കേരളത്തിൽ പ്രചാരം നേടിയ ഉഷ്ണമേഖലാ ഇലക്കറിച്ചെടിയാണ് ചായ മൻസ. രുചികരവും പോഷക ഗുണങ്ങളും അടങ്ങിയ ഈ സസ്യം മരം പോലെ വളരുന്നതിനാൽ മരച്ചീരയെന്നും അറിയപ്പെടുന്നു. ഈ വൈവിധ്യ സസ്യം മെക്സിക്കോയിൽ ആണ് ഉതഭവിച്ചത്.അതിനാൽ മെക്സിക്കൻ ചീരയെന്നും മായന്മാരുടെ നിത്യാഹാരത്തിലും പാരമ്പര്യവൈദ്യത്തിലും ഉപയോഗിച്ചിരുന്നതിനാൽ മായൻ ചീരയെന്നും ഇതിന് പേരുണ്ട് . മരച്ചീനിയുടെ കുടുംബമായ യൂഫോർബിയേസിയേയിലെ അംഗമായ ഇതിപ്പോൾ ലോകമൊട്ടാകെ വ്യാപിച്ചിട്ടുണ്ട്. നിഡോസ് കോളസ് എന്നാണ് ചായ മൻസയുടെ ശാസ്ത്രീയ നാമം.
ഉപയോഗിക്കുന്ന രീതി
വളരെ വേഗം വളരുന്ന ഒരു കുറ്റിച്ചെടിയായ ചായ മൻസ ചീര ഉപയോഗിക്കുന്നതു പോലെ ഉപയോഗിക്കാം. മൂക്കാത്ത ഇലകളും ഇളന്തണ്ടുകളും ചെറുതായി നുറുക്കി ഇലക്കറിയായി ഉപയോഗിക്കാം. മരച്ചീനിയിലുള്ളതുപോലുള്ള വിഷമയമായ സയനോജനിക് ഗ്ലൈക്കോ സൈഡുകൾ അടങ്ങിയിട്ടുള്ളതിനാൽ 15 മിനിട്ട് വേവിച്ച ശേഷമേ ഉപയോഗിക്കാവൂ .വേവിക്കുമ്പോൾ ഈ വിഷഘടകങ്ങൾ ഹൈഡ്രജൻ സയനൈഡ് വാതകമായി പുറത്തുപോയി ഇല ഭക്ഷ്യയോഗ്യമാകും. ചായ മൻസ തോരൻ ,കട്ലറ്റ് ,പരുപ്പുകറി ,സൂപ്പ് എന്നിങ്ങനെ ചീര കൊണ്ടുണ്ടാക്കുന്ന എല്ലാ വിഭവങ്ങളും ഇതുകൊണ്ടുമുണ്ടാക്കാം. പച്ചയിലകളും ,ഉണക്കിയ ഇലകളും മാത്രമായോ ഇഷ്ടാനുസരണം ഗ്രീൻ റ്റീയും പുതിനയുമൊക്കെ ചോർത്തോ ഹെർബൽ റ്റീ യുമുണ്ടാക്കാം.
പോഷകഘടകങ്ങൾ
ഇതിൽ ധാരാളം ഭക്ഷ്യ നാരുകളും കാൽസ്യം ,പൊട്ടാസ്യം ,ഇരുമ്പ് മുതലായ അനേകം ധാതുകളും വൈറ്റമിൻ എ,ബി,സി എന്നിവയും കരോട്ടിനും നിരോക്സീ കാരികളും മാംസ്യവുമൊക്കെയുണ്ട്. പ്രമേഹം ,രക്താതിമർദ്ദം ,വിളർച്ച എന്നിവ പരിഹരിക്കാനും വൃക്ക രോഗങ്ങളും ഹൃദയസംബന്ധമായ രോഗങ്ങളും പ്രതിരോധി ക്കാനും കഴിയും. കൊളസ്റ്റ റോൾ ,ട്രൈഗ്ലിസറൈഡ് എന്നിവ കുറയ്ക്കും. കാഴ്ചശക്തി വർധിപ്പിക്കും .ദഹനം സുഗമമാക്കും.
നിത്യഹരിതമായി നിൽക്കുന്നതിനാൽ വേലിച്ചെടിയായി വളർത്താനും ഈ ചെടി അനുയോജ്യമാണ്.