অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

വിവിധ ഇനം പാമ്പുകള്‍

വിവിധ ഇനം പാമ്പുകള്‍

ആമുഖം

പാമ്പുകളുടെ വംശോല്പത്തി ഏകദേശം ജുറാസ്സിക് കാലഘട്ടത്തില്‍ ആണെന്നാണ്‌ പൊതുവേയുള്ള വിശ്വാസം.കടല്‍ ജീവികളായ മീസോ സോറുകള്‍ ആണ് അവയുടെ ആദിമ പിതാമഹന്മാര്‍ എന്ന് ഒരു വിഭാഗം ശാസ്ത്രകാരന്മാര്‍ പറയുന്നു.കാലുള്ള ജീവികളില്‍ നിന്ന് പരിണാമം സംഭവിച്ചു അവ വെള്ളത്തിലും കരയിലും മരത്തിനു മുകളിലും എല്ലാം താമസം തുടങ്ങി.ലോകത്തില്‍ ആകെ മൂവായിരത്തി അഞ്ഞൂറിലധികം ഇനം പാമ്പുകളുണ്ട്‌.നമ്മുടെ കേരളത്തില്‍ നൂറ്റി ഏഴു ഇനം പാമ്പുകളുണ്ടെന്നു സുവോളജിക്കല്‍ സര്‍വേ ഓഫ് ഇന്ത്യയിലെ ശാസ്ത്രജ്ഞനായ ഡോക്ടര്‍ മുഹമ്മദ്‌ ജാഫെര്‍ പാലോട്ട് പറയുന്നു.
കേരളത്തിലെ പാമ്പുകളെ വിശദമായി പരിചയപ്പെടുന്നതിനു മുന്‍പ് നമുക്ക് പാമ്പുകളെക്കുറിച്ച് പൊതുവായി ചില കാര്യങ്ങള്‍ മനസ്സിലാക്കാം.
പാമ്പുകളെ പതിനൊന്നു കുടുംബങ്ങളായി തരം തിരിച്ചിരിക്കുന്നു.
റ്റിഫ്ലോപിടെ
ലെപ്ടോ ടിഫ്ലോപിടെ
യൂറോ പെല്‍ട്ടിടെ
സീനോപെല്‍ടിടെ
ബോയിടെ
അക്രോ കോര്ടിടെ
കൊളുബ്രിടെ
ദാസിപെല്ടിടെ
ഇലാപിടെ
വൈപെറിടെ
ഹൈട്രോഫിടെ
ഇത്രയും കുടുംബങ്ങളിലായി ഇരുനൂറ്റി എഴുപത്തെട്ട് ഇനം പാമ്പുകള്‍ ആണ് ഇന്ത്യയില്‍ ഉള്ളത്.

വലുതും ചെറുതും

വളരെ വലിപ്പമുള്ളവ മുതല്‍ ചെറിയ നൂല് പോലുള്ളവ വരെയുണ്ട് പാമ്പുകളുടെ കൂട്ടത്തില്‍.ദിനോസോറുകളുടെ കുട്ടികളെ ആഹാരമാക്കുന്ന പാമ്പുകള്‍ പോലും ജുറാസ്സിക് കാലഘട്ടത്തില്‍ ജീവിച്ചിരുന്നെന്നു അടുത്ത കാലത്ത് ശാസ്ത്രജ്ഞന്മാര്‍ കണ്ടെത്തുകയുണ്ടായി.

എങ്കിലും ടൈട്ടാണോബോവ എന്ന പാമ്പുകള്‍ ആയിരുന്നത്രെ ലഭ്യമായ തെളിവുകള്‍ വെച്ച് ജീവിച്ചിരുന്നതില്‍ ഏറ്റവും വലുത്.
നാല്പതു മുതല്‍ അമ്പതു വരെ അടി നീളവും ഒരു മീറ്ററിലധികം വണ്ണവും ഒന്നര ടണ്ണോളം തൂക്കവും ഉണ്ടായിരുന്ന ഈ ഭീമന്‍ പാമ്പിന്റെ ഫോസില്‍ കണ്ടുകിട്ടിയത് കൊളംബിയയിലെ സിരിജോണ്‍ കല്‍ക്കരി ഖനിയില്‍ നിന്നായിരുന്നു.ടോരോന്ടോ യൂനിവേര്സിട്ടിയിലെ പ്രോഫസ്സര്‍ ജേസന്‍ ഹെഡിന്റെ നേതൃത്വത്തിലുള്ള ഗവേഷക സംഘമാണ് ഖനിയില്‍ നിന്ന് ഇതിന്റെ ഫോസിലുകള്‍ കണ്ടെടുത്തത്.അനകൊണ്ടാകളെയും കൂടുതല്‍ കാണപ്പെടുന്നത് ഈ പ്രദേശത്തെ ചതുപ്പുകളില്‍ തന്നെയാണ്.പക്ഷെ അനാക്കൊണ്ടയെക്കള്‍ മൂന്നിരട്ടി തൂക്കവും ഇരട്ടിയോളം നീളവും ഉണ്ടായിരുന്നു ഇവയ്ക്ക്.

എങ്കിലും ടൈട്ടാണോബോവ എന്ന പാമ്പുകള്‍ ആയിരുന്നത്രെ ലഭ്യമായ തെളിവുകള്‍ വെച്ച് ജീവിച്ചിരുന്നതില്‍ ഏറ്റവും വലുത്.
നാല്പതു മുതല്‍ അമ്പതു വരെ അടി നീളവും ഒരു മീറ്ററിലധികം വണ്ണവും ഒന്നര ടണ്ണോളം തൂക്കവും ഉണ്ടായിരുന്ന ഈ ഭീമന്‍ പാമ്പിന്റെ ഫോസില്‍ കണ്ടുകിട്ടിയത് കൊളംബിയയിലെ സിരിജോണ്‍ കല്‍ക്കരി ഖനിയില്‍ നിന്നായിരുന്നു.ടോരോന്ടോ യൂനിവേര്സിട്ടിയിലെ പ്രോഫസ്സര്‍ ജേസന്‍ ഹെഡിന്റെ നേതൃത്വത്തിലുള്ള ഗവേഷക സംഘമാണ് ഖനിയില്‍ നിന്ന് ഇതിന്റെ ഫോസിലുകള്‍ കണ്ടെടുത്തത്.അനകൊണ്ടാകളെയും കൂടുതല്‍ കാണപ്പെടുന്നത് ഈ പ്രദേശത്തെ ചതുപ്പുകളില്‍ തന്നെയാണ്.പക്ഷെ അനാക്കൊണ്ടയെക്കള്‍ മൂന്നിരട്ടി തൂക്കവും ഇരട്ടിയോളം നീളവും ഉണ്ടായിരുന്നു ഇവയ്ക്ക്.

നീളത്തിന്റെ കാര്യത്തില്‍ രേട്ടിക്കുലെട്ടദ് പെരുമ്പാമ്പും ഭാരത്തിന്‍റെ കാര്യത്തില്‍ അനാക്കൊണ്ടയും ആണ് കേമന്മാരെങ്കിലും വലിപ്പ കുറവിന്റെ കാര്യത്തില്‍ കുരുടിപ്പാമ്പുകള്‍ക്കാന് ഒന്നാം സ്ഥാനം.നമുക്കും സുപരിചിതരായ ഇവയ്ക്ക് ഏതാനും സെന്റി മീറ്ററുകള്‍ മാത്രമാണ് നീളം.

ബാഹ്യ ഘടന - ശല്‍ക്കങ്ങള്‍

പാമ്പുകളുടെ ശരീരം ശല്‍ക്കങ്ങള്‍ കൊണ്ട് പൊതിഞ്ഞതാണ്.കെരാറ്റിന്‍ എന്നറിയപ്പെടുന്ന ഒരിനം പ്രോട്ടീന്‍ കൊണ്ടാണ് മിനുസമുള്ള ഈ ശല്‍ക്കങ്ങള്‍ രൂപം കൊണ്ടിട്ടുള്ളത്.ഘര്‍ഷണം കുറയ്ക്കാനും ശരീരത്തില്‍ മാലിന്യങ്ങള്‍ പിടിക്കാതിരിക്കാനും ഈ ശല്‍ക്കങ്ങള്‍ പാമ്പിനെ കുറച്ചൊന്നുമല്ല സഹായിക്കുന്നത്.നമ്മുടെ മുടിയും നഖവുമെല്ലാം ഇതേ പ്രോട്ടീന്‍ കൊണ്ട് തന്നെയാണ് രൂപം കൊണ്ടിട്ടുള്ളത്.

പാമ്പിന്റെ ശല്ക്കതിനെ 'സ്കെയില്‍'[scale] എന്നാണു ഇംഗ്ലീഷില്‍ വിളിക്കുന്നത്‌.പുറം ഭാഗത്തുള്ളവ Dorsal Scales എന്നും അടിഭാഗത്തുള്ളവ Ventral Scales അഥവാ Ventral Scutes എന്നും തലയിലുള്ള വലിയ ശല്‍ക്കങ്ങള്‍ Head Shields എന്നും അറിയപ്പെടുന്നു.ഓരോ ഇനം പാമ്പുകള്‍ക്കും ഒരു നിശ്ചിത എണ്ണം ശല്‍ക്കങ്ങള്‍ ആയിരിക്കും ജനിക്കുമ്പോള്‍ മുതല്‍ ഉണ്ടായിരിക്കുക.വളര്‍ച്ചക്കനുസരിച്ച്‌ ഈ ശല്‍ക്കങ്ങളും വലുതാവുമെന്നല്ലാതെ അവയുടെ എണ്ണത്തില്‍ വ്യത്യാസം വരാറില്ല.പാമ്പുകളുടെ ഇനം തിരിച്ചറിയാന്‍ സഹായിക്കുന്ന ഒരു ഘടകമാണ് അവയുടെ ശല്ക്കങ്ങളുടെ എണ്ണം.
പ്രധാനമായി രണ്ടു തരം ശല്‍ക്കങ്ങള്‍ പാമ്പുകളില്‍ കാണപ്പെടുന്നു.ചേര, മൂര്‍ഖന്‍ തുടങ്ങിയവില്‍ കാണപ്പെടുന്നത് പോലുള്ള മിനുസമുള്ള ശല്‍ക്കങ്ങളും അണലി വര്‍ഗത്തില്‍ പെട്ട പാമ്പുകളില്‍ കാണപ്പെടുന്നതു പോലുള്ള നടുഭാഗം നീളത്തില്‍ അല്‍പ്പമൊന്നു തടിച്ചുയര്‍ന്ന പരുക്കന്‍ ശല്‍ക്കങ്ങളും.ഇവ Keeled Scales എന്നാണ് അറിയപ്പെടുന്നത്.

ഉദര ശല്‍ക്കങ്ങളും പ്രധാനമായി രണ്ടു വിധത്തിലുണ്ട്.വയറിന്റെ ഒരു വശം തൊട്ടു മറു വശം വരെ വീതിയുള്ളതും അത്ര വീതി ഇല്ലാത്തതും.വീതി കുറഞ്ഞ ഉദര ശല്‍ക്കങ്ങള്‍ സാധാരണയായി വിഷമില്ലാത്ത പാമ്പുകളിലാണ് കാണാറുള്ളത്‌.

ഉദര ശല്‍ക്കങ്ങള്‍ അവസാനിച്ചു വാല്‍ ശല്‍ക്കങ്ങള്‍ ആരംഭിക്കുന്നതിനു തൊട്ടു മുന്‍പുള്ള ശല്ക്കമാണ് ഗുദശല്ക്കം.[Anal Shield] ഇത് ചിലപ്പോള്‍ ഒറ്റയായിരിക്കും.ചിലപ്പോള്‍ ഇരട്ടയും.അപൂര്‍വമായി മൂന്ന് ഭാഗങ്ങളുള്ളവയും കാണാറുണ്ട്‌.

ഗുദ ശല്ക്കതിന്റെ താഴെക്കുള്ളവ വാല്‍ ശല്‍ക്കങ്ങള്‍ എന്നറിയപ്പെടുന്നു.ഇത് ഒറ്റ വരിയായോ ഇരട്ട വരിയായോ കാണപ്പെടാറുണ്ട്.
തലയിലെ വലിപ്പം കൂടിയ ശല്ക്കങ്ങളെ ശീല്‍ടുകള്‍ എന്ന് വിളിക്കുന്നു.ഇതിന്റെ എണ്ണവും പൊതുവേ ഓരോ പാമ്പിലും വ്യത്യസ്ഥമായിരിക്കും. ഓരോ ശീല്ടിനും ഓരോ പ്രത്യേക പേരുകളും നല്‍കപ്പെട്ടിട്ടുണ്ട്.കീഴ്താടിയുടെ അടിഭാഗത്തെ ശീല്ടുകള്‍ക്കുമുണ്ട് ഇത് പോലെ പ്രത്യേക പേരുകള്‍.

കണ്ണ്
പാമ്പിന്റെ കണ്ണുകള്‍ക്ക്‌ പുറമേ സുതാര്യമായ ഒരു ആവരണമുണ്ട് ഇത് ബ്രില്‍ എന്നാണ് അറിയപ്പെടുന്നത്.കണ്ണില്‍ കരടും പൊടിയുമൊക്കെ വീഴാതിരിക്കാനുള്ള അനുകൂലനമാണിത്.മാളങ്ങളില്‍ ഇഴഞ്ഞു കയറുമ്പോഴും മറ്റും ഇതിനുള്ള സാധ്യത വളരെ കൂടുതലാണല്ലോ.
കണ്ണിലെ കൃഷ്ണ മണിക്ക് പക്ഷെ പല ഇനം പാമ്പുകളിലും പല ആകൃതിയാണ്.പകല്‍ ഇര തേടുന്നവക്കു വൃത്താകൃതിയും രാത്രി ഇര തേടുന്നവക്കു ലംബാകൃതിയും.

കണ്ണിനു പുറമേ ബ്രില്‍ എന്നാ ആവരണം ഉള്ളത് കൊണ്ടാവാം,പാമ്പുകള്‍ക്ക് കണ്‍ പോളകള്‍ ഇല്ല.
ചെവി
പാമ്പുകള്‍ക്ക് ബാഹ്യ കര്‍ണ്ണങ്ങള്‍ ഇല്ല.അത് കൊണ്ട് അവയ്ക്ക് വായുവിലൂടെ വരുന്ന ശബ്ദ തരംഗങ്ങള്‍ കേള്‍ക്കാന്‍ കഴിയില്ല.പ്രതലത്തിലൂടെ വരുന്ന ശബ്ദ സ്പന്ദനങ്ങള്‍ അവ ആന്തര കര്‍ണ്ണത്തിന്റെ ഭാഗത്തുള്ള കൊലുമെല്ല ഓരിസ്‌ എന്ന കാര്ട്ടിലെജ് ഉപയോഗിച്ച് പിടിച്ചെടുക്കുകയാണ് ചെയ്യുക.കീഴ്ത്താടി എല്ലുകളും ഈ കാര്യത്തില്‍ പാമ്പുകളെ സഹായിക്കുന്നുണ്ട്.

മൂക്ക്

മേല്താടിയുടെ മുന്‍ അറ്റത്ത്‌ ഇരു വശങ്ങളിലുമായി ഓരോ സുഷിരങ്ങള്‍ പോലെ കാണപ്പെടുന്നതാണ് പാമ്പിന്റെ മൂക്ക്.പക്ഷെ മൂക്ക് കൊണ്ടല്ല,നാക്ക് കൊണ്ടാണ് പാമ്പ് പ്രധാനമായും മണം പിടിക്കുക.

താപ സംവേദന സുഷിരങ്ങള്‍

അണലി വര്‍ഗത്തില്‍ പെട്ട പാമ്പുകള്‍ക്ക് ആണ് താപ സംവേദന സുഷിരങ്ങള്‍ പ്രധാനമായി കാണപ്പെടുന്നത്‌.പെരുംപാമ്പുകള്‍ക്കുമുണ്ട് ഇരയുടെ ചൂട് അറിയാനുള്ള ഈ സംവിധാനം.കണ്ണിനും മൂക്കിനും ഇടയില്‍ കാണപ്പെടുന്ന ഈ സുഷിരങ്ങള്‍ ഉപയോഗിച്ച് പാമ്പ് കൂരിരുട്ടില്‍ പോലും ഇരയുടെ ഒരു താപ ഫോട്ടോ തലച്ചോറില്‍ തയ്യാറാക്കും.കൃത്യമായി അതിനെ പിടി കൂടുകയും ചെയ്യും.0.003 degree Celsius ചൂട് പോലും അവയ്ക്ക് ഈ സുഷിരങ്ങള്‍ ഉപയോഗിച്ച് പിടിച്ചെടുക്കാന്‍ കഴിയും.

അവശിഷ്ട പാദങ്ങള്‍
ഇത്രയുമല്ലാതെ പാമ്പുകളുടെ ശരീരത്തിന് പുറമേ കാണപ്പെടുന്ന അവയവം അവശിഷ്ട പാദം മാത്രമാണ്.പെരുമ്പാമ്പ്‌ പോലുള്ള പാമ്പുകളുടെ ഗുദ ശല്ക്കത്തിനു ഇരു വശത്തും ആയാണ് അവശിഷ്ട പാദങ്ങള്‍ കാണപ്പെടുന്നത്‌. കാലുള്ള ജീവികള്‍ പരിണമിച്ചാണ് പാമ്പുകള്‍ ഉണ്ടായതെന്നുള്ളതിന്റെ തെളിവായി ശാസ്ത്രജ്ഞന്മാര്‍ ഇത് കണക്കു കൂട്ടുന്നു.പിന്‍ കാലുകളുടെ അവശിഷ്ടമാണ് Anal Spur എന്ന് കൂടി അറിയപ്പെടുന്ന ഈ ഭാഗം.

പാമ്പ്-ആന്തര ഘടന

പാമ്പുകള്‍ക്ക് ഒരു കുഴല്‍ പോലെ നീണ്ട ശരീരമായതു കൊണ്ട് അതിന്റെ ആന്തരാവയവങ്ങളും ഒരു കുഴല്‍ ശരീരത്തിനു അനുയോജ്യമായ ആകൃതിയിലാണ് ഉള്ളത്.
ഒന്നിനോടൊന്നു ചേര്‍ത്ത് വെച്ചത് പോലുള്ള നാനൂറിലേറെ കശേരുക്കളും അവയുടെ ഇരുവശങ്ങളിലെക്കുമുള്ള വാരിയെല്ലുകളും ആണ് ഒറ്റനോട്ടത്തില്‍ പാമ്പിന്റെ അസ്ഥികൂടത്തില്‍ കാണാന്‍ കഴിയുക.

പാമ്പിന്റെ താടിയെല്ലുകളുടെ പിന്‍ഭാഗം ഇലാസ്തികതയുള്ള ലിഗമെന്റുകള്‍ കൊണ്ട് മാത്രം ബന്ധിപ്പിച്ചിരിക്കുന്നത് കൊണ്ട് പാമ്പിനു വായ വളരെ വലിപ്പത്തില്‍ തുറക്കാനും വായയെക്കാള്‍ വലിപ്പമുള്ള ഇരകളെ പോലും നിഷ്പ്രയാസം വിഴുങ്ങാനും കഴിയും.

ഇടതു ശ്വാസകോശം വളരെ ചുരുങ്ങി ചെറുതായി പോയിരിക്കുന്നു എന്നാ കാര്യം ശ്രദ്ധിക്കുക.വലതു ശ്വാസകോശത്തിന് ശരീരത്തിന്റെ മൂന്നിലൊന്നു നീളമുണ്ട് താനും.

ഇര വിഴുങ്ങുമ്പോള്‍ പലപ്പോഴും പാമ്പുകള്‍ക്ക് ശ്വാസ തടസ്സം നേരിടാറുണ്ട്.ഇത് മറികടക്കാനുള്ള ഒരു സംവിധാനമാണ് Glottis breathing.വായയുടെ ഉള്ളില്‍ നാവിനടിയിലായിക്കാണുന്ന ശാസ നാളിയുടെ മുന്നറ്റം ആണ് ഗ്ലോട്ടിസ് എന്നറിയപ്പെടുന്നത്.വായക്കുള്ളില്‍ ഇരയുള്ളപ്പോള്‍ പാമ്പിന്റെ ശ്വാസോച്ച്വാസം ഇതിലൂടെ ആകും.

ഇങ്ങനെ വായക്കുള്ളില്‍ എത്തുന്ന ഇരയെ ദഹിപ്പിക്കാന്‍ അവിടെ വെച്ചു തന്നെ ഉമിനീരിന്റെ പ്രവര്‍ത്തനം തുടങ്ങും.വീര്യം കൂടിയ ഉമിനീരുള്ളവയെ നമ്മള്‍ വിഷപ്പാമ്പുകള്‍ എന്നും വീര്യം കുറഞ്ഞ ഉമിനീരുള്ളവയെ വിഷമില്ലാത്തവ എന്നും വിളിക്കുന്നു.അതായത് വിഷമില്ലാത്ത പാമ്പുകള്‍ ഇല്ല.വിഷ വീര്യത്തിന്റെ കാര്യത്തിലേ അവ തമ്മില്‍ വ്യത്യാസം ഉള്ളു.

ഈ വിഷം അഥവാ വീര്യമുള്ള ഉമിനീര്‍ പല്ലുകളിലേക്ക് എത്തുന്ന രീതിക്കനുസരിച്ച് പാമ്പുകളെ വിഷപ്പല്ല് ഇല്ലാത്തവ,[Aglypha],പിന്നില്‍ വിഷപ്പല്ല് ഉള്ളവ [Opisthoglypha],മുന്നില്‍ വിഷപ്പല്ല് ഉള്ളവ [Proteroglypha],വളരെ വികാസമുള്ള മടക്കി വെക്കാവുന്ന വിഷപ്പല്ലുള്ളവ [Solenoglypha]എന്നിങ്ങനെ തരം തിരിച്ചിട്ടുണ്ട്.പഴയ കാലത്ത് ആയുര്‍വേദവും ഇങ്ങനെ നാല് തരം വിഷ പല്ലുകളെ കുറിച്ച് പറഞ്ഞിരുന്നു.കടിയേല്‍ക്കുന്ന ആളില്‍ ഉണ്ടാകുന്ന പ്രതികരണങ്ങളെ അടിസ്ഥാനമാക്കി മകരി മരാളി, കാളരാത്രി, യമദൂതി എന്നിങ്ങനെയായിരുന്നു ആ തരം തിരിവ്.

പാമ്പിന്റെ വായയോടു ബന്ധപ്പെട്ടു കാണുന്ന മറ്റൊരു അവയവമാണ് ജേക്കബ്സന്‍സ് അവയവം [Jacobsons organ]. ഇടയ്ക്കിടെ പുറത്തേക്ക് നീട്ടുന്ന നാവില്‍ പറ്റിപ്പിടിക്കുന്ന ഗന്ധ തന്മാത്രകളെ പാമ്പ് തിരിച്ചറിയുന്നത്‌ ഈ അവയവത്തിന്റെ സഹായത്തോടെയാണ്.

ഇനിയുള്ളത് പാമ്പ് ആണോ പെണ്ണോ എന്നറിയുന്ന കാര്യമാണ്.ഗുദശല്ക്കത്ത്തിന്റെ അടിയില്‍ ഗുദ ദ്വാരത്തില്‍ വാലിന്റെ ദിശയില്‍ ചെറിയ ഒരു അന്വേഷണ ദണ്ട് കടത്തി നോക്കിയാണ് സാധാരണയായി പാമ്പുകളുടെ ഇനം തിരിച്ചറിയുന്നത്‌.ആണ്‍ പാമ്പാണ് എങ്കില്‍ ദണ്ട് ഏകദേശം എട്ടാമത്തെ വാല്‍ ശല്ക്കം വരെയോ അതില്‍ കൂടുതലോ ഇറങ്ങി ചെല്ലും.പെണ്‍പാമ്പിന്റെ ഒന്നാമത്തെയോ രണ്ടാമത്തെയോ വാല്‍ ശല്ക്കം വരെ മാത്രമേ ദണ്ട് ഇറങ്ങി ചെല്ലുകയുള്ളു.

ഗുദ ശല്ക്കത്തിന്റെ ഇരു വശത്തും കൈ വിരല്‍ ഉപയോഗിച്ചു അമര്‍ത്തിയാല്‍ ആണ്‍ പാമ്പാണ് എങ്കില്‍ അതിന്റെ ഇരട്ട ലിംഗം പുറമേക്ക് തള്ളി വരും.ഇങ്ങനെയും ആണ്‍ പാമ്പുകളെ തിരിച്ചറിയാം.ഈ ഇരട്ട ലിംഗം അകം പുറം മറിഞ്ഞു ഉള്ളിലേക്ക് കയറി ഇരിക്കുന്നത് കൊണ്ടാണ് അന്വേഷണ ദണ്ട് ആണ്‍ പാമ്പില്‍ അത്ര അധികം താഴേക്കു ഇറങ്ങിപ്പോകുന്നത്.

പാമ്പുകളുടെ ചലന രീതി

ബയോ മെക്കാനിക്സില്‍ വിദഗ്ധനായ പ്രൊഫെസര്‍ കാള്‍ ഗാന്‍സ് പറയുന്നത് പാമ്പുകള്‍ക്ക് നാല് തരം ചലന രീതികള്‍ ഉണ്ടെന്നാണ്.
1. സര്‍പ്പിള ചലനം[Serpentine or Undulating Motion]
പാമ്പുകളില്‍ സാധാരണ കണ്ടു വരുന്ന ചലന രീതിയാണിത്. 'S' ആകൃതിയില്‍ പാമ്പ് ശരീരം വശങ്ങളിലേക്ക് വളക്കുകയും പ്രതലത്തില്‍ പിന്നിലേക്ക്‌ ബലം പ്രയോഗിച്ചു കൊണ്ട് മുന്നിലേക്ക്‌ നീങ്ങുകയും ചെയ്യും.
ഉദാ; ചേര
2. കണ്സെര്ട്ടിന ചലന രീതി [Concertina Motion]
മരം കയറി പാമ്പുകളിലാണ് ഇത്തരം ചലന രീതി കാണുന്നത്.ഇതില്‍ പാമ്പ് ശരീരത്തിന്റെ മുന്‍ ഭാഗം മുന്‍പില്‍ ഒരു സ്ഥലത്ത് ഉറപ്പിക്കുകയും ബാക്കി ഭാഗം അങ്ങോട്ട്‌ വളച്ചു വലിച്ചു വെക്കുകയും ചെയ്യും
ഉദാ; വില്ലൂന്നി
3. നേര്‍ രേഖാ ചലനം.[Rectilinear Motion]
തടിച്ച ശരീരമുള്ള പാമ്പുകളിലാണ് ഇത്തരം ചലന രീതി പൊതുവേ കാണപ്പെടുന്നത്.ശരീരം വശങ്ങളിലേക്ക് വളക്കാതെ ഏകദേശം ഒരു നേര്‍ രേഖയില്‍ ചില പുഴുക്കളും മറ്റും മുന്നോട്ടു അരിച്ചു നടക്കുന്നത് പോലെയുള്ള ചലന രീതിയാണിത്.ഇതില്‍ വാരിയെല്ലുകള്‍ കാലു പോലെ ഉപയോഗിച്ചു പാമ്പ് മുന്നോട്ടു നടന്നു നീങ്ങുന്നത്‌ പോലെ തോന്നും.
ഉദാ;പെരുമ്പാമ്പ്‌.
4. വശങ്ങളിലെക്കുള്ള ചലനം.[Side Winding]
മരുഭൂമിയിലെ പാമ്പുകളില്‍ കാണപ്പെടുന്ന ചലന രീതിയാണിത്.ഇതില്‍ പാമ്പുകളുടെ ചലനം പൂര്‍ണ്ണമായും വശങ്ങളിലേക്ക് ആണ്.
ഉദാ; മരുഭൂമിയിലെ പാമ്പുകള്‍

ഭക്ഷണം

പാമ്പുകളില്‍ സസ്യാഹാരികള്‍ ഇല്ല.എല്ലാ പാമ്പുകളും ജീവനുള്ള മാംസാഹാരമാണ് കഴിക്കുന്നത്‌.എന്നാലും ഗതികെട്ടാല്‍ അവ ചത്തതോ ചീഞ്ഞത് പോലുമോ തിന്നേക്കാം.കടിച്ചു ചവച്ചു തിന്നാനോ വലിച്ചു കുടിക്കാനോ പറ്റുന്ന രീതിയിലല്ല അവയുടെ വായയുടെ ഘടന.അത് കൊണ്ട് തന്നെ അവ മുട്ട കൊത്തിക്കുടിക്കുമെന്നുള്ളത് തെറ്റായ ധാരണയാണ്.സത്യത്തില്‍ അവ മുട്ട വിഴുങ്ങുകയാണ് ചെയ്യുക.ഇങ്ങനെ വിഴുങ്ങുന്ന മുട്ടയുടെ തോട് അവ പുറത്തേക്ക് തുപ്പിക്കളയുകയും ചെയ്യും.
ഇരയുടെ തല മുതലാണ്‌ പാമ്പ് വിഴുങ്ങുക.നഖം തുടങ്ങിയ കൂര്‍ത്ത ഭാഗങ്ങള്‍ തട്ടി അന്ന നാളം മുറിയാതിരിക്കാനും ഇര തിരിഞ്ഞു കടിക്കാതിരിക്കാനുമൊക്കെ വേണ്ടിയാണ് അവ ഇങ്ങനെ ചെയ്യുന്നത്. ഒരിക്കല്‍ വയറു നിറഞ്ഞാല്‍ പിന്നെ കഴിച്ച ഭക്ഷണം ദഹിച്ചുകഴിഞ്ഞു മാത്രമേ അവ ഭക്ഷണം കഴിക്കൂ.ഇതിനു ചിലപ്പോള്‍ ആഴ്ചകളോ മാസങ്ങളോ എടുത്തേക്കാം.
വിഷപ്പാമ്പുകള്‍ ഇരയെ വിഷം കുത്തിവെച്ചു കൊന്നു വിഴുങ്ങുന്നു.വിഷമില്ലാത്ത പാമ്പുകള്‍ പലപ്പോഴും ഇരയെ ചുറ്റി വരിഞ്ഞു ശ്വാസം മുട്ടിച്ചു കൊന്നു തിന്നുന്നു.എങ്കിലും ചിലപ്പോള്‍ പാമ്പുകള്‍ ഇരയെ ജീവനോടെയും അകത്ത്താക്കാറുണ്ട്.സാധാരണ ഇരകള്‍ പല്ലി,ഓന്ത്,തവള,പക്ഷി തുടങ്ങിയവ ആണെങ്കിലും രാജ വെമ്പാല,വെള്ളിക്കെട്ടന്‍,പവിഴപ്പാമ്പ് തുടങ്ങിയവ പാമ്പുകളെതന്നെ ആഹാരമാക്കാറുണ്ട്.

ഇണ ചേരല്‍

ഒരു പക്ഷെ ഏറ്റവും കൂടുതല്‍ തെറ്റിദ്ധാരണ ഉണ്ടാക്കപ്പെട്ടിട്ടുള്ള ഒരു കാര്യമാണ് പാമ്പുകളുടെ ഇണ ചേരല്‍.ഒരു വര്‍ഗത്തില്‍ പെട്ട പാമ്പുകള്‍ തമ്മിലെ ഇണ ചേരൂ.പഴയ കാലത്ത് ആയുര്‍വേദവും പറഞ്ഞിരുന്നു.മൂര്‍ഖ വര്‍ഗത്തില്‍ പെട്ടവയും രാജില വര്‍ഗത്തില്‍ പെട്ടവയും ഇണ ചേര്‍ന്ന് വേന്തിരന്‍ എന്ന പുതിയൊരു വര്‍ഗം ഉണ്ടാകുമെന്ന്.പക്ഷെ യഥാര്‍ഥത്തില്‍ അങ്ങനെ ഒരിക്കലും സംഭവിക്കാറില്ല.മൂര്‍ഖന്‍ ആണും ചേര അതിന്റെ പെണ്ണും ആണെന്നൊക്കെ പല സ്ഥലത്തും ഉള്ള വിശ്വാസം അടിസ്ഥാന രഹിതവും അബദ്ധവും ആണ്.മൂര്‍ഖന്‍ മൂര്ഖനോടെ ഇണ ചേരൂ.ചേര ചെരയോടും.
നാം പലപ്പോഴും പാമ്പുകളുടെ ഇണ ചേരല്‍ എന്ന് പറയാറുള്ളത് അവ തമ്മിലുള്ള പ്രവിശ്യാ യുധ്ധത്തെ ആണ്.ഇണ ചേരല്‍ സമയത്ത് അവ തമ്മില്‍ പിണഞ്ഞു തല ഉയര്‍ത്തി ബല പരീക്ഷണം നടത്താറില്ല.വളരെ ശാന്തരായി ഒരിടത്ത് കിടന്നാണ് അവര്‍ ആ കര്‍മ്മം നിര്‍വഹിക്കുക.പലപ്പോഴും ചുറ്റി പിണയാതെ ചേര്‍ന്ന് കിടന്നു വാല്‍ ഭാഗം മാത്രം അവര്‍ ഒന്നോ രണ്ടോ വട്ടം തമ്മില്‍ ചുറ്റി ചേര്‍ത്ത് വെച്ചു ഗുദ ദ്വാരങ്ങള്‍ ചേര്‍ത്ത് വെക്കും.ആണ്‍ പാമ്പ് പെണ്‍ പാമ്പിന്റെ ശരീരത്തിനു മുകളില്‍ തലയോ ശരീരമോ ഉരസി അവളെ ലൈംഗികമായി ഉണര്ത്തിയെടുക്കാന്‍ ശ്രമിച്ചു കൊണ്ടിരുന്നെക്കാം എന്ന് മാത്രം.

ഇണ ചേരല്‍ കാലത്ത് പെണ്‍ പാമ്പുകളുടെ ഗന്ധ ഗ്രന്ഥി [Musk Gland] ഉല്‍പ്പാദിപ്പിക്കുന്ന ഫിറോമോനിന്റെ മണം വളരെ ദൂരെ പോലും എത്തുകയും ആണ്‍ പാമ്പുകളുടെ വോമെറോ നേസല്‍ അവയവത്തിലെ സ്തരം ഈ മണം തട്ടുമ്പോള്‍ ഉത്തെജിതമാകുകയും അങ്ങനെ ആണ്പാമ്പുകള്‍ പെണ്പാമ്പുകള്‍ ഉള്ള സ്ഥലം തിരിച്ചറിഞ്ഞു അങ്ങോട്ട്‌ എത്തുകയും ചെയ്യും.

പ്രവിശ്യായുദ്ധം

ഒരു പാമ്പിനു താമസിക്കാന്‍ ഒരു പ്രത്യേക പ്രവിശ്യ ഉണ്ടായിരിക്കും.അവിടുത്തെ ഏകാധിപതി ആയിരിക്കും അവന്‍.അവന്റെ സാമ്രാജ്യത്തിലേക്ക് മറ്റൊരു ആണ്‍ പാമ്പ് കടന്നു വന്നാല്‍ അവര്‍ തമ്മില്‍ വഴക്കുണ്ടാകും.ഒരു പക്ഷെ നമ്മളെ സംബന്ധിച്ചിടത്തോളം മാതൃകാപരം എന്നൊക്കെ വേണമെങ്കില്‍ പറയാവുന്ന തരം വഴക്ക്.രണ്ടാളും ചുറ്റിപ്പിണഞ്ഞു തല നിലത്തു നിന്ന് ആവുന്നത്ര ഉയര്‍ത്തി പിടിക്കും.എന്നിട്ട് എതിരാളിയുടെ തല നിലത്തു മുട്ടിക്കാന്‍ പരസ്പരം തള്ളും.ആരുടെ തല ആദ്യം നിലത്തു മുട്ടുന്നോ അയാള്‍ പരാജയം സമ്മതിക്കും.എന്നിട്ട് പുതിയൊരു താമസ സ്ഥലം തേടി പോകും.പല ജീവികളിലും കാണുന്ന ഈ പ്രവിശ്യാ യുധ്ധത്തെയാണ് നാം പലപ്പോഴും പാമ്പിന്റെ ഇണ ചേരല്‍ എന്ന് തെറ്റിദ്ധരിക്കുന്നത്.അത് കണ്ടാല്‍ കാണുന്നവന്റെ കണ്ണ് പൊട്ടുമെന്നും മൈലുകളോളം പിന്തുടര്‍ന്നെത്തി പാമ്പുകള്‍ അത് കണ്ട ആളിനെ കടിച്ചു കൊല്ലുമെന്നും ഒരു മൂഡവിശ്വാസവും നിലനിന്നിരുന്നു പണ്ട്.

പ്രത്യുല്പ്പാദനം

മുട്ടയിടല്‍[Ovipary], പ്രസവം [Ovo vivipary] എന്നിവയാണ് പാമ്പുകളില്‍ കണ്ടു വരുന്ന പ്രധാനപ്പെട്ട പ്രത്യുല്പാദന രീതികള്‍.പ്രസവം ശരിയായ അര്‍ഥത്തില്‍ സസ്തനികളിലും മറ്റും കാണുന്ന രീതിയിലുള്ള പ്രസവമല്ല.[Vivipary]. വയറിനുള്ളില്‍ ഇരുന്നു മുട്ട വിരിഞ്ഞു കുഞ്ഞുങ്ങള്‍ പുറത്തു വരികയാണ് ചെയ്യുക.[Ovo vivipary].ഇന്ത്യയിലെ പാമ്പുകളില്‍ ഏകദേശം 25%  -അതായത് ഏതാണ്ട് 60 ഇനം പാമ്പുകള്‍ ഇത്തരത്തില്‍ പ്രസവിക്കുന്നവയാണ്.കവചവാലന്മാര്‍, മന്നൂലിപ്പാമ്പ്, പച്ചില പാമ്പ്, ചതുപ്പ് പാമ്പുകള്‍, കടല്‍ പാമ്പുകള്‍, അണലികള്‍, സുഷിര മണ്ടലികള്‍ എന്നിവ ഈ വിഭാഗത്തില്‍ പെടുന്നു.

ഇണ ചേര്‍ന്ന് 30 മുതല്‍ 50 വരെ ദിവസത്തിനുള്ളില്‍ സാധാരണയായി പെണ്‍ പാമ്പുകള്‍ മുട്ടയിടും. നാല് മുതല്‍ നാല്പതു മുട്ടകള്‍ വരെ ഒറ്റതവണ അവ ഇട്ടേക്കാം.ചിലപ്പോള്‍ പെരും പാമ്പിനെപ്പോലുള്ള വലിയ പാമ്പുകള്‍ നൂറോളം മുട്ടകള്‍ ഇടാറുണ്ട്.60 - 70 ദിവസം കൊണ്ട് മുട്ട വിരിയും.

വിസര്‍ജ്ജനം.
പാമ്പുകള്‍ക്ക് മൂത്ര സഞ്ചിയില്ല.ദ്രാവക രൂപത്തില്‍ അവ മൂത്രം ഒഴിക്കാറുമില്ല.ജല നഷ്ടം ഉണ്ടാവാതിരിക്കാനുള്ള ഒരു അനുകൂലനം ആണ് ഇത്.പരല്‍ രൂപത്തിലാണ് അവ യൂറിക് ആസിഡ് വിസര്‍ജ്ജിക്കുക.ഈ വിസര്‍ജ്ജ്യത്ത്തിനു ഒരു തരം രൂക്ഷ ഗന്ധമുണ്ടാകും.കപ്പ പുഴുങ്ങുമ്പോള്‍ ഉണ്ടാകുന്നത് പോലെയോ ശീമക്കൊന്നയുടെ വാടിയ ഇലകള്‍ക്ക് ഉള്ളത് പോലെയോ പാട വള്ളി പൂത്തത് പോലെയോ ഉള്ള ഒരു മണം.ഈ മണമാണ് ഇന്നും ചില നാട്ടിന്‍ പുറങ്ങളില്‍ പാമ്പ് വാ പൊളിച്ചത് പോലെ എന്നൊക്കെ പറയപ്പെടുന്ന മണം.പാമ്പിന്റെ വായക്കു പ്രത്യേകിച്ചു മണം ഒന്നുമില്ല.പാമ്പുകളെ വളര്‍ത്തുകയും അടുത്ത് പരിചയപ്പെടുകയം ഒക്കെ ചെയ്തിട്ടുള്ളവര്‍ക്ക്അവയുടെ കാഷ്ടത്തിന്റെ ഈ മണം പെട്ടെന്ന് തിരിച്ചറിയാം.ഒറ്റ നോട്ടത്തില്‍ ഏകദേശം കോഴിക്കാഷ്ട്ടം പോലെ തന്നെയാണ് പാമ്പിന്‍ കാഷ്ട്ടവും കാണപ്പെടുക.
പാമ്പുകള്‍ ശീത രക്ത ജീവികളാണ്.അന്തരീക്ഷ താപനിലക്കനുസരിച്ച്ചു ശരീരതാപനില നിയന്ത്രിക്കാന്‍ അവയ്ക്ക് കഴിയില്ല.അതുകൊണ്ട് തന്നെ ദഹനം ശരിയായി നടക്കണമെങ്കില്‍ ഒരു നിശ്ചിത ഊഷ്മാവ് അത്യാവശ്യമാണ്.അഞ്ചു ഡിഗ്രി സെന്റിഗ്രേഡില്‍ താഴ്ന്നാല്‍ ദഹനം അല്പം പോലും നടക്കില്ല. 35 ഡിഗ്രിയില്‍ കൂടിയാലും ദഹന നിരക്ക് താഴും.ഏകദേശം 24-25 ഡിഗ്രി സെന്റിഗ്രേഡ് ആണ് പാമ്പുകളുടെ ദഹനം സുഗമമായി നടക്കുന്ന ഊഷ്മാവ്.ഇങ്ങനെ നന്നായി ദഹനം നടന്നാല്‍ ഇരയുടെ മിക്കവാറും എല്ലാ ഭാഗവും ദഹിച്ച്ചു പോകും.എങ്കിലും പലപ്പോഴും ഇരയുടെ നഖം,അസ്ധിക്കഷ്ണങ്ങള്‍,രോമം തുടങ്ങിയവ പാമ്പിന്‍ കാഷ്ട്ടത്ത്തില്‍ കാണാറുണ്ട്.

പടം പൊഴിക്കല്‍

പാമ്പുകളുടെ വളര്‍ച്ചക്ക് അനുസരിച്ച് അവയുടെ പുറം കുപ്പായം വളരില്ല.അതുകൊണ്ട് ഇടയ്ക്കിടെ ഈ പുറം കുപ്പായം അതിനു ഊരി മാറ്റേണ്ടി വരുന്നു.ഇതിനെ പടം പൊഴിക്കല്‍,ഉറ ഊരല്‍[Ecdysis,Moulting,Squammation]എന്നൊക്കെ പറയാറുണ്ട്‌.വളര്‍ച്ച പെട്ടെന്നുണ്ടായാല്‍ പടം പൊഴിക്കലും പെട്ടെന്ന് ഉണ്ടാകും.വളര്‍ച്ച മെല്ലെ ആയാല്‍ പടം പൊഴിക്കലും വൈകും.ഭക്ഷണത്തിന്റെ ലഭ്യതയാണ് പടം പൊഴിക്കലിന്റെ നിരക്കിനെ നിര്‍ണ്ണയിക്കുന്ന ഒരു പ്രധാന ഘടകം എന്ന് സാരം.ജനിച്ചു വീഴുന്ന പാമ്പിന്‍ കുഞ്ഞുങ്ങള്‍ പതിനഞ്ചു ദിവസത്തില്‍ ഒരിക്കല്‍ പടം പൊഴിചേക്കാം എങ്കിലും വലുതായിക്കഴിഞ്ഞാല്‍ രണ്ടോ മൂന്നോ മാസത്തില്‍ ഒരിക്കലെ ഇത് സംഭവിക്കുകയുള്ളൂ.
തല മുതലാണ്‌ പടം പൊഴിഞ്ഞു തുടങ്ങുക.പൂര്‍ണ്ണമായി ഊരിക്കഴിയുമ്പോള്‍ പടം അകം പുറം മറിഞ്ഞ അവസ്ഥയില്‍ ആയിരിക്കും ഉണ്ടാകുക.ഒപ്പം അത് തല തിരിയുകയും ചെയ്യും.അതായത് ഉറ ഊരിയ പാമ്പ് ഏതു ദിശയിലെക്കാണോ പോയത് അതിന്റെ എതിര്‍ ദിശയിലെക്കായിരിക്കും ഊരിയിട്ടിരിക്കുന്ന ഉറയുടെ തല.
പടം പൊഴിയാറായ പാമ്പ് ഉഷാറൊക്കെ നഷ്ടപ്പെട്ടു ഏതെങ്കിലും മാളത്തില്‍ വിശ്രമത്തില്‍ ഏര്‍പ്പെടും.ഭക്ഷണം പോലും കഴിക്കാതെ.ആ സമയത്ത് അതിന്റെ കണ്ണ് പാല്‍ നിറമാകുകയും ചെയ്യും.

പാമ്പും പാട്ടും.
പശുക്കളും ശിശുക്കളും പാമ്പും പാട്ട് ആസ്വദിക്കുന്നു എന്നൊരു വിശ്വാസം പഴയ കാലം മുതല്‍ നില നിന്ന് പോരുന്നുണ്ട്. പാമ്പാട്ടികളുടെ മകുടിയുടെ ശബ്ദത്തിനനുസരിച്ചു പാമ്പ് തലയാട്ടുന്നത്‌ കാണുമ്പോള്‍ ഈ വിശ്വാസം കുറേക്കൂടി ബലപ്പെടുകയും ചെയ്യുന്നു.പക്ഷെ,പശുവും ശിശുവും പാട്ട് ആസ്വദിക്കുന്നതിനു ശാസ്ത്രീയ തെളിവുകളുണ്ടെങ്കിലും പാമ്പ് അങ്ങനെ ചെയ്യുന്നതിന് ഇതുവരെ തെളിവുകള്‍ ലഭിച്ചിട്ടില്ല.200 മുതല്‍ 500 വരെ ഹെര്‍ട്സ് ആവൃത്തിയുള്ള വളരെ ചെറിയ ശബ്ദങ്ങള്‍ പാമ്പുകള്‍ക്ക് 'തിരിച്ചറിയാന്‍ ' കഴിയുമെങ്കിലും സംഗീതം ആസ്വദിക്കാന്‍ കഴിയുന്നതിനു തെളിവൊന്നും ഇത് വരെ ഇല്ല.ചെറിയ ആവൃത്തിയിലുള്ള ശബ്ദങ്ങള്‍ തലയോടിന്റെ വശങ്ങള്‍,താടിയെല്ലിന്റെ പേശികള്‍, കൊലുമെല്ല ഓരിസ്‌തുടങ്ങിയ ഭാഗങ്ങള്‍ ഉപയോഗിച്ച് പിടിച്ചെടുത്തു മനസ്സിലാക്കുകയാണ് ചെയ്യുക.കേള്‍ക്കുകയല്ല.പാമ്പാട്ടിയുടെ മകുടിയുടെ ചലനങ്ങള്‍ കണ്ടിട്ടാണ് പാമ്പ് തലയാട്ടുന്നത്‌.പാട്ട് കേട്ടിട്ടല്ല.

പാമ്പ്- ഒരു ഭക്ഷണം.

പല രാജ്യങ്ങളിലും പാമ്പിനെ ഭക്ഷണമായി ഉപയോഗിക്കാറുണ്ട് തായിലണ്ട്,ചൈന,ഇന്ടോനെഷിയ തുടങ്ങിയ സ്ഥലങ്ങളില്‍ മാത്രമല്ല നമ്മുടെ നാട്ടിലും ചില ആദി വാസി വിഭാഗങ്ങള്‍ പാമ്പിനെ ഭക്ഷണമായി ഉപയോഗിക്കുന്നുണ്ട്.വിഷപ്പാമ്പുകള്‍ എന്നോ വിഷമില്ലാത്തവ എന്നോ വ്യത്യാസമില്ലാതെ അവര്‍ പാമ്പിനെ തിന്നും.ചേരയെ കരവാള എന്ന് അവര്‍ വിളിക്കുന്നു.അതിനെ കണ്ടാല്‍ പിടിച്ചു കണ്ണന്‍ ചിരട്ടയിലൂടെ വാല്‍ കടത്തി ഊര്ത്തി വലിച്ചു ശല്‍ക്കങ്ങള്‍ കളഞ്ഞു കഴുകി കഷ്ണങ്ങളാക്കി വേവിച്ചു കഴിക്കുന്നു.ഒരിക്കല്‍ തിരുനെല്ലി ഭാഗത്ത് വെച്ചു അവര്‍ തന്ന പൊരിച്ച പാമ്പിനെ തിന്നാന്‍ എനിക്കും കഴിഞ്ഞിട്ടുണ്ട്.പൊരിച്ച മീനിന്റെ രുചിയായിരുന്നു അന്ന് തിന്ന പൊരിച്ച നീര്‍ക്കോലിക്ക്.

പ്രാചീനമായ പല സംസ്കാരങ്ങളിലും നാഗാരാധന നില നിന്നിരുന്നു.ഗ്രീസ്,റോം തുടങ്ങിയ വിദേശ രാജ്യങ്ങളില്‍ മാത്രമല്ല നമ്മുടെ ഇന്ത്യയിലും നാഗാരാധന വളരെ സജീവമായിരുന്നു.അവയുടെ സംരക്ഷണത്തിനു വേണ്ടി പവിത്രമായി നില നിര്‍ത്തപ്പെട്ട നാഗക്കാവുകള്‍ ഇന്നും നമ്മുടെ നാട്ടില്‍ പല സ്ഥലത്തും നില നില്‍ക്കുന്നുണ്ടല്ലോ.മണ്ണാര്‍ശാല,വെട്ടിക്കോട്,ആമേട,പാമ്പുംമെക്കാവ് എന്നിവയാണ് കേരളത്തിലെ പ്രസിദ്ധമായ നാഗക്കാവുകള്‍.

സ്വപ്നത്തിലെ പാമ്പ്

നാം പലപ്പോഴും പാമ്പുകളെ സ്വപ്നം കാണാറുണ്ട്.ഇത് ഉപ ബോധ മനസ്സിലെ ലൈംഗികതയുടെ പ്രകടീകരണം ആണെന്ന് പല മന ശാസ്ത്രജ്ഞരും അഭിപ്രായപ്പെടുന്നു.പക്ഷെ ഇത് പരിണാമത്തിന്റെ ആദ്യ നാളുകളില്‍ എപ്പോഴോ നമ്മള്‍ മരത്തിനു മുകളിലായിരുന്നു താമസം എന്നതിന്റെ അടയാളമാണെന്നു കാള്‍സാഗന്‍ അഭിപ്രായപ്പെടുന്നു.ഇതിനു കാരണമായി അദ്ദേഹം പറയുന്നത് നമ്മള്‍ കാണുന്നതില്‍ കൂടുതല്‍ സ്വപ്നങ്ങളും ഉയരത്തില്‍ നിന്നുള്ള വീഴ്ചയോ പാമ്പുകലോ ആണെന്നുള്ളതാണ്.മരത്തിനു മുകളില്‍ താമസിക്കുന്നവന്റെ നിരന്തരമായ പ്രധാന പേടി താഴോട്ടുള്ള ഒരു വീഴ്ച്ച ആയിരിക്കുമല്ലോ.അത് പോലെ ഉള്ള മറ്റൊരു പേടിയാണ് വല്ലപ്പോഴും താഴെ ഇറങ്ങി വരുമ്പോള്‍ ഉണങ്ങിയ ഇലകള്‍ക്കിടയില്‍ മറഞ്ഞു കിടക്കുന്ന പാമ്പിന്റെ രൂപത്തിലുള്ള മരണം.ഈ രണ്ടു പേടികളും തലമുറകളായി ജീനില്‍ കലര്‍ന്ന് നമ്മളുടെ ഒപ്പം പോന്നത് കൊണ്ടാണ് അത്രേ നമ്മള്‍ ഇന്നും ഈ രണ്ടു സ്വപ്നങ്ങളും കൂടുതലായി കാണുന്നത്.

ചികിത്സയും പാമ്പ് അടയാളവും

ആധുനിക ചികിത്സാ സംവിധാനത്തിലും ചികിത്സാ രംഗത്തെ സൂചിപ്പിക്കാനായി ഉപയോഗിക്കുന്ന ഒരു അടയാളമാണ് പാമ്പ്.ഡോക്ടര്‍മാരുടെ വാഹനങ്ങളിലും അവരെ തിരിച്ചറിയാന്‍ സഹായകമായി ഈ ചിഹ്നം കാണാം.ലോകാരോഗ്യ സംഘടന,മെഡിക്കല്‍ അസോസിയേഷനുകള്‍ തുടങ്ങി പല രംഗങ്ങളിലും ഈ ചിഹ്നം ഉപയോഗത്തില്‍ ഉണ്ട്.
ഗ്രീസിലെ സംസ്കാരത്തില്‍ ഒരു കാലത്ത് പാമ്പിനു മാന്ത്രിക കഴിവുകള്‍ ഉള്ളതായി കരുതപ്പെട്ടിരുന്നു.ഭാവി പ്രവചിക്കുക,സ്വപ്നം വ്യാഖ്യാനിക്കുക,രോഗം സുഖപ്പെടുത്തുക എന്നീ കാര്യങ്ങളിലായിരുന്നു പാമ്പിനു ദൈവികമായ കഴിവുകള്‍ ഉണ്ടെന്നു കരുതപ്പെട്ടിരുന്നത്.ദൈവം പാമ്പിന്റെ രൂപത്തില്‍ ആണത്രേ ഭൂമിയില്‍ ആദ്യം പ്രത്യക്ഷപ്പെട്ടത്.ദൈവത്തിന്റെ ആജ്ഞ അനുസരിച്ചു മോസ്സെസ് ഓടു കൊണ്ട് ഒരു നാഗ പ്രതിമ ഉണ്ടാക്കിയെന്നും അത് ഒരു വടിയുടെ മുകളില്‍ ഉറപ്പിച്ചു വെച്ച്ചെന്നും ബൈബിളില്‍ പറയുന്നു.പാമ്പുകടി ഏറ്റവര്‍ ഈ നാഗ പ്രതിമയിലേക്ക് വെറുതെ ഒന്ന് നോക്കിയാല്‍ പോലും വിഷ ബാധയില്‍ നിന്ന് രക്ഷപ്പെടുമായിരുന്നു അത്രേ.
പൌരാണിക ഗ്രീസിലെ എപ്പിഡോരാസ്[Epidaurus]എന്ന സ്ഥലത്ത് മഞ്ഞ നിറമുള്ള,വിഷമില്ലാത്ത ഒരിനം പാമ്പുകള്‍ ഇഷ്ടം പോലെ ഉണ്ടായിരുന്നു.രോഗികളുടെ അസുഖമുള്ള ഭാഗത്ത് നക്കാന്‍ പരിശീലിപ്പിക്കപ്പെട്ട പാമ്പുകള്‍ ആയിരുന്നു ഇവ. അസ്ക്ലെപിയുസ് [Asclepius]വിഭാഗക്കാരുടെ അസ്ക്ലേപിയോന്‍[Asclepion]എന്നറിയപ്പെട്ടിരുന്ന ക്ഷേത്ര വൈദ്യശാലയില്‍ ആയിരുന്നു ഈ പാമ്പുകളെ പോറ്റിയിരുന്നത്.
ഗ്രീസിലെ ദേവ വൈദ്യന്‍ ആയിരുന്നു അസ്ക്ലെപിയുസ്.ഇദ്ദേഹത്തിന്റെ പേരിലുള്ള അസ്ക്ലേപിയോന്‍ ക്ഷേത്ര വൈദ്യ ശാലയില്‍ എത്തുന്ന രോഗി രണ്ടോ മൂന്നോ ദിവസം ഉപവാസം എടുക്കേണ്ടിയിരുന്നു.ദിവ്യ തീര്ധത്ത്തില്‍ കുളിച്ചു വിശ്രമിക്കുന്ന രോഗി രാത്രിയില്‍ ദിവ്യ നാഗം മുറിയിലേക്ക് ഇഴഞ്ഞു കയറുന്ന ശബ്ദം കേള്‍ക്കും എന്നായിരുന്നു വിശ്വാസം.
അസ്ക്ലെപിയുസിന്റെ മക്കളായിരുന്നു ഹൈജിയയും പനെഷ്യയും.[Hygeia and Panacea].ആരോഗ്യ ദേവത ആയിരുന്ന ഹൈജിയയും പനെഷ്യയും ആയിരുന്നു ഈ പാമ്പുകളെ തീറ്റി പോറ്റിയിരുന്നത്.അവരുടെ അച്ച്ചനായ അസ്ക്ലെപ്യുസിന്റെ സ്ഥാന ചിഹ്നമായ വടിയില്‍ ഈ പാമ്പിന്റെ ശില്‍പം കൊത്തിയിട്ടുണ്ടായിരുന്നു.ഈ സ്ഥാന ചിഹ്നമാണ് പിന്നീട് വൈദ്യ ശാസ്ത്രത്തിന്റെ അടയാളമായിത്തീര്‍ന്നത്‌.

നവോദ്ധാന കാലഘട്ടം വരെ ഇതായിരുന്നു.വൈദ്യശാസ്ത്രത്തിന്റെ പ്രതീകം.അത് കഴിഞ്ഞപ്പോള്‍ അത് ഇന്ന് കാണുന്ന രണ്ടു പാമ്പുകള്‍ ഒരു വടിയില്‍ ചുറ്റി പിണഞ്ഞു കയറുന്ന തരത്തിലുള്ള ചിഹ്നമായി മാറി.കച്ച്ച്ചവടത്തിന്റെയും നേട്ടത്ത്തിന്റെയും ലാറ്റിന്‍ ദേവനായ കടുസിയുസിന്റെ[Caduceus]സ്ഥാന ചിഹ്നമാണിത്.അന്ന് മുതല്‍ വൈദ്യശാസ്ത്രം കച്ചവടത്തിന്റെയും സ്വാര്‍ഥ നേട്ടത്തിന്റെയും ശാസ്ത്രമായി മാറിയോ എന്നുള്ളത് തമാശക്കെങ്കിലും പഠന വിധേയമാക്കാവുന്നതാണ്.

പാമ്പ് വിഷം

പാമ്പിന്റെ ഉമിനീരാണ് വിഷം.ആ അര്‍ഥത്തില്‍ എല്ലാ പാമ്പിനും വിഷമുണ്ട്‌.എങ്കിലും മനുഷ്യനെപ്പോലുള്ള വലിയ ജീവികളെ കൊല്ലാന്‍ മാത്രം വീര്യമുള്ള വിഷം വളരെ കുറച്ചു പാമ്പുകള്‍ക്കെ ഉള്ളു.കണ്ണിനു പിന്നില്‍ കുറച്ചു താഴെയാണ് വിഷ ഗ്രന്ഥിയുടെ സ്ഥാനം.ഇതില്‍ നിന്നുള്ള ചെറിയ വിഷക്കുഴലുകള്‍ വിഷപ്പല്ലുമായി ഇതിനെ ബന്ധിപ്പിക്കുന്നു.

നമ്മുടെ നാട്ടില്‍ നാല് ഇനം പാമ്പുകള്‍ക്കാന് മനുഷ്യനെ കൊല്ലാന്‍ മാത്രം മാരക ശക്തിയുള്ള വിഷമുള്ളത്.
1. വെള്ളിക്കെട്ടന്‍ [Krait]
2. മൂര്‍ഖന്‍ [Cobra]
3.അണലി [Russels Viper]
4. ചുരുട്ട മണ്ഡലി [Saw scaled Viper]
ഈ നാലിനം പാമ്പുകളെ പൊതുവേ The Big Four എന്നാണു വിളിക്കുന്നത്‌.ഇവരെ കൂടാതെ വിഷമുള്ള മറ്റൊരാള്‍ രാജ വെമ്പാലയാണ്. പക്ഷെ അത് നിത്യ ഹരിത വനങ്ങളില്‍ മാത്രമാണ് കാണപ്പെടുന്നത്. വന നശീകരണവും മറ്റും കാരണം ഇടയ്ക്കിടെ നാട്ടില്‍ ഇറങ്ങാരുന്ടെങ്കിലും.!

വെള്ളിക്കെട്ടന്‍
ശങ്ഖു വരയന്‍ ;മോതിര വളയന്‍;വളകൊഴുപ്പന്‍;വള വളപ്പന്‍; വളയിപ്പാന്‍ എന്നൊക്കെ അറിയപ്പെടുന്ന ഈ പാമ്പാണ് വിഷ വീര്യത്തിന്റെ കാര്യത്തില്‍ ഏഷ്യയില്‍ ഒന്നാം സ്ഥാനത്ത്.വിഷം നാഡികളെ ബാധിക്കുന്നു.

 

മൂര്‍ഖന്‍

കണ്ണാടി മൂര്‍ഖന്‍; കണ്ണാടി വിരിയന്‍;പുല്ലാനി മൂര്‍ഖന്‍; കരി മൂര്‍ഖന്‍;എന്നൊക്കെ അറിയപ്പെടുന്നു.കഴുത്തില്‍ വീതിയുള്ള പത്തിയും അതില്‍ കണ്ണട അടയാളവും ഉണ്ട്.ശക്തിയായി ചീറ്റി ശബ്ദം ഉണ്ടാക്കും.ഇതിന്റെ വിഷവും നാഡികളെ തന്നെയാണ് ബാധിക്കുന്നത്.

 

അണലി

ചേനത്തണ്ടന്‍; മണ്ഡലി;പയ്യാന മണ്ഡലി;രക്ത മണ്ഡലി.തേക്ക് അണലി എന്നൊക്കെ പല പേരുകളില്‍ അറിയപ്പെടുന്നു.ശരീരത്തില്‍ പരസ്പരം തൊടാത്ത മൂന്നു നിര ചങ്ങല അടയാളങ്ങള്‍ കാണാം.വളരെ ശക്തിയായി ചീറ്റും.വിഷം രക്തത്തെയാണ് ബാധിക്കുന്നത്.

 

 

 

 

 

ചുരുട്ട മണ്ഡലി

ഈര്‍ച്ച വാള്‍ ശല്ക്ക മണ്ഡലി,ഈര്‍ച്ച വാള്‍ ശല്ക്ക അണലി,രക്ത അണലി എന്നൊക്കെ അറിയപ്പെടുന്നു.തലയില്‍ തലതിരിഞ്ഞ ഒരു വെളുത്ത ത്രിശൂല അടയാളമുണ്ട്.ശരീരത്തില്‍ അണലിയെ പോലെ അടയാളങ്ങളും.ശല്‍ക്കങ്ങള്‍ തമ്മില്‍ ഉരസി ഒരു പ്രത്യേക ശബ്ദം ഉണ്ടാക്കും.

മേല്‍പ്പറഞ്ഞ പാമ്പുകള്‍ കടിച്ചാല്‍ കടിയേറ്റ ഭാഗം ഇങ്ങനെ തന്നെ ആയിക്കൊള്ളണം എന്ന് യാതൊരു നിര്‍ബന്ധവുമില്ല.അധികവും ഇങ്ങനെയാണ് കാണാറുള്ളത്‌ എന്ന് മാത്രം.
അണലി വര്‍ഗത്തില്‍ പെട്ട പാമ്പുകള്‍ കടിച്ചാല്‍ പലപ്പോഴും ഊനുകള്‍,രോമകൂപങ്ങള്‍,കണ്ണ്,മൂക്ക്,തുടങ്ങിയ ഭാഗങ്ങളില്‍ നിന്ന് സൂക്ഷ്മ രക്തക്കുഴലുകള്‍ പൊട്ടി രക്തം വരാറുണ്ട്.മൂത്രത്തിലും ചോര കലര്‍ന്ന് കണ്ടേക്കാം.

അപൂര്‍വമായി വിഷപ്പാമ്പുകളുടെ കടി വിഷമേല്പ്പിക്കാതെ വരാറുണ്ട്.ഒന്നിലധികം തവണ ഇര പിടിക്കുകയോ മറ്റോ ചെയ്യുമ്പോള്‍ വിഷ സഞ്ചിയിലെ വിഷത്തിന്റെ അളവ് വളരെ കുറഞ്ഞു പോയിക്കഴിയുന്ന ഒരു അവസ്ഥയിലാണ് ഇത് സംഭവിക്കാരുള്ളത്.എങ്കിലും ഓരോ കടിയിലും മാരകമായ മാത്രയുടെ പത്തോ നൂറോ ഇരട്ടി അളവ് വിഷമാണ് പാമ്പ് അത് കടിക്കുന്ന ജീവിയുടെ ശരീരത്തില്‍ ഏല്‍പ്പിക്കുന്നത് എന്ന കാര്യം കണക്കിലെടുക്കുമ്പോള്‍ ഇത് വളരെ വളരെ അപൂര്‍വമായേ സംഭവിക്കുകയുള്ളൂ എന്നതാണ് സത്യം. ഇത്തരം കടി ശുഷ്ക ദംശം[Dry Bite] എന്ന് അറിയപ്പെടുന്നു.

മൂര്‍ഖന്റെയും വെള്ളിക്കെട്ടന്റെയും വിഷം ഏറ്റാല്‍ ഏകദേശം ഒരേ പോലുള്ള ലക്ഷണങ്ങളാണ് പ്രകടിപ്പിക്കുക.ഇതിന്റെ കാരണം രണ്ടും നാഡികളെ ബാധിക്കുന്ന വിഷമാണ് എന്നുള്ളതാണ്.ഇത്തരം വിഷത്തിനു Neurotoxic Venom എന്ന് പറയും.

കടി ഏറ്റാല്‍ ഉള്ള പൊതു ലക്ഷണങ്ങള്‍

1. കടിയേറ്റ ഭാഗത്ത് അസഹ്യമായ നീറ്റല്‍.
2. കടി ഏറ്റ ഭാഗം നീര് വെച്ചു വീങ്ങും.
3. കരിവാളിപ്പ്
4. കടിവായില്‍ നിന്ന് നേര്‍ത്ത രക്തം കിനിഞ്ഞു കൊണ്ടിരിക്കും.
5. ദേഹം വിറങ്ങലിക്കും.
6. കൈകാലുകള്‍ അനക്കാന്‍ കഴിയാതാകും.
7. കഴുത്ത് നേരെ നില്‍ക്കില്ല.
8. നാവ് അനക്കാന്‍ വയ്യാതാവും.
9. ഭക്ഷണം ഇറക്കാന്‍ കഴിയില്ല.
10. ചുണ്ട് വിളറും.
11. വായില്‍ നിന്ന് നുരയും പതയും ഒഴുകും.
12. കണ്പോളകള്‍ അടഞ്ഞു പോകും.
13. ശ്വാസ തടസ്സം ഉണ്ടാകും.
14. ചിലപ്പോള്‍ വായില്‍ നിന്നും മൂക്കില്‍ നിന്നും രക്ത സ്രാവം.

ഈ പറഞ്ഞ എല്ലാ ലക്ഷണങ്ങളും ഇതേ പടി എല്ലാ കടിയിലും ആവര്‍ത്തിക്കണം എന്നില്ല.ഉള്ളിലെത്തുന്ന വിഷത്തിന്റെയും കടിയേല്‍ക്കുന്ന സ്ധാനത്തിന്റെയും അടിസ്ഥാനത്തില്‍ ഇതിനു തീര്‍ച്ചയായും മാറ്റങ്ങള്‍ ഉണ്ടാകും.വെള്ളിക്കെട്ടന്റെ കടിയേറ്റാല്‍ പലപ്പോഴും ആറുമണിക്കൂര്‍ കഴിഞ്ഞു പെട്ടെന്നുണ്ടാകുന്ന അസഹ്യമായ ഒരു വയറു വേദന ആയേക്കാം ആദ്യത്തെ വിഷ ബാധാ ലക്ഷണം.

അണലിവര്‍ഗ്ഗ വിഷ ലക്ഷണം

1. കടിവായില്‍ കരിവാളിപ്പ്.
2. കടിവായില്‍ നിന്ന് നേര്‍ത്ത രക്തം കിനിഞ്ഞിറങ്ങും.
3. നീറ്റല്‍.
4. കടിവായക്ക്‌ ചുറ്റും മാംസം ചീയാന്‍ തുടങ്ങും.
5. വായില്‍ നിന്നും മൂക്കില്‍ നിന്നും വയറ്റില്‍ നിന്നും ചോര പോയേക്കാം.

വിഷത്തിലെ ഘടകങ്ങള്‍

പ്രോട്ടീന്‍,പെപട്യ്ടുകള്‍[Peptides],എന്സ്യ്മുകള്‍ എന്നിവയാണ് പൊതുവേ പാമ്പ് വിഷത്തിലെ ഘടകങ്ങള്‍.രക്ത പര്യയന വ്യവസ്ഥയില്‍ എത്തുമ്പോഴാണ് ഇവ മരണ കാരണം ആകുന്നത്‌.അതായത് വായിലോ വയറ്റിലോ മുറിവൊന്നും ഇല്ലെങ്കില്‍ പാമ്പുവിഷം ഉള്ളില്‍ കഴിച്ചാലും കുഴപ്പമൊന്നും ഉണ്ടാവുകയില്ല.
Trypsin,Haemolysin തുടങ്ങിയ പ്രോട്ടീനുകളും Proteases,Phospholipase-A,Cholinesterase,Ophio-amino-oxidase,Nucleases,Hyaluronidases തുടങ്ങിയ എന്സ്യ്മുകളും ആണ് പ്രധാനമായും പാമ്പുവിഷത്തില്‍ കാണപ്പെടുന്നത്.ഇവയുടെ കൂടിക്കലര്‍ന്നുള്ള പ്രവര്‍ത്തനങ്ങളാണ് വിഷ ബാധക്ക് കാരണമായി തീരുന്നത്.

മാരക അളവ്

ഒരു ശരാശരി മനുഷ്യന് മാരകമാകുന്ന വിഷത്തിന്റെ മാത്ര ഏകദേശം താഴെ പറയുന്ന അളവിലാണ്.പക്ഷെ ഇതിനേക്കാള്‍ എത്രയോ അധികം ആയിരിക്കും ഓരോ കടിയിലും പാമ്പ് ഇരയുടെ ഉള്ളിലേക്ക് കടത്തി വിടുന്ന വിഷത്തിന്റെ അളവ്.

1. അണലി- 15 mgm
2.ചുരുട്ട മണ്ഡലി- 8 mgm
3. മൂര്‍ഖന്‍- 12 mgm
4. വെള്ളിക്കെട്ടന്‍- 6 mgm.

ഈ പറഞ്ഞ ഇനങ്ങള്‍ അല്ലാതെ വിഷമുള്ള മറ്റു പാമ്പുകള്‍ രാജ വെമ്പാല,പവിഴപ്പാമ്പുകള്‍,സുഷിര മണ്ടലികള്‍,കടല്‍ പാമ്പുകള്‍ എന്നിവയാണ്.രാജ വെമ്പാലയുടെ വിഷത്തിനു മൂര്‍ഖ വിഷത്തിന്റെ അത്ര ശക്തി ഇല്ലെങ്കിലും അളവ് വളരെ കൂടുതല്‍ ആണ്.ഒറ്റക്കടിയില്‍ ഒരു വലിയ ആനയെപ്പോലും കൊല്ലാന്‍ മാത്രം- ഏകദേശം 6 cc വിഷം- അതിന്റെ വിഷ സഞ്ചിയില്‍ ഉണ്ടാവും. നാഡികളെ ബാധിക്കുന്ന ഇനം വിഷം തന്നെയാണ് രാജ വെമ്പാലക്കും ഉള്ളത്.
പവിഴപ്പാമ്പുകളും മൂര്‍ഖ വര്‍ഗ്ഗത്തില്‍ പെട്ടവ തന്നെയാണ്.ഇവയുടെ വിഷ വീര്യത്തെ കുറിച്ചു ഇനിയും ആധികാരിക പഠനങ്ങള്‍ നടക്കേണ്ടതുണ്ട്.
സുഷിര മണ്ടലികള്‍ അണലി വര്‍ഗ്ഗത്തില്‍ പെടുന്നു.ഇവയുടെ വിഷം മനുഷ്യന് അത്രയൊന്നും മാരകമല്ല.കടിയേറ്റ ഭാഗത്ത് നീര്,ചൊറിച്ചില്‍,വേദന,പനി എന്നിവ ഉണ്ടായേക്കാം എന്ന് മാത്രം.അങ്കമാലിയിലെ ലിറ്റില്‍ ഫ്ലവര്‍ ആസ്പത്രിയില്‍ അടുത്ത കാലത്ത് നടന്ന പഠനത്തില്‍ Hypnale hypnale എന്ന ഇനത്തില്‍ പെട്ട സുഷിര മണ്ടലിയുടെ വിഷം മനുഷ്യന് മാരകമാണെന്ന് കണ്ടെത്തിയതായി അവകാശപ്പെടുന്നുണ്ടെങ്കിലും ശാസ്ത്ര ലോകം ഇത് അംഗീകരിച്ചിട്ടില്ല.
കടല്‍ പാമ്പുകളുടെ വിഷം അതി മാരകമാണെങ്കിലും അവ നാട്ടിന്‍ പുറങ്ങളില്‍ സാധാരണമല്ലല്ലോ.
പൂച്ച്ചക്കണ്ണന്‍ പാമ്പ്,നാഗത്താന്‍ പാമ്പ്,പച്ചില പാമ്പ് തുടങ്ങി ചേരയുടെയും നീര്‍ക്കൊലിയുടെയുമൊക്കെ കുടുംബത്തില്‍ [Colubridae] പെട്ട ചില പാമ്പുകള്‍ക്ക് നേരിയ തോതില്‍ വിഷം ഉണ്ടെങ്കിലും അവയ്ക്ക് മനുഷ്യനെ കൊല്ലാന്‍ മാത്രം വീര്യമില്ല.എങ്കിലും പരിണാമത്തിന്റെ ആദ്യഘട്ടങ്ങളില്‍ വിഷമുണ്ടായിരുന്നതും പിന്നീട് എപ്പോഴോ വിഷവീര്യം നഷ്ട്ടപ്പെട്ടതുമായ ചേര ഉള്‍പ്പെടെയുള്ള Colubrid Snakes വീണ്ടും വിഷ വീര്യമുള്ളവയായിക്കൊണ്ടിരിക്കുകയാനെന്നു ചില സര്‍പ്പ ഗവേഷകര്‍ അഭിപ്രായപ്പെടുന്നു.

പ്രതിവിഷം [Anti-Snake Venom]

വളരെ നേര്‍പ്പിച്ച വിഷം കുതിരകളില്‍ കുത്തി വെച്ച് ക്രമേണ വിഷത്തിന്റെ അളവ് കൂട്ടി,കുതിരകള്‍ക്ക് പ്രതിരോധ ശേഷി ഉണ്ടാക്കുന്നു.അവസാനം ഒട്ടും നേര്‍പ്പിക്കാത്ത വിഷം കുത്തി വെച്ചാലും അതിനെ പ്രതിരോധിക്കാന്‍ മാത്രം ശക്തി നേടും കുതിര.അപ്പോള്‍ അവയുടെ കുറച്ചു രക്തം കുത്തിയെടുത്തു അതിന്റെ ദ്രാവകാംശം [Serum]തണുപ്പിച്ചു ഉണക്കുന്നു.ഇത് 10ml ന്‍റെ കുപ്പികളില്‍ ആക്കി വിപണിയില്‍ എത്തിക്കുന്നു.ഇതാണ് പ്രതിവിഷം അഥവാ ആന്റിവെനിന്‍.ആദ്യമൊക്കെ ഓരോ പാമ്പിനും പ്രത്യേകം പ്രത്യേകം പ്രതിവിഷം [Monovalent] ആയിരുന്നു എങ്കിലും ഇന്ന് എല്ലാ പാമ്പുകളുടെയും വിഷത്തിനു എതിരെ ഫലപ്രദമായ പ്രതിവിഷമാണ് [Poly valent] വിപണിയില്‍ എത്തുന്നത്‌.അതുകൊണ്ട് ഇപ്പോള്‍ പഴയ കാലത്തേതു പോലെ കടിച്ച പാമ്പിനെയും കൊണ്ട് ആസ്പത്രിയില്‍ എത്തേണ്ട കാര്യമില്ല.

അപൂര്‍വ്വം ചിലര്‍ക്ക് കുതിരയുടെ രക്തത്തോട് അലര്‍ജി [Horse Serum Allergy] കാണാറുണ്ട്.ഇത്തരം അലറ്ജിയുണ്ടായാല്‍ ഹൃദയത്തിന്റെ പ്രവര്‍ത്തനം നിലക്കുകയും പെട്ടെന്ന് മരണം സംഭവിക്കുകയും ചെയ്തേക്കാം.ഇവിടെയാണ്‌ ബില്‍ ഹാസ്റ്റിനെ പോലുള്ള വ്യക്തികളുടെ പ്രസക്തി.അമേരിക്കയിലെ മിയാമി പാമ്പ് ഗവേഷണ കേന്ദ്രത്തിലായിരുന്നു ബില്‍ ഹാസ്റ്റ് പ്രവര്‍ത്തിച്ചു കൊണ്ടിരുന്നത്.അദ്ദേഹം നേര്‍പ്പിച്ച പാമ്പ് വിഷം സ്വന്തം രക്തത്തിലേക്ക് കുത്തി വെക്കുകയും അങ്ങനെ സ്വയം പ്രതിരോധ ശേഷി നേടിയെടുക്കുകയും ചെയ്തു.എന്നിട്ട് വിഷബാധ ഏറ്റവര്‍ക്ക് രക്തം ദാനം ചെയ്ത് അവരുടെ ജീവന്‍ രക്ഷപ്പെടുത്തി.

മറ്റു ചികിത്സകള്‍

1. പ്രാചീന മന്ത്രവാദ ചികിത്സ.

പഴയ കാലത്ത് മന്ത്രവാദ ക്രിയകള്‍ക്കു നമ്മുടെ നാട്ടിലെ പാമ്പ് വിഷ ചികിത്സയില്‍ ഒരു പ്രധാന സ്ഥാനം ഉണ്ടായിരുന്നു.കടിച്ച പാമ്പിനെ വരുത്തി വിഷം ഇറക്കലായിരുന്നു ഇതിന്റെ ഏറ്റവും ആകര്‍ഷകമായ ഭാഗം.കോടിക്കരുത്ത്,കീരിക്കരുത്ത്,ഉറുമ്പിന്‍ കരുത്ത്,പക്ഷിക്കരുത്ത് തുടങ്ങിയ ദ്രാവിഡ മന്ത്ര പ്രയോഗ രീതികളും ബ്രാഹ്മണരുടെ ആര്യ രീതികളും നില നിന്നിരുന്നതായി കഥകളുണ്ട്.ഇത് കൂടാതെയായിരുന്നു നൂറു കണക്കിന് വിഷഹര മന്ത്രങ്ങളും ഗാരുട മന്ത്രങ്ങളും.

2. ആയുര്‍വേദ ചികിത്സ.

പ്രയോഗ സമുച്ചയം,വിഷ ചികിത്സാ നൂല്‍,ഭൈഷജ്യ രത്നാകരം തുടങ്ങിയ പ്രാചീന ആയുര്‍വേദ കൃതികളില്‍ വിഷ ചികിത്സാ ക്രമങ്ങളെ കുറിച്ച് വിശദമായ പരാമര്‍ശങ്ങള്‍ ഉണ്ട്.ഗരളഹരം,അണലി വേഗം,തുടങ്ങിയ ഔഷധ സസ്യങ്ങള്‍ ഇതിന്റെ ഒരു പ്രധാന ഭാഗം ആയിരുന്നു.പിന്നീട് "അഗദതന്ത്രം"എന്ന പേരില്‍ ഒരു പ്രത്യേക വിഷ ചികിത്സാ വിഭാഗം തന്നെ ആയുര്‍ വേദത്തില്‍ രൂപപ്പെടുകയുണ്ടായി.

3. ഹോമിയോ ചികിത്സ

സ്വര്‍ണ്ണ ലവണം അടിസ്ഥാന ഘടകമായ Lexin ,തിരിയാക് [Tiriyaq]എന്നിവയായിരുന്നു ആദ്യ കാലത്ത് പാമ്പ് വിഷ ബാധയില്‍ നമ്മുടെ നാട്ടില്‍ ഉപയോഗിച്ച് കൊണ്ടിരുന്ന ഹോമിയോ ഔഷധങ്ങള്‍.ഫാദര്‍ മുല്ലെര്‍സ് ക്ലിനിക് ആയിരുന്നു ഇതിന്റെ വിതരണക്കാര്‍.ഏകദേശം അര നൂറ്റാണ്ട് കാലത്തോളം ഈ മരുന്ന് ഇവിടെ പ്രചാരത്തില്‍ ഉണ്ടായിരുന്നു.

4. വിഷക്കല്ല് ചികിത്സ

ചില പ്രത്യേക മരുന്നുകള്‍ കൊണ്ട് ഉണ്ടാക്കിയ കല്ല്‌ പോലെ കാഴ്ചയില്‍ തോന്നിക്കുന്ന ഒരു ഉരുളയാണ്‌ വിഷക്കല്ല് എന്ന് അറിയപ്പെടുന്നത്.ഇത് കടി വായില്‍ വെച്ചാല്‍ വിഷം അത് വലിച്ചെടുത്തു കൊളളും അത്രേ.തനിയെ അടര്‍ന്നു താഴെ വീഴുമ്പോള്‍ പാലില്‍ കഴുകി വീണ്ടും വെക്കണം.ചിലപ്പോള്‍ ഒന്നിലേറെ കല്ലുകള്‍ ഉപയോഗിക്കേണ്ടി വന്നേക്കാം.അവസാനം വിഷാംശം മുഴുവന്‍ വലിച്ചെടുത്തു കഴിയുമ്പോള്‍ കല്ല്‌ മുറിവില്‍ പിടിക്കാതിരിക്കും.അപ്പോള്‍ കടിയേറ്റ ആള്‍ അപകട ഘട്ടം തരണം ചെയ്യുന്നു.

5. കോഴി ചികിത്സ
കോഴിയുടെ ഗുദഭാഗത്ത് മുറിവ് ഉണ്ടാക്കിയ ശേഷം ആ ഭാഗം പാമ്പ് കടിച്ച സ്ഥലത്ത് ചേര്‍ത്ത് വെക്കുന്നു.അത് വിഷം വലിച്ചെടുക്കുകയും കോഴി ചാകുകയും ചെയ്യുന്നു.ഇങ്ങനെ കോഴി ചാവാതെ ആകുന്നതു വരെ തുടരുന്നു.ഇതിന്റെ ഫലമായി കടിയേറ്റ ആള്‍ രക്ഷപ്പെടുന്നു.

ഇത് കൂടാതെ പല സ്ഥലത്തും പല രീതിയിലുള്ള പ്രാദേശിക ചികിത്സകള്‍ നിലവിലുണ്ട്.ഇന്നും വിഷ ഹാരികളായ വിഷ വൈദ്യന്മാര്‍ ഇല്ലാത്ത നാട്ടിന്‍ പുറങ്ങള്‍ ചുരുക്കം ആയിരിക്കുമല്ലോ.അതാതു കാലത്ത് നിരീക്ഷനങ്ങ്ളിലൂടെയും ചിന്തകളിലൂടെയും വളര്‍ന്നു വന്ന ചികിത്സാ പദ്ധതികള്‍ ആണ് ഇവയില്‍ പലതും.അതിന്റെ തുടര്‍ച്ചയായി വികസിച്ചു വന്നത് തന്നെയാണ് ആധുനിക ചികിത്സാ പദ്ധതിയും.വിഷം ശരീരത്തിലെ രക്ത പര്യയന വ്യവസ്ഥയില്‍ എത്തിയാല്‍ പക്ഷെ ഏറ്റവും ഫലപ്രദമായ ചികിത്സ പ്രതിവിഷ ചികിത്സ തന്നെയാണ്.മറ്റു ചികിത്സാ പദ്ധതികള്‍ ഒരു പക്ഷെ വിഷമില്ലാത്തതോ നേരിയ വിഷമുള്ളതോ ആയ പാമ്പുകളുടെ കടിയില്‍ ഫലപ്രദമായെക്കാമെന്നു മാത്രം.അല്ലെങ്കില്‍ തന്നെ പഴയ കാലത്ത് പരീക്ഷണ നിരീക്ഷണങ്ങളിലൂടെ വികസിച്ചു വന്ന വിഷ ചികിത്സാ രീതികളെ അന്ന് സ്വീകരിച്ചിരുന്നത് പോലെ ഇന്നത്തെ ഏറ്റവും വികാസം പ്രാപിച്ച ചികിത്സാ പദ്ധതിയെ ജീവ രക്ഷക്ക് വേണ്ടി നാം സ്വീകരിച്ചേ മതിയാകൂ

പ്രഥമ ശുശ്രൂഷ

പാമ്പ് വിഷ ബാധയേറ്റ ആളിനെ എത്രയും പെട്ടെന്ന് ഏറ്റവും അടുത്തുള്ള പ്രതിവിഷ ചികിത്സാ സൌകര്യമുള്ള ആസ്പത്രിയില്‍ എത്തിക്കുകയാണ് ആദ്യം ചെയ്യേണ്ടത്.പക്ഷെ അത്തരം ഒരു ആസ്പത്രി അടുത്തെങ്ങും ഇല്ലെങ്കില്‍ നാം തന്നെ ചില പ്രഥമ ശുശ്രൂഷകള്‍ നല്‍കേണ്ടതുണ്ട്

1. ഒട്ടും പരിഭ്രമിക്കരുത്‌.കടിയേറ്റ ആളിന് ധൈര്യം പകരുന്ന രീതിയില്‍ സംസാരിക്കുക.
2. റ്റൂര്‍നിക്കെ കെട്ടുക. കടിയേറ്റ സ്ഥാനത്തിനു മുകളില്‍ ഒരു അസ്ഥി മാത്രം ഉള്ള ഭാഗത്ത്‌ തുണി കൊണ്ടോ ചരട് കൊണ്ടോ അധികം മുറുകാതെ കെട്ടുന്നതിനാണ് റ്റൂര്‍നിക്കെ എന്ന് പറയുന്നത്.രക്തയോട്ടം നിലച്ചു പോകാത്ത വിധത്തില്‍ ആവണം കെട്ടുന്നത്.അതായത് വേണമെങ്കില്‍ ഒരു വിരല്‍ നമുക്ക് അതിനടിയിലൂടെ തിരുകി കയറ്റാന്‍ സാധിക്കണം.കേട്ട് വല്ലാതെ മുറുകിയാല്‍ അതിനു താഴേക്കുള്ള രക്തപ്രവാഹം നിലച്ചു ആ അവയവം ചത്ത്‌ പോകും.പിന്നെ അത് മുറിച്ചു മാറ്റുകയല്ലാതെ വേറെ വഴികളില്ല.

3. കടിയേറ്റ ആളിന് ആത്മ വിശ്വാസം നല്‍കാനായി അപകടമില്ലാത്ത പ്ലാസിബോ മരുന്നുകളോ കുത്തി വെപ്പോ നല്‍കാവുന്നതാണ്.
4. നടക്കാനോ ഓടാനോ കടിയേറ്റ ഭാഗം ഇളകാനോ അനുവദിക്കാതെ എത്രയും പെട്ടെന്ന് ആസ്പത്രിയില്‍ ആക്കുക.

5. ശര്‍ദ്ദിച്ചാല്‍ ,കടിയേറ്റ ആളിനെ ഒരു വശത്തേക്ക് ചെരിച്ചു കിടത്തുക.

കടിയേറ്റ ഭാഗം ശ്രദ്ധിച്ചു നോക്കിയാല്‍ പലപ്പോഴും കടിച്ചത് വിഷ പാമ്പാണോ എന്നാ കാര്യം നമുക്ക് മനസ്സിലാക്കാന്‍ കഴിയും.പക്ഷെ എല്ലായ്പോഴും ഇത് കൃത്യമായി കൊള്ളണം എന്നില്ല.

കടിയേറ്റ ഭാഗം കീറി രക്തം പുറത്തു കളയാന്‍ ശ്രമിക്കരുത്.അണലി വര്‍ഗത്തില്‍ പെട്ട പാമ്പുകളുടെ കടിയില്‍ ഇത് കൂടുതല്‍ കുഴപ്പം ഉണ്ടാക്കാം.മാത്രമല്ല മുറിവില്‍ അണുബാധ ഉണ്ടാകാനുള്ള സാധ്യതയും കൂടും.വായ കൊണ്ട് രക്തം വലിച്ചെടുത്തു തുപ്പിക്കളയാന്‍ ശ്രമിക്കുന്നതും അത്ര നല്ലതല്ല.വായിലോ വയറ്റിലോ മുറിവുണ്ടെങ്കില്‍ ഇത് അപകടങ്ങള്‍ ഉണ്ടാക്കിയേക്കാം.

വിഷപ്പാമ്പുകള്‍


വലുത്

ലോകത്തിലെ ഏറ്റവും വലിയ വിഷപ്പാമ്പ് രാജ വെമ്പാലയാണ്.വിഷ വീര്യത്തിന്റെ കാര്യത്തില്‍ ഇവന്‍ മൂര്ഖനെക്കാള്‍ അല്‍പ്പമൊന്നു പിന്നില്‍ ആണെങ്കിലും.പക്ഷെ വലിയ വിഷ സഞ്ചിയുള്ളത് കൊണ്ട് തന്നെ വിഷത്തിന്റെ അളവ് വളരെ കൂടുതല്‍ ആണ്.ഇന്ത്യയില്‍ ഇതിന്റെ വിഷത്തിനു പ്രതിവിഷം ഇല്ല.

ചെറുത്‌

ഏറ്റവും ചെറിയ വിഷപ്പാമ്പ് നമീബിയയിലും മറ്റും കാണുന്ന കൊമ്പന്‍ അണലി ആണ്.Peringuis Adder എന്നാണു ശരിക്കുള്ള പേര്

ഏറ്റവും വിഷ വീര്യം ഉള്ളത്

കരയിലെ പാമ്പുകളില്‍ ഏറ്റവും വീര്യമുള്ള വിഷം ആസ്ട്രെല്യക്കാരനായ ഇന്‍ലാന്ഡ് തൈപാന്‍ [Inland Taipan]എന്ന പാമ്പിനാണ് ഉള്ളത്.ഇതിനെ ഫിയെര്സ് സ്നേക്ക് [Fierce Snake]എന്നും വിളിക്കാറുണ്ട് ഒറ്റക്കടിയില്‍ നൂറാളെ കൊല്ലാന്‍ മാത്രം വിഷമാണ് ഇതിന്റെ വിഷ സഞ്ചിയില്‍ ഉള്ളത്.

ഏറ്റവും വേഗതയുള്ളത്

ഏറ്റവും വേഗതയുള്ള വിഷപ്പാമ്പ് ആഫ്രിക്കക്കാരനായ ബ്ലാക്ക് മാമ്പ ആണ്.മണിക്കൂറില്‍ പത്തൊമ്പത് കിലോ മീറ്റര്‍ വരെ വേഗതയില്‍ ഇത് സഞ്ചരിച്ചതിന്റെ രേഖകള്‍ ഉണ്ട്.ഈ പാമ്പിന്റെ വായക്കുള്ളിലെ കറുപ്പ് നിറം ആണ് ഇതിനു ഇങ്ങനെയൊരു പേര് നേടിക്കൊടുത്തത്

ഏറ്റവും വലിയ വിഷപ്പല്ല്.

ഗബൂണ്‍ അണലി ആണ് ലോകത്തില്‍ ഏറ്റവും വലിയ വിഷപ്പല്ലുള്ള പാമ്പ്.ഇതിന്റെ വിഷപ്പല്ലിനു ശരാശരി 3-4 സെന്റി മീറ്റര്‍ നീളം ഉണ്ടാകും.

കുരുടിപ്പാമ്പ്

ഇംഗ്ലീഷ് പേര്- WORM SNAKE,THREAD SNAKE

ശാസ്ത്ര നാമം- Ramphotyphlops braminus

മറ്റു മലയാളം പേരുകള്‍- കണ്ണില്ലാ കുരുടി,ബ്രാഹ്മണി കുരുടി,വിരപ്പാമ്പ്,നൂല്‍ പാമ്പ്.

വലിപ്പം- ജനിക്കുമ്പോള്‍-35mm

ശരാശരി- 125mm

പരമാവധി- 230mm

ചെറുതും മിനുസം ഉള്ളതുമായ ശരീരം.കണ്ടാല്‍ വിരയെപ്പോലെ തോന്നും.തലയ്ക്കു ശരീരത്തിന്റെ അത്ര തന്നെ വീതി.കണ്ണുകള്‍ നേര്‍ത്ത കറുത്ത കുത്തുകള്‍ പോലെ തോന്നും.കൂര്‍ത്ത വാല്‍.അടിഭാഗത്ത്തിനു വിളറിയ നിറം.

ശല്ക്കങ്ങളുടെ എണ്ണം- ശരീരത്തിന്റെ മധ്യ ഭാഗത്ത്‌ 20.ഉദര ശല്ക്കങ്ങള്‍ക്ക് വലിപ്പക്കൂടുതല്‍ ഇല്ല.മേല്‍ത്താടിയില്‍ മാത്രമേ പല്ലുകള്‍ ഉള്ളു.

സ്വഭാവം- കൂടുതല്‍ സമയവും മണ്ണിനടിയില്‍ കഴിയാന്‍ ഇഷ്ട്ടപ്പെടുന്നു.ഈര്‍പ്പവും ഇരുട്ടും ഉള്ള സ്ഥലങ്ങളിലാണ് സാധാരണ കാണപ്പെടുന്നത്.കല്ലുകളുടെ അടിയിലും പൂച്ച്ചട്ടികളിലും ഒക്കെ കാണാറുണ്ട്.മഴയ്ക്ക് ശേഷം പുറത്ത് വരാറുണ്ട്.ഉറുമ്പ്‌,ചെറു കീടങ്ങള്‍,പുഴുക്കള്‍ തുടങ്ങിയവയാണ് ആഹാരം.കയ്യിലെടുത്താല്‍ പിടഞ്ഞു പുളയുകയും കയ്യില്‍ കാഷ്ട്ടിക്കുകയും ചെയ്യാറുണ്ട്.

കുരുടികുടുംബത്ത്തില്‍ പെണ്പാമ്പുകള്‍ മാത്രമേയുള്ളൂ.ബീജ സങ്കലനം നടക്കാതെ മുട്ട വിരിഞ്ഞു കുഞ്ഞുങ്ങള്‍ ഉണ്ടാകുന്നു.ഇത് അനിഷേകജനനം [Parthenogenesis] എന്നാണു അറിയപ്പെടുന്നത്.ഈ വര്‍ഗ്ഗത്തില്‍ ഇതുവരെ ഒരൊറ്റ ആണ്‍ പാമ്പിനെ പോലും കണ്ടെത്തിയതായി ഔദ്യോഗിക രേഖകളില്ല.ജൂണ്‍ മാസത്തിലാണ് മുട്ടകള്‍ ഇടുന്നതെന്നും ഒരു തവണ 2 മുതല്‍ 7 മുട്ടകള്‍ വരെ ഇടുമെന്നും.കേണല്‍ ഫ്രാങ്ക് വാള്‍ പറയുന്നു.കൂടുതല്‍ പഠനങ്ങള്‍ നടന്നിട്ടില്ല.ഏതായാലും ആണ്പാമ്പുകളുടെ സഹായമില്ലാതെ മുട്ട വിരിയുന്നത് കൊണ്ടാവാം ലോകത്തില്‍ പാമ്പുകള്‍ ഇല്ലാത്ത സ്ഥലങ്ങള്‍ ആയി അറിയപ്പെട്ടിരുന്ന ന്യൂസിലാന്റ്,ലക്ഷദ്വീപ്,ഹവായ് തുടങ്ങിയ സ്ഥലങ്ങളിലും ഇവ എത്ത്തിപ്പെട്ടിട്ടുണ്ട്.

ബെട്ഡോമിന്റെ കുരുടി

ഇംഗ്ലീഷ് പേര് - Beddome"s worm snake

ശാസ്ത്ര നാമം - Typhlops beddomei

മറ്റു മലയാളം പേരുകള്‍ - വെള്ള മൂക്കന്‍ കുരുടി

വലിപ്പം - 140 mm

സാധാരണ കുരുടിയുടെത് പോലുള്ള തിളക്കമുള്ള ശരീരം.കണ്ടാല്‍ വിരയെപ്പോലെ തോന്നും.കഴുത്ത് വേര്‍തിരിക്കപ്പെട്ടിട്ടില്ല.ശരീരം ശല്ക്കാവൃതം.കണ്ണുകള്‍ നേത്ര ശല്ക്കത്തിനടിയില്‍ ഓരോ കറുത്ത കുത്തുകള്‍ പോലെ തോന്നും.അറ്റം കൂര്‍ത്ത വാല്‍.തവിട്ടുനിറം.ശരീരത്തിന് നടുവില്‍ പുറത്തു കൂടി മിക്കവാറും താഴെ വരെ എത്തുന്ന ഒരു ഇരുണ്ട വര കാണാം.അടിഭാഗം വിളറിയ നിറം. ശല്ക്കങ്ങളുടെ എണ്ണം 18. ഉദര ശല്ക്കങ്ങള്‍ക്ക് വീതി കൂടുതല്‍ ഇല്ല.പല്ലുകള്‍ മേല്താടിയില്‍ മാത്രം.

ഇളകിയ മണ്ണില്‍ അറ്റം കൂര്‍ത്ത വാല്‍ ഉപയോഗിച്ച് തുരന്നിറങ്ങും.ഈര്‍പ്പവും ഇരുട്ടുമുള്ള സ്ഥലങ്ങളിലാണ് കാണപ്പെടാരുള്ളത്‌. മുട്ടയിട്ടു കുഞ്ഞുങ്ങള്‍ ഉണ്ടാകുന്നു.ഉറുമ്പ്‌,ചിതല്‍,പുഴുക്കള്‍,ഉറുമ്പിന്‍ മുട്ട തുടങ്ങിയവയാണ് ആഹാരം. മധ്യ കേരളത്തില്‍ പശ്ചിമ ഘട്ട മലനിരകളുടെ 610 മുതല്‍ 1524 വരെ മീറ്റര്‍ ഉയരമുള്ള സ്ഥലങ്ങളില്‍ കാണപ്പെടുന്നു.

കൊക്കുരുടിപ്പാമ്പ്

ഇംഗ്ലീഷ് പേര് - Beaked Worm Snake.

ശാസ്ത്ര നാമം -Grypotyphlops acutus.

മറ്റു മലയാളം പേരുകള്‍ - ഇല്ല

വലിപ്പം - പരമാവധി 24 inch

ഈ പാമ്പ്‌ അത്ര സാധാരണമല്ല.ശരീരത്തില്‍ നിന്ന് വേര്തിരിച്ചിട്ടില്ലാത്ത തലയുടെ മുന്ഭാഗത്ത് പക്ഷിച്ച്ചുണ്ടിന്റെ ആകൃതിയില്‍ ഒരു നീണ്ട ശല്ക്കം ഉള്ളത് കൊണ്ടാണ് ഇങ്ങനെ ഒരു പേര് കിട്ടിയത്.ശല്‍ക്കങ്ങള്‍ മിനുസമുള്ളവയാണ്.പക്ഷിച്ച്ചുണ്ടിന്റെ ആകൃതിയുള്ള ശല്ക്കത്ത്തിന്റെ അടിയിലാണ് ഈ പാമ്പിന്റെ മൂക്ക്.ശല്ക്കാവൃതമായ കണ്ണുകള്‍ കറുത്ത കുത്തുകള്‍ പോലെ കാണാം.നീളം കുറഞ്ഞ വാലിന്റെ അറ്റം കൂര്‍ത്ത മുള്ളിന്റെ ആകൃതിയിലാണ്.അടിഭാഗത്ത്തിനു വിളറിയ നിറം.ശല്ക്കങ്ങളുടെ എണ്ണം 28 മുതല്‍ 34 വരെ ആകാം.ഉദര ശല്ക്കങ്ങള്‍ക്ക് വീതി കൂടുതല്‍ ഇല്ല.പല്ലുകള്‍ മേല്‍ത്താടിയില്‍ മാത്രം.

കാര്യമായ പഠനങ്ങളൊന്നും ഇതുവരെ ഇതിനെ കുറിച്ചു നടന്നിട്ടില്ല.മണ്ണിര,ചെറു കീടങ്ങള്‍,പുഴുക്കള്‍ തുടങ്ങിയവയാണ് ആഹാരം.തെക്കേ ഏഷ്യയിലെ ഏറ്റവും വലിപ്പമുള്ള കുരുടി വര്‍ഗ്ഗമാണ് ഇത്.

മെലിയന്‍ കവച വാലന്‍

ഇംഗ്ലീഷ് പേര് : Pied-belly Shield Tail
ശാസ്ത്ര നാമം :Melanophidium punctatum
മറ്റു മലയാളം പേരുകള്‍ : ഇല്ല.
വലിപ്പം :  22 inch [പരമാവധി ]

മെലിഞ്ഞു ഉരുണ്ട് മൃദുല ശല്ക്കത്തോട്‌ കൂടിയ ശരീരം.തലയ്ക്കു കഴുത്തിനേക്കാള്‍ വീതി കുറവ്.കണ്ണും വാലും വളരെ ചെറുത്‌.വാല്‍ കുറച്ചൊന്നു പരന്നിട്ടാണ്.വാലിനു മുകളില്‍ ഒരു കവചം - പ്ലേറ്റ് - ഉണ്ട്.ഇളകിയതും ഈര്പ്പമുള്ളതുമായ മണ്ണില്‍ അറ്റം കൂര്‍ത്ത വാല്‍ ഉപയോഗിച്ചു തുരന്നു ഇറങ്ങുന്നതിനുള്ള ഒരു അനുകൂലനം ആണ് ഇത്.
ശല്ക്കങ്ങളുടെ എണ്ണം 15. മണ്ണിരയാണ് ആഹാരം.കാര്യമായ പഠനങ്ങള്‍ നടന്നിട്ടില്ല.പശ്ചിമ ഘട്ട മലനിരകളില്‍ ആണ് കാണപ്പെടാരുള്ളത്.

ചുവപ്പു വയറന്‍ കവച വാലന്‍

ഇന്ഗ്ലീഷ്‌ പേര് :  Walls Shield Tail
ശാസ്ത്ര നാമം :  Brachyophidium rhodogaster
മറ്റു മലയാളം പേരുകള്‍ : ഇല്ല
വലിപ്പം :  210 mm [ 8 in ] പരമാവധി

മിനുസമുള്ള ശല്ക്കങ്ങളും അറ്റം കൂര്‍ത്ത ചെറിയ തലയുമുള്ള ഈ പാമ്പും പശ്ചിമ ഘട്ട മല നിരകളില്‍ ആണ് കാണപ്പെടുന്നത്.തലയെക്കാള്‍ വീതിയുള്ള കഴുത്തും കുഞ്ഞു കണ്ണുകളും ഉള്ള ഇതിന്റെ വയറിനു ചുവപ്പു നിറമാണ്.പുറം ഭാഗം കറുപ്പ് കലര്‍ന്ന തവിട്ടു നിറം.ശല്ക്കങ്ങളുടെ എണ്ണം 15. കല്ലിനടിയിലും വിള്ളലുകളിലും ഒക്കെയാണ് സാധാരണ കാണപ്പെടുന്നത്.മണ്ണിരകള്‍ ആണ് ആഹാരം എന്ന് കരുതപ്പെടുന്നു .കടിക്കാറില്ല.

മുള്ള് വാലന്‍ പാമ്പ്‌

ഇന്ഗ്ലീഷ്‌ പേര് : Perrotetts Shield Tail
ശാസ്ത്ര നാമം : Plectrurus perrotetti
മറ്റു മലയാളം പേരുകള്‍ : ഇല്ല.
വലിപ്പം : 17 inch

മിനുസമുള്ള ശല്ക്കങ്ങളും കൂര്‍ത്ത കുഞ്ഞു തലയും. വാലിന്റെ അറ്റത്ത് ഒന്നിന് മീതെ ഒന്നായി കൂര്‍ത്ത രണ്ടു കുഞ്ഞു മുള്ളുകള്‍ . ചിലപ്പോള്‍ വാലിന്റെ അടിഭാഗത്തിന് തീ നിറം ആയിരിക്കും.ഓരോ ശല്ക്കത്ത്തിനു നടുവിലും ചുവപ്പോ മഞ്ഞയോ നിറമുള്ള കുത്തുകള്‍ കണ്ടേക്കാം. ശല്ക്കങ്ങളുടെ എണ്ണം 15.

കൂടുതല്‍ സമയവും മണ്ണിനടിയില്‍ കഴിയുന്ന ഇവ രാത്രിയിലും നല്ല മഴ പെയ്യുന്ന സമയത്തുമേ സാധാരണ പുറത്ത് വരാറുള്ളൂ.ജൂലൈ ,ആഗസ്റ്റ്‌ മാസങ്ങളില്‍ ഇതിന്റെ പെണ്പാമ്പ്‌ മൂന്നു മുതല്‍ ആറു വരെ കുഞ്ഞുങ്ങളെ പ്രസവിക്കും.പിടിച്ചാല്‍ കടിക്കാറില്ല.പക്ഷെ കാഷ്ട്ടിക്കുകയോ വാള്‍ കൊണ്ട് കുത്തുന്നത് പോലെ നടിക്കുകയോ ചെയ്തേക്കാം . പശ്ചിമഘട്ട മലനിരകളില്‍ മാത്രം കാണപ്പെടുന്നു .

എലിയട്ട് കവചവാലന്‍

ഇംഗ്ലീഷ്‌പേര് :   Elliot's Shieldtail
ശാസ്ത്രനാമം :  Uropeltis ellioti
മറ്റു മലയാളം പേരുകള്‍ : ഇല്ല
വലിപ്പം :  10 inch
മൃദുല ശല്‍ക്കങ്ങള്‍ ഉള്ള മെലിഞ്ഞ ശരീരം. ചെരിച്ചു മുറിച്ച പോലെ തോന്നിക്കുന്ന ചെറിയ വാല്‍. കൂര്‍ത്ത മൂക്ക്. തലയ്ക്കു കഴുത്തിനെക്കാള്‍ വീതി കുറവാണ്. പുറംഭാഗത്തിനു തിളക്കമുള്ള ഇരുണ്ട നിറമാണ്. ചിലപ്പോള്‍ ശരീരത്തില്‍ മഞ്ഞക്കുത്തുകള്‍ കണ്ടേക്കാം. അടിഭാഗത്ത്‌ ഈ കുത്തുകള്‍ക്ക്വലിപ്പം കൂടുതല്‍ ആയിരിക്കും. കഴുത്തിന്റെയും വാലിന്റെയും ഇരുവശത്തും മഞ്ഞ വരകള്‍.

ഇരതേടല്‍ രാത്രിയിലാണ്.ആക്രമണകാരിയല്ല.ഇളകിയ മണ്ണ് തുരന്നിറങ്ങുന്ന സ്വഭാവം .ആഹാരം മണ്ണിര. കുഞ്ഞുങ്ങളെ പ്രസവിക്കുന്നു

പെരിയാര്‍ കവചവാലന്‍

ഇംഗ്ലീഷ്‌ പേര് : Periyar Shieldtail

ശാസ്ത്രനാമം : Uropeltis arcticeps madurensis

മറ്റു മലയാളം പേരുകള്‍ : ഇല്ല

വലിപ്പം : 15 inch

മിനുസമുള്ള ശല്ക്കങ്ങളും മെലിഞ്ഞ ശരീരവും.മുറിഞ്ഞു പോയത് പോലെയുള്ള വാല്‍. തല കഴുത്തിനേക്കാള്‍ ചെറുത്‌. കൂര്‍ത്ത മൂക്ക്.

ശരീരത്തിന്റെ പുരംഭാഗത്ത്‌ തിളങ്ങുന്ന കറുപ്പോ തവിട്ടോ നിറം.ശല്ക്കങ്ങളുടെ അതിരുകളിലും കഴുത്തിന്റെ രണ്ടു വശങ്ങളിലും മഞ്ഞ നിറം. ഉദരം കറുത്ത പുള്ളിക്കുത്തുകള്‍ നിറഞ്ഞ പീതവര്‍ണ്ണം .

പിടിച്ചാല്‍ കടിക്കാറില്ല. ഇളകിയ മണ്ണില്‍ തുരന്നിറങ്ങും. ആഹാരം മണ്ണിര. കുഞ്ഞുങ്ങളെ പ്രസവിക്കുന്നു.

വിഷം   : ഇല്ല

അഷംബു കവചവാലന്‍

ഇംഗ്ലീഷ്‌ പേര് : Ashambu Shieldtail

ശാസ്ത്രനാമം : Uropeltis liura

മറ്റു മലയാളം പേരുകള്‍ : ഇല്ല

വലിപ്പം : 12-13 inch

മിനുസമുള്ള തിളങ്ങുന്ന ശല്‍ക്കങ്ങള്‍. ഉരുണ്ട ശരീരം.കൂര്‍ത്ത മൂക്ക്. കഴുത്തിനെക്കാള്‍ വീതി കുറഞ്ഞ തല.

ശരീരത്തിന് തവിട്ടു നിറം. ശരീരത്തില്‍ മഞ്ഞയും കറുപ്പും കുത്തുകള്‍ കാണാറുണ്ട്‌. ഉദരം മഞ്ഞ വരകളോടെ കറുപ്പ് നിറം.നിറത്തിന് മാറ്റം കാണാറുണ്ട്‌.

രാത്രിയില്‍ ഇര തേടുന്ന സ്വഭാവം. ആക്രമണകാരിയല്ല. ഇളകിയ മണ്ണില്‍ തുരന്നിറങ്ങും.ആഹാരം മണ്ണിര. കുഞ്ഞുങ്ങളെ പ്രസവിക്കുന്നു.

കടപ്പാട് : unnimozhi.blogspot.in

അവസാനം പരിഷ്കരിച്ചത് : 7/19/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate