മനുഷ്യന്റെ ആരോഗ്യ പരിപാലനവുമായി ബന്ധപ്പെട്ട് അനേകം നാട്ടറിവുകള് നമുക്ക് പൈതൃകമായുണ്ട്. പുതിയ കാലത്ത് ഒരുപാട് ആരോഗ്യകേന്ദ്രങ്ങളും, ആശുപത്രികളും, മരുന്നുകളും ലഭ്യമാണു. എന്നാല് നമ്മുടെ ഒരു തലമുറയ്ക്ക് മുബ് വരെ ഇത്തരത്തിലുള്ള യാതൊരു വിധി സൗകര്യങ്ങളില്ലാതിരുന്നിട്ടും ആരോഗ്യപരമായി പുതിയ തലമുറയേക്കാളും പഴയ തലമുറ ഒരുപാട് മുന്നോട്ട് പോയിരുന്നു. അത് പ്രധാനമായും ആ തലമുറയുടെ ആരോഗ്യപരിപാലനവുമായി ബന്ധപ്പെട്ടാണു കിടക്കുന്നത്. രോഗം വന്ന് ചികിത്സിക്കുന്ന രീതിയാണു ഇന്ന് പരിശീലിക്കുന്നതെങ്കില് അവര് രോഗം വരാതെ സൂക്ഷിക്കാനായിരുന്നു ശ്രമിച്ചിരുന്നത്. അത്തരതില് അവര് പരിശീലിച്ചിരുന്ന ആരോഗ്യപരിപാലന രീതിയെക്കുറിച്ചുള്ള അറിവുകളാണു ഈ മേഖലയില് ശേഖരിക്കേണ്ടത്.
ആരോഗ്യപരിപാലനത്തില് പ്രതിരോധ ചികിത്സയ്ക്ക് ഒരുപാട് മാര്ഗ്ഗങ്ങള് നാട്ടറിവുമേഖലയിലുണ്ട്. ഉദാ:- ഭക്ഷണ്ത്തിലെ ഔഷധകൂട്ടുകള്, പ്രസവ ശുശ്രൂഷയുമായി ബന്ധപ്പെട്ട ഭക്ഷണങ്ങള്, ഔഷധങ്ങള്, കുഞ്ഞുങ്ങള്ക്ക് നല്കുന്ന പരിപാലനം.
ശിരോ രോഗികള്ക്കുള്ള ഭക്ഷണക്രമവും ജീവിതക്രമവും ആയുര്വേദം നിര്ദ്ദേശിക്കുന്നുണ്ട്. ആട്ടിന്മാംസം, പഴകിയ ചെന്നല്ലരി, ചെറുപയര്, പഴം, മുതിര, ഉഴുന്ന്, പഴകിയ നെയ്യ്, ചൂടുപാല്, മുന്തിരി, നെല്ലിക്ക, പടവലങ്ങ, മാതളപ്പഴം എന്നീ ഭക്ഷണങ്ങള് ശിരോരോഗികള്ക്ക് ഉത്തമമാണ്. ദുഷിച്ച ജലം, പകലുറക്കം, അമിത മാനസിക വിക്ഷോഭം, വേഗധാരണം, പുളി, എരിവ്, ഉപ്പ് എന്നീ രസങ്ങളടങ്ങിയ ഭക്ഷണങ്ങളുടെ അമിതോപയോഗം എന്നിവ ശിരോ രോഗികള്ക്ക് നിഷിദ്ധമാണ്.
ശിരസ്സിനെ സംബന്ധിക്കുന്ന രോഗങ്ങള്ക്കുള്ള പ്രധാന ചികിത്സ നസ്യം ആണ്. പ്രഭാതത്തിലാണ് നസ്യം ചെയ്യുന്നത്. രോഗിയെ രോഗത്തിനനുസരിച്ചുള്ള എണ്ണ പുരട്ടി വിയര്പ്പിക്കുകയാണ് ആദ്യം. എന്നിട്ട് മൂക്കിലൂടെ ഔഷധപ്രയോഗം നടത്തുന്നു. നസ്യം കൂടാതെ ശിരോവസ്തി, ശിരോധാര തുടങ്ങിയ ചികിത്സാ ക്രമങ്ങളും നടത്താറുണ്ട്. ആയുര്വേദം ആദ്യം ചെയ്യുക രോഗകാരണം കണ്ടെത്തി അത് ഒഴിവാക്കുകയാണ്. രോഗകാരണങ്ങള് ഉപേക്ഷിച്ചിട്ടും മാറാത്തവയ്ക്കാണ് ദോഷാനുസരേണ ചികിത്സ നടത്തുന്നത്.
പറമ്പില് കാലവര്ഷം തുടങ്ങിയാല് മുളച്ചുവരുന്ന ചാമയിലയും ഔഷധക്കൂട്ടുകളും ഉപയോഗിച്ചുണ്ടാക്കുന്ന കഞ്ഞി രോഗപ്രതിരോധ ഔഷധം കൂടിയാണ്. പണ്ടുകാലങ്ങളിലുള്ളവര് ഇത് ധാരാളമായി ഉപയോഗിച്ചിരുന്നു.
പ്രസവശുശ്രൂഷയുമായി ബന്ധപ്പെട്ടാണ് ജീരകക്കോഴി കഴിക്കുന്നത്.
ചേരുവകള്. 1) മൂപ്പാവാത്ത പിടക്കോഴി, 2) പച്ചമല്ലി, 3) കുരുമുളക് പൊടി, 4) ജീരകം, 5) ഉലുവ, 6) കടുക്, 7) വെളുത്തുള്ളി, 8) ചെറിയ ഉള്ളി, 9) എണ്ണ, 10) മഞ്ഞള്പൊടി, 11) ഉപ്പ്.
തയ്യാറാക്കുന്നവിധം 2 മുതല് 6 വരെയുള്ള ചേരുവകള് നന്നായി അരച്ചെടുക്കുക. കഷ്ണങ്ങളാക്കിയ കോഴിയിറച്ചിയില് അരച്ചെടുത്ത ചേരുവകളും മഞ്ഞള്പൊടിയും പാകത്തിന് ഉപ്പുംചേര്ത്ത് ചെറിയഉള്ളി അരിഞ്ഞത് നന്നായി മൂപ്പിച്ചതിനുശേഷം അതിലേക്കിടുക. എണ്ണയില് കിടന്ന് ഇറച്ചി നല്ലവണ്ണം വെന്തശേഷം വാങ്ങിവെക്കുക. (അരവ് മരുന്നുകളും എണ്ണയും നല്ലവണ്ണം ചേര്ക്കണം)
വായുവിന്റെ പ്രധാനസ്ഥാനങ്ങളിലൊന്നാണ് ചെവി. വായുവിന് ശമനമുണ്ടാകാന് ചെവിയില് എണ്ണ വീഴ്ത്തി ശീലിക്കേണ്ടതാണ്. രോഗാവസ്ഥയില് വൈദ്യ നിര്ദ്ദേശപ്രകാരവും രോഗമില്ലാത്ത അവസ്ഥയില് നിത്യേന തേച്ചുകുളിക്കുമ്പോഴും ചെവിയില് എണ്ണ വീഴ്ത്തി ശീലിക്കാം. സഹിക്കാവുന്ന ചൂടോടെ എണ്ണ ഓരോ ചെവിയിലും നിറക്കുകയും 10-15 മിനിറ്റ് അതേപടി വയ്ക്കുകയുമാണ് വേണ്ടത്. പിന്നീട് ഒരു തിരികൊണ്ട് തുടച്ച് എണ്ണ എടുത്തു കളയണം. കര്ണ്ണരോഗങ്ങള് അകറ്റാന് ആയുര്വേദം നിര്ദ്ദേശിക്കുന്ന മറ്റൊരു ചികിത്സാക്രമമാണ് പുക കൊള്ളിക്കല്. കുരുമുളക് പൊടി കനലില് വിതറിയുണ്ടാകുന്ന പുക ഒരു ചോര്പ്പിലൂടെയോ പേപ്പര് കോട്ടിയുണ്ടാക്കിയ കുഴലിലൂടെയോ ചെവിയിലെത്തിച്ചാല് ചെവിവേദനയും ചെവിയിലെ ദുര്ഗന്ധവും ശമിക്കും. ഗുല്ഗുലു, കുന്തിരിക്കം, തുളസിയില തുടങ്ങിയവ നെയ്യ് ചേര്ത്തോ, വേപ്പെണ്ണ ചേര്ത്തോ പുകച്ചും ചെവിയില് കൊള്ളിക്കാവുന്നതാണ്. കേള്വിക്കുറവിനും ചെവിയിലെ മൂളല് അകറ്റുന്നതിനും എള്ള്, ചെറുപയര്, കായം, ഏലത്തരി ഇവ കടുകെണ്ണയില് കുഴച്ചു പുകയ്ക്കുന്ന ചികിത്സ ദിവസം 3-4 തവണ ചെയ്യണം.
ചെവിക്കകത്തു കുരുവുണ്ടായാല് എരുക്കിലമേല് എണ്ണ പുരട്ടി വാട്ടിപ്പിഴിഞ്ഞ നീര് ഒഴിക്കുക. എരുക്കിലനീരും ഉള്ളിയും മഞ്ഞളിന് നീരും കൂട്ടി ചൂടോടെ വീഴ്ത്തിയാലും കുരുവും അതിന്റെ വേദനയും മാറും. കുരു വീണ്ടും വീണ്ടും വരുന്നുണ്ടെങ്കില് വലംപിരി, ഉള്ളി, മഞ്ഞള് ഇവ ചേര്ത്ത് എണ്ണ കാച്ചി ചെവിയില് നിര്ത്തി ശീലിക്കുന്നത് നല്ലതാണ്. വെളുത്തുള്ളി പഞ്ഞിയില് പൊതിഞ്ഞ് ചെവിക്കുള്ളില് വെച്ചാല്, കാറ്റും തണുപ്പും കൊള്ളുമ്പോഴുള്ള താല്ക്കാലിക ശ്രവണ ഹാനി മാറും. കൂവളത്തില ഇടിച്ചുപിഴിഞ്ഞ നീരില് കൂവളത്തിന് വേര് അരച്ചു ചേര്ത്ത് പാലും ചേര്ത്ത് എണ്ണ കാച്ചിത്തേച്ചാല് മിക്ക കേള്വിക്കുറവും ശമിക്കും.
ചെവി അടഞ്ഞാല് ചെറുനാരങ്ങയില് ഇന്ദുപ്പ് നിറച്ച് ചുട്ടെടുത്ത് പിഴിഞ്ഞ നീര് ചെവിയില് വീഴ്ത്തുന്ന ചികിത്സയുണ്ട്. ഇതു ചെവി വേദനക്കും ചെവി പഴുപ്പിനും കൂടി നല്ലതാണ്. തലചുറ്റല്, കേള്വിക്കുറവ്, ചെവിമൂളല് എന്നീ പ്രശ്നങ്ങള് ഒരുമിച്ച് അനുഭവപ്പെട്ടാല് ഗൌരവമായ ചികിത്സകള് വേണം. ഗുല്ഗുലുതിക്തകം കഴിക്കുക, നെയ്യ് സേവിക്കുക, തലയ്ക്കു ധാര ഇവ പ്രയോജനപ്പെടും. കേള്വിക്കുറവ് ശിശുക്കളിലാണെങ്കില് അവരുടെ സംസാരശേഷിയെ തന്നെ ബാധിക്കാനിടയുണ്ട്.
പഥ്യം പ്രധാനം.
പഥ്യം പാലിക്കുന്നതും ആയുര്വേദത്തില് പ്രധാനമാണ്. മരുന്നുകള് ഫലിക്കുന്നതിന് സഹായകമായ അന്തരീക്ഷം സൃഷ്ടിക്കുകയാണ് പഥ്യം കൊണ്ട് ഉദ്ദേശിക്കുന്നത്. രോഗം മാറുന്നതുവരെ അപഥ്യമായവ ഒഴിവാക്കുക. എരിവ്, പുളി, ഉപ്പ് തുടങ്ങിയ രസങ്ങള് കൂടുതലുള്ളതും ദഹിക്കാന് പ്രയാസമുള്ളതുമായ ആഹാരം പാടില്ല. ലഘുവും എളുപ്പം ദഹിക്കുന്നതുമായ ആഹാരം ശീലിക്കണം. ദേഹത്തില് കഫമുണ്ടാക്കുന്ന തൈര്, ഉഴുന്ന് തുടങ്ങിയ ആഹാരം ഒഴിവാക്കുക.
മലമൂത്രവിസര്ജനം, ഉറക്കം, ദാഹം വിശപ്പ്, തുമ്മല് തുടങ്ങി പ്രകൃത്യാലുള്ള ശീലങ്ങള് തടയരുത്. അധികമായി സംസാരിക്കുന്നതും വളരെ വലിയ ശബ്ദം കേള്ക്കുന്നതും കര്ണരോഗികള്ക്കു നന്നല്ല. ചെവിയുടെ പരിസരവുമായി ബന്ധപ്പെട്ട പ്രവൃത്തികള് സൂക്ഷിച്ചു ചെയ്യണം. വളരെ ശക്തിയില് പല്ല് തേയ്ക്കുക, നാക്ക് വടിക്കുക എന്നിവയൊക്കെ രോഗാവസ്ഥയില് ചെയ്യരുത്.
ശരീരക്ഷീണം ഉണ്ടാക്കുന്ന വ്യായാമങ്ങളും പാടില്ല. പരുപരുത്തതും മൂര്ച്ചയുള്ളതുമായ വസ്തുക്കള് ചെവിക്കുള്ളിലേക്ക് കടത്തരുത്. പെന്സിലും കടലാസും തൂവലും മറ്റു ചെറു വസ്തുക്കളും ചെവിയിലിട്ടു ചൊറിയുന്നത് തീരെ നന്നല്ല. മഞ്ഞ്, തണുത്ത കാറ്റ്, ചാറ്റല് മഴ ഇവയില് നിന്ന് ചെവിക്കു വേണ്ടത്ര സംരക്ഷണം കൊടുക്കണം. ഗോതമ്പ്, ചെറുപയര്, ബാര്ലി, പഴകിയ നെയ്യ്, പടവലങ്ങ, മുരിങ്ങക്കായ, വഴുതനങ്ങ, തഴുതാമയില എന്നിവയടങ്ങിയ ആഹാരം, പലതരത്തിലുള്ള രസായനങ്ങള്, നിയന്ത്രിതമായ ലൈംഗികത എന്നിവ രോഗമുക്തി ഉറപ്പാക്കാന് കര്ണരോഗികള് ശീലിക്കുന്നത് നന്നായിരിക്കും.
എല്ലാ കര്ണരോഗികളും ഒഴിവാക്കേണ്ട ഒന്നാണു തലയില് വെള്ളമൊഴിച്ചുള്ള കുളി. തല കുളിക്കുന്നതുവഴി, ചെവിയെ മറ്റുഭാഗങ്ങളുമായി ബന്ധപ്പെടുത്തുന്ന സ്രോതസ്സുകള്ക്കും അതു സ്ഥിതി ചെയ്യുന്ന ശൃംഗാടകം എന്ന പ്രദേശത്തിനു മുഴുവനുമായും കഫം വര്ദ്ധിച്ചു നീര്ക്കെട്ട് ഉണ്ടാക്കുന്നു. രോഗലക്ഷണങ്ങളൊന്നും ഉണ്ടാക്കിയില്ലെങ്കില് പോലും ഈ നീര്ക്കെട്ട് രോഗസാധ്യത നിലനിര്ത്തിക്കൊണ്ടിരിക്കും.
ജ്വരം ഒരു വ്യാധിയായും മറ്റു വ്യാധികളുടെ ലക്ഷണമായും പ്രത്യക്ഷപ്പെടാമെന്ന് ആയുര്വേദത്തില് പറയുന്നു. മറ്റു വ്യാധികള് മൂലമാണു ജ്വരമെങ്കില് യഥാര്ത്ഥ രോഗം ഏതെന്നു നിര്ണയിക്കണം. മുത്തങ്ങയും പര്പ്പടകപ്പുല്ലും കഷായമായി നല്കുന്നതാണ് ജ്വരത്തിനുള്ള ഏറ്റവും ശ്രേഷ്ഠമായ ഔഷധം. വാതവുമായി ബന്ധപ്പെട്ട ജ്വരങ്ങളില് അമൃതു ചേര്ന്ന കഷായങ്ങളും പിത്തജന്യമായ ജ്വരങ്ങളില് മധുരശീതഗുണങ്ങളോടുകൂടിയ കഷായങ്ങളും കഫം മൂലമുണ്ടാകുന്ന ജ്വരത്തിന് തിക്തരസത്തോടുകൂടിയ കഷായങ്ങളും ഹിതകരമാണ്. ജ്വരത്തിന്റെ തീവ്രതയും അനുബന്ധവികാരങ്ങളും പരിശോധിച്ച ശേഷമാണ് ചികിത്സ നിശ്ചയിക്കുക.
വാതജ്വരത്തില് ഗളുച്യാദികഷായം, കിരാതതിക്താകാദി കഷായം എന്നിവയും പിത്തജ്വരത്തില് ദ്രാക്ഷാദികഷായം പര്പ്പടകപ്പുല്ലു കഷായം എന്നിവയും കഫജ്വരത്തില് പാര്ങ്യാദി കഷായം എന്നിവയും നല്കുന്നു. ഇവയോടൊപ്പം സര്വജ്വരഹരമായി കടുക്ക, നെല്ലിക്ക, തിപ്പലി, കൊടുവേലി, ഇവ കൊണ്ടുള്ള കഷായവും നല്കണമെന്നു നിഷ്കര്ഷിച്ചിട്ടുണ്ട്. കഷായം കുടിക്കാന് പല രോഗികള്ക്കും ബുദ്ധിമുട്ടായതിനാല്, അരിഷ്ടങ്ങളും ഗുളികകളും ചേര്ത്തുള്ള മിശ്രിതങ്ങള് നല്കാവുന്നതാണ്.
ദ്രാക്ഷാരിഷ്ടം, അമൃതാരിഷ്ടം, സുദര്ശനാരിഷ്ടം ഇവ പ്രയോജനപ്രദമാണ്. സൂര്യപ്രഭാഗുളിക, ആരോഗ്യവര്ദ്ധിനി ഗുളിക ഇവ ചേര്ത്തുള്ള ഔഷധപ്രയോഗങ്ങളും ജ്വരം അകറ്റാന് ഉപകരിക്കും. തളം വെയ്ക്കുക, തുണി നനച്ചിടുക എന്നിവ ശരീരത്തിന്റെ ചൂടുകുറയ്ക്കാന് ചെയ്യാവുന്നതാണ്. ഭക്ഷണം കുറയ്ക്കുന്നതാണ് നല്ലത്. രോഗിക്ക് വിശപ്പനുഭവപ്പെടുന്നതനുസരിച്ച് ഔഷധങ്ങളിട്ടു പാകപ്പെടുത്തിയ കഞ്ഞി നല്കാം.
കല്ലുരുക്കി എന്ന പച്ചമരുന്ന് അതിരാവിലെ പച്ചയായി അരച്ചുകലക്കി കഴിച്ചാല് മൂത്രാശയകല്ലുകള്ക്ക് ആശ്വാസം കാണുന്നു. കല്ലൂര്വഞ്ചി എന്ന മരുന്ന് കഷായം വെച്ചും ഈ മരുന്നിട്ട് വെള്ളം തിളപ്പിച്ചും സ്ഥിരമായി കുടിക്കുന്നത് ആശ്വാസകരമാണ്. ഇളനീര് വെള്ളത്തില് രാത്രി ഏലത്തരി പൊടിച്ചു ചേര്ത്ത് രാവിലെ കുടിക്കുന്നതും നല്ലതാണ്. വിരതരാദി കഷായം, കന്മദ ഭസ്മം മുതലായവ വിദഗ്ദ നിര്ദേശത്തില് സേവിക്കാവുന്നതാണ്. വാതഹരങ്ങളായ തൈലങ്ങള് പുരട്ടി വിയര്പ്പിക്കുന്നത് ഇതിന്റെ വേദന കുറയ്ക്കുവാനും മൂത്രം പോകുന്നതിനും ഉപകരിക്കും. ആയുര്വേദത്തില് ഈ രോഗത്തിനെ അശ്മരി എന്നാണ് പറയുന്നത്. നാലു തരത്തിലുള്ള അശ്മരി രോഗമുണ്ട്. വാതാശ്മരി, പിത്താശ്മരി, കഫാശ്മരി, ശുക്ലാശ്മരി എന്നിങ്ങനെയാണിവ. കുടിക്കുന്ന വെള്ളത്തില് കാല്സ്യത്തിന്റെ അളവു കൂടുതലാകുന്നതാണ് മൂത്രാശയ രോഗത്തിന് പ്രധാന കാരണം. വെള്ളം കുടിക്കുന്നത് കുറവായിരിക്കുക, വിയര്പ്പു രൂപത്തില് വെള്ളം ശരീരത്തില് നിന്ന് ധാരാളമായി പോകുക എന്നീ കാരണങ്ങളാല് മൂത്രാശയത്തിലെത്തുന്ന ജലാംശം കുറയുന്നതും മറ്റൊരു കാരണമാണ്. കാല്സ്യം കാര്ബണേറ്റ്, ഫോസ്ഫേറ്റ്, യൂറിക് ആസിഡ് എന്നിവ ചേര്ന്നതാണ് സാധാരണ ഈ കല്ലുകള്.
കാട്ടുകുതിര ഉരക്കുക, പൃക്കതുളസിയും കാട്ടുതുളസിയും വെള്ളത്തില് കലക്കി ഒഴിക്കുക. ചീമക്കൊന്ന പിച്ചി പറിച്ചിടുക. എന്നിവയെല്ലാം കൊതുകിനെ അകറ്റാന് നല്ലതാണ്.
ഉള്ളിച്ചോര് ചേരുവകള്. നെയ്യ്, വെളിച്ചെണ്ണ, ചെറിയഉള്ളി, വെളുത്തുള്ളി, മഞ്ഞള്പൊടി, ഉപ്പ്, ജീരകപൊടി, കടുക് പൊടി, ഉലുവപ്പൊടി, ചോറ്.
തയ്യാറാക്കുന്ന വിധം. വെളിച്ചെണ്ണയും നെയ്യും ചേര്ത്ത് വെളുത്തുള്ളി അരിഞ്ഞതുമിട്ട് നന്നായി മൂപ്പിക്കുക. അതില് ചേരുവകളെല്ലാം കൂടി ചേര്ത്തിളക്കി ഉപയോഗിക്കുക.
ഉലുവച്ചോര് ചേരുവകള് - ഉലുവ, ഉണങ്ങലരി, തേങ്ങ ചിരവിയത്, ഉള്ളി, വെളിച്ചെണ്ണ.
തയ്യാറാക്കുന്ന വിധം - ഉലുവയും ഉണങ്ങലരിയും തേങ്ങ ചിരവിയതും ഒരു മണ്ചട്ടിയിലിട്ട് വേവിക്കുക. ശേഷം വെളിച്ചെണ്ണയില് ഉള്ളി മൂപ്പിച്ച് ഇളക്കി ഉപയോഗിക്കുക.
അവസാനം പരിഷ്കരിച്ചത് : 5/3/2020
കൂടുതല് വിവരങ്ങള്
അമിതവണ്ണം നിയന്ത്രിക്കുന്നതില് ആഹാര നിയന്ത്രണത്തിന...
കൂടുതല് വിവരങ്ങള്
ആഹാരപദാര്ഥടങ്ങള് ദഹിക്കാതിരിക്കുന്ന അവസ്ഥ