കൂടുതല്‍ സംസാരിക്കുന്നവരോട് തമാശ രൂപേണ നമ്മള്‍ ചോദിക്കാറുണ്ട് എന്താ വക്കീലാണോ? ശരിയാണ് ഉരുളക്കുപ്പേരിപോലെ വാദങ്ങള്‍ക്ക് എതിര്‍വാദങ്ങള്‍ നിരത്താനുള്ള കഴിവ് വക്കീലിന് കൂടിയേ തീരൂ. എന്നാല്‍ വാക്സാമര്‍ത്ഥ്യം കൊണ്ട് മാത്രം ഒരു നല്ല വക്കീലാവാന്‍ സാധിക്കില്ല. യുക്തി കൊണ്ട് കാര്യങ്ങള്‍ സമര്‍ത്ഥിക്കാനുള്ള കഴിവ്, പേജുകളോളം വരുന്ന നിയമ വിശദീകരണങ്ങളും ഗൗരവമുള്ള നിയമ പ്രശ്നങ്ങളും സംഗ്രഹിച്ച് അവതരിപ്പിക്കാനും അനുയോജ്യമായതും അല്ലാത്തതുമായ നിയമവകുപ്പുകള്‍ തരംതിരിക്കാനുമുള്ള കഴിവ്, തുടങ്ങിയവ ഇവര്‍ക്കുണ്ടാകണം. കൂടാതെ നല്ല ഓര്‍മശക്തി, ഉദാഹരണങ്ങളും ഉപമകളും നിരത്തി കാര്യങ്ങള്‍ വിശദീകരിക്കാനുള്ള കഴിവ്, വാക് സമ്പത്തും ഭാഷാചാതുരിയും പുഷ്ടിപ്പെടുത്താനുള്ള തൃഷ്ണ, തുടങ്ങിയ മറ്റു ഗുണങ്ങളും ഒരു നിയമജ്ഞന് ആവശ്യമാണ്. നിയമ കാര്യത്തിലെ അഭിരുചി പരീക്ഷകള്‍ ഈ കഴിവുകള്‍ ഒരു വ്യക്തിയില്‍ എത്രത്തോളം സമന്വയിച്ചിട്ടുണ്ടെന്ന് പരിശോധിക്കുന്നു. ആഡംസ് ലീഗല്‍ ആപ്റ്റിറ്റ്യൂഡ് ടെസ്റ്റ്, അയോവ ലീഗല്‍ ആപ്റ്റിറ്റ്യൂഡ് ടെസ്റ്റ് തുടങ്ങി പല അഭിരുചി പരീക്ഷകളും മന:ശാസ്ത്രജ്ഞര്‍ വികസിപ്പിച്ചെടുത്തിട്ടുണ്ട്.
മാനേജ്മെന്റ്റിലെ അഭിരുചി
പുത്തന്‍ സാമ്പത്തിക വ്യവസ്ഥിതിയുടെ ഭാഗമായി വന്ന ആഗോളവത്ക്കരണവും വിപണിയുടെ അനന്തസാദ്ധ്യതകളും ബിസിനസ് മാനേജ്മെന്‍റ് രംഗത്ത് ധാരാളം അവസരങ്ങളാണൊരുക്കിയിരിക്കുന്നത്. മാനേജ്മെന്‍റ് വിദ്യാഭ്യാസത്തില്‍ ഐ.ഐ.എമ്മുകള്‍ പോലുള്ള ദേശീയ സ്ഥാപനങ്ങള്‍ നല്‍കിയ സംഭാവനകള്‍ ഈ രംഗത്തേക്ക് പുതിയ തലമുറയെ ആകര്‍ഷിക്കുകതന്നെ ചെയ്തു. ഉന്നതമായ പദവി, ആകര്‍ഷകമായ ശമ്പളം, ഉയര്‍ന്ന ജീവിതനിലവാരം, ബിസിനസ് രംഗത്തെ ഉന്നതരുമായുള്ള ബന്ധം തുടങ്ങി മാനേജ്മെന്‍റിനെ ആകര്‍ഷകമാക്കുന്ന ഘടകങ്ങള്‍ നിരവധിയാണ്.
എന്നാല്‍ ഈ ആകര്‍ഷകത്വം പോലെതന്നെ കഠിനാദ്ധ്വാനവും ഉത്തരവാദിത്തവും ഏറെ ആവശ്യപ്പെടുന്ന ഒരു ജോലിയാണ് ഇത്. അതിനാല്‍ ബുദ്ധിശക്തി, യുക്തി, ആള്‍ക്കാരുമായി സംവദിക്കാനുള്ള കഴിവ് തുടങ്ങി ധാരാളം വ്യക്തിഗുണങ്ങള്‍ മാനേജ്മെന്‍റ് ജോലികള്‍ ഒരാളില്‍ ആവശ്യപ്പെടുന്നു. പ്രശ്നങ്ങള്‍ പരിഹരിക്കാനും പദ്ധതികള്‍ ആസൂത്രണം ചെയ്യാനും അത് പ്രാവര്‍ത്തികമാക്കുവാനുമുള്ള കഴിവ്, സംവേദന ശേഷി, മേല്‍നോട്ടത്തിലും ഭരണകാര്യങ്ങളിലുമുള്ള നിപുണത, ബിസിനസ്സ് നിയന്ത്രിക്കാനുള്ള കഴിവ്, മാനേജര്‍ പൊട്ടന്‍ഷ്യല്‍ ഇന്‍ഡക്സ് (മാനേജ്മെന്‍റ് പ്രശ്നങ്ങള്‍ പരിഹരിക്കാനുള്ള ഉദ്യോഗാര്‍ത്ഥിയുടെ കഴിവ്) എന്നീ ഘടകങ്ങളാണ് മാനേജ്മെന്‍റ് അഭിരുചി പരീക്ഷയില്‍ വിലയിരുത്തുന്നത്.
മാധ്യമ അഭിരുചി
ഒരു മൗസിന്‍റെ ക്ലിക്കില്‍ മാറിമറിയുന്ന ലോകത്തേയും കേബിള്‍ ചാനലുകള്‍ നല്‍കിയ പുത്തന്‍ സൗഹൃദങ്ങളേയും അടുത്തറിഞ്ഞ ഇന്നത്തെ തലമുറയ്ക്ക്, മാധ്യമങ്ങളെക്കുറിച്ചും പത്രപ്രവര്‍ത്തനത്തെക്കുറിച്ചും പുതിയ സങ്കല്‍പങ്ങളാണുള്ളത്.
ഉപഗ്രഹചാനലുകള്‍ ലോകത്തെ മുഴുവന്‍ വിശേഷങ്ങളും ടെലിവിഷന്‍റെ കൊച്ചുജാലകത്തിലൊതുക്കിയപ്പോള്‍ അതിര്‍ത്തികള്‍ പോലും വഴിമാറി. ഭാഷയുടേയും സംസ്കാരത്തിന്‍റെയും അതിര്‍വരമ്പുകള്‍ ഭേദിച്ച് വന്ന ആട്ടവും പാട്ടും പുതിയ കീഴ്വഴക്കങ്ങളും മര്യാദകളും പെരുമാറ്റരീതികളുമുള്‍ക്കൊള്ളുന്ന ഒരു സാര്‍വദേശീയ സംസ്കാരം വളര്‍ത്തിയെടുത്തു. മാത്രമല്ല മാധ്യമങ്ങള്‍ സാഹസികതയുടേയും ചുറുചുറുക്കിന്‍റെയും നൂതനമായ ആശയങ്ങളുടെയും പര്യായമായി മാറി. മാധ്യമങ്ങള്‍ക്കും മാധ്യമപ്രവര്‍ത്തനത്തിനും അങ്ങിനെ ലഭിച്ച പുതിയ നിര്‍വചനങ്ങള്‍ അതിനെ ബഹുമുഖമായ വ്യക്തിത്വവും കഴിവുകളും ഏറെ ആവശ്യപ്പെടുന്ന മേഖലയാക്കി ഉയര്‍ത്തി. ഇന്ന് മാധ്യമ പ്രവര്‍ത്തകനാവാന്‍ നല്ല ഭാവനയുണ്ടായാല്‍ മാത്രം പോര, ബഹുമുഖത്വം, പൊതുവിജ്ഞാനം, യുക്തിബോധം, ചുറുചുറുക്ക്, ധൈര്യം, പുത്തന്‍ ആശയങ്ങള്‍, വിശദമായ കാര്യങ്ങള്‍ സംഗ്രഹിക്കാനുള്ള കഴിവ്, പദസമ്പത്ത് തുടങ്ങിയ ഗുണങ്ങളും ഒത്തുചേരണം. മാധ്യമാഭിരുചി പരീക്ഷയില്‍ ഈ വ്യക്തിഗുണങ്ങളാണ് വിശകലനം ചെയ്യുന്നത്.
അധ്യാപനത്തിലെ അഭിരുചി
സമൂഹത്തില്‍ നല്ല മൂല്യങ്ങള്‍ വാര്‍ത്തെടുക്കുന്നതില്‍ അധ്യാപകന് പ്രധാന പങ്ക് വഹിക്കുന്നു. സമൂഹം അനുശാസിക്കുന്ന മര്യാദകളും നിയമങ്ങളും കീഴ്വഴക്കങ്ങളും നമ്മിലേക്ക് പകര്‍ന്നു തരുന്നത് മാതാപിതാക്കള്‍ കഴിഞ്ഞാല്‍ പിന്നെ അധ്യാപകര്‍ തന്നെയാണ്. അറിവ് നല്‍കുന്നതിനോടൊപ്പം തന്നെ വിദ്യാര്‍ത്ഥിയുടെ വ്യക്തിത്വവും അധ്യാപകന് രൂപപ്പെടുത്തുന്നു. അതുകൊണ്ട് തന്നെ ഏത് സമൂഹത്തിലും അധ്യാപകവൃത്തി ഏറ്റവും കൂടുതല്‍ മാനിക്കപ്പെടുന്നു. അധ്യാപകന് സര്‍വസമ്മതനും ബഹുമാന്യനുമാകുന്നു. ഒരു നല്ല പൗരനെ വാര്‍ത്തെടുക്കുന്ന ഭാരിച്ച ഉത്തരവാദിത്തമുള്ളതുകൊണ്ടുതന്നെ അധ്യാപകന് നല്ല വ്യക്തി ഗുണങ്ങള്‍ ആവശ്യമാണ്. ഈ വ്യക്തി ഗുണങ്ങള്‍ തന്നെയാണ് അധ്യാപകവൃത്തിക്കുള്ള അഭിരുചിക്കും മാനദണ്ഡങ്ങളാവുന്നത്. പക്വമായ മാനസികാവസ്ഥ, ഉയര്‍ന്ന സാമൂഹ്യ മൂല്യങ്ങള്‍, സംവദിക്കാനും ബന്ധങ്ങള്‍ സ്ഥാപിക്കാനുമുള്ള കഴിവ് തുടങ്ങിയവയാണ് അധ്യാപനവൃത്തിക്കുള്ള അഭിരുചിയെ നിര്‍ണ്ണയിക്കുന്ന വ്യക്തിഗുണങ്ങള്‍. ഇതിലുപരി പഠിപ്പിക്കുന്ന വിഷയങ്ങളെ അധികരിച്ച് പെഡഗോഗിയിലും എഡ്യൂക്കേഷന്‍ സൈക്കോളജി, അധ്യാപനത്തിന്‍റെ അടിസ്ഥാന പ്രശ്നങ്ങള്‍, ക്ലാസ്സുമുറിയിലെ ചിട്ടകള്‍ തുടങ്ങിയ കാര്യങ്ങളിലും നല്ല അറിവുണ്ടായിരിക്കണം. കോക്സ്-ഓര്‍ലിയന്‍സ് പ്രോഗ്നോസിസ് ടെസ്റ്റ് പോലുള്ള അധ്യാപന അഭിരുചി പരീക്ഷകള്‍ അധ്യാപനത്തെ സംബന്ധിച്ച ഇത്തരം അറിവുകളാണ് വിലയിരുത്തുന്നത്. മറ്റു തൊഴിലുകളെപ്പോലെ തിരഞ്ഞെടുക്കപ്പെടുന്നതിന് മുമ്പല്ല അധ്യാപനത്തിലെ അഭിരുചി വിലയിരുത്തുന്നത്, പലപ്പോഴും അധ്യാപക പരിശീലനത്തോടനുബന്ധിച്ചോ അതിനുശേഷമോ ആണ്.
പൈലറ്റ് ആപ്റ്റിട്യൂറ്റ് ബാറ്ററി ടെസ്റ്റ്
പൈലറ്റ് ആകാനുള്ള വ്യക്തിഗുണങ്ങളും താല്‍പര്യവും ഒരാളില്‍ വിശകലനം ചെയ്യുന്ന പരീക്ഷയാണ് പൈലറ്റ് ആപ്റ്റിറ്റ്യൂഡ് ടെസ്റ്റ്. വിമാനത്തിലെ ഉപകരണങ്ങളില്‍ നിന്നും ലഭിക്കുന്ന വിവരങ്ങളുടെയും മറ്റു നിര്‍ദ്ദേശങ്ങളുടെയും അടിസ്ഥാനത്തില്‍ ത്രിമാനമായ തലത്തില്‍ വിമാനത്തെ വിഭാവനം ചെയ്യാനുള്ള കഴിവ്, വിമാനത്തിലെ ഉപകരണങ്ങളില്‍ നിന്നും പെട്ടെന്ന് വിവരങ്ങള്‍ ഗ്രഹിക്കാനുള്ള കഴിവ്, കണ്ണും കയ്യും തമ്മിലുള്ള ഏകോപനം തുടങ്ങി ധാരാളം ഘടകങ്ങളെ വിലയിരുത്തുന്നതാണ് ഈ അഭിരുചി പരീക്ഷ. സാധാരണ ഈ അഭിരുചി പരീക്ഷയ്ക്ക് അഞ്ച് വിഭാഗങ്ങളുാവും. മാനസികശേഷിയും ചലനാത്മകതയും ഈ പരീക്ഷകളില്‍ വിശകലനം ചെയ്യുന്നു.
1) ഒന്നാമത്തെ വിഭാഗത്തില്‍ കണ്ണും കൈകളും തമ്മിലുള്ള ഏകോപനമാണ് വിശകലനം ചെയ്യുന്നത്. ഇതില്‍ ദീര്‍ഘവൃത്തത്തില്‍ സഞ്ചരിക്കുന്ന ഒരു വിമാനത്തിന്‍റെ ചിത്രമാണ് ഉദ്യോഗാര്‍ത്ഥി കമ്പ്യൂട്ടര്‍ സ്ക്രീനില്‍ കാണുക. ഇതോടൊപ്പം സ്ക്രീനില്‍ തെളിയുന്ന ഗണ്‍ സൈറ്റിനെ കണ്‍ട്രോള്‍ സ്റ്റിക്കുകള്‍ ഉപയോഗിച്ച് വിമാനത്തെ ലക്ഷ്യമാക്കാന്‍ ഉദ്യോഗാര്‍ത്ഥിയോട് ആവശ്യപ്പെടുന്നു. ഇതു ശരിയായി ചെയ്യുന്ന വ്യക്തിക്ക് കണ്ണും കൈകളും തമ്മില്‍ ശരിയായ ഏകോപനമുണ്ടെന്ന് പറയാം.
2) ഇന്ദ്രിയങ്ങളുടെയും ശരീരത്തിന്‍റെയും സങ്കീര്‍ണ്ണമായ ഏകോപനപ്രവര്‍ത്തനങ്ങള്‍ വിലയിരുത്തുന്ന പരീക്ഷയാണ് രണ്ടാമത്തേത്. ഇതില്‍ കണ്ണും കൈകളും തമ്മിലുള്ള ഏകോപനവും, നിയന്ത്രണ ശേഷിയുമാണ് വിലയിരുത്തുന്നത്. വലത്തേ കൈകൊണ്ട് സ്ക്രീനില്‍ തെളിയുന്ന സൂചികയും (കഴ്സര്‍) ഇടത്തേ കൈകൊണ്ട് സ്ക്രീനിന്‍റെ ചുവട്ടില്‍ തെളിയുന്ന റഡാര്‍ ബാറും നിയന്ത്രിക്കണം.
3) ഓര്‍മ്മശക്തി പരീക്ഷിക്കുന്ന ഇനമാണ് മൂന്നാമത്തേത്. ഇതില്‍ സ്ക്രീനില്‍ തെളിഞ്ഞുമറയുന്ന അക്കങ്ങളുടെ നിര ചെറിയൊരു ഇടവേളയ്ക്കുശേഷം ഓര്‍മ്മയില്‍ നിന്നും രേഖപ്പെടുത്തണം.
4) കാര്യങ്ങള്‍ നിയന്ത്രിക്കാനും പെട്ടെന്ന് പ്രതികരിക്കാനുമുള്ള കഴിവ് വിലയിരുത്തുന്നതാണ് നാലാമത്തെ ഇനം. ഇതില്‍ ഒരു കൈകൊണ്ട് സ്ക്രീനില്‍ പ്രത്യേക പാതയിലല്ലാതെ സഞ്ചരിക്കുന്ന വിമാനത്തിന്‍റെ നേര്‍ക്ക് ഗണ്‍സൈറ്റ് ലക്ഷ്യമാക്കുകയും അതേസമയം സ്ക്രീനില്‍ പലയിടത്തായി തെളിഞ്ഞുവരുന്ന അക്കങ്ങള്‍ കീബോര്‍ഡില്‍ അതാത് അക്കങ്ങളില്‍ വിരലമര്‍ത്തി മായ്ച്ചുകളയുകയും വേണം.
5) അവസാനത്തേത് സാഹസികമായ പ്രവൃത്തികള്‍ ഏറ്റെടുക്കുന്നതിനോടുള്ള പരീക്ഷാര്‍ത്ഥിയുടെ താല്‍പര്യത്തെ വിലയിരുത്തുന്ന ഒരു താല്‍പര്യ സഞ്ചികയാണ്. ഇതില്‍ പലതരം പ്രവൃത്തികള്‍ ജോഡികളായി നല്‍കിയിരിക്കും. ഇതില്‍ ഏതു പ്രവൃത്തിക്കാണ് പരീക്ഷാര്‍ത്ഥി മുന്‍തൂക്കം നല്‍കുന്നതെന്ന് രേഖപ്പെടുത്തണം.
ഇതുകൂടാതെ ഓഫീസറിനു വേണ്ടുന്ന വ്യക്തിഗുണങ്ങളും കഴിവുകളും പരിശോധിക്കുന്ന പരീക്ഷയുമുണ്ടാകും. വാക്കുകള്‍ ഉപയോഗിക്കാനുള്ള കഴിവ്, സംഗ്രഹണം, വിവര വിശകലനം, പട്ടിക വിശകലനം, ശാസ്ത്ര വിഷയങ്ങളിലെ അറിവ് തുടങ്ങിയ ആഭിമുഖ്യങ്ങളാണ് ഇതില്‍ വിലയിരുത്തുന്നത്.
സാന്ദര്‍ഭിക പരീക്ഷകള്‍
താല്‍പര്യ സഞ്ചികകളില്‍ കൂടിയല്ലാതെ തൊഴിലിനോടുള്ള ആഭിമുഖ്യം വിലയിരുത്തുന്ന മറ്റൊരു ഉപാധിയാണ് സാന്ദര്‍ഭിക പരീക്ഷകള്‍. ഇവിടെ ജീവിത സാഹചര്യങ്ങളില്‍ അല്ലെങ്കില്‍ കൃത്യമായി സൃഷ്ടിച്ച യാഥാര്‍ത്ഥ്യത്തോടടുത്ത സാഹചര്യങ്ങളിലാണ് ഒരാളുടെ ആഭിമുഖ്യം വിലയിരുത്തുന്നത്. ഇവിടെ പരീക്ഷാര്‍ത്ഥി താന്‍ വിശകലനം ചെയ്യപ്പെടുകയാണെന്ന് അറിയുന്നതേയില്ല. ചില പരീക്ഷകള്‍ സത്യസന്ധത, വിശ്വാസ്യത, ആത്മസംയമനം, സഹകരണം തുടങ്ങിയ വ്യക്തിത്വ ഗുണങ്ങള്‍ പരീക്ഷിക്കണം. മറ്റു ചിലത് ഒരു പ്രത്യേക തൊഴില്‍ ചെയ്യാന്‍ ഒരു വ്യക്തിക്കുണ്ടായിരിക്കേണ്ട സ്വഭാവ സവിശേഷതകള്‍ വിലയിരുത്തുന്നു. സായുധ സേനകളിലേക്കുള്ള ഓഫീസര്‍ തിരഞ്ഞെടുപ്പുകളില്‍ ഉദ്യോഗാര്‍ത്ഥികളെ വിലയിരുത്താന്‍ സാന്ദര്‍ഭിക പരീക്ഷകള്‍ സാധാരണയായി ഉപയോഗിച്ചുവരുന്നു.
അവസാനം പരിഷ്കരിച്ചത് : 7/10/2020
കൂടുതല്‍ വിവരങ്ങള്‍
കൂടുതല്‍ വിവരങ്ങള്‍
കൂടുതല്‍ വിവരങ്ങള്‍
കഥാപാത്രങ്ങള്‍ക്കും ചിത്രങ്ങള്‍ക്കും കമ്പ്യൂട്ടറിന...
