অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

ലഘു യന്ത്രങ്ങള്‍

ലഘു യന്ത്രങ്ങള്‍

കൈയുറ

കാര്‍ഷിക പ്രവര്‍ത്തനങ്ങള്‍ക്കിടയില്‍ കൈപ്പത്തികളുടെ സുരക്ഷിതത്വത്തിനും സൗന്ദര്യരക്ഷയ്ക്കും വേണ്ടിയാണ് കൈയുറകള്‍ ധരിക്കുന്നത്. പലതരത്തിലും കനത്തിലുമുള്ള കൈയുറകളുണ്ടെങ്കിലും കൃഷിപ്പണികള്‍ക്കിറങ്ങുമ്പോള്‍ മുട്ടോളമെത്തുന്ന കൈയുറകള്‍ ധരിക്കുന്നതാണ് നല്ലത്. റോസ് പോലെ മുള്ളുള്ള ചെടികള്‍ക്കിടയില്‍ ജോലികള്‍ ചെയ്യുമ്പോള്‍ കൈകള്‍ സുരക്ഷിതമായിരിക്കുന്നതിനും കൈത്തണ്ടയില്‍ വെയിലേല്‍ക്കുന്നതു തടയുന്നതിനും ഇത്തരം കൈയുറകള്‍ക്കു സാധിക്കും.

പ്രോട്രേ

വിത്തുകള്‍ വേരുപിടിപ്പിച്ചെടുക്കുന്നതിനുള്ള തട്ടമാണിത്. ചെറിയ അറകളോടു കൂടിയ ഇത്തരം തട്ടങ്ങളില്‍ സംസ്കരിച്ച ചകരിരിച്ചോറു നിറച്ച് അതിനുള്ളില്‍ ഓരോ വിത്തു വീതം നടാം. കാരറ്റ്, കാബേജ്, ബീറ്റ്റൂട്ട്, കോളിഫ്ളവര്‍ തുടങ്ങി തീരെ ചെറിയ വിത്തുകള്‍ നടുന്നതിനാണ് തുടക്കത്തില്‍ ഉപയോഗിച്ചിരുന്നത്. നഴ്സറിത്തടങ്ങളില്‍ നട്ടതിനു ശേഷം പിഴുതെടുത്ത് തോട്ടത്തില്‍ നടുന്ന പച്ചക്കറികളായ വഴുതിന, മുളക്, ചീര തുടങ്ങിയവയുടെ നടീലിന് പിന്നീട് ഉപയോഗിക്കാന്‍ തുടങ്ങി ഇപ്പോള്‍ ഏതിനം പച്ചക്കറിയും വേരുപിടിപ്പിക്കുന്നതിന് പ്രോട്രേകള്‍ ഉപയോഗിച്ചുവരുന്നു. സൗകര്യപൂര്‍വം എവിടേക്കും വിത്തുകള്‍ കൊണ്ടുപോകുന്നതിനു സാധിക്കുമെന്നതാണ് ഇവയുടെ മെച്ചം.

തൂമ്പ

കൃഷിയുടെ ഏറ്റവും അടിസ്ഥാന ഉപകരണം. കിളച്ച് മണ്ണിളക്കുന്നതിനു മുതല്‍ മണ്ണിനെ തട്ടി നിരപ്പാക്കുന്നതിനു വരെ ഉപയോഗിക്കുന്നു. തൂമ്പ എന്നു സാധാരണ പറയുന്നത് അടുക്കളത്തോട്ടത്തിലെ ഉപയോഗത്തിന് വലിയ തൂമ്പകള്‍ ആവശ്യമില്ല. ചെറിയ ഇനം തൂമ്പകള്‍ വിപണിയില്‍ കിട്ടും. ഇത്തരം തൂമ്പകള്‍ക്ക് അമ്പതു രൂപയ്ക്കടുത്ത് വിലയാകുമ്പോള്‍ വലിയ തൂമ്പകള്‍ക്ക് ഇരുനൂറു രൂപയ്ക്കു മേല്‍ വിലവരും. കാര്‍ഷികോപകരണങ്ങള്‍ വില്‍ക്കുന്ന കടകളിലും ഇരുമ്പുകടകളിലും ലഭിക്കും. ഇംഗ്ലീഷ് നാമം സ്പേഡ്. വലിയ തൂമ്പ തന്നെ പലയിനമുണ്ട്. മണ്ണ് ഉടയ്ക്കുന്നതിനും നിരത്തുന്നതിനും കളയെടുക്കുന്നതിനുമുപയോഗിക്കുന്ന പരന്ന വായ്ത്തലയോടു കൂടിയ തൂമ്പയാണ് മണ്‍വെട്ടി (മമ്മട്ടി). മലയാളത്തിലെ 'റ' എന്ന അക്ഷരത്തിനു സമാനമായ രീതിയില്‍ കൈപ്പിടിയും മൂര്‍ച്ചയുള്ള ഭാഗവും ക്രമീകരിച്ചിരിക്കുന്നത് കൂന്താലി എന്നയിനം തൂമ്പയിലാണ്.

മണ്ണിളക്കി

തൂമ്പകൊണ്ട് കിളച്ചിളക്കിയ മണ്ണ് കട്ടയുടച്ച് കല്ലും വേരുമൊക്കെ മാറ്റുന്നതിന് ഉപയോഗിക്കുന്ന ഉപകരണമാണിത്. തൂമ്പയുടെ കാര്യത്തിലെന്ന പോലെ മണ്ണിളക്കിയുടെ കാര്യത്തിലും വലുതും ചെറുതുമായ ഇനങ്ങളുണ്ട്. വലിയ ഇനത്തിലുള്ളവ വീട്ടുവളപ്പിലെ കൃഷിക്ക് ആവശ്യമായി വരും. നീളമുള്ള കൈപ്പിടിയുടെ ഒരു അഗ്രത്തില്‍ അകന്ന പല്ലുകളുളള ചീപ്പുപോലെയുള്ള ഭാഗം ഉറപ്പിച്ചിരിക്കുന്നതാണ് വലിയ മണ്ണിളക്കി. ചെറിയ കൈപ്പിടിയും അതിന്‍റെ അഗ്രത്തിലായി മൂന്നോ നാലോ പല്ലുകളുള്ള ഭാഗവുമാണ് ചെറിയ മണ്ണിളക്കിക്കുള്ളത്. ഇതിന് അമ്പതു രൂപയ്ക്കടുത്ത് വിലയാകുമ്പോള്‍ വലിയതിന് ഇരുനൂറു രൂപയ്ക്കു മേല്‍ വിലയാകും. ഇംഗ്ലീഷ് നാമം ഗാര്‍ഡന്‍ റേക്ക്.

മുപ്പല്ലി

പേരു സൂചിപ്പിക്കുന്നതു പോലെ മൂന്നു പല്ലുകളാണ് ഇവയ്ക്കുള്ളത്. ചെടിയുടെ ചുവട്ടില്‍ വളമിട്ടുകൊടുക്കുന്നതിനാണ് പ്രധാനമായും ഉപയോഗിക്കുന്നത്. തൂമ്പയുടെ കാര്യത്തിലെന്ന പോലെ ഇതിലും വലിയ ഇനവും ചെറിയ ഇനവുമുണ്ട്. വലിയ ഇനത്തിന് തൂമ്പക്കൈക്കൊപ്പം നീളമുള്ള ഹാന്‍ഡിലാണുള്ളത്. തീന്‍മേശയിലെ ഫോര്‍ക്കിനോടാണ് ഇതിനു സാമ്യം. മണ്ണില്‍ ആഞ്ഞു കുത്തുമ്പോള്‍ പല്ലുപോലെയുള്ള ഭാഗം മണ്ണിലേക്ക് താഴ്ന്നിറങ്ങുന്നു. ഉപയോഗിക്കുന്നയാള്‍ സ്വന്തം നെഞ്ചോട് ഇതിന്‍റെ പിടി അടുപ്പിക്കുമ്പോള്‍ മുപ്പല്ലിയുടെ പല്ലിനും മണ്ണിനുമിടയില്‍ കുറച്ചു സ്ഥലം ലഭിക്കുന്നു. അവിടേക്ക് വളമിട്ടുകൊടുക്കാം. അടുക്കളത്തോട്ടത്തിനുള്ള ചെറിയ മുപ്പല്ലിയില്‍ ചെറിയൊരു കൈപ്പിടിയും മൂന്നു പല്ലുകളുമാണുള്ളത്. ഉപയോഗം വലിയ മുപ്പല്ലിയുടെ അതേ രീതിയില്‍ തന്നെ. മണ്ണിലേക്ക് കുത്തിയിറക്കുക. അതിനു ശേഷം മുന്നിലേക്ക് അല്പം അടുപ്പിക്കുക. അപ്പോള്‍ ലഭിക്കുന്ന വിടവിലേക്ക് വളവും മറ്റും നിക്ഷേപിക്കുക. ഇംഗ്ലീഷ് നാമം ഗാര്‍ഡന്‍ ഫോര്‍ക്ക്

ഫ്ളെക്സിബിള്‍ ഹോസ്

സാധാരണയായി തോട്ടത്തിലും മറ്റും ഉപയോഗിക്കുന്ന പച്ചനിറത്തിലും നീലനിറത്തിലുമൊക്കെയുള്ള പൈപ്പുകളാണിവ. എങ്ങനെ വേണമെങ്കിലും ചുരുട്ടിയെടുക്കാവുന്നതിനാലാണ് ഇവയെ ഫ്ളെക്സിബിള്‍ ഹോസ് എന്നു വിളിക്കുന്നത്. ദൂരെയെവിടെയെങ്കിലുമുള്ള പൈപ്പ്ലൈനില്‍ നിന്നോ ടാപ്പില്‍ നിന്നോ വിളകളുടെ ചുവട്ടില്‍ വെള്ളമെത്തിക്കുന്നതിനാണ് ഇതുപയോഗിക്കുന്നത്. ഇതിന്‍റെ അഗ്രഭാഗത്തായി വ്യത്യസ്ത രീതിയിലുള്ള ഗാര്‍ഡന്‍ സ്പ്രേയര്‍ ഘടിപ്പിച്ചാണുപയോഗിക്കുന്നത്.

പൂവാലി

പേരു സൂചിപ്പിക്കുന്നതു പോലെ പൂച്ചെടികളുടെ ചുവട്ടില്‍ വെള്ളമൊഴിക്കുന്നതിനുള്ള വാലിപ്പാത്രമാണിവ. നീണ്ട കഴുത്തും അതിനഗ്രത്ത് പൂപോലെ വെള്ളം ചിതറി വീഴുന്നതിനുള്ള അഗ്രഭാഗവും ഉണ്ടായിരിക്കും. ഇത് ഉറപ്പിച്ചിരിക്കുന്നത് അഞ്ചോ പത്തോ ലിറ്റര്‍ വെള്ളം കൊള്ളുന്ന പാത്രത്തിലാണ്. ഇതിനു തൂക്കിയെടുക്കാന്‍ സഹായിക്കുന്ന കൈപ്പിടിയുമുണ്ട്. ഹോസില്‍ നിന്നു സ്പ്രേയറിലൂടെ വെള്ളം വീഴുന്നതിന് ശക്തിയിലാണെങ്കില്‍ പൂവാലിയില്‍ നിന്നു വെള്ളം വീഴുന്നത് നേര്‍മയിലായിരിക്കും. അതിനാല്‍ ചെടിക്ക് ക്ഷതമേല്‍ക്കുന്നില്ല. ഇംഗ്ലീഷ് നാമം റോസ്ക്യാന്‍

തളിനന സഹായി

അടുക്കളത്തോട്ടത്തില്‍ ഒരു പ്രദേശം ഒന്നാകെ നനയ്ക്കുന്നതിന് ഈ യന്ത്രം ഉപയോഗിക്കുന്നു. പേരു സൂചിപ്പിക്കുന്നതു പോലെ തളിക്കുന്ന രീതിയില്‍ വെള്ളം വീഴുന്നതിനാണ് ഇതു സഹായിക്കുന്നത്. മൂന്നോ നാലോ വിരല്‍ പോലെയുള്ള ഭാഗങ്ങള്‍ പൈപ്പിന്‍റെ അഗ്രത്തില്‍ ഉറപ്പിച്ചിരിക്കുന്നതാണ് ഇതിന്‍റെ ഘടന. ഇത്തരം ഭാഗങ്ങളിലൂടെയാണ് വെള്ളം പുറത്തേക്കു വരുന്നത്. വെള്ളത്തിന്‍റെ മര്‍ദം വരുമ്പോള്‍ വിരല്‍ പോലെയുള്ള ഭാഗം വൃത്താകൃതിയില്‍ കറങ്ങുന്നു. അപ്പോള്‍ ഒരു പ്രദേശമാകെ വെള്ളം ചീറ്റിവീണ് നനയുന്നു. അടുത്തടുത്തായി പല വിളകള്‍ നട്ടിരിക്കുന്ന അടുക്കളത്തോട്ടത്തില്‍ നനയ്ക്കുന്നതിന് ഇത് ഏറെ സഹായകരമാണ്. ഇംഗ്ലീഷ് നാമം വാട്ടര്‍ സ്പ്രിംഗ്ളര്‍

വേലിക്കത്രിക

പേരു സൂചിപ്പിക്കുന്നതു പോലെ ഇത് ഒരിനം കത്രികയാണ്. സാധാരണ കത്രികയില്‍ നിന്നുള്ള വ്യത്യാസം ഇതിന്‍റെ വായ്ത്തലഭാഗത്തിനും കൈപ്പിടി ഭാഗത്തിനും ഏറക്കുറേ തുല്യമായ നീളമായിരിക്കും. കൈപ്പിടി ഇരു കൈകളിലുമായി പിടിച്ചാണ് ഇതു പ്രവര്‍ത്തിപ്പിക്കുന്നത്. വേലിച്ചെടികളും മറ്റും വെട്ടിനിര്‍ത്തുന്നതിനാണ് ഇതുപയോഗിക്കുന്നത്. ഇതിന്‍റെ കരുത്തുകൂടിയ ഇനങ്ങള്‍ മരങ്ങളുടെ കമ്പുമുറിക്കുന്നതിനു പോലും ഉപയോഗിക്കാം. ഇംഗ്ലീഷ് നാമം ഗാര്‍ഡന്‍ ഷിയേഴ്സ്

ഖുര്‍പി

കെട്ടിടം നിര്‍മാണത്തില്‍ കല്ലാശാരിമാര്‍ ഉപയോഗിക്കുന്ന കരണ്ടിക്കു സമാനമായ ഉപകരണമാണിത്. പലവിധ കാര്യങ്ങള്‍ക്ക് ഇത് ഒരേപോലെ ഉപയോഗിക്കുന്നതിനു സാധിക്കും. മണ്ണിലെ പുല്ല് കൊത്തിമാറ്റുന്നതിന് മേല്‍മണ്ണ് ഇളക്കുന്നതിനുമാണ് സാധാരണയായി ഉപയോഗിക്കുന്നത്.

ഹാന്‍ഡ് സ്പ്രേയര്‍

അടുക്കളത്തോട്ടത്തില്‍ ഒരിക്കലും വലിയ സ്പ്രേയറുകള്‍ ആവശ്യമില്ല. ചെടികളുടെ ഇലകളില്‍ ദ്രാവകവളവും ജൈവകീടനാശിനികളുമൊക്കെ തളിച്ചു കൊടുക്കുന്നതിനാണ് സ്പ്രേയറുകള്‍ ആവശ്യമായി വരുന്നത്. വളരെ ഒതുക്കമുള്ള സ്പ്രേയറുകള്‍ കടകളില്‍ വാങ്ങാന്‍ കിട്ടും. മഗ്ഗിലോ മറ്റേതെങ്കിലും പ്ലാസ്റ്റിക് പാത്രത്തിലോ മിശ്രണം ചെയ്ത വളം അല്ലെങ്കില്‍ കീടനാശിനി ഇത്തരം സ്പ്രേയറിലാക്കി തളിക്കാനെടുക്കാം.

കത്തികള്‍

മൂന്നിനം കത്തികള്‍ അടുക്കളത്തോട്ടത്തിലെയും വീട്ടുവളപ്പിലെയും ജോലികള്‍ക്ക് സാധാരണയായി ഉപയോഗിക്കാറുണ്ട്. ഒന്നാമത്തേത് വെട്ടുകത്തിയെന്നും മടാക്കത്തിയെന്നും വിളിക്കുന്ന വലിയ വാക്കത്തികളാണ്. ബലമുള്ള കമ്പുകളും തടിയും മറ്റും വെട്ടിമുറിക്കുന്നതിനാണ് ഇവ ഉപയോഗിക്കുന്നത്. കളയെടുക്കുന്നതിനും മറ്റുമായി കൊയ്ത്തരവാളിന്‍റെ ആകൃതിയിലുള്ള രണ്ടാമതൊരു കത്തിയും കൂടിയേ തീരൂ. പച്ചക്കറികള്‍ വിളവെടുക്കുന്നതിന് ഉപയോഗിക്കുന്ന ചെറിയ മടക്കുപിച്ചാത്തിയും നല്ലതാണ്. ഇതിനു പകരം ചെറിയ മേശക്കത്തിയായാലും മതി.

ഇളക്കുകമ്പികള്‍

ഇംഗ്ലീഷില്‍ ക്രോബാര്‍ എന്നു വിളിക്കുന്ന ഇളക്കുകമ്പികള്‍ അപൂര്‍വമായിട്ടാണെങ്കിലും കൃഷിയില്‍ ആവശ്യമായി വരും. അലവാങ്ക്, കുത്തുകമ്പി എന്നിങ്ങനെ രണ്ടിനത്തിനാണ് ഏറ്റവുമധികം ഉപയോഗമുള്ളത്.

സീക്കേച്ചര്‍

വീട്ടുവളപ്പിലെ കൃഷിയിലും അടുക്കളത്തോട്ടത്തിലെ കൃഷിയിലും ഏറ്റവും ആവശ്യം വരുന്ന ഉപകരണങ്ങളിലൊന്നാണിത്. കത്രികയും ചവണയും തമ്മില്‍ സങ്കരം നടത്തിയാല്‍ എങ്ങനെയിരിക്കുമോ അതുപോലെയാണ് സീക്കേച്ചറിന്‍റെയും ഘടന. ചവണയ്ക്കുള്ളതുപോലെ രണ്ടു കൈപ്പിടികളുണ്ട്. ഇവ തമ്മില്‍ സാധാരണയായി അകന്നാണിരിക്കുന്നത്. വായ്ത്തലയുടെ ഭാഗം ചെറുതാണെങ്കിലും നല്ല മൂര്‍ച്ചയുണ്ട്. വായ്ത്തലകള്‍ക്കിടയില്‍ കമ്പോ തണ്ടോ എന്തും വച്ചുകൊടുത്തതിനുശേഷം കൈപ്പിടികളില്‍ ബലം കൊടുത്താല്‍ അവ മുറിഞ്ഞു കിട്ടും. സാമാന്യം വലുപ്പമുള്ള ശിഖരങ്ങള്‍ പോലും ഇങ്ങനെ മുറിക്കാം. ഇതിനായി സീക്കേച്ചര്‍ കൊണ്ട് അത്തരം ശാഖകളുടെ ചുറ്റിലുമായി വരയുക. അതിനു ശേഷം ഒടിച്ചെടുത്താക്കാന്‍ സാധിക്കും.

ഇരുതലയന്‍ കൈത്തൂമ്പ

തൂമ്പയുടെയും മുപ്പല്ലിയുടെയും ഉപയോഗം ഒരുപോലെ നടക്കുന്ന ഉപകരണമാണിത്. വീട്ടുവളപ്പിലെ കൃഷിക്കും തോട്ടത്തിലെ കൃഷിക്കുമൊന്നും ഇതുപയോഗിക്കാന്‍ സാധ്യമല്ല. അടുക്കളത്തോട്ടത്തിലെ കൃഷിയില്‍ എന്നാല്‍ ഏറെ സഹായകവുമാണ്. ഓരോ ചെടിയും നടുന്നതിനുള്ള ഭാഗം ഇതിന്‍റെ തൂമ്പപോലെയുള്ള ഭാഗം കൊത്തിക്കിളയ്ക്കുന്നതിനു സാധിക്കുന്നു. മുപ്പല്ലി പോലെയുള്ള ഭാഗം കൊണ്ട് കട്ടയും മറ്റും ഉടയ്ക്കുന്നതിനും സാധിക്കുന്നു. ഇംഗ്ലീഷ് നാമം ഡബിള്‍ പ്രോംഗ് ഹോ.

വാട്ടര്‍ നോസില്‍

നനയ്ക്കുന്നതിന് ഉപയോഗിക്കുന്നു. പ്രധാന ജലവിതരണ കുഴലിനോടോ ടാപ്പിനോടോ ചേര്‍ത്ത് ഇത്തരം നോസിലുകള്‍ ഉറപ്പിച്ച ചെറിയ കുഴലുകള്‍ ഘടിപ്പിച്ചാണ് കൃഷിയില്‍ ഉപയോഗിക്കുന്നത്. ഗാര്‍ഡന്‍ ഹോസ് എന്നുവിളിക്കുന്ന ഇത്തരം പൈപ്പുകളുടെ ഒരു അഗ്രം ടാപ്പിലും മറ്റേയറ്റം നോസിലിലും ഉറപ്പിക്കുകയാണ് ചെയ്യുന്നത്. വെള്ളം ചീറ്റിവീഴുകയോ പൂ പോലെ ചിതറി വീഴുകയോ ചെയ്യുന്നതിനുള്ള സൗകര്യം നല്ല നോസിലുകളിലെല്ലാമുണ്ട്. ഇവയുടെ കൈപ്പിടിയോടു ചേര്‍ന്ന് വെള്ളം പൂട്ടുന്നതിനും തുറക്കുന്നതിനുമുള്ള ഹാന്‍ഡിലുമുണ്ടായിരിക്കും.

അവസാനം പരിഷ്കരിച്ചത് : 3/3/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate