অসমীয়া   বাংলা   बोड़ो   डोगरी   ગુજરાતી   ಕನ್ನಡ   كأشُر   कोंकणी   संथाली   মনিপুরি   नेपाली   ଓରିୟା   ਪੰਜਾਬੀ   संस्कृत   தமிழ்  తెలుగు   ردو

അഗ്രോപോറസ്ട്രി

വിവിധ തരം വാഴ കൃഷികള്‍

വിവിധതരം നേന്ത്രവാഴകള്‍

ചെങ്ങാലിക്കോടന്‍,നെടുനേന്ത്രന്‍,ആറ്റുനേന്ത്രന്‍, വാളിയേത്തന്‍, ചങ്ങനാശ്ശേരി നേന്ത്രന്‍, മഞ്ചേരിവാഴ, വലിയ മഞ്ചേരിവാഴ, പുളിയന്‍ വെട്ടി, മേട്ടുപാളയം, കാളിയേത്തന്‍, മിന്റോളി (ക്വിന്റല്‍ വാഴ) , സാന്‍സിബാര്‍, പെടലമൂഞ്ചില്‍, ഒറ്റമൂഞ്ചില്‍

ചെങ്ങാലിക്കോടന്‍

പത്തര പതിനൊന്നുമാസം മൂപ്പാണിതിന്. തുറസ്സായ ചെങ്കല്‍ കലര്‍ന്ന വെട്ടുകല്‍ ‍പ്രദേശങ്ങളാണ്  കൃഷിക്ക് ഏറ്റവും അനുയോജ്യമായ സ്ഥലം. തിരഞ്ഞെടുത്ത മാതൃവാഴയില്‍ നിന്നും ഇളക്കിയെടുത്ത മൂന്നരമാസം മൂപ്പുള്ള കന്നുകളാണ് നടീല്‍ വസ്തു. സാധാരണ സെപ്തംബര്‍, ഒക്ടോബര്‍ മാസങ്ങളില്‍ നടണം. വാഴകള്‍ തമ്മിലും വരികള്‍ തമ്മിലും രണ്ടര മീറ്റര്‍ അകലം നല്കി ചാലുകളെടുത്തോ 75 സെ. മീ. വീതം നീളവും വീതിയും ആഴവുമുള്ള കുഴികള്‍ എടുത്തോ ആണ് നടേണ്ടത്. ഏഴ്, ഏഴര മാസം മൂപ്പെത്തുമ്പോള്‍ വാഴ കുലക്കാന്‍ തുടങ്ങും.

നെടുനേന്ത്രന്‍

ചെങ്കല്‍ പ്രദേശങ്ങളില്‍ വിപുലമായി കൃഷിചെയ്യാവുന്ന ഈ ഇനത്തിന് 11 മാസം മൂപ്പുണ്ട്. നല്ല ഉയരത്തില്‍ വളരുന്ന ഇവക്ക് മൂപ്പെത്തിയാല്‍ നെടുകെ നീണ്ട് ഉരുണ്ടിരിക്കുന്ന കായകള്‍ മൂലമാണ് ഈ പേരുവന്നത്. ഇതിന്റെ പഴങ്ങള്‍ വളരെ സ്വാദിഷ്ഠമാണ്.

ആറ്റുനേന്ത്രന്‍
തീരപ്രദേശങ്ങളിലുള്ള അടയ്ക്കാതോട്ടങ്ങളിലും നെല്‍വയലുകളിലും കൃഷിചെയ്യാവുന്ന ഈ ഇനത്തിന് 12 മാസത്തിലേറെ മൂപ്പുണ്ട്. വണ്ണവും കരുത്തുമുള്ള വാഴത്തടയോടെ ഉയരത്തില്‍ വളരുന്ന ഈ വാഴകള്‍ക്ക് ഊന്നു നല്കണം. കായ്കള്‍ക്ക് നല്ല നീളവും വണ്ണവും എണ്ണവും ഉണ്ടായിരിക്കും.
ചങ്ങനാശ്ശേരി നേന്ത്രന്‍
മഴയെ മാത്രം ആശ്രയിച്ചു വളരുന്ന ഈയിനം വേനല്‍വാഴ, പൊടിവാഴ എന്ന പേരുകളിലും അറിയപ്പെടുന്നു. ഉയര്‍ന്ന കുന്നിന്‍ പ്രദേശങ്ങളിലും കൃഷിചെയ്യാവുന്ന ഇവ ഫെബ്രുവരി, മാര്‍ച്ച് മാസത്തില്‍ നടാം. ജനുവരി മാസത്തോടെ കുല വെട്ടാന്‍ പാകമാവും. വരള്‍ച്ചയെ പ്രതിരോധിക്കാന്‍ കഴിവുള്ള ഏകയിനം നേന്ത്രവാഴയാണിത്. മധുരവും രുചിയും കൂടുതലുള്ള പഴമാണിതിന്.
മഞ്ചേരിവാഴ / ചേറ്റുവാഴ
മുണ്ടകന്‍ നെല്‍വയലുകളില്‍ നെല്ല് കതിര് വരുമ്പോള്‍ നിശ്ചിത അകലത്തില്‍ വഴക്കന്നുക‍ള്‍ ചേറില്‍ ചവിട്ടിത്താഴ്ത്തിയാണ് ഈയിനം നടുന്നത്. അതുകൊണ്ട് ഇതിന് ചേറ്റുവാഴയെന്നും പേരുണ്ട്. കൊയ്ത്ത് കഴിഞ്ഞ് വൈക്കോല്‍ കുറ്റികളും ചേറും ചേര്‍ത്ത് ബണ്ടുകളുണ്ടാക്കി അതിനുള്ളില്‍ വളം ഇട്ടുകൊടുത്തു വളര്‍ത്താം. നല്ല രീതിയില്‍ നോക്കിയാല്‍ 9 മാസത്തിനുള്ളില്‍ കുല വെട്ടാം.
വലിയ മഞ്ചേരിവാഴ
ഇതിനെ കോട്ടയം വാഴയെന്നും പറയുന്നു. വയലുകളില്‍ തിട്ടെടുത്തു നടുന്ന നനവാഴയായി കൃഷിചെയ്യുന്നു. വാഴത്തടക്ക് കനംകുറവായ ഇതിന് 10 മാസം മൂപ്പുണ്ട്. ഇലകളുടെ അരികിലൂടെ ചുവന്നനിറം കാണാം.
പുളിയന്‍ വെട്ടി
കൊയമ്പത്തൂര്‍ ജില്ലയിലെ പുളിയവെട്ടി ഗ്രാമത്തില്‍ വിപുലമായി കൃഷിചെയ്യുന്ന നേന്ത്രന്‍ ഇനമാണിത്. ഇതിന്റെ കായ്കള്‍ക്ക് നമ്മുടെ നെടുനേന്ത്രന്‍ കായ്കളുടെ ഗുണമുണ്ട്. നെല്‍വയലുകളില്‍ നനവാഴയായി കൃഷിചെയ്യുന്ന ഇതിന് ഒമ്പതര മാസമാണ് വിളവ്.
മേട്ടുപാളയം
ആറ്റുനേന്ത്രന്‍ വാഴകള്‍ പോലെ വളരെ കരുത്തോടെ ഉയരത്തില്‍ വളരുന്ന ഈ വാഴയിനത്തിന്റെ കായ്കള്‍ക്ക് നല്ല വലുപ്പമുണ്ടാകും. കനംകൂടിയ തൊലിയോടുകൂടിയ പഴത്തിന്റെ ഉള്‍വശത്തിനു വെളുത്ത ചാരനിറമായിരിക്കും. നല്ല ഫലഭൂയിഷ്ഠമായ മണ്ണില്‍ കൂടുതല്‍ വിളവു ലഭിക്കും.
കാളിയേത്തന്‍
നെല്‍വയലുകളില്‍ വിപുലമായി കൃഷിചെയ്യുന്ന ഈ ഇനത്തിന് ഒമ്പതര മാസമാണ് മൂപ്പ്. നനവാഴക്കൃഷിക്ക് ഏറ്റവും അനുയോജ്യമാണ്. ഞെട്ടിനു ബലം കുറവായതിനാല്‍ കായ് മൂപ്പെത്തിപ്പഴുക്കുമ്പോള്‍ തൂങ്ങിക്കിടക്കാന്‍ ഇടയുള്ളതിനാല്‍ കടകളില്‍ തലകീഴായി തൂക്കിയിട്ടാണ് വില്പന നടത്തുന്നത്. പഴങ്ങളുടെ കാമ്പിന് കട്ടി കൂടുതലായിരിക്കും.
മിന്റോളി (ക്വിന്റല്‍ വാഴ)
ആഫ്രിക്കന്‍ നാടുകളില്‍ നിന്നുമുള്ള ജിയാന്റ് പ്ലാന്റെയിന്‍ എന്നയിനത്തില്‍ നിന്ന് ഉരുത്തിരിഞ്ഞതാണിത്. വലുപ്പം കൂടുതലുള്ള ഇതിന്റെ മൂപ്പ് 18 മാസമാണ്. ധാരാളം ജൈവവളം നല്കി കൃഷിചെയ്താല്‍ നല്ല വിളവെടുപ്പ് കിട്ടും. മേല്‍പടലകളിലെ കായ്കള്‍ പൂര്‍ണവലിപ്പം പ്രാപിക്കുമ്പോള്‍ അടിപടലകളിലെ കായ്കള്‍ ദശകൊണ്ടു നിറയാറില്ലെന്നതാണ് ഇതിന്റെ പ്രത്യേകത. കായ്കളുടെ തൊലിക്ക് കട്ടികൂടുതലായിരിക്കും. മാംസളമായ പഴത്തിന്റെ ദശയ്ക്ക് കട്ടി കുറവും വെളുത്ത നിറവുമാണ്. മൂപ്പത്തിയ കായ്കളുടെ തൊലിക്ക് 3 ഏണുകള്‍ ഉണ്ടായിരിക്കും.
സാന്‍സിബാര്‍
ഇതൊരു വിദേശയിനം വാഴയാണ്. ഹോണ്‍ പ്ലാന്റെയിന്‍ ഇനത്തില്‍ പെട്ട ഈ വാഴ കുലവരുമ്പോള്‍ രണ്ട് അല്ലെങ്കില്‍ മുന്ന് പടലകള്‍ മാത്രമെ ഉണ്ടാവുകയുള്ളൂ. അതിനുശേഷം കുടപ്പന്‍ ഉണ്ടാവുകയില്ല. ഓരോ കായ്ക്കും 35 മുതല്‍ 40 സെ.മീ. നീളവും അതിനൊത്ത വണ്ണവും ഉണ്ടാകും. കായ്കള്‍ ഉപ്പേരിയുണ്ടാക്കാന്‍ വളരെ നല്ലതാണ്.
പെടലമൂഞ്ചില്‍
കുലക്കുമ്പോള്‍ ഒരു പടലമാത്രവും പടലയില്‍ 3 മുതല്‍ 5 വരെ കായ്കളും മാത്രമുള്ള ഇത് ഒരു അപൂര്‍വ്വയിനം വാഴയാണ്. ഗവേഷണ ആവശ്യങ്ങള്‍ക്ക് മാത്രമായി നട്ടുവളര്‍ത്തുന്ന ഇനം എന്നതിലുപരി മറ്റു പ്രാധാന്യമില്ല.
ഒറ്റമൂഞ്ചില്‍
ഒരു വാഴക്കുലയില്‍ ഒരു പടലയും ഒരു കായും മാത്രമുള്ള അപൂര്‍വ്വയിനമാണിത്. കായക്ക് ഒരു കിലോഗ്രാം വരം തൂക്കം വരും
നേന്ത്രവാഴകൃഷി
പണ്ടു മുതല്‍‍ തന്നെ ഈകൃഷി തുടങ്ങിയിരുന്നു മറ്റു കൃഷികളെ പോലെ നേന്ത്രവാഴ കൃഷി പെട്ടെന്ന് നശിക്കുന്നില്ല. തുമ്പടപ്പ് തുടങ്ങിയ രോഗങ്ങള്‍ ഉണ്ടായാല്‍ പെട്ടെന്ന് നശിച്ച് പോകാന്‍ സാധ്യതയുണ്ട്. ഈ പഴത്തിന് കൂടുതല്‍ വലിപ്പവും സ്വാദുമുണ്ട്. നേന്ത്രവാഴ കൃഷികള്‍ ചെയ്യുന്നത് കൂടുതല്‍ പുരുഷന്മാരാണ്. നൂല്‍ ചാക്കില്‍ കെട്ടി വെച്ചാണ് ഈ പഴം പഴുപ്പിക്കുന്നത്. മൂപ്പെത്തിയ പഴം മൂന്നോ നാലോ ദിവസം വെച്ചാല്‍ വേഗത്തില്‍ പഴുക്കുന്നു.

വാഴകളെ ബാധിക്കുന്ന രോഗങ്ങള്‍

കൊക്കാന്‍ / ഇലപ്പേനുകള്‍. വൈറസ് രോഗമാണ് കൊക്കാന്‍. രോഗം ബാധിച്ച വാഴകളുടെ പുറംപോളയില്‍ അസാധാരണ ചുവപ്പുനിറം വരകളായി പ്രത്യക്ഷപ്പെടും. രോഗത്തിന്റെ രൂക്ഷതക്കനുസരിച്ച് ചുവപ്പുനിറം കൂടിവരും. രോഗം വന്ന വാഴ മിക്കവാറും കുലക്കുകയില്ല. വിത്തിനു രോഗമുണ്ടാകാതെ നോക്കുകയും രോഗം വന്നാല്‍ ചുവടോടെ നശിപ്പിക്കുകയുമാണ് ഇതിനെതിരെയുള്ള പ്രതിവിധി.

മൂടുചീയല്‍ - ബാക്ടീരിയ മൂലമുണ്ടാകുന്ന രോഗമാണിത്. രോഗം ബാധിച്ചാല്‍ വാഴയുടെ വളര്‍ച്ച മുരടിക്കും. ഇലകളില്‍ തവിട്ടുനിറത്തിലുള്ള പാടുകള്‍ ഉണ്ടാവുകയും പിന്നീട് ആ ഭാഗം ഉണങ്ങി നശിക്കുകയും ചെയ്യുന്നു. ഇതുതടയാനായി നനക്കാന്‍ വേണ്ടിയുള്ള ചാലുകളില്‍ ബ്ലീച്ചിങ്ങ് പൌഡര്‍ തുണിയില്‍ കിഴികെട്ടിയിട്ടാല്‍ മതി.

പനാമ രോഗം - കുമിളുകളുടെ ഫലമായി ഉണ്ടാകുന്ന രോഗമാണിത്. 5 മാസമായ വാഴകളിലാണ് രോഗം കണ്ടുവരുന്നത്. ഇലകളില്‍ മഞ്ഞ നിറത്തിലുള്ള വരകള്‍ പ്രത്യക്ഷപ്പെടുന്നു. അവ ഇലകള്‍ മുഴുവന്‍ വ്യാപിക്കുകയും ചെയ്യും. രോഗബാധിതമായ ചെടികളെ വേരോടെ പിഴുതു നശിപ്പിക്കുകകയും വേപ്പിന്റെ എണ്ണ,ഫൈറ്റൊലാന്‍ എന്നിവ ഉപയോഗിച്ചും രോഗനിയന്ത്രണം നടത്താം.

മഹാളി രോഗം - വാഴകളില്‍ കാണുന്ന വേറൊരു രോഗമാണ് മഹാളി. രോഗം പിടിപെട്ടാല്‍ തുരിശ്,ചുണ്ണാമ്പ് എന്നിവ കലക്കി തളിച്ചുകൊടുത്താല്‍ മതി. വാഴകളില്‍ എതെങ്കിലും കട്ടയിട്ടുണ്ടെങ്കില്‍ അവ വോരോടെ പിഴുതെടുക്കണം.

വിവിധതരം വാഴകള്‍.

നിവേദ്യവസ്തുക്കളില്‍ പ്രധാനമായ വാഴ കൃഷി ചെയ്താല്‍ ദേവകളുടെ അനുഗ്രഹം ഉണ്ടാകും. നിരവധിയിനം വാഴകള്‍ കേരളത്തിലുണ്ട്. സാമ്പത്തികനേട്ടം ഉദ്ദേശിച്ചു കൃഷി ചെയ്യുന്നവയുമുണ്ട്.

വാഴയില്‍ ഇനങ്ങള്‍ കൂടിയവിഭാഗം കദളിയാണ്. അണ്ണാന്‍, കണ്ണന്‍, വണ്ണന്‍, എന്നീ പേരുകളിലും ഇതറിയപ്പെടുന്നു. ആറ്റുകദളി (അണ്ണാന്‍, വിളനിരങ്ങി), രസകദളി (മധുരയണ്ണാന്‍, ഞാലിപ്പൂവന്‍), പൂങ്കദളി(മലണ്ണാന്‍), ചെങ്കദളി (കപ്പ), കറയണ്ണാന്‍ എന്നിങ്ങനെ പലതരമുണ്ട്. കദളിവാഴക്കു ദേവന്‍കദളി, പൂജാകദളി എന്നീ പേരുകളുമുണ്ട്. പേങ്കദളി, വിരൂപാക്ഷി എന്നീ പേരുകളുള്ള 'മട്ടി'യില്‍ പാണ്ടിമട്ടി, വെള്ളമട്ടി,ചെമന്നമട്ടി എന്നു മൂന്നിനങ്ങളുണ്ട്. വാളിമൊന്തന്‍ അഥവാ വലിയമൊന്തന്‍, പേമൊന്തന്‍, ചാമ്പമൊന്തന്‍ എന്നിവ വിവിധതരം മൊന്തന്‍ അഥവാ പൊന്തന്‍ വാഴകളാണ്. നേന്ത്രവാഴ (ഏത്തന്‍) . പാണ്ടി, നാടന്‍, കൂനൂര്‍, ചെങ്ങഴിയോടന്‍ എന്നിങ്ങനെ പലതരമുണ്ട്. പടറ്റി (നല്‍ച്ചിങ്ങന്‍) തമിഴ്നാട്ടുകാരനായ'പാളയംകോടന്‍ ' എന്നിവ വൈവിധ്യമില്ലാത്ത വര്‍ഗ്ഗങ്ങളാണ്. ഉള്ളില്‍ വലിയ വിത്തുകളുണ്ടാകുന്ന കല്ലുവാഴ സൂക്ഷിച്ചുവേണം കഴിക്കാന്‍. റോബസ്റ്റ, മോറിസ് അഥവാ കുഴിവാഴ, മണവും മധുരവുമുള്ള കര്‍പ്പൂരവല്ലി എന്നിങ്ങനെ നിരവധിയിനം വാഴകള്‍ കേരളത്തിലുണ്ട്. ശുദ്ധവും വൃത്തിയും വേണ്ട ദേവന്‍കദളിയുടെ ഫലത്തില്‍ സ്വര്‍ണ്ണത്തിന്റെ അംശമുണ്ട്. ഇതിന്റെ പഴം കഴിക്കുന്ന ദിവസം മുട്ട, മീന്‍, ഇറച്ചി തുടങ്ങിയ നിഷിദ്ധഭക്ഷണങ്ങള്‍ പാടില്ലെന്നും വിശ്വാസമുണ്ട്. ഇതിലെ ഒരേഒരു വൈദ്യന്‍കായ ദീര്‍ഘായുസ്സു നല്കും. പടറ്റിവാഴപ്പഴം, വസൂരി, മണ്ണന്‍, പൊക്കന്‍ തുടങ്ങിയവ ഉഷ്ണരോഗങ്ങള്‍ക്ക് ആശ്വാസകരമാണ്. വയറിലെ അമ്ലാധിക്യം (അസിഡിറ്റി) കാരണത്താല്‍ ബുദ്ധിമുട്ടുന്നവര്‍ക്ക് കഴിക്കാനാകുന്ന പഴങ്ങളാണ് രസകദളി,റോബസ്റ്റ, ചെങ്കദളി, അഥവാ കപ്പ എന്നിവ. നല്ലവണ്ണം പഴുത്തു കഴിഞ്ഞതിനുശേഷമല്ലാതെ കഴിച്ചാല്‍ കറയുടെ സ്വാദു മാറാത്ത വര്‍ഗ്ഗമാണു കറയണ്ണാന്‍. ആയുര്‍വേദത്തിലെ പഥ്യാഹാരത്തില്‍ ഉപയോഗിക്കാവുന്ന പച്ചക്കറികളില്‍ വാളിമൊന്തന്‍ പ്രധാനമാണ്. പടല മുഴുവന്‍ ഇറങ്ങിക്കഴിഞ്ഞശേഷം തനിയെതന്നെ കൂമ്പില്ലാതാകുന്ന കൂമ്പില്ലാ അണ്ണാന്‍ (കണ്ണന്‍) പൊതുവെ ദീര്‍ഘായുസ്സു നല്കുന്ന പഴമായി കരുതി വരുന്നു. മലബന്ധത്തിനുത്തമമായി പറയാറുള്ള പാളയന്‍ കോടന്‍ കഴിക്കുന്നതു നന്നല്ല,. ആറ്റു കദളി പഴം നല്ല മധുരവും ഉള്ളില്‍ മാവു തീരെയില്ലാത്ത വര്‍ഗ്ഗവുമാണ്. ഇലയ്ക്കായി നട്ടുവളര്‍ത്താവുന്ന ഈ വര്‍ഗ്ഗത്തിനു രോഗപ്രതിരോധശക്തി കൂടുതലുണ്ട്. ഒരു കായ മാത്രം ഫലിക്കുന്ന ഒറ്റക്കൊമ്പനെന്ന മൂങ്കിവാഴക്കു ഔഷധഗുണമേറും. ചെങ്കദളിയുടെ ഉള്ളില്‍ ഉലുവ നിറച്ചുവെച്ച ശേഷം കഴിച്ചാല്‍ രക്താതിസാരമുള്‍പെടെ മാറിക്കിട്ടും. മട്ടിപ്പഴം അടപ്രഥമനില്‍ ചേര്ത്താല്‍ രുചിയേറും. ഉണ്ണിയപ്പത്തിനെങ്കില്‍ മയമേറും. പഴമായികഴിച്ചാല്‍ ഏമ്പക്കം വിടുന്ന സമയം പുറത്തുവരുന്ന വായുവിനു ദുര്‍ഗന്ധമുണ്ടാവില്ല. കല്ലുവാഴയുടെ ഉള്ളില്‍ കാണുന്ന കല്ലിനു സമാനമായ വിത്തുകള്‍ക്ക് മൂത്രക്കല്ലിനെ അലിയിച്ചു കളയാനുള്ളശക്തിയുണ്ട്.

എല്ലാ ദിവസവും വ്യാഴം കേന്ദ്രീകരിച്ചുള്ള രാശി ഒഴിവാക്കി വാഴ കൃഷിചെയ്യുകയെന്നു കൃഷിഗീതപറയുന്നു.

'തോട്ടം തോറും വാഴ ദേശം തോറും ഭാഷ',

'ചവിട്ടിയ കന്നിനു ഇരട്ടിശക്തി',

'ഇല തൊടാഞ്ഞാല്‍ കുല മലയ്ക്കു മുട്ടും'

തുടങ്ങിയ ചൊല്ലുകള്‍ വാഴകൃഷിയില്‍ പ്രധാനമാണ്

വാഴകൃഷി

വാഴക്കൃഷി നടത്താന്‍ പ്രത്യേകിച്ച് സമയമില്ല. സാധാരണയായി കന്നി മാസത്തിലാണ് കന്നുകള്‍ നടുന്നത്. വാഴക്കന്ന് (വാഴവിത്ത്) തലയും വേരും വെട്ടിയിട്ട് വെണ്ണീര്‍ പൂശി വെയില്‍ കൊള്ളിക്കണം. 15ദിവസം കഴിഞ്ഞ് രണ്ടടി സമചതുരത്തില്‍ കുഴിയെടുത്ത് ആറടിവിട്ട് വേണം ഓരോ കന്നും നടാന്‍. നടുന്നതിനു മുമ്പായി കുഴിയില്‍ വെണ്ണീറ്, ആട്ടിന്‍കാഷ്ഠം, ചാണകം, പച്ചില എന്നിവയിടണം. ഒരുമാസം കഴിഞ്ഞ് തൂമ്പ് വരുമ്പോള്‍ ചുവട്ടില്‍  പച്ചിലത്തോല് വെട്ടിയിടണം. വേപ്പിന്‍ പിണ്ണാക്കും ചേര്‍ക്കണം. അതിനു മുകളില്‍ ചാരം, കോഴിക്കാഷ്ഠം വളപ്പൊടി എന്നിവ ഇടണം. 3 മാസം കൊണ്ട് വാഴ കുലക്കാന്‍ തുടങ്ങും. മൂന്ന് മാസം കഴിഞ്ഞാല്‍ രാസവളം ചേര്‍ക്കണം. മൂന്നു മാസം കൂടുമ്പോള്‍ മിക്സഡ് വളം ചേര്‍ക്കണം. ആറു മാസമാകുമ്പോള്‍ വാഴ കുലക്കാന്‍ തുടങ്ങുമ്പോള്‍ യൂറിയ, ഫാക്ടംഫോസ്, എന്നിവഇട്ടുകൊടുക്കണം. പത്ത് മാസമാകുമ്പോഴേക്കും കുല മൂപ്പാകും. രോഗങ്ങള്‍ ഒഴിവാക്കാന്‍ കീടനാശിനി ഉപയോഗിക്കണം.

നേന്ത്രവാഴകൃഷി

പണ്ടു മുതല്‍ തന്നെ തുടങ്ങിയിരുന്ന നേന്ത്രവാഴ കൃഷി മറ്റു കൃഷികളെ പോലെ പെട്ടെന്ന് നശിക്കുന്നില്ല. എന്നാല്‍ തൂമ്പടപ്പ് തുടങ്ങിയ രോഗങ്ങള്‍ ഉണ്ടായാല്‍ പെട്ടെന്ന് നശിച്ച് പോകാന്‍ സാധ്യതയുണ്ട്. നേന്ത്രവാഴകൃഷി ധാരാളം മണ്ണുള്ള പ്രദേശങ്ങളിലാണ് ചെയ്തുവരുന്നത്. പയര്‍, കപ്പ തുടങ്ങിയവ നേന്ത്രവാഴ കൃഷിയുടെ കൂടെ ചെയ്യാറുണ്ട്. വാഴക്കുല വെട്ടിയെടുത്തതിനു ശേഷം അതിന്റെ കന്ന് എടുത്ത് 4 ദിവസം ഉണക്കിയതിനുശേഷം വീണ്ടും കൃഷി ചെയ്യുന്നു. കാലഭേദമനുസരിച്ചല്ല ഈ കൃഷി ചെയ്യുന്നത്. വെള്ളം ലഭ്യമാണെങ്കില്‍ ഏത്കാലത്തും ചെയ്യാവുന്നതാണ്. ഈകൃഷിക്ക് കീടനാശിനികള്‍ ആവശ്യമാണ്, ചാണകപ്പൊടി, വെണ്ണീര്‍,പച്ചിലവളങ്ങള്‍ തുടങ്ങിയവ ഉപയോഗപ്രദമാണ്. ഏറ്റവും ചുരുങ്ങിയ ചെലവില്‍ ചെയ്യാവുന്ന നല്ലവിളവ് ലഭിക്കുന്ന ഒന്നാണ് നേന്ത്രവാഴ കൃഷി. വാഴപ്പഴത്തിന് നല്ല വലിപ്പവും സ്വാദുമാണ്. മൂപ്പെത്തിയ പഴംമൂന്നോ നാലോ ദിവസം വെച്ചാല്‍ വേഗത്തില്‍ പഴുക്കുന്നു. എല്ലാ ജില്ലകളിലും ഒട്ടനവധി കര്‍ഷകര്‍ നേന്ത്രവാഴ കൃഷിയില്‍ ഏര്‍പ്പെടുന്നുണ്ട്. ഓണം, വിഷു, തുടങ്ങിയ ആഘോഷളിലും നിരവധി വിവാഹ സദ്യവട്ടങ്ങളിലും നിറഞ്ഞു നില്ക്കുന്ന ഒന്നാണ് നേന്ത്രപ്പഴം. ചെറിയ കുട്ടികള്‍ക്ക് ലഘു ആഹാര പദാര്‍ഥമായിഇതുപയോഗിക്കുന്നു.

അവസാനം പരിഷ്കരിച്ചത് : 2/15/2020



© C–DAC.All content appearing on the vikaspedia portal is through collaborative effort of vikaspedia and its partners.We encourage you to use and share the content in a respectful and fair manner. Please leave all source links intact and adhere to applicable copyright and intellectual property guidelines and laws.
English to Hindi Transliterate