Skip to content. | Skip to navigation

Vikaspedia

പങ്കുവയ്ക്കുക
Views
  • നില എഡിറ്റ്‌ ചെയുവാൻ വേണ്ടി തയ്യാ

ഗർഭകാല ആരോഗ്യം

ഗർഭകാല ആരോഗ്യം - കൂടുതൽ വിവരങ്ങൾ,ശ്രദ്ധിക്കേണ്ട കാര്യങ്ങള്‍

അമ്മയാകാനൊരുങ്ങുമ്പോള്‍

ഇന്ന് കേരളത്തില്‍ ഒരു പ്രധാന ആരോഗ്യപ്രശ്നമാണ് വന്ധ്യത. സ്ത്രീ–പുരുഷ വന്ധ്യതയും വന്ധ്യത ചികിത്സാകേന്ദ്രങ്ങളും ഏറിക്കൊണ്ടിരിക്കുന്നു. കൃത്രിമ ഗര്‍ഭധാരണ സംവിധാനങ്ങള്‍ കൂടുന്നു. ഇന്നത്തെ വ്യായാമരഹിത ജീവിതശൈലിയും ഭക്ഷണരീതികളും കൌമാരക്കാരായ പെണ്‍കുട്ടികളില്‍ ആര്‍ത്തവ ക്രമക്കേടുകളുണ്ടാക്കുന്നു. ആണ്‍കുട്ടികളിലെ ചെറുപ്പത്തിലേയുള്ള മദ്യപാനം, പുകവലി, പാന്‍പരാഗ്, മയക്കുമരുന്നുകള്‍ തുടങ്ങിയവയുടെ ഉപയോഗം വന്ധ്യതയിലേക്കു നയിക്കുന്നു. ഇന്ത്യയില്‍ 18ശതമാനം സ്ത്രീകളിലും വന്ധ്യതയ്ക്ക് കാരണമായ  ഗര്‍ഭാശയരോഗങ്ങളുണ്ടെന്ന് പഠനങ്ങള്‍ പറയുന്നു.

വിവാഹത്തെക്കുറിച്ചും ഗര്‍ഭധാരണത്തെക്കുറിച്ചും ആയുര്‍വേദത്തില്‍ വിവരിക്കുന്ന അധ്യായത്തിന്റെ പേരുതന്നെ പുത്രകാമീയം (സത്സന്താനത്തെ ആഗ്രഹിക്കുക) എന്നാണ്. 21 വയസ്സായ പുരുഷന്‍ തന്റെ ഗോത്രത്തില്‍നിന്നു തീര്‍ത്തും വ്യത്യസ്തമായ മറ്റൊരു ഗോത്രത്തില്‍നിന്ന് വധുവിനെ തെരഞ്ഞെടുക്കണമെന്ന് ഈ അധ്യായത്തില്‍ പറയുന്നു. രക്തബന്ധമുള്ളവരാകരുതെന്നു സാരം. നല്ല ആരോഗ്യവും നല്ല ശരീരപ്രകൃതിയുള്ളവളുമാകണം വധു.  സ്ത്രീ പുരുഷന്മാരുടെ പ്രായം കുറവാണെങ്കില്‍ ആയുസ്സും ബലവും ആരോഗ്യവും സാമര്‍ഥ്യവും കുറഞ്ഞതോ വൈകല്യങ്ങളോടുകൂടിയതോ ആയ സന്തതിയാകും ഉണ്ടാകുകയെന്നും പറയുന്നു.

ആഗോളതലത്തില്‍തന്നെ 40 ശതമാനം ഗര്‍ഭധാരണവും ആഗ്രഹിക്കാതെ, വേണ്ടത്ര തയ്യാറെടുപ്പില്ലാതെ നടക്കുന്നതാണെന്ന് കണക്കുകള്‍ സൂചിപ്പിക്കുന്നു. നല്ല പുത്രനെയോ പുത്രിയെയോ ആഗ്രഹിക്കുന്ന ദമ്പതികള്‍ അതിനുവേണ്ട ഒരുക്കങ്ങള്‍ നടത്തുകതന്നെ വേണം.

ഗര്‍ഭധാരണത്തിന് ഒരുമാസം മുമ്പെങ്കിലും ദമ്പതികള്‍ പഥ്യമായ ആഹാരവിഹാരങ്ങള്‍ ശീലിക്കേണ്ടതാണ്. പഞ്ചകര്‍മങ്ങളാല്‍ ആന്തരികശുദ്ധി വരുത്തിയശേഷം സൌമ്യവും മധുരരസപ്രധാനവുമായ ആഹാരം പുരുഷന്‍ കഴിക്കണം. പാല്, പാല്‍ക്കഞ്ഞി, നെയ്യ്, ബദാംപരിപ്പ്, കശുവണ്ടി, വെണ്ടയ്ക്ക, വെള്ളരിക്ക, നല്ല പഴുത്ത പഴങ്ങള്‍ ഇവ കഴിക്കണം. സ്ത്രീയാകട്ടെ കഫത്തെ വര്‍ധിപ്പിക്കുന്നതും ശരീരത്തെ തടിപ്പിക്കുന്നതുമായ എല്ലാ ആഹാരങ്ങളും ഉപേക്ഷിക്കണം. വ്യായാമം ഉണ്ടാകണം. ഉഴുന്ന്, മുതിര, എള്ള് തുടങ്ങിയവ കൂടുതല്‍ ഉപയോഗിക്കണം. അമുക്കുരചൂര്‍ണം ചേര്‍ത്ത പശുവിന്‍പാലില്‍ നെയ്യ് ചേര്‍ത്ത് കഴിക്കാം. കല്യാണകഘൃതം, മഹാകല്യാണകഘൃതം തുടങ്ങിയവ വളരെ ഫലം തരുന്നതാണ്. ആര്‍ത്തവത്തിന്റെ നാലാം ദിവസംമുതല്‍ 16–ാം ദിവസംവരെ ഉപയോഗിക്കാം. തിപ്പലി കഷായംവച്ച് 12 ദിവസംവരെ കുടിച്ചശേഷം നെയ്യ് ഉപയോഗിക്കാം.  ഒരുമാസം ലൈംഗികബന്ധത്തിലേര്‍പ്പെടാതെ  ഇത്തരം ആഹാരവിഹാരങ്ങള്‍ ശീലിച്ചശേഷംവേണം ഗര്‍ഭധാരണത്തിനുള്ള ലൈംഗികബന്ധത്തിലേര്‍പ്പെടാന്‍ എന്ന് ആയുര്‍വേദം പറയുന്നു.  'പ്രസന്നമായ മനസ്സാണ്' സത്സന്താനമുണ്ടാകാന്‍ പ്രധാനമായും വേണ്ടത്. 'സൌമനസ്യം ഗര്‍ഭധാരണാനാം' എന്ന് ചരകാചാര്യന്‍ പറയുന്നു.

ശരിയായ ഋതുകാലത്തില്‍ ശുദ്ധമായ ഗര്‍ഭാശയത്തില്‍ ആരോഗ്യമുള്ള ബീജവും അണ്ഡവും സംയോജിച്ചാല്‍ തീര്‍ച്ചയായും ഗര്‍ഭധാരണം ഉണ്ടാവും. ഗര്‍ഭധാരണത്തിന് യോജിച്ച കാലത്തെ ഋതുകാലം എന്നാണ് ആചാര്യന്മാര്‍ വിവക്ഷിക്കുന്നത്. ആര്‍ത്തവാരംഭംമുതലുള്ള 12 മുതല്‍ 16 ദിവസമാണ് ഋതുകാലം. ആര്‍ത്തവചക്രത്തിലെ പ്രോളിഫിറ്റേറ്റീവ് ഫേസും അണ്ഡോല്‍പ്പാദനവും കൂടിയുള്ള സമയമാണിതെന്നു കണക്കാക്കാം. അതിനുശേഷം യോനിക്ക് സങ്കോചമുണ്ടാവുന്നു. അണ്ഡോല്‍പ്പാദനത്തിനുശേഷമുള്ള സെക്രീറ്ററി ഫേസില്‍ പ്രൊജസ്ട്രോണ്‍ എന്ന ഹോര്‍മോണിന്റെ പ്രവര്‍ത്തനത്താല്‍ ഗര്‍ഭാശയമുഖം ചുരുങ്ങുന്നു. സ്രാവങ്ങള്‍ കുറയുന്നു.

യോനിയിലുണ്ടാകുന്ന രോഗങ്ങള്‍, മനഃസംഘര്‍ഷങ്ങള്‍, ആഹാരവിഹാരങ്ങളാല്‍ ദുഷിച്ച ആര്‍ത്തവവും ശുക്ളവും ഋതുകാലത്തല്ലാതുള്ള ലൈംഗികബന്ധം, ദമ്പതികളുടെ ശാരീരിക ശക്തിക്കുറവ് ഇവ ഗര്‍ഭാധാനം താമസിക്കാനുള്ള കാരണങ്ങളാണ്.

ഗര്‍ഭിണിയെ വളരെയേറെ ശ്രദ്ധയോടെ പരിചരിക്കണം. ഭര്‍ത്താവിന്റെയും  കുടുംബാംഗങ്ങളുടെയും സ്നേഹപരിലാളനകളുണ്ടാവണം. പ്രസവംവരെ അനുഷ്ഠിക്കേണ്ടതായ ആഹാര വിഹാരങ്ങളെല്ലാം ശീലിച്ചാല്‍ ഗര്‍ഭസ്രാവമോ പ്രസവവൈഷമ്യമോ ഉണ്ടാകുകയില്ല. ശരീരായാസകരമായ പ്രവൃത്തികള്‍, ലൈംഗികബന്ധം,ഉപവാസം, വളരെ കൂടുതല്‍ സമയം യാത്രചെയ്യുക, രാത്രിയില്‍ ഉറങ്ങാതിരിക്കുക, പകലുറങ്ങുക, മലമൂത്രാദികള്‍ യഥാസമയം വിസര്‍ജിക്കാതിരിക്കുക, കോപിക്കുക, സങ്കടപ്പെടുക മനസ്സിന് ക്ഷോഭമുണ്ടാകുന്ന കാര്യങ്ങള്‍ കാണുകയോ കേള്‍ക്കുകയോ ചെയ്യുക, കുന്തിച്ചിരിക്കുക, മാര്‍ദവമില്ലാത്ത ഇരിപ്പിടത്തിലിരിക്കുക, കൂടുതല്‍ സമയം മലര്‍ന്നുകിടക്കുക തുടങ്ങിയവ ഗര്‍ഭിണി അനുഷ്ഠിക്കാന്‍പാടില്ല.

കുഞ്ഞിന്റെ വളര്‍ച്ചയ്ക്കാവശ്യമായ ഘടകങ്ങള്‍ മാതൃശരീരത്തില്‍നിന്നാണ് ലഭിക്കുന്നത്. ഗര്‍ഭസ്ഥശിശു വളര്‍ച്ചപ്രാപിക്കുന്തോറും മാതൃശരീരത്തിലെ മൃദുവായ അംശങ്ങള്‍ കുറയുകയും ബലക്ഷയം ഉണ്ടാവുകയും ചെയ്യാം. അതുകൊണ്ട് ബലവും സ്നിഗ്ദതയും തരുന്ന പാലും നെയ്യും ഉപയോഗിക്കണമെന്ന് നിര്‍ദേശിച്ചിരിക്കുന്നു.

ആദ്യ രണ്ടുമാസങ്ങളില്‍ ഗര്‍ഭത്തിന് അധികം വളര്‍ച്ചയുണ്ടാകുന്നില്ല. മൂന്നാം മാസത്തില്‍ എല്ലാ അവയവങ്ങളും രൂപംകൊള്ളുന്നു. പഞ്ചേന്ദ്രിയങ്ങളാല്‍ എല്ലാം അറിയാന്‍കഴിയുന്നു. സുഖവും ദുഃഖവും അമ്മയുടെ ശ്വാസോച്ഛ്വാസവും ഉറക്കവും ചലനങ്ങളും ഗര്‍ഭസ്ഥശിശു അറിയുന്നു എന്ന് സുശ്രുതാചാര്യന്‍ പറഞ്ഞിരിക്കുന്നു. അമ്മയുടെയും കുഞ്ഞിന്റെയും ഹൃദയം ഒന്നായിരിക്കുന്നതിനാല്‍ അമ്മയുടെ മനോഭാവങ്ങള്‍ ഗര്‍ഭസ്ഥശിശുവിനെ സ്വാധീനിക്കുകതന്നെ ചെയ്യും. ആധുനിക വൈദ്യശാസ്ത്രത്തിലും ആദ്യത്തെ 10 ആഴ്ചവരെയുള്ള കാലഘട്ടത്തിന് എംബ്രിയോജെനെസിസ്  എന്നു പറയുന്നു. ഈ കാലം അവസാനിക്കാറാകുമ്പോഴേക്ക് വിരലുകള്‍, കണ്ണുകള്‍, വായ, ചെവികള്‍ ഇവ കാണപ്പെടാന്‍ തുടങ്ങും.

മൂന്നാം മാസത്തില്‍ വൈദ്യനിര്‍ദേശപ്രകാരം പാല്‍മുതക്കിന്‍കിഴങ്ങ്, ക്ഷീരകാകോളി, ചെണ്ടഴുന്നീര്‍ കിഴങ്ങ്, നറുനീണ്ടിക്കിഴങ്ങ് തുടങ്ങിയവ പാല്‍കഷായമാക്കി ഒരുനേരം. രാവിലെ ആഹാരത്തിനുമുമ്പ് കല്യാണകഘൃതം കഴിക്കാം. ഇങ്ങിനെ ഓരോ മാസവും പാല്‍കഷായമാക്കാന്‍ വ്യത്യസ്ത ഔഷധങ്ങള്‍ നിര്‍ദേശിച്ചിട്ടുണ്ട്. കല്യാണകഘൃതം തുടര്‍ന്നും സേവിക്കാം. ഏഴാം മാസത്തില്‍ കുട്ടിയുടെ എല്ലാ അംഗങ്ങളും എല്ലാഭാവങ്ങളും പൂര്‍ണമായി പ്രത്യക്ഷപ്പെടുന്നു. ഏഴാം മാസംമുതല്‍ രണ്ടുനേരവും ഗര്‍ഭരക്ഷാഗുളിക ജീരകവെള്ളത്തില്‍ ചേര്‍ത്ത് കഴിക്കാം. വൈദ്യനിര്‍ദേശം അനുസരിച്ചുള്ള തൈലം പുരട്ടി മൃദുവായി തടവി കുളിക്കാം.

എട്ടാം മാസത്തില്‍ കുറുന്തോട്ടിവേര് പാല്‍കഷായമാക്കി പഞ്ചസാര ചേര്‍ത്ത് നല്‍കാം. പാല്‍കഞ്ഞിയാക്കി പശുവിന്‍ നെയ്യ് ചേര്‍ത്തുകൊടുക്കാം. വെള്ളം നന്നായി കുടിക്കണം. ഔഷധങ്ങളിട്ട് തിളപ്പിച്ച വെള്ളം ചെറുചൂടോടെ ഉപയോഗിച്ച് കുളിക്കണം. ഇതെല്ലാം പ്രസവംവരെ തുടരാം. വൈദ്യനിര്‍ദേശപ്രകാരം ഓരോരുത്തര്‍ക്കും അനുയോജ്യമായ തൈലം തേച്ച് ആഴ്ചയില്‍ നാലുദിവസമെങ്കിലും ചെറുചൂടുവെള്ളത്തില്‍ കുളിക്കണം.

മലബന്ധം, അര്‍ശസ്, അതിയായ കിതപ്പ്, ശ്വാസംമുട്ടല്‍, പ്രമേഹം ഇവയൊക്കെ ഗര്‍ഭകാല രോഗങ്ങളാണ്. ഇവയ്ക്കെല്ലാം വ്യക്തമായ ചികിത്സയും ആഹാരക്രമങ്ങളും ആയുര്‍വേദത്തില്‍ നിര്‍ദേശിച്ചിട്ടുണ്ട്. ഗര്‍ഭകാല ഛര്‍ദിക്ക് അനേകം ഔഷധങ്ങളുണ്ട്. വയറിന് വിസ്താരമുണ്ടാകുന്നതിനാലുണ്ടാകുന്ന ചൊറിച്ചിലിന് വിവിധ ലേപനങ്ങള്‍ നിര്‍ദേശിച്ചിട്ടുണ്ട്.

ഗര്‍ഭാരംഭംമുതല്‍ പ്രസവംവരെയും ലഘുവ്യായാമങ്ങള്‍ ചെയ്യണം. ആധുനിക വൈദ്യശാസ്ത്രത്തിലും എയ്റോബിക് വ്യായാമങ്ങള്‍ ചെയ്യണമെന്ന് പറയുന്നു. ഭ്രൂണത്തിന്റെ വലുപ്പത്താല്‍ വലുപ്പംകൂടിയ ഗര്‍ഭപാത്രം രക്തധമനികളുടെ പ്രവര്‍ത്തനത്തെ കുറച്ചേക്കാം എന്നതുകൊണ്ടാണ് കൂടുതല്‍ സമയം മലര്‍ന്നുകിടക്കരുതെന്നും ഇടതുവശം ചരിഞ്ഞുകിടക്കണമെന്നും പറയുന്നത്.

ദമ്പതികളുടെ ആഹാരാചാരങ്ങള്‍, പ്രവൃത്തികള്‍, മൈഥുന സമയത്തെ വിചാരവികാരങ്ങളെല്ലാം ഗര്‍ഭസ്ഥശിശുവിനെ തീര്‍ച്ചയായും സ്വാധീനിക്കുന്നുണ്ട്. പരസ്പര സ്നേഹവും ചുറ്റുപാടുകളും ശിശുവിനെ സ്വാധീനിക്കുമെന്ന് ഇന്ന് മനഃശാസ്ത്രജ്ഞര്‍ എല്ലാവരും സമ്മതിക്കുന്നു.

തന്റെ ശരീരത്തിലുണ്ടാകുന്ന മാറ്റങ്ങള്‍, പ്രസവം എങ്ങിനെയാകാം. കുട്ടിയെ വളര്‍ത്തേണ്ടതെങ്ങിനെയാവും? ഇങ്ങിനെയുള്ള പല കാര്യങ്ങള്‍ ചിന്തിച്ച് ആശങ്കയും ഭീതിയുമുള്ള ഗര്‍ഭിണികള്‍ ധാരാളമാണ്.  ജീവിതാനുഭവങ്ങളേറെയുള്ള പ്രായമായ സ്ത്രീകളുടെ സാന്ത്വനമാണ് പ്രധാന പരിഹാരം.

സ്ത്രീരോഗവിദഗ്ധര്‍ നിര്‍ദേശിക്കുന്ന ഫോളിക്കാസിഡും അയണും കാത്സ്യവുമെല്ലാം കഴിക്കുന്നതോടൊപ്പം ആയുര്‍വേദ ഡോക്ടര്‍മാര്‍ നിര്‍ദേശിക്കുന്ന ഗര്‍ഭിണി ചര്യകളും അനുഷ്ഠിച്ചാല്‍ സുഖപ്രസവം നടക്കുമെന്നതിന് ഒരു സംശയവുമില്ല. ഗര്‍ഭകാലത്ത് പ്രമേഹം, രക്താതിമര്‍ദ്ദം പോലെ വിവിധ രോഗങ്ങളുള്ളവരാണ് അധികംപേരും. അവര്‍  ഡോക്ടര്‍മാരോട് ഇക്കാര്യം പറയുകയും അവരുടെ നിര്‍ദേശപ്രകാരംമാത്രമേ  മരുന്നുകളും ഭക്ഷണവും ഉപയോഗിക്കാവൂ.

ജീവിതശൈലി രോഗങ്ങള്‍ ഉള്‍പ്പെടെയുള്ള പലവിധ രോഗങ്ങളുള്ള തലമുറ ഉണ്ടാകാതിരിക്കാനുള്ള പ്രധാന പരിഹാരം ഗര്‍ഭാധാനത്തിനുമുമ്പ് ദമ്പതികളുടെ ആരോഗ്യവും ഗര്‍ഭധാനത്തിനുശേഷം സ്ത്രീയുടെ ആരോഗ്യവും വേണ്ടവിധം സംരക്ഷിക്കപ്പെടുക എന്നുള്ളതാണ്. എങ്കില്‍ മാനസികമായും ശാരീരികമായും പൂര്‍ണ ആരോഗ്യമുള്ള സന്താനങ്ങള്‍ ഉണ്ടാകുകതന്നെ ചെയ്യും.

ഡോ. ഉഷ കെ പുതുമന

(അയിരൂരില്‍ പത്തനംതിട്ട ജില്ലാ ആയുര്‍വേദ ആശുപത്രിയില്‍ ചീഫ് മെഡിക്കല്‍ ഓഫീസറാണ് ലേഖിക)

ഗര്‍ഭാശയ മുഴകള്‍

 

പ്രത്യുല്‍പ്പാദനക്ഷമമായ കാലങ്ങളില്‍ സ്ത്രീകളില്‍ വളരെ സാധാരണയായി കാണുന്ന പ്രശ്നമാണ് ഫൈബ്രോയ്ഡുകള്‍ എന്നറിയപ്പെടുന്ന ഗര്‍ഭാശയമുഴകള്‍. പലപ്പോഴും അത്യധികം ആശങ്കയ്ക്കും ഭയപ്പാടിനും ഇവ കാരണമാകാറുണ്ട്. ഈ ആശങ്കകള്‍ക്ക് എത്രമാത്രം അടിസ്ഥാനമുണ്ടെന്നു നോക്കാം.

ഗര്‍ഭാശയത്തിന്റെ മാംസപേശികളില്‍നിന്നുണ്ടാകുന്ന ഒരു ട്യൂമറാണ് ഫൈബ്രോയ്ഡ്. ട്യൂമര്‍ എന്നതിന് ക്യാന്‍സര്‍ എന്ന് അര്‍ഥമില്ല. ഫൈബ്രോയ്ഡ് ഒരു  ക്യാന്‍സര്‍ അല്ലാത്തതരം ദശവളര്‍ച്ച (യലിശഴി ൌാീൌൃ)  യാണ്. ഏകദേശം 30% മുതല്‍ 50% വരെ സ്ത്രീകളിലും ഇവയുണ്ടാകാം. എന്നാല്‍ എല്ലായ്പ്പോഴും ഇവ രോഗലക്ഷണങ്ങള്‍ കാണിക്കണമെന്നില്ല. 30 വയസ്സിനു ശേഷമാണ് സാധാരണ കാണുന്നതെങ്കിലും കൌമാരപ്രായക്കരില്‍വരെ ചിലപ്പോഴൊക്കെ കാണാറുണ്ട്. ആര്‍ത്തവവിരാമത്തിനുശേഷം പുതുതായി ഫൈബ്രോയ്ഡുകള്‍ ഉണ്ടാകാറില്ല.

വളരെ പതുക്കെ വളരുന്നയവാണ് ഈ ഗര്‍ഭാശയ മുഴകള്‍. സ്ത്രീഹോര്‍മോണുകളെ ആശ്രയിച്ചാണ് ഇവയുടെ വളര്‍ച്ച. അതിനാല്‍ ഗര്‍ഭധാരണം, ഗര്‍ഭനിരോധ ഗുളികകളുടെ ഉപയോഗം തുടങ്ങിയവയൊക്കെ ഇവയുടെ വളര്‍ച്ച ത്വരിതപ്പെടുത്തുന്നു. ഗര്‍ഭസമയത്ത് അവ വലുതാവുകയും മൃദുവാകുകയും ചെയ്യാം. പ്രസവശേഷം ഇവ ചുരുങ്ങിപ്പോവുന്നു. അതുപോലെ ഹോര്‍മോണ്‍ ഗുളികകള്‍ നിര്‍ത്തിയശേഷവും, ആര്‍ത്തവവിരാമത്തിനു ശേഷവും ഇവ ചെറുതാകും. എന്നാല്‍ എത്ര ചുരുങ്ങുന്നു എന്നത് ആദ്യം ഉണ്ടായിരുന്ന വലുപ്പമനുസരിച്ചാകും.

പ്രത്യുല്‍പ്പാദനക്ഷമത കുറഞ്ഞവരില്‍ ഫൈബ്രോയ്ഡ് ഉണ്ടാകാന്‍ സാധ്യത കൂടുതലാണ്. ധാരാളം കുട്ടികളെ പ്രസവിച്ച പഴയ തലമുറയിലെ സ്ത്രീകളില്‍ ഇവ വിരളമായിരുന്നു. ഇന്നത്തെ കാലത്ത് വന്ധ്യത, ജനനനിയന്ത്രണം എന്നിവമൂലം ഫൈബ്രോയ്ഡ് കൂടുതല്‍ കാണുന്നുണ്ട്. ഇവ ഉണ്ടാകുന്നതില്‍ പാരമ്പര്യവും ഘടകമാണ്. അതുപോലെ ചില രാജ്യക്കാരില്‍, പ്രത്യേകിച്ച് ആഫ്രിക്കന്‍ വംശജരില്‍ ഫൈബ്രോയ്ഡ് കൂടുതലായി കാണുന്നു.

ഫൈബ്രോയ്ഡ് പല രീതിയിലുണ്ടാകാം. ഗര്‍ഭപാത്രത്തിനുള്ളിലേക്കു തള്ളിനില്‍ക്കുന്നവ (ടൌയ ാൌരീൌ),ഗര്‍ഭാശയ പേശികള്‍ക്കുള്ളില്‍ വളരുന്നവ (കിൃമാൌൃമഹ),  ഗര്‍ഭാശയത്തിനു പുറത്തേക്കു തള്ളിനില്‍ക്കുന്നവ (ടൌയ ലൃീൌെ)  എന്നിങ്ങനെയാണ് സാധാരണയായി അവയെ തരംതിരിക്കുന്നത്. സ്ഥാനം അനുസരിച്ച് അവയുണ്ടാക്കുന്ന രോഗലക്ഷണങ്ങളിലും ഏറ്റക്കുറിച്ചല്‍ വരാം.

പുറത്തേക്കു തള്ളിനില്‍ക്കുന്ന മുഴകള്‍ വലിയ രോഗലക്ഷണങ്ങള്‍ ഉണ്ടാക്കണമെന്നില്ല. അവ പലപ്പോഴും ഗര്‍ഭാശയത്തിന്റെ വലുപ്പം കൂട്ടുകയും വയറില്‍ കട്ടിയായി

പ്രത്യക്ഷപ്പെടുകയും ചെയ്യും. അവയുണ്ടാക്കുന്ന ലക്ഷണങ്ങള്‍ കൂടുതലും ചുറ്റുമുള്ള മറ്റ് അവയവങ്ങളില്‍ സമ്മര്‍ദം ഉണ്ടാക്കുന്നതുമൂലമാണ്.

ഉള്ളിലേക്കു തള്ളിനില്‍ക്കുന്നതും ഗര്‍ഭാശയപേശികള്‍ക്കുള്ളില്‍ വളരുന്നവയുമായ മുഴകള്‍ ആര്‍ത്തവസമയത്ത് അമിതരക്തസ്രാവവും കഠിനമായ വേദനയും ഉണ്ടാക്കും. ഇത്തരം മുഴകള്‍ അധികം വലുപ്പമുള്ളതല്ലെങ്കില്‍പ്പോലും രോഗലക്ഷണങ്ങളുണ്ടാക്കാം.

സാധാരണയായി ഗര്‍ഭപാത്രത്തില്‍ ഒന്നിലധികം മുഴകള്‍ ഉണ്ടാകാം. വലുതായി ഒരെണ്ണം മാത്രമേ കാണപ്പെടുന്നുള്ളു എങ്കിലും വളരെ ചെറിയ അനേകം മുഴകള്‍ ഉണ്ടായെന്നുവരാം. കടുകുമണിയുടെ വലുപ്പംമുതല്‍ വയറുമുഴുവന്‍ നിറഞ്ഞുനില്‍ക്കുന്ന വലുപ്പംവരെ അവയ്ക്കുണ്ടാകാം. പലപ്പോഴും അനേകം മുഴകളുള്ള ഗര്‍ഭാശയത്തിന്റെ ആകൃതിതന്നെ വളരെ വ്യത്യാസപ്പെട്ടിരിക്കും. സാധാരണ പേശീതന്തുക്കളെക്കാള്‍ കട്ടിയുള്ളവയാണ് ഈ മുഴകള്‍. പലപ്പോഴും കാത്സ്യം അടിഞ്ഞുകൂടുന്നതുമൂലം വളരെ കഠിനമായോ, ഡീജനറേഷന്‍ വന്ന് മൃദുവായോ ഇവ കാണപ്പെടാം. അമിത രക്തസ്രാവമാണ് ഇവയുണ്ടാക്കുന്ന ഏറ്റവും പ്രധാന രോഗലക്ഷണം. ആര്‍ത്തവചക്രം കൃത്യമാകുകയും എന്നാല്‍ രക്തസ്രാവത്തിന്റെ അളവ്, ആര്‍ത്തവദിനങ്ങളുടെ എണ്ണം എന്നിവ അധികമാകും. അമിതരക്തസ്രാവംമൂലം സ്ത്രീകളില്‍ വിളര്‍ച്ച ഉണ്ടാകുന്നത് സാധാരണയാണ്. രക്തത്തിന്റെ അളവ് വളരെ കുറഞ്ഞാല്‍ ക്ഷീണവും നെഞ്ചിടിപ്പും അണുബാധയും ഉണ്ടാകാം. പലപ്പോഴും രക്തം കുത്തിവയ്ക്കേണ്ടിവന്നേക്കാം.

ആര്‍ത്തവസമയത്തെ വയറുവേദനയാണ് മറ്റൊരു പ്രധാന ലക്ഷണം. അടിവയറ്റില്‍ കൊളുത്തിപ്പിടിക്കുന്നപോലെയോ കഴയ്ക്കുന്നതുപോലെയോ വേദനയുണ്ടാകാം. വയറിനുള്ളില്‍ ഭാരം അനുഭവപ്പെടല്‍, വയറ് തള്ളിനില്‍ക്കുക തുടങ്ങിയവയും വലിയ മുഴകളുള്ളപ്പോള്‍ അനുഭവപ്പെടാം. മുഴകളുടെ വലുപ്പവും സ്ഥാനവും അനുസരിച്ച് ചുറ്റുമുള്ള അവയവങ്ങളില്‍ സമ്മര്‍ദമുണ്ടാകാം. അങ്ങിനെ മൂത്രസഞ്ചിയില്‍ സമ്മര്‍ദമുണ്ടാകുമ്പോള്‍ മൂത്രതടസ്സം, വന്‍കുടലില്‍ സമ്മര്‍ദമുണ്ടായാല്‍ മലബന്ധം എന്നിവയുമുണ്ടാകാം. വൃക്കകളില്‍നിന്നു താഴേക്കുവരുന്ന മൂത്രനാളികളില്‍  സമ്മര്‍ദമുണ്ടായാല്‍ അത് വൃക്കകളുടെ പ്രവര്‍ത്തനത്തെ ബാധിക്കാം. കാലുകളിലേക്കുള്ള രക്തക്കുഴലുകളില്‍ പ്രഷര്‍ വരുന്നതുവഴി കാലുകളില്‍ നീരും നാഡികളിലുണ്ടാകുന്ന സമ്മര്‍ദംമൂലം നടുവേദനയും ഉണ്ടാകാം.

ഗര്‍ഭാശയമുഴകള്‍ പലപ്പോഴും വന്ധ്യതയ്ക്ക് കാരണമാകാം. അടിയ്ക്കടി ഗര്‍ഭം അലസാനും അവ കാരണമാകാം. ഗര്‍ഭസമയത്ത് അവയിലെ രക്തചംക്രമണത്തില്‍ വ്യത്യാസം ഉണ്ടാകുന്നതുമൂലം കഠിനമായ വയറുവേദന അനുഭവപ്പെടാം. പ്രസവസമയത്ത് അമിതരക്തസ്രാവം ഉണ്ടാകാനും ഇവ കാരണമാകാം.

സാധാരണഗതിയില്‍ ഗൈനക്കോളജിസ്റ്റിന്റെ പരിശോധനയില്‍ പലപ്പോഴും രോഗനിര്‍ണയം സാധ്യമാകും. എന്നിരുന്നാലും ഓവറിയിലെ ട്യൂമര്‍, അഡീനൊമിയോസിസ് (മറല്യിീാീശെ) എന്നീ അവസ്ഥകളില്‍നിന്ന് വേര്‍തിരിച്ചറിയാനും, മുഴകളുടെ എണ്ണം, വലുപ്പം,സ്ഥാനം എന്നിവ നിര്‍ണയിക്കാനും അള്‍ട്രാസൌണ്ട് സ്കാനിങ് സഹായിക്കും.

ഗര്‍ഭാശയമുഴകളുടെ ചികിത്സ സാധാരണഗതിയില്‍ ഓപ്പറേഷന്‍ ആണ്. മുഴ മാത്രമായോ ഗര്‍ഭപാത്രം മുഴുവനായോ നീക്കംചെയ്യുന്നു. എന്നാല്‍ എല്ലാ ഫൈബ്രോയ്ഡിനും ചികിത്സ ആവശ്യമില്ല. ചെറുതും രോഗലക്ഷണങ്ങള്‍ ഉണ്ടാക്കാത്തതുമായ ഫൈബ്രോയ്ഡ് നീക്കംചെയ്യേണ്ടതില്ല. എന്നാല്‍ അവയുടെ വളര്‍ച്ച നിരീക്ഷിക്കേണ്ടതാണ്. പെട്ടെന്ന് വളരുകയോ രോഗലക്ഷണങ്ങള്‍ പ്രകടിപ്പിക്കുകയോ ചെയ്യുമ്പോള്‍ അവ നീക്കംചെയ്യണം.

വലുതും, അമിതരക്തസ്രാവം, ചുറ്റുമുള്ള അവയവങ്ങളില്‍ സമ്മര്‍ദം തുടങ്ങിയവ ഉണ്ടാക്കുന്ന ഫൈബ്രോയ്ഡ് നീക്കംചെയ്യുകതന്നെ വേണം. സാധാരണയായി കുട്ടികളൊക്കെയായ സ്ത്രീകളില്‍ ഗര്‍ഭപാത്രം നീക്കംചെയ്യുന്ന ഓപ്പറേഷനാ (ഒ്യലൃെേലരീാ്യ) ണ് ചെയ്യുക. മുഴകള്‍ മാത്രം നീക്കംചെയ്യുന്ന ഓപ്പറേഷന്‍ (ങ്യീാലരീാ്യ) ഗര്‍ഭപാത്രം സംരക്ഷിക്കേണ്ടവര്‍ക്കാണ് ചെയ്യുന്നത്. പലപ്പോഴും മുഴകള്‍ നീക്കംചെയ്തശേഷം മറ്റു മുഴകള്‍ വളര്‍ന്ന് വീണ്ടും രോഗലക്ഷണങ്ങള്‍ കാണിക്കാറുണ്ട്. ഗര്‍ഭാശയ മുഴകള്‍ക്കുള്ള ഓപ്പറേഷന്‍ വയറുതുറന്നോ, കീഹോള്‍വഴിയോ ചെയ്യാന്‍സാധിക്കും.

ഫൈബ്രോയ്ഡിന്റെ രക്തക്കുഴലുകളെ ബ്ളോക്ക്ചെയ്യുന്ന (ഋായീഹശമെശീിേ)   എന്ന ചികിത്സാരീതിയുണ്ട്. ചില മരുന്നുകള്‍കൊണ്ട് ഓപ്പറേഷനു മുമ്പായി മുഴകളെ താല്‍ക്കാലികമായി ചുരുക്കാന്‍സാധിക്കും. എന്നാല്‍ മരുന്നു നിര്‍ത്തിയാല്‍ അവ തിരിച്ച് പഴയ വലുപ്പത്തിലെത്തും.

ഗര്‍ഭാശയമുഴകള്‍ അര്‍ബുദമായി മാറനുള്ള സാധ്യത  0.5% മാത്രമാണ്.ഇങ്ങിനെ സംഭവിക്കാനുള്ള സാധ്യത വളരെ പെട്ടെന്ന് വളരുന്ന മുഴകളിലും, ആര്‍ത്തവവിരാമശേഷം വലുതാകുന്ന മുഴകളിലും മുന്നില്‍ക്കാണേണ്ടതാണ്. ഗര്‍ഭാശയമുഴകള്‍ക്കെല്ലാം ഓപ്പറേഷന്‍ ആവശ്യമില്ലെങ്കിലും, കൃത്യമായ ഇടവേളകളിലെ പരിശോധന ഒഴിച്ചുകൂടാനാവാത്തതാണ്.

ഡോ. എസ് ശ്രീകല

തിരുവനന്തപുരം എസ്‌യുടി ആശുപത്രിയില്‍ ഡോക്ടറാണ് ലേഖിക

വാടകഗര്‍ഭധാരണത്തിലെ 'ധാര്‍മികത'

 

ഇന്ത്യയില്‍ വാടകഗര്‍ഭധാരണം നിയന്ത്രിക്കുന്ന ബില്‍ കേന്ദ്ര മന്ത്രിസഭ പാസാക്കി. പാര്‍ലമെന്റ് അംഗീകരിക്കുകയാണെങ്കില്‍ ജമ്മു കശ്മീര്‍ ഒഴികെ രാജ്യത്താകമാനം നിയമം നിലവില്‍വരും. വാടകഗര്‍ഭധാരണ മേഖലയിലുള്ള വ്യാപാരം നിരോധിക്കലും ധാര്‍മികവും പരോപകാരപ്രദവുമായ വാടകഗര്‍ഭധാരണം പ്രോത്സാഹിപ്പിക്കലുമാണ് ബില്ലിന്റെ ഉദ്ദേശ്യമെന്ന് കേന്ദ്ര ആരോഗ്യമന്ത്രാലയം പറയുന്നു.

ആധുനിക ശാസ്ത്രസാങ്കേതികവിദ്യയുടെ വികാസത്തിന്റെ ഭാഗമായി രൂപംകൊണ്ട കൃത്രിമഗര്‍ഭധാരണ സമ്പ്രദായമാണ് വാടകഗര്‍ഭധാരണം (Surrogacy). ഗര്‍ഭം ധരിക്കുന്ന സ്ത്രീക്ക് അവര്‍ പ്രസവിക്കുന്ന കുഞ്ഞിനുമേല്‍ അവകാശമില്ലാത്ത വിധത്തിലാണ് ‘ഭൂരിഭാഗം വാടകഗര്‍ഭധാരണവും. ഗര്‍ഭധാരണശേഷിയില്ലാത്തതോ, ഗര്‍ഭം ധരിച്ചാല്‍ കുഞ്ഞിനോ അമ്മയ്ക്കോ അപകടസാധ്യതയുള്ളതോ, ഗര്‍ഭം ധരിക്കാനും പ്രസവിക്കാനും താല്‍പ്പര്യമില്ലാത്തതോ, ദമ്പതികളില്‍ ആര്‍ക്കെങ്കിലും പ്രത്യുല്‍പ്പാദനപരമായ പ്രശ്നങ്ങളുള്ളതോ തുടങ്ങി നിരവധി സാഹചര്യങ്ങളില്‍ വാടകഗര്‍ഭധാരണം  പ്രയോജനപ്പെടുത്താറുണ്ട്. വ്യവസ്ഥാപിതമായി വിവാഹിതരാവാന്‍ താല്‍പ്പര്യമില്ലാത്തവരും ഒറ്റയ്ക്ക് കഴിയാനാഗ്രഹിക്കുന്ന സ്ത്രീ– പുരുഷന്മാരും സ്വവര്‍ഗരതിക്കാരും ഈ സംവിധാനത്തെ ആശ്രയിക്കാറുണ്ട്. വന്‍ ലാഭസാധ്യതയുള്ള ഒരു വ്യാപാരമായി വാടകഗര്‍ഭധാരണം മാറിയതോടെ ആ മേഖലയിലെ ചൂഷണവും വര്‍ധിച്ചു. ലോകത്ത് പല രാജ്യങ്ങളിലും വ്യാപാരാടിസ്ഥാനത്തിലുള്ള വാടകഗര്‍ഭധാരണം നിയന്ത്രണ വിധേയമായും സ്വതന്ത്രമായും നിലനില്‍ക്കുന്നുണ്ട്.

ഇന്ത്യയില്‍ 2002 മുതല്‍ വ്യാപാരാടിസ്ഥാനത്തിലുള്ള വാടക ഗര്‍ഭധാരണത്തിന് നിയമപരമായി അംഗീകാരമുണ്ട്. പല വിദേശരാജ്യങ്ങളിലും ആവശ്യമായ ചെലവിന്റെ മൂന്നിലൊന്നു മതി എന്നതും വ്യവസ്ഥകള്‍ താരതമ്യേന കര്‍ശനമല്ലെന്നതും ഇന്ത്യയില്‍ കൃത്രിമഗര്‍ഭധാരണ സമ്പ്രദായത്തിന്റെ കച്ചവടസാധ്യത വര്‍ധിപ്പിച്ചു. സ്വന്തം ശരീരത്തിനുമേല്‍ സ്വയംനിര്‍ണയാവകാശം സ്ത്രീക്ക് അനുവദിച്ചിട്ടില്ലാത്തൊരു സമൂഹമായ ഇന്ത്യയില്‍ വാടകഗര്‍ഭധാരണത്തിന് സ്ത്രീകളെ മറ്റുള്ളവര്‍ പ്രേരിപ്പിക്കുന്നത് വ്യാപകമാണ്. കടുത്ത ദാരിദ്യ്രം, ഭത്താവിന്റെയും ഭര്‍തൃവീട്ടുകാരുടെയും മറ്റ് ബന്ധുക്കളുടെയും  സമ്മര്‍ദം തുടങ്ങിയവ സ്വയംതാല്‍പ്പര്യമില്ലാതെ ഗര്‍ഭപാത്രം വാടകയ്ക്ക് നല്‍കാന്‍ സ്ത്രീകളെ പ്രേരിപ്പിക്കുന്നുണ്ട്. ഉദാരമായ കരാര്‍വ്യവസ്ഥകള്‍ ഗര്‍ഭധാരണത്തിന് തയ്യാറാവുന്ന സ്ത്രീയുടെ ആരോഗ്യത്തെയും തുടര്‍ജീവിതത്തെയും പ്രതികൂലമായി ബാധിക്കുന്ന സ്ഥിതിയുമുണ്ട്. ഈ സാഹചര്യത്തിലാണ് കേന്ദ്രസര്‍ക്കാര്‍ വാടകഗര്‍ഭധാരണ നിയന്ത്രണബില്‍ കൊണ്ടുവരുന്നത്.

പെട്ടെന്ന് കേള്‍ക്കുമ്പോള്‍ ഇതൊരു സ്വീകാര്യമായ നിയമമാണെന്നു തോന്നിയേക്കാം. സ്ത്രീശരീരം വ്യാപകമായി ചൂഷണം ചെയ്യപ്പെടുന്നത് ഇല്ലാതാക്കാനുള്ള നീക്കമെന്നോര്‍ത്ത് ആശ്വാസവും തോന്നാം. എന്നാല്‍, കേന്ദ്രസര്‍ക്കാര്‍ ധാര്‍മികതയുടെ പേരിലാണ് നിയമരൂപീകരണത്തിന് ശ്രമിക്കുന്നത്. എന്താണ് ആ ധാര്‍മികത?

ജപ്പാനിലെ ഒരു ദമ്പതിക്കുവേണ്ടി 2007ല്‍ ഇന്ത്യക്കാരിയായ  സ്ത്രീ വാടകഗര്‍ഭധാരണം നടത്തിയിരുന്നു. കുഞ്ഞിനെ പ്രസവിക്കുന്നതിനുമുമ്പ് ദമ്പതികള്‍ വേര്‍പിരിഞ്ഞതിനെ തുടര്‍ന്ന് കുഞ്ഞ് അനാഥയായി. സമാന അനിശ്ചിതത്വം ഗര്‍ഭം ധരിച്ച മറ്റൊരു സ്ത്രീയുടെ കാര്യത്തിലുമുണ്ടായി. ദാരിദ്യ്രം  കാരണം ഗര്‍ഭപാത്രം വാടകയ്ക്ക് നല്‍കേണ്ടിവന്ന ഇന്ത്യന്‍സ്ത്രീ പ്രസവവേദനയ്ക്കിടെ ആശുപത്രിയില്‍ വീണ് മരിച്ചു. സ്ത്രീയുടേത് അപകടമരണമാണെന്ന് ഡോക്ടര്‍ വിധിയെഴുതിയതോടെ അവരുടെ കുടുംബത്തിന് സഹായമൊന്നും ലഭിച്ചില്ല. ദാരിദ്യ്രത്തിന് പരിഹാരവുമുണ്ടായില്ല. ഇത്തരം അനുഭവങ്ങളാണ് വാടകഗര്‍ഭം ധരിക്കാന്‍ തയ്യാറാകുന്ന സ്ത്രീയുടെയും അവര്‍ പ്രസവിക്കുന്ന കുഞ്ഞിന്റെയും ജീവിതം നേരിടുന്ന വെല്ലുവിളി എന്നതുകൊണ്ട് കേന്ദ്ര സര്‍ക്കാര്‍ ഉദ്ദേശിക്കുന്നത്. എന്നാല്‍, അത് പരിഹരിക്കാന്‍ ആവശ്യമായ നിബന്ധനകളല്ല ബില്ലില്‍ ഉള്ളത്. മറിച്ച്, കേന്ദ്രസര്‍ക്കാര്‍ സംരക്ഷിക്കാനാഗ്രഹിക്കുന്നത് സദാചാരത്തെ സംബന്ധിക്കുന്ന യാഥാസ്ഥിതിക മൂല്യമാണ്. അതോടൊപ്പം ഇന്ത്യന്‍ പൌരരുടെ അവകാശങ്ങളില്‍ ബില്ലിലൂടെ വിവേചനമേര്‍പ്പെടുത്തുകയും ചെയ്യുന്നു. ബില്ലിന്റെ ഉള്ളടക്കം  പരിശോധിക്കുമ്പോള്‍ അത് വ്യക്തമാകും:

  • വിദേശികള്‍ക്കുവേണ്ടി ഇന്ത്യയില്‍ വാടകഗര്‍ഭധാരണം അനുവദിക്കില്ല.
  • വ്യവസ്ഥാപിത രീതിയില്‍ വിവാഹിതരായി കുറഞ്ഞത് അഞ്ചു വര്‍ഷമെങ്കിലും ഒരുമിച്ചു ജീവിക്കുന്ന ഇന്ത്യന്‍ദമ്പതിക്ക് മാത്രമേ വാടകഗര്‍ഭധാരണം തേടാനാവൂ.
  • വന്ധ്യതയുള്ള ഇന്ത്യന്‍ദമ്പതികള്‍ക്ക് മാത്രമേ വാടകഗര്‍ഭപാത്രം ലഭിക്കാന്‍ അര്‍ഹതയുള്ളൂ.
  • ദമ്പതികളില്‍ പുരുഷന് 26– 55 വയസ്സും സ്ത്രീക്ക് 23– 50 വയസ്സും പ്രായപരിധിയുണ്ട്.
  • സ്വവര്‍ഗരതിക്കാര്‍ക്കും ഒറ്റയ്ക്ക് ജീവിക്കുന്ന സ്ത്രീ– പുരുഷന്മാര്‍ക്കും വ്യവസ്ഥാപിത വിവാഹത്തിലൂടെയല്ലാതെ ഒരുമിച്ചു ജീവിക്കുന്നവര്‍ക്കും വാടകഗര്‍ഭധാരണം തേടാന്‍ അര്‍ഹതയില്ല.
  • ഗര്‍ഭപാത്രം നല്‍കാന്‍ തയ്യാറാകുന്ന സ്ത്രീക്ക്, അവരുടെ ചികിത്സയ്ക്കും മരുന്നിനുമല്ലാതെ ആവശ്യക്കാര്‍ പണം നല്‍കാന്‍ പാടില്ല.
  • ഏറ്റവുമടുത്ത ബന്ധുവില്‍നിന്ന് മാത്രമേ ഗര്‍ഭപാത്രം തേടാവൂ.
  • ഒരിക്കല്‍മാത്രമേ വാടകഗര്‍ഭധാരണം നടത്താനും സ്വീകരിക്കാനും പാടുള്ളൂ.

ഈ വ്യവസ്ഥകളില്‍ വിദേശികള്‍ക്ക് വിലക്കേര്‍പ്പെടുത്തുന്നതു മാത്രമാണ് വ്യാപാരനിരോധനവുമായി പ്രകടബന്ധമുള്ളത്. മറ്റുള്ളവ നിയന്ത്രണമെന്ന പേരില്‍ ഇന്ത്യന്‍ പൌരരുടെ അവകാശങ്ങളെത്തന്നെ പ്രകടമായി നിരോധിക്കലാണ്. സഹജീവിതവും സ്വവര്‍ഗരതിയും സ്ത്രീയോ പുരുഷനോ തനിച്ചു ജീവിക്കുകയെന്നതും നിയമവിരുദ്ധമല്ലാത്ത സമൂഹത്തില്‍, ആ വിഭാഗത്തിലുള്ളവര്‍ക്ക് വാടകഗര്‍ഭധാരണം തേടാന്‍ അര്‍ഹതയില്ലെന്നു പറയുന്നതാണ് അധാര്‍മികത. വ്യവസ്ഥാപിത വിവാഹമെന്ന സ്ഥാപനത്തിനുള്ളിലെ ക്രൂരമായ ചൂഷണം കാണാതെ, അതിനെ സംരക്ഷിക്കാന്‍ ശ്രമിക്കുന്നതാണ് അധാര്‍മികത.

സ്ത്രീയുടെ ശരീരം അവളുടെ താല്‍പ്പര്യമോ അനുവാദമോ ഇല്ലാതെ ഉപയോഗിക്കുന്ന അവസ്ഥ ഏതു സാഹചര്യത്തിലും എതിര്‍ക്കപ്പെടണം. അതാണ് ധാര്‍മികത. ഉഭയസമ്മതമില്ലാത്ത ലൈംഗികബന്ധം ഭാര്യാഭര്‍തൃ ബന്ധത്തിലുള്‍പ്പെടെ കുറ്റകരമാണെന്ന് ജസ്റ്റിസ് വര്‍മ കമീഷന്‍ നിര്‍ദേശിച്ചത് ആ ധാര്‍മികതയുടെ അടിസ്ഥാനത്തിലാണ്. ആ നിര്‍ദേശം കേന്ദ്രസര്‍ക്കാര്‍ അംഗീകരിക്കാതിരിക്കുന്നത് കുടുംബ ബന്ധം തകരുമെന്ന സദാചാരപ്രശ്നത്തിന്റെ പേരിലാണ്. ദാരിദ്യ്രം കാരണം ഭാര്യമാരെ വില്‍ക്കുന്ന (കാര്‍ഷിക കടം വീട്ടാനായി ഭാര്യമാരെ വില്‍ക്കുന്ന ഉത്തരേന്ത്യന്‍ സംസ്ഥാനങ്ങളിലെ സ്ഥിതി റിപ്പോര്‍ട്ട് ചെയ്യപ്പെട്ടിട്ടുണ്ട്) അവസ്ഥ ഇല്ലാതാക്കുന്നതില്‍ പ്രകടമാവാത്ത ധാര്‍മികത എന്തുകൊണ്ടാണ് ഗര്‍ഭധാരണത്തില്‍ കടന്നുവരുന്നത്? അപ്പോള്‍, സദാചാരത്തിനെന്നപോലെ ധാര്‍മികതയ്ക്കും സ്ത്രീയുടെ അടിമത്താവസ്ഥയെന്നു മാത്രമേ ഈ സാഹചര്യത്തില്‍ അര്‍ഥമുള്ളൂ.

കച്ചവടത്തിന്റെ പേരില്‍ വാടകഗര്‍ഭധാരണ മേഖലയില്‍ നിലനില്‍ക്കുന്ന ചൂഷണം അവസാനിപ്പിക്കുകയാണ് ഉദ്ദേശ്യമെങ്കില്‍ കര്‍ശനമായ നിബന്ധനകള്‍ സ്ത്രീകള്‍ക്കനുകൂലമായി കൊണ്ടുവരികയാണ് വേണ്ടത്. ഗര്‍ഭപാത്രം കുറഞ്ഞ നിരക്കില്‍ ലഭിക്കുമെന്നത് വിദേശികളെ ആകര്‍ഷിക്കുന്നുവെങ്കില്‍ വിദേശികള്‍ക്കുളള നിരക്ക് സര്‍ക്കാര്‍തന്നെ വര്‍ധിപ്പിച്ച് ഏകീകരിക്കണം. വാടകയ്ക്ക് ഗര്‍ഭപാത്രം നല്‍കാന്‍ സമ്മതമുള്ള സ്ത്രീയുമായി, ആ സ്ത്രീക്ക് അനുകൂലമായ വിധത്തില്‍, ആവശ്യക്കാര്‍ (വിദേശിയായാലും സ്വദേശിയായാലും) ശക്തമായ കരാറിലേര്‍പ്പെടാന്‍ വ്യവസ്ഥ ചെയ്യണം. സ്ത്രീയുടെ ശരീരവുമായി ബന്ധപ്പെട്ട്, സ്ത്രീതന്നെ കക്ഷിയാകുന്ന കരാര്‍ ഏത് പരിധിവരെയാകാമെന്ന് തീരുമാനിക്കാന്‍ സ്ത്രീക്ക് അവകാശമുണ്ടാകണം.

വാടകഗര്‍ഭധാരണത്തിന് ഒരു സ്ത്രീ തയ്യാറാണെങ്കില്‍, ബന്ധുവിനാണോ സുഹൃത്തിനാണോ അന്യര്‍ക്കാണോ തന്റെ ഗര്‍ഭപാത്രം പ്രയോജനപ്പെടേണ്ടത് എന്നു തീരുമാനിക്കേണ്ടത് ആ സ്ത്രീയാണ്. ശരീരവുമായി ബന്ധപ്പെട്ട ഒരു ലിഖിത ഉടമ്പടിയുമില്ലാത്ത വിവാഹത്തിന്  നല്‍കുന്ന പവിത്രതയും ദാമ്പത്യബന്ധത്തിനും ബന്ധുത്വത്തിനും നല്‍കുന്ന ധാര്‍മികതയും സ്ത്രീയുടെ ശരീരത്തിനുമേല്‍ സ്ത്രീക്കുള്ള അവകാശത്തിനു നല്‍കാതിരിക്കുന്നത് കടുത്ത സ്ത്രീവിരുദ്ധത തന്നെയാണ്. യാഥാസ്ഥിതികത്വത്തില്‍ അധിഷ്ഠിതമായ സദാചാര ധാര്‍മികതയല്ല, ഭരണഘടനയിലധിഷ്ഠിതമായ ജനാധിപത്യ ധാര്‍മികതയാണ് ഇന്ത്യയില്‍ സംരക്ഷിക്കപ്പെടേണ്ടത്

ഗര്‍ഭിണികള്‍ അറിയേണ്ടതെല്ലാം

 

നമുക്ക് അമ്മയാകുന്നതിനു മുമ്പുള്ള തയ്യാറെടുപ്പിലേക്കു  കടക്കാം. അമ്മയ്ക്കു പ്രശ്നങ്ങളൊന്നും കൂടാതെ, ആരോഗ്യമുള്ള ഒരു കുഞ്ഞിനെ കിട്ടുകയാണല്ലോ നമ്മുടെ ലക്ഷ്യം. അതിന് അവിചാരിതമായുണ്ടാകുന്ന ഗര്‍ഭത്തെക്കാള്‍ മുന്‍കൂട്ടി പ്ളാന്‍ ചെയ്ത് ഗര്‍ഭം ധരിക്കുന്നതാണ് എന്തുകൊണ്ടും നല്ലത്. അതുകൊണ്ട് ഗൈനക്കോളജിസ്റ്റിനെ കണ്ട് പരിശോധന നടത്തി പ്രശ്നങ്ങള്‍ ഇല്ലെന്ന് ഉറപ്പുവരുത്തേണ്ടതുണ്ട്. നിങ്ങള്‍ക്ക് എന്തെങ്കിലും അസുഖങ്ങളുണ്ടോ എന്തെങ്കിലും മരുന്നുകള്‍ കഴിക്കുന്നുണ്ടോ കുടുംബത്തിലുള്ളവരുടെ അസുഖങ്ങള്‍, ബുദ്ധിവൈകല്യമുള്ള കുട്ടികള്‍ ഇവയെക്കുറിച്ചൊക്കെ അന്വേഷിക്കുകയും നിങ്ങളെ വിശദമായി പരിശോധിക്കുകയും ചില രക്തപരിശോധനകള്‍ നടത്തുകയും ചെയ്യും. ഇവയില്‍ ഏറ്റവും പ്രധാനം തൈറോയ്ഡ് ഗ്രന്ഥിയുടെ പ്രവര്‍ത്തനവും പ്രമേഹവുമാണ്.

നിങ്ങള്‍ ഗര്‍ഭനിരോധന ഗുളികകള്‍ കഴിക്കുന്ന ആളാണെങ്കില്‍ അതു നിറുത്തി മൂന്നു മാസം കഴിഞ്ഞ് ഗര്‍ഭം ധരിക്കുന്നതാണ് ഉത്തമം. ഇത് കുഞ്ഞിന് അംഗവൈകല്യം ഉണ്ടാകും എന്നതു കൊണ്ടല്ല, മാസമുറ കൃത്യമാക്കാനാണ്. പുകവലി. മദ്യപാനം, മറ്റു ലഹരി മരുന്നുകള്‍ മുതലായവയുടെ ഉപയോഗം ഗര്‍ഭധാരണത്തിനു മുമ്പ് നിറുത്തണം. നിങ്ങള്‍ പുകവലിക്കുന്നതും മറ്റുള്ളവര്‍ വലിക്കുന്ന പുകയേല്‍ക്കുന്നതും മാസം തോറും അണ്ഡാശയത്തില്‍ നിന്ന് പുറത്തുവരുന്ന അണ്ഡത്തേയും ബീജങ്ങളുടെ ചലനശക്തിയേയും ബാധിക്കും. വന്ധ്യതയുടെ കാരണങ്ങളില്‍ 13 ശതമാനം പുകവലി മൂലമാണ്. മാത്രമല്ല, അത് ഗര്‍ഭം അലസല്‍, രക്തസ്രാവം, മാസം തികയാതെയുള്ള പ്രസവം,  തൂക്കക്കുറവും ബുദ്ധിമാന്ദ്യവുമുള്ള കുഞ്ഞുങ്ങള്‍ എന്നിവയ്ക്കും കാരണമാകുന്നു.

അഞ്ചാംപനി, ചിക്കന്‍പോക്സ് തുടങ്ങിയ അസുഖങ്ങള്‍ക്ക് പ്രതിരോധിക്കാനുള്ള ശേഷിയില്ലെങ്കില്‍ കുത്തിവയ്പ്പെടുത്തിട്ട് മൂന്നു മാസം കഴിഞ്ഞിട്ട് ഗര്‍ഭിണിയാകുന്നതാണ് ഉത്തമം. ഗര്‍ഭിണികള്‍ക്ക് അഞ്ചാംപനി പിടിപെട്ടാല്‍ ഗുരുതരമായ അംഗവൈകല്യങ്ങള്‍ ഉണ്ടാകാം.

അമ്മയ്ക്ക് ആരോഗ്യകരമായ തൂക്കം ഉണ്ടായിരിക്കുന്നതാണ് നല്ലത്. തൂക്കം കൂടുതലുള്ളവരില്‍ തസമ്മര്‍ദ്ദം, പ്രമേഹം, തൂക്കക്കുറവുള്ള കുഞ്ഞുങ്ങള്‍, അംഗവൈകല്യമുള്ള കുട്ടികള്‍ എന്നിവ കൂടുതലായി കാണുന്നു. വ്യായാമമുറകളിലൂടെ തൂക്കം കുറയ്ക്കുക വഴി ധൈര്യസമേതം ഗര്‍ഭത്തെ അഭിമുഖീകരിക്കാന്‍ സാധിക്കുന്നു. മാത്രമല്ല, ഈ വ്യായാമമുറകള്‍ ഗര്‍ഭകാലത്തും തുടരുക വഴി അമ്മയ്ക്കും കുഞ്ഞിനും പല പ്രയോജനങ്ങളും കിട്ടുന്നു. പല്ലുവേദനയുള്ളവര്‍ ഡെന്റിസ്റ്റിനെ കണ്ടും ചികിത്സിക്കണം. അല്ലെങ്കില്‍ മാസം തികയാതെയുള്ള പ്രസവത്തിനും കാരണമാകും.

മറ്റ് അസുഖമുള്ള സ്ത്രീകള്‍ക്ക് ഗൈനക്കോളജിസ്റ്റിനു പുറമെ അവര്‍ നിര്‍ദ്ദേശിക്കുന്ന സ്പെഷ്യലിസ്റ്റ് ഡോക്ടര്‍മാരെ കൂടി കണ്ട് ഒരുമിച്ച് ചികിത്സ വേണ്ടിവരും. ഹൃദയത്തിന് അസുഖമുള്ളവര്‍, പ്രമേഹരോഗികള്‍, അപസ്മാരം, തൈറോയ്ഡ് ഗ്രന്ഥിയുടെ പ്രവര്‍ത്തനക്ഷമതയില്ലാത്തവര്‍, ശ്വാസംമുട്ടുള്ളവര്‍ എന്നിവരെല്ലാം ഇതിനു ഉദാഹരണങ്ങളാണ്, പ്രത്യേകിച്ച് ഹൃദയവാല്‍വിനു ചികിത്സ തേടുന്നവര്‍. വാര്‍ഫാറിന്‍ എന്ന രക്തം പിടിക്കാതിരിക്കാന്‍ ഉപയോഗിക്കുന്ന മരുന്ന് മാറ്റിയിട്ട് മറുപിള്ള വഴി കുഞ്ഞിലേക്കു പ്രവേശിക്കാത്ത ഹെപാരിന്‍ എന്ന മരുന്ന് ഉപയോഗിക്കണം. മാത്രമല്ല, ഹൃദയത്തിന് അസുഖമുള്ളവര്‍ ഹൃദയപ്രവര്‍ത്തനം ശരിയാണെന്ന് ഡോക്ടര്‍ ഉപദേശിച്ചാല്‍ മാത്രം ഗര്‍ഭം ധരിക്കുക. അല്ലെങ്കില്‍ അതിനു പ്രതിവിധി എടുത്ത ശേഷം മതി ഗര്‍ഭധാരണം. എന്തെന്നാല്‍, ഗര്‍ഭിണികള്‍ക്ക് ഹൃദയമിടിപ്പ് കൂടും രക്തത്തിന്റെ അളവും കൂടും ഹൃദയത്തിന്റെ പമ്പിംഗും കൂടും. ഇത് ദോഷഫലങ്ങളുണ്ടാക്കും. ഭാഗ്യവശാല്‍ ഇന്നു ഗര്‍ഭധാരണം പാടില്ല എന്നു പറയുന്ന അസുഖങ്ങള്‍ വളരെ കുറവാണ്.

അപസ്മാരമുള്ള 90 ശതമാനം പേര്‍ക്കും പ്രശ്നങ്ങളൊന്നും കാണാറില്ല. എന്നാലും മരുന്ന് കഴിച്ച് ഫിറ്റ്സ് നിയന്ത്രണവിധേയമാക്കിയിട്ട് ഗര്‍ഭം ധരിക്കുക. കുഞ്ഞിന് വളരെ ദോഷം ചെയ്യാത്ത മരുന്നുകള്‍ ഉപയോഗിക്കുക. മാത്രമല്ല, ഈ മരുന്നുകള്‍ ഉപയോഗിക്കുന്നവര്‍ ഫോളിക് ആസിഡ് എന്ന ഗുളിക  ഗര്‍ഭകാലത്തു മുഴുവന്‍ കഴിക്കണം. ഇതുവഴി തലച്ചോറിനുണ്ടാകുന്ന ചില അസുഖങ്ങള്‍ കുറയ്ക്കാന്‍ സാധിക്കും.

പ്രമേഹമാണ് മറ്റൊരു പ്രധാന വില്ലന്‍. രക്തത്തിലെ പഞ്ചസാരയുടെ അളവ് സാധാരണ നിലയിലാക്കിയ ശേഷമേ ഗര്‍ഭം ധരിക്കാന്‍ പാടുള്ളൂ. അല്ലെങ്കില്‍ ഗര്‍ഭം അലസല്‍, അംഗവൈകല്യം, മാസം തികയുന്നതിനു മുമ്പ് പ്രസവിക്കുക, വെള്ളം നേരത്തെ പൊട്ടിപ്പോവുക, ഗര്‍ഭപാത്രത്തില്‍ വച്ചു തന്നെയുള്ള കുഞ്ഞിന്റെ മരണം തുടങ്ങിയ പ്രശ്നങ്ങളുണ്ടാവാം. ചിലപ്പോള്‍ വളരെ തൂക്കം കൂടിയ കുഞ്ഞായിരിക്കാം. ഇതുവഴി കുഞ്ഞിനു കോട്ടല്‍, മഞ്ഞപ്പിത്തം, ശ്വാസംമുട്ടല്‍ മുതലായവയും ഉണ്ടാകും. എന്നാല്‍, രക്തത്തിലെ പഞ്ചസാരയുടെ അളവ് സാധാരണഗതിയിലാക്കിയ ശേഷം മാത്രം ഗര്‍ഭം ധരിക്കുകയാണെങ്കില്‍ മുകളില്‍ പറഞ്ഞ പ്രശ്നങ്ങളൊന്നും ഉണ്ടാവില്ല. ഗര്‍ഭകാലത്തു മുഴുവന്‍ ഒരു എന്റോക്രൈനോളജിസ്റ്റിന്റെ സഹായത്തോടെ രക്തത്തിലെ പഞ്ചസാരയുടെ അളവ് സാധാരണഗതിയിലാക്കേണ്ടതും വളരെ പ്രധാനമാണ്. ഇതിനു ചിലപ്പോള്‍ ഇന്‍സുലിന്‍ എടുക്കേണ്ടിവരും.

ഗര്‍ഭകാലത്തിനു മുമ്പ് കഴിച്ചുകൊണ്ടിരിക്കുന്ന മരുന്നുകള്‍ പ്രധാനമാണ്. മുഖക്കുരുവിനു കഴിക്കുന്ന റെറ്റിനോയ്ഡ്സ്, ടെട്രാസൈക്ളിന്‍, കൊളസ്ട്രോള്‍ നിയന്ത്രിക്കാനുള്ള സ്റ്റാറ്റിന്‍സ് ഇവയുടെ ഉപയോഗം നിറുത്തണം. അധിക പ്രഷറിനു കഴിക്കുന്ന എസിഇ ഇന്‍ഹിബിറ്റേഴ്സ് എന്ന മരുന്നിനു പകരം കുഞ്ഞിനു ദോഷം ചെയ്യാത്ത മരുന്നിലേക്കു മാറണം.

എല്ലാം ശരിയായി നിങ്ങള്‍ ഗര്‍ഭം ധരിക്കാന്‍ തുടങ്ങുന്നതിന് ഒരു മാസം മുമ്പ് ഫോളിക് ആസിഡ് എന്ന ഗുളിക കഴിച്ചുതുടങ്ങണം. തലച്ചോറിലും സ്പൈനല്‍ കോഡിലും ഉണ്ടാകുന്ന ഒരു അസുഖം ഇതു കുറയ്ക്കും.

പ്രശ്നങ്ങളുള്ള ഗര്‍ഭിണികള്‍ ആശുപത്രി തിരഞ്ഞെടുക്കുമ്പോള്‍ ശ്രദ്ധിക്കണം. ഗര്‍ഭിണിയായിരിക്കുമ്പോള്‍ ആവശ്യമായ സ്പെഷ്യലിസ്റ്റുകള്‍, സങ്കീര്‍ണ്ണ പ്രസവമെടുത്തു പരിചയമുള്ള ഗൈനക്കോളജിസ്റ്റുകള്‍, പ്രസവശേഷം കുഞ്ഞിന്റെ ഏതു പ്രശ്നവും പരിഹരിക്കാനുള്ള നിയോനാറ്റോളജിസ്റ്റ്, ജനിച്ച കുഞ്ഞിനെ പരിചരിക്കാനുള്ള ഐസിസിഐ സൌകര്യം ഇവയെല്ലാം ഉണ്ടായിരിക്കണം.

ഡോ. ഗിരിജ ഗുരുദാസ്

തിരുവനന്തപുരം കിംസ് ആശുപത്രിയിലെ സീനിയര്‍ കണ്‍സള്‍ട്ടന്റാണ് ലേഖിക.

3.14285714286
സ്റ്റാറുകള്‍ക്കു മുകളിലൂടെ നീങ്ങി, റേറ്റ് ചെയ്യുന്നതിനായി ക്ലിക്ക് ചെയ്യുക.
നിങ്ങളുടെ നിര്‍ദ്ദേശം പോസ്റ്റ് ചെയ്യുക

(നിങ്ങള്‍ക്ക് അന്വേഷണങ്ങള്‍ പോസ്റ്റ് ചെയ്യുകയോ ചര്‍ച്ച ചെയ്യുകയോ ചേര്‍ക്കുകയോ ചെയ്യാം)

Enter the word
നവിഗറ്റിഒൻ
Back to top