Skip to content. | Skip to navigation

Vikaspedia

പങ്കുവയ്ക്കുക
Views
  • നില എഡിറ്റ്‌ ചെയുവാൻ വേണ്ടി തയ്യാ

കുട്ടികളിലെ രോഗങ്ങള്‍

കുട്ടികളിലെ വിവിധ രോഗങ്ങള്‍

കുഞ്ഞുങ്ങള്‍ പുതിയ ലോകവുമായി പൊരുത്തപ്പെടാന്‍ തുടങ്ങുമ്പോള്‍ തന്നെ രോഗങ്ങള്‍ പിടിപെടാനുള്ള സാദ്ധ്യതയും കൂടുതലാണ്.ഇത്തരം രോഗങ്ങള്‍ പിടിപെടാതിരിക്കുവാനുള്ള ചില മുന്‍കരുതലുകള്‍ മാതാപിതാക്കള്‍ ശ്രദ്ധിക്കേണ്ടതുണ്ട്. പ്രധിരോധ കുത്തിവെയ്പ്പുകള്‍ പ്രധാനമാണ്. എല്ലാ സര്‍ക്കാര്‍ ആശുപത്രികളിലും അംഗന്‍വാടികളിലും , ഹെല്‍ത്ത്  സെന്‍ററുകളിലും, പ്രധിരോധ കുത്തിവെയ്പ്പുകള്‍ സൗജന്യമായി ചെയ്തു കൊടുക്കുന്നുണ്ട്. കുട്ടികളെ പിടികൂടുന്ന ചില പ്രധാന രോഗങ്ങളാണ് പിള്ളവാതം, ക്ഷയരോഗം ,ഡിഫ്തീരിയ ,വില്ലന്‍ചുമ , അഞ്ചാംപനി.

പിള്ളവാതം

5 വയസ്സിനു താഴെയുള്ള കുട്ടികളെയാണ് ഈ രോഗം ബാധിക്കുന്നത്.ചില പ്രത്യേകതരം വൈറസ്സുകളാണ് ഈ രോഗത്തിന്‍റെ കാരണം. തലച്ചോറിനെ ബാധിച്ചുണ്ടാകുന്ന ഈ അസുഖം അപൂര്‍വമായി മുതിര്‍ന്നവരെയും പിടികൂടാറുണ്ട്.ഗുരുതരമായ രോഗമാണ് പിള്ളവാതം.രോഗാണുക്കള്‍ ശരീരത്തില്‍ പ്രവേശിച്ചാല്‍ രണ്ടാഴ്ചക്കകം രോഗലക്ഷണങ്ങള്‍ കണ്ടുതുടങ്ങും. കുഞ്ഞിനു അതിയായ ക്ഷീണം ,പനിയും തലവേദനയും , കഴുത്ത് തിരിക്കാന്‍ വിഷമം,നടക്കുമ്പോള്‍ മുടന്തിപ്പോവുക, തുടങ്ങിയവ അനുഭവപ്പെടുന്നുണ്ടെങ്കില്‍ രോഗം തുടക്കമാണോ എന്ന് സംശയിക്കണം. കാല്‍,കൈ എന്നിവയ്ക്ക് ബാലക്കുറവു തോന്നുകയും പേശികള്‍ ശക്തിയായി വേദനിക്കുകയും ഓര്‍മ്മക്കുറവുണ്ടാവുകയും ചെയ്യും. സ്ഥിരമായ അംഗവൈകല്യത്തിനും അപൂര്‍വമായി മരണത്തിനും കാരണമാവുന്ന പിള്ളവാതം പിടിപെട്ടാല്‍ ചികിത്സിച്ചു മാറ്റുക പ്രയാസമാണ്.അതുകൊണ്ട് അതാതു സമയത്തുള്ള കുത്തിവെയ്പ്പു നടത്തി രോഗം വരാതെ സൂക്ഷിക്കാവുന്നതാണ്.

ഡിഫ്തീരിയ

ഈ ഗൗരവമേറിയ അസുഖവും 5 വയസ്സിനു താഴെയുള്ള കുട്ടികളെ ബാധിക്കുന്ന രോഗമാണ്.അപൂര്‍വമായി മുതിര്‍ന്നവരെയും പിടികൂടാറുണ്ട്. പ്രത്യേകയിനം ബാക്ടീരിയകളാണ് രോഗഹേതു. ‘കൊറൈന്‍ ബാക്ടീരിയം ഡിഫ്ടീരിയെ’ എന്ന് പേരുള്ള ബാക്ടീരിയയുടെ ഉപദ്രവം മൂലം തൊണ്ടയിലുണ്ടാകുന്ന അസ്വസ്ഥതയാണ് രോഗാരംഭം. ശക്തി കുറഞ്ഞ പനി , തൊണ്ടവേദന, ഭക്ഷണം കഴിക്കുമ്പോഴും ഉമിനീരിറക്കുമ്പോഴും വേദന, ഉന്മേഷക്കുറവ് എന്നിവ അനുഭവപ്പെടും.വായ്തുറന്നു ടോര്‍ച്ചടിച്ചു നോക്കിയാല്‍ തൊണ്ടയില്‍ ചാരം കലര്‍ന്ന വെള്ളനിറത്തിലുള്ള പാട മൂടിയിരിക്കുന്നതായി കാണാം.രോഗാണുക്കള്‍ പുറപ്പെടുവിക്കുന്ന വിഷ പദാര്‍ത്ഥത്തില്‍ നിന്നുണ്ടാകുന്ന പാട ടോന്‍സിലിനു പുറത്തായി തൊണ്ടയിലേക്ക്‌ വ്യാപിച്ചു കാണപ്പെടും. രോഗത്തിന്‍റെ പ്രകടമായ ലക്ഷണവും ഇതാണ്.ശ്വാസതടസ്സവും അനുഭവപ്പെട്ടേക്കും. രോഗം ശ്വാസനാളിയിലേക്ക് വ്യപിക്കുമ്പോഴാണ് ഏറ്റവും ഗുരുതരമായ അവസ്ഥ. രോഗപ്രതിരോധ കുത്തിവെയ്പ് എടുക്കാത്തവരിലാണ് ഈ രോഗം കണ്ടുവരുന്നത്. ആദ്യത്തെ മൂന്നും നാലും അഞ്ചും മാസങ്ങളിലായി ഡി.പി.ടി വാക്സിനേഷന്‍ കുഞ്ഞുങ്ങള്‍ക്ക്‌ കൊടുക്കണം. 16-24 മാസങ്ങള്‍ക്കുള്ളില്‍ ബൂസ്റ്റര്‍ഡോസും കൊടുക്കണം.ട്രിപ്പില്‍ ആന്‍റിജെനില്‍ ഡിഫ്തീരിയക്ക് എതിരായുള്ള വാക്സിന്‍ അടങ്ങിയിട്ടുണ്ട്.ശരീരം നീല വര്‍ണ്ണമാകുന്നതും , ശബ്ദപേടകത്തെ ബാധിച്ചു ശബ്ധതിനു തകര്‍ച്ചയുണ്ടാകുന്നതും രോഗം മൂര്‍ഛിച്ചതിന്‍റെ ലക്ഷണമാണ്. ഉടന്‍ ചികിത്സ തേടണം.രോഗം മാറിക്കിട്ടാന്‍ സഹായകമാകും.

വില്ലന്‍ചുമ

ചുമച്ചു ചുമച്ചു ശരീരം വില്ലുപോലെ വളയുന്നത് കൊണ്ടാണ് ഈ രോഗത്തിന് വില്ലന്‍ ചുമ എന്ന പേര് വന്നത്. ഇതും 5 വയസ്സിനു താഴെ പ്രായമുള്ള കുട്ടികളിലാണ്‌ കണ്ടു വരുന്നത്.വായുവിലൂടെ പകരുന്ന ഈ രോഗം പെട്ടെന്ന് തന്നെ രോഗിയില്‍നിന്നും രോഗമില്ലാത്തവരിലേക്ക് പടരും. രോഗാണുക്കള്‍ ശരീരത്തില്‍ പ്രവേശിച്ചു ഒരാഴ്ച കഴിഞ്ഞാല്‍ മാത്രമേ രോഗലക്ഷണങ്ങള്‍ പ്രകടമാകാറുള്ളൂ.ഹീമോഫിലസ്പെര്‍ടൂസിസ് എന്ന ബാക്ടീരിയയാണ് ഈ രോഗത്തിന്‍റെ രോഗഹേതു. ഒരിക്കല്‍ വന്നു പോയാല്‍ പിന്നീട് ഈ രോഗം ഉണ്ടാകാറില്ല.പ്രധാന ലക്ഷണങ്ങള്‍ മൂക്കൊലിപ്പ്,തുമ്മല്‍, നേരിയ തോതിലുള്ള പനിയും ചുമയും ,ശ്വാസമെടുക്കാന്‍ പ്രയാസം, ചുമക്കുമ്പോഴും ശ്വസിക്കുമ്പോഴും പ്രത്യേക ശബ്ദം കേള്‍ക്കുക,ശരീരത്തിന് നിറവ്യത്യാസം കണ്ടു തുടങ്ങുക, മുഖം ചുവക്കുക, ചുണ്ട് നീലനിറമായി തീരുക , ചുമച്ചു ഛര്‍ദ്ദിക്കുക,ചുമ കൂടുതല്‍ ശക്തമാവുക, കഴുത്തിലെ ഞരമ്പുകള്‍ വ്യക്തമായി കാണാന്‍ സാധിക്കുക ഇവയാണ്.

രോഗം ഒരു മാസം വരെ നീണ്ടു നില്‍ക്കും.വിശ്രമം ആവശ്യമാണ്.ചികിത്സ വൈകിയാല്‍ രോഗം മൂര്‍ഛിച്ചു ന്യുമോണിയ (ശ്വാസകോശത്തില്‍ പഴുപ്പ്) , പക്ഷാഘാതം, തുടങ്ങി ഗുരുതരമായ അവസ്ഥയുണ്ടാകാന്‍ ഇടയാകും.

അഞ്ചാം പനി

വേഗത്തില്‍ പടര്‍ന്നു പിടിക്കുന്ന ഒരു രോഗമാണ് അഞ്ചാം പനി. 5 വയസ്സില്‍ താഴെയുള്ള കുട്ടികളിലാണ് കണ്ടുവരാറുള്ളതെങ്കിലും 14 വയസ്സ് വരെയുള്ള കുട്ടികളിലും ഈ അസുഖം വരാറുണ്ട്.രോഗത്തിന് കാരണമായ ചില പ്രത്യേകയിനം വൈറസ്സുകള്‍ ശരീരത്തില്‍ പ്രവേശിച്ചാല്‍ 10 ദിവസം കഴിഞ്ഞു മാത്രമേ ലക്ഷണങ്ങള്‍ പ്രകടമാവാറുള്ളൂ. തുടക്കത്തില്‍ മൂക്കൊലിപ്പും , പനിയും,ചുമയുമുണ്ടാകും. ഇടവിട്ടുള്ള ശക്തിയായ പനിക്കുപുറമേ ചുമക്കുമ്പോള്‍ കഫം ഇളകിപ്പോവുകയുമില്ല. കണ്ണിനു ചുവപ്പ്,കണ്‍പോളകള്‍ക്ക് വീക്കം,കണ്ണില്‍ വെള്ളം നിറഞ്ഞിരിക്കുക, എന്നിവയും കാണപ്പെടും. മൂന്നുമുതല്‍ ഏഴു ദിവസങ്ങള്‍ക്കുള്ളില്‍ ശരീരത്തില്‍ മണല്‍ത്തരിപോലെയുള്ള തടിപ്പുകള്‍ പ്രത്യക്ഷപ്പെടും.ചെവിക്കും മൂക്കിനും പിറകിലായി നെറ്റിയിലും കണ്ടു വരുന്ന തടിപ്പുകള്‍ നെഞ്ചിലേക്കും അവസാനം കൈകാലുകളിലേക്കും വ്യാപിക്കുന്നു. നാക്കിനടിയില്‍ വെളുത്ത പാടുകള്‍ കാണപ്പെടാറുണ്ട്. ഇതിനെ കോപ്ലിക്സ് സ്പോട്ട് എന്നാണ് പറയുന്നത്. രോഗത്തിന്‍റെ പ്രകടമായ ലക്ഷണവും ഇത് തന്നെയാണ്.ഭക്ഷണത്തില്‍ താല്പര്യം കുറയും .അതിയായ ക്ഷീണവും ഉണ്ടാവും.

എളുപ്പം പകരുന്ന രോഗമായതിനാല്‍ വേണ്ട മുന്‍കരുതലുകള്‍ എടുക്കണം. ഉടന്‍ ചികിത്സ തേടണം . ശരിയായ ചികിത്സ നടത്തിയില്ലെങ്കില്‍ രോഗം കൂടുതല്‍ ഗുരുതരമാവാന്‍ കാരണമാവും. കൂടാതെ തലച്ചോറിനെ ബാധിക്കാനുമിടയാകും. വയറിളക്കം , ഛര്‍ദ്ദി എന്നിവയും കാണപ്പെടും.

വീട്ടുവൈദ്യം

ചുമ : കുരുമുളക് പൊടിച്ചു തേനില്‍ ചാലിച്ച് കഴിച്ചാല്‍ ചുമക്കു ശമനം കിട്ടും.

തിപ്പലിയും കല്‍ക്കണ്ടവും സമം പൊടിച്ചു തേനില്‍ ചാലിച്ചു കഴിക്കുന്നത് ചുമക്കും കഫശല്യത്തിനും നല്ലതാണു.

അമുക്കുരുപൊടി തിളപ്പിച്ച ചെറുചൂടുവെള്ളത്തില്‍ കലക്കിക്കുടിക്കുന്നത് നല്ലതാണ്.

ആടലോടകത്തില വാട്ടിപ്പിഴിഞ്ഞു ( സമൂലം ഇടിച്ചു പിഴിഞ്ഞാലും ഉത്തമം) അതിന്‍റെ നീരില്‍ ചുക്കുപൊടി ചേര്‍ത്ത് കഴിക്കുന്നതും ചുമക്കു നല്ലതാണ്.

ജീരക വെള്ളത്തില്‍ വായു ഗുളിക അരച്ച്ചേര്‍ത്ത് കഴിക്കുന്നതും നല്ലതാണ്.

കുരുമുളക് പൊടിച്ചതും തേനും നെയ്യും പഞ്ചസാരയും ചേര്‍ത്ത് രാത്രി കിടക്കാന്‍ നേരത്ത് കഴിക്കുക.ചുമ മാറും ,ദഹനം കൂടും.

പത്ത് കുരുമുളക് ഒരു കടുക്ക ഇവ രണ്ടും പൊടിച്ചു ചെറു ചൂടു വെള്ളത്തില്‍ കലക്കി രാത്രിയില്‍ സേവിക്കുക.ചുമ മാറും, നല്ല ഉറക്കം കിട്ടും.

കടുക്ക ,തിപ്പലി ,ചുക്ക്,കുരുമുളക് ഇവ സമം പൊടിച്ചു ശര്‍ക്കരയും ചേര്‍ത്ത് ഗുളിക രൂപത്തില്‍ കഴിക്കുക.ചുമയ്ക്കും ഏങ്ങലിനും ശ്വാസംമുട്ടിനും നല്ലതാണ്.

വരട്ടുമഞ്ഞള്‍ വറുത്തുപൊടിച്ച പൊടി പശുവിന്‍ പാലില്‍ നെയ്യും ചേര്‍ത്ത് കഴിക്കുന്നതും ചുമ മാറാന്‍ നല്ലതാണു.വെറ്റില കടിച്ചു നീരിറക്കുന്നത് ചുമ മാറാന്‍ നല്ലതാണ്.

വായിലെ അസുഖത്തിന് : ചുണ്ട് ചൊറിഞ്ഞു വീങ്ങിയാല്‍ എള്ളരച്ചു കിഴി കെട്ടി നെയ്യ് ചേര്‍ത്ത് തേയ്ക്കുക.

എരിക്കില ചുട്ട ഭസ്മം കുറെ എരുമ വെണ്ണയും ചേര്‍ത്ത് പുരട്ടുക.എരുമ നെയ്യ് പുരട്ടിയാലും ചുണ്ട് ചൊറിഞ്ഞു വീങ്ങുന്നതിനു ശമനം കിട്ടും .

എള്ള് അരച്ചത്‌ ,ഇരട്ടിമധുരം, തേന്‍ ഇവ ചേര്‍ത്ത എണ്ണ കവിള്‍ കൊണ്ടാല്‍ പല്ല് തരിക്കുന്നതിനു ശമനം കിട്ടും.

എള്ളരച്ചു പച്ച വെള്ളത്തില്‍ കലക്കി ചെറു ചൂടാക്കിയ ശേഷം കവിള്‍ കൊള്ളുക .പല്ലിളക്കം മാറും ,പല്ലുവേദനക്കും ഉത്തമം.

ഉറക്കക്കുറവ് : വെണ്ണയും പാലും കൂട്ടി ചാലിച്ച് തലയിലിടുക.

എരുമ പാല്‍ കൊണ്ട് രാത്രയില്‍ കഞ്ഞി കുടിക്കുക. നിത്യവും രാത്രി പാല്‍ കുടിക്കുക.

കൂവളത്തിന്‍ വേരരച്ചു വെണ്ണയും കൂട്ടി ഉള്ളംകാലില്‍ പുരട്ടി കിടക്കുക.

രാത്രി കിടക്കാന്‍ നേരത്ത് ഉള്ളംകാല്‍ നല്ലവണ്ണം കഴുകി വൃത്തിയാക്കി വെണ്ണ പുരട്ടി തലോടുക.

കൃമിക്ക് : തുളസി വേരരച്ചു ചെറു ചൂടുവെള്ളത്തില്‍ കഴിക്കുക.

കായം ശര്‍ക്കരയില്‍ പൊതിഞ്ഞു കഴിച്ചാല്‍ കടിക്കു ശമനം കിട്ടും.

വയമ്പ് അരച്ച് ഗോമൂത്രത്തില്‍ സേവിക്കുക. വയറ്റിലെ കൃമികള്‍ നശിക്കും.

വിഴാലരി അരിക്കാടിയില്‍ കഴിക്കുന്നത്‌ നല്ലതാണ്.

വിഴാലരി പൊടിച്ചു നാളികേര വെള്ളത്തില്‍ കഴിച്ചാലും കൃമി ശല്യം കുറയും.

ആര്യവേപ്പിന്‍റെയോ കരിവേപ്പിലയുടെയോ നീര് തേന്‍ ചേര്‍ത്ത് കഴിച്ചാലും കൃമി ശല്യം കുറയും.

കണ്ണ്: കടുക്കയും ചന്ദനവും അരച്ച് വെളിച്ചെണ്ണയില്‍ കണ്ണിലൊഴുക്കുക. ചെങ്കണ്ണ്‍മാറിക്കിട്ടും.

വെളിച്ചെണ്ണകൊണ്ട് ധാര കോരുക.ഇതും ചെങ്കണ്ണിനു നല്ലതാണ്.

നന്ത്യാര്‍വട്ടത്തിന്‍റെ പൂമൊട്ട് നുള്ളുമ്പോള്‍ വരുന്ന പാല് കണ്ണിലെഴുതുക. ചെങ്കണ്ണ്‍ മാറും.

വയമ്പരച്ചു മുലപ്പാലില്‍ ധാര കോരുക.

പൂവാംകുരുന്നില ചതച്ചു മുലപ്പാലിലോ ,പാലിലോ കലക്കി അരിച്ചെടുത്ത്‌ അതുകൊണ്ട് ധാര കോരുക.ചെങ്കണ്ണിനു നല്ലതാണ്.

പുഴുക്കടി : പുകയില വെളിച്ചെണ്ണയില്‍ കാച്ചി പുഴുക്കടിയുള്ള ഭാഗത്ത്‌ തേക്കുക.ശമനം കിട്ടും.

കുടകന്‍റെ ഇലയും പച്ച മഞ്ഞളും അരച്ച് പുരട്ടിയാല്‍ പുഴുക്കടി മാറിക്കിട്ടും.

ആറ്റുതകരയുടെ ഇല അരച്ച് മോരില്‍ കലക്കി പുരട്ടുന്നതും പുഴുക്കടിക്ക് നല്ലൊരു പ്രതിവിധിയാണ്.

കുഴിനഖം : ഉപ്പ്,ഒലിവെണ്ണ,ചേര്‍ത്ത് പുരട്ടിയാല്‍ കുഴിനഖം  മാറിക്കിട്ടും.

കോലരക്ക് പൊടിച്ചു എരുമ നെയ്യില്‍ കാച്ചി പുരട്ടിയാലും കുഴിനഖം മാറിക്കിട്ടും.

കാഞ്ഞിരവേര്‍ക്കഷായത്തില്‍ പാല് ചേര്‍ത്ത് ധാര കോരുക.കുഴിനഖം ശമിക്കും.

തീപ്പൊള്ളലിന് : പശുവിന്‍ നെയ്യ് കൊണ്ട് ധാര കോരുക.വെളിച്ചെണ്ണകൊണ്ട് ധാര കോരുക എന്നിവ നല്ലതാണ്.ഉപ്പു മാങ്ങ വെള്ളം കൊണ്ട് ധാര കോരുന്നതും നല്ലതാണ്.

മുക്കൂറ്റി സമൂലം തൈരിലരച്ചു പുരട്ടുന്നതും തീപ്പൊള്ളലിനു നല്ലതാണ്.

ബാര്‍സോപ്പ്‌ വെള്ളത്തില്‍ കലക്കി പൊള്ളിയ ഭാഗം അതില്‍ മുക്കിപ്പിടിക്കുക. പൊള്ളിയ ഭാഗത്ത്‌ കുമിളകള്‍ ഉണ്ടാവുകയില്ല.

കറ്റാര്‍വാഴയുടെ നീര് പൊള്ളലേറ്റ ഭാഗത്ത്‌ പുരട്ടുന്നതും നല്ലതാണ്.

മരച്ചീനി(കപ്പ)യുടെ ഇല അരച്ച് പുരട്ടിയാലും തീപ്പൊള്ളലിനു ശമനം കിട്ടും.

മുറിവ് : മുക്കുറ്റിയുടെ ഇല അരച്ച് മുറിവില്‍ ഇടുക.മുറിവ് ഉണങ്ങാന്‍ വളരെ നല്ലതാണ്.

ചുവന്നുള്ളി ചതച്ചു വച്ച് കെട്ടുന്നതും മുറിവിനു നല്ലതാണ്. ചുവന്നുള്ളി നല്ലൊരു അണുനാശിനിയാണ്.

കീഴാര്‍നെല്ലിയുടെ ഇലയും പച്ചമഞ്ഞളുംകൂടി കൂട്ടി അരച്ച് മുറിവില്‍ കെട്ടുക. മുറിവ് ഉണങ്ങും.

ചുണങ്ങ് : ആര്യവേപ്പില മഞ്ഞള്‍ ചേര്‍ത്തരച്ചു പുരട്ടുന്നത് ചുണങ്ങു മാറാന്‍ സഹായിക്കും.

കൊന്നയില , എള്ള്, പച്ചമഞ്ഞള്‍ എന്നിവ മോരിലരച്ചു പുരട്ടുക.ചുണങ്ങു മാറാന്‍ നല്ലതാണ്.

ഉമ്മത്തിന്‍റെ ഇല പിഴിഞ്ഞ് നീരെടുത്ത് തേങ്ങാപ്പാലില്‍ ചാലിച്ച് പുരട്ടുക.

അരി കഴുകിയ വെള്ളത്തില്‍ കൊന്നയില അരച്ച് പുരട്ടുന്നതും ചുണങ്ങു മാറിക്കിട്ടാന്‍ വളരെ നല്ലതാണ്.

കുമ്പളവള്ളി ചുട്ട ഭസ്മം പുരട്ടിയാലും ചുണങ്ങിനു നല്ലതാണ്.

കാഴ്ചക്കുറവ് : അകത്തിയുടെ ഇല നെയ്യില്‍ വറുത്ത് 10 ഗ്രാം വീതം രണ്ടു നേരം കഴിക്കുക.

കയ്യൂന്നി സമൂലം അരച്ച് പിഴിഞ്ഞ നീര് 5 മില്ലിലിറ്റര്‍ വീതം 3 നേരം കഴിച്ചാല്‍ രാത്രിയിലുണ്ടാകുന്ന കാഴ്ച്ചക്കുറവിനു നല്ലതാണ്.

ദിവസവും രാവിലെ കടുക്കയുടെ പൊടി തേന്‍ ചേര്‍ത്തോ പഞ്ചസാര ചേര്‍ത്തോ കഴിച്ചാല്‍ തിമിരത്തിനു നല്ലതാണ്.

ത്രിഫല കഷായത്തില്‍ നെയ്യും,തേനും ചേര്‍ത്ത് കഴിച്ചാലും തിമിരത്തിനു നല്ലതാണ്.

വിശപ്പില്ലായ്മ : ചുക്ക് പൊടിച്ചു ഇരട്ടി ശര്‍ക്കര ചേര്‍ത്ത് രാവിലെയും , വൈകിട്ടും ആഹാരത്തിനു മുന്‍പ് കഴിക്കുക. വിശപ്പില്ലായ്മക്ക് വളരെ നല്ലതാണ്.

ഉപ്പ് ചേര്‍ത്ത തുളസിയില പിഴിഞ്ഞ നീര് കുടിക്കുക. വിശപ്പില്ലായ്മക്ക് നല്ലൊരു പ്രതിവിധിയാണ്.

പപ്പായ പതിവായി കഴിക്കുന്നത്‌ വിശപ്പില്ലായ്മക്ക് നല്ലതാണ്.

ചുക്ക് , കുരുമുളക് , തിപ്പലി,എന്നിവ കഷായം വെച്ച് കഴിക്കുന്നതും നല്ലതാണ്.

ത്രിഫലപ്പൊടിയില്‍ (കടുക്ക,താന്നിക്ക,നെല്ലിക്ക) ശര്‍ക്കര ചേര്‍ത്ത് പതിവായി കഴിക്കുന്നതും വിശപ്പില്ലായ്മക്ക് വളരെ നല്ലതാണ്.

3.33333333333
നിങ്ങളുടെ നിര്‍ദ്ദേശം പോസ്റ്റ് ചെയ്യുക

(നിങ്ങള്‍ക്ക് അന്വേഷണങ്ങള്‍ പോസ്റ്റ് ചെയ്യുകയോ ചര്‍ച്ച ചെയ്യുകയോ ചേര്‍ക്കുകയോ ചെയ്യാം)

Enter the word
നവിഗറ്റിഒൻ
Back to top