ന്യൂജനറേഷന്‍ എന്‍ജിനീയറിങ് കോഴ്സുകള്‍

എന്‍ജിനീയറിങ്ങിലെ സാധ്യതകള്‍ അനന്തമാണെങ്കിലും എല്ലാവര്‍ക്കും എന്‍ജിനീയറാകാന്‍ സാധിക്കില്ല. എന്‍ജിനീയറിങ് അഭിരുചിയും ലോജിക്കല്‍ സ്‌കില്ലും കുട്ടിക്കുണ്ടോ എന്ന് മാതാപിതാക്കളും കുട്ടികള്‍ സ്വയവും പരിശോധിച്ച് ഉറപ്പിച്ചശേഷമേ എന്‍ജിനീയറാകാന്‍ ഇറങ്ങിപ്പുറപ്പെടാവൂ.

കണക്കിലും ഫിസിക്‌സിലും മികവുള്ള വിദ്യാര്‍ഥികള്‍ക്കാണ് എന്‍ജിനീയറിങ് ഇണങ്ങുക. സിവില്‍ എന്‍ജിനീയറിങ്ങിന് ചേരുന്ന കുട്ടിക്ക് ഡ്രോയിങ് സ്‌കില്‍ ഉണ്ടായിരിക്കണം. ആര്‍ക്കിടെക്ചറിന് ചേരുന്നവര്‍ക്ക് ഡ്രോയിങ് സ്‌കില്ലും ക്രിയേറ്റിവിറ്റിയും വേണം.

എന്‍ജിനീയറിങ് എന്നാല്‍ സിവില്‍, മെക്കാനിക്കല്‍, ഇലക്ട്രിക്കല്‍- ഇതായിരുന്നു പഴയ സങ്കല്പം. കോഴ്സുകളുടെ കോലവും രൂപവും മാറി. നവീന ശാഖകള്‍ വന്നു. അവയില്‍ പലതും ഉയര്‍ന്ന  തൊഴില്‍സാധ്യതകളുള്ളവയാണ്

മെഡിക്കല്‍ ഇലക്ട്രോണിക്‌സ്

ഹൈടെക് ആസ്പത്രികള്‍ കൂണുകള്‍പോലെ പൊട്ടിമുളയ്ക്കുന്നു. ആസ്പത്രികളെ ചികിത്സാരംഗത്ത് മുന്‍പന്തിയിലെത്തിക്കുന്നതില്‍ അവര്‍ ഉപയോഗിക്കുന്ന ഉപകരണങ്ങള്‍ക്കും പങ്കുണ്ട്. ഇവിടെയാണ് മെഡിക്കല്‍ ഇലക്ട്രോണിക്‌സ് പ്രൊഫഷണലിന്റെ തൊഴില്‍സാധ്യത തെളിയുന്നത്. ചികിത്സാ ഉപകരണങ്ങളുടെ സാങ്കേതികവിദ്യകള്‍ പഠിക്കുകയും അവ പ്രവര്‍ത്തിപ്പിക്കുകയും ചെയ്യുന്ന ഒരു വിഭാഗമാണ് മെഡിക്കല്‍ ഇലക്ട്രോണിക്‌സ് എന്‍ജിനീയര്‍മാര്‍.

പഠനകേന്ദ്രങ്ങള്‍

1. ശ്രീ ബെലിമാതാ മഹാ സഹംസ്ഥാന ഇന്‍സ്റ്റിറ്റ്യൂട്ട് ഓഫ് ടെക്‌നോളജി 
2. ദയാനന്ദസാഗര്‍ കോളേജ് ഓഫ് എന്‍ജിനീയറിങ്, ബെംഗളൂരു
3. എം.എസ്. രാമയ്യ ഇന്‍സ്റ്റിറ്റ്യൂട്ട് ഓഫ് ടെക്‌നോളജി ബെംഗളൂരു

പെയിന്റ് ടെക്‌നോളജി

പെയിന്റ് നിര്‍മാണത്തില്‍ ഉപയോഗിക്കുന്ന വിവിധ പോളിമറുകളെക്കുറിച്ചും ഘടകപദാര്‍ഥങ്ങളെക്കുറിച്ചുമൊക്കെ പഠിക്കുന്ന എന്‍ജിനീയറിങ് വിഭാഗം. കെമിസ്ട്രിയില്‍ താത്പര്യമുള്ളവര്‍ക്ക് ഇണങ്ങുന്ന പഠനമേഖല. പെയിന്റ് ടെക്‌നോളജിയില്‍ ബി.ടെക്., എം.ടെക്. കോഴ്‌സുകള്‍ ഉണ്ട്.

പഠനകേന്ദ്രങ്ങള്‍
1. ഹാര്‍കോര്‍ട്ട് ബട്‌ലര്‍ ടെക്‌നോളജിക്കല്‍ ഇന്‍സ്റ്റിറ്റ്യൂട്ട്, കാണ്‍പുര്‍.
2. ഉത്തര്‍പ്രദേശ് സാങ്കേതിക സര്‍വകലാശാല.

ഫാര്‍മസ്യൂട്ടിക്കല്‍ എന്‍ജിനീയറിങ്

മാരകരോഗങ്ങള്‍ക്ക് ഫലപ്രദമായ മരുന്നുകള്‍ കണ്ടെത്താന്‍ യത്‌നിക്കുന്ന വിഭാഗമാണ് ഫാര്‍മസ്യൂട്ടിക്കല്‍ എന്‍ജിനീയറിങ്. കുറഞ്ഞ ചെലവില്‍ മികച്ച ഫലമുണ്ടാക്കാന്‍ കഴിയുന്ന മരുന്നുകള്‍ കണ്ടെത്താന്‍ ഇവര്‍ ഗവേഷണം നടത്തുന്നു. മികച്ച തൊഴില്‍സാധ്യതയാണ് ഫാര്‍മസ്യൂട്ടിക്കല്‍ എന്‍ജിനീയര്‍മാര്‍ക്കുള്ളത്.

പഠനകേന്ദ്രങ്ങള്‍

1. ഭാരതീദാസന്‍ ഇന്‍സ്റ്റിറ്റ്യൂട്ട് ഓഫ് എന്‍ജിനീയറിങ് ആന്‍ഡ് ടെക്‌നോളജി
2. ധര്‍മജ് ഫാര്‍മസി കോളേജ്, ആനന്ദ്.

പെട്രോളിയം എന്‍ജിനീയറിങ്

പെട്രോളിയം വസ്തുക്കളുടെ നിര്‍മാണവുമായി ബന്ധപ്പെട്ട എന്‍ജിനീയറിങ് വിഭാഗമാണിത്. പെട്രോളിയവും പ്രകൃതിവാതകവും ഖനനം ചെയ്‌തെടുത്ത് അവയെ പലഘടകങ്ങളായി വേര്‍തിരിച്ചാണ് നാം ഉപയോഗിക്കുന്നത്. ലാഭകരമായരീതിയില്‍ പെട്രോളിയം ഖനനം നടത്തി സംസ്‌കരിക്കുന്നതില്‍ പെട്രോളിയം എന്‍ജിനീയര്‍മാര്‍ വഹിക്കുന്ന പങ്ക് വളരെ വലുതാണ്.

ഗള്‍ഫ് രാജ്യങ്ങളില്‍ ഒട്ടേറെ തൊഴില്‍സാധ്യതകള്‍ തുറക്കുന്ന ഒരു കോഴ്‌സാണിത്. ഐ.ഐ.ടി.കള്‍ ഉള്‍പ്പെടെ പല സ്ഥാപനങ്ങളും പെട്രോളിയം എന്‍ജിനീയറിങ്ങില്‍ എം.ടെക്. കോഴ്‌സ് നടത്തുന്നുണ്ട്. ഇതിനായി പ്രത്യേകം ഒരു സര്‍വകലാശാലയുമുണ്ട്.

വിലാസം: Universtiy of Pteroleum and energy Studies, Bindholi, Prem Nagar, Dehradun, Uttarakhand -248007. www.upes.ac.i

പോളിമര്‍ എന്‍ജിനീയറിങ്

പോളിമര്‍ പദാര്‍ഥങ്ങളുടെ നിര്‍മാണം, ഗവേഷണം, രൂപകല്പന എന്നിവയാണ് പോളിമര്‍ എന്‍ജിനീയറിങ്ങിന്റെ അടിസ്ഥാനം. നാമുപയോഗിക്കുന്നവയില്‍ പലതും പോളിമര്‍ വസ്തുക്കളാണ്. അതുകൊണ്ടുതന്നെ ഈ മേഖലയില്‍ ഒട്ടേറെ തൊഴിലവസരങ്ങളുണ്ട്. കൊച്ചിന്‍ യൂണിവേഴ്‌സിറ്റിയില്‍ ഈ കോഴ്‌സുണ്ട് (www.cusat.ac.in)

പഠനകേന്ദ്രങ്ങള്‍
1. ക്രസന്റ് എന്‍ജിനീയറിങ് കോളേജ്, ചെന്നൈ.
2. ഹിന്ദുസ്ഥാന്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആന്‍ഡ് സയന്‍സ്, ചെന്നൈ.
3. അമൃത ഇന്‍സ്റ്റിറ്റ്യൂട്ട് ഓഫ് ടെക്‌നോളജി, കോയമ്പത്തൂര്‍.4. ഐ.ഐ.ടി., ഡല്‍ഹി.
4. ഡിപ്പാര്‍ട്ട്‌മെന്റ് ഓഫ് പോളിമര്‍ സയന്‍സ് ആന്‍ഡ് ടെക്‌നോളജി, കൊല്‍ക്കത്ത.

റബ്ബര്‍ ടെക്‌നോളജി

റബ്ബറിനെ ഉപയോഗപ്രദമായ വസ്തുക്കളാക്കിമാറ്റുന്ന വ്യവസായങ്ങളിലൊക്കെ റബ്ബര്‍ ടെക്‌നോളജിസ്റ്റുകള്‍ ഉണ്ടാകും. കൃത്രിമ റബ്ബറില്‍ ഗവേഷണം നടത്താനും ഈ എന്‍ജിനീയറിങ് ശാഖ സഹായിക്കുന്നു. കൊച്ചിന്‍ യൂണിവേഴ്‌സിറ്റി ഓഫ് സയന്‍സ് ആന്‍ഡ് ടെക്‌നോളജിയില്‍ ബി.ടെക്. റബ്ബര്‍ ടെക്‌നോളജി കോഴ്‌സ് നടത്തുന്നുണ്ട്. മഹാത്മാഗാന്ധി സര്‍വകലാശാലയിലും റബ്ബര്‍ ടെക്‌നോളജി കോഴ്‌സുണ്ട്.

പഠനകേന്ദ്രങ്ങള്‍
1. ഗുജറാത്ത് സര്‍വകലാശാല, അഹമ്മദാബാദ്.
2. അണ്ണാ യൂണിവേഴ്‌സിറ്റി, ചെന്നൈ.

ലെതര്‍ ടെക്‌നോളജി

തുകല്‍ സംസ്‌കരണവും അതുവഴി വ്യവസായവും വളര്‍ന്നപ്പോള്‍ ഉണ്ടായ എന്‍ജിനീയറിങ് ശാഖയാണ് ലെതര്‍ ടെക്‌നോളജി. തുകല്‍ സംസ്‌കരണം, നിറംകൊടുക്കല്‍, അവയുടെ ഉപയോഗസാധ്യതകളെക്കുറിച്ചുള്ള പഠനം എന്നിവയെല്ലാം അടങ്ങുന്നതാണ് ഈ കോഴ്‌സ്.

പഠനകേന്ദ്രങ്ങള്‍
1. ഗവ. കോളേജ് ഓഫ് എന്‍ജിനീയറിങ് ആന്‍ഡ് ലെതര്‍ ടെക്‌നോളജി, വെസ്റ്റ് ബംഗാള്‍ യൂണിവേഴ്‌സിറ്റി, കൊല്‍ക്കത്ത.
2. ഹാര്‍കോര്‍ട്ട് ബട്ട്‌ലര്‍ ടെക്‌നോളജിക്കല്‍ ഇന്‍സ്റ്റിറ്റ്യൂട്ട്, കാണ്‍പുര്‍.
3. കോളേജ് ഓഫ് ലെതര്‍ ടെക്‌നോളജി, യൂണിവേഴ്‌സിറ്റി ഓഫ് കൊല്‍ക്കത്ത.
4. സെന്‍ട്രല്‍ ലെതര്‍ റിസര്‍ച്ച് ഇന്‍സ്റ്റിറ്റ്യൂട്ട്, അഡയാര്‍

പള്‍പ്പ് ആന്‍ഡ് പേപ്പര്‍ ടെക്‌നോളജി

കടലാസ് നിര്‍മാണ മേഖലയുമായി ബന്ധപ്പെട്ട എന്‍ജിനീയറിങ് ശാഖയാണിത്. പേപ്പര്‍വ്യവസായത്തിന്റെ എല്ലാ മേഖലകളെയും ഈ കോഴ്‌സ് സ്പര്‍ശിക്കുന്നു. പേപ്പര്‍നിര്‍മാണ ഉപകരണങ്ങളുടെ നിര്‍മാണം, രാസപദാര്‍ഥങ്ങളുടെ ഉപയോഗം, പള്‍പ്നിര്‍മാണം തുടങ്ങിയ വിഷയങ്ങളാണ് പഠനപരിധിയില്‍ വരിക.

പഠനകേന്ദ്രങ്ങള്‍
1. ഇന്‍സ്റ്റിറ്റ്യൂട്ട് ഓഫ് പേപ്പര്‍ ടെക്‌നോളജി, ഉത്തര്‍പ്രദേശ്
2. ഐ.ഐ.ടി. റൂര്‍ക്കി.
3. ലക്ഷ്മിനാരായണ്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി, മഹാരാഷ്ട്ര.

ഷുഗര്‍ ടെക്‌നോളജി

പഞ്ചസാരനിര്‍മാണവുമായി ബന്ധപ്പെട്ട എന്‍ജിനീയറിങ് ആണിത്. ഇതിനുവേണ്ട ഉപകരണങ്ങളുടെ പ്രവര്‍ത്തനം, ഏകോപനം, വിവിധ മേഖലകളിലെ പഞ്ചസാരയുടെ ഉപയോഗം തുടങ്ങിയവയും നിര്‍മാണത്തിനുവേണ്ട സാങ്കേതികവിദ്യയുടെ വികസനവുമെല്ലാം പഠനത്തിന്റെ ഭാഗമാണ്. പഞ്ചാബിലെ ഗുരുനാനാക്ക് ദേവ് യൂണിവേഴ്‌സിറ്റി, മഹാരാഷ്ട്രയിലെ എന്‍.ഡി.എ.വി.പി. സമാജ് കോളേജ് ഓഫ് എന്‍ജിനീയറിങ് എന്നിവിടങ്ങളില്‍ ഷുഗര്‍ ടെക്‌നോളജി പഠിക്കാം.

പവര്‍ ഇലക്ട്രോണിക്‌സ്

പുത്തന്‍ സാങ്കേതികവിദ്യയുടെ സഹായത്തോടെ വൈദ്യുതിയുടെ സാധ്യതകളെയാണ് പവര്‍ ഇലക്ട്രോണിക്‌സില്‍ പഠനവിഷയമാക്കുന്നത്. കേരളത്തിലെ വിവിധ സര്‍ക്കാര്‍സ്വാശ്രയ എന്‍ജിനീയറിങ് കോളേജുകളില്‍ എം.ടെക്. കോഴ്‌സുണ്ട്.

പഠനകേന്ദ്രങ്ങള്‍
1. ഗുരു ജമ്പേശ്വര്‍ യൂണിവേഴ്‌സിറ്റി ഓഫ് സയന്‍സ് ആന്‍ഡ് ടെക്‌നോളജി, ഹരിയാണ
2. അണ്ണാ യൂണിവേഴ്‌സിറ്റി, ചെന്നൈ

സില്‍ക്ക് ടെക്‌നോളജി

പട്ടുനൂല്‍പ്പുഴുക്കളെ ഉപയോഗിച്ച് നൂല്‍ ഉണ്ടാക്കുന്നതു മുതല്‍ പട്ടുവസ്ത്രനിര്‍മാണം വരെയുള്ള കാര്യങ്ങളാണ് സില്‍ക്ക് ടെക്‌നോളജിയില്‍ പഠിക്കാനുള്ളത്. ചൈനയിലാണ് ഈ കോഴ്‌സിന് ഏറെ പ്രചാരമുള്ളത്. പട്ടുവസ്ത്ര നിര്‍മാണരംഗത്തേക്ക് പ്രവേശിക്കാന്‍ ഈ കോഴ്‌സ് ഉപകാരപ്രദമാണ്. ബെംഗളൂരുവിലുള്ള ഗവ. എസ്.കെ.എസ്.ജെ. ടെക്‌നോളജിക്കല്‍ ഇന്‍സ്റ്റിറ്റ്യൂട്ടില്‍ ബി.ടെക്. കോഴ്‌സ് നടത്തുന്നുണ്ട്.

സ്ട്രക്ചറല്‍ എന്‍ജിനീയറിങ്

സിവില്‍ എന്‍ജിനീയറിങ്ങുമായി ചേര്‍ന്നുവരുന്ന ഒരു എന്‍ജിനീയറിങ്. വലിയ കെട്ടിടങ്ങളുടെ നിര്‍മാണഘടന തയ്യാറാക്കുന്നതുമുതല്‍ ആസ്പത്രി ഉപകരണങ്ങളുടെ രൂപകല്പനവരെ സ്ട്രക്ചറല്‍ എന്‍ജിനീയറുടെ സാധ്യതകളിലുണ്ട്. ഖരഗ്പുരിലുള്ള ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി, തമിഴ്‌നാട്ടിലെ വെല്ലൂര്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി എന്നിവ സ്ട്രക്ചറല്‍ എന്‍ജിനീയറിങ് കോഴ്‌സ് നടത്തുന്നുണ്ട്.

ഇലക്ട്രോണിക്‌സ് ആന്‍ഡ് കണ്‍ട്രോള്‍ സിസ്റ്റം എന്‍ജിനീയറിങ്

ഇലക്ട്രോണിക് നിയന്ത്രണ സംവിധാനങ്ങളുടെ പ്രവര്‍ത്തനവുമായി ബന്ധപ്പെട്ടു കിടക്കുന്ന എന്‍ജിനീയറിങ് ആണിത്. ഇലക്ട്രോണിക്‌സിന്റെ ആപ്ലിക്കേഷനാണ് പ്രധാനമായും ഈ കോഴ്‌സില്‍ വരുന്നത്. റഡാറുകള്‍, വിദൂരനിയന്ത്രണ സംവിധാനങ്ങള്‍ തുടങ്ങിയ ഉപകരണങ്ങളുടെയെല്ലാം സാങ്കേതികവിദ്യ വികസിപ്പിക്കുകയും അത്തരം ഉപകരണങ്ങള്‍ നിര്‍മിക്കുകയും ചെയ്യുന്നതില്‍ ഈ വിഭാഗത്തിന് പങ്കുണ്ട്.

പഠനകേന്ദ്രങ്ങള്‍

1. എച്ച്.എം.ആര്‍. ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആന്‍ഡ് മാനേജ്‌മെന്റ്, ന്യൂഡല്‍ഹി.
2. മഹാരാജ സൂരജ്മാള്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി, ന്യൂഡല്‍ഹി.
3. നോര്‍ത്തേണ്‍ ഇന്ത്യ എന്‍ജിനീയറിങ് കോളേജ്, ന്യൂഡല്‍ഹി.
4. അംബേദ്കര്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി, ന്യൂഡല്‍ഹി.

ഇലക്ട്രോണിക്‌സ് ആന്‍ഡ് ടെലികമ്യൂണിക്കേഷന്‍ എന്‍ജിനീയറിങ്

ടെലികമ്യൂണിക്കേഷനും ഇലക്ട്രോണിക്‌സും ചേര്‍ന്നുവരുന്ന എന്‍ജിനീയറിങ് ആണിത്.

പഠനകേന്ദ്രങ്ങള്‍

1. ഗുരു തേജ് ബഹാദൂര്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി, ന്യൂഡല്‍ഹി.
2. മഹാരാജ അഗ്രാസെന്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി, ന്യൂഡല്‍ഹി.
3. ഫാക്കല്‍ട്ടി ഓഫ് എന്‍ജിനീയറിങ് ആന്‍ഡ് ടെക്‌നോളജി, ജാമിഅ മില്ലിയ്യ ഇസ്ലാമിയ യൂണിവേഴ്‌സിറ്റി, ന്യൂഡല്‍ഹി.

അഗ്രി ഇന്‍ഫോര്‍മാറ്റിക്‌സ് എന്‍ജിനീയറിങ്

അഗ്രിക്കള്‍ച്ചറും ഇന്‍ഫോര്‍മാറ്റിക്‌സും ചേര്‍ന്നുവരുന്ന എന്‍ജിനീയറിങ് ആണിത്. കാര്‍ഷികരംഗത്തെ വിവരശേഖരണവും അതുവഴി കൃഷിയുടെ വികസനവുമെല്ലാമാണ് പഠനമേഖലകള്‍. മീററ്റിലെ ശോഭിത് യൂണിവേഴ്‌സിറ്റിയാണ് അഗ്രി ഇന്‍ഫര്‍മാറ്റിക്‌സ് എന്‍ജിനീയറിങ്ങില്‍ കോഴ്‌സ് നടത്തുന്ന പ്രമുഖ സ്ഥാപനം.

മെക്കാട്രോണിക്‌സ്

വിമാനം, ഷിപ്പിങ് കമ്പനികള്‍, ഐ.ടി., ബയോമെഡിക്കല്‍, റോബോട്ടിക്‌സ്, നാനോടെക്‌നോളജി തുടങ്ങിയ നിരവധി മേഖലകളില്‍ തൊഴില്‍സാധ്യതയുള്ള കോഴ്‌സാണ് മെക്കാട്രോണിക്‌സ്. മെക്കാനിക്കല്‍, ഇലക്ട്രോണിക്‌സ്, ഇലക്ട്രിക്കല്‍ എന്‍ജിനീയറിങ് ശാഖകള്‍ സംയോജിപ്പിച്ചുണ്ടായതാണ് മെക്കാട്രോണിക്‌സ്. കണക്കിലും സയന്‍സിലും 50 ശതമാനം മാര്‍ക്കോടെ പ്ലസ്ടു ജയിച്ചവര്‍ക്ക് ബി.ടെക്. കോഴ്‌സിന് അപേക്ഷിക്കാം. കോഴിക്കോട് എന്‍.ഐ.ടി.യില്‍ ചില ബി.ടെക്. കോഴ്‌സുകളില്‍ മെക്കാട്രോണിക്‌സ് പഠിപ്പിക്കുന്നുണ്ട്.

നെട്ടൂര്‍ ടെക്‌നിക്കല്‍ ട്രെയിനിങ് ഫൗണ്ടേഷന്റെ കോയമ്പത്തൂര്‍, ധര്‍വാഡ്, തൂത്തുക്കുടി, ജംഷേദ്പുര്‍, ഗോപാല്‍പുര്‍ (ഒഡിഷ) സെന്ററുകളില്‍ മെക്കാട്രോണിക്‌സില്‍ മൂന്നുവര്‍ഷ ഡിപ്ലോമ കോഴ്‌സ് നടത്തുന്നുണ്ട്. കൂടുതല്‍ വിവരങ്ങള്‍ക്ക് www.frg.com. ഈറോഡിലെ കൊങു എന്‍ജിനീയറിങ് കോളേജ് (www.kongu.ac.in), മധുരയിലെ ത്യാഗരാജര്‍ കോളേജ് ഓഫ് എന്‍ജിനീയറിങ് (www.tce.edu),  മണിപ്പാല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി (www.manipal.edu) മദ്രാസ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി (www.mitindia.edu) എന്നിവിടങ്ങളില്‍ മെക്കാട്രോണിക്‌സില്‍ ബി.ഇ., എം.ഇ. കോഴ്‌സുകളുണ്ട്. വെല്ലൂര്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി (www.vit.ac.in) മെക്കാട്രോണിക്‌സില്‍ എം.ടെക്. കോഴ്‌സ് നടത്തുന്നുണ്ട്.

റോബോട്ടിക്‌സ് ആന്‍ഡ് ആര്‍ട്ടിഫിഷല്‍ ഇന്റലിജന്‍സ് എന്‍ജിനീയറിങ്

മനുഷ്യന് കടന്നുചെല്ലാന്‍പറ്റാത്ത മേഖലകളില്‍ ജോലിചെയ്യാനും മാനുഷികപ്രയത്‌നം കുറയ്ക്കാനും റോബോട്ടുകളെ ഉപയോഗിക്കുന്നു.  ഇവയ്ക്ക് കൃത്രിമബുദ്ധിയും ചിന്താശേഷിയും നല്‍കാനാണ് ഗവേഷകരുടെ ശ്രമം.
റോബോട്ടുകളുടെ നിര്‍മാണം, ഉപയോഗം, അവയുടെ നിയന്ത്രണം, അവയുമായി ബന്ധപ്പെട്ട സോഫ്ട്വെയര്‍ ഗവേഷണം എന്നിവയാണ് ഈ വിഭാഗത്തിലെ പ്രധാന പഠനമേഖലകള്‍. സാധാരണയായി മെക്കാനിക്കല്‍, ഇലക്ട്രിക്കല്‍, ഇലക്ട്രോണിക്‌സ്, കമ്പ്യൂട്ടര്‍ സയന്‍സ്, ഇന്‍സ്ട്രുമെന്റേഷന്‍ എന്നിവയില്‍ ബിരുദം നേടിയതിനുശേഷമാണ് റോബോട്ടിക്‌സില്‍ ഉപരിപഠനത്തിന് അവസരം ലഭിക്കുക.

പഠനകേന്ദ്രങ്ങള്‍:

1. ഐ.ഐ.ടി. കാണ്‍പുര്‍. 2. നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്നോളജി, ഹൈദരാബാദ് 3. ശ്രീ സത്യസായി ഇന്‍സ്റ്റിറ്റ്യൂട്ട് ഓഫ് ഹയര്‍ലേണിങ്, തമിഴ്നാട് 4. ബിര്‍ള ഇന്‍സ്റ്റിറ്റ്യൂട്ട് ഓഫ് ടെക്നോളജി ആന്‍ഡ് സയന്‍സ്, പിലാനി 5. പി.എസ്.ജി. കോളേജ് ഓഫ് ടെക്‌നോളജി, കോയമ്പത്തൂര്‍

ബയോമെഡിക്കല്‍ എന്‍ജിനീയറിങ്

എന്‍ജിനീയറിങ് വിദ്യയെ വൈദ്യശാസ്ത്രവുമായി കോര്‍ത്തിണക്കി മരുന്നുഗവേഷണം, നിര്‍മാണം, രോഗചികിത്സ എന്നീ രംഗങ്ങളില്‍ മുന്നേറ്റം സൃഷ്ടിക്കുന്ന കോഴ്സാണിത്. ഒട്ടേറെ  തൊഴില്‍സാധ്യതകളാണ് ബയോമെഡിക്കല്‍ എന്‍ജിനീയറിങ് തുറന്നുതരുന്നത്.

പഠനകേന്ദ്രങ്ങള്‍: 1. യൂണിവേഴ്സിറ്റി കോളേജ് ഓഫ് എന്‍ജിനീയറിങ്, ഉസ്മാനിയ സര്‍വകലാശാല  2. എന്‍.ഐ.ടി. റൂര്‍ഖേല, റായ്പുര്‍. 3. കോളേജ് ഓഫ് എന്‍ജിനീയറിങ്, ബെലഗാവി. 4. മണിപ്പാല്‍ ഇന്‍സ്റ്റിറ്റ്യൂട്ട് ഓഫ് ടെക്നോളജി, കര്‍ണാടക 5. ഐ.ഐ.ടി.കളിലും എം.ടെക് ബയോ മെഡിക്കല്‍ എന്‍ജിനീയറിങ് കോഴ്സ് നടത്തുന്നുണ്ട്.

സെറാമിക് എന്‍ജിനീയറിങ്

സെറാമിക് പദാര്‍ഥങ്ങളുടെ നിര്‍മാണം, രൂപകല്പന, ഉപയോഗം എന്നിവയിലുള്ള പഠനമാണ് സെറാമിക് എന്‍ജിനീയറിങ്. സെറാമിക് പദാര്‍ഥങ്ങളുടെ ഉപയോഗമേഖലകള്‍ കണ്ടെത്തുന്നതിനും നിലനില്‍ക്കുന്നവയെ മാറ്റിസ്ഥാപിക്കുന്നതിനും പുതിയവ കണ്ടെത്തുന്നതിനുമൊക്കെയുള്ള ഗവേഷണം ഇതിന്റെ ഭാഗമാണ്.

പഠനകേന്ദ്രങ്ങള്‍:

1. കോളേജ് ഓഫ് സെറാമിക് ടെക്നോളജി, കൊല്‍ക്കത്ത 2. ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് സെറാമിക്‌സ്, കൊല്‍ക്കത്ത 3. യൂണിവേഴ്സിറ്റി കോളേജ് ഓഫ് സയന്‍സ് ആന്‍ഡ് ടെക്നോളജി, കൊല്‍ക്കത്ത 4. ബനാറസ് ഹിന്ദു യൂണിവേഴ്സിറ്റി 5. എന്‍.ഐ.ടി. റൂര്‍ഖേല.

കണ്‍സ്ട്രക്ഷന്‍ എന്‍ജിനീയറിങ്

നിര്‍മാണമേഖലയുമായി ബന്ധപ്പെട്ടുകിടക്കുന്ന പഠനശാഖയാണിത്. ഹൈവേകള്‍, പാലങ്ങള്‍, വിമാനത്താവളങ്ങള്‍, റെയില്‍പ്പാതകള്‍, വമ്പന്‍ കെട്ടിടങ്ങള്‍, ഡാമുകള്‍ തുടങ്ങിയവയുടെയൊക്കെ രൂപകല്പനയും നിര്‍മാണനിയന്ത്രണവുമൊക്കെ ഇതില്‍ ഉള്‍പ്പെടുന്നു. ഗുണമേന്മ നിര്‍ണയം, പ്‌ളാനിങ്, സുരക്ഷാസാങ്കേതികവിദ്യ തുടങ്ങിയവയും കണ്‍സ്ട്രക്ഷന്‍ എന്‍ജിനീയറിങ്ങില്‍ ഉള്‍പ്പെടുന്നു.

പഠനകേന്ദ്രങ്ങള്‍:

1. സെന്റര്‍ ഫോര്‍ എന്‍വയണ്‍മെന്റ് പ്‌ളാനിങ് ആന്‍ഡ് ടെക്നോളജി, അഹമ്മദാബാദ് 2. മഹാരാഷ്ട്ര ഇന്‍സ്റ്റിറ്റ്യൂട്ട് ഓഫ് ടെക്നോളജി, പുണെ.

അക്വാകള്‍ച്ചര്‍ എന്‍ജിനീയറിങ്

മത്സ്യങ്ങള്‍, മറ്റ് ജലജീവികള്‍ എന്നിവയുമായി ബന്ധപ്പെട്ടുകിടക്കുന്ന പഠനശാഖയാണ് അക്വാകള്‍ച്ചര്‍ എന്‍ജിനീയറിങ്. മത്സ്യഗവേഷണ കേന്ദ്രങ്ങളിലും സീഫുഡ് മേഖലയിലുമൊക്കെ ഒട്ടേറെ തൊഴില്‍സാധ്യതകളാണ് ഈ കോഴ്സ് തുറന്നുവെക്കുന്നത്.

പഠനകേന്ദ്രങ്ങള്‍:

എറണാകുളം ജില്ലയിലെ ഫിഷറീസ് സര്‍വകലാശാലയില്‍ എം.എസ്സി. (അക്വാകള്‍ച്ചര്‍) ഉണ്ട്. അണ്ണാമലൈ സര്‍വകലാശാല, ചിദംബരം, ആന്ധ്രാ സര്‍വകലാശാല, വിശാഖപട്ടണം എന്നിവ അക്വാകള്‍ച്ചര്‍ എന്‍ജിനീയറിങ്ങില്‍ കോഴ്സുകള്‍ നടത്തുന്ന സ്ഥാപനങ്ങളാണ്.

ഫൈബര്‍ ടെക്നോളജി / ജൂട്ട് ടെക്നോളജി

കൃത്രിമനാരുകളുടെ നിര്‍മാണം, ഉപയോഗം എന്നിവയിലൊക്കെ ഗവേഷണം നടത്തുന്ന എന്‍ജിനീയറിങ് വിഭാഗമാണിത്. കൃത്രിമതലമുടിയും മറ്റും ഈ ഗവേഷണങ്ങളുടെ ഫലമായി പലരൂപത്തിലും ഗുണമേന്മയിലും പുറത്തിറങ്ങിയിട്ടുണ്ട്. പഠനകേന്ദ്രങ്ങള്‍: 1. ഇന്‍സ്റ്റിറ്റ്യൂട്ട് ഓഫ് ജൂട്ട് ടെക്നോളജി, കൊല്‍ക്കത്ത 2. സെന്‍ട്രല്‍ ടെക്സ്‌റ്റൈല്‍ ഇന്‍സ്റ്റിറ്റ്യൂട്ട്, കാണ്‍പുര്‍ 3. പശ്ചിമബംഗാള്‍ യൂണിവേഴ്സിറ്റി ഓഫ് ടെക്നോളജി, കൊല്‍ക്കത്ത.

കെമിക്കല്‍ ആന്‍ഡ് ഇലക്ട്രോ കെമിക്കല്‍ എന്‍ജിനീയറിങ്

കെമിസ്ട്രിയും എന്‍ജിനീയറിങ്ങും ഒത്തുചേരുന്ന പഠനമേഖലയാണിത്. വൈദ്യുതി ഉപയോഗിച്ചുള്ള ഇലക്ട്രോ പ്ലേറ്റിങ്, ഫ്യൂവല്‍ സെല്ലുകളുടെ നിര്‍മാണം തുടങ്ങിയ മേഖലകളിലാണ് പഠനം.

പഠനകേന്ദ്രങ്ങള്‍:

1.എ.സി. കോളേജ് ഓഫ് എന്‍ജിനീയറിങ് ആന്‍ഡ് ടെക്നോളജി, ചെന്നൈ. 2. സെന്‍ട്രല്‍ ഇലക്ട്രോ കെമിക്കല്‍ റിസര്‍ച്ച് ഇന്‍സ്റ്റിറ്റ്യൂട്ട്, ചെന്നൈ. 3. യൂണിവേഴ്സിറ്റി ഓഫ് പെട്രോളിയം ആന്‍ഡ് എനര്‍ജി സ്റ്റഡീസ്, ഉത്തരാഖണ്ഡ്.

പവര്‍ എന്‍ജിനീയറിങ്

ഊര്‍ജമേഖലയിലെ മാനവശേഷി വികസനവും പരിശീലനവുമാണ് പവര്‍ എന്‍ജിനീയറിങ് കോഴ്സിലെ പ്രധാന പ്രതിപാദ്യം.

പഠനകേന്ദ്രങ്ങള്‍:

പവര്‍ എന്‍ജിനീയറിങ് രംഗത്തെ പ്രധാന സ്ഥാപനമാണ് ഫരീദാബാദിലുള്ള നാഷണല്‍ പവര്‍ ട്രെയിനിങ് ഇന്‍സ്റ്റിറ്റ്യൂട്ട്. ദുര്‍ഗാപുര്‍, ബഡാപുര്‍, ന്യൂഡല്‍ഹി, നാഗ്പുര്‍, ഗുവാഹാട്ടി, ബെംഗളൂരു എന്നിവിടങ്ങളിലെ സെന്ററുകളിലും ഈ കോഴ്സ് നടത്തുന്നു.

എയ്റോ സ്‌പേസ് എന്‍ജിനീയറിങ്:

വിമാനങ്ങള്‍, ബഹിരാകാശ വാഹനങ്ങള്‍, റോക്കറ്റുകള്‍ എന്നിവയുമായി ബന്ധപ്പെട്ട സാങ്കേതികവിദ്യകള്‍ വികസിപ്പിക്കുന്ന ശാസ്ത്രശാഖയാണിത്.

പഠനകേന്ദ്രങ്ങള്‍:
1. ഐ.ഐ.ടി., ഗൊരഖ്പുര്‍ 
2. ഐ.ഐ.ടി. മുംബൈ 
3. ഐ.ഐ.ടി. കാണ്‍പുര്‍ 
4. ഐ.ഐ.ടി. ചെന്നൈ

എയ്റോനോട്ടിക്കല്‍ എന്‍ജിനീയറിങ്

വിമാനങ്ങളുടെയും മറ്റ് ആകാശ വാഹനങ്ങളുടെയും നിര്‍മാണത്തിലെ എന്‍ജിനീയറിങ്ങാണ് എയ്റോേനാട്ടിക്കല്‍ എന്‍ജിനീയര്‍മാര്‍ ശ്രദ്ധിക്കുന്നത്. രൂപകല്പന, നിര്‍മാണം, പ്രവര്‍ത്തനം എന്നിവയെല്ലാം എയ്റോനോട്ടിക്കല്‍ എന്‍ജിനീയറിങ്ങില്‍ വരുന്നു.

പഠനകേന്ദ്രങ്ങള്‍:

1.ഐ.ഐ.ടി. ഗൊരഖ്പുര്‍ 
2. ഐ.ഐ.ടി. കാണ്‍പുര്‍ 
3 ഐ.ഐ.ടി. മുംബൈ 
4. ഐ.ഐ.ടി. ചെന്നൈ 
5. ഇന്‍സ്റ്റിറ്റ്യൂട്ട് ഓഫ് എയ്റോനോട്ടിക്കല്‍ ആന്‍ഡ് മറൈന്‍ എന്‍ജിനീയറിങ് െബംഗളൂരു
6. ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് എയ്റോനോട്ടിക്കല്‍ എന്‍ജിനീയറിങ് ഡെറാഡൂണ്‍

എന്‍വയണ്‍മെന്റല്‍ എന്‍ജിനീയറിങ്

വിവിധ സാങ്കേതികവിദ്യകളുപയോഗിച്ച് ജലം, വായു, മണ്ണ് തുടങ്ങിയവയിലെ മലിനീകരണം കുറയ്ക്കുക, ശബ്ദമലിനീകരണം ചെറുക്കുക എന്നിവയിലാണ് എന്‍വയണ്‍മെന്റല്‍ എന്‍ജിനീയര്‍മാര്‍ ശ്രദ്ധിക്കുന്നത്.

പഠനകേന്ദ്രങ്ങള്‍:
1. പി.ഇ.എസ്. കോളേജ് ഓഫ് എന്‍ജിനീയറിങ്, മാണ്ഡ്യ, കര്‍ണാടക 
2. ഗവ. ബി.ഡി.ടി. കോളേജ് ഓഫ് എന്‍ജിനീയറിങ്, കര്‍ണാടക 
3. ബര്‍ക്കത്തുള്ള യൂണിവേഴ്സിറ്റി ഭോപ്പാല്‍.

മറൈന്‍ എന്‍ജിനീയറിങ്

കപ്പലുകളുമായി ബന്ധപ്പെട്ട കാര്യങ്ങളാണ് മറൈന്‍ എന്‍ജിനീയറിങ്ങില്‍ വരുന്നത്. കപ്പലിന്റെ പ്രൊപ്പലര്‍, മറ്റ് യന്ത്രഭാഗങ്ങള്‍ എന്നിവയുടെ നിര്‍മാണവുമായി ബന്ധപ്പെട്ട പഠനമാണിത്. ചെന്നൈ ഇത്തരം പഠനങ്ങള്‍ക്കുള്ള ഒരു കേന്ദ്രമാണ്.

1. ഇന്ത്യന്‍ മാരിടൈം യൂണിവേഴ്സിറ്റി, ചെന്നൈ
2. ഐ.ഐ.ടി., മുംബൈ
3. ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് എയ്റോനോട്ടിക്കല്‍ എന്‍ജിനീയറിങ്, ഡെറാഡൂണ്‍.
4. ഷിപ്പ്യാര്‍ഡ് ഇന്‍ഡസ്ട്രി സൊസൈറ്റി ഓഫ് ഗോവന്‍ ഇന്‍സ്റ്റിറ്റ്യൂട്ട് ഓഫ് മാരിടൈം സ്റ്റഡീസ്, ഗോവ
5. ആര്‍.എന്‍. ഇന്‍സ്റ്റിറ്റ്യൂട്ട് ഓഫ് നോട്ടിക്കല്‍ സയന്‍സ്, തമിഴ്നാട്
6.മുഹമ്മദ് സാദക് എന്‍ജിനീയറിങ് കോളേജ്, തമിഴ്നാട്.
7. കോളേജ് ഓഫ് എന്‍ജിനീയറിങ്, കിലാകാരി, തമിഴ്നാട്.

കടപ്പാട് : ജലീഷ് പീറ്റര്‍ ,കാലടി ശ്രീശങ്കര സംസ്‌കൃത
സര്‍വകലാശാല പി.ആര്‍.ഒ