കമുക്,കുരുമുളക്,ഇഞ്ചി, ഏലം

കമുക്

കൊട്ടപ്പാക്ക്

മുഴുവനോടെ അടയ്ക്ക ഉണക്കി എടുക്കുന്ന ഉല്‍പ്പന്നത്തിനു ചാളി അഥവാ കൊട്ടപ്പാക്ക് എന്നാണു പറയുന്നത്. പഴുത്ത അടയ്ക്ക 35-40 ദിവസം വെയിലത്ത് ഉണക്കി തൊണ്ടു കളഞ്ഞ് ഉണക്ക അടയ്ക്കയായി (കൊട്ടപ്പാക്ക്) വില്‍ക്കുന്നു. ഇതിലെ ശരിയായ ജലാംശം ഏതാണ്ട് 12% ആണ്. ഉണക്കു കുറവായാല്‍ പൂപ്പല്‍ബാധ വരികയും ഗുണം കുറയുകയും ചെയ്യും. മോട്ടി, ശ്രീവര്‍ദ്ധന്‍, ജാംനഗര്‍, ജിനി എന്നീ പേരുകളില്‍ വലിപ്പം കൂടിയതുമുതല്‍ ചെറുതുവരെ ക്രമമായി കൊട്ടടയ്ക്കയെ തരംതിരിച്ചിട്ടുണ്ട്. കേരളം, കര്‍ണ്ണാടകം, അസാം, മഹാരാഷ്ട്ര എന്നിവയാണ് ചാളി ഉല്‍പ്പാദിപ്പിക്കുന്ന സംസ്ഥാനങ്ങള്‍. പാക്ക് നെടുകെ രണ്ടായി മുറിച്ച് 10 ദിവസത്തോളം വെയിലത്തുണക്കുന്ന രീതി, പാക്ക് വേഗം ഉണങ്ങുവാനും എളുപ്പത്തില്‍ തൊണ്ടുകളയുവാനും സഹായകമാണ്. ഉണങ്ങിക്കഴിഞ്ഞാല്‍ അടയ്ക്ക കുത്തിയെടുത്ത് ഒരിക്കല്‍കൂടി നന്നായുണക്കുന്നു. പരേഹ എന്നറിയപ്പെടുന്ന ഈ ഉല്‍പ്പന്നം കേരളത്തിലും കര്‍ണ്ണാടകത്തിലും പ്രചാരത്തിലുണ്ട്. യന്ത്രത്തില്‍ ഉണക്കിയും ചാളി നിര്‍മ്മിക്കാം. ഇതുപ്രകാരം 45-750ഇ താപനിലയില്‍ 7-8 ദിവസംകൊണ്ട് 60-70 മണിക്കൂര്‍ നേരം യന്ത്രത്തില്‍ ഉണക്കേണ്ടിവരും. തൊണ്ടു കളയുവാനായി കാസര്‍കോട്ടുള്ള കേന്ദ്ര തോട്ടവിള ഗവേഷണസ്ഥാപനം വികസിപ്പിച്ചെടുത്ത അടയ്ക്ക പൊതിക്കാനുളള യന്ത്രവും ഉപയോഗിക്കാം. ഇതുപ്രകാരം 8 മണിക്കൂര്‍കൊണ്ട് ശരാശരി 40 കി.ഗ്രാം ചാളി ഉണ്ടാക്കാന്‍ കഴിയും.

കളിപ്പാക്ക്

സംസ്കരിച്ച പാക്കിന്‍റെ മറ്റൊരു ഇനമാണിത്. കേരളവും കര്‍ണ്ണാടകവുമാണ് കളിപ്പാക്കിന്‍റെ പ്രധാന ഉല്‍പ്പാദകര്‍. മൂപ്പു കുറഞ്ഞ (6-7 മാസം മൂപ്പെത്തിയ) അടയ്ക്ക പറിച്ചു തൊണ്ടു കളഞ്ഞു ചെറിയ കഷണങ്ങളായി അരിഞ്ഞശേഷം വെള്ളത്തില്‍ ഇട്ടു തിളപ്പിച്ചശേഷം 'കളി' പുരട്ടി ഉണക്കിയാണ് ഇത് ഉണ്ടാക്കുന്നത്. (അടയ്ക്ക ചൂടാക്കിയ വെള്ളം നേര്‍പ്പിച്ചതും അടുത്ത ബാച്ചുകളിലെ അടയ്ക്ക തിളപ്പിക്കാനായി ഉപയോഗിക്കാം). കളിയടയ്ക്കയ്ക്കു നല്ല തിളക്കം കിട്ടാനായി 3-4 ആവര്‍ത്തി കളി പുരട്ടി ഉണക്കാവുന്നതാണ്. ഇങ്ങനെ മൂന്നു നാല് ആവര്‍ത്തി അടയ്ക്ക ചൂടാക്കിയശേഷം കിട്ടുന്ന കട്ടിയുള്ള ദ്രാവകമാണ് 'കളി'. ഒരു പാക്ക് എത്ര കഷണമായി മുറിക്കുന്നു. ആകൃതി, വലിപ്പം തുടങ്ങിയ സമ്പ്രദായങ്ങളെ ആധാരമാക്കി കളിപ്പാക്കിനെ വിവിധ പേരുകളില്‍ അറിയപ്പെടുന്നു. മുഴുവന്‍ അടയ്ക്കയ്ക്ക് 'അപി' അഥവാ 'അണ്ടെ' എന്നും നെടുകെ രണ്ടായി മുറിച്ചതിനെ 'ബറ്റ്ലു' എന്നും നെടുനീളത്തില്‍ പല കഷണങ്ങളായി അരിഞ്ഞതിനെ 'ചൂര്' എന്നും നെടുകെയും കുറുകെയും അരിഞ്ഞതിനെ 'പോഡി' എന്നും കനം കുറച്ചു വട്ടത്തില്‍ അരിഞ്ഞതിനെ 'എറേസല്‍' എന്നുമാണു പറയുന്നത്. പച്ചകാമ്പ് വട്ടത്തില്‍ 5-6 കഷണമാക്കി അരിഞ്ഞു കളി പുരട്ടാതെ ഉണക്കി എടുക്കുന്നതിനെ 'ഐലോണ്‍' എന്നു പറയുന്നു. കളിപ്പാക്ക് ഉണ്ടാക്കുമ്പോള്‍ പാക്കിലെ ടാനിന്‍റെ അളവു നല്ലപോലെ കുറയുന്നു. നല്ലതുപോലെ ഉണങ്ങിയ ഇരുണ്ടു തവിട്ടുനിറവും തിളക്കവും ചവയ്ക്കുമ്പോള്‍ തകര്‍ച്ചയും പാകത്തിനു ചവര്‍പ്പും ഉള്ളതും മൂപ്പു കൂടിയതുമായ അടയ്ക്കകള്‍ ഒട്ടും ഇല്ലാത്ത കളിപ്പാക്കിനെയാണ് ഏറ്റവും മുന്തിയ തരമായി കണക്കാക്കുന്നത്.

സുഗന്ധ സുപാരി

ചാളിയില്‍നിന്നും കളിപ്പാക്കില്‍നിന്നും സുപാരി ഉണ്ടാക്കാം. ചാളിയില്‍ നിന്നുണ്ടാക്കുന്ന സുപാരിയാണ് കൂടുതല്‍ പ്രചാരത്തിലുള്ളത്. ചാളിയോ കളിപ്പാക്കോ പൊടിച്ചു ചെറിയ നുറുങ്ങുകഷണങ്ങള്‍ ആക്കുകയും, ഇവ സുഗന്ധമസാലകളും സുഗന്ധദ്രവ്യങ്ങളും ചേര്‍ത്തു യോജിപ്പിച്ച് വെണ്ണക്കടലാസില്‍ (ബട്ടര്‍പേപ്പര്‍) പൊതിയുകയും ചെയ്യുന്നു. അടയ്ക്കാ കഷണങ്ങള്‍ ഒരേപോലെ നന്നായി കലര്‍ത്തുവാനുള്ള എളുപ്പത്തിനു സുഗന്ധവിളകളുടെ പൊടിക്കുപകരം തൈലവും ഉപയോഗിക്കുന്നുണ്ട്. ഇതില്‍ തേങ്ങാക്കൊത്ത് ഉണക്കി ചേര്‍ത്താല്‍ പൂപ്പല്‍ബാധ കുറയും. മധുരം കിട്ടാനായി സക്കാരിന്‍ എന്ന പദാര്‍ത്ഥവും ചേര്‍ക്കുന്നുണ്ട്. സുഗന്ധ ദ്രവ്യങ്ങളായി റോസിന്‍റെ സത്തും മെന്തോളും ചേര്‍ത്തുവരുന്നു.

അടയ്ക്കയിലെ രാസഘടകങ്ങളുടെയും ഉപോല്‍പന്നങ്ങളുടെയും ഉപയോഗം

ടാനിന്‍: ടാനിന്‍ അഥവാ പോളിഫിനോളുകള്‍ (കറ) ആണ് അടയ്ക്കയിലെ ഒരു പ്രധാന രാസഘടകം. പൈങ്ങ അടയ്ക്കയില്‍ 30-37%ഉം, പഴുക്ക പാക്കില്‍ 16-22%ഉം ടാനിന്‍ ഉണ്ടാകും. പൈങ്ങയടയ്ക്ക സംസ്കരിക്കുമ്പോള്‍ ഒരു ഉപോല്‍പന്നമായി കിട്ടുന്ന ടാനിന്‍, തുണികള്‍, തോല്‍, കയര്‍ ഇവയ്ക്കു നിറം നല്‍കാനം, ഫെറസ് സള്‍ഫേറ്റുമായി കലര്‍ത്തി കറുത്ത മഷി ഉണ്ടാക്കുവാനും പ്ലൈവുഡ് നിര്‍മിക്കാനുള്ള പശയായും ഭക്ഷണവസ്തുക്കള്‍ക്കു നിറം ചേര്‍ക്കാനായുമെല്ലാം ഉപയോഗിച്ചുവരുന്നു.

കൊഴുപ്പ്: അടയ്ക്കയില്‍ 8-12% കൊഴുപ്പ് അടങ്ങിയിരിക്കുന്നു. ഹെക്സേന്‍, ക്ലോറോഫോം തുടങ്ങിയ ലായകങ്ങള്‍ ഉപയോഗിച്ച് ഈ കൊഴുപ്പ് വേര്‍തിരിച്ചെടുക്കാം. അടയ്ക്കയിലെ കൊഴുപ്പില്‍ മിരിസ്റ്റിക് ആസിഡ് ധാരാളം അടങ്ങിയിരിക്കുന്നു. അതിനാല്‍ മിരിസ്റ്റിക് ആസിഡ് ഉണ്ടാക്കുവാനും അടയ്ക്കയിലെ കൊഴുപ്പ് ഉപയോഗിക്കുന്നു. ക്ഷാരം ചേര്‍ത്തു ശുചിയാക്കിയെടുത്ത അടയ്ക്കയുടെ കൊഴുപ്പ് ഭക്ഷ്യയോഗ്യവുമാണ്. മധുരപലഹാരങ്ങളില്‍ കൊക്കോ കൊഴുപ്പിനോടൊപ്പം ചേര്‍ത്തുപയോഗിക്കാം. മധുരപലഹാരങ്ങളും ബിസ്കറ്റും ഉണ്ടാക്കുവാന്‍ വനസ്പതിക്കു പകരമാകും ശുദ്ധീകരിച്ച അടയ്ക്കാ കൊഴുപ്പ് ഉപയോഗിക്കാം.

ആല്‍ക്കലോയിഡുകള്‍: അടയ്ക്കയില്‍ 1.5% അരിക്കൊലൈന്‍, അരിക്കൊലിഡിന്‍, അരിക്കയിഡൈന്‍, ഗുവാസിന്‍, ഐസോഗുവാസിന്‍, ഗുവാകൊലിഡിന്‍ തുടങ്ങിയ പലതരം ആല്‍ക്കലോയിഡുകള്‍ അടങ്ങിയിരിക്കുന്നു. ഇതില്‍ 0.24%ത്തോളവും അരിക്കൊലൈന്‍ ആണ്. ഇവയ്ക്കെല്ലാം വിരകള്‍ക്കെതിരായ പ്രവര്‍ത്തനശേഷിയുണ്ട്. നാടവിരകള്‍ക്കും ഉരുളന്‍ വിരകള്‍ക്കും എതിരെ ഇവ ഫലപ്രദമാണ്. ബാക്ടീരിയകള്‍ക്കെതിരെയും പ്രവര്‍ത്തനശേഷിയുള്ള ഈ പദാര്‍ത്ഥങ്ങള്‍ ഐസ്ക്കെരിക്കിയ കോളിസ്റ്റൈഫലോ കോക്കസ് ടൈഫി, സ്റ്റഫൈലോകോക്കസ് ഓറിയസ് തുടങ്ങിവയുടെ വളര്‍ച്ചയെ തടയുന്നു. രക്തത്തിലെ പഞ്ചസാരയുടെ അളവു കുറയ്ക്കാന്‍ അരിക്കൊളൈനുള്ള പങ്ക് ആയുര്‍വേദത്തില്‍ പരാമര്‍ശിക്കുന്നുണ്ട്.

അടയ്ക്കാ തൊണ്ട്

പച്ച അടയ്ക്കയുടെ തൂക്കത്തിന്‍റെ 60-80% ഭാഗവും അടയ്ക്ക തൊണ്ട് കൈയടക്കിയിരിക്കുന്നു. അടയ്ക്കാതൊണ്ടുകൊണ്ട് ഹാര്‍ഡ് ബോര്‍ഡ്, പ്ലാസ്റ്റിക് ബോര്‍ഡ്, ബ്രൗണ്‍ പേപ്പര്‍ തുടങ്ങിയവ ഉണ്ടാക്കാനുള്ള പല സാങ്കേതികവിദ്യകളും വികസിപ്പിച്ചെടുത്തിട്ടുണ്ട്. അടയ്ക്കാ തൊണ്ട് മൂന്നാഴ്ച വെള്ളത്തില്‍ ചീയിതിനുശേഷം തടികൊണ്ട് അടിച്ചു ശരിയാക്കി വേര്‍തിരിച്ചെടുക്കുന്ന നാരുകൊണ്ട് കട്ടിയുള്ള ബോര്‍ഡുകള്‍, പരുപരുത്ത കുഷ്യനുകള്‍, നെയ്തുപണിയില്ലാത്ത വസ്ത്രങ്ങള്‍ ഇവ ഉണ്ടാക്കാവുന്നതാണ്. വ്യവസായശാലകള്‍ക്ക് ആവശ്യമായ ഫര്‍പുരാല്‍, സൈറ്റലാസ് എന്നിവയുടെ നല്ലൊരു ഉറവിടമാണ് അടയ്ക്കാ തൊണ്ട്.

അടയ്ക്കാമരവും പാളയും

കെട്ടിടനിര്‍മാണത്തിനു കൊള്ളാവുന്നതാണ് അടയ്ക്കാമരം. ഇതിനു നല്ല ഉറപ്പുള്ളതു കാരണം റൂളറുകള്‍, ഷെല്‍ഫുകള്‍, കുപ്പത്തൊട്ടികള്‍ തുടങ്ങി ഒട്ടേറെ വസ്തുക്കള്‍ ഉണ്ടാക്കാന്‍ ഉപയോഗിക്കുന്നു. അടയ്ക്കാമരത്തിന്‍റെ അകത്തെ നാരുനിറഞ്ഞ ഭാഗങ്ങള്‍ മാറ്റി എടുത്ത കുഴല്‍ പോലുള്ള തടി, നീര്‍വാര്‍ച്ചയ്ക്കും ജലസേചനത്തിനും പറ്റിയ കുഴലായും ഉപയോഗിക്കാം. പാള ഉപയോഗിച്ച് ചായപ്പെട്ടി, ഫയല്‍ ബോര്‍ഡ് തുടങ്ങിയവ ഉണ്ടാക്കുവാനുള്ള വിദ്യകള്‍ കാസര്‍കോട്ടെ കേന്ദ്രതോട്ടവിള ഗവേഷണ സ്ഥാപനം വികസിപ്പിച്ചെടുത്തിട്ടുണ്ട്. പേപ്പര്‍ പ്ലേറ്റുകള്‍ക്കു പകരമായി ഉപയോഗിക്കാവുന്ന പ്ലേറ്റുകള്‍, കപ്പുകള്‍ എന്നിവ കവുങ്ങിന്‍പാളകൊണ്ട് ഉണ്ടാക്കാന്‍ സഹായകരമായ ഒരു യന്ത്രം മൈസൂരിലുള്ള കേന്ദ്ര ഭക്ഷ്യ സാങ്കേതിക ഗവേഷണസ്ഥാപനം (CFTRI) വികസിപ്പിച്ചെടുത്തിട്ടുണ്ട്.

കുരുമുളക്

കുരുമുളക് എണ്ണ

ഉണക്കിപ്പൊടിച്ച കുരുമുളകില്‍നിന്നും ബാഷ്പീകരണ പ്രക്രിയ വഴി കുരുമുളക് എണ്ണ വേര്‍തിരിച്ചെടുക്കാം. ഇങ്ങനെ കിട്ടുന്ന എണ്ണയെ ചില ലായകത്തിന്‍റെ സഹായത്തോടെ വാറ്റല്‍ നടത്തി ഒളിയോറെസിന്‍ നിര്‍മാണത്തിനും ഉപയോഗിക്കാം. കുരുമുളക് പാകമാകുന്നതിനനുസരണമായി ആദ്യഘട്ടത്തില്‍ എണ്ണയുടെ അളവ് കൂടുകയും പാകമാകുമ്പോള്‍ സ്ഥിരപ്പെടുകയും ചെയ്യും. എന്നാല്‍ കായ്കള്‍ പഴുത്തുതുടങ്ങുമ്പോള്‍ എണ്ണയുടെ അളവ് കുറയുന്നു. അന്നജത്തിന്‍റെയും നാരിന്‍റെയും വളരെ വേഗത്തിലുള്ള നിര്‍മാണത്തിനായി ചെടി ഈ എണ്ണ ഉപയോഗിക്കുന്നതാണ് കാരണം. കുരുമുളക് എണ്ണ വിവിധ വ്യാവസായിക ആവശ്യങ്ങള്‍ക്കും ഉപയോഗിക്കുന്നു.
പുരുഷന്മാരുടെ സൗന്ദര്യവര്‍ദ്ധക വസ്തുക്കളില്‍ ചിലതില്‍ ഒഴിച്ചുകൂടാനാകാത്ത ഘടകമാണ് കുരുമുളക് എണ്ണ.

പൈപെറിന്‍

കുരുമുളകിന്‍റെ രുചി പ്രദായനം ചെയ്യുന്ന പ്രധാന ഘടകമാണ് പൈപെറിന്‍ എന്ന ആല്‍ക്കലോയിഡ്. ഇത് കുരുമുളക് കായില്‍ മാത്രമെ അടങ്ങിയിട്ടുള്ളൂ. കുരുമുളക് കായില്‍നിന്നും വേര്‍തിരിച്ചെടുക്കുന്ന പൈപെറിന്‍ വിവിധ തരത്തിലുള്ള ഭക്ഷണത്തിന്‍റെ രുചിഭേദത്തിനായി ഉപയോഗിക്കുന്നു. കൂടാതെ ആയുര്‍വേദചികില്‍സാരംഗത്തെ മരുന്നു നിര്‍മാണത്തിനും ഒരു ഘടകമായി ഉപയോഗിക്കുന്നു.

ഒളിയോറെസിന്‍

കുരുമുളകിന്‍റെ യഥാര്‍ത്ഥ രുചി കിട്ടുന്നതിനായി ഒളിയോറെസിന്‍ ഉപയോഗിക്കണം. കുരുമുളകില്‍നിന്നും എത്തിലില്‍ ഡൈക്ലോറൈഡ് അല്ലെങ്കില്‍ ഈതൈല്‍ അസറ്റേറ്റ് ഉപയോഗിച്ചു വേര്‍തിരിച്ചെടുക്കുന്ന ഉല്‍പ്പന്നത്തില്‍ ബാഷ്പീകരണശക്തിയുള്ളതും ഇല്ലാത്തതുമായ ഘടകങ്ങള്‍ അടങ്ങിയിരിക്കുന്നു. ഇങ്ങനെ കിട്ടുന്ന ഉല്‍പ്പന്നത്തെ ഒളിയോറെസിന്‍ എന്നു പറയുന്നു. വിവിധ ഭക്ഷണപദാര്‍ത്ഥങ്ങളുടെ നിര്‍മാണത്തിനും പാചകത്തിനും, വിവിധ മരുന്നുകളുടെ ഘടകങ്ങളായും ഇന്ന് ഒളിയോറെസിന്‍ ഉപയോഗിച്ചു വരുന്നു.

വെള്ള കുരുമുളക്പൊടി

ലോകത്തില്‍ ഇന്ന് ഉല്‍പ്പാദിപ്പിക്കുന്ന കുരുമുളകിന്‍റെ നാലിലൊന്നും വെള്ള കുരുമുളക് പൊടിയായി വിപണനം നടത്തുന്നു. കുരുമുളകിന്‍റെ പുറംതൊലി വെള്ളത്തിലിട്ട് അഴുക്കല്‍ പ്രക്രിയനടത്തി വേര്‍തിരിച്ചാണ് വെള്ള കുരുമുളക് ഉല്‍പാദിപ്പിക്കുന്നത്. പടിഞ്ഞാറന്‍ രാജ്യങ്ങളില്‍ വെള്ള കുരുമുളക് പൊടിച്ചു പൊടിയായി വിപണനം നടത്തുന്നു.

ഇഞ്ചി

ഇഞ്ചി എണ്ണ

കേരളത്തില്‍

ഉല്‍പാദിപ്പിക്കുന്ന ഇഞ്ചി, ഇഞ്ചി എണ്ണ നിര്‍മാണത്തിന് അത്യുത്തമമാകുന്നു. ഉണക്കിയ ഇഞ്ചിക്ക് അതിന്‍റെ യഥാര്‍ത്ഥ മണത്തിനനുസരിച്ചു വില ലഭിക്കുമെന്നതിനാല്‍ ഈ മണം പ്രദായനം ചെയ്യുന്ന എണ്ണയുടെ അളവ് ഒഴിച്ചു കൂടാനാവാത്തതാണ്. ഉണക്കി പൊടിച്ച ഇഞ്ചി വാറ്റിയാണ് ഇഞ്ചി എണ്ണ ഉല്‍പാദിപ്പിക്കുന്നത്. ജിഞ്ചിബെറിന്‍ എന്ന സെസ്ക്യൂടെര്‍പിന്‍ ഹൈഡ്രോകാര്‍ബണ്‍ ധാരാളമായി ഈ എണ്ണയില്‍ അടങ്ങിയിട്ടുണ്ട്. ഇഞ്ചി എണ്ണ വിവിധതരം ഭക്ഷ്യപദാര്‍ത്ഥ നിര്‍മാണത്തിനും, ലഘുപാനീയം, കേക്ക് എന്നിവയുടെ നിര്‍മാണത്തിനും ധാരാളം ഉപയോഗിക്കുന്നുണ്ട്. എന്നിരുന്നാലും ഇഞ്ചിയുടെ തനതു രുചിക്ക് ഇഞ്ചിയില്‍നിന്നും വേര്‍തിരിച്ചെടുക്കുന്ന ഒളിയോറെസിന്‍ വാണിജ്യപരമായി വളരെ പ്രാധാന്യം അര്‍ഹിക്കുന്നു.

 

ഏലം

ഏലക്കാ എണ്ണ

ഏലക്കായുടെ പ്രധാന ഘടകമാണ് ഏലക്കാ എണ്ണ. ഇത് വിത്തിലാണ് ധാരാളം അടങ്ങിയിരിക്കുന്നത്. വ്യാവസായികമായി ഏലക്കായുടെ സ്ഥാനത്ത് ഏലക്കാ എണ്ണ ധാരാളമായി ഉപയോഗിക്കുന്നു. ഏലയ്ക്കാരുചിയുള്ള ബിസ്കറ്റ്, ഏലയ്ക്കാ ചേര്‍ത്ത പാല്‍ ഉല്‍പ്പന്നങ്ങള്‍ ഉപയോഗിച്ചുള്ള ഭക്ഷണങ്ങള്‍ എന്നിവുയുടെ കൂടിയ ആവശ്യകത ഏലയ്ക്കാ എണ്ണയുടെ പ്രാധാന്യം വര്‍ധിപ്പിച്ചിട്ടുണ്ട്. ഗുണനിലവാരമുള്ള ഏലയ്ക്കാ എണ്ണ ഉല്‍പ്പാദനത്തിനു വിത്തു വേര്‍തിരിച്ചെടുക്കണം. ഈ വിത്തില്‍നിന്നും നീരാവി ഉപയോഗിച്ചു വാറ്റി എണ്ണ വേര്‍തിരിച്ചെടുക്കാം.