Skip to content. | Skip to navigation

Vikaspedia

പങ്കുവയ്ക്കുക
Views
  • നില എഡിറ്റ്‌ ചെയുവാൻ വേണ്ടി തയ്യാ

ഉറക്കം

ഉറക്കത്തിലെ സംസാരത്തെ കുറിച്ചും ഉറങ്ങേണ്ട രീതികളെ കുറിച്ചുമുള്ള കൂടുതൽ വിവരങ്ങൾ

നന്നായി ഉറങ്ങൂ, ദീര്‍ഘായുസ്സ് നേടൂ

ശരീരത്തിനു നല്ല പ്രവര്‍ത്തനങ്ങള്‍ക്ക് അത്യാവശ്യമാണു നല്ല വിശ്രമം. വിശ്രമത്തില്‍ പ്രധാനപ്പെട്ടതാണ് ഉറക്കം. നന്നായി ഉറങ്ങിയശേഷം ലഭിക്കുന്ന സുഖം പറഞ്ഞറിയിക്കാനാവാത്തതാണ്.

ഉറക്കം വെറും സമയം കളയല്‍ മാത്രമല്ല. അതിനു ചില ഗുണങ്ങളുമുണ്ട്. എന്നുവെച്ച് ഏതുനേരവും ഉറങ്ങണമെന്നല്ല കെട്ടോ…

ദീര്‍ഘായുസ്സ്: രാത്രി ആറു മണിക്കൂറില്‍ കുറവു ഉറങ്ങുന്നവരുടെ ആയുര്‍ദൈര്‍ഘ്യം കുറയാന്‍ സാധ്യതയുണ്ടെന്നാണു ഗവേഷകര്‍ അഭിപ്രായപ്പെടുന്നത്. ദിവസം എട്ടു മണിക്കൂര്‍ ഉറക്കമാണ് ആരോഗ്യകരമായ ശരീരം ആഗ്രഹിക്കുന്നവര്‍ക്ക് നിര്‍ദേശിക്കാനുള്ളത്.

വേദന: ശരീര വേദനകള്‍കൊണ്ട് ബുദ്ധിമുട്ടുന്നവര്‍ക്കും മരുന്നായി നിര്‍ദേശിക്കാന്‍ സാധിക്കുക ഉറക്കമാണ്. ഉറക്കം ഈ വേദനകള്‍ കുറയ്ക്കാന്‍ സഹായിക്കും.

തിളങ്ങുന്ന ചര്‍മ്മം: നിങ്ങള്‍ ഉറങ്ങുന്ന സമയം ശരീരം ഒരു വളര്‍ച്ചാ ഹോര്‍മോണ്‍ പുറത്തുവിടും. ഇതു കൊളാജിന്‍ എന്ന പ്രോട്ടീന്റെ ഉത്പാദനത്തിനു വര്‍ധിപ്പിക്കുകയും അതുവഴി തിളങ്ങുന്ന ചര്‍മ്മം പ്രദാനം ചെയ്യുകയും ചെയ്യും.

ഉറക്കമൊഴിക്കുന്നത് നമ്മുടെ ജീനില്‍ മാറ്റങ്ങള്‍ വരുത്തുമെന്ന് പഠനം

ഒരു രാത്രി ഉറക്കമൊഴിച്ചാല്‍ അത് നമ്മുടെ കോശങ്ങളിലെ ക്ലോക്ക് ജീനുകളില്‍ മാറ്റം വരുത്തുമെന്ന് പഠനം. സ്വീഡനിലെ ഉപ്പശാല സര്‍വ്വകലാശാലയിലെ ഗവേഷകരാണ് ഈ കണ്ടെത്തലില്‍ എത്തിച്ചേര്‍ന്നിരിക്കുന്നത്.

ഉറക്കമില്ലായ്മ നമ്മുടെ ശരീര പരിണാമത്തെ വിപരീതമായി ബാധിക്കുന്നുണ്ടെന്നും പൊണ്ണത്തടിക്കും ടൈപ്പ്2 ഡയബറ്റീസിനും ഉറക്കമില്ലായ്മ കാരണമാകുമെന്നും മുന്‍ ഗവേഷണങ്ങളില്‍ വ്യക്തമായിട്ടുള്ളതാണ്.  ക്ലോക്ക് ജീനുകളിലുണ്ടാകുന്ന വിഭജനം ഇത്തരം രോഗങ്ങള്‍ക്ക് കാരണമാകാറുണ്ട്. ഉപ്പശാല സര്‍വ്വകലാശാലയിലെ ഗവേഷകന്‍ ജോനാഥന്‍ കെഡര്‍നെസ് പറയുന്നു. എന്നാല്‍ നമ്മുടെ ക്ലോക്ക് ജീനുകളില്‍ മാറ്റങ്ങള്‍ വരുത്തുന്നതില്‍ ഉറക്കമില്ലായ്മ കാരണമാകുന്നുണ്ടെന്നാണ് ഞങ്ങളുടെ പഠനത്തിലൂടെ വ്യക്തമായിരിക്കുന്നത്. അദ്ദേഹം കൂട്ടിച്ചേര്‍ത്തു.

ഇതിനായി സാധാരണ ഭാരമുള്ള 15 ഓളം ആളുകളിലാണ് ഇവര്‍ ഗവേഷണം നടത്തിയത്. രണ്ട് ഘട്ടങ്ങളിലായി രണ്ട് രാത്രികളിലായായിരുന്നു ഗവേഷണം. ഇതില്‍ ഒരു ഘട്ടത്തില്‍ അവരെ എട്ട് മണിക്കൂറോളം ഉറങ്ങാന്‍ അനുവദിക്കുകയും മറ്റേ ഘട്ടത്തില്‍ അവരെ ഉറങ്ങാതെ ഇരിപ്പിക്കുകയുമായിരുന്നു. ഓരോരുത്തരിലും പല ക്രമങ്ങളിലാണ് ഈ നിരീക്ഷണങ്ങള്‍ നടത്തിയത്. ഇതിനായി അവിടുത്ത പ്രകാശം, ഭക്ഷണം, മറ്റു പ്രവൃത്തികള്‍ എന്നിവയെല്ലാം ശക്തമായി നിയന്ത്രിക്കുകയും ചെയ്തു. തുടര്‍ന്ന് ഇവരുടെ ശരീരത്തില്‍ നിന്നും വ്യത്യസ്ത സ്വഭാവങ്ങളിലുള്ള കോശങ്ങള്‍ ശേഖരിക്കുകയും ചെയ്തു.

ഈ കോശങ്ങളില്‍ നടത്തിയ പഠനങ്ങളിലൂടെയാണ് ഉറക്കമില്ലായ്മ ജീനുകളുടെ സ്വഭാവത്തില്‍ മാറ്റങ്ങള്‍ വരുത്തുന്നുണ്ടെന്ന കണ്ടെത്തലില്‍ ഗവേഷകരെത്തിയത്. വളരെ പെട്ടെന്നു തന്നെ ഇത്തരത്തില്‍ ജീനുകള്‍ക്ക് മാറ്റം സംഭവിക്കുന്നുണ്ടെന്നും അതും നമ്മുടെ ശരീര പരിണാമത്തെ സ്വാധീനിക്കുന്ന പ്രധാനപ്പെട്ട ക്ലോക്ക് ജീനുകളിലാണ് ഇത് സംഭവിക്കുന്നതെന്നും കെഡര്‍നെസ് പറഞ്ഞു.

ശരിക്കും നിങ്ങള്‍ എത്ര നേരം ഉറങ്ങണം?

നമ്മള്‍ ഓരോ ദിവസവും എങ്ങനെ പ്രവര്‍ത്തിക്കുന്നു എങ്ങനെ ഉറങ്ങുന്നു എന്നതിനെയെല്ലാം സ്വാധീനിക്കുന്ന നിരവധി അവസ്ഥകളില്‍ ഒന്നാണ് ഉറക്കമില്ലായ്മയും സുഖകരമല്ലാത്ത ഉറക്കവും. ഒരുപക്ഷെ നിങ്ങള്‍ അറിയാതെ തന്നെ നിങ്ങളില്‍ ഉറക്കത്തിലെ പ്രശ്‌നങ്ങള്‍ ഉണ്ടാവാം.

എത്ര നേരം ഉറങ്ങാം

നല്ല ഉറക്കത്തിനായി കൃത്യമായി മണിക്കൂറുകളുടെ കണക്കുകളില്ല. പ്രായപൂര്‍ത്തിയായ ഭൂരിഭാഗം ആളുകള്‍ക്ക് ഏഴ് മുതല്‍ ഒമ്പത് മണിക്കൂര്‍ വരെ ഉറക്കം ആവശ്യമായി വരുന്നു. മറ്റുള്ളവരില്‍ ആറു മണിക്കൂര്‍ തന്നെ മതിയാവും. അതേസമയം കൂടുതല്‍ സമയം ഉറക്കത്തിനായി കിടക്കയില്‍ ചിലവഴിക്കുന്നത് തളര്‍ച്ച വിഷാദം തുടങ്ങിയ ആരോഗ്യ പ്രശ്‌നങ്ങളുടെ ലക്ഷണമാവാം.

അതുകൊണ്ട് നിങ്ങളുടെ ഉറക്കത്തിന്റെ സമയക്കണക്കുകള്‍ കണ്ടെത്തുന്നത് തന്നെയാണ് ആരോഗ്യകരമായ ഉറക്കത്തിനുള്ള ആദ്യ പടി.

ഉറക്കക്കുറവ് ആരോഗ്യത്തിന് ഹാനികരമാണ്

ഉറക്കക്കുറവ് അനുഭവിക്കുന്ന ആളുകളില്‍ (അഞ്ച് മണിക്കൂറോ അതില്‍ താഴെയോ മാത്രം ഉറക്കമുള്ളവര്‍) രക്തസമ്മര്‍ദ്ദത്തിനും ഹൃദയ സംബന്ധിയായ രോഗങ്ങള്‍ക്കുമുള്ള സാധ്യത ഏറെയാണെന്ന് ബ്രിട്ടനില്‍ നടന്ന ഒരു പഠനത്തില്‍ പറയുന്നു. അതുപോലെ ഉറക്കക്കുറവ് നിങ്ങളെ പൊണ്ണത്തടി, ഡയബറ്റീസ്, വിഷാദരോഗം, മദ്യാസക്തി, വാഹനാപകടങ്ങള്‍ എന്നിവയിലേക്ക് നയിച്ചേക്കാം. അതുപോലെതന്നെ ശ്രദ്ധ, നമ്മുടെ മാനസികാവസ്ഥ തുടങ്ങിയ തലച്ചോറിന്റെ പ്രവകര്‍ത്തനങ്ങളെയും ഉറക്കക്കുറവ് ബാധിച്ചേക്കാം.

ആരോഗ്യകരമായ ഉറക്കത്തിന്റെ ലക്ഷണങ്ങള്

ഉറക്കത്തിന്റെ അളവും സ്വഭാവവും പരിശോധിച്ചാലേ ഡോക്ടര്‍മാര്‍ക്ക് അതിന്റെ പ്രശ്‌നങ്ങള്‍ മനസ്സിലാവുകയുള്ളൂ.

ഉറക്കത്തിന്റെ സ്വഭാവത്തിന്റെ കാര്യമെടുക്കാം. രോഗികളില്‍ എല്ലായിപ്പോഴും പ്രശ്‌നങ്ങള്‍ പ്രകടമായിരിക്കില്ല. രാത്രിമുഴുവന്‍ ഉറക്കമില്ലാതെ കിടക്കുന്നയാള്‍ക്ക് അയാളുടെ പ്രശ്‌നമെന്തെന്ന് എളുപ്പത്തില്‍ മനസ്സിലാക്കാം. അതേസമയം കൂര്‍ക്കം വലിയുള്ളയാള്‍ക്ക് അത് തിരിച്ചറിയാന്‍ പറ്റില്ല.

നിങ്ങളുടെ ഓരോ ദിവസത്തെയും ശാരീരികാവസ്ഥകളാണ് നിങ്ങളിലെ ഉറക്ക പ്രശ്‌നങ്ങളെ പ്രകടമാക്കുന്നത്. നിങ്ങള്‍ സമയത്തിന് എഴുന്നേല്‍ക്കുകയും ഉന്‍മേഷം തോന്നുകയും ചെയ്യുന്നുണ്ടെങ്കില്‍ നിങ്ങളുടേത് ആരോഗ്യകരമായ ഉറക്കമാണ്. എന്നാല്‍ ഉറക്കച്ചടവോടെയും അസ്വസ്ഥതയോടെയുമാണ് നിങ്ങള്‍ എഴുന്നേല്‍ക്കുന്നതെങ്കില്‍ നിങ്ങളില്‍ ഉറക്ക പ്രശ്‌നങ്ങള്‍ ഉണ്ടാവാനുള്ള സാധ്യതയുണ്ട്.

നന്നായി ഉറങ്ങാന്‍, ഇതാ ചില ആഹാരങ്ങള്‍

എല്ലാ വയസ്സിലും ഉള്ള ആളുകള്‍ പൊതുവായി അനുഭവിക്കുന്ന ഒരു പ്രശ്‌നമാണ് ഉറക്കമില്ലായ്മ.  അതിനുവേണ്ടി ഉറക്കഗുളികകള്‍ കഴിക്കുന്നവര്‍ ഏറെയാണ്. എന്നാല്‍ ഇത് ഏറെ അപകടകരവുമാണ്.  ഇത്തരം ഒരു പ്രശ്‌നത്തിന് എന്തുകൊണ്ട് നിങ്ങള്‍ക്ക് പ്രകൃതിദത്തവും ആരോഗ്യപരവുമായ വഴികള്‍ സ്വീകരിച്ചുകൂടാ? എല്ലാ രാത്രികളിലും സുഖനിദ്രയുടെ ആനന്ദം അറിയാന്‍ നിങ്ങളുടെ ആഹാരക്രമത്തില്‍ ചെറിയ മാറ്റങ്ങള്‍ വരുത്തിയാല്‍ മാത്രം മതി. ഇതാ നിങ്ങള്‍ക്കായി ചില ആഹാരങ്ങള്‍

വാഴപ്പഴം

വാഴപ്പഴത്തില്‍ പൊട്ടാസ്യം ധാരാളം അടങ്ങിയിട്ടുണ്ട്. അത് നിങ്ങളുടെ പേശികളെ ശാന്തമാക്കും. ഇതില്‍ ധാരാളമായി അടങ്ങിയിട്ടുള്ള വിറ്റാമിന്‍ ബി6 നിങ്ങളുടെ ശരീരത്തിലെ മെലാറ്റനിന്‍ അളവ് വര്‍ധിപ്പിക്കുന്നു അതിലൂടെ വിട്ടുമാറാത്ത ഉറക്കമില്ലായ്മയെ ഭേദമാക്കാം.

ചെറി

രാവിലെ ചെറി ജ്യൂസ് കഴിക്കുന്നത് ഉറക്കത്തിന് ഏറെ നല്ലതാണ്. കാരണം ഇതില്‍ ശരീരത്തിന്റെ ഉറക്കത്തെ നിയന്ത്രിക്കുകയും ഉര്‍ജ്ജസ്വലത നിലനിര്‍ത്തുകയും ചെയ്യുന്ന മെലാറ്റനിന്റെ അളവ് കൂടുതലാണ്. മെലാറ്റനിന്റെ അളവ് കൂടുതലുള്ള മറ്റൊരു പഴം മുന്തിരിയാണ്.

ധാന്യങ്ങള്

ധാന്യങ്ങള്‍ ആഹാരമാക്കുന്നത് ഏറെ ഗുണകരമാണ്. ഇതിലടങ്ങിയിട്ടുള്ള കാര്‍ബോ ഹൈഡ്രേറ്റ് രക്തത്തിലെ ട്രിപ്‌റ്റോഫന്‍(tryptophan)ന്റെ അളവ് വര്‍ധിപ്പിക്കുന്നു. അത് നിങ്ങളുടെ ഉറക്കത്തെ സഹായിക്കും

ബദാം

ബദാമില്‍ ധാരാളം മഗ്നീഷ്യം അടങ്ങിയിട്ടുണ്ട്. അത് നിങ്ങളുടെ ഉറക്കത്തിന് സഹായിക്കുകയും നിങ്ങളുടെ പേശികളെ ശാന്തമാക്കുകയും ചെയ്യും. ഇതില്‍ അടങ്ങിയിട്ടുള്ള പ്രൊട്ടീന്‍ നിങ്ങളുറങ്ങുമ്പോള്‍ നിങ്ങളുടെ രക്തത്തിലെ പഞ്ചസാരയുടെ അളവ് സുസ്ഥിരമായി നിര്‍ത്തുകയും ഉറങ്ങാന്‍ സഹായിക്കുകയും ചെയ്യുന്നു.

മധുരക്കിഴങ്ങ്

ധാരാളം പൊട്ടാസ്യവും പ്രോട്ടീനും ഇതില്‍ അടങ്ങിയിട്ടുണ്ട്, മധുരക്കിഴങ്ങ് നിങ്ങളുടെ പേശികളെ ശാന്തമാക്കുകയും നിദ്രയിലേക്ക് നയിക്കുകയും ചെയ്യും. ഇത് ദിവസേന കഴിക്കുന്നത്  നിങ്ങള്‍ക്ക് എന്നും സുഖനിദ്ര സമ്മാനിക്കും.

തണുത്ത പാല്

നല്ല തണുത്ത പാല്‍ കുടിക്കുന്നത് ഏറെ നല്ലതാണ്. കാര്‍ബോഹൈഡ്രേറ്റ് അടങ്ങിയ ഓട്‌സിനെ പോലെയുള്ള ആഹാരങ്ങള്‍ പാലില്‍ ചേര്‍ത്ത് കഴിക്കുന്നത് ഏറെ നല്ലതാണെന്നും പരീക്ഷണങ്ങള്‍ തെളിയിക്കുന്നു. മാത്രവുമല്ല കാത്സ്യം അടക്കം നിരവധി ധാതുക്കളും പാലില്‍ അടങ്ങിയിട്ടുണ്ട്. ഇവ നിങ്ങളുടെ ഉറക്കത്തെ ഏറെ സഹായിക്കുന്നു.

തേന്

തേനില്‍ ധാരാളം ഗ്രൂക്കോസ് അടങ്ങിയിട്ടുണ്ട്. നിങ്ങളുടെ തലച്ചോറില്‍ നിങ്ങളെ ഉണര്‍ന്നിരിക്കാന്‍ സഹായിക്കുന്ന ഒറെക്‌സിന്‍ എന്ന രാസവസ്തുവിന്റെ പ്രവര്‍ത്തനത്തെ ഗ്രൂക്കോസ് നിര്‍ത്തിവെക്കുന്നു. പക്ഷെ ഇത് അധികം കഴിക്കരുത്. ഒരു ടേബിള്‍ സ്പൂണ്‍ തേന്‍ മാത്രം മതിയാവും നിങ്ങളുടെ ഉറക്കത്തിന്.

ഡാര്ക്ക് ചോക്കലേറ്റ്

മില്‍ക് ചോക്കലേറ്റ് ഒഴിവാക്കി പകരം ഡാര്‍ക്ക് ചോക്കലേറ്റ് കഴിക്കുക. ഇതിലടങ്ങിയിരിക്കുന്ന സെറോട്ടോണിന്‍ നിങ്ങളുടെ ശരീരത്തിനെയും മനസ്സിനെയും ശാന്തമാക്കുകയും നിങ്ങളെ ഉറക്കത്തിലേക്ക് നയിക്കുകയും ചെയ്യുന്നു.

ഭക്ഷണക്രമം ഉറക്കത്തെ ബാധിക്കുന്നതായി പഠനം

ആഹാരക്രമം ഉറക്കത്തെ ബാധിക്കുന്നതായി പഠനം. നമ്മള്‍ ഉറക്കത്തിന് മുമ്പ് എന്താണ് കഴിച്ചതെന്നതിനെ ആശ്രയിച്ചിരിക്കും നമ്മുടെ ഉറക്കവുമെന്നാണ് പെന്‍സില്‍വാനിയ യൂണിവേഴ്‌സിറ്റി പെറില്‍മാന്‍ സ്‌കൂള്‍ ഓഫ് മെഡിസിന്‍ നടത്തിയ പഠനം പറയുന്നത്.

Ads By Google

7-8 മണിക്കൂര്‍ രാത്രി ഉറങ്ങുന്നവര്‍ക്കിടയില്‍ സാധാരണയായി നല്ല ആരോഗ്യമുള്ളവരെയാണ് കണ്ടുവരുന്നത്. സാധാരണ ഉറക്കക്കാരും, ദീര്‍ഘ നേരം ഉറങ്ങുന്നവരും, ഹ്രസ്വമായി മാത്രം ഉറങ്ങുന്നവര്‍ക്കിടയില്‍ ഭക്ഷണക്രമത്തില്‍ എന്തെങ്കിലും വ്യത്യാസമുണ്ടോയെന്ന സംശയത്തില്‍ നിന്നാണ് ഈ വിഷയത്തില്‍ പഠനം നടത്താന്‍ യൂണിവേഴ്‌സിറ്റി തീരുമാനിച്ചത്്.

ആളുകളുടെ ഭക്ഷണത്തിന്റെ അളവും കലോറിയും, വെള്ളത്തിന്റെ അളവും, ഉറക്കവും തമ്മില്‍ ബന്ധമുണ്ടെന്നാണ് ഈ വിഷയത്തില്‍ റിസര്‍ച്ചറായ മൈക്കല്‍ എ ഗ്രാന്‍ഡര്‍ അഭിപ്രായപ്പെടുന്നത്.

2007-2009 നാഷണല്‍ ഹെല്‍ത്ത് ആന്‍ഡ് ന്യൂട്രീഷന്‍ എക്‌സാമിനേഷന്‍ സര്‍വെ നാലു കാറ്റഗറിയായാണ് ഉറക്കക്കാരെ തിരിച്ചത്.

രാത്രി അഞ്ചുമണിക്കൂറില്‍ താഴെ ഉറങ്ങുന്നവര്‍ ഉറക്കം തീരെ കുറഞ്ഞവരാണ്. എന്നാല്‍ അഞ്ചുമതുല്‍ ആറുമണക്കൂര്‍ ഉറങ്ങുന്നവര്‍ ഹ്രസ്വ ഉറക്കക്കാരാണ്.സാധാരണ ഉറക്കമെന്നത് ഏഴ് മുതല്‍ എട്ടുമണിക്കൂറാണ്്.ഒമ്പത് മണിക്കൂറിലധികം ഉറങ്ങുന്നവരാണ് ദീര്‍ഘ ഉറക്കക്കാര്‍ എന്നും പഠനം വ്യക്തമാക്കുന്നു.

എന്നാല്‍ പഠനത്തിന്റെ ഭാഗമായി തിരഞ്ഞെടുത്തവരുടെ ഉറക്കവും അവര്‍ കഴിക്കുന്ന ഭക്ഷണത്തില്‍ നിന്നു ലഭിക്കുന്ന കലോറിയുടെ അളവും തമ്മില്‍ അസോസിയേഷന്‍ പരിശോധന നടത്തി.

ഏറ്റവും കൂടുതല്‍ അളവില്‍ കലോറിയുള്ള ഭക്ഷണം അകത്താക്കുന്നവരാണ് ഹ്രസ്വ ഉറക്കാരെന്നാണ് മനസിലാക്കാനായത്. സാധാരണ ഉറക്കാക്കാര്‍ സാമാന്യം ഭേദപ്പെട്ട നിലയില്‍ കലോറി ലഭിക്കുന്നവരാണ്.

എന്നാല്‍ തീരെ ഉറക്കം കുറഞ്ഞവര്‍ കലോറി വളരെ കുറഞ്ഞ ഭക്ഷണം കഴിക്കുന്നവരാണെന്നാണ് കണ്ടെത്തല്‍. ഇവരുടെ ഭക്ഷണത്തില്‍ വെള്ളവും , കാര്‍ബോഹൈട്രേറ്റിന്റെയും അളവ് വളരെ കുറവാണെന്നും പഠനം വ്യക്തമാക്കുന്നു.

നഗ്നരായി ഉറങ്ങുന്നത് നല്ലതാണ്, എന്തുകൊണ്ട്?

ജീവശാസ്ത്രപരമായി ഉറക്കത്തിന്റെ ലക്ഷ്യം ശരീരത്തിന്റെ പുനര്‍നിര്‍മാണമാണ്. പകല്‍ മുഴുവനുമുള്ള പ്രവര്‍ത്തനത്തിനുശേഷം ശരീരം വിശ്രമിക്കുന്ന സമയമാണിത്. കോശങ്ങള്‍ പുനരുജ്ജീവിപ്പിക്കാനും സമ്മര്‍ദ്ദം അകറ്റാനുമെല്ലാം ഉറക്കം അത്യാവശ്യമാണ്. അതുകൊണ്ടുതന്നെ ഉറക്കം കൂടുതല്‍ ഗുണകരമാകാന്‍ എന്തൊക്കെ ചെയ്യണമെന്ന് അറിയേണ്ടതുണ്ട്.

സമാനമായി നഗ്നരായി കിടന്നുറങ്ങുന്നത് ശരീരത്തിനു ഗുണം ചെയ്യുകയും ചെയ്യും. എന്താ നിങ്ങള്‍ക്ക് അത്ഭുതം തോന്നുന്നുണ്ടോ? ഇന്ത്യയില്‍ ഈ രീതി അത്ര സാധാരണമല്ല. എന്നാല്‍ നഗ്നരായി ഉറങ്ങുന്നതിന്റെ ഗുണം മനസിലാക്കിയാല്‍ നിങ്ങളും അത് പിന്തുടരും.

നഗ്നരായി ഉറങ്ങുന്നതിന്റെ ഉറക്കത്തിന്റെ ഗുണം വര്‍ധിപ്പിക്കും. വസ്ത്രങ്ങള്‍ പലപ്പോഴും ശരീരത്തിനെ തണുക്കാന്‍ അനുവദിക്കാറില്ല. ശരീരം തണുക്കേണ്ടത് നല്ല ഉറക്കത്തിന് അനിവാര്യമാണ്. വസ്ത്രങ്ങള്‍ ഒഴിവാക്കുന്നതിലൂടെ ഇത് സാധ്യമാകും.

മറ്റുള്ള സമയത്തെല്ലാം ശരീരം വസ്ത്രം കൊണ്ട് മൂടിയിരിക്കും. ശരീരത്തിന്റെ വിവിധ ഭാഗങ്ങള്‍ക്ക് ആവശ്യമായ വായുപോലും കടക്കാത്ത വിധത്തിലായിരിക്കും പലരുടേയും വസ്ത്രധാരണം.

നഗ്നരായി ഉറങ്ങുന്നത് നിങ്ങളുടെ ലൈംഗിക അവയവങ്ങള്‍ക്ക് ഗുണകരമാണ്. പുരുഷന്മാരെ സംബന്ധിച്ച് അവരുടെ ലൈംഗികാവയവത്തിന് തണുപ്പ് ലഭിക്കും. ഇത് ബീജത്തെ ആരോഗ്യമുള്ളതും പ്രത്യുല്പാദന വ്യവസ്ഥയെ സാധാരണവുമാക്കും.

സ്ത്രീകളുടെ കാര്യത്തിലും ലൈംഗികാവയവങ്ങള്‍ക്ക് തണുപ്പ് ലഭിക്കും. കൂടാതെ വായു സഞ്ചാരമുള്ള അവസ്ഥയില്‍ ഉറങ്ങുന്നത് യീസ്റ്റ് അണുബാധ തടയും.

നഗ്നരായി ഉറങ്ങുന്നത് വേനല്‍ക്കാലത്ത് ഏറെ ഗുണകരമാണ്. എസി ഇല്ലാത്ത വീടാണെങ്കില്‍ രാത്രിയത്തെ ഉറക്കം വേനല്‍ക്കാലത്ത് ഏറെ ബുദ്ധിമുട്ടാണ്. അതുകൊണ്ടുതന്നെ വസ്ത്രങ്ങള്‍ അഴിച്ചുവെക്കുമ്പോള്‍ ചൂട് കുറയും.

ഉറക്കത്തിലെ സംസാരത്തിനു പിന്നില്‍

നീ ഇന്നലെ ഉറക്കത്തില്‍ എന്താ സംസാരിച്ചതെന്ന് ആരെങ്കിലും നിങ്ങളോടു ചോദിച്ചിട്ടുണ്ടോ? ഏയ് ഞാന്‍ ഒന്നും സംസാരിച്ചില്ലല്ലോ എന്ന മറുപടി നിങ്ങള്‍ പറഞ്ഞിട്ടുമുണ്ടോ? ഈ സംസാരത്തെക്കുറിച്ച് നിങ്ങളുടെ മനസിലുമുണ്ടാകും നിരവധി ചോദ്യങ്ങള്‍ അല്ലേ!

ഉറക്കത്തിലെ സംസാരം എന്നത് നിഷ്കളങ്കമായ ഒന്നാണ്. ഏതെങ്കിലും സംഭവത്തെക്കുറിച്ചോ മറ്റോ നിങ്ങള്‍ കൂടുതല്‍ ഉത്കണ്ഠാകുലരാകുകയോ ആശങ്കയുള്ളവരോ ഒക്കെ ആകുമ്പോഴാണ് സംസാരം കൂടുതലായും ഉണ്ടാകുന്നത്. അതായത് ഉറങ്ങിക്കഴിഞ്ഞെങ്കിലും നിങ്ങളുടെ ഉപബോധ മനസില്‍ ഈ സംഭവത്തിന്‍മേല്‍ പ്രവര്‍ത്തിക്കുന്നുണ്ടെന്നു സാരം. അങ്ങനെ അല്ലാതെ എന്തെങ്കിലും അസ്വാഭാവികമായി തോന്നുകയാണെങ്കില്‍ ചികിത്സ തേടാനും മടിക്കരുത്.

എന്തുകൊണ്ട് ഉറക്കത്തില്‍ സംസാരിക്കുന്നു

ഉറക്കത്തിലെ സംസാരത്തെ അസുഖമായിട്ടല്ല, മറിച്ച് ഒരു ലക്ഷണമായാണ് കാണുന്നത്. ഉറക്കവുമായി ബന്ധപ്പെട്ടുള്ള വ്യതിയാനങ്ങളാണ് ഇവിടെ നടക്കുന്നത്. മൂന്നിനും പത്തിനും ഇടയില്‍ പ്രായമുള്ള കുട്ടികളില്‍ 50 ശതമാനത്തിലധികവും ഉറക്കത്തില്‍ സംസാരിക്കുന്നവരാണ്. ഇതില്‍ പേടിക്കേണ്ട കാര്യവുമില്ല. പ്രായം കൂടുന്തോറും ഈ സ്വഭാവവും മാറിവരും. മുതിര്‍ന്നവരില്‍ മൂന്നു മുതല്‍ അഞ്ച് ശതമാനം വരെയാണ് ഇത്തരം സ്വഭാവക്കാര്‍ ഉള്ളത്. ഇത് ഒരു രോഗമായി കണ്ട് മിക്കവരും ഡോക്ടറുടെ അടുത്ത് എത്താറുമില്ല.

എന്നാല്‍ കൂട്ടത്തില്‍ കിടക്കുന്ന പാര്‍ട്നര്‍ക്ക് ബുദ്ധിമുട്ടുണ്ടാകും വിധം സംസാരിക്കുക, ഉറക്കത്തില്‍ അമിതമായി ദേഷ്യം പ്രകടിപ്പിക്കുക, ഞെട്ടി ഉണരുക, അവനവനു തന്നെ ഉറക്കം നഷ്ടപ്പെടുക എന്നിവ കണ്ടാല്‍ ഡോക്ടറുടെ അടുത്ത് ചികിത്സ തേടേണ്ടതാണ്. ഇവ ചിലപ്പോള്‍ മറ്റേതെങ്കിലും രോഗത്തിന്റെ ലക്ഷണമാകാം.

സ്വപ്നാവസ്ഥയിലെ ഉറക്കം

റാപിഡ് ഐ മൂവ്മെന്റ് സ്ലീപ് അഥാവാ സ്വപ്നാവസ്ഥയിലുള്ള ഉറക്കം. ഈ ഉറക്കത്തിന്റെ സമയത്ത് തലച്ചോറ് പ്രവര്‍ത്തിച്ചു കൊണ്ടിരിക്കുകയായിരിക്കും. എന്നാല്‍ ശരീരം തളര്‍ന്ന അവസ്ഥയിലുമായിരിക്കും. തൊഴിക്കുന്നതായൊക്കെ സ്വപ്നം കണ്ടാലും തൊഴിക്കാത്തത് ഇതുകൊണ്ടാണ്. എന്നാല്‍ ചിലരില്‍ വര്‍ത്തമാനം പറയുന്ന പേശികളെ തലച്ചോറ് തളര്‍ത്തിക്കളയും. അവരാണ് ഉറക്കത്തില്‍ ഭീകരസ്വപ്നം കണ്ട് പ്രശ്നമുണ്ടാക്കുന്നത്. ഇത്തരം അവസ്ഥയെ റാപിഡ് ഐ മൂവ്മെന്റ് സ്ലീപ് ബിഹേവിയറല്‍ ഡിസ്ഓര്‍ഡര്‍ എന്ന് പറയും. ഇത്തരക്കാരെയാണ് ചികിത്സിക്കേണ്ടതായി വരുന്നത്. ഉറക്കത്തില്‍ ഭീകരസ്വപ്നം കണ്ട് ഞെട്ടി എഴുന്നേല്‍ക്കുന്നവരും കൂടെ കിടക്കുന്നവരുടെ ഉറക്കത്തിന് ഭംഗം വരുത്തുന്ന രീതിയില്‍ സംസാരിക്കുന്നവരും ചികിത്സ തേടേണ്ടതാണ്.

ചികിത്സ എങ്ങനെ?

എല്ലാ രോഗങ്ങള്‍ക്കും നല്‍കുന്നതു പോലെ മരുന്ന് നല്‍കി മാറ്റുന്ന ചികിത്സാരീതിയൊന്നും ഇതിനില്ല. മെഡിറ്റേഷന്‍, സ്ട്രെസ് ഇല്ലാതാക്കുക തുടങ്ങിയവയാണ് സാധാരണയായി ചെയ്യാറുള്ളത്. കടുത്ത മാനസിക സമര്‍ദം അനുഭവിക്കുമ്പോഴാണ് ഉറക്കത്തിലെ സംസാരം കൂടുന്നത്. ആദ്യത്തെ ലെവലില്‍ ഉറക്കം നന്നാക്കുക, സമര്‍ദം അകറ്റുക തുടങ്ങിയവയാണ് ചെയ്തുവരുന്നത്.

നല്ല ഉറക്കശീലങ്ങള്‍

നല്ല ഉറക്കശീലങ്ങള്‍ ഉണ്ടാക്കിയെടുക്കാന്‍ ചില കാര്യങ്ങള്‍ ശ്രദ്ധിച്ചാല്‍ മതി.

  1. ഉറങ്ങുന്ന മുറി ഉറങ്ങാന്‍ വേണ്ടി മാത്രം ഉപയോഗിക്കുക.

  2. ഉറങ്ങാന്‍ പോകുന്നതിന് ഒരു മണിക്കൂര്‍ മുന്‍പെങ്കിലും ജോലികളെല്ലാം നിര്‍ത്തിവച്ച് വിശ്രമിച്ചതിനു ശേഷം കിടക്കയിലേക്കു പോകുക.

  3. ഉറങ്ങുന്ന മുറി ശബ്ദരഹിതവും പ്രകാശരഹിതവും(ഡാര്‍ക്ക്) ആക്കുക.

  4. ഉറങ്ങുന്നതിനു മുന്‍പ് കട്ടിലില്‍ കിടന്ന് മാസികകളോ പുസ്തകങ്ങളോ വായിക്കാതിരിക്കുക.

  5. ടിവി കണ്ട് ഉറങ്ങുന്ന ശീലം മാറ്റുക.

  6. വൈകിട്ട് ആറിനു ശേഷം ഉത്തേജക പാനീയങ്ങള്‍ ഒഴിവാക്കുക. ഇളം ചൂടുള്ള പാല്‍ കുടിക്കുന്നത് നല്ല ഉറക്കം കിട്ടാന്‍ സഹായകമാണ്.

  7. ഉറങ്ങാന്‍ പോകുന്നതിനു മുന്‍പ് ലഘുവ്യാമങ്ങൾ ശീലമാക്കാം.

  8. പകല്‍ ഉറങ്ങാതിരിക്കുക.

  9. ലാപ്ടോപ്പ്, കംപ്യൂട്ടര്‍, മൊബൈല്‍ ഫോണ്‍ തുടങ്ങിയവയുടെ ഉപയോഗം ഉറക്കം വീണ്ടും മോശമാക്കുകയേ ഉള്ളൂ.

  10. ക്ളോക്കിലേക്ക് നോക്കാതിരിക്കുക.

സമര്‍ദം അകറ്റുക

ഉറങ്ങാന്‍ പോകുന്നതിനു മുന്‍പ് മനസിനെ മദിക്കുന്ന അന്നത്തെ പ്രശ്നങ്ങള്‍ ഒരു പേപ്പറില്‍ എഴുതുക. ഇതിനുള്ള പരിഹാരങ്ങളും നിങ്ങള്‍ക്കു തന്നെ ലിസ്റ്റ് ചെയ്ത് എഴുതാവുന്നതാണ്. തെളിഞ്ഞ് മനസുമായി കിടക്കയിലേക്കു പോകുക. പ്രാര്‍ഥന, നാമജപം തുടങ്ങിയവയും സമര്‍ദം അകറ്റാന്‍ സഹായിക്കും. ചെറിയ ഡോസ് ആന്റിഡിപ്രസന്റുകളും നല്‍കാറുണ്ട്.

വിവരങ്ങള്‍ക്കു കടപ്പാട്

ഡോ.രാജന്‍ ജോണ്‍

സൈക്കോളജിസ്റ്റ്

കോഴഞ്ചേരി മെഡിക്കല്‍കോളജ്

ഉറക്കം സുഖകരമാക്കാൻ 10 തലയിണ സൂത്രങ്ങൾ

 

1. കിടക്കുമ്പോൾ തല, കഴുത്ത്, തോൾസന്ധികൾ എന്നിവയ്ക്ക് താങ്ങ് നൽകുന്നതിനാണ് ബെഡ്പില്ലോ. വാഹനത്തിൽ യാത്ര ചെയ്യുമ്പോൾ, കസേരയിൽ ഇരിക്കുമ്പോൾ ഉപയോഗിക്കുന്നതാണ് ഡോനട്ട് പില്ലോ. നടുഭാഗത്ത് നട്ടെല്ലിന്റെ വളവ് താങ്ങുന്നതിനുള്ളതാണ് ലംബാർ പില്ലോ.

2. തൂവൽ നിറച്ച തലയിണയ്ക്ക് വില കൂടും. അലർജി പ്രശ്നമുള്ളവർക്കായി ഗുണമേന്മ കൂടുതലുള്ള ഹൈപ്പോഅലർജെനിക് വൂൾ കൊണ്ടുള്ള തലയിണ ഉപയോഗിക്കാം. കഴുത്തിന്റെ പ്രശ്നമുള്ളവർക്ക് വെള്ളം നിറച്ച തലയിണ പ്രയോജനം ചെയ്യും.

3. 12 മുതൽ 18 മാസം കൂടുമ്പോൾ തലയിണ മാറ്റി ഉപയോഗിക്കുന്നതാണ് നല്ലത്. തലയിണക്കവറുകൾ ഇടയ്ക്കിടെ വൃത്തിയാക്കണം. ആഴ്ചയിലൊരിക്കൽ 130-140 ഡിട്രി ഫാരൻഹീറ്റിൽ തലയിണ കഴുകുന്നത് ‍ഡസ്റ്റ് മൈറ്റ് നശിക്കാൻ സഹായിക്കും.

4. കിടക്കുമ്പോൾ കഴുത്തിൽ മുന്നിലേക്ക് കുഴിഞ്ഞ വളവോടുകൂടിയ കശേരുക്കളുടെ വളവ് നിലനിർത്തണം. അല്ലാത്തപക്ഷം കഴുത്തുവേദന ഉണ്ടാകും.

5. ഒരുവശം ചരിഞ്ഞ് കിടക്കുന്നയാളുടെ താഴെ വശത്തെ ചെവിക്കും ആ തോളിനു മിടയിലെ അകലം നികത്തുന്ന കട്ടിയാണ് തലയിണയ്ക്ക് വേണ്ടത്. നിവർന്നു കിടക്കുമ്പോൾ തല മുന്നിലേക്ക് കൂടുതൽ ഉയർന്നിരിക്കാതിരിക്കാൻ കനം കുറഞ്ഞത് മതി.

6. കമിഴ്ന്ന് കിടക്കുമ്പോൾ തലയിണ ഉപയോഗിച്ചില്ലെങ്കിൽ കൂടി നടുവേദന വരാതിരിക്കാൻ വയറിനു കീഴെ കനം കുറഞ്ഞ തലയിണ വയ്ക്കണം.

7. കിടന്നുകൊണ്ട് പുസ്കതം വായിക്കുമ്പോഴും ടിവി കാണുമ്പോഴും തലയിണ കൊണ്ട് തലയ്ക്ക് താങ്ങ് നൽകണം.

8. ഒരുവശം ചരിഞ്ഞ് കിടക്കുമ്പോൾ കാൽമുട്ട് മടക്കി നട്ടെല്ല് ഏതാണ്ട് നിവർന്നിരിക്കുന്ന അവസ്ഥയിലാകുന്നതാണ് സൗകര്യം. കാൽമുട്ടുകൾക്കിയിൽ തലയിണ വയ്ക്കുന്നത് ഇടുപ്പെല്ലിനു താങ്ങ് നൽകും.

9. കൂർക്കം വലി കുറയ്ക്കാൻ കഴുത്തിനു പുറകിൽ വയ്ക്കുന്ന തലയിണ സഹായിക്കും.

10. രണ്ട് വർഷത്തിൽ കൂടുതൽ ഒരു തലയിണ ഉപയോഗിക്കരുത്.

തയാറാക്കിയത്

ഡോ.ബി.സുമാദേവി ഇൻഎൻടി സർജൻ. ഇ.എസ്.െഎ ഹോസ്പിറ്റൽ, ഉദ്യോഗമണ്ഡൽ, എറണാകുളം

മലയാളിയുടെ രാത്രി

 

കേരളത്തിലെ പ്രഭാതത്തെക്കാളും മധ്യാഹ്നത്തെക്കാളും അധികം മാറ്റങ്ങൾ വന്നിട്ടുള്ളതു നമ്മുടെ സന്ധ്യയ്ക്കും രാത്രിക്കുമാണ്. പണ്ടൊക്കെ എല്ലാ ജനവിഭാഗങ്ങളും സന്ധ്യാവന്ദനം ഒരു മംഗളകർമമായി അംഗീകരിച്ചിരുന്നു.

ഒന്നിച്ചിരുന്നു പ്രാർഥിക്കുകയും കീർത്തനങ്ങളും മറ്റും ആലപിക്കുകയും ചെയ്യുന്നതു കുട്ടികളുടെ സ്വഭാവരൂപീകരണത്തിനും കുടുംബത്തെ കെട്ടുറപ്പോടുകൂടി നിലനിർത്തുന്നതിനും പ്രേരകശക്തികളായിരുന്നു. ചുരുക്കിപ്പറഞ്ഞാൽ സന്ധ്യയിൽ ഒന്നിച്ചു ചേരുകയും ഒന്നിച്ചു സന്ധ്യാവന്ദനം നടത്തുകയും ചെയ്യാത്ത കുടുംബങ്ങൾ കഴിഞ്ഞ നൂറ്റാണ്ടിൽ പത്തു ശതമാനം പോലും ഉണ്ടായിരുന്നില്ല. ഇന്നു പത്തു ശതമാനം കുടുംബങ്ങൾ പോലും അതു ചെയ്യുന്നില്ല എന്നതാണു വാസ്തവം.

ഇന്നു നമ്മുടെ സാത്വിക ടിവി ചാനലുകൾ പോലും സന്ധ്യാദീപങ്ങൾ തിങ്കളാഴ്ച മുതൽ വെള്ളിയാഴ്ച വരെ മാത്രമേ കത്തിക്കുവാൻ ധൈര്യപ്പെടാറുള്ളൂ. ശനിയും ഞായറും റിയാലിറ്റി ഷോകൾക്കും സീരിയലുകൾക്കും ആയി മുഴുവൻ ഉഴിഞ്ഞുവച്ചിരിക്കുകയാണ്.

സന്ധ്യാവന്ദനം കഴിഞ്ഞാൽ, പിന്നീടു രണ്ട് — രണ്ടര മണിക്കൂർ പണ്ടു കുട്ടികൾ പാഠങ്ങൾ പഠിക്കുന്നതിനും വീട്ടമ്മമാർ വീട്ടുജോലികൾക്കും മറ്റുള്ളവർ അവരുടെ ജോലികളും നിർവഹിക്കുന്നതും ആയിരുന്നു പതിവ്. ഇന്ന് അതു പാടേ മാറി. സ്ത്രീകളും കുട്ടികളും കുറെയേറെ പുരുഷന്മാരും വിഡ്ഢിപ്പെട്ടിയുടെ അടിമകളായി അതിനു മുമ്പിൽ സ്ഥിരം സ്ഥലം പിടിക്കുവാൻ തുടങ്ങി. വലിയ ക്ലാസുകളിൽ പഠിക്കുന്ന കുട്ടികളും കുറെയേറെ ഇൻഫർമേഷൻ ടെക്നോളജി എന്ന ഓമനപ്പേരിനാൽ വിളിക്കുന്ന ജോലികൾ ചെയ്യുന്നവരും കംപ്യൂട്ടറിന്റെയും ലാപ്ടോപ്പിന്റെയും മുമ്പിൽ ഇരുപ്പായി. കുറെയേറെ ആളുകൾ ഈ സമയം മദ്യപാനത്തിനും ഫാസ്റ്റ് ഫുഡും ബേക്കറി ആഹാരങ്ങളും കഴിക്കുവാനും ആണു മുഖ്യമായും ഉപയോഗിക്കുന്നത്.

ഇതു കേരളത്തിനു മൂന്ന് ഒന്നാം സ്ഥാനങ്ങളാണു നേടിക്കൊടുത്തിട്ടുള്ളത്. ഇന്ന് ഇന്ത്യയിൽ ഏറ്റവും അധികം ആളോഹരി മദ്യം അകത്താക്കുന്ന സംസ്ഥാനം കേരളമാണ്. അതേപോലെ പ്രമേഹത്തിന്റെയും പൊണ്ണത്തടിയുടെയും ലോക തലസ്ഥാനവും ഇന്നു കേരളമാണ്. പഠനവൈകല്യങ്ങളും ഓൺലൈനിൽക്കൂടിയും മറ്റു സാങ്കേതിക പ്രവർത്തനങ്ങളിലൂടെയും ഉള്ള അപഥസഞ്ചാരം കൊണ്ടും അമിതമായ ആഗ്രഹങ്ങൾ കൊണ്ടും വിദ്യാർഥികളിലെ ആത്മഹത്യയിലും കേരളം തന്നെയാണു മുൻപന്തിയിൽ.

പഴയ ആചാരപ്രകാരവും ആയുർവേദ വിധിപ്രകാരവും ചില മതവിശ്വാസങ്ങളനുസരിച്ചും സന്ധ്യയ്ക്കു മുമ്പു തന്നെ അത്താഴം കഴിക്കണമെന്നാണു വയ്പ്. എട്ടു മണിയോടു കൂടി രാത്രി ഭക്ഷണം കഴിക്കുക പതിവായിരുന്നു. അതാണ് ഇപ്പോൾ വളരെ വൈകിപ്പോയിട്ടുള്ളത്. മാത്രമല്ല ഭക്ഷണത്തെപ്പറ്റി മുമ്പേ തന്നെ പറഞ്ഞിട്ടുള്ള ഏറ്റവും കാതലായ ഉപദേശം, അതായതു ഒരു രാജാവിനെപ്പോലെ പ്രഭാതഭക്ഷണവും ഒരു പ്രഭുവിനെപ്പോലെ ഉച്ചഭക്ഷണവും കഴിക്കാമെങ്കിലും രാത്രി ഭക്ഷണം ഒരു പാപ്പരെപ്പോലെ വേണം എന്നാണ്.

അത്താഴം അത്തിപഴത്തോളം എന്നാണു ചൊല്ല്. അമിതഭക്ഷണം വിശ്രമത്തെയും ഉറക്കത്തെയും ദഹനവ്യവസ്ഥിതിയെയും സാരമായി ബാധിക്കുന്നതിനു പുറമേ രക്തസമ്മർദം, ഹൃദ്രോഗം, ചർമരോഗങ്ങൾ എന്നിവയെല്ലാം സൃഷ്ടിക്കുന്ന പ്രധാന ഘടകവുമാകുന്നു. കേരളത്തിലെ രാത്രി ഭക്ഷണം കുറേക്കൂടി ലളിതമാക്കുകയും കുറയ്ക്കുകയും ചെയ്താൽ തന്നെ ഇവിടുത്തെ ആരോഗ്യ അന്തരീക്ഷത്തിൽ കാര്യമായ മാറ്റം വരുത്താമെന്നു തോന്നുന്നു.

നിദ്ര നിശയിങ്കൽ പോലുമില്ല

ഊണു കഴിഞ്ഞവൻ പായ തിരയുന്നതു സ്വാഭാവികമാണല്ലോ. കഴിഞ്ഞ അമ്പതു കൊല്ലം കൊണ്ടു നമുക്കുണ്ടായിട്ടുള്ള ഏറ്റവും വലിയ നഷ്ടം സുഖനിദ്രയ്ക്കുണ്ടായിട്ടുള്ള ഭംഗമാണ് എന്നു തോന്നുന്നു. നിദ്ര നിശയിങ്കൽ പോലുമില്ലാതെയായി എന്ന അവസ്ഥ.

ജോൺ സ്റ്റീൽബെക്ക് പറഞ്ഞതു പോലെ സത്യസന്ധമായ ഉറക്കത്തിനുള്ള ഏറ്റവും നല്ല തലയണ ഒരു സുതാര്യമായ മനസാക്ഷി തന്നെയാണ്. (A Clear Conseience is the best pillow for honest sleep). അതുള്ളവർക്കു പോലും വേണ്ടത്ര നിദ്ര ലഭിക്കാത്തതിന്റെ കാരണമാണു നമുക്കു വിശകലനം ചെയ്യേണ്ടത്. ഒരു വ്യക്തിക്കു (കുട്ടികൾക്കും വൃദ്ധർക്കും കുറച്ചുകൂടി അധികം വേണ്ടിവരും) വേണ്ടത് ഏഴു മുതൽ എട്ടു മണിക്കൂർ വരെ ഉറക്കമാണ്. ഇതിനു നമുക്കു സ്വീകരിക്കുവാൻ കഴിയുന്ന കാര്യങ്ങൾ താഴെ പറയുന്നവയാണ്.

  1. ഉറങ്ങാൻ കിടക്കുന്നതിനു ഒരു മണിക്കൂർ മുമ്പെങ്കിലും ഭക്ഷണം കഴിക്കുക.

  2. മനസിനെ ശാന്തമാക്കുവാൻ ശ്രമിക്കുക. ഇതിനു ധ്യാനം, മനനം എന്നിവ നല്ലതാണ്.

  3. ഉറങ്ങാൻ കിടക്കുന്ന മുറിയിൽ ധാരാളം വായു സഞ്ചാരം ഉണ്ടാവണം.

    1. കിടക്കയും വിരികളും പുതപ്പും എല്ലാം നനവില്ലാത്തതും വൃത്തിയുള്ളവയാവണം.

    2. ഇറുകിയ വസ്ത്രങ്ങൾ ധരിക്കരുത്.

    3. ഉറക്കത്തിനു മരുന്നുകൾ കഴിക്കുന്നതോ, അതിനായി മദ്യം ഉപയോഗിക്കുകയോ ചെയ്യുന്നത് അപകടകരമാണ്.

    കേരളത്തിന്റെ രാത്രികളെ, വിശിഷ്യ യുവകേരളത്തിന്റെ സായംകാലങ്ങളെ കൂടുതൽ നല്ല വഴികളിലേക്കു നയിക്കാൻ നാം ശ്രമിച്ചില്ലെങ്കിൽ ഭാവി അപകടം നിറഞ്ഞതായിരിക്കും.

3.11111111111
നിങ്ങളുടെ നിര്‍ദ്ദേശം പോസ്റ്റ് ചെയ്യുക

(നിങ്ങള്‍ക്ക് അന്വേഷണങ്ങള്‍ പോസ്റ്റ് ചെയ്യുകയോ ചര്‍ച്ച ചെയ്യുകയോ ചേര്‍ക്കുകയോ ചെയ്യാം)

Enter the word
നവിഗറ്റിഒൻ
Back to top