অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ആട്രിയൽ സെപ്റ്റൽ ഡിഫക്ട് (ASD)

ആമുഖം

ശുദ്ധമായ ഓക്‌സിജൻ അടങ്ങിയ രക്തം ഹൃദയത്തിന്റെ ഇടത് മുകൾ ഭിത്തിയിൽ നിന്നും വലത് മുകൾ ഭിത്തിയിലേക്ക് സഞ്ചരിക്കുവാൻ ASD എന്ന അവസ്ഥ കാരണമാകുന്നു. ഇവിടെ വെച്ച് ഇത് ഓക്‌സിജൻ ഇല്ലാത്ത രക്തവുമായി കലർന്ന് ശ്വാസകോശത്തിലേക്ക് സഞ്ചരിക്കുന്നു.

ASD യുടെ വലുപ്പം കൂടുതലാണെങ്കിൽ ശ്വാസകോശത്തിലേക്കെത്തുന്ന രക്തത്തിന്റെ അളവ് വർദ്ധിക്കുകയും ഹൃദയത്തിന് പ്രവർത്തനശേഷി കൂടുതലായി വേണ്ടിവരികയും ചെയ്യുന്നു.

കൃത്യസമയത്ത് ചികിത്സ നടത്തിയിട്ടില്ലെങ്കിൽ ഹൃദയത്തിന്റെ വലത് ഭാഗം ക്രമേണ വികസിക്കുകയും, ശക്തിക്ഷയിക്കുകയും ചെയ്യും. ഈ അവസ്ഥ വീണ്ടും തുടർന്നാൽ ശ്വാസകോശത്തിലേക്കുള്ള രക്തസമ്മർദ്ദം വർദ്ധിക്കുകയും പൾമണറി ഹൈപ്പർടെൻഷൻ എന്ന അവസ്ഥയിലേക്ക് നയിക്കുകയും ചെയ്യും. ഇത് ജന്മനാ ഉണ്ടാകുന്ന തകരാറാണ്.

ചെറിയ ദ്വാരങ്ങളാണെങ്കിൽ ചിലപ്പോൾ വളർച്ചയുടെ ഘട്ടത്തിൽ തന്നെ അത് സ്വാഭാവികമായി അടഞ്ഞ് പോകാറുണ്ട്. വലുതും, ദീർഘകാലമുള്ളതുമായ ASD ഹൃദയത്തെയും ശ്വാസകോശത്തെയും ഒന്നുപോലെ തകരാറിലാക്കും

പ്രൊസീജര്‍

എക്കോകാർഡിയോഗ്രാം: ഹൃദയത്തിലുണ്ടാകുന്ന തകരാറുകൾ മൂലം സൃഷ്ടിക്കപ്പെടുന്ന കാർഡിയാക് ഇലക്ട്രിക്കൽ ആക്റ്റിവിറ്റികളിലെ മാറ്റങ്ങളെ രേഖപ്പെടുത്തുകയാണ് ഇ സി ജിയിൽ ചെയ്യപ്പെടുന്നത്. ASD നിർണ്ണയിക്കുവാൻ അനുവർത്തിക്കുന്ന പ്രധാന രീതിയും ഇത് തന്നെയാണ്. എക്കോകാർഡിയോഗ്രാമിൽ ശബ്ദതരംഗങ്ങൾ ഉപയോഗിച്ച് ഹൃദയത്തിന്റെ ഒരു വീഡിയോ ഇമേജ് സൃഷ്ടിക്കുന്നു. ഇതിലൂടെ ഡോക്ടർക്ക് ഹൃദയഭിത്തികൾ കാണുവാനും പമ്പിങ്ങിന്റെ ശക്തി വിലയിരുത്തുവാനും സാധിക്കും.

ചെസ്റ്റ് എക്‌സ്-റെ: ഹൃദയത്തിന്റെയും ശ്വാസകോശത്തിന്റെയും അവസ്ഥ എക്‌സ്-റെ ഇമേജ് ഉപയോഗിച്ച് പരിശോധിക്കുവാൻ ഇതിലൂടെ ഡോക്ടർക്ക് സാധിക്കുന്നു. രോഗലക്ഷണങ്ങൾ വാക്കുകളിലൂടെ വിവരിക്കുന്നതിൽ നിന്നും കൂടുതൽ വ്യക്തമായ രീതിയിൽ രോഗനിർണ്ണയത്തിലെത്തിച്ചേരുവാൻ ഇത് ഡോക്ടറെ സഹായിക്കുന്നു

കാർഡിയാക് കത്തീറ്ററൈസേഷൻ:ഒരു നേർത്ത ട്യൂബ് അടിവയറ്റിലെയോ, കൈയിലെയോ രക്തധമനിയിൽ സന്നിവേശിപ്പിക്കുകയാണ് ഈ രീതിയിൽ പ്രാഥമികമായി ചെയ്യുന്നത്. കത്തീറ്ററൈസേഷനിലൂടെ ഡോക്ടർക്ക് ജന്മനാലുള്ള ഹൃദയ വൈകല്യങ്ങൾ തിരിച്ചറിയുവാനും, ഹൃദയത്തിന്റെ പമ്പിങ്ങ് എത്രത്തോളം ആരോഗ്യപ്രദമാണ് എന്ന് മനസ്സിലാക്കുവാനും, ഹൃദയവാൾവുകളുടെ പ്രവർത്തനം വിലയിരുത്തുവാനും സാധിക്കുന്നു. ഇതിന് പുറമെ ശ്വാസകോശത്തിന്റെ രക്തസമ്മർദ്ദവും ഇതിലൂടെ മനസ്സിലാക്കുവാൻ സാധിക്കും.

മാഗ്നറ്റിക്ക് റിസോഴ്‌സ് ഇമാജിങ്ങ് (എം ആർ ഐ)കാന്തിക തരംഗങ്ങളും റേഡിയോ വികിരണങ്ങളും ഉപയോഗിച്ച് ആന്തരികാവയവങ്ങളുടെ ത്രിമാന രൂപങ്ങൾ സൃഷ്ടിച്ച് ശരീരത്തിനകത്തെ അവസ്ഥകൾ കൃത്യമായി മനസ്സിലാക്കുവാൻ സാധിക്കുന്ന രീതിയാണ് എം ആർ ഐ. ഇതിലൂടെ ഹൃദയത്തെ ബാധിച്ചിരിക്കുന്ന ബുദ്ധിമുട്ടുകൾ വളരെ വ്യക്തമായി മനസ്സിലാക്കുവാൻ സാധിക്കുന്നു

കമ്പ്യൂട്ടറൈസ്ഡ് ടോമോഗ്രഫി (സി ടി) സ്‌കാൻ: ഹൃദയത്തിന്റെ വിശദമായ ചിത്രം തുടർച്ചയായ എക്‌സ്-റെ വികിരണങ്ങളുടെ സഹായത്താൽ സൃഷ്ടിച്ചെടുക്കുന്ന രീതിയാണ് സി ടി സ്‌കാനിൽ സ്വീകരിക്കുന്നത്. മറ്റുള്ള രീതികളിലൂടെ വ്യക്തമായ ചിത്രം ലഭിക്കാതെ വരുമ്പോഴാണ് സി ടി സ്‌കാൻ പൊതുവെ ആശ്രയിക്കാറുള്ളത്

അപകട സാധ്യതകള്‍

ASD എന്ന അവസ്ഥയിലുള്ള നവജാത ശിശുക്കളിൽ പലരിലും തുടക്കത്തിൽ തന്നെ ലക്ഷണങ്ങൾ കാണപ്പെടാറില്ല. പ്രായമായവരിലാണെങ്കിൽ പൊതുവെ 30 വയസ്സിനോടനുബന്ധിച്ചാണ് ലക്ഷണങ്ങൾ ശ്രദ്ധയിൽ പെട്ട് തുടങ്ങാറുള്ളത്.

ചില സന്ദർഭങ്ങളിൽ ലക്ഷണങ്ങൾ പ്രത്യക്ഷപ്പെടുവാൻ പിന്നെയും ഒരുപാട് കാലം പിന്നിടാറുണ്ട്. ശ്വാസതടസ്സം, തളർച്ച, കാൽ, കാൽപാദം, അടിവയറ് തുടങ്ങിയ സ്ഥലങ്ങളിൽ നീർക്കെട്ട്, ഹൃദയത്തിന്റെ താളക്രമത്തിലുള്ള വ്യതിയാനം, തുടർച്ചയായ ശ്വാസകോശ അണുബാധ, പക്ഷാഘാതം, ഹൃദയത്തിലെ കുറുകൽ, സ്റ്റെതസ്‌കോപ്പിലൂടെ വിസിൽ ശബ്ദം കേൾക്കുക തുടങ്ങിയവ ASD രോഗത്തിന്റെ ലക്ഷണങ്ങളാണ്. ഇവ ASD യ്ക്ക് പുറമെ മറ്റ് ചില ഹൃദ്രോഗങ്ങൾക്കുളള ലക്ഷങ്ങളും ആയി പ്രത്യക്ഷപ്പെടാറുണ്ട്.

വലുപ്പം കുറഞ്ഞ ASD മറ്റ് തരത്തിലുള്ള പ്രത്യാഘാതങ്ങൾക്കൊന്നും ഇടവരുത്താറില്ല. എന്നാൽ ദ്വാരത്തിന്റെ വലുപ്പം കൂടുന്നതിനനുസരിച്ച് ജീവന് തന്നെ ഭീഷണിയായിത്തീരുന്ന തരത്തിലുള്ള പ്രത്യാഘാതങ്ങൾക്കിടവരും.

ഹൃദയത്തിന്റെ വലത് ഭാഗം നിശ്ചലമാവുക, ഹൃദയത്തിന്റെ താളം ക്രമം തെറ്റുക, പക്ഷാഘാതത്തിനുള്ള സാധ്യത വർദ്ധിക്കുക തുടങ്ങിയവയെല്ലാം ഇതിന്റെ പ്രത്യാഘാതങ്ങളാണ്. ഹൃദയം നിശ്ചലമാവുക, താളഭംഗം സംഭവിക്കുക, പൾമണറി ഹൈപ്പർടെൻഷൻ തുടങ്ങിയവ സാധ്യതകളുള്ളവരിൽ പ്രസവ സംബന്ധമായ സങ്കീർണ്ണതകളും അധികരിക്കാനിടയുണ്ട്.

ശക്തമായ പൾമണറി ഹൈപ്പർടെൻഷൻ ഉള്ളവരിൽ പൊതുവെ ഡോക്ടർമാർ ഗർഭധാരണം വിലക്കാറുണ്ട്. ജന്മനാ ഹൃദ്രോഗമുളളവരുടെ കുഞ്ഞുങ്ങളിലും ഇതേ രോഗമുണ്ടാകുവാനുള്ള സാധ്യതകൾ നിലനിൽക്കുന്നുണ്ട്.

ഇത്തരക്കാരിൽ ഗർഭധാരണം നടത്തുന്നതിന് മുൻപ് തന്നെ ചില മരുന്നുകൾ കഴിക്കുവാൻ വേണ്ടി നിർദ്ദേശിക്കാറുണ്ട്. ഇത് ഭ്രൂണത്തിന്റെ വളർച്ചാ ഘട്ടത്തിൽ തന്നെ രോഗസാധ്യത തടയുവാൻ സഹായിക്കും.

സര്‍ജറിക്കു മുന്‍പ്



മുതിർന്ന ശേഷം ശസ്ത്രക്രിയ നടത്തുമ്പോൾ താരതമ്യേന സങ്കീർണ്ണതകൾ വർദ്ധിക്കുവാൻ സാധ്യതയുണ്ട് എന്നതിനാൽ കഴിയുന്നതും ചെറുപ്പകാലത്ത് തന്നെ ശസ്ത്രക്രിയ നടത്തുവാനാണ് പൊതുവെ ഡോക്ടർമാർ നിർദ്ദേശിക്കാറുള്ളത്.

ASD യുടെ വലുപ്പം ഇടത്തരത്തിലോ അതിന് മുകളിലോ എത്തുമ്പോഴാണ് ശസ്ത്രക്രിയ പൊതുവെ നിർദ്ദേശിക്കാറുള്ളത്. ഗുരുതരമായ പൾമണറി ഹൈപ്പർടെൻഷൻ ഉള്ളവരിൽ പൊതുവെ ശസ്ത്രക്രിയ നിർദ്ദേശിക്കപ്പെടാറില്ല.

മുതിർന്നവരിലും കുട്ടികളിലും പ്ലഗ്ഗിങ്ങ് അല്ലെങ്കിൽ പാച്ചിങ്ങ് എന്നീ രീതികളാണ് ശസ്ത്രക്രിയയിലൂടെ നിർവ്വഹിക്കാറുള്ളത്. പൊതുവെ രണ്ട് രീതികളാണ് ഇതിനായി സ്വീകരിക്കുന്നത്. ആദ്യത്തേതിൽ കാർഡിയാക് കത്തീറ്ററൈസേഷൻ എന്നറിയപ്പെടുന്നു.

ഇതിൽ അടിവയറ്റിൽ ഒരു നേർത്ത ട്യൂബ് കയറ്റുകയും ഇതിലൂടെ ലഭിക്കുന്ന ഇമേജിന്റെ സഹായത്തോടെ കത്തീറ്റർ വഴി ഒരു ചെറിയ പ്ലാസ്റ്റർ പോലുള്ള പദാർത്ഥം കടത്തിയശേഷം ദ്വാരം അടയ്ക്കുന്നു. ഈ പദാർത്ഥത്തിന് ചുറ്റും ഹൃദയകോശങ്ങൾ കോശങ്ങൾ ക്രമേണ വളരുകയും ശാശ്വതമായി ദ്വാരം അടയുകയും ചെയ്യുന്നു.

കാർഡിയാക് കത്തീറ്ററൈസേഷനിലൂടെ ചികിത്സ സാധിക്കാത്ത അവസ്ഥ വരുമ്പോൾ ഓപ്പൺ ഹാർട്ട് സർജറി സ്വീകരിക്കേണ്ടി വരുന്നു. ഇതിന് ജനറൽ അനസ്തീഷ്യയും, ഹാർട്ട്‌ലങ്ക് മെഷിന്റെ സഹായവും ആവശ്യമായി വരും. നെഞ്ചിൽ സൃഷ്ടിക്കുന്ന സുഷിരത്തിലൂടെയാണ് ശസ്ത്രക്രിയാ വിദഗ്ദ്ധർ ഹൃദയത്തിലെ ദ്വാരം അടയ്ക്കുന്നത്. ഈ രീതി സ്വീകരിക്കുമ്പോൾ ശരീരത്തിൽ ചെറിയ മുറിവുകൾ സൃഷ്ടിക്കേണ്ടതായി വരും.

സര്‍ജറിക്കു ശേഷം

ചെറുപ്പത്തിലേ ഭേദമാക്കുന്ന പൊതുവെ സങ്കീർണ്ണമല്ലാത്ത ASD കൾക്ക് വല്ലപ്പോഴുമുള്ള ഫോളോ അപ്പ് മാത്രമേ ആവശ്യമായി വരാറുളളൂ.

എന്നാൽ സങ്കീർണ്ണമായ ASD കൾക്കും മുതിർന്നവരിൽ നടത്തുന്ന ASD കൾക്കും പൾമണറി ഹൈപ്പർടെൻഷൻ, ഹൃദയമിടിപ്പിലെ തകരാറുകൾ, ഹൃദയസ്തംഭനം, വാൾവ് പ്രശ്‌നങ്ങൾ മുതലായവ ഉണ്ടാകുവാൻ സാധ്യതയുള്ളതിനാൽ തുടർച്ചയായുള്ള ചെക്കപ്പുകൾ ആവശ്യമായി വരും.

ശസ്ത്രക്രിയ നിർവ്വഹിച്ചതായാലും കത്തീറ്റർ ഉപയോഗിച്ച് നിർവ്വഹിച്ചതായാലും പ്രൊസീജ്യർ ചെയ്ത ശേഷം പൊതുവായ ശാരീരികാദ്ധ്വാനങ്ങൾക്ക് വലിയ നിയന്ത്രണമുണ്ടാവാറില്ല. പൊതുവെ വ്യായാമങ്ങളിലും നിയന്ത്രണമുണ്ടാവാറില്ല.

ഏതെങ്കിലും തരത്തിലുള്ള ബുദ്ധിമുട്ടുകൾ (ശ്വാസതടസ്സം, ഹൃദയസ്പന്ദനത്തിലെ തകരാറുകൾ മുതലായവ) ഉണ്ടെങ്കിൽ ശാരീരികാദ്ധ്വാനത്തിലും, വ്യായാമത്തിലുമെല്ലാം നിയന്ത്രണങ്ങൾ വേണ്ടി വരും. കൊഴുപ്പ്, കൊളസ്‌ട്രോൾ, സോഡിയം മുതലായവ പരമാവധി ഒഴിവാക്കുകയും, പഴവർഗ്ഗങ്ങൾ, പച്ചക്കറി, ധാന്യങ്ങൾ മുതലായവ പരമാവധി ഉൾപ്പെടുത്തുകയും വേണം. ആഴ്ചയിൽ ഒന്നോ രണ്ടോ ദിവസം മത്സ്യം കഴിക്കുന്നതിൽ തെറ്റില്ല. അണുബാധയുണ്ടാകുവാനിടയുള്ള സാഹചര്യങ്ങൾ പരമാവധി ഒഴിവാക്കണം

കടപ്പാട്-http://ml.astermimssurgeryguide.com

അവസാനം പരിഷ്കരിച്ചത് : 5/8/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate