অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

കുട്ടി പൊലീസ്

സ്റ്റുഡന്‍റ് പൊലീസ് കേഡറ്റ്

ജാഗരൂകവും സമാധാനപരവും വികസനോന്മുഖവുമായ ഒരു സമൂഹസൃഷ്ടിക്കായി അച്ചടക്കം, ഉത്തരവാദിത്ത ബോധം, സാമൂഹിക പ്രതിബദ്ധത, സേവന സന്നദ്ധത തുടങ്ങിയ ലക്ഷ്യങ്ങള്‍ മുന്‍നിര്‍ത്തി പ്രവര്‍ത്തിക്കുന്ന ഒരു വിദ്യാര്‍ഥി കര്‍മസേനയാണ് സ്റ്റുഡന്‍റ് പൊലീസ് കേഡറ്റ്.
ഹൈസ്കൂള്‍ വിങ് സ്റ്റുഡന്‍റ് പൊലീസ് കേഡറ്റ് പദ്ധതിയെ ഹൈസ്കൂള്‍ വിങ് എന്നും ഹയര്‍സെക്കന്‍ഡറി തലത്തില്‍ നടപ്പാക്കുന്ന പദ്ധതിയെ സ്റ്റുഡന്‍റ് പൊലീസ് കേഡറ്റ് എന്നും നാമകരണം ചെയ്തിരിക്കുന്നു. പരിശീലനത്തിന്‍െറ വിജയകരമായ ഓരോവര്‍ഷം പൂര്‍ത്തിയാക്കുമ്പോഴും ഓരോ സ്റ്റാര്‍ നല്‍കി സ്ഥാനക്കയറ്റം നല്‍കുന്നതാണ്.

സ്റ്റുഡന്‍റ് പൊലീസ് കേഡറ്റ് എന്തിന്?

കുട്ടികള്‍ക്ക് ലക്ഷ്യബോധവും ഗുണമേന്മയുമുള്ള വിദ്യാഭ്യാസം നല്‍കി അവരുടെ കര്‍മശേഷി വികസിപ്പിച്ച് സാമൂഹിക വികസനത്തിന് ഉപയുക്തമാക്കുന്നതില്‍ രക്ഷകര്‍ത്താക്കള്‍ക്കും, സര്‍ക്കാറിനും ഒരുപോലെ ബാധ്യതയുണ്ട്. വൈജ്ഞാനിക മേഖലയില്‍ ഉണ്ടായിക്കൊണ്ടിരിക്കുന്ന സ്ഫോടനാത്മകമായ പരിവര്‍ത്തനങ്ങളും സാങ്കേതിക വിദ്യയിലുണ്ടാകുന്ന വികാസവും വിദ്യാഭ്യാസത്തിന്‍െറ സാധ്യതയും സാമൂഹിക പ്രസക്തിയും വര്‍ധിപ്പിച്ചിട്ടുണ്ട്. പൊതുവെ മികവുള്ള കേരളത്തിലെ വിദ്യാര്‍ഥിസമൂഹത്തെ കൂടുതല്‍ ചടുലമാക്കാന്‍ ഈ മാറ്റങ്ങള്‍ വഴിതെളിയിച്ചിട്ടുണ്ട്. എന്നാല്‍ സൈദ്ധാന്തികമായ അറിവ് നേടിയതു കൊണ്ട് മാത്രം സാമൂഹികബോധമുള്ള പൗരന്മാരായി വിദ്യാര്‍ഥികള്‍ വളര്‍ന്നു കൊള്ളണമെന്നില്ല. പ്രത്യേകിച്ചും സ്വാര്‍ഥ താല്‍പര്യങ്ങളില്‍ അധിഷ്ഠിതമായ കമ്പോള സംസ്കാരം നമ്മുടെ സമൂഹത്തെ പൊതുവിലും യുവജനങ്ങളെ പ്രത്യേകിച്ചും കീഴടക്കിക്കൊണ്ടിരിക്കുന്ന ഈ കാലത്ത്. പാഠ്യപദ്ധതിയോടൊപ്പം പൗരബോധവും ലക്ഷ്യബോധവും സാമൂഹിക പ്രതിബദ്ധതയും സേവന സന്നദ്ധതയുമുള്ള ഒരു സമൂഹമായി വിദ്യാര്‍ഥികളെ വളര്‍ത്തിയെടുക്കണമെങ്കില്‍ ബോധപൂര്‍വമായ പരിശ്രമം ആവശ്യമാണ്.
തങ്ങളുടെ അവകാശങ്ങളെയും കടമകളെയും കുറിച്ച് ബോധമുള്ളതും സാമൂഹിക തിന്മകള്‍ക്കെതിരെ പ്രതികരിക്കാന്‍ ശേഷിയുള്ളതും നിയമവാഴ്ചയെ ബഹുമാനിക്കുന്ന ജനാധിപത്യ ബോധമുള്ളതുമായ ഒരു സമൂഹത്തെ വാര്‍ത്തെടുക്കുന്നതിന് വിദ്യാര്‍ഥികളുടെ കര്‍മശേഷിയെ ഉപയോഗപ്പെടുത്തുകയെന്നതാണ് സ്റ്റുഡന്‍റ് പൊലീസ് കേഡറ്റ് ഉദ്ദേശിക്കുന്നത്. സംസ്ഥാനത്ത് വിദ്യാഭ്യാസ വകുപ്പും ആഭ്യന്തരവകുപ്പും ഒത്തുചേര്‍ന്ന് നടപ്പാക്കുന്ന ഈ നൂതന പഠനാനുബന്ധപദ്ധതി നിയമ പരിപാലനത്തിലും ആഭ്യന്തര സുരക്ഷാ രംഗത്തും കേരളം സൃഷ്ടിക്കുന്ന ഒരു മാതൃകയായിരിക്കും.

ലക്ഷ്യങ്ങള്‍

1. നിയമത്തെ അംഗീകരിക്കുകയും അനുസരിക്കുകയും ചെയ്യുന്ന ഒരു സമൂഹത്തെ സൃഷ്ടിക്കുക.
2. വിദ്യാര്‍ഥികളില്‍ പൗരബോധം, സമത്വബോധം, മതേതര വീക്ഷണം, അന്വേഷണ ത്വര, നിരീക്ഷണ പാടവം, നേതൃശേഷി, സാമൂഹിക മനോഭാവം തുടങ്ങിയ മൂല്യങ്ങള്‍ വളര്‍ത്തുക.
3. വിദ്യാര്‍ഥികളില്‍ സാമൂഹിക പ്രതിബദ്ധതയും സേവനസന്നദ്ധതയും സഹജീവി സ്നേഹവും വളര്‍ത്തുക.
4. സാമൂഹിക തിന്മകളായ തീവ്രവാദം, വിഘടന വാദം, വര്‍ഗീയത, ജാതീയത, ലഹരിഭ്രമം തുടങ്ങിയവക്കെതിരെ പ്രതികരിക്കാനും പ്രവര്‍ത്തിക്കാനും വിദ്യാര്‍ഥികളെ സജ്ജരാക്കുക.
5. ആഭ്യന്തര സുരക്ഷ, കുറ്റകൃത്യ നിവാരണം, ക്രമസമാധാന പാലനം, ഗതാഗത നിയന്ത്രണം, സാമൂഹിക സേവനം തുടങ്ങിയ സേവന പ്രവര്‍ത്തനങ്ങളില്‍ പൊലീസ് സേനയോടൊപ്പം പ്രവര്‍ത്തിക്കുന്നതിന് വിദ്യാര്‍ഥികളെ പ്രാപ്തരാക്കുക.
6. എന്‍.സി.സി, എന്‍.എസ്.എസ് തുടങ്ങിയ സന്നദ്ധ സംഘടനകളെപ്പോലെ സ്റ്റുഡന്‍റ് പൊലീസ് കേഡറ്റിനെ ഒരു സ്വതന്ത്ര സാമൂഹിക സേവനവിഭാഗമായി വളര്‍ത്തുക.
7. വിദ്യാര്‍ഥികളില്‍ പ്രകൃതി സ്നേഹം, പരിസ്ഥിതി സംരക്ഷണ ബോധം, പ്രകൃതി ദുരന്തങ്ങള്‍ക്കെതിരെ പ്രവര്‍ത്തിക്കാനുള്ള സന്നദ്ധത എന്നിവ വളര്‍ത്തുക.
8. സാമൂഹിക പ്രശ്നങ്ങളില്‍ ഇടപെടാനും ദുരന്തഘട്ടങ്ങളില്‍ ഉണര്‍ന്ന് പ്രവര്‍ത്തിക്കാനുമുള്ള മനോഭാവം വിദ്യാര്‍ഥികളില്‍ വളര്‍ത്തുക.
9. സ്വഭാവ ശുദ്ധിയിലും പെരുമാറ്റ ശീലത്തിലും മൂല്യങ്ങള്‍ ഉയര്‍ത്തിപ്പിടിക്കുന്നതിലും ഒരു മാതൃകാ വിദ്യാര്‍ഥി സമൂഹത്തെ വാര്‍ത്തെടുക്കുക.
10. സമൂഹത്തിന്‍െറ സര്‍വതോമുഖമായ പുരോഗതിക്കുവേണ്ടി നിസ്വാര്‍ഥമായി പ്രവര്‍ത്തിക്കുന്ന ഒരു യുവസമൂഹത്തെ സൃഷ്ടിക്കുക.

കുട്ടിപ്പൊലീസ്

രാഷ്ട്രത്തിന്‍െറ അഭിനന്ദനവും അംഗീകാരവും ഏറ്റുവാങ്ങിയാണ് രാഷ്ട്രനിര്‍മാണ പ്രക്രിയക്ക് ഊര്‍ജവും ആവേശവും പുതിയ പ്രവര്‍ത്തന മാതൃകകളും നല്‍കിയ സ്റ്റുഡന്‍റ് പൊലീസ് കേഡറ്റ് പദ്ധതി മുന്നോട്ട് യാത്രതുടരുന്നത്. ഒരിക്കല്‍കൂടി നമ്മുടെ സംസ്ഥാനം രാഷ്ട്രത്തിന് മാതൃകയാവുന്ന പദ്ധതിയാണ് എസ്.പി.സി. കേരള പൊലീസിന്‍െറ ദീര്‍ഘവീക്ഷണത്തോടെയുള്ള പദ്ധതി കുട്ടികളില്‍ സാമൂഹിക അവബോധം വളര്‍ത്തുകയും പൗരബോധവും  പ്രതിബദ്ധതയുള്ള വിദ്യാര്‍ഥികളെ വാര്‍ത്തെടുക്കുന്നതിനുമാണ്.
കേരളത്തിന്‍െറ പൊതുസമൂഹത്തില്‍ ഇന്ന് എസ്.പി.സി സജീവമാണ്. ഇവര്‍ ഏറ്റെടുത്ത് നടത്തുന്ന പ്രവര്‍ത്തനങ്ങള്‍ മാതൃകാപരവും വേറിട്ടതുമാണ്. ഹെല്‍മറ്റില്ലാതെയും സീറ്റ്ബെല്‍റ്റ് ധരിക്കാതെയും യാത്ര ചെയ്യുന്നവരെ കൈകാട്ടി നിര്‍ത്തി ബോധവത്കരണവും പ്രതിജ്ഞാകാര്‍ഡുകളും ശുഭയാത്രക്ക് റോസാപ്പൂക്കളും നിറഞ്ഞപുഞ്ചിരിയും നല്‍കുന്ന ഈ സന്നദ്ധ സംഘം ഇന്ന് നമ്മുടെ ഗ്രാമീണ-നഗര നിരത്തുകളിലും കവലകളിലും സജീവമാണ്.
ആഭ്യന്തര സുരക്ഷാരംഗത്ത് വിദ്യാര്‍ഥികളുടെ പങ്കാളിത്തം ഉറപ്പുവരുത്തുന്ന ഈ പദ്ധതിയില്‍ കുട്ടികള്‍ ആവേശത്തോടെയാണ് ചേരുന്നത്. നിയമത്തിന്‍െറ മാനുഷിക മുഖം എസ്.പി.സിയിലൂടെ കൂടുതല്‍ ജനകീയമാവുന്നു.
ദൈവത്തിന്‍െറ സ്വന്തംനാടിന്‍െറ ഈ നന്മയുടെ കൂട്ടായ്മക്ക് പൊതുസമൂഹത്തിന്‍െറ ഉറച്ച പിന്തുണയാണ് ലഭിക്കുന്നത്. പ്രധാനമന്ത്രി മന്‍മോഹന്‍ സിങ്, മുന്‍ രാഷ്ട്രപതി എ.പി.ജെ. അബ്ദുല്‍കലാം തുടങ്ങി സാമൂഹിക-രാഷ്ട്രീയ രംഗത്തെ ഉന്നതരുടെ അനുമോദനങ്ങളും പിന്തുണയും എസ്.പി.സിയെ തേടിയെത്തി.
മറ്റു സംസ്ഥാനങ്ങള്‍ കേരളത്തെ മാതൃകയാക്കാനുള്ള ശ്രമത്തിലാണ്. എസ്.പി.സിയെ കുറിച്ച് പഠിക്കാനും അറിയാനും മറ്റു സംസ്ഥാന പ്രതിനിധികള്‍ കേരളത്തിലെത്തിക്കൊണ്ടിരിക്കുന്നു.
മികച്ച പ്രവര്‍ത്തനങ്ങള്‍ കാഴ്ചവെക്കുന്ന കേഡറ്റിന് എസ്.എസ്.എല്‍.സി പരീക്ഷക്ക് ഗ്രേസ് മാര്‍ക്ക് ലഭിക്കുമെന്നതും വിദ്യാര്‍ഥികളെയും രക്ഷിതാക്കളെയും അധ്യാപകരെയും ഇതിലേക്ക് ആകര്‍ഷിക്കുന്നു. വിദ്യാലയങ്ങളിലെ സേവനസന്നദ്ധതയുടെ പുതിയ മുഖമാവുകയാണ് എസ്.പി.സി.

പൊലീസ്-സ്റ്റുഡന്‍റ് ലെയ്സന്‍ ഓഫിസര്‍

കലാലയവും പൊലീസും തമ്മിലുള്ള ബന്ധം നിലനിര്‍ത്തുന്നതിന് കുറഞ്ഞത് ഇന്‍സ്പെക്ടര്‍ റാങ്കിലുള്ള ഒരു പൊലീസ് ഉദ്യോഗസ്ഥനെ ലെയ്സന്‍ ഓഫിസറായി നിയമിക്കും. സ്റ്റുഡന്‍റ് പൊലീസ് കേഡറ്റ് പദ്ധതിയുടെ നടത്തിപ്പില്‍ പ്രധാനപങ്ക് ഇദ്ദേഹം വഹിക്കേണ്ടതാണ്. കേഡറ്റുകള്‍ ഉള്ള യൂനിറ്റുകളില്‍ പൊലീസിനെ പരിശീലന വേളയില്‍ ഇദ്ദേഹം നിയോഗിക്കേണ്ടതാണ്.

ചുമതലകളും പ്രവര്‍ത്തനങ്ങളും

1. സ്റ്റുഡന്‍റ് പൊലീസ് കേഡറ്റുകള്‍ക്കായി സംഘടിപ്പിക്കുന്ന കായിക പരിപാടികള്‍, ഡ്രില്‍, പരേഡ്, ക്യാമ്പുകള്‍, പഠന ക്ളാസുകള്‍, യാത്രകള്‍ എന്നിവയില്‍ സജീവമായി പങ്കെടുക്കുക.
2. വിവിധ സര്‍ക്കാര്‍ ഇതര സംഘടനകളുമായി ചേര്‍ന്ന് സഹപാഠികള്‍ക്കായി നിയമ സാക്ഷരത ക്ളാസുകള്‍ക്ക് നേതൃത്വം നല്‍കുക.
3. മയക്കുമരുന്നിനും തീവ്രവാദത്തിനും മറ്റു സാമൂഹിക വിരുദ്ധപ്രവര്‍ത്തനങ്ങള്‍ക്കുമെതിരെ കൂട്ടായ്മ, ലഘുനാടകങ്ങള്‍, മോണോ ആക്ടുകള്‍, ഉപന്യാസ മത്സരം, ഫിലിംഷോ എന്നിവ സംഘടിപ്പിക്കുക.
4. ക്ളാസ് മുറിക്കകത്തും പുറത്തുമായി നടക്കുന്ന അച്ചടക്ക രാഹിത്യം, അനാരോഗ്യ പ്രവണത എന്നിവ മനസ്സിലാക്കി അതത് ക്ളാസ് ടീച്ചര്‍മാരുടെയും പ്രധാനാധ്യാപകന്‍െറയും ശ്രദ്ധയില്‍ കൊണ്ടുവരുക.
5. രാജ്യസ്നേഹം ജീവിത വ്രതമാക്കുകയും രാജ്യത്തിന്‍െറ വികസനത്തില്‍ അതീവ തല്‍പരരാവുകയും ചെയ്യുക. ദേശീയ ഉത്സവങ്ങള്‍ ആഘോഷിക്കുകയും ദേശീയ പ്രതീകങ്ങളെ ആദരിക്കുകയും ദേശത്തിന്‍െറ വളര്‍ച്ചയില്‍ അഭിമാനം കൊള്ളുകയും ചെയ്യുക.
6. നിയമ വിധേയത്വം ജീവിതചര്യയാക്കുകയും അതിനായി സഹപാഠികളെയും കുടുംബാംഗങ്ങളെയും പ്രേരിപ്പിക്കുകയും ചെയ്യുക.
7. ക്രമസമാധാന പാലനത്തിനും കുറ്റകൃത്യ നിവാരണത്തിനും പൊലീസ് സേനക്കൊപ്പം നിന്ന് പ്രവര്‍ത്തിക്കാന്‍ യുവതലമുറയുടെ നെറ്റ്വര്‍ക് രൂപവത്കരിക്കുക.
8. ക്രൈം സ്റ്റോപ്പര്‍, പൊലീസ് ഹെല്‍പ് ലൈന്‍ തുടങ്ങിയ ടെലിഫോണ്‍ നമ്പറുകള്‍ വിദ്യാര്‍ഥികളുടെ ഇടയില്‍ പ്രചരിപ്പിക്കുകയും കുറ്റകൃത്യങ്ങള്‍ തടയുന്നതിനുള്ള വിവരങ്ങള്‍ പൊലീസിന് കൈമാറുവാന്‍ കുടുംബാംഗങ്ങളെയും സുഹൃത്തുക്കളെയും പ്രേരിപ്പിക്കുകയും ചെയ്യുക.
9. പൊലീസും പൊതുസമൂഹവും തമ്മിലുള്ള അകല്‍ച്ച ലഘൂകരിക്കുക.
10. പൊലീസ് സ്റ്റേഷന്‍, കോടതി, ജയില്‍ നടപടികള്‍ എന്നിവ മനസ്സിലാക്കുന്നതിനായി സന്ദര്‍ശനം നടത്തുകയും പ്രവര്‍ത്തന റിപ്പോര്‍ട്ട് തയാറാക്കുകയും ചെയ്യുക.
11. വ്യക്തിത്വ വികസനത്തിനും നേതൃശേഷി വികസിപ്പിക്കുന്നതിനും പ്രത്യേക പരിശീലന ക്ളാസുകള്‍ സംഘടിപ്പിക്കുക.
ഒരു വിദ്യാര്‍ഥിയെ സ്റ്റുഡന്‍റ് പൊലീസ് കേഡറ്റിലേക്ക് തെരഞ്ഞെടുക്കാന്‍ വേണ്ട യോഗ്യതകള്‍
1. തൊട്ടുമുമ്പുള്ള വാര്‍ഷിക പരീക്ഷയില്‍ ചുരുങ്ങിയത് ഡി പ്ളസ് ഗ്രേഡ് (50 ശതമാനം) നേടിയിരിക്കണം.
2. നിശ്ചിത ശാരീരിക യോഗ്യതകള്‍ ഉണ്ടായിരിക്കുകയും വൈദ്യ പരിശോധനയില്‍ അയോഗ്യത കല്‍പിക്കാതിരിക്കുകയും ചെയ്യുക.
3. പ്രധാനാധ്യാപകന്‍ നല്‍കുന്ന സ്വഭാവ സര്‍ട്ടിഫിക്കറ്റും രക്ഷാകര്‍ത്താവിന്‍െറ സമ്മതപത്രവും ഉണ്ടാകണം.

നാള്‍വഴികളിലൂടെ

2006ല്‍ കൊച്ചി സിറ്റി പൊലീസിന്‍െറ ‘ജനകീയം’ പദ്ധതിയുടെ ഭാഗമായാണ് കുട്ടിപ്പൊലീസ് എന്ന ആശയത്തിന് തുടക്കം. സാമൂഹിക പങ്കാളിത്തത്തോടെയുള്ള ഈ പദ്ധതിയില്‍ 30ഓളം സ്കൂളുകളില്‍ നിന്നായി 400 വിദ്യാര്‍ഥികള്‍ പങ്കെടുത്തിരുന്നു. ഉന്നതപൊലീസ് ഉദ്യോഗസ്ഥരുമായി ജനകീയ വിഷയങ്ങളില്‍ ചര്‍ച്ചയും സംവാദവും നടത്തി  പൊലീസ് സ്റ്റേഷനുകള്‍ സന്ദര്‍ശിക്കുകയും കൂടിക്കാഴ്ച നടത്തുകയും ചെയ്തു കുട്ടികള്‍. ഈ ചര്‍ച്ചകളില്‍ നിന്നാണ് വിദ്യാര്‍ഥികളുടെ ഇത്തരത്തിലുള്ള സ്ഥിരമായ ഒരു വേദിയെകുറിച്ചുള്ള ആശയത്തിന് തുടക്കമാവുന്നത്. ഇതിന്‍െറ അടിസ്ഥാനത്തില്‍ പൈലറ്റ് സ്റ്റുഡന്‍റ് പൊലീസ് പദ്ധതി എറണാകുളം റൂറല്‍ ജില്ലയിലെ കുറച്ച് സ്കൂളുകളിലും പിന്നീട് ആലപ്പുഴ ജില്ലയിലെ സ്കൂളുകളിലും പരീക്ഷണാടിസ്ഥാനത്തില്‍ തുടങ്ങി. വളരെ കുറഞ്ഞ സമയത്തിനുള്ളില്‍തന്നെ പദ്ധതിക്ക് വമ്പിച്ച പ്രതികരണവും പിന്തുണയും വിദ്യാര്‍ഥി സമൂഹത്തില്‍നിന്ന് ലഭിച്ചു.
തുടര്‍ന്ന് 2010 ജനുവരിയില്‍ സംസ്ഥാന സ്കൂള്‍ യുവജനോത്സവ മത്സരം നടന്ന കോഴിക്കോട്ട് ജനങ്ങളെയും കാണികളെയും നിയന്ത്രിച്ച് ‘കുട്ടിപ്പൊലീസ്’ മാതൃകാ പ്രവര്‍ത്തനം കാഴ്ചവെച്ചു. ഇത് വന്‍ വിജയതിനെ തുടര്‍ന്ന് അന്നത്തെ ഡി.ജി.പി ജേക്കബ് പുന്നൂസിന്‍െറ നേതൃത്വത്തില്‍ സംസ്ഥാനതലത്തില്‍തന്നെ എസ്.പി.സി പദ്ധതി റിപ്പോര്‍ട്ട് ഗവണ്‍മെന്‍റിന് സമര്‍പ്പിച്ചു. ഗവണ്‍മെന്‍റ് ഇത് അംഗീകരിക്കുകയും 2010ല്‍ തന്നെ ഇത് സംസ്ഥാനത്തെ സ്കൂളുകളില്‍ നടപ്പാക്കുന്നതുമായി ബന്ധപ്പെട്ട് സര്‍ക്കാര്‍ ഉത്തരവിറക്കുകയും ചെയ്തു. സംസ്ഥാനതല ഉപദേശകസമിതിയുടെ ചെയര്‍മാനായി ഡി.ജി.പി ജേക്കബ് പുന്നൂസ്, ഉന്നത ഉദ്യോഗസ്ഥര്‍ അംഗങ്ങള്‍, പി. വിജയന്‍ ഐ.പി.എസ് സംസ്ഥാന നോഡല്‍ ഓഫിസര്‍ എന്നിങ്ങനെ സമിതി നിലവില്‍ വന്നു.
2010 ആഗസ്റ്റ് രണ്ടിന് 127 സ്കൂളുകളില്‍ സംസ്ഥാനത്ത് എസ്.പി.സി പദ്ധതിക്ക് തുടക്കമായി. തുടര്‍ന്ന് മറ്റു വിദ്യാലയങ്ങളിലേക്കും ഇത് വ്യാപിച്ചു.

 

പരിശീലനം

പദ്ധതിയുടെ ഉദ്ദേശ്യങ്ങള്‍ സാക്ഷാത്കരിക്കുന്നതിനും കേഡറ്റുകളുടെ ചുമതലകള്‍ നിര്‍വഹിക്കുന്നതിനും പര്യാപ്തമായ പരിശീലന പരിപാടികളാണ് സംഘടിപ്പിക്കേണ്ടത്.

കായിക പരിശീലനം

(Outdoor classes)
മനസ്സിനും ശരീരത്തിനും അച്ചടക്കം നല്‍കുന്നതിന് ഏറ്റെടുക്കുവാന്‍ പോകുന്ന പ്രവര്‍ത്തനങ്ങള്‍ ധീരതയോടും കാര്യക്ഷമതയോടും ചെയ്തു തീര്‍ക്കുവാന്‍ പര്യാപ്തമാക്കുക എന്നുള്ളതാണ് കായിക പരിശീലനത്തിന്‍െറ ലക്ഷ്യം. അവധിക്കാല ക്യാമ്പുകള്‍ കൂടാതെ വര്‍ഷത്തില്‍ 60 മണിക്കൂര്‍ കായിക പരിശീലനത്തിനായി മാറ്റി വെക്കണം. ആഴ്ചയില്‍ ഒരു ദിവസമെങ്കിലും കായിക പരിശീലനത്തിനായി മാറ്റിവെക്കണം. അതില്‍ 45 മിനിറ്റ് പി.ടിയും (Physical Training) 45 മിനിറ്റ് പരേഡിനായും മാറ്റി വെക്കണം. 10 മിനിറ്റ് വിശ്രമം ആവശ്യമാണ്. സമയത്തിന്‍െറ ലഭ്യതക്കനുസരിച്ച് കേഡറ്റുകള്‍ക്ക് ഗെയിംസിനുള്ള അവസരം കൊടുക്കേണ്ടതാണ്.
മാസത്തില്‍ ഒരു തവണ (രണ്ടാം ശനിയാഴ്ചയോ അവധി ദിവസങ്ങളിലോ) റൂട്ട് മാര്‍ച്ച്/ക്രോസ് കണ്‍ട്രി സംഘടിപ്പിക്കണം.

പഠന ക്ളാസുകള്‍

(Indoor Classes)
പൊലീസ് അനുബന്ധ വിഷയങ്ങള്‍, നിയമ കാര്യങ്ങള്‍, ഭരണഘടനാ തത്ത്വങ്ങള്‍, ജനകീയ പൊലീസ് സംവിധാനം, ദേശീയ പ്രസ്ഥാനം, വ്യക്തിത്വ വികസന സംബന്ധമായ വിഷയങ്ങള്‍ എന്നിവയെകുറിച്ച് കേഡറ്റുകളില്‍ അവഗാഹം ഉണ്ടാക്കുകയും കേഡറ്റുകളെ കര്‍ത്തവ്യനിരതമായ ആത്മ വിശ്വാസമുള്ള പൗരന്മാരായി ഉയര്‍ത്തുകയും ചെയ്യുക എന്നുള്ളതാണ് പഠന ക്ളാസുകളുടെ ഉദ്ദേശ്യം. അവധിക്കാല ക്ളാസുകള്‍ക്ക് പുറമെ വര്‍ഷത്തില്‍ 40 മണിക്കൂര്‍ പഠന ക്ളാസുകള്‍ക്കായി മാറ്റി വെക്കണം. മാസത്തില്‍ ഒരു ദിവസം റൂട്ട് മാര്‍ച്ച്/ക്രോസ് കണ്‍ട്രിക്ക് ശേഷം മൂന്ന് മണിക്കൂര്‍ പഠന ക്ളാസുകള്‍ക്ക് മാറ്റി വെക്കണം. കൂടാതെ വര്‍ഷത്തില്‍ 10 മണിക്കൂര്‍ മറ്റു സമയങ്ങളിലായി ക്ളാസ് സംഘടിപ്പിക്കണം. പഠനക്ളാസ് വിരസമാകാതെ നോക്കേണ്ടതും സാധിക്കുമെങ്കില്‍ മരത്തിന്‍െറ ചുവട്ടില്‍ വിദഗ്ധരെ പങ്കെടുപ്പിച്ചും വേണം നടത്തേണ്ടത്. കേഡറ്റ് കേന്ദ്രീകൃത പഠന ക്ളാസുകള്‍ക്ക് പ്രാധാന്യം നല്‍കണം.

പ്രായോഗിക പരിശീലനം

(Practical Training)

നിയമ നിര്‍മാണം, നിയമ പരിശീലനം, നീതി നിര്‍വഹണം എന്നിവ നടപ്പിലാക്കുന്ന കേന്ദ്രങ്ങള്‍, ചരിത്രപരവും സാംസ്കാരികവും ശാസ്ത്രപരവും ദേശീയവുമായി പ്രാധാന്യമുള്ള സ്ഥലങ്ങള്‍ എന്നിവ സന്ദര്‍ശിച്ച് അവയുടെ പ്രവര്‍ത്തനത്തെയും പ്രാധാന്യത്തെയും കുറിച്ച് അവബോധം സൃഷ്ടിക്കുകയും പ്രസ്തുത സന്ദര്‍ശനത്തെ കുറിച്ചുള്ള കേഡറ്റിന്‍െറ നിരീക്ഷണവും കണ്ടെത്തലുകളും എഴുതി സമര്‍പ്പിക്കേണ്ടതുമാണ്.
സഹപാഠികള്‍ക്കായി നിയമ കുറ്റകൃത്യ നിവാരണ ബോധവത്കരണ ക്ളാസുകള്‍ സംഘടിപ്പിക്കുക, ആതുരസേവനത്തില്‍ പങ്കാളികളാക്കുക, സ്കൂള്‍ കലോത്സവങ്ങളിലും മറ്റു വിദ്യാഭ്യാസ മേഖലകളിലും സന്നദ്ധസേവനം അനുഷ്ഠിക്കുകയും അവയുടെ ക്രമസമാധാന ട്രാഫിക് നിയന്ത്രണ ചുമതലകള്‍ ഏറ്റെടുക്കുകയും ചെയ്യേണ്ടതാണ്. ഇവ സി.പി.ഒ ലെയ്സന്‍ ഓഫിസറുടെ സഹായത്തോടെ വിദ്യാലയങ്ങളിലെ സമയ ലഭ്യതയനുസരിച്ച് നടപ്പാക്കേണ്ടതാണ്.

അവസാനം പരിഷ്കരിച്ചത് : 7/11/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate