കാലിത്തീറ്റയ്ക്കായി കൃഷി ചെയ്യപ്പെടുന്ന ഇനങ്ങൾ പുൽവർഗ്ഗത്തിൽ പെട്ടവയോ, പയറിനത്തിൽപ്പെട്ടവയോ, ദീർഘകാല വൃക്ഷവിളകളോ ആകാം. സങ്കര നേപ്പിയർ, ഗിനിപ്പുല്ല്, സിഗ്നൽ, കോംഗോ സിഗ്നൽ, പാരപ്പുല്ല് തുടങ്ങിയവ പുല്ലിനത്തിൽ പെട്ടവയാണ്. സ്റ്റൈലോ സാന്തസ്, സെൻട്രോ, അമരപ്പയർ, ലാബിലാബ് തുടങ്ങിയവയാണ് പയറിനത്തിൽ പ്രധാനമായവ.
ദീർഘകാല വൃക്ഷവിളകൾ പയറിനത്തിൽ പെടുന്നവതന്നെ. ഇവ വൃക്ഷങ്ങളായി വളരുന്ന സ്വഭാവമുള്ളവയാണ്. പീലിവാക, (സുബാബുൾ), ശീമക്കൊന്ന, അഗത്തി, കലിയാൻഡ്ര തുടങ്ങിയവയാണ് ഈ വിഭാഗത്തിലെ പ്രമുഖർ. പുല്ലിനത്തിൽപ്പെട്ടവയിൽ താരതമ്യേന മാംസ്യം കുറവായിരിക്കും. പയറിനങ്ങളിൽ മാംസ്യം കൂടുതലായിരിക്കും. പശുവിന്റെ തീറ്റയിൽ പുല്ലും പയറും ചേർച്ചയൊപ്പിച്ച് നൽകുന്നത് ഉത്തമം. തീറ്റപ്പുല്ല് ദിവസേന 25-30 കിഗ്രാം തന്നെ നൽകണം. എന്നാൽ പയറിനത്തിൽപ്പെട്ടവ പശുക്കൾ നന്നായി തിന്നുമെങ്കിലും 3-6 കിഗ്രാമിൽ കൂടുതൽ നൽകിയാൽ ദഹനപ്രശ്നങ്ങളുണ്ടാകും. ഇവ കൊടുത്ത് ശീലിപ്പിക്കണം.
തീറ്റപ്പുല്ലുമായി ചേർത്ത് നൽകുന്നതാണ് ഉത്തമം. തീറ്റപ്പുല്ലിനൊപ്പം പയറിനങ്ങൾ കൃഷി ചെയ്താൽ ഇവ ഒരുമിച്ച് മുറിച്ച് പശുവിന് നൽകാം. ദീർഘകാല വൃക്ഷവിളകൾ അതിർത്തികളിൽ വേലികളിലും തരിശു ഭൂമിയിലുമൊക്കെ നട്ടുപിടിപ്പിക്കാറുള്ളവയാണ്. ഇവ വേനൽക്കാലത്തുപോലും പച്ചിലയുടെ ലഭ്യത ഉറപ്പാക്കുന്നു. ഈ രീതിയിൽ പുല്ലിനം, പയറു വർഗ്ഗം, വൃക്ഷവിളകൾ എന്നിവ ഉൾപ്പെടുത്തിയുള്ള കൃഷി പശുക്കൾക്ക് വർഷം മുഴുവൻ ഗുണമേന്മയുള്ള പച്ചപ്പുല്ല് നൽകും. തനിവിളയായും ഇടവിളയായും കൃഷി ചെയ്യാവുന്ന ഇനങ്ങളാണ് കോംഗോ സിഗ്നൽ, ഗിനി തുടങ്ങിയവ. തണൽ സഹിക്കാൻ നല്ല ശേഷിയുള്ളതിനാൽ ഇടവിളയായി തെങ്ങിൻ തോപ്പിൽ വളർത്താം. മഴ കൂടുതലുള്ള സ്ഥലങ്ങളിൽ കോംഗോ സിഗ്നലും കുറഞ്ഞ സ്ഥലങ്ങളിൽ ഗിനിയും തിരഞ്ഞെടുക്കാം. വെള്ളക്കെട്ടുള്ള സ്ഥലത്തിന് യോജിച്ച ഇനമാണ് പാരാഗ്രാസ്, സ്റ്റൈലോ സാന്തസ്, സെൻട്രോ മുതലായ പയറിനങ്ങൾ. തെങ്ങിൻ തോപ്പുകളിലും, കവുങ്ങിൻ തോപ്പുകളിലും കൃഷി ചെയ്യാം. വരണ്ട കാലാവസ്ഥയിലും മഴ പ്രദേശങ്ങളിലും വളരാൻ യോജിച്ചവ പയറു വർഗ്ഗ ചെടിയായതിനാൽ അന്തരീക്ഷത്തിലെ നൈട്രജൻ വലിച്ചെടുത്ത് ജൈവാംശം കൂട്ടാനും സഹായിക്കുന്നു. പീലിവാക, ശീമക്കൊന്ന തുടങ്ങിയവയിൽ ചെറിയ അളവിൽ അടങ്ങിയിട്ടുള്ള വിഷാംശം ഒഴിവാക്കാൻ ഇവ വെയിലത്ത് വാട്ടിയിട്ട് നൽകണം. എന്നാൽ കലിയാൻഡ്രയിൽ മേൽപ്പറഞ്ഞ പ്രശ്നം തീരെയില്ല. പറമ്പിന്റെ അതിർത്തികളിലും, തരിശുഭൂമിയിലും, ചരിവുകളിലും ഇവ നടാം. സി ഒ-3, കിളികുളം ഇനങ്ങൾ, പുൽക്കടകൾ നട്ടാണ് കൃഷി ചെയ്യുക. ഒരു ഏക്കറിലേക്ക് 12000 വരെ കടകൾ വേണ്ടിവരും. ഗിനി, കോംഗോ സിഗ്നൽ സ്റ്റൈലോസാന്തസ് ഇവ വിത്തുപയോഗിച്ച് കൃഷി ചെയ്യാം. തീറ്റപ്പുല്ലിനങ്ങളുടെ വിത്തുകൾ വളരെ ചെറുതായതിനാൽ വിത്ത് മണ്ണിൽ താഴ്ന്നു പോകാതെ ശ്രദ്ധിക്കണം. ഭാരം കുറഞ്ഞ ഈ വിത്തുകൾ ഉറുമ്പ്, മറ്റ് കീടങ്ങൾ എന്നിവയിൽ നിന്നും സംരക്ഷിക്കണം. ഇതിനായി കീടനാശിനികൾ ഉപയോഗിക്കാം. 4-7 കിഗ്രാം വിത്ത് ഒരു ഹെക്ടറിലേക്ക് വേണ്ടിവരും. പയറിനങ്ങളുടെ വിത്തുകൾ മുളയ്ക്കാൻ ബുദ്ധിമുട്ടായതിനാൽ ഒരു രാത്രി മുഴുവൻ വെള്ളത്തിൽ മുക്കിവെയ്ക്കുകയോ ചെറു ചൂടുവെള്ളത്തിൽ അൽപസമയം വെയ്ക്കുകയോ ചെയ്യുന്ന രീതികളുണ്ട്. പയർ വിത്തുകൾ റൈസോബിയം കൾച്ചറിലും മുക്കണം. വളമായി ചാണകവും, ഗോമൂത്രവും, ആട്ടിൻ കാഷ്ഠവും കോഴിവളവുമൊക്കെ ഉപയോഗിക്കാം. രാസവളപ്രയോഗം വിളവ് കൂട്ടുന്നു.
70-90 ദിവസമെത്തുമ്പോൾ മിക്ക പുല്ലിനങ്ങളും വിളവെടുക്കാനാകും. പിന്നീട് ഒന്നരമാസം ഇടവേളയിലും മുറിച്ചെടുക്കാം. ഓരോ പ്രാവശ്യവും മിറിച്ചെടുത്തു കഴിഞ്ഞാൽ ചാണക-ഗോമൂത്ര സ്ളറി തളിക്കുക. വർഷംതോറും 6-8 തവണ പുല്ല് അരിഞ്ഞെടുക്കാം.
അവസാനം പരിഷ്കരിച്ചത് : 4/1/2020