অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

സത്രീകളുടെ ആരോഗ്യ വിവരങ്ങള്‍

സത്രീകളുടെ ആരോഗ്യ വിവരങ്ങള്‍

ബൈകോർണുവേറ്റ് (Bicornuate Uterus) ഗർഭപാത്രം: ഗർഭപാത്രത്തിന് രണ്ട് കൊമ്പുകൾ

മിക്ക സ്ത്രീകൾക്കും പിയർ (സബർജൻ) പഴത്തിന്റെ ആകൃതിയിലുള്ള ഗർഭപാത്രമായിരിക്കുമെങ്കിലും ചിലർക്ക് അങ്ങിനെയാവില്ല. പലയവസരങ്ങളിലും ഗർഭപാത്രത്തിന് വ്യത്യസ്ത ആകൃതിയും ഘടനയും ഉണ്ടായേക്കാം. വ്യത്യസ്തമായ ആകൃതിയിലും ഘടനയിലുമുള്ള, പിയർ പഴത്തെ  പോലെയല്ലാത്ത, ഗർഭപാത്രത്തെ അസ്വാഭാവികമായിട്ടാണ് കണക്കാക്കുന്നത്. അസ്വാഭാവിക ഗർഭപാത്രമുള്ള സ്ത്രീകൾക്ക് ഗർഭം ധരിക്കാൻ ബുദ്ധിമുട്ട് ഉണ്ടായേക്കാം. ഗർഭമലസൽ, മാസം തികയാതെ പ്രസവിക്കൽ തുടങ്ങിയ ബുദ്ധിമുട്ടുകളും ഇവർക്ക് നേരിടേണ്ടി വന്നേക്കാം.

എന്താണ് ബൈകോർണുവേറ്റ് ഗർഭപാത്രം?

ബൈകോർണുവേറ്റ് ഗർഭപാത്രം എന്നത് ഗർഭപാത്രത്തിന് ജന്മനാ ഉണ്ടാകുന്ന അസ്വാഭാവികതയാണ്. ഇത്തരം ഗർഭപാത്രത്തിന്, മുകൾ ഭാഗം രണ്ടായി പിരിഞ്ഞ്, ഹൃദയത്തിന്റെ ആകൃതിയായിരിക്കും. പെൺ ഭ്രൂണത്തിന്റെ ഗർഭപാത്രം ശരിയായ രീതിയിൽ വികസിച്ച് പൊള്ളയായ ഒറ്റ അറയായി വികാസം പ്രാപിക്കാത്തതു മൂലമാണ് ഇത്തരം ഗർഭപാത്രമുണ്ടാവുന്നത്. ചില സ്ത്രീകളിൽ ഗർഭപാത്രത്തിന് വളരെ ചെറിയൊരു വിഭജനം മാത്രമേ ഉണ്ടാവുകയുള്ളൂ. ഇത്തരം ഗർഭപാത്രത്തെ ഭാഗികമായ ബൈകോർണുവേറ്റ് ഗർഭപാത്രം (പാർഷ്യൽ ബൈകോർണുവേറ്റ്) എന്നും പൂർണമായും വിഭജിക്കപ്പെട്ട ഗർഭപാത്രത്തെ പൂർണ ബൈകോർണുവേറ്റ് ഗർഭപാത്രം (കം‌പ്ലീറ്റ് ബൈകോർണുവേറ്റ്) എന്നും വിളിക്കുന്നു.

ഗർഭപാത്രം സംബന്ധിച്ച ഏകദേശം 20% അസ്വാഭാവികതകളും ഗർഭപാത്രത്തിന്റെ ബൈകോർണുവേറ്റ് സ്വഭാവം മൂലമാണെന്നാണ് കരുതുന്നത്. മിക്ക സ്ത്രീകളും ഗർഭ സംബന്ധമായ പ്രശ്നങ്ങൾ അഭിമുഖീകരിക്കുമ്പോഴായിരിക്കും ഈ പ്രശ്നത്തെ കുറിച്ച് അറിയുന്നത്.

എന്തുകൊണ്ട് ഇങ്ങനെ സംഭവിക്കുന്നു?

ഭ്രൂണാവസ്ഥയിൽ ഗർഭപാത്ര നാളികൾ (uterine tubes) കൂടിച്ചേരാത്തതു മൂലം ബൈകോർണുവേറ്റ് ഗർഭപാത്രം ഉണ്ടാകാം. ആകസ്മികമായി നടക്കുന്ന ഇത്തരം സംഭവങ്ങൾക്ക് മനുഷ്യരുടെ പ്രവൃത്തികൾ കാരണമാവുന്നില്ല.

ബൈകോർണുവേറ്റ് ഗർഭപാത്രമുള്ളവർ ഗർഭം ധരിച്ചാൽ?

നിങ്ങളുടെ ഡോക്ടർ അസ്വാഭാവികമായ ഗർഭപാത്രം ശ്രദ്ധിച്ചില്ല എന്ന് വന്നേക്കാം. നിങ്ങൾ വിജയകരമായി ഗർഭംധരിക്കുകയും പൂർണ കാലയളവിൽ കുട്ടിയെ ഉദരത്തിൽ വഹിക്കുകയും ചെയ്തതു മൂലമാകാം ഇത്.

നിങ്ങൾക്ക് ബൈകോർണുവേറ്റ് ഗർഭപാത്രമാണുള്ളതെങ്കിലും വിജയകരമായി ഗർഭം ധരിച്ചുവെന്നിരിക്കട്ടെ, അടുത്ത ഒമ്പത് മാസം കുട്ടിയെ വഹിക്കുന്നത് ഒരു പ്രശ്നമായേക്കാം.

ബൈകോർണുവേറ്റ് ഗർഭപാത്രവും ഗർഭാവസ്ഥയും

തീർത്തും അസ്വാഭാവികമായ ബൈകോർണുവേറ്റ് ഗർഭപാത്രമുള്ളവർ ഗർഭംധരിച്ചാൽ ആദ്യത്തെ അല്ലെങ്കിൽ രണ്ടാമത്തെ ട്രൈമസ്റ്ററിൽ ഗർഭമലസാൻ സാധ്യതയുണ്ട്. വളരുന്ന ഭ്രൂണം ഗർഭപാത്രത്തിന്റെ രണ്ട് കൊമ്പുകളിൽ ഒന്നിൽ സ്ഥാനം‌പിടിക്കുകയും വികാസം പ്രാപിക്കാൻ ആവശ്യമായ സ്ഥലം ലഭിക്കാതെ വരികയും ചെയ്യുമ്പോഴാണ് ഗർഭമലസൽ സംഭവിക്കുന്നത്.

അസ്വാഭാവികത കുറഞ്ഞ കേസുകളിൽ ഗർഭം തുടരാനാവും നിർദേശിക്കുക. ഗർഭകാലഘട്ടത്തിൽ ഡോക്ടറുടെ ശ്രദ്ധപൂർവമായ നിരീക്ഷണം ഉണ്ടായിരിക്കും. ഗർഭപാത്രത്തിൽ സ്ഥലം വളരെ കുറവായതു കാരണം ഭ്രൂണം അടിത്തട്ടിൽ പറ്റിച്ചേർന്ന് കിടക്കാനോ തലതിരിഞ്ഞ് കിടക്കാനോ കുറുകെ കിടക്കാനോ ഉള്ള സാധ്യത വളരെ കൂടുതലാണ്. കുട്ടിയുടെ കിടപ്പും അവസ്ഥയും അനുസരിച്ച് പ്രസവത്തിന് സിസേറിയന്റെ ആവശ്യമുണ്ടോയെന്ന് ഡോക്ടർ നിർദേശിക്കും.

മാസം തികയാതെയുള്ള പ്രസവം, അമ്നിയോട്ടിക് ദ്രാവകം നിറഞ്ഞ അമ്നിയോണിന് (ഭ്രൂണത്തെ സംരക്ഷിക്കുന്ന ദ്രാവകം നിറഞ്ഞ സഞ്ചി) കേടുപറ്റുക തുടങ്ങിയ പ്രശ്നങ്ങളും നേരിടേണ്ടിവന്നേക്കാം. ഇത്തരം സാഹചര്യങ്ങളിൽ, വളരുന്ന ഭ്രൂണത്തിന് വികാസത്തിന് ആവശ്യമായ സ്ഥലം ലഭിക്കാതെ വരികയും അതുവഴി ഭ്രൂണം നശിക്കുകയും ചെയ്യും.

അപകടസാധ്യതകൾ എന്തൊക്കെ?

കൂടുതൽ അസ്വാഭാവികതയുള്ള ഒരു ബൈകോർണുവേറ്റ് ഗർഭപാത്രമുള്ള നിങ്ങൾ കുഞ്ഞിനെ പ്രതീക്ഷിക്കുകയാണെങ്കിൽ ഇനി പറയുന്ന അപകടസാധ്യതകൾ ഉണ്ടായേക്കാം;

  • ആദ്യത്തെയോ രണ്ടാമത്തെയോ ട്രൈമസ്റ്ററുകളിൽ ഗർഭം അലസാം.
  • മാസം തികയാതെ പ്രസവിക്കാം.
  • ഭ്രൂണം ഗർഭപാത്രത്തിന്റെ അടിത്തട്ടിലോ അസ്വാഭാവിക സ്ഥിതിയിലോ ആകാം.
  • ഗർഭാശയമുഖം ദുർബലമാകാം.
  • അപൂർവം ചില കേസുകളിൽ ജനനസമയത്ത് കുട്ടിയുടെ ഭാരം ശരാശരിയിൽ താഴെയായിരിക്കും.

ബൈകോർണുവേറ്റ് ഗർഭപാത്രവും ഗർഭവും എങ്ങനെ കൈകാര്യം ചെയ്യും?

ബൈകോർണുവേറ്റ് ഗർഭപാത്രമുള്ള നിങ്ങൾ ഗർഭിണിയായാൽ, ആയാസരഹിതമായും ശാന്തമായും ഇരിക്കണം. മാസം തികയാതെയുള്ള പ്രസവത്തിന്റെ ലക്ഷണങ്ങൾ നിങ്ങൾ മനസ്സിലാക്കേണ്ടതുണ്ട്. ഡോക്ടറുമായുള്ള കൂടിക്കാഴ്ചകളിൽ മുടക്കം വരുത്തരുത്. എന്തെങ്കിലും ബുദ്ധിമുട്ട് തോന്നുകയാണെങ്കിൽ വൈദ്യസഹായം തേടാൻ മടിക്കരുത്. നേരത്തെ ഇത്തരം സാഹചര്യത്തിൽ ഗർഭമലസിയിട്ടുണ്ട് എങ്കിൽ നിങ്ങൾ കൂടുതൽ ജാഗ്രത പുലർത്തണം. അടുത്ത തവണ ഗർഭിണിയാകുമ്പോൾ ഗർഭാവസ്ഥയിൽ നിരന്തരമായി നിരീക്ഷണത്തിനു വിധേയമാവണം. കുട്ടി അപകടാവസ്ഥയിൽ ആണെങ്കിൽ സിസേറിയന് വിധേയമാവാൻ ഡോക്ടർ ആവശ്യപ്പെട്ടേക്കാം.

കോൺട്രാസെപ്റ്റീവ് സ്പോഞ്ച് (Contraceptive Sponge): ഗർഭനിരോധനത്തിന് ഒരു ബാരിയർ രീതി

എന്താണ് കോൺട്രാസെപ്റ്റീവ് സ്പോഞ്ച്?

പുരുഷ ബീജങ്ങളെ യോനിയിലേക്ക് പ്രവേശിക്കാതെ തടയുന്ന (ബാരിയർ മെത്തേഡ്) ഒരു ഗർഭനിരോധന മാർഗമാണ് കോൺട്രാസെപ്റ്റീവ് സ്പോഞ്ച്. ഇത് പോളിയുറേത്തീൻ കൊണ്ട് നിർമ്മിച്ച ചെറിയ താഴികക്കുടത്തിന്റെ രൂപത്തിലുള്ള സ്പോഞ്ച് പോലെയുള്ള ഉപാധിയാണ്. ഇതിൽ ബീജനാശിനിയും അടങ്ങിയിട്ടുണ്ട്. ഉപയോഗിക്കുന്നതിനു മുമ്പ് സ്പോഞ്ച് ശുദ്ധജലത്തിൽ നനയ്ക്കുമ്പോൾ ഇതിലെ ബീജനാശിനി പ്രവർത്തനസജ്ജമാകുന്നു. ഗർഭാശയമുഖത്ത് പാകമാവാൻ തക്കവിധത്തിൽ സ്പോഞ്ചിന്റെ ഒരുവശത്ത് താഴ്ചയും ഉപയോഗ ശേഷം വലിച്ചെടുക്കാനായി മറുവശത്ത് ഒരു കുടുക്കും ഉണ്ടായിരിക്കും.

എങ്ങിനെയാണ് കോൺട്രാസെപ്റ്റീവ് സ്പോഞ്ച് പ്രവർത്തിക്കുന്നത്?

താഴെ പറയുന്ന രീതിയിലാണ് കോൺട്രാസെപ്റ്റീവ് സ്പോഞ്ച് പ്രവർത്തിക്കുന്നത്:

  • സ്പോഞ്ച് ബീജങ്ങളെ ആഗിരണം ചെയ്യുകയും അവയെ ഗർഭാശയത്തിലേക്ക് കടക്കാതെ ഭൗതികമായി തടയുകയും ചെയ്യുന്നു.
  • സ്പോഞ്ചിലെ ബീജനാശിനി ബീജങ്ങളെ നശിപ്പിക്കുന്നു. ബീജനാശിനിക്ക് 24 മണിക്കൂർ ഫലപ്രദമായി പ്രവർത്തിക്കാൻ സാധിക്കും.
  • എങ്ങിനെയാണ് സ്പോഞ്ച് ഉപയോഗിക്കേണ്ടത്?
  • സ്പോഞ്ച് ഒറ്റത്തവണത്തെ ഉപയോഗത്തിനു വേണ്ടിയുള്ളതാണ്.
  • ലൈംഗിക ബന്ധത്തിൽ ഏർപ്പെടുന്നതിനു മുമ്പ് ഇത് യോനിയിൽ കടത്തിവയ്ക്കേണ്ടതാണ്. കുറഞ്ഞത് ആറ് മണിക്കൂർ മുതൽ പരമാവധി 24-30 മണിക്കൂർ വരെ ഇത് മാറ്റാതിരിക്കാം.
  • കൈകൾ സോപ്പ് ഉപയോഗിച്ച് വൃത്തിയായി കഴുകുക. ശുദ്ധജലമുപയോഗിച്ച് സ്പോഞ്ച് നനച്ച് ബീജനാശിനി എല്ലായിടത്തും ഒരേപോലെ വ്യാപിപ്പിക്കുക.
  • മുഴയുള്ള ഭാഗം ഗർഭാശയമുഖത്തിൽ പാകമായിരിക്കുന്ന വിധത്തിൽ സ്പോഞ്ച് യോനിയിലേക്ക് കടത്തിവയ്ക്കുക. മുഴയുള്ള ഭാഗം മുകളിലേക്കും കുടുക്കുള്ള ഭാഗം താഴേക്കുമായിരിക്കുന്ന രീതിയിൽ വേണം പിടിക്കേണ്ടത്. ഇത് യോനിയുടെ പിന്നിലേക്ക് ആകാവുന്നത്ര കടത്തിവയ്ക്കുക.
  • ഗർഭാശയമുഖം മറയ്ക്കുന്ന രീതിയിലാണ് സ്പോഞ്ച് എന്ന് ഉറപ്പുവരുത്താൻ വിരലുകൾ ഉപയോഗിച്ച് സ്പോഞ്ചിന്റെ അരികുകൾ പരിശോധിക്കുക.
  • ഒരിക്കൽ സ്പോഞ്ച് കടത്തിവച്ചാൽ അത് 24 മണിക്കൂർ പ്രവർത്തനക്ഷമമായിരിക്കും. നിങ്ങൾ എത്ര തവണ ബന്ധപ്പെടുന്നു എന്നത് കണക്കിലെടുക്കേണ്ടതില്ല. അവസാനം ബന്ധപ്പെട്ടതിനു ശേഷം ആറ് മണിക്കൂർ ഉള്ളിൽ തന്നെ വയ്ക്കണം. (എന്നാൽ 30 മണിക്കൂറിൽ കൂടുതൽ ഉള്ളിൽ വയ്ക്കാൻ പാടില്ല). ഓരോ ബന്ധപ്പെടലിനു ശേഷവും കൂടുതൽ ബീജനാശിനി ചേർക്കേണ്ടതുണ്ട്.
  • സ്പോഞ്ച് അകത്ത് ഉള്ളപ്പോഴും അവസാനമായി ബന്ധപ്പെട്ടു കഴിഞ്ഞ് ആറ് മണിക്കൂർ നേരത്തേക്കും നിങ്ങൾ യോനി കഴുകുകയോ ഡൗച്ച് ചെയ്യുകയോ അരുത്. സ്പോഞ്ച് നീക്കംചെയ്യുന്നതിന്, കൈകൾ സോപ്പ് ഉപയോഗിച്ച് വൃത്തിയാക്കിയ ശേഷം വിരൽ ഉപയോഗിച്ച് കുടുക്ക് കണ്ടെത്തി സാവധാനത്തിൽ പുറത്തേക്ക് വലിച്ചെടുക്കുക. സ്പോഞ്ച് പുറത്തെടുത്ത ശേഷം സ്പോഞ്ചിന് കുഴപ്പമൊന്നുമില്ല എന്നും അതിന്റെ ഭാഗങ്ങളൊന്നും അകത്ത് പെട്ടുപോയിട്ടില്ല എന്നും ഉറപ്പുവരുത്തുക. അത് മുറിഞ്ഞുപോയിട്ടുണ്ട് എങ്കിൽ ബാക്കി ഭാഗങ്ങൾ യോനിയിൽ നിന്ന് നീക്കംചെയ്യുക. വെളിയിലെടുത്ത ശേഷം സ്പോഞ്ച് ഉപേക്ഷിക്കുക.

സ്പോഞ്ച് എത്രത്തോളം ഫലപ്രദമാണ്?

  • സ്ഥിരമായും തുടർച്ചയായും ഉപയോഗിക്കുമ്പോൾ 89-91% വരെ ഉദ്ദേശിച്ച ഫലം ലഭിച്ചിട്ടുണ്ട്. അതായത്, 100 സ്ത്രീകൾ ഒരു വർഷം തുടർച്ചയായി ഉപയോഗിക്കുമ്പോൾ 9-11പേർ ഗർഭിണികളാവും.
  • സാധാരണയായി, 84 – 87% വരെയാണ് ഫലസിദ്ധി.
  • പ്രസവിച്ച സ്ത്രീകളിൽ ഫലസിദ്ധി കുറവാണ് (68-80%).
  • സ്പോഞ്ചിനൊപ്പം കോണ്ടവും ഉപയോഗിച്ചപ്പോൾ ഫലസിദ്ധി 97-99% ആയി ഉയർന്നതായി കണ്ടെത്തിയിട്ടുണ്ട്.

സ്പോഞ്ച് ലൈംഗികജന്യ രോഗങ്ങളെ തടയുമോ?

സ്പോഞ്ച് ലൈംഗികജന്യ രോഗങ്ങളെ (എസ്ടിഡി) തടയില്ല. ലൈംഗികജന്യ രോഗങ്ങൾ പകരുന്നത് തടയാൻ ലൈംഗിക ബന്ധത്തിൽ ഏർപ്പെടുമ്പോൾ കോണ്ടം ഉപയോഗിക്കേണ്ടത് അത്യാവശ്യമാണ്.

കോൺട്രാസെപ്റ്റീവ് സ്പോഞ്ചിന്റെ നേട്ടങ്ങളും കോട്ടങ്ങളും എന്തൊക്കെ?

നേട്ടങ്ങൾ

  • ഡോക്ടറുടെ നിർദേശമില്ലാതെ ഉപയോഗിക്കാം.
  • സ്ഥിരമായി വയ്ക്കേണ്ട കാര്യമില്ല.
  • 24 മണിക്കൂർ ഉപയോഗിക്കാൻ കഴിയും, ഇതിനിടെ പലതവണ ലൈംഗികബന്ധത്തിൽ ഏർപ്പെടാം.
  • എളുപ്പത്തിൽ തിരിച്ചാക്കാവുന്ന രീതി.
  • താരതമ്യേന സുരക്ഷിതമായത് (ലൈംഗികബന്ധത്തിനു മുമ്പ് യോനിയിൽ കടത്തിവയ്ക്കാം).

കോട്ടങ്ങൾ

  • സംരക്ഷണത്തിന്റെ കാലയളവ് കുറച്ചു സമയത്തേക്ക് മാത്രമാണ് – മറ്റ് ദീർഘകാല മുൻകരുതലുകളെ അപേക്ഷിച്ച് നോക്കുമ്പോൾ 24 മണിക്കൂർ വരെ മാത്രമാണ് സംരക്ഷണം.
  • മറ്റ് ചില മാർഗങ്ങളെ അപേക്ഷിച്ച് ഫലപ്രാപ്തി കുറവാണ്.
  • ലൈംഗികജന്യ രോഗങ്ങളെ പ്രതിരോധിക്കുകയില്ല.
  • കൂടുതൽ സമയം യോനിക്കുള്ളിൽ വച്ചിരുന്നാൽ യീസ്റ്റ് അണുബാധയ്ക്കുള്ള സാധ്യത കൂടുതലാണ്.

കോൺട്രാസെപ്റ്റീവ് സ്പോഞ്ചിനുള്ള പാർശ്വഫലങ്ങളും അപകടസാധ്യതകളും എന്തൊക്കെ?

  • ചില സ്ത്രീകൾക്ക് യോനീവരൾച്ചയും അസ്വസ്ഥതയും ഉണ്ടായേക്കാം.
  • ചിലസ്ത്രീകളിൽ അലർജിയുണ്ടായേക്കാം.
  • സ്പോഞ്ച് യോനീ കോശകലകൾ പോലെ തോന്നുമെന്നതിനാൽ അത് നീക്കം ചെയ്യുമ്പോൾ ചില സ്ത്രീകൾക്ക് ബുദ്ധിമുട്ട് അനുഭവപ്പെട്ടേക്കാം.
  • ചിലയവസരങ്ങളിൽ, സ്പോഞ്ച് ഗർഭാശയമുഖത്ത് പറ്റിച്ചേർന്നു പോയേക്കാം. ഈ അവസരത്തിൽ വിരൽ ഉപയോഗിച്ച് സ്പോഞ്ച് ഗർഭാശയമുഖത്തു നിന്ന് ഇളക്കേണ്ടതുണ്ട്. അതിനു ശേഷം ലൂപ് ഉപയോഗിച്ച് സ്പോഞ്ച് പുറത്തേക്ക് വലിച്ചെടുക്കണം. (സ്പോഞ്ച് അല്ലെങ്കിൽ സ്പോഞ്ചിന്റെ കഷണങ്ങൾ യോനിയിൽ അകപ്പെട്ടുപോവുകയും അത് പുറത്തെടുക്കാൻ കഴിയാതെ വരികയും ചെയ്താൽ നിങ്ങൾ ആരോഗ്യ വിദഗ്ധരുടെ അഭിപ്രായം തേടുക.)
  • സ്പോഞ്ച് നിർദ്ദിഷ്ട സമയത്തിൽ കൂടുതൽ അകത്തു വച്ചിരുന്നാൽ അപൂർവമായി ഉണ്ടായേക്കാവുന്ന ഒരു സങ്കീർണതയാണ് ‘ടോക്സിക് ഷോക്ക് സിൻഡ്രോം’ (പെട്ടെന്നുണ്ടാവുന്ന കടുത്ത പനി, തടിപ്പുകൾ, ഛർദി അല്ലെങ്കിൽ അതിസാരം, ശരീരവേദന, തലകറക്കം, ദുർബലത, മയക്കം തുടങ്ങിയവ ലക്ഷണങ്ങളിൽ ഉൾപ്പെടും)

ആർത്തവ സമയത്ത് യോഗ ചെയ്യാമോ (Yoga During Periods)?

ഭാരതത്തിൽ പിറന്ന യോഗ ഇന്ന്  ലോകമെമ്പാടും അംഗീകരിക്കപ്പെട്ടിരിക്കുന്നു. ഫിറ്റ്‌നെസ്, ഫാഷൻ, രോഗങ്ങൾ, പിരിമുറുക്കം, ആത്മീയതയോടുള്ള അടുപ്പം തുടങ്ങി വിവിധങ്ങളായ ലക്ഷ്യങ്ങളും കാരണങ്ങളും മൂലമാണ് സ്ത്രീകളും പുരുഷന്മാരും യോഗയിലേക്ക് ആകൃഷ്ടരാവുന്നത്.

പുരുഷന്മാരെക്കാൾ കൂടുതൽ സ്ത്രീകളാണ് യോഗയിലേക്ക് ആകൃഷ്ടരാവുന്നതെന്ന് ഒരു പഠനത്തിൽ പറയുന്നു. മകൾ, സഹോദരി, ഭാര്യ, മരുമകൾ, അമ്മ അങ്ങനെ ജീവിതത്തിൽ സ്ത്രീകൾക്കുള്ള വ്യത്യസ്തങ്ങളായ വേഷങ്ങൾ മൂലമാവാം ഇത്. ഇന്നത്തെ സ്ത്രീകൾ വീട്ടുജോലികളിൽ മാത്രം ഒതുങ്ങിക്കൂടാതെ തൊഴിലും സ്വന്തം താല്പര്യങ്ങളും നേടാൻ പ്രാപ്തി നേടിയതും ഇതിനു കാരണമാകാം.

സ്ത്രീകൾക്ക് ജോലിസ്ഥലത്തും വീട്ടിലും സ്വന്തം ഉത്തരവാദിത്വങ്ങൾ ഭംഗിയായി നിറവേറ്റുന്നതിന് അപാരമായ ക്ഷമ അത്യാവശ്യമാണ്. ഇവിടെ യോഗ ഒരു സ്വാന്തനമാവും. എന്നാൽ, അവർക്ക് സന്തുലിതാവസ്ഥ നഷ്ടമാവുന്ന സമയങ്ങളും ഉണ്ടാകാം. ആർത്തവം അഥവാ മെൻസസ് ഇത്തരമൊരു അവസരമാണ്. ആർത്തവത്തിന്റെ 3-5 ദിവസങ്ങളിൽ ഒരു സ്ത്രീക്ക് ശാരീരികവും (ക്ഷീണം, പുറംവേദന, കോച്ചിപ്പിടുത്തം) മാനസികവുമായ (നിരാശ, കോപം, അസ്വസ്ഥത) അസ്വസ്ഥതകൾ ഉണ്ടായേക്കാം. ആർത്തവം ഉള്ള  അവസരത്തിൽ യോഗ ചെയ്യുന്നതുമായി ബന്ധപ്പെട്ട് ചില ചോദ്യങ്ങൾ ഉയരാം. ഈ സമയത്ത് യോഗ ചെയ്യുന്നത് സുരക്ഷിതമാണോ? അങ്ങിനെ ചെയ്താൽ പ്രശ്നങ്ങളൊന്നും ഉണ്ടാവില്ലേ? യോഗ ചെയ്യുമ്പോൾ വേദന വർദ്ധിക്കുമോ? തുടങ്ങിയ ചോദ്യങ്ങൾ സാധാരണ പ്രതീക്ഷിക്കാവുന്നതാണ്.

ഇതിനുള്ള ഉത്തരം എപ്പോഴും വിവാദവിഷയമാണ്. ചില ശാഖകൾ ഇതിനെ ശരിവയ്ക്കുമ്പോൾ മറ്റു ചിലർ ഇത് ശക്തമായി എതിർക്കുന്നു. എന്നാൽ, ശരിയായ അഭ്യാസങ്ങൾ ശരിയായ രീതിയിൽ ചെയ്താൽ ആർത്തവസമയത്ത് യോഗ മൂലം ഒരു ദോഷവും ഉണ്ടാവില്ല. യോഗാഭ്യാസങ്ങൾ ചെയ്യുന്നതിനു മുമ്പ് ചില പ്രധാനപ്പെട്ട കാര്യങ്ങൾ ശ്രദ്ധിക്കേണ്ടതുണ്ട്.

  • യോഗ ചെയ്യുമ്പോൾ ആയാസപ്പെടരുത്.
  • ആരോഗ്യ പ്രശ്നങ്ങൾ (പുറം വേദന, കഴുത്ത് വേദന..തുടങ്ങിയവ) ഉണ്ടെങ്കിൽ ശ്രദ്ധിക്കണം.
  • അമിത രക്തസ്രാവമുണ്ടെങ്കിൽ യോഗ ചെയ്യരുത്.
  • ശീർഷാസനം, സർവാംഗാസനം, കപാലബതി (ശ്വസന വ്യായാമം) ബന്ധ യോഗകൾ തുടങ്ങിയവ ആർത്തവ സമയത്ത് ഒഴിവാക്കണം.

ആർത്തവ സമയത്ത് ചെയ്യാവുന്ന യോഗാഭ്യാസങ്ങൾ;

പദ്മാസനം (താമരയുടെ സ്ഥിതി):  കാലുകൾ നീട്ടിവച്ച് തറയിൽ നിവർന്ന് ഇരിക്കുക. നിങ്ങളുടെ വലത് കാൽ മടക്കി ഉപ്പൂറ്റി ഇടത് തുടയിൽ വയ്ക്കുക. ഇതേപോലെ, ഇടതുകാൽ മടക്കി ഇടത്തെ ഉപ്പൂറ്റി വലത് തുടയിൽ വയ്ക്കുക. ഈ സ്ഥിതിയാണ് പദ്മാസനം.

വജ്രാസനം (വജ്രത്തിന്റെ സ്ഥിതി): കാലുകൾ മുന്നോട്ട് നീട്ടി നിവർന്ന് ഇരിക്കുക. ആദ്യം നിങ്ങളുടെ വലതു കാലും പിന്നീട് ഇടതു കാലും പിന്നോട്ട് മടക്കി ഉപ്പൂറ്റികൾ രണ്ടും പൃഷ്ഠത്തിനടിയിലാക്കുക. കാൽപ്പാദങ്ങൾ തമ്മിൽ കൂട്ടിമുട്ടണം, പക്ഷേ തമ്മിൽ പിണഞ്ഞ അവസ്ഥയിലാവരുത്. ഉപ്പൂറ്റികൾ രണ്ടിന്റെയും ഇടയിലൂടെ പൃഷ്ഠം തറയിൽ മുട്ടണം. ഈ അവസ്ഥയിൽ കൈകൾ മുട്ടിൽ വച്ച് ദീർഘമായി ശ്വാസോച്ഛ്വാസം നടത്തുക. ഇതാണ് വജ്രാസനം.
ജാനുശീർഷാസനം (തല മുട്ടിലേക്ക് മുട്ടിച്ച് മുന്നോട്ട് വളയുന്ന സ്ഥിതി): തറയിൽ കാലുകൾ നിവർത്തി ഇരിക്കുക. ഇടതുകാൽ മടക്കി പാദം തുടയുടെ മധ്യഭാഗത്തായി വയ്ക്കുക. പതുക്കെ മുന്നോട്ടു വളഞ്ഞ് വലത് പാദത്തിൽ പിടിക്കാൻ ശ്രമിക്കുക. ഇതോടൊപ്പം വലത് കാൽമുട്ടിൽ സ്പർശിക്കാനും ശ്രമിക്കണം. കഴിയുന്നിടത്തോളം ഈ സ്ഥിതിയിൽ തുടർന്ന ശേഷം പഴയ സ്ഥിതിയിലേക്ക് മടങ്ങുക. തുടക്കത്തിൽ അധികം സമ്മർദം നൽകാതിരിക്കാൻ ശ്രദ്ധിക്കണം.

പശ്ചിമോത്തനാസനം (ഇരുന്നുകൊണ്ട് മുന്നോട്ടു വളയുന്ന സ്ഥിതി): കാലുകൾ നിവർത്തി തറയിൽ ഇരിക്കുക. പതുക്കെ ശരീരം മുന്നോട്ടു വളച്ച് പാദങ്ങളിൽ പിടിക്കാൻ ശ്രമിക്കുക. ഈ അവസരത്തിൽ, മുട്ടു പൊന്തിക്കാതെ തല മുട്ടുകളിൽ മുട്ടിക്കാൻ ശ്രമിക്കുക. ശ്വാസോച്ഛ്വാസം സാധാരണഗതിയിലായിരിക്കണം. ഈ അവസ്ഥയിൽ കഴിയുന്നത്ര തുടരുക.

ബദ്ധകോണാസനം (ശലഭ സ്ഥിതി): ശരീരം ലംബമാക്കി കാലുകൾ നിവർത്തി ഇരിക്കുക. മുട്ട് മടക്കി പാദങ്ങൾ ചേർത്തുവച്ച ശേഷം കണങ്കാലിൽ പിടിക്കുക. കാൽമുട്ടുകൾ നിലത്ത് മുട്ടിയിരിക്കണം. ശ്വാസോച്ഛ്വാസത്തിന്റെ വേഗത കുറച്ച് ഈ സ്ഥിതിയിൽ അല്പനേരം തുടരുക.

ഇതേപോലെ, ആർത്തവ സമയത്ത് പ്രാണായാമവും റിലാക്സേഷൻ ടെക്നിക്കുകളും ചെയ്യാവുന്നതാണ്.

യോഗ ചെയ്യുന്നതു മൂലം ദോഷ ഫലങ്ങൾ ഉണ്ടാകില്ല എങ്കിലും വൈദഗ്ധ്യം നേടിയവരുടെ മേൽനോട്ടത്തിൽ അഭ്യസിക്കുന്നത് അനുയോജ്യമായിരിക്കും. ആരോഗ്യപരമായ എന്തെങ്കിലും പ്രശ്നങ്ങൾ (പുറം വേദന, കഴുത്ത് വേദന, ശസ്ത്രക്രിയ…തുടങ്ങിയവ) ഉണ്ടെങ്കിൽ അത്  നിങ്ങളെ യോഗ പരിശീലിപ്പിക്കുന്നവരെ അറിയിക്കാൻ മറക്കരുത്

പാപ് പരിശോധന (Pap Test) ഗർഭാശയഗള ക്യാൻസർ നേരത്തെ കണ്ടെത്തും

എന്താണ് പാപ് സ്മിയർ?

ഗർഭാശയഗള ക്യാൻസർ കണ്ടെത്താനുള്ള പരിശോധനയാണ് പാപ് സ്മിയർ അഥവാ പാപ് പരിശോധന. ഗർഭപാത്രത്തിൽ അസ്വാഭിക കോശങ്ങൾ (ക്യാൻസർ കോശങ്ങളോ ക്യാൻസർ കോശങ്ങളായി പരിണമിച്ചേക്കാവുന്ന കോശങ്ങളോ) ഉണ്ടോ എന്ന് ഈ പരിശോധനയിലൂടെ അറിയാം. ഹ്യൂമൻ പാപ്പിലോമ വൈറസ് കാരണമാണ് (എച്ച് പി വി) ഗർഭാശയഗള ക്യാൻസർ ഉണ്ടാവുന്നത്. ഇത് ലൈംഗികബന്ധത്തിലൂടെയാണ് പകരുന്നത്.

പാപ് സ്മിയർ പരിശോധന എങ്ങിനെ?

  • പരിശോധനയ്ക്ക് വിധേയയാവുന്ന സ്ത്രീയെ പരിശോധനാ മേശയിൽ മലർത്തി കിടത്തുന്നു.
  • ഗർഭപാത്രത്തിന്റെ കാഴ്ചയ്ക്കായി ഡോക്ടർ ഒരു സ്പെകുലം (speculum) ഉപയോഗിച്ച് യോനി വിടർത്തുന്നു
  • തടിയുടെയോ മരത്തിന്റെയോ സ്ക്രാപ്പർ അല്ലെങ്കിൽ ബ്രഷ് ഉപയോഗിച്ച് ഗർഭാശയ കോശങ്ങൾ ചുരണ്ടിയെടുക്കുന്നു.
  • സാമ്പിള്‍ പാപ് വിശകലനത്തിന് അയക്കുന്നു.

വസ്തിപ്രദേശത്ത് നടത്തുന്ന ഒരു സാധാരണ പരിശോധനയാണ് പാപ് സ്മിയർ. പാപ് പരിശോധന വേദനയുളവാക്കുന്നതല്ല. എന്നാൽ, പരിശോധയ്ക്ക് ശേഷം ചെറിയ തടിപ്പോ രക്തത്തിന്റെ അംശമോ കണ്ടേക്കാം.

പാപ് സ്മിയർ പരിശോധന നടത്തണമെന്ന് പറയുന്നത് എന്തുകൊണ്ട്?

ആദ്യഘട്ടത്തിൽ തന്നെ ഗർഭാശയ ക്യാൻസർ നിര്‍ണ്ണയിക്കുന്നതിനാണ് പാപ് സ്മിയർ. പിന്നീട് ക്യാൻസർ  കോശങ്ങളാവാൻ സാധ്യതയുള്ള അസ്വാഭാവിക കോശങ്ങളുടെ സാന്നിദ്ധ്യം കണ്ടെത്താനും ഈ പരിശോധന സഹായിക്കുന്നു. ശരിയായ ഇടവേളകളിൽ പാപ് സ്മിയർ നടത്തിയാൽ ആകസ്മികമായി ഉണ്ടായേക്കാവുന്ന ഗർഭാശയഗള ക്യാൻസറിനെ പ്രതിരോധിക്കാനും അതുവഴി സ്ത്രീകളുടെ ജീവൻ രക്ഷിക്കാനും കഴിയും.

ആർക്കൊക്കെയാണ് പാപ് ചെയ്യേണ്ടത്?

സാധാരണ ആരോഗ്യ പരിശോധനാ വേളകളിൽ 21-65 വയസ്സ് പ്രായമുള്ള എല്ലാ സ്ത്രീകളും പാപ് പരിശോധനയും നടത്തേണ്ടതാണ്. ലൈംഗികപരമായി സജീവമല്ലാത്ത സ്ത്രീകളും ആർത്തവ വിരാമം സംഭവിച്ചവർ ഉൾപ്പെടെ 65 വയസ്സിനു താഴെ പ്രായമുള്ള എല്ലാ സ്ത്രീകളും പാപ് പരിശോധന നടത്തണം. പാപ് പരിശോധന സംബന്ധിച്ച് കൂടുതൽ സംശയങ്ങളുണ്ടെങ്കിൽ നിങ്ങളുടെ ഡോക്ടറുമായി ചർച്ച ചെയ്യുക.

പാപ് പരിശോധന ആവശ്യമില്ലാത്തത് ആർക്കൊക്കെ?

ഇനി പറയുന്ന വിഭാഗത്തിലുള്ള സ്ത്രീകൾക്ക് സ്ഥിരമായി പാപ് പരിശോധന നടത്തേണ്ടതില്ല;

  • ഗർഭാശയഗള ക്യാൻസറിന് സാധ്യതയില്ലാത്ത, ഗർഭപാത്രം നീക്കം ചെയ്ത സ്ത്രീകൾ അല്ലെങ്കിൽ പാപ് ഫലത്തിൽ അസ്വാഭാവികതയില്ലാത്തവർ.
  • തുടർച്ചയായ മൂന്ന് പാപ് പരിശോധനയിലും കഴിഞ്ഞ പത്ത് വർഷമായി നടത്തിയ പരിശോധനകളിലും അസ്വാഭാവികത കണ്ടെത്താൻ കഴിയാത്ത 65 വയസ്സ് കഴിഞ്ഞ സ്ത്രീകൾ.

പാപ് പരിശോധനയുടെ ഇടവേളകൾ?

ഇരുപത്തിയൊന്നിനും അറുപത്തിയഞ്ചിനും ഇടയിൽ പ്രായമുള്ള സ്ത്രീകൾക്ക് ഓരോ മൂന്ന് വർഷം കൂടുമ്പോഴും പാപ് പരിശോധന ശുപാർശചെയ്തേക്കാം. എച്ച് പി വി പരിശോധനയും ഇതോടൊപ്പം ചെയ്താൽ, മുപ്പതിനും അതിനു മുകളിലും പ്രായമുള്ള സ്ത്രീകൾക്ക് അഞ്ച് വർഷത്തിൽ ഒരിക്കൽ എന്ന നിലയിൽ പാപ് പരിശോധന നടത്തിയാൽ മതിയാവും. ഇനി പറയുന്ന അപകടസാധ്യതാ ഘടകങ്ങളുള്ള സ്ത്രീകൾക്ക് പ്രായം കണക്കിലെടുക്കാതെ അടിക്കടി പാപ് പരിശോധന വേണ്ടിവരും;

  • പാപ് പരിശോധനാ ഫലത്തിൽ ക്യാൻസർ കോശങ്ങളായി പരിണമിക്കാവുന്ന കോശങ്ങൾ കണ്ടെത്തുകയോ ഗർഭാശയ ഗള ക്യാൻസർ നിർണ്ണയിക്കപ്പെടുകയോ ചെയ്താൽ.
  • ഗർഭധാരണ കാലത്ത് ഡൈഈതൈൽസ്‌റ്റില്‍ബസ്‌ത്രോള്‍ (Diethylstilbestrol) ചികിത്സ ലഭിച്ചവർ.
  • പ്രതിരോധശക്തി കുറഞ്ഞവർ.
  • എച്ച് ഐ വി അണുബാധയുള്ളവർ.

പാപ് പരിശോധനയ്ക്ക് എങ്ങനെയാണ് തയ്യാറാവുന്നത്?

ആര്‍ത്തവ ചക്രത്തിന്‍റെ രണ്ടാം പകുതിയില്‍ (പതിനാലാം ദിവസം) ഈ പരിശോധന നടത്തണം. ഇതിനായി;

  • പരിശോധനയ്ക്ക് രണ്ട് ദിവസം മുമ്പു മുതലെങ്കിലും ലൈംഗികബന്ധവും ഡൗച്ചിംഗും ഒഴിവാക്കണം.
  • യോനിയിൽ ക്രീമുകൾ, മരുന്നുകൾ, കുഴമ്പുകൾ എന്നിവ പുരട്ടാതിരിക്കുക.
  • കഴിവതും ആര്‍ത്തവ സമയങ്ങളില്‍ പാപ് പരിശോധനയ്ക്ക് വിധേയരാവാതിരിക്കുക.
  • ടാമ്പൂണുകൾ ഉപയോഗിക്കാതിരിക്കുക.

പാപ് പരിശോധനാ ഫലങ്ങൾ

മിക്കപ്പോഴും പരിശോധനാ ഫലത്തിൽ പ്രശ്നങ്ങളൊന്നുമുണ്ടാവില്ല. എന്നാൽ, ഫലത്തിൽ അസ്വാഭാവികതയുണ്ടെങ്കിൽ ഡോക്ടർ പരിശോധന ആവർത്തിക്കുകയും കൂടുതൽ പരിശോധനകൾ നിർദേശിക്കുകയും ചെയ്തേക്കാം. ഫലം അസ്വാഭാവികമായാൽ എല്ലാ അവസരത്തിലും ക്യാൻസർ ആണെന്ന് അർത്ഥമാക്കേണ്ടതില്ല. ചില അസ്വാഭാവിക കോശങ്ങൾ ക്യാൻസർ ആയി മാറിയേക്കാം. അസ്വാഭാവിക കോശങ്ങൾക്ക് ചികിത്സ നൽകി മിക്കവാറും എല്ലാ ഗർഭാശയ ഗള ക്യാൻസറുകളും തടയാൻ കഴിയും. ഗൗരവമുള്ള റിപ്പോർട്ടുകൾക്ക് ഡോക്ടർ എറ്റവും മികച്ച പരിശോധന നിർദേശിക്കും.

തെറ്റായ പോസിറ്റീവുകൾ: ചിലപ്പോൾ അസ്വാഭാവിക കോശങ്ങൾ ഇല്ല എങ്കിലും റിപ്പോർട്ട് പോസിറ്റീവ് ആകാറുണ്ട്. ഗർഭനിരോധന ഗുളികകൾ ഉപയോഗിക്കുന്ന സ്ത്രീകളുടെ പരിശോധനാഫലത്തിലാണ് ഇതുണ്ടാവുക.

തെറ്റായ നെഗറ്റീവുകൾ: മറ്റുചിലപ്പോൾ അസ്വാഭാവിക കോശങ്ങൾ ഉണ്ടെങ്കിലും റിപ്പോർട്ട് നെഗറ്റീവ് ആയിരിക്കും. ഇത് ഇനി പറയുന്ന കാരണങ്ങൾകൊണ്ടാവാം;

  • ടെക്നീഷ്യന്മാർ കോശങ്ങൾ ശരിയായ വിധത്തിൽ കൈകാര്യം ചെയ്യാത്തതു മൂലം.
  • കോശങ്ങൾ സംഭരിച്ച സ്ലൈഡ് വളരെ കൂടുതൽ സമയം വായുവുമായി സമ്പർക്കത്തിലായാൽ.
  • ബാക്ടീരിയ അല്ലെങ്കിൽ യീസ്റ്റ് മൂലം കോശങ്ങൾ മലിനപ്പെട്ടാൽ.
  • മാനുഷികമായ തെറ്റുകൾ മൂലം.

ഇത്തരം നെഗറ്റീവുകൾ അടുത്ത പാപ് പരിശോധനയിൽ കണ്ടെത്താൻ കഴിഞ്ഞേക്കും.

 

എന്താണ് യോനീവരൾച്ച (Vaginal Dryness)? എപ്പോഴാണ് ഡോക്ടറെ കാണേണ്ടത്?

എന്താണ് യോനീവരൾച്ച?

ഏതു പ്രായത്തിലുള്ള സ്ത്രീകളെയും യോനീവരൾച്ച ബാധിക്കാം. എന്നാൽ, സാധാരണയായി ആർത്തവ വിരാമം സംഭവിച്ചവരിലാണ് ഇതു കണ്ടുവരുന്നത്.

സ്ത്രീകളിൽ കണ്ടുവരുന്ന സാധാരണ ലക്ഷണങ്ങളിലൊന്നാണ്. ലോകത്താകമാനം ഏകദേശം 5.8% മുതൽ 19.7% വരെ സ്ത്രീകൾക്ക് യോനീവരൾച്ച പ്രശ്നമാകുന്നുണ്ട്.

ലൈംഗികതയ്ക്കുള്ള ആഗ്രഹത്തെയും അതിന്റെ ആസ്വാദ്യതയെയും ഇത് കെടുത്തി കളഞ്ഞേക്കാം.

എന്താണ് യോനീവരൾച്ചയ്ക്ക് കാരണം?

സത്രീകളിലെ ഈസ്ട്രജൻ ഹോർമോൺ നില വജിനൽ അസിഡിറ്റിയെയും വഴുവഴുപ്പിനെയും ഇലാസ്തികതയെയും  സ്വാധീനിക്കുന്നു..

ഈസ്ട്രജൻ നില കുറയുന്നതാണ് യോനീവരൾച്ചയുടെ ഒരു പ്രധാന കാരണം

താഴെ പറയുന്ന കാരണങ്ങളാൽ ഈസ്ട്രജൻ നില കുറഞ്ഞേക്കാം:

  • ആർത്തവ വിരാമം
  • പെരി-മെനോപോസ് (ആർത്തവ അണ്ഡാശയങ്ങൾ ശസ്ത്രക്രിയയിലൂടെ നീക്കം ചെയ്യൽ.
  • ലൈംഗിക ഉത്തേജനമില്ലായ്മ
  • ലൈംഗിക ഉത്തേജനമില്ലായ്മ
  • പ്രസവം
  • മുലയൂട്ടൽ
  • അമിതമായ പുകവലി
  • അണ്ഡാശയങ്ങളെ ബാധിക്കുന്ന രീതിയിലുള്ള കീമോതെറാപ്പി
  • ഈസ്ട്രജൻ-പ്രതികൂല മരുന്നുകൾ ഉപയോഗിക്കുന്നത്

വജിനൽ ഡൗച്ചിംഗ് (വെള്ളം ചീറ്റിച്ച് യോനി കഴുകൽ)

ചികിത്സ തേടേണ്ടത് എപ്പോൾ ?

യോനീവരൾച്ച നിങ്ങൾക്ക് ശാരീരിക വൈഷമ്യങ്ങൾ സൃഷ്ടിക്കുകയോ ലൈംഗിക ജീവിതത്തെ പ്രതികൂലമായി ബാധിക്കുകയോ  ചെയ്താൽ ചികിത്സക്കായി ഡോക്ടറെ സന്ദർശിക്കാം.

വജിനൽ ഡൗച്ചിംഗ് ഒഴിവാക്കിയും സോപ്പിന്റെ ഉപയോഗം പരിമിതപ്പെടുത്തിയും ലൈംഗിക പൂർവകേളികൾക്ക് കൂടുതൽ സമയം നൽകിയും (പരമാവധി വഴുവഴുപ്പ് സൃഷ്ടിക്കാൻ ബർത്തോലിൻസ് ഗ്രന്ഥിയെ അനുവദിക്കുക) മറ്റും യോനീവരൾച്ചയെ പ്രതിരോധിക്കാൻ സഹായിക്കും.

ഇതിനായി ഡോക്ടർ ഇനി പറയുന്ന കാര്യങ്ങൾ ശുപാർശ ചെയ്തേക്കാം;

  • ലോക്കൽ ഈസ്ട്രജൻ: ഗുളികകൾ, ക്രീമുകൾ, പെസ്സറി (ഗർഭനിരോധന ഉപാധികൾ ) എന്നിവയുടെ രൂപത്തിൽ ഈസ്ട്രജൻ യോനിയിൽ കടത്തിവയ്ക്കാൻ നിർദേശിച്ചേക്കാം. ഇത് യോനിയുടെ പിഎച്ച് നില നിയന്ത്രിക്കാനും വരൾച്ച കുറയ്ക്കാനും സഹായിക്കും.
  • ലൂബ്രിക്കന്റുകൾ: ഈസ്ട്രജൻ നൽകാൻ ബുദ്ധിമുട്ടുള്ള കേസുകളിൽ ലൂബ്രിക്കന്റുകൾ ഉപയോഗിക്കാനാവും നിർദേശിക്കുക. എല്ലാ തവണയും ലൈംഗിക ബന്ധത്തിൽ ഏർപ്പെടുന്നതിനു മുമ്പ് ഇത് പുരട്ടണം. കെ വൈ (KY) ജെല്ലി, വജിനൽ മോയിസ്ചറൈസറുകൾ, വാസ്ലിൻ പോലെയുള്ള പെട്രോളിയം ഉത്പന്നങ്ങൾ എന്നിവ ലൂബ്രിക്കന്റുകൾക്ക് ഉദാഹരണമാണ്.

 

സ്ത്രീ സ്തനങ്ങളുടെ ഘടനയെ കുറിച്ച് (Anatomy Of Female Breast) അറിയാം

ലൈംഗികപരമായി സ്ത്രീകളുടെ ആകര്‍ഷണീയത വര്‍ദ്ധിപ്പിക്കുന്ന അവയവമാണല്ലോ സ്തനങ്ങൾ. ഇവയുടെ ഘടനയെ കുറിച്ചും പ്രവർത്തനത്തെ കുറിച്ചും എല്ലാവരും അറിഞ്ഞുകൊള്ളണമെന്നില്ല. സ്തനങ്ങൾ എന്താണെന്നും അവയുടെ പ്രാഥമിക ധർമ്മത്തെ കുറിച്ചുമാണ് ഇവിടെ വിവരിക്കുന്നത്. പുരുഷന്മാര്‍ക്കും സ്ത്രീകള്‍ക്കും സ്തനകലകൾ (breast tissues) ഉണ്ട്. സ്ത്രീകളുടെ സ്തനങ്ങള്‍ക്ക് പുരുഷന്മാരുടെതിനെക്കാൾ മുഴച്ചുനില്‍ക്കുന്ന ഘടനയാണുള്ളത്. സ്ത്രീകളുടെ സ്തനങ്ങൾ പാല്‍ ചുരത്തുന്നതിനുള്ള അവയവം എന്നതിനു പുറമെ ഒരു ദ്വിതീയ ലൈംഗിക അവയവമായും പ്രവർത്തിക്കുന്നു.

കണ്ണുനീര്‍ത്തുള്ളിയുടെ രൂപത്തില്‍ നെഞ്ചിനു മുൻഭാഗത്തായി വ്യാപിച്ചു കിടക്കുന്ന ഗ്രന്ഥികളാണ് സ്ത്രീകളുടെ സ്തനങ്ങള്‍. ഇവ തോളെല്ലിനു തൊട്ടു താഴെ നിന്നു തുടങ്ങി വാരിയെല്ലുകൾക്കു മുകളിലേക്ക് (രണ്ടാം വാരിയെല്ല് മുതല്‍ ആറ് അല്ലെങ്കില്‍ ഏഴാമത്തെ വാരിയെല്ല് വരെ) വ്യാപിച്ചുകിടക്കുന്നു. തിരശ്ചീനമായി,  മാറെല്ലിന് അരികിൽ നിന്ന് തുടങ്ങി കക്ഷം വരെ വ്യാപിച്ചുകിടക്കുന്നു. സ്തനങ്ങളുടെ ചുവട് ഭാഗം വൃത്താകൃതിയിലുള്ളതും ഏകദേശം 10 – 12 സി.എം. വരെ വലിപ്പമുള്ളതും ആയിരിക്കും. എന്നാൽ, സ്തനങ്ങളുടെ ആകൃതിയും അളവും ഒരേപോലെയാവണമെന്നില്ല.

ഭ്രൂണവളര്‍ച്ചയുടെ ആറാമത്തെ ആഴ്ചമുതല്‍ ജനനത്തിനുള്ള വികാസപരിണാമങ്ങള്‍ തുടങ്ങിയിരിക്കും. ജനന സമയത്ത് ആണിന്റെയും പെണ്ണിന്റെയും സ്തനങ്ങൾ ഒരുപോലിരിക്കും. ഈസ്‌ട്രജന്‍, പ്രോജെസ്റ്ററോണ്‍ എന്നീ ഹോര്‍മോണുകളുടെ പ്രവര്‍ത്തനഫലമായി യൗവനാരംഭത്തോടു കൂടി പെണ്‍കുട്ടികളില്‍ സ്തനങ്ങള്‍ വികാസം പ്രാപിച്ചു തുടങ്ങും.

സാധാരണഗതിയില്‍ സ്ത്രീകളുടെ സ്തനങ്ങള്‍ ഒരുപോലെയായിരിക്കില്ല. ഒരു സ്തനം മറ്റതിനെക്കാൾ വലുതോ ചെറുതോ ആയിരിക്കാം. അതേപോലെ, ഒന്ന് അടുത്തതിനെക്കാൾ ഉയര്‍ന്നു നില്‍ക്കുന്നതോ താഴ്ന്നു കിടക്കുന്നതോ ആകൃതിയിൽ വ്യത്യസ്തമോ ആയിരിക്കാം.

കുട്ടികളില്ലാത്ത ചെറുപ്പക്കാരികളുടെ സ്തനങ്ങള്‍ സാധാരണയായി അര്‍ദ്ധവൃത്താകൃതിയിലാണ് കാണപ്പെടുക, അതേ സമയം പ്രസവിച്ച സ്ത്രീകളുടേത് താരതമ്യേന വലുതും അയഞ്ഞു കിടക്കുന്നതുമായിരിക്കും. വൃദ്ധകളെ സംബന്ധിച്ചിടത്തോളം സ്തനങ്ങളുടെ വ്യാപ്തി ചുരുങ്ങി ബലമില്ലാതെ അയഞ്ഞു തൂങ്ങിക്കിടക്കുന്ന തരത്തിലായിരിക്കും. സാധാരണഗതിയിൽ, സ്തനങ്ങളുടെ ഭാരം 150 ഗ്രാം മുതല്‍ 225 ഗ്രാം വരെയായിരിക്കും. എന്നാൽ, മുലയൂട്ടുന്ന സമയത്ത് പാൽ നിറഞ്ഞ സ്തനങ്ങളുടെ ഭാരം 500 ഗ്രാമില്‍ കൂടുതലായിരിക്കും. മുലഞെട്ടിന്റെ വലിപ്പവും ഓരോ സ്ത്രീകളിലും വ്യത്യസ്തമായിരിക്കും.

സ്തനത്തിന്റെ ഘടന

സ്തനത്തില്‍ ഗ്രന്ഥികളും കണക്ടീവ് ടിഷ്യൂകളും കൊഴുപ്പും സന്ധിബന്ധങ്ങളും, രക്തക്കുഴലുകളും, നാഡികളും, ലിംഫാറ്റിക് സംവിധാനങ്ങളും ഉൾക്കൊള്ളുന്നു.

സ്തനത്തിനു ചുറ്റും ഒരു പാളി കൊഴുപ്പ് (കൊഴുപ്പു കോശങ്ങള്‍) ഉള്ളതുകൊണ്ടാണ് മൃദുവായിരിക്കുന്നത്.

സ്തനത്തിന്റെ മൂന്ന് പ്രധാന ഭാഗങ്ങള്‍ ഇവയാണ്‌:

  • പാല്‍ ഗ്രന്ഥികള്‍ അഥവാ ലോബ്യൂൾസ് (glandulamammaria)
  • ഏരിയോള അഥവാ മുലക്കണ്ണിനു ചുറ്റുമുള്ള ചര്‍മ്മം (areola mammae)
  • മുലക്കണ്ണ്‌ (papilla mammariae)

ലോബ്യൂൾസ് എന്ന പാല്‍ ഗ്രന്ഥികള്‍ (lobi glandulaemammariae ): സ്തനത്തിൽ പതിനഞ്ചു മുതല്‍ 20 വരെ ലോബ്യൂളുകള്‍ വൃത്താകൃതിയില്‍ നിരന്നിരിക്കും. കണക്ടീവ് കോശങ്ങളുടെയും കൊഴുപ്പ് അടങ്ങിയ കോശങ്ങളുടേയും (adipose tissue) പാളികള്‍ കൊണ്ട് വേര്‍തിരിക്കപ്പെട്ട അവസ്ഥയിലായിരിക്കും ഇവയിലോരോന്നും. പാല്‍ ഉല്പാദനമാണ് ഈ ഗ്രന്ഥികളുടെ ധര്‍മ്മം.

ഓരോ ലോബ്യൂളിന്റെയും പ്രധാന നാളത്തെ ലാക്ടിഫെറസ് നാളി എന്നു വിളിക്കുന്നു, ഇത് മുലക്കണ്ണിലേക്കാണ് തുറക്കുന്നത്. ലോബ്യൂളുകളില്‍ നിന്നും മുലപ്പാലിനെ മുലക്കണ്ണിലേക്ക് വഹിച്ചുകൊണ്ടു വരുന്നത് ലാക്ടിഫെറസ് നാളികളാണ്.

ഏരിയോള (Areola) എന്നത് മുലക്കണ്ണിനു ചുറ്റും വൃത്താകാരത്തില്‍ കാണുന്ന ചര്‍മ്മം ആണ്. ഇത് ബ്രൗണ്‍ അല്ലെങ്കില്‍ പിങ്ക് നിറത്തിൽ കാണപ്പെടുന്നു. മുലക്കണ്ണിനും അതിനു ചുറ്റുമുള്ള ചര്‍മ്മത്തിനും വഴുവഴുപ്പും സംരക്ഷണവും നൽകുന്നതിനായി നിരവധി ചെറിയ എണ്ണ ഗ്രന്ഥികളും ഇതിലുണ്ട്.

മുലക്കണ്ണ് സ്തനത്തിന്റെ മധ്യഭാഗത്തായി ഉയര്‍ന്നു നില്‍ക്കുന്നു. മുലക്കണ്ണിലൂടെയാണ് പാല്‍ പുറത്തേക്കൊഴുകി വരുന്നത്.

ഫാറ്റി ടിഷ്യൂകളും കണക്ടീവ് ടിഷ്യൂകളും: സ്തനത്തിലെ ഗ്രന്ഥികളുടെയും നാളങ്ങളുടെയും ഉള്ളിലും പുറത്തും ഈ കോശങ്ങളാണ്. സ്തനങ്ങള്‍ക്ക് സംരക്ഷണവും രൂപഭംഗിയും നല്‍കുന്നതിൽ ഇവ പ്രധാന പങ്ക് വഹിക്കുന്നു.

ലിഗമെന്റുകൾ: ചര്‍മ്മത്തില്‍ നിന്നും നെഞ്ചിലെ പേശികളിലേക്ക് സ്തനങ്ങളിലൂടെ ഊര്‍ന്നിറങ്ങുന്ന സന്ധിബന്ധങ്ങളാണിവ. ലിഗമെന്റുകൾ സ്തനങ്ങളെ താങ്ങിനിര്‍ത്താന്‍ സഹായിക്കുന്നു.

നാഡികള്‍: സ്തനങ്ങളുടെ ഭാഗത്ത് നിരവധി പ്രധാനപ്പെട്ട നാഡികള്‍ ഉണ്ട്. നെഞ്ചിന്റേയും കൈകളുടേയും ഭാഗങ്ങളിലുള്ള നാഡികളും ഇവയില്‍ ഉള്‍പ്പെടും. നെഞ്ചിലെയും കക്ഷത്തിലെയും ചര്‍മ്മത്തില്‍ നിരവധി സംവേദനക്ഷമതയുള്ള നാഡികളുണ്ട്. ഉത്തേജനങ്ങൾ സംവേദിക്കപ്പെടുന്നത് ഇവയിലൂടെയാണ്.

രക്തക്കുഴലുകള്‍: നിരവധി രക്തക്കുഴലുകളോടു കൂടി ധാരാളം രക്തയോട്ടം ഉള്ള ഭാഗമാണ് സ്തനം.

സ്തനത്തിലെ ലിംഫാറ്റിക് സംവിധാനം: രക്തക്കുഴലുകള്‍ക്ക് സമാനമായ മെലിഞ്ഞ കുഴലുകളാണ് ലിംഫ് വെസ്സല്‍സ്. ലിംഫ് അഥവാ കോശദ്രാവകം തെളിഞ്ഞ മഞ്ഞ നിറത്തിലുള്ള ഒരു ദ്രാവകമാണ്. പോഷകങ്ങളും, വെളുത്ത രക്താണുക്കളും, ആന്റിബോഡികളും അടങ്ങിയിരിക്കുന്ന ഇത് ശരീരകോശങ്ങളെ തഴുകി ഒഴുകിക്കൊണ്ടിരിക്കും. സ്തനത്തില്‍ നിന്നുള്ള കോശദ്രാവകം ചെറിയ കുഴലുകള്‍വഴി പയറിന്റെ ആകൃതിയിലുള്ള ലിംഫ് നോഡുകളിലേക്കെത്തും. ലിംഫ് നോഡുകളില്‍ ധാരാളം ലിംഫോസൈറ്റുകള്‍ ഉണ്ടായിരിക്കും (ഒരു തരം വെളുത്ത രക്താണുക്കൾ). ശരീരത്തിലെ രോഗപ്രതിരോധ സംവിധാനത്തിന്റെ ഭാഗമായി സൂക്ഷ്മജീവികളേയും ബാഹ്യ വസ്തുക്കളേയും അരിച്ചെടുക്കുന്നതാണ് ഇതിന്റെ ധര്‍മ്മം.

സ്തനത്തിന് നാല് തരം ലിംഫ് നോഡുകളുണ്ട്:

  • സുപ്രാക്ലാവിക്കുലര്‍ നോഡുകള്‍ – തോളെല്ലിനു മുകളിലായി സ്ഥിതിചെയ്യുന്നു.
  • ഇന്‍ഫ്രാക്ലാവിക്കുലര്‍ (സബ് ക്ലാവിക്കുലര്‍) നോഡുകള്‍ തോളെല്ലിനു താഴെയായി സ്ഥിതിചെയ്യുന്നു.
  • ആക്‌സില്ലറി നോഡുകള്‍ – കക്ഷത്തില്‍ സ്ഥിതിചെയ്യുന്നു.
  • ആന്തരിക മാമറി നോഡുകൾ നെഞ്ചിനകത്ത്, മാറെല്ലിനു പിന്നിലായി സ്ഥിതിചെയ്യുന്നു.

സ്തനത്തിന്റെ ധര്‍മ്മങ്ങള്‍

കുഞ്ഞിന്റെ പോഷണത്തിന് ആവശ്യമായ പാല്‍ ഉല്‍പ്പാദിപ്പിക്കുകയും സംഭരിക്കുകയും ആവശ്യാനുസരണം വിട്ടുകൊടുക്കുകയുമാണ് സ്തനത്തിന്റെ പ്രാഥമിക ധര്‍മ്മം. ഗര്‍ഭകാലത്ത് ഹോര്‍മോണുകളുടെ പ്രവര്‍ത്തനഫലമായി സ്തനങ്ങള്‍ ഉത്തേജിതമായി പാല്‍ ഉല്‍പ്പാദിപ്പിക്കാന്‍ സജ്ജമാകുന്നു. പ്രസവശേഷം, സ്ത്രീയുടെ ശരീരത്തില്‍ നടക്കുന്ന ഹോര്‍മോണ്‍ മാറ്റങ്ങള്‍ പാല്‍ ഗ്രന്ഥികളെ പാല്‍ ഉല്‍പ്പാദിപ്പിക്കാന്‍ പ്രേരിപ്പിക്കും. പാല്‍ ഉല്‍പ്പാദിപ്പിക്കുന്ന ഗ്രന്ഥികളില്‍ നിന്നും നാളങ്ങള്‍ (ducts) വഴി പാല്‍ മുലക്കണ്ണിലെത്തിച്ചേരും. കുഞ്ഞ് മുല ചപ്പുമ്പോൾ മുലക്കണ്ണിൽ നിന്നുമാണ് പാല്‍ പുറത്തേക്ക് ചുരത്തുന്നത്.

ആർത്തവം വൈകിപ്പിക്കാൻ (Delaying Periods) കഴിയുമോ?

ആർത്തവം താമസിപ്പിക്കേണ്ടതിന്റെ ആവശ്യകത

അവധിക്കാലം, വിവാഹം, പരീക്ഷകൾ, മതപരമായ ചടങ്ങുകൾ തുടങ്ങി ചില അവസരങ്ങളിലെങ്കിലും സ്ത്രീകൾ തങ്ങളുടെ ആർത്തവം അൽപ്പം താമസിച്ചു മതിയെന്ന് ആഗ്രഹിച്ചേക്കും. ആർത്തവം വൈകിപ്പിക്കൽ ആണ് ഇത്തരം സന്ദർഭങ്ങൾക്ക് എറ്റവും അനുയോജ്യമായ സംഗതി.

ആർത്തവം വൈകിപ്പിക്കുന്നതിന്റെ പ്രയോജനങ്ങൾ

ആർത്തവം വൈകിപ്പിക്കുന്നതിലൂടെ ഇനി പറയുന്ന, ആർത്തവുമായി ബന്ധപ്പെട്ട പ്രശ്നങ്ങളിൽ നിന്ന് മോചനം ലഭിക്കും;

  • ബ്ലോട്ടിംഗ്
  • തലവേദന
  • മനംപിരട്ടലും ഛർദിയും
  • സ്വഭാവ വ്യതിയാനങ്ങൾ
  • ചാക്രികമായി വരുന്നതോ പെട്ടെന്നുണ്ടാവുന്നതോ ആയ രൂക്ഷമായ ചെന്നിക്കുത്ത്

ഇനി പറയുന്ന സാഹചര്യങ്ങളുണ്ടെങ്കിൽ ആർത്തവം വൈകിപ്പിക്കാൻ ഡോക്ടർമാർ ശുപാർശ ചെയ്തേക്കും;

  • ആർത്തവത്തിനു മുമ്പുള്ള വിഷാദവും അസന്തുഷ്ടിയും.
  • കടുത്ത വേദനയോടു കൂടിയ എൻഡ്രോമെട്രിയോസിസ്
  • ഹോർമോൺ പിന്മാറ്റത്തിന്റെ ലക്ഷണങ്ങൾ
  • ഗർഭപാത്രത്തിൽ നിന്നുള്ള രക്തസ്രാവം
  • രക്തസ്രാവ രോഗങ്ങൾക്ക് വഴങ്ങാനുള്ള ശരീരത്തിന്റെ പ്രവണത

ആർത്തവം നീട്ടിവയ്ക്കുന്നതിലൂടെ തലവേദന, ക്ഷീണം, ബ്ലോട്ടിംഗ്, ജനനേന്ദ്രിയത്തിലുള്ള ചൊറിച്ചിൽ, ആർത്തവ വേദന തുടങ്ങിയവയ്ക്ക് ആശ്വാസം ലഭിക്കുമെന്ന് റിപ്പോർട്ടു ചെയ്യപ്പെട്ടിട്ടുണ്ട്. ആർത്തവം നീട്ടിവയ്ക്കുന്നതിലൂടെ സ്ത്രീകളുടെ ജീവിതം സുഖപ്രദമാക്കുകയും അവരുടെ രോഗഗ്രസ്തമായ അവസ്ഥയിൽ മാറ്റം വരുത്തുകയുമാണ് ലക്ഷ്യമിടുന്നത്.

താഴെ പറയുന്ന വഴികളിലൂടെ നിങ്ങൾക്ക് നൂറുശതമാനം തൃപ്തികരമായി ആർത്തവം വൈകിപ്പിക്കാൻ സാധിക്കില്ലെന്നു മനസ്സിലാക്കണം. എന്നാൽ, ഇവ ആർത്തവം വൈകിപ്പിക്കാൻ ഒരു പരിധി വരെ സഹായകമാണ്.

ആർത്തവം വൈകിപ്പിക്കുന്നതിനുള്ള വഴികൾ

കമ്പയിൻഡ് ഓറൽ കോൺട്രാസെപ്റ്റീവ് പിൽ (COCP). നിങ്ങൾ ഒരു കൃത്യമായ ഡോസ് COCP ഉപയോഗിച്ചുകൊണ്ടിരിക്കുകയാണെങ്കിൽ, അത് മുടങ്ങാതെ തുടരുക. ഇവിടെയും രണ്ട് പാക്കുകൾ തീർന്ന ശേഷം ഒരാഴ്ച മുടക്കം വേണം.

ഗുളികകളുടെ ഇനത്തിന് അനുസൃതമായി ഉപയോഗവും വ്യത്യാസപ്പെടും;

  • മോണോഫേസിക് പിൽസ് ഇത് 21 ദിവസം തുടർച്ചയായി കഴിച്ചതിനു ശേഷം ഏഴ് ദിവസം ഇടവേള നൽകും. ആദ്യ പാക്കിൽ നിന്ന് അവസാനത്തെ ഗുളിക കഴിച്ച ശേഷം പുതിയ പാക്കിൽ നിന്ന് തുടങ്ങുക, പിന്നീട് ഏഴ് ദിവസം ഇടവേള നൽകുക.
  • എല്ലാ ദിവസവുമുള്ള ഗുളികകൾ ഈ ഗുളികകൾ എല്ലാ ദിവസവും കഴിക്കേണ്ടതാണ്. ആദ്യത്തെ 21 ഗുളികകൾ ഹോർമോൺ ഉള്ളതും തുടർന്നു വരുന്ന ഏഴെണ്ണം ഹോർമോൺ രഹിതവുമാണ്.
  • ഫേസിക് പിൽസ് ഇവ വ്യത്യസ്തങ്ങളും ഒരാളുടെ ആർത്തവചക്രത്തെ ബന്ധപ്പെടുത്തിയുള്ളതുമാണ്. ഇവ കൃത്യമായി കഴിച്ചാൽ മാത്രമേ ശരിയായ പ്രയോജനം ലഭിക്കുകയുള്ളൂ. നിങ്ങളുടെ ആർത്തവം താമസിപ്പിക്കാൻ എന്തു തരം ഗുളികകളാണ് വേണ്ടതെന്ന് അറിയാൻ ഡോക്ടറുടെ ഉപദേശം തേടുക.
  • പ്രോജസ്റ്റജെൻ ഒൺലി പിൽ ഇവ എല്ലാ ദിവസവും ഒരേ സമയത്ത് കഴിക്കേണ്ട ഗുളികകളാണ്. ഇവ ആർത്തവം വൈകിപ്പിക്കാൻ സഹായകമായില്ലെങ്കിൽ ഡോക്ടറുടെ നിർദേശപ്രകാരം മറ്റു മരുന്നുകൾ പരീക്ഷിക്കുക.

ആർത്തവം വൈകിപ്പിക്കാൻ എന്തു തരം മരുന്നാണ് ഉപയോഗിക്കേണ്ടത് എന്ന് നിങ്ങൾക്ക് നിശ്ചയമില്ലെങ്കിൽ ഡോക്ടറുടെ ഉപദേശം തേടേണ്ടതാണ്.

ഗുളികകൾ ഒന്നും ഉപയോഗിക്കുന്നില്ല എങ്കിൽ?

നിങ്ങൾ നിലവിൽ ഗുളികകൾ ഉപയോഗിക്കുന്നില്ല എങ്കിൽ, ആർത്തവം വൈകിപ്പിക്കുന്നതിന് വേണ്ട മരുന്നിനെ കുറിച്ചുള്ള ഉപദേശം ഡോക്ടറിൽ നിന്ന് സ്വീകരിക്കുക. നിങ്ങളുടെ ഡോക്ടർ പ്രോജസ്റ്ററോൺ അടങ്ങിയ ഹോർമോൺ ഗുളികകൾ നിർദ്ദേശിക്കാം. ഗർഭപാത്രത്തിലെ വരകൾ നിലനിർത്താൻ സഹായിക്കുന്നത് പ്രോജസ്റ്റോജെനുകളാണ്. ഈ ഗുളികകൾ ഗർഭനിരോധനത്തിനുള്ളതല്ലെന്ന് മനസ്സിലാക്കണം. ഗുളികകൾ നിർത്തി രണ്ടോ മൂന്നോ ദിവസത്തിനുള്ളിൽ ആർത്തവം പുനരാരംഭിക്കും.

ആർത്തവം താമസിപ്പിക്കുന്നതിന്റെ ദോഷവശങ്ങൾ

ആർത്തവം താമസിപ്പിക്കുന്നതിന്റെ ഗുണങ്ങളെ കുറിച്ചും ദോഷങ്ങളെ കുറിച്ചും ഡോക്ടറോട് സംസാരിച്ച് മനസ്സിലാക്കിയ ശേഷം എന്തു സമീപനമാണ് വേണ്ടതെന്ന് തീരുമാനിക്കുക. ആർത്തവം താമസിപ്പിക്കുന്നതിന്റെ ദോഷവശങ്ങളിൽ ഇവയും ഉൾപ്പെടുന്നു;

  • രണ്ട് ആർത്തവങ്ങളുടെ മധ്യേയുള്ള സമയത്തും രക്തസ്രാവമുണ്ടാകാം (breakthrough bleeding).
  • ആർത്തവം നിലയ്ക്കുന്ന അവസരത്തിൽ ഗർഭിണിയാണോ എന്നറിയാൻ ബുദ്ധിമുട്ടാണ്. അതിനാൽ, സംശയമുള്ളവർ ഡോക്ടറെ കാണുകയോ ഗർഭ പരിശോധന നടത്തുകയോ വേണം

കടപ്പാട്-www.modasta.com

 

അവസാനം പരിഷ്കരിച്ചത് : 2/15/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate