অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

സുസ്ഥിര വിളവിന് സംയോജിത പൈനാപ്പിള്‍ കൃഷി

കളനിയന്ത്രണ മാര്‍ഗ്ഗങ്ങള്‍

  • കൃഷി തുടങ്ങുന്നതിനുമുമ്പ് പറമ്പ് ഉഴുത്/കിളച്ച് കളകളും അവയുടെ കാണ്ഡങ്ങളും നശിപ്പിക്കണം.
  • കൈതച്ചെടികള്‍ വളര്‍ത്തുന്ന രണ്ട് വരികള്‍ക്കിടയിലുള്ള സ്ഥലത്തുണ്ടാകുന്ന കളകളെ തൂമ്പകൊണ്ട് ചെത്തിയോ അരിവാള്‍കൊണ്ട് വീശിയോ നിയന്ത്രിക്കാം.
  • കളകള്‍ പറിച്ചെടുത്ത് മണ്ണ് കുടഞ്ഞു കളഞ്ഞ് കൈതയ്ക്ക് പുതയായി ഉപയോഗിച്ചാല്‍ കടുത്ത വേനലില്‍ നിന്നും സൂര്യാഘാതത്തില്‍നിന്നും രക്ഷിക്കാം. പക്ഷികള്‍ ചക്ക കൊത്തുകയുമില്ല.
  • കൈത നട്ടയുടനെ കൈതയുടെ വരികള്‍ക്കിടയിലുള്ള സ്ഥലത്ത് പയര്‍, ചണമ്പ് തുടങ്ങിയ പച്ചിലച്ചെടികള്‍ വളര്‍ത്തിയാല്‍ കളശല്യം കുറയും. പൂവിട്ടു തുടങ്ങുമ്പോള്‍ ഈ ചെടികള്‍ പറിച്ചെടുത്ത് കൈതയ്ക്ക് വളമായോ പുതയായോ ഉപയോഗിക്കാവുന്നതാണ്.
  • കളകളെ മുറിക്കുന്ന യന്ത്രം ഉപയോഗിച്ച് മുറിച്ച് കളയാം.
  • ആവശ്യമെങ്കില്‍ മാത്രം കളനാശിനി ഉപയോഗിച്ച് കള നിയന്ത്രിക്കാം.

കളനാശിനി ഉപയോഗിച്ചുള്ള കളനിയന്ത്രണം

കൈതച്ചെടിയിലുള്ള മുള്ളുകള്‍ മൂലം കളകള്‍ പറിച്ചുമാറ്റുന്നത് ശ്രമകരമാണ്. തൊഴിലാളികളുടെ ദൌര്‍ലഭ്യവും കൂലിവര്‍ധനവും മൂലം പ്രായോഗികമാര്‍ഗം കളനാശിനി ഉപയോഗിക്കുകയാണ്.

  1. കളകള്‍ മുളയ്ക്കുന്നത് തടയുന്ന കളനാശിനികള്‍

ഡൈയൂറോണ്‍ (Diuron) എന്ന കളനാശിനി ക്ലാസ്സ്, കാര്‍മെക്സ്, ഡൈയൂറെക്സ് എന്നീ പേരുകളില്‍ ലഭിക്കുന്നു. കൈതച്ചെടികള്‍ക്ക് ഒരു കേടും വരുത്താതെ 4-5 മാസം വരെ കളകളെ നിയന്ത്രിക്കുവാനും നശിപ്പിക്കുവാനും സാധിക്കും. കളകള്‍ മുളച്ചുവരാതിരിക്കാന്‍ 3 കി.ഗ്രാം ഡൈയൂറോണ്‍ (ക്ലാസ്സ്) 600 ലിറ്റര്‍ വെള്ളത്തില്‍ കലക്കി ഒരു ഹെക്ടറില്‍ തളിക്കണം. വീണ്ടും കളകള്‍ മുളയ്ക്കുകയാണെങ്കില്‍ ഇതിന്‍റെ പകുതി അളവില്‍ ഒന്നുകൂടി തളിച്ചാല്‍ മതിയാകും.

ഡൈയൂറോണിന് പകരമായി ഉപയോഗിക്കുവാന്‍ പറ്റിയ ഒരു കളനാശിനിയാണ് ഓക്സിഫ്ലൂര്‍ഫിന്‍. ഗോള്‍, ഓക്സിഗോള്‍ഡ്‌ എന്നീ പേരുകളില്‍ ഇത് ലഭിക്കുന്നു. ഡൈയൂറോണിനെ അപേക്ഷിച്ച് വിഷവീര്യം കുറവുള്ളത് കൊണ്ട് പരിസ്ഥിതി പ്രശ്നങ്ങള്‍ കുറവാണ്. ഹെക്ടറിന് 300 ഗ്രാം (1200 മി.ലി. ഗോള്‍) തളിച്ചാല്‍ ഏതാണ്ട് 4 മാസത്തോളം കളകളൊന്നും മുളയ്ക്കുകയില്ല.

നിലം ഒരുക്കി കാനികള്‍ നടുന്നതിന് തൊട്ടുമുമ്പായി കളനാശിനികള്‍ തളിക്കുന്നതാണ് ഏറ്റവും നല്ലത്. തളിക്കുന്ന സമയത്ത് മണ്ണില്‍ നനവ്‌ ഉണ്ടായിരിക്കണം. നല്ല മഴയുള്ളപ്പോള്‍ തളിച്ചാല്‍ പറമ്പില്‍നിന്നും വെള്ളം പുറത്തേക്ക് ഒഴുകിപ്പോകുന്നതിലൂടെ കളനാശിനിയും നഷ്ടപ്പെടാന്‍ സാധ്യതയുണ്ട്.

  1. മുളച്ച കളകളെ നശിപ്പിക്കുന്ന കളനാശിനികള്‍

ഗ്ലൈഫോസേറ്റ് എന്ന കളനാശിനി അടങ്ങിയിട്ടുള്ള റൌണ്ടപ്പ്, ഗ്ലൈസല്‍, ഗ്ലൈറ്റാഫ് തുടങ്ങിയ പേരുകളില്‍ ലഭിക്കുന്ന കളനാശിനി ഒരു ലിറ്റര്‍ വെള്ളത്തിന് 10 മി.ലി. അനുപാതത്തില്‍ കലക്കി തളിച്ചാല്‍ ഒട്ടുമിക്ക കളകളും 8-10 ദിവസം കൊണ്ട് ഉണങ്ങിക്കിട്ടും. അന്തര്‍വ്യാപനശേഷിയുള്ള കളനാശിനി ആയതിനാല്‍ തളിച്ച കളകള്‍ വേരുള്‍പ്പെടെ പൂര്‍ണ്ണമായും നശിക്കുന്നതാണ്. കൈതയ്ക്കും ദോഷം ചെയ്യുന്നതായതിനാല്‍ കൈതയുടെ ഇലയില്‍ വീഴാതെ കൈതവരികള്‍ക്കിടയിലുള്ള സ്ഥലത്ത് മാത്രമേ ഈ കളനാശിനി ഉപയോഗിക്കാന്‍ പാടുള്ളൂ.

നറുനീണ്ടിയും പാര്‍വള്ളിയും ഗ്ലൈഫോസേറ്റും തളിച്ചാലും പൂര്‍ണ്ണമായി ഉണങ്ങാറില്ല.

കൈതച്ചെടികളുടെ മുകളിലേക്ക് പടര്‍ന്നുകയറി വളരുന്ന അമേരിക്കന്‍ വള്ളി, വയറവള്ളി തുടങ്ങിയ കളകളെ ഉണക്കാന്‍ ഡൈയൂറോണ്‍ 5 ഗ്രാം/ലിറ്റര്‍ വെള്ളത്തിന് എന്ന അനുപാതത്തില്‍ കലക്കി തളിച്ചാല്‍ മതി.

പാരക്വാറ്റിന് പകരമായി ഗ്ലൂഫോസിനെറ്റ് അമോണിയം (ബാസ്റ്റാ) എന്ന കളനാശിനി ഉപയോഗിക്കാവുന്നതാണ്. ഇത് ഹെക്ടറിന് 900 ഗ്രാം (3 ലി.ബാസ്റ്റ) എന്ന തോതില്‍ ഉപയോഗിക്കേണ്ടതാണ്.

കളനാശിനികളില്‍ ഡൈയൂറോണ്‍ ഒഴികെ മറ്റൊന്നും അല്‍പ്പംപോലും ചെടികളില്‍ വീഴാതെ സൂക്ഷിക്കണം. കളനാശിനികള്‍ ഉപയോഗിച്ച് കളകളെ നശിപ്പിക്കുമ്പോള്‍ അവിടവിടെ ബാക്കി നില്‍ക്കുന്ന കളകള്‍ പറിച്ചു കളയേണ്ടതാണ്.

പുഷ്പിക്കല്‍

ഒരു തോട്ടത്തിലെ എല്ലാ ചെടികളും ഒരേസമയത്ത് പുഷ്പ്പിച്ചു ഒരുമിച്ച് വിളവെടുക്കുന്നതിന് എത്തിഫോണ്‍ പ്രയോഗം ആവശ്യമാണ്‌. ചെടികള്‍ ഏതാണ്ട് 7 മാസം പ്രായമെത്തി നാല്‍പ്പതോളം ഇലകളുള്ളപ്പോഴാണ് എത്തിഫോണ്‍ പ്രയോഗിക്കുന്നത്. 2-ക്ലോറോ ഈതൈല്‍ ഫോസ്ഫോണിക് ആസിഡ് അടങ്ങിയ എത്തിഫോണ്‍ 25 പി പി എം, യൂറിയ 2 ശതമാനം, കാത്സ്യം കാര്‍ബണെറ്റ് 0.04 ശതമാനം അടങ്ങിയ ലായനി 50 മില്ലി ലിറ്റര്‍ വീതം കാനി ഒന്നിന് കൂമ്പില്‍ ഒഴിച്ചുകൊടുക്കണം. ഇങ്ങനെ 1000 ചെടികള്‍ക്ക് വേണ്ടിവരുന്ന ലായനി ഉണ്ടാക്കാന്‍ 50 ലിറ്റര്‍ വെള്ളത്തില്‍ 1.25 മി.ലി. എത്തിഫോണ്‍ (3.2 മി.ലി. എത്രല്‍ 39 ശതമാനം, അല്ലെങ്കില്‍ 12.5 മി.ലി. എത്രല്‍ 10 ശതമാനം), ഒരു കി.ഗ്രാം. യൂറിയ, 20 ഗ്രാം കാത്സ്യം കാര്‍ബണെറ്റ് (ചുണ്ണാമ്പ്) എന്നിവ ലയിപ്പിക്കണം. എത്തിഫോണ്‍ ഒഴിച്ചു കഴിഞ്ഞയുടന്‍ മഴ പെയ്താല്‍ വീണ്ടും ഒഴിക്കേണ്ടതാണ്.

ഒഴിക്കുന്ന സമയത്ത് ചെടികളില്‍ ഏകദേശം 39-42 ഇലകള്‍ ഉണ്ടായിരിക്കണം. കേരളത്തില്‍ വാണിജ്യാടിസ്ഥാനത്തില്‍ കൃഷി ചെയ്യുന്ന മൌറീഷ്യസ്, അമൃത, എംഡി 2 എന്നീ ഇനങ്ങള്‍ക്ക് 7-8 മാസങ്ങള്‍ക്കുള്ളില്‍ ഇത്രയും ഇലകള്‍ ഉണ്ടാകും. എന്നാല്‍ മറ്റൊരിനമായ ക്യൂ നട്ടു 10-12 മസാങ്ങള്‍ക്കുള്ളില്‍ മാത്രമേ ഇത്രയും ഇലകള്‍ ഉണ്ടാകൂ. അതിനാല്‍ മൌറീഷ്യസ്, അമൃത, എംഡി 2 എന്നീ ഇനങ്ങള്‍ക്ക് നട്ട് 7-8 മാസത്തിനുശേഷവും ക്യൂ ഇനം നട്ട് 10-12 മാസങ്ങള്‍ക്ക് ശേഷവും എത്തിഫോണ്‍ ലായനി ഒഴിച്ചു കൊടുക്കാം. ശരിയായ കായികവളര്‍ച്ച ഇല്ലാത്ത ചെടികളില്‍ എത്തിഫോണ്‍ പ്രയോഗംകൊണ്ട് പൂക്കള്‍ ഉണ്ടാക്കാമെങ്കിലും അത്തരം അവസ്ഥയില്‍ ചക്കയുടെ വലിപ്പം വളരെ കുറവായിരിക്കും.

എത്തിഫോണ്‍ മിശ്രിതം ഒഴിച്ചുകൊടുത്ത് 30 ദിവസം കഴിയുമ്പോള്‍ പൂങ്കുലകളുടെ അങ്കുരം നടുകൂമ്പില്‍ കണ്ടുതുടങ്ങും. ഒരു ചുവന്ന കളറാണ് ആദ്യം കാണുന്നത്. മൌറീഷ്യസ് ഇനത്തിലും അമൃത ഇനത്തിലും തുടങ്ങിക്കഴിഞ്ഞ് 10 ദിവസത്തിനുള്ളില്‍ എല്ലാ ചെടികളിലും പൂക്കള്‍ പൂര്‍ത്തിയാകും. എന്നാല്‍ ക്യൂ ഇനത്തില്‍ 40 ദിവസം കഴിയുമ്പോഴേ പൂങ്കുലകളുടെ അങ്കുരം കാണുകയുള്ളൂ. തുടങ്ങിക്കഴിഞ്ഞ് ഏകദേശം 15 ദിവസങ്ങള്‍ക്കുള്ളില്‍ മാത്രമേ എല്ലാ ചെടികളിലെയും പൂക്കള്‍ പൂര്‍ത്തിയാകുകയുള്ളൂ. എത്തിഫോണ്‍ പ്രയോഗംകൊണ്ട് 95-98 ശതമാനം ചെടികളും പൂക്കുമെന്ന് ഗവേഷണ ഫലങ്ങള്‍ തെളിയിച്ചിട്ടുണ്ട്. എത്തിഫോണ്‍ പ്രയോഗം കഴിഞ്ഞ് നാല്-നാലര മാസങ്ങള്‍ക്കുള്ളില്‍ മൌറീഷ്യസ്, അമൃത, എം ഡി 2 എന്നീ ഇനങ്ങള്‍ വിളവെടുപ്പിന് പാകമാകും. ക്യൂ ഇനം എത്തിഫോണ്‍ ഒഴിച്ചുകഴിഞ്ഞ് ഏകദേശം അഞ്ചേകാല്‍-അഞ്ചേമുക്കാല്‍ മാസങ്ങള്‍ എടുക്കും വിളവെടുപ്പിന്.

ക്യൂ ഇനത്തില്‍ ഒന്നാമത്തെ വിളവെടുപ്പിനുശേഷം 8-10 മാസങ്ങള്‍ കഴിയുമ്പോള്‍ ആദ്യത്തെ കുറ്റിവിളയ്ക്കുവേണ്ടി എത്തിഫോണ്‍ പ്രയോഗം നടത്താം. അമൃത, മൌറീഷ്യസ് ഇനങ്ങളില്‍ ഒന്നാംവിള കഴിഞ്ഞ് 5-6 മാസങ്ങള്‍ക്കുള്ളില്‍ എത്തിഫോണ്‍ കൊടുക്കാം. രണ്ടാം കുറ്റി വിളയ്ക്കുവേണ്ടി നേരത്തെ പറഞ്ഞതുപോലെ എത്തിഫോണ്‍ പ്രയോഗം നടത്താം. ഒരു പ്രധാന വിളയും രണ്ട് കുറ്റിവിളകളും ആണ് പൈനാപ്പിളില്‍ ശുപാര്‍ശ ചെയ്തിട്ടുള്ളത്. ഇപ്രകാരം മൌറീഷ്യസ് ഇനത്തിലും അമൃത ഇനത്തിലും മൂന്നു വിളവ്‌ കിട്ടുന്നതിന് 3 കൊല്ലം മതി. എന്നാല്‍ ക്യൂ ഇനത്തില്‍ 4 വര്‍ഷത്തിനുള്ളിലാണ് ഒരു പ്രധാന വിളയും രണ്ട് കുറ്റി വിളകളുമായി 3 വിളകള്‍ കിട്ടുന്നത്.

മൂന്നു വര്‍ഷത്തിനുള്ളില്‍ നാല് വിളകള്‍ എടുക്കുന്ന രീതി കേരളത്തിലെ മൌറീഷ്യസ് പൈനാപ്പിള്‍ കൃഷിയുടെ സിരാകേന്ദ്രമായ എറണാകുളം ജില്ലയിലെ വാഴക്കുളത്ത് പ്രചാരത്തിലുണ്ട്. പ്രത്യേകിച്ച് സ്ഥലം മൂന്ന് വര്‍ഷത്തെ പാട്ടത്തിനെടുത്ത് കൃഷി ചെയ്യുമ്പോള്‍ ഈ രീതി പ്രയോഗിച്ചു വരുന്നു.

സംയോജിത കീടനിയന്ത്രണം

നമ്മുടെ നാട്ടില്‍ പൈനാപ്പിള്‍ കൃഷിയെ ബാധിക്കുന്ന ശത്രുകീടങ്ങള്‍ അധികമില്ല എങ്കിലും കൂടുതല്‍ സ്ഥലങ്ങളില്‍ കൃഷി വ്യാപിക്കുന്നതോടെ കീടങ്ങളും കൂടിവരാനുള്ള സാധ്യതകള്‍ ഉണ്ട്.

മീലിമുട്ടകള്‍ (ഡിസ്മികോക്കസ് ബ്രെവിപസ്, ഡിസ്മികോക്കസ് നിയോബ്രെവിപസ്)

കൈതച്ചക്കയെ ബാധിക്കുന്ന ഒരു പ്രധാനപ്പെട്ട കീടമാണ്‌ മീലിമുട്ടകള്‍. ഇവ മധുരമുള്ള ഒരു തരം ദ്രാവകം പുറപ്പെടുവിക്കുന്ന കാപ്നോഡിയം എന്ന കുമിളിന്‍റെ വളര്‍ച്ചയെ സഹായിക്കുകയും കരിംപൂപ്പല്‍ ഇലകളിലും കൈതച്ചക്കയിലും വ്യാപിക്കുന്നതിന് ഇടയാക്കുകയും ചെയ്യും. ഇലകളുടെ പ്രവര്‍ത്തനത്തെയും ഹാനികരമായി ബാധിക്കുന്നു. ചക്കയില്‍ കരിംപൂപ്പല്‍ വന്നാല്‍ അത് വിപണനത്തെയും പ്രതികൂലമായി ബാധിക്കും.

ചെടിയുടെ വേര്, കട, ഇലകള്‍, ചക്ക എന്നീ ഭാഗങ്ങളെല്ലാം മീലിമുട്ട ആക്രമിക്കാറുണ്ട്. മീലിമുട്ടകളുടെ ആക്രമണമുണ്ടായിട്ടുള്ള കൈതച്ചക്കയില്‍ മെഴുകുപൊടിയും നാരുകളും അവശേഷിക്കുന്നത് വിപണനത്തെ പ്രതികൂലമായി ബാധിക്കും. ആക്രമണം ബാധിച്ച ചെടിയുടെ ഇലകള്‍ മഞ്ഞനിറമോ ചുവപ്പുനിറമോ ആയി കണ്ടുവരുന്നു. ഇലകളുടെ അഗ്രഭാഗം മുതല്‍ താഴേയ്ക്ക് വാടി വരുന്നത് മീലിമുട്ടയുടെ ആക്രമണം മൂലമാണ്.

കൈതയെ ബാധിക്കുന്ന വൈറസ് രോഗമായ (മീലിബഗ് വില്‍റ്റ് അസ്സോസിയേറ്റഡ് വൈറസ്) വാട്ടരോഗത്തിന്‍റെ വാഹകരാണ് ഈ മീലിമുട്ടകള്‍. അതിനാല്‍ വാട്ടരോഗബാധയുള്ള സ്ഥലത്ത് മീലിമുട്ടകളെ നിയന്ത്രിക്കേണ്ടത് അത്യാവശ്യമാണ്.

നിയന്ത്രണമാര്‍ഗ്ഗങ്ങള്‍

മീലിമുട്ടയുടെ ആക്രമണമില്ലാത്ത നടീല്‍വസ്തുക്കള്‍ മാത്രം കൃഷിചെയ്യുന്നതിന് ഉപയോഗിക്കുക. ജൈവകുമിള്‍, ലെക്കാനിസില്ലിയം (വെര്‍ട്ടിസീലിയം) ലെക്കാനി, ഒരു ലിറ്റര്‍ വെള്ളത്തിനു 20 ഗ്രാം എന്ന തോതില്‍ കലക്കി ചെടിയില്‍ തളിക്കുകയും ചുവട്ടില്‍ ഒഴിച്ചുകൊടുക്കുകയും ചെയ്യുക, ഒരാഴ്ചയ്ക്കുശേഷം ഒരിക്കല്‍ക്കൂടി ആവര്‍ത്തിക്കുക. വിവിധയിനം കളകളിലും മീലിമുട്ട കാണാറുണ്ടെന്നതിനാല്‍ തോട്ടത്തില്‍ കളനിയന്ത്രണം ഉറപ്പാക്കുക, ധാരാളം വിളകളെ ആക്രമിക്കുന്നതിനാല്‍ വാഴ, പച്ചക്കറികള്‍, ചേമ്പ്, പേര, ആത്തച്ചെടി എന്നിവയിലും നിയന്ത്രണമാര്‍ഗ്ഗങ്ങള്‍ സ്വീകരിക്കുക, മീലിമുട്ടയുള്ള തോട്ടങ്ങളില്‍ ഉപയോഗിച്ച കൃഷി ഉപകരണങ്ങള്‍ പുതിയ സ്ഥലത്തേക്ക് കൊണ്ടുപോകുമ്പോള്‍ അവയില്‍ മീലിമുട്ട ഇല്ല എന്നുറപ്പ് വരുത്തുക എന്നിവയാണ് അവലംബിക്കാവുന്ന മാര്‍ഗ്ഗങ്ങള്‍.

ഈ കീടത്തിന്‍റെ വംശവര്‍ദ്ധന തടഞ്ഞ് അവ വ്യാപിക്കുന്നത് തടയാന്‍വേണ്ടി തോട്ടത്തിലെ ഉറുമ്പുകളെ നശിപ്പിക്കുക. ഇതോടൊപ്പം എതിര്‍പ്രാണികളുടെ കാര്യക്ഷമതയും കൂടും. ഉറുമ്പുകെണി വച്ചും ഉറുമ്പിന്‍റെ മാളം കണ്ടുപിടിച്ചു അതില്‍ കീടനാശിനി ഒഴിച്ചും അവയെ നശിപ്പിക്കാം.

മീലിമുട്ടകളെ നിയന്ത്രിക്കുന്നതിനുള്ള അവസാനമാര്‍ഗ്ഗമെന്ന നിലയില്‍ രാസകീടനാശിനികള്‍ ചെടിയില്‍ തളിക്കുകയും ചുവട്ടില്‍ ഒഴിക്കുകയും ചെയ്യുക. താഴെക്കൊടുത്തിരിക്കുന്നതില്‍ ഏതെങ്കിലും ഒരു കീടനാശിനി ഉപയോഗിക്കുക.

  • ക്ലോര്‍പൈറിഫോസ് (ഹില്‍ബാന്‍ 20 ഇ.സി. 2.5 മി.ലി./ലി.) 500 ലി./ഹെക്ടര്‍ 2. ഇമിഡാ ക്ലോപ്രിഡ് (ടാറ്റാമിഡ 200 എസ്.എല്‍. 0.3 മി.ലി./ലിറ്റര്‍) 500 ലി./ഹെക്ടര്‍ 3. ക്വിനാല്‍ഫോസ് (ഇകാലക്സ് 25 ഇ.സി., 2 മി.ലി./ലി.) 500 ലി./ഹെക്ടര്‍

സംയോജിത രോഗനിയന്ത്രണം

അഴുകല്‍, കൂമ്പുചീയല്‍, ഇലപ്പുള്ളി രോഗം എന്നിങ്ങനെ പല കുമിള്‍രോഗങ്ങളും ചെടിയെ ബാധിക്കാറുണ്ട്. നീര്‍വാര്‍ച്ച കുറഞ്ഞ പ്രദേശങ്ങളിലാണ് രോഗം കൂടുതല്‍ കണ്ടുവരുന്നത്.

  • അഴുകല്‍/ചീയല്‍ രോഗം

ഈ രോഗത്തിന് കാരണം ഫൈറ്റോഫ്തോറ സിനമോമി, ഫൈറ്റോഫ്തോറ നികോട്ടിയാന എന്നീ കുമിളുകളാണ്.

രോഗലക്ഷണങ്ങള്‍

കാനിയുടെ ഹൃദയഭാഗത്തുള്ള ഇലകള്‍ മഞ്ഞയില്‍നിന്ന് ചെറിയ ചെമ്പുനിറമുള്ളവയായി മാറുകയും പിന്നീട് കരിയുകയും ചെയ്യുന്നു. രോഗത്തിന്‍റെ മൂര്‍ധന്യാവസ്ഥയില്‍ ഇളംപോളകള്‍ പോലും എളുപ്പത്തില്‍ വലിച്ചെടുക്കാന്‍ പാകത്തിനായി മാറുന്നു. കാനിയുടെ താഴ്ഭാഗം മഞ്ഞകലര്‍ന്ന തവിട്ടുനിറമാകുകയും ഒരു കറുത്തരേഖ പോളയുടെ ആരോഗ്യമുള്ള ഭാഗത്തെയും രോഗം ബാധിച്ച ഭാഗത്തെയും വേര്‍തിരിക്കുന്നു.

രോഗനിയന്ത്രണം

കൃഷിയിടത്തിന്‍റെ ശുചിത്വം ഉറപ്പുവരുത്തുക, നീര്‍വാര്‍ച്ച ഉറപ്പുവരുത്തുക, നിരപ്പില്‍നിന്ന് 20 സെന്റിമീറ്റര്‍ പൊക്കത്തില്‍ മണ്ണ് പൊക്കി നീര്‍ച്ചാലുകള്‍ തീര്‍ത്ത് കാനികള്‍ നടുക, ട്രൈക്കോടെര്‍മ, സ്യൂഡോമോണാസ് എന്നിവ ഉപയോഗിച്ച് ജൈവരീതിയില്‍ രോഗം നിയന്ത്രിക്കുക (1-2 കി.ഗ്രാം ട്രിക്കോഡര്‍മ്മ, 100 കി.ഗ്രാം വേപ്പിന്‍പിണ്ണാക്ക്-ചാണകപ്പൊടി (1:1) മിശ്രിതത്തില്‍ ചേര്‍ത്ത് മണ്ണില്‍ ഇട്ടുകൊടുക്കുക, 10 ഗ്രാം സ്യൂഡോമോണാസ്, 2 കി.ഗ്രാം ചാണകപ്പൊടിയിലോ കമ്പോസ്റ്റിലോ ചേര്‍ത്ത് ചെടിയുടെ ചുവട്ടില്‍ ഇട്ടുകൊടുക്കുക) എന്നീ മാര്‍ഗ്ഗങ്ങള്‍ അവലംബിക്കുക.

അവസാന മാര്‍ഗ്ഗമെന്നനിലയില്‍ കുമിള്‍നാശിനികളായ മാങ്കോസേബ് അല്ലെങ്കില്‍ ഇന്‍ഡോഫില്‍ 0.2-0.3 ശതമാനം പ്രയോഗിച്ച കാനികള്‍ നടാനായി ഉപയോഗിക്കുക. നട്ടതിനുശേഷം രോഗബാധ കാണുമ്പോള്‍ ഹെക്ടറിന് 500 ലിറ്റര്‍ ലായനി എന്ന കണക്കില്‍ മേല്‍പ്പറഞ്ഞ കുമിള്‍നാശിനി തളിച്ചുകൊടുക്കണം. രോഗം കൂടുതല്‍ ബാധിച്ച സ്ഥാനങ്ങളില്‍ ചെടിയുടെ ചുവട്ടിലുള്ള മണ്ണ് കുതിരുംവിധം ഒഴിച്ചും രോഗം ബാധിച്ച ചെടികളെ നിശ്ശേഷം നശിപ്പിച്ചും ഈ രോഗങ്ങളെ നിയന്ത്രിക്കാവുന്നതാണ്.

  • പൈനാപ്പിളിലെ വൈറസ് വാട്ടരോഗം

ഈ രോഗത്തിനു കാരണം ആംപെലോ വൈറസ് ആണ്. മീലിമുട്ടകളാണ് ഈ രോഗം പരത്തുന്നത്.

രോഗലക്ഷണങ്ങള്‍

ഇലകള്‍ ചുവപ്പുനിറമായി ‘റ’ പോലെ വളഞ്ഞു കരിഞ്ഞുപോകും. വേരുകള്‍ നശിച്ചു ചെടി മൊത്തത്തില്‍ വാടുന്നു. തണുപ്പുകാലത്ത് കൂടുതലായി ഈ രോഗം കാണുന്നു. പ്രായംകുറഞ്ഞ കാനികള്‍ 2-3 മാസങ്ങളില്‍ രോഗലക്ഷണങ്ങള്‍ കാണിക്കുമ്പോള്‍ പ്രായംകൂടിയ കാനികള്‍ 12 മാസങ്ങള്‍ വരെ സമയമെടുക്കും.

രോഗനിയന്ത്രണം

വൈറസ് രോഗം ബാധിച്ച ചെടികള്‍ പൂര്‍ണ്ണമായി നശിപ്പിക്കുക, നടാനുള്ള കാനികള്‍ രോഗസാധ്യതയില്ലാത്ത പ്രദേശങ്ങളില്‍ നിന്നെടുക്കുക, മൂന്നു ശതമാനത്തില്‍ താഴെ കാനികള്‍ക്ക് മാത്രമേ രോഗം വന്നിട്ടുള്ളൂവെങ്കില്‍ അവ പിഴുതുനശിപ്പിക്കുക, ഉറുമ്പുകളേയും മീലിമുട്ടകളെയും നിയന്ത്രിക്കുക, കൃഷിസ്ഥലത്ത് പാഴ്ചെടികള്‍ വളരാതെ നോക്കുക, രോഗം പരത്തുന്ന മീളിമുട്ടയെ നിയന്ത്രിക്കുക എന്നീ മാര്‍ഗ്ഗങ്ങള്‍ അവലംബിക്കുക.

സുരക്ഷിത വിളസംരക്ഷണം

സുരക്ഷിത വിളസംരക്ഷണത്തിനായി കൃഷിസ്ഥല ശുചിത്വം ഉറപ്പുവരുത്തുക, ശരിയായ നീര്‍വാര്‍ച്ച ഉറപ്പുവരുത്തുക, കീടരോഗബാധയില്ലാത്ത ആരോഗ്യമുള്ള ഒന്നാം വര്‍ഷ കാനികള്‍ നടുക, കാനികള്‍ ശരിയായി പരിചരിക്കുക, ട്രൈക്കോഡര്‍മ്മ, സ്യൂഡോമോണാസ് എന്നിവയുടെ പ്രയോഗം, രോഗം ബാധിച്ച ചെടികളെ നശിപ്പിക്കുക, രോഗം പരത്തുന്ന കീടങ്ങളെയും കളകളെയും നിയന്ത്രിക്കുക, തുടക്കത്തിലെയുള്ള കീടരോഗ നിര്‍ണ്ണയവും നിയന്ത്രണവും അവസാനമാര്‍ഗ്ഗമെന്ന നിലയില്‍ മാത്രം ശുപാര്‍ശയനുസരിച്ച് മരുന്ന് പ്രയോഗിക്കുക എന്നീ മാര്‍ഗ്ഗങ്ങള്‍ അവലംബിക്കുക.

മറ്റു പരിചരണങ്ങള്‍

വേനല്‍ക്കാലത്ത് ചക്ക ചാഞ്ഞുനില്‍ക്കാറുണ്ട്. അവയുടെ ഒരുവശം സൂര്യപ്രകാശത്തിന്‍റെ ആഘാതത്താല്‍  നശിച്ചു ഉപയോഗശൂന്യമായിത്തീരുന്നു. ഇത് തടയാന്‍ ചക്കയുടെ മേല്‍ ചപ്പുചവറുകള്‍ ഇട്ടു ഭാഗികമായി മൂടുന്നതും അതേ ചെടിയുടെ ഇലകള്‍ കൊണ്ടുതന്നെ പൊതിഞ്ഞുകെട്ടുന്നതും നല്ലതാണ്. ചെടികള്‍ ചാഞ്ഞുപോകുമ്പോള്‍ മണ്ണ് അണച്ചുകൊടുക്കുന്നതും വളരെ ഫലപ്രദമാണ്. ചെടി കുലയ്ക്കാന്‍ തുടങ്ങുന്നതോടെ ചുവട്ടില്‍നിന്നും പുതിയ കന്നുകള്‍ പൊട്ടിവരാന്‍ തുടങ്ങും. ഇവയില്‍ ഏറ്റവും നല്ല ഒരു കന്നുമാത്രം നിര്‍ത്തി ബാക്കി അടര്‍ത്തിക്കളയണം. ചക്ക പൊട്ടി വരുമ്പോള്‍ മകുടത്തിന്‍റെ കൂമ്പ് മാത്രം നുള്ളിക്കളയുന്നതും സ്ലിപ്പുകള്‍ അടര്‍ത്തിക്കളയുന്നതും കൂടുതല്‍ വലിപ്പമുള്ള ചക്കയുണ്ടാവാന്‍ സഹായകമാണ്.

വിളവെടുപ്പ്

എത്തിഫോണ്‍ പ്രയോഗം കഴിഞ്ഞു നാല്-നാലര മാസങ്ങള്‍ക്കുള്ളില്‍ മൌറീഷ്യസ്, അമൃത, എം.ഡി 2 എന്നീ ഇനങ്ങള്‍ വിളവെടുപ്പിനു പാകമാകും. ക്യൂ ഇനം എത്തിഫോണ്‍ ഒഴിച്ചു കഴിഞ്ഞു ഏകദേശം അഞ്ചേകാല്‍ അഞ്ചേമുക്കാല്‍ മാസങ്ങള്‍ എടുക്കും വിളവെടുപ്പിന്. പൈനാപ്പിള്‍ ഉത്പാദനം പരിചരണമുറകളെയും കാനികളുടെ എണ്ണത്തെയും ആശ്രയിച്ചിരിക്കുന്നു. തനിവിളയായി 40,000 കാനികള്‍ നടുമ്പോള്‍ ഒരു ഹെക്ടറില്‍ നിന്നും 40-50 ടണ്‍ വിളവു ലഭിക്കും. റബ്ബര്‍, തെങ്ങ് തോട്ടങ്ങളില്‍ ഇടവിളയായി 20,000-25,000 കാനികള്‍ നടുമ്പോള്‍ 25-35 ടണ്‍ ചക്ക ലഭിക്കും. ഇതേ രീതിയില്‍ നെല്‍വയലുകളില്‍ നിന്നും ചിലപ്പോള്‍ ഇതിലും കൂടുതല്‍ വിളവ്‌ ലഭിക്കും.

കുറ്റിവിള

ആദ്യവര്‍ഷം ചക്ക വെട്ടി എടുത്തുകഴിഞ്ഞാല്‍ പിന്നീട് രണ്ടു വര്‍ഷംകൂടി ഇവ കുറ്റിവിളയായി നിലനിര്‍ത്തി നല്ല രീതിയില്‍ പരിചരിച്ചാല്‍ നല്ല വിളവ്‌ ലഭിക്കും. വിളവെടുപ്പ് കഴിഞ്ഞ് നടചാലുകളിലെക്ക് നീണ്ടുനില്‍ക്കുന്ന ഇലകള്‍ മുറിച്ചുകളഞ്ഞു മണ്ണില്‍ വളം ചേര്‍ത്ത് മണ്ണ് അണച്ചുകൊടുക്കണം. ചക്കയുടെ വലുപ്പം ഓരോ വര്‍ഷം കഴിയുന്തോറും ചെറുതായി വരും. തന്മൂലം 3 വര്‍ഷം കഴിയുമ്പോള്‍ ആവര്‍ത്തന കൃഷി എടുക്കണം.

സുസ്ഥിര ആദായത്തിന്

പൈനാപ്പിളിന്‍റെ വലുപ്പത്തിനനുസരിച്ചുള്ള A, B, C ഗ്രേഡിംഗ് മൂലം ഓരോ ഗ്രേഡ് കുറയുന്തോറും വിള നേരെ പകുതിയായി കുറയുന്നു. അതിനാല്‍ ഏറ്റവും കൂടുതല്‍ A ചക്ക വിളയിപ്പിച്ചാലേ സുസ്ഥിര ആദായം ലഭിക്കുകയുള്ളൂ. കൂടുതല്‍ A ചക്ക വിളയിപ്പിക്കാനും സുസ്ഥിര ആദായത്തിനും താഴെ പറയുന്ന കാര്യങ്ങള്‍ ശ്രദ്ധിക്കണം.

  • ഭൂസൂചികയുള്ള വാഴക്കുളം പൈനാപ്പിള്‍ (മൌറീഷ്യസ്) ഇനം കൃഷി ചെയ്യുക.
  • നല്ല നീര്‍വാര്‍ച്ചയുള്ളതും, അല്‍പ്പം അമ്ലതയും, നല്ല ജൈവവളക്കൂറുള്ളതുമായ മണല്‍ കലര്‍ന്ന മണ്ണ് വേണം കൃഷിയ്ക്കായി തെരഞ്ഞെടുക്കേണ്ടത്.
  • നല്ല വിളവിന് നല്ല സൂര്യപ്രകാശം വേണം, വേനല്‍ക്കാലത്ത് മൂന്നു ആഴ്ച കൂടുമ്പോള്‍ നനച്ചുകൊടുക്കണം.
  • കീടരോഗബാധയില്ലാത്ത ആരോഗ്യമുള്ള ഒന്നാംവര്‍ഷ കാനികള്‍ നടണം.
  • ട്രൈക്കോഡര്‍മ്മ, സ്യൂഡോമോണാസ്, വേര്‍ട്ടിസീലിയം (20 ഗ്രാം/ലിറ്റര്‍) മുതലായവ പ്രയോഗിക്കണം.
  • ശരിയായ വിളസാന്ദ്രത പാലിക്കണം (ഹെക്ടറിന് തനിവിളയ്ക്ക് 40000, ഇടവിളയ്ക്ക് 20000 കാനികള്‍)
  • സംയോജിത വളപ്രയോഗക്രമം പാലിക്കുക. (കാനി ഒന്നിന്: ജൈവവളം 1 കി.ഗ്രാം, എന്‍.പി.കെ 8:4:8 ഗ്രാം; ഹെക്ടറിന്: ജൈവവളം 1 കി.ഗ്രാം, എന്‍.പി.കെ. 320:160:320 കി.ഗ്രാം, 34 തവണകളായി).
  • തണ്ടുപൊട്ടല്‍ ഒഴിവാക്കാന്‍ പൈനാപ്പിള്‍ പുഷ്പിക്കുന്ന സമയത്ത് അമിതമായ വളപ്രയോഗം അരുത്.
  • കുറ്റിവിളയ്ക്ക് ഏറ്റവും നല്ല ഒരു കാനി മാത്രം നിലനിര്‍ത്തി ബാക്കിയുള്ളവ അടര്‍ത്തിമാറ്റണം.
  • കളകളെ മുളയിലെ നിയന്ത്രിക്കുക (ഹെക്ടറിന് 3 കി.ഗ്രാം ഡൈയൂറോണ്‍ (ക്ലാസ്സ്) 600 ലിറ്റര്‍ വെള്ളത്തില്‍ എന്ന തോതില്‍).
  • പുഷ്പിക്കാന്‍ 25 ppm എത്തിഫോണ്‍ 50 മി.ലിറ്റര്‍  40 ഇല പരുവത്തില്‍ (നട്ട് 7 മാസത്തില്‍) കൂമ്പില്‍ ഒഴിക്കുക. (1000 ചെടികൾക്ക് 50 ലി. വെള്ളം + 3.2 മി.ലി. എത്രൽ 39 ശതമാനം + 1 കി.ഗ്രാം യൂറിയ + 20 ഗ്രാം കാൽസ്യം കാർബണേറ്റ്).
  • സൂര്യാഘാതം തടയാൻ ചക്കയുടെമേല്‍ ചപ്പുചവറുകള്‍ ഇടുകയോ പൊതിഞ്ഞു കെട്ടുകയോ ചെയ്യുക.
  • രോഗം പരത്തുന്ന കീടങ്ങളേയും കളകളെയും നിയന്ത്രിക്കുകയും രോഗം ബാധിച്ച ചെടികളെ നശിപ്പിക്കുകയും ചെയ്യുക.
  • തുടക്കത്തിലെ തന്നെ നിർണ്ണയം നടത്തുകയും നിയന്ത്രിക്കുകയും ചെയ്യണം. ആവശ്യമെങ്കിൽ മാത്രം ശിപാർശയനുസരിച്ച് മരുന്നു പ്രയോഗിക്കുക.

ഉപയോഗം

പൈനാപ്പിൾ (പ്രധാനമായും മൂന്നുരിതിയിലാണ് ഉപയോഗിക്കുന്നത്. നേരിട്ടും, ക്യാൻ ചെയ്തും, ജ്യൂസായും. പൈനാപ്പിൾ ധാരാളമായി ലഭിക്കുന്ന സീസണിൽ അവ സംസ്കരിച്ച് സൂക്ഷിച്ചാൽ വർഷം മുഴുവൻ പൈനാപ്പിൾ ഉത്പന്നങ്ങളുടെ ലഭ്യത ഉറപ്പു വരുത്താം. പൈനാപ്പിൾ 10- 13°C-ൽ 20 ദിവസംവരെ സൂക്ഷിക്കാവുന്നതാണ്. പൈനാപ്പിൾ കൊണ്ട് തയ്യാറാക്കാവുന്ന ചില വിഭവങ്ങളാണ് ജ്യൂസ്, ജ്യൂസ് കോൻ സൻട്രേറ്റ്, സിറപ്പ്, സ്ക്വാഷ്, ജാം, കാൻഡി, പുഡിംഗ്, കേക്ക്, ഹൽവ, കേസരി, ചിപ്സ്, പോപ്സ്, കാരമല്‍,  ബോളി, അട, ഉണ്ട, പായസം, അച്ചാർ, സാലഡ്, മധുരക്കറി, പുളിശ്ശേരി, പച്ചടി, വോഡ്ക തുടങ്ങിയവ. വിപണിയിൽ പെനാപ്പിൾ കൂടുതലായി ലഭ്യമായിരിക്കുമ്പോഴും വിലക്കുറവുളളപ്പോഴും ഇതുപോലുള്ള ഒട്ടനവധി വിഭവങ്ങള്‍ തയ്യാറാക്കി ആദായമുണ്ടാക്കാവുന്നതാണ്.

ഡോ.പി.വി.ജോയി

അസോസിയേറ്റ് പ്രൊഫസര്‍ ആന്‍ഡ്‌ ഹെഡ്,

പൈനാപ്പിള്‍ റിസര്‍ച്ച് സ്റ്റ